voliš ga (nju), a?

bit ćeš  sritna (sritan)

ako je sritan (sritna).

by XVII

kad je ješka ča je tribaš nadit na udicu vridnija o' ribe,

vrime je da prikineš ič u ribe.

afroamerička izreka, prilagođena na dalmatinski o' xvii

pozapodne na suncu by XVII

e, danas me je tokalo platit porez. to narafski radin s posebnin veseljen, pogotovo kad znan koje se sve mone i monade u ovoj bidnoj zemlji financiraju o' tih pinezi. di ću poza tega, a? a pravac bačvice, ajmo ča uvatit pinku sunca i rekuperat dušu, e...

e... ča bi život bija brez tih malih, sitnih radosti ča život znače, a? je mi ured lipo vonje ovih dana, super :o)

nagradno pitanje: koja je šterika užgana, narančaste oli zelene kolure, a?

zvonik sv. arnira by XVII - zanimljivo je da se ovi zvonik nikad nije naziva riči kampanel

e...

nikidan ja tako učin jednega momčića matematiku, a dica ka dica, kurjoži su, pitaju svašta. kad je finilo učenje matematike, počeja on sa menon pričat o splitu. posebno onon staron, onon ča je sa spliton jema veze. vidin ja da ga sve interesira, pričan sa njin, odgovaran mu ono ča znan. palo mu je na pamet da me pita:

 -  a sićate li se vi gusara, a?

- a na šta ti misliš, onega ča je bija na matejušku oli tamo di je bija diskač ča je iša u ariju, a?

- onega ča je bija na matejušku, e... svi stariji pričaju da je tot nekad bila ludilo zabava, đir pravi.

- en ti iruda, onda ja još uvik spadan u mlaje.  jerbo, momak moj, kad su meni bile tvoje godine, to ti je već bila jedna ruina. poslin je potaracalo to sve ča i nikoliko godin na ti mul nije bilo ništa. međutin, ako upitaš starije, je, oni će se s puno jubavi i nostalgije sitit tega mista. jemaš prav. tot je nekad bija đir, e... vengo, jeman ti ja jedan libar, pun litrati starega splita, zove se spli'ski memento, ajmo ča mrvu poćirit u njega, nekako mi se pari da tot jema jedan litrat gusara dok je još bija mladić. 

- znači ovo ti je iz 1927. kad je otvoren, e...

i blablabla, ćakulamo mi dalje dok jemamo volje.

u subotu pozapodne, poslin posla, učinin veliki đir oko merjana i vratit se doma priko matejuške. peškan litrate o' radova na matejušku. š njima ću ovod za one ča odavno nisu bili doma. sve ovo skupa notajen tek danas jerbo mi je vrime ovih dan bilo tanko, tokalo me radit i u nedilju, a i sad san u nikon konfužjunu i zaradi tega pomalo gren ča. morete ih uvećat klikon. pozdravljan lipo! 

e...

jubav. jubav između dvoje, baš ona između muškića i ženskice. eto ta. o njoj ću danas reč rič dvi. kažu da:

• kad je prava, ne triba ti višje niko. misliš samo na tu peršonu. želiš samo s ton peršonon bit. čin je drugovačije, odma znaš da nešto ne gre dobro. di je prava jubav nima mista za nekoga uljeza.  
• kad stvarno voliš nekoga, nećeš ga sputavat, vezivat. daš slobodu toj peršoni. narafski, vidit ćeš, ako i tebe ta peršona stvarno voli, jubav će je vratit tebi, neće opće jemat potribe da nigdi drugdi pođe.
• strefi te to sve skupa brez ikakvoga plana i programa, nisi se dobro njanci ošerva, a već si u jubavi. narafski, u njoj praštaš i opraštaš ako stvarno voliš. ego ti tot i ne igra baš prikovišje. 

mislin da jemaju prav tj. dobro kažu, ne lažu.

http://www.walter-fendt.de/

još jedan link za one željne učenja. kad se prolazi kroza stranicu more se nač i rvacka i ingleška verzija. jema odličnih simulacija, pogotovo matematika i fizika, jedino na računalu tribate jemat javu.

javu morete besplatno skinit s neta ovod:

http://www.java.com/en/

e... dica ka dica, uvik im nešto padne na pamet. evo šta su mi dica učinila ovih miseci. došli na poduke, (instrukcije, repeticije). iz matematike i fizike u zadnje vrime najviše. onda su rekli svojim kumpanjima da su bili u mene i da im je lipo objašnjeno. e, sad oče i njihovi kumapnji doč. roditelji zivkaju, ja to sve pomalo prihvaćan, radin, neka dice. broj učenika mi se tako ovih dana rapidno umnožija, pa san ovih dana najvišje u formulama. mora se, a kad se mora nije teško. prije je, na jesen, na poduke iša tek dil posla, sad je to dosta intezivno jer duraju ispravci negativnih ocjena po skulama. liti isto dosta oko tega radin.

evo jedan koristan link za sve ča uče fiziku:

http://sirius.phy.hr/SAMP/seminari/amir/SEMINAR2/index.html

ako na računalu jemate instaliranu javu, priko ovega linka morete naučit dosta o jednolikon gibanju, vozit tonobil, ubrzavat ga, crtat graf puta, brzine, akceleracije, naučit štagod o temu kako sila masi daje ubrzanje, simulirat slobodni pad i sl. dici se svidilo tutokompleto, pomoglo u učenju, a odrasli moredu štagod naučit oli štagod svatit na jedan nov i zanimljiv način.

ja svih, i dicu i odrasle peršone, učin učit s razumijevanjen; koriste se naši udžbenici, ali i zanimljiva strana literatura, internet i sl. trudin se, a najlipše je kad ti se za par miseci judi jave u gradu i kažu: fala van lipa, puno ste mi pomogli, proša san ispit oli beskrajno van fala, spasili ste mi ditetu godinu.

narafski, bavin se i kartušinon. danas je recimo svin radnicima tribalo potpisat šta im je isplaćeno u 2007., poslat im te izvještaje. u računovodstvu mi je danas oko ove i ostale kartušine prošlo nikoliko uri.

eto, danas posal, ovih dana posal, nikih glamuroznih događanja baš i nima, a apropo posla danas ćemo se zafalit:

- gospojama iz računovodstva ča vridno pripremaju svu katrušinu koju iz dana u dan tvrtka triba

- veterinarskoj ambulanti za male životinje bošnjak - split ča su platili brez ikakvih napominjanja račun i prije vrimena dospijeća - ovo je u današnje vrime za svaku pohvalu!

- svima kod kojih se danas kupovalo na ljubaznosti, poza ovakvih dana kad radin o' jutra do mraka, ne triba mi nervožast svit.

šta bi mogli još reč, a? evo, kad san notavanjen inđinjerstvu gren van priporučit i  jedan zanimljiv libar u elektronskom obliku na temu optimizacija stranica za tražilice, nikidan ga je moja malenkost pročitala, mislin da je ok napisan i da jema korisnih stvari.

http://www.posluh.hr/seo/seo4.pdf

ovih dan mi je baš priko posla i dice naletilo nešto zanimljivo o splitu, ali to će ovod arivat u jednemu o' idućih postova. do tad pozdravljan lipo!

e... ajmo ča reč o čemu se tot radi. njegovo veličanstvo Toč. jema i još jedno ime: Šug. zavest će vas mirison, očarat će vas okuson ako ga učinite jušto ovako kako ću notat. ovo vam je svitu moj iz kužine moje matere, a kako mater uvik kuva najbolje, onda narafski more bit samo dobro. nikako drugovačije. probajte!

za dvi peršone:

- 1 kapula (crveni luk) srednje veličine

- uje, biljno

- 2 šnicela, najbolje goveđa

- začini: oraščići. klinčići, papar, sol

- konšerva (koncentrat rajčice oli pome)

- crno vino

šnicele istuč baton s obje strane. uvaljat ih u brašno, pofrigat na malo biljnog uja u pršulu (tavu). 

kapulu isickat na male bokune, zažutit na biljno uje u teči. u jednu čašu o' 2 deca, punu vode razmutit 2 kućarina (2 male žlice) konšerve. to ulit u teču di je zažućena kapula.

šnicele iz pršule pribacit u teču, neka kuva na laganoj vatri. kad uzavre, doda se čaša crnoga vina, sol, sastruganog oraščića, 4-5 klinčića, malo papra. neka kuva oko uru i po dvi dok meso ne omekša. vodu dodajite prema potribi.

da bi svaki put bija u originalan i maštovit, u zanimljivom izdanju jedan put ćete ga učinit s njokima (ricetu za domaće njoke ću jedanput napisat ovod), drugi put s makarunima, treći s pireon itd.

ekola, gren ča. za ovi put dosta. jemate pozdrav!

sad se mislin kad će mi ovo bit za obid, e...

još riceta: http://web.vip.hr/nmagazin.vip/ricete.html

e, dok se čeka naredni post, a vidin (narafski,niman kuglu, nisan vištica, to mi samo ispriča ova moja škatula o' kompjutera) da se čeka tutokompleto kurjože, pogotovo o' jednega šjora, evo jedna dobra Pisma. predobra, poslušajte! eto, tot za gušt. a naredni post ča je povezan s prošlin, a? bit će, e... jema vrimena. i nima opće razloga za bilo kakve sekirancije, nervozu i sl. vidit ćete šta će to bit, narafski. zasad samo moren reč: nešto puno lipo, e...

zavodi me mirisom, vonjem.

očarava me okuson.

maštovit je i originalan.

svaki put u zanimljivom izdanju.

ko, a?

nastavak slidi, vrnite se jopet ovod pa ću van sve temeljito ispripovidit, e...

u vrime prije sna

uranjan u more uspomena. na dah.

ne, nije me strah.

neću izgubit zrak.

to sasvin dovoljno je
da ti nacrtan joči po sićanju.

i smiješak, naravno.

s puno žara nastaje portret jubavi u pijesku.

dura.

ne odnose ga vali.

ka da je stvaran, ka da nije rođen iz uspomena.

isprepliću se vrimena, događaji, judi, stvari.

samo more zna šta nas još sve čeka...

tonen u san,

sutra je novi dan!

tuti koluri, nebo maloprije by XVII, slikano s mog balkona, klik za veće

ovo mi je ulipšalo radni vikend. narafski, radin i sutra.

e... na šta bi još tribalo pazit osin libra ča se zove: knjiga poslovnih udjela? (vidi prethodni post)

najprvo ćemo reč da ja nisan pravnik, vengo da ću ovi post nostat iz iskustva. nadalje, za nike posebne djelatnosti tipa kafić, mesnica, ordinacija sigurno jema još stvari. ja ću notat samo ono najosnovnije ča je bitno za niki uredski tip djelatnosti.

1. pompjerski (vatrogasni) aparat - gleda se kvadratura prostora i ovisno o temu se kupuje višje oli manje tih aparati, a i tip aparata ovisi o temu - godišnje ih se triba servisirat.

2. škatula prva pomoći - kad se načme, triba je i nadopunit

3. uredne instalacije o' letrike, plina (ako ga jema), vode, telefona i sl.

4. kondut oliti zahod - triba radit

5. istaknuta tabla s radnin vrimenon na vratima, a nije loše i neku tablu stavit na samu kuću di ste - tot morate pazit jeste li u zgradi koja je spomenička baština. kod obrta triba pisat i ime vlasnika.

6. grb republike hrvatske na zidu

7. etiketa jemate li račun na vidljivo misto

8. ne smi se ni fumat, pa i etiketa zabranjeno pušenje na vidljivo misto

9. uredan prostor, pod, zidovi, prozori (ponistre), vrata

10. račun za svaku uslugu

11. stručna osoba za svako radno misto (ja recimo mogu za svakoga djelatnika pokazat ovjerenu diplomu, a original je svaki djelatnik pokaza meni)

12. matična knjiga radnika - u nju se upisuju radnici zaposleni na određeno i neodređeno vrime, honorarni ne

13. knjiga prometa - tot notaš sve ča prodaš

14. knjiga žalbi - e, ovo jeman, ali mi niko nije zna reč triba li mi opće to ili je to samo libar za ugostiteljstvo

15. ugovor sa svakin djelatnikon, radna knjižica o' svakog radnika

16. platit poreze redovito

17. platit radnike i njihove doprinose, poreze i prireze redovito

18. odabrat ambulantu medicine rada - ovo je nešto novo, mi smo svoju obvezu jučer ispunili i odabrali ambulantu

19. ne dugovat nikome tj. plaćat račune na vrime

20. servisirat klimu i ostale uređaje redovito

21. jemat legalan softver na računalu

22. ako se dupera .hr internetska domena, snosit odgovornost za sadržaj ča je na njoj

 23. odabrat dobrog knjigovođu, najbolje ovlaštenog računovođu i vodit računa nosi li sve obrasce od fine do porezne i socijalnog, knjiži li račune uredno. cili je popis knjiga koje vodi knjigovođa, a na poreznu upravu je potribno predat ugovor s knjigovođom

24. godišnje izvještavat trgovački sud o vlasničkoj strukturi na osnovi knjige poslovnih udjela

25. plaćanje radnika: na tekući plaća, na žiro honorar. gotovinski nikako. ovako se štiti i radnika i poslodavca. poslodavci koji plaćaju gotovinski radnike obično zaobilaze uplatu doprinosa.

26. svakom radniku za svaku isplatu dati pisani, potpisani i pečatirani izvještaj. također dat godišnji izvještaj o isplatama.

itd.

jema tega još, ovo je najosnovnije, a ako bar to uspijete na konju ste.

fala XVII

e... jema mrvu višje o' godine dan da je iša ovi post:

http://www.xvii-online.com/p-ajmo-ih-ca-malo-pritisnit-barenko-to-moremo/83948.html

hitro? hitro me povuci za nos.

eto, to ti je sve. jerbo:

1. visinu najma još uvik određuje porezna uprava

za one ča ne znaju: ako vlastiti prostor iznajmite vlastitoj tvrtki, visinu najma će vam odredit porezna uprava i to zaradi tega da na taj najam vama ka građaninu more puknit najveći porez. mislin da je ovo nečuveno i da tako nešto ne postoji nigdi na svitu.

2. za zdravstveno mi se još uvik čiča iljade i iljade kuna od kojih honorarni zaposlenik ča jema stalni posal praktički nima ništa konkretno.

za one ča ne znaju: na honorarni rad se također plaćaju doprinosi, porez, prirez. oni su čak znatno viši vengo na rad ča gre na ugovor o radu tj. ako nekome oču honorarno dat 100 kn moran dat još 100 kn u davanja. svit ča jema ugovor o radu jema uplate za zdrastveno priko prvoga posla. takvima na honorarnom poslu idu ogromna davanja za zdravstveno, a ti judi o' tega zdravstvenoga praktički nimaju nikakve konkretne koristi. ovo se po zdravoseljački zove pljačka.

3. narafski da san i ove godine poviri na trgovački sud jerbo i jopet nima promjena u vlasničkoj strukturi moje tvrtke pa im je to tribalo reč.

za one ča ne znaju: tribate jemat libar oli knjigu poslovnih (vlasničkih) udjela. tot se upiše početna vlasnička struktura tvrtke i svaka daljnja promjena. to mi je ok. libar dođe oko 50 oli 100 kuna, ne znan sad višje i neka ga. medjutim, nije mi ok da svake godine triban poč reč na sud da nima promjena u vlasničkoj strukturi. dosta bi bilo javit ako jema promjena. sve ostalo je doslovce zahebavanje radnog naroda. a ako libar vlasničkih udjela nimate i ako svake godine ne grete na sud, more vas rebnit sa

50 000 kn (pedeset iljada kuna)

- ako nije poskupilo, ovako je prije bilo prima zakonu o trgovačkin društvima.

daklem; kako je hitro skresa nevjerojatne i nesuvisle propise, a? nikako, eto, kako. hitro me potegni za nos, to je sve ča se dogodilo. jerbo o' čega bi šjor šuker i ostala  pulitičarska družina tukla kile i punila takujin svoj i svoje bliže i daljnje fameje kad bi se prikinija pljačkat radni narod, a?

zamolit ću političare kojima će sad past na pamet da me zivkaju na mob. da se saberu i da to ne čine. za vas višje vrimena niman, moja malenkost vas je štufa, ukakite, a onda mene zivkate i pitate me da šta ste na internetu. aaaaaaa ako niste znali, blogovi i služe za to da se na njima objavi ono ča bi vi da se ne zna i ono ča u foje oli novine ne smi poč. 

- ništa o' vožnje naredni misec dan, autoškola mora sredit niku administraciju, dokumentaciju, kartušinu i neće se radit misec dana - reče moj instruktor jučer i odredi novi termin u misecu maški.

u jednu mi je ruku drago jerbo triba se malo odmorit o' svega tega, s druge strane se mislin kako će mi arivat penžujn, a da ću i dalje bit brez vozačke.

bit će je to tribalo polagat u doba socijalizma, a ne čekat ovo veselje danas, e... jerbo, kako mi svit priča, bilo je to onda puno jednostavnije, a mnogi iz tih iskustava vuku i zanimljive anegdote koje kroza smij prepričavaju.

žena je tako ujurila u tonobil i nije opće sinjala da je na zadnji sic već sija ispitivač. itne ona svoju lumbrelu zada, daje kontakt, ka čuješ:

joooooooooooooooooooooooooooooooooj!!!!!

strefilo ispitivača u ćivericu. poza tega je narafski više mislija na svoje zdravje, vengo na njenu sigurnost pri upravljanju tonobilon i tako to. položi žena i vozi cili život. jema godin koliko i ja, drži jednu radnju ovod u split, pa zaradi tega nećemo reč koja je vengo ako vam ona to nekad ispriča dobro ispriča. ta vozačka nije stečena u split, vengo sjevernije.

aaaaaa, evo još jedna sjevernija vozačka. ova je o' jednega poznatoga šjora, pa zaradi tega i jopet nećemo reč kojega, vengo ako vam sam ispriča, dobro ispriča. daklem, tot se najprije instruktora poslalo u bolnicu. narafski, poza tega ga niko nije tija učit, pa je tadašnji kandidat za šofera oli vozača triba čekat da mu se instruktor rekupera. poslin je pada ispit, a iz treće su ga puštili na ravno. eto tako, da se višje ne tlače ni oni ni on. vozi čovik cili život, bokunić stariji o' mene.

a ja? kad ću ja? hehe, ko to zna... kažu da se bolje rodit brez nosa vengo brez sriće, a ja oko tega šoferstva stalno jeman nike pegule. eto.

zaradi tega ću danas zafalit korektnin judima iz firme VATROPROMET - podruznica SPLIT jerbo su mi i ove ka i svih ovih mojih pješačkih godina dopeljali pompjerski aparat ča je bija na redoviton godišnjen servisu.

vengo, znate li ča je pompjer, a? stariji će sigurno znat, za mlađe ne virujen baš. pompjer je stara rič za vatrogasca. eto, sad znaju i mlaji, ali ne daj bože potribe za duperanjen tega.

šta još jema ovih dan, a? a ništa, učin dicu matematiku, fiziku, radin sav svoj ostali posal jerbo neće niko za me, čekan lito, mislin šta jema dobro za izist, ono, život gre svojin tokon. pješke narafski. korak po korak oli step by step. bit će bolje. valjda. ;)

gren ča, pozdravljan lipo sve poznate i nepoznate ča povire ovod.

e...

ovin san se bavi u zadnje vrime:

 http://www.ambulantabosnjak.hr/

ako mi je ikad bilo posebno drago napravit nešto,

to je ovo za veterinara Bošnjaka.

VETERINARSKA AMBULANTA BOŠNJAK SPLIT

od prije uru dvi jema i stranicu na netu. vižitajte je. fala lipa!

e... svako malo me sandra utagira u štagod pa me onda toka ovod notavat...

sad bi ka tribalo reč rič dvi o umjetnosti i priporučit još koga. ne znan je li samo sa www.mojblog.hr  ili može iz bespuća neta pa ću se ipak ograničit na www.mojblog.hr .

tribalo bi notat 8 zanimljivosti o onemu ča radiš po pitanju art-a oli umjetnosti i onda odredit još 8 svita.

ja ću odma odredit 4 svita, a neka oni pišu ako im se da, ako im se ne da i jopet dobro. gren višje na neku kvalitetu vengo kvantitetu, zaradi tega dosta 4 :o)

• dotur Lebowski jerbo taj čovik zna pisat,
• galerija Latica jerbo ta žena zna slikat,
• Selma jerbo ta žena zna napisat dobar vers,
• drito konjić , vječiti buntovnik s razlogom, simpatičan momak iz metropole, zna i štagod notat, ali još mu je jača strana mužika

ča se mene tiče isto ćemo skratit ovo 8 na 4.

• crtarije (većinom lapiš oli olovka i ugljen oli garbun) i slikarije (većinom akvareli, tempere, pastele) su moje društvo odavno, crtan otkad znan za se. nike radove morete nač u galeriji o' XVII . niman umjetničku naobrazbu vengo tekničku, a ča se tiče umjetnosti samo likovna grupa u skuli uvik :o) . niki misle da radin dobro tj. jeman obožavatelje, a drugi pak misle da ne znan dvi rige potegnit. poćirite u galeriju i zaključite. neki meni dragi judi jemaju na dar moj rad, a ja radin moj inđinjerski posal i još šefujen u Parametar doo
• litrati oli fotografije su mi ušli u život priko bloga, tribalo je za to nešto litrati jemat da ova stranica bude stranica o splitu u slici i riči. prvi digitalac mi je jema 2.0 megapikselića, drugi, današnji jema 5. 0 . duperan kodak, a niman nikakav tečaj ni iz fotografije tj. nikakvu naobrazbu po tom pitanju. moje fotke morete nač ovod.
• versi su moja treća jubav, notan kad uvatin volje rič dvi. možda i vride štagod, često ih kombiniran s likovnim/vizualnim radovima bilo svojim bilo tuđim, a kako gre rič dvi o' XVII morete nač ovod.
• eto, to je to po pitanju moga arta, možda još da rečen da  masu svita voli i www.xvii-online.com , kažu: počneš jednostavno, oko najobičnije stvari i riči te vuku, napišeš dobar i zanimljiv post. fala in! (mislin da se takvih postova o umjetnosti i guštu života naročito more nač kroza 2004., 2005., pa povirite malo i na moj šufit  , jema se i tot šta pročitat, e)

ekola, gren ča, obaveze me zovu. jemate pozdrav! :o)

 4 ure pozapodne by XVII, slikano danas, klik za još bokunić veće

e... ča je dobro u ovi grad, a? ovi grad ti odma čin izađeš iz kuće oli sa posla štagod priredi. ne moraš opće poč daleko, ma ke, e... dosta je recimo i do pošte ka ja pozapodne i eto ti odma mirakula lipote. narafski, ako si bolje sriće, čut ćeš i koju batudu, neko će se uvatit na nečiju baketinu i sl.

sve ča tribaš je dobro otvorit joči, naćulit uvo i predstava života počinje. tega nima u metropolu i zaradi tega metropola nima ni pinezi kojima bi me platila...

ekola, gren ča, za ovi put dosta, jemate pozdrav!

HDZ je formira Vladu.

Bože, molim Te,  čuvaj od njih Hrvatsku i svakoga poštenoga Hrvata!

e... danas san na telefon devet dva (92 oli pulicija) pa poslin nazovit ovi broj pa još počekajte malo i tako to traži informaciju.

moje pitanje glasi: dobar dan. zanima me je li vam državno odvjetništvo dostavilo ikakvu informaciju o predmetu za koji ste prema informacijama koje jeman o' vaseg šefa podnili kaznenu prijavu. radi se o ovemu.

šjor iz pulicije:  sve znam o čemu se radi, ali državno odvjetništvo nam još nije dostavilo nikakav odgovor.

jopet ja: molim vas da mi javite ako vam nešto jave. hvala doviđenja.

šjor iz pulicije: naravno da oćemo,doviđenja i vama.

narafski, da još uvik dicu u drugom gradu po veličini  u rvackoj uči peršona  sa timbrom ča pari crtan čepon o' pive , narafski da još uvik radi i "puno pošteni čovik "  ča je to zaposlija. jo, da mi je vidit njegove diplome kad se ovakvima veseli....

nikidan me iz slobodne zvala jedna novinarka i ka tila je nešto i u novine oliti foje notat rič dvi o' ovemu, to me molila i kumila da nađen iduću šetimanu koji minut za nju, međutin poza tega mi se višje nije javila. nima veze, splićani bi na slobodnu poza čitanja očistli ribu, a ovako, čitaju na internet i štorija će se prinosit sa kolina na kolino.

ivo sanader će kako svaćan jopet stavit ministra primorca za ministra o' skula. 21. stoljeće je. država nam ka ide naprid. kako kažu zemlja je znanja. vitrovi pušu, judi se okriću, a vične "vridnosti" duraju. evo kako ta vična "vridnost" izgleda svitu moj:

jopet za one ča ne znaju di je to sažetak:

grad: split

skula : TŠ u Zrinsko frankopanskoj (to je ona ča gre o' staroga placa put Poljuda)

diretur: M. T.

tajnica: D. M. rođena M.

vlasnica timbra: K.K. rođena V.

s tin se zaposlila i "uči" dicu letriku.

dežurne mone: porezni obveznici ove zemlje, svi mi, mone koje ovo financiramo....

IDEMO DALJE! NA BALKANU NIŠTA NOVO!

e...

jutros smo vozili tonobil. bolje rečeno ja vozin. danas je uz instruktora Banovića uza me u tonobil sija i vlasnik autoškole šjor Joško Komadina. tija je čovik vidit kolika je ta moja smotanost, je li je jema oli nima, vidit kako napravit plan da se nešto popravi, nešto nauči.

dobro je šta je tako postupija. poza vožnje su mi on i instruktor banović rekli:

- da opće nisan temeljito smotana peršona, da dosta toga gre dobro

- da još neke elemente triban vježbat da bi mi grad iša bolje, ali da će se sve to savladat u nekom razumnom roku

- da san ritko žensko koje je normalno stalo i normalno krenilo s uzbrdice (asti sto a koliko me to stajanje i kretanje mučilo na početku, parilo mi je da ću zaradit tega proključat, ali baš tako)

ruta je bila:

solinska, pulicija, turska kula, put stadiona, tunel, zvončac, meje, tunel, stadion, škver, mljekara, brda, povišje fesba, pa jopet put grada, mažuranićevo i solinska.

preživih i to....

sad gren vidit ko mi nije platija račun ;)

e... osin muke po učenju vožnje (vidi prošli post) jeman i muku direturstva. učenja vožnje ću se s vrimenon rišit, za ovo drugo ne virujen baš.

pred nikoliko godin, kad je moja malenkost bila brez posla, a saša ljubičić nota u slobodnu da prikovišje nezaposlenih traži posal, a moli boga da ga ne nađe i da kad ih neko zaposli namjerno čine monade da ih taj isti i otposli, parilo mi je to nevjerojatno. još mu je doša i moj mail di ga pitan da ča on to grubo govori u tu slobodnu, da kako more tako notavat u foje i sl. e, novinaru moj sa toča, jema si ti prav, vidin ja to danas kad zapošljavan ljude i kad doslovce crkavan za nač peršonu ča jema obrazovanje, znanje, ča je normalna, vridna i poštena.

uz puno muke uglavnom nađen normalan svit za radit. ponavljan, to opće nije jednostavno. živa je muka nač obrazovane, vridne i poštene ljude.

međutin, da je sve super, ne bi bilo "zabavno". zaradi tega uvik moran jemat i koji "biser" uza se jerbo brez nih ne moren. ne zato šta ja tako oču, vengo šta me životna srića tako potrefi, e...

jedna mi je tako rekla da san, pazi sad ovo, brezobraznica i to zaradi tega ča je moja malenkost njeno visočanstvo činila da dođe u ured sredit svoj ugovor na osnovi kojega joj je triba bit isplaćen honorar. mislin da nima nigdi na svitu da vlasnik tvrtke moli ljude da dođu po svoje pineze. stvarno, baš je brezobrazna moja malenkost ča još svakome i SMS pošalje da mu je iša honorar oli plaća. ne želin nikome ništa loše, ali ovoj bi se stvarno tribalo dogodit da negdi radi tri miseca pa da je opće na plate. recimo kod ovih novopečenih tajkuna-brodovlasnika-zemljoposjednika-tvrorničara i sl. ča su puno bogati postali u zadnjih petnaest godin, a prije 91. nisu jemali ni za gače. možda bi onda svatila značenje riči brezobraznik. šta smo s njon učinili, a? a ništa, šta ćemo učinit? dali joj honorar i zaželili puno sriće, nima druge.

sad jeman još veselja. svima je objašnjeno na prvon razgovoru koji su sa menon jemali da se honorar isplaćuje na žiro-račun, a plaća na tekući račun. svi su to iz prve i razumili. samo jedna peršona nikako to ne razumi. i tako joj je nikidan išla plaća. na tekući račun, narafski. točnije puštena je 03.01. na izvršenje o 04.01. jesan, baš san brezobraznica kad tako rano puštan plaću, to je isto krajnje brezobrazno znan.  prikontroliran ja konte, internet bankarstvo jeman, sve mi štima. danas mi međutin stiže sms, šinjorina još nije dobila plaću na zamislite žiro račun. virovali oli ne po 101. put joj govorin da plaća gre na tekući i da joj je odavno isplaćena. sebi se divin koliko jeman pacijence sa ovon peršonon, a čini monade praktički otkad  smo se prvi put vidili.

šta ćemo tot, a? a kako ja iz vlastite firme niman namjeru poč ča, nešto oli neko će se ovod morat minjat.

eto, zaradi svega ovega ću sve manje svita angažirat putem natječaja. pari mi se da je to previše nervoze, a da se na ti način ipak ne uspiju baš nač ljudi kakvi mi tribaju. neke sasvin solidne se našlo i na ovi način, ali bisera puten natječaja jema i prikovišje.

zanimljivo je da je baš među onima šta najlošije rade oli se ponašaju želja za plaćon od pazite sad ovo 15 do 20 iljada kuna misečno nevjerojatno jako izražena.

narafski, oni ne bi pokrenili tvrtku, uložili kapital i vrime, rizik,  sami se mučili kako pronač posal, ljude za radit, kako odradit to, kako naplatit to, vengo bi da im ja taj posal za njih stvorin. narafski, po njima, za njih ja moran radit i suboton i nediljon, po njima firma bi morala iz vlasnikovoga džepa platit od reklame do telefona. kako zna i umije za njih stvorit minstarsku plaću, a oni ne bi njanci posal iz svoje branše odradili, to isto ja za njih triban, a plaću bi vazeli. jerbo, razmazila ih mater pa su oni viša vrsta, a ja eto niža.

Dario Marijan vlasnik tvrtke NAUTIKA CENTAR NAVA d.o.o. mi je kad smo nešto o ovemu diskutirali reka:

"Ne sekiraj se, ti jemaš tvrtku, ti je vodiš, znači u tebe je pamet, a ne u takvih; to i sebi govorin sve ove godine otkad san u poslu".

Dario, po ovom pitanju stvarno pametna rečenica! ovod je stivajen jerbo bi tribala vodit svakoga ko se muči stvorit nove vridnosti.

mislin da su headhunterske agencije nešto ok za traženje zaposlenika, platiš im pa ti se potrude naći nekoliko dobrih zaposlenika, a ti na kraju suziš izbor. ne znan, još s njima nismo radili, ne mogu reč kako funkciniraju u praksi, ali vjerojatno ću i to isprobat. ka zamisao mi ne pari loše. isprobat ću i druge metode, ma natječaja će bit sve manje i manje... štufalo me čitat hrpe životopisa, trošit ure i ure na razgovore, a  mižerjasto mali broj zaposlenika ča su po mom guštu (obrazovan, vridan i pošten) nač iza svega tega.

e... minimalni broj odvoženih sati za izač na ispit u autoškoli je 35. kroza to vrime bi čovik triba naučit vozit tonobil. možeš uplatit i za dodatne ure pa učit još ako je potriba. meni je danas bija 46. sat. na ispit se još nije išlo, a teško da će se tako brzo i probat. instruktor me naučija nešto, ali ne dovoljno za proč ispit. čunje (tj. poligon) ga sa menon opće nije bilo volja kvalitetno radit i zaradi tega smo, otkrit ću vam tajnu, prominili instruktora. bija je još jedan razlog, a to je: instruktor je po mom mišljenju prečesto prakticira grupni rad tj. višje svita u istu uru pa svak neka pomalo vozi. meni je to ok jednom oli dvaput za razbit straj i tremu o' još svita u tonobilu, ali ne višje o' tega. isto tako, ja mislin da tonobil triba učit vozit u autoškoli, a on mi je uporno govorija da ga se triba vozit prije autoškole, da je on vozija već sa 9 godina, a i tantobuson  se narafski zaputija u vožnju. narafski, i tantobuson brez vozačke. ja tako ne moren učit. na početku još nekako, išlo je to pomalo, čak moren reč da se  sa zadovoljstvon na te ure odilo, instruktora se čak i na ovi internet pofalilo, poslin sve gore i gore, nikakav napredak. sad jeman novega instruktora, š njin već vježban 9 uri. čunji su sad mrvu bolje tj. nekako se uspilo savladat prvu vježbu, a drugu se čak probalo učinit i uspila se napravit iz prve. http://www.herz.hr/ispit_uv.php

jutros mi je bila gradska vožnja. to me katkad gre mrvu bolje, katkad mrvu lošije. jutros nije bilo dobro, dogodilo se nikoliko rizičnih situacija. još uvik ne mogu reč da za se mislin da ok vozin tonobil. instruktor misli da triba još dosta radit. e, sad. judi mi govore da su dodatnih uri često uplaćivali, padali na ispitima i sl. jesmo li svi skupa blesavi oli taj fond sati triba proširit? more li se naučit vozit tonobil u grupnon učenju oli gledajući kako drugi vozi? u ovoj autoškoli teorijsku nastavu drži sam vlasnik škole, čovik je ok, dobro nas je učija, odma se išlo na teorijski ispit, prošlo iz prve, sa maksimalnim brojem bodova.

vožnja? ajme meni, upomoć...

more bit da je stvarno, kako reče moj prvi instruktor, tribalo znat vozit tonobil prije autškole. jerbo, reka mi je da se čudon čudi kako to ja ne znan i da šta se došlo u autoškolu brez tega, u autoškolu se po njemu samo dođe po dozvolu. narafski, on onda s lakoćom uči vozit one koji već znaju vozit.

kvragu ćemo zaradi tega poslat:

- ćaću

- mater

(ovo dvoje ni nema vozačku, ljudi cili život nisu opće vozili, ćaća jema tonobil, njega voze drugi)

- kumpanje

- rođake

- suside

- momke

- narafski sve njih, one koji su znali i nisu znali vozit tonobil.

oni su me naime tribali naučit vozit, a nisu. tako je mislija moj prvi instruktor. novi me pokušava nešto naučit, ali sad bidan jema puno posla.

bila mi je ideja da poza polaganja vozačkog otkrijen u koju autoškolu gren, ali špijat ću vam odma danas. AUTO ŠKOLA GOLF Split 

vlasnik: Joško Komadina, prvi instruktor: Miroslav Grgurević, drugi instruktor: Nebojša Banović

narafski, sa svima sad pričan o vozačkom i svit mi na sve autoškole priča istu priču i kaže: "sritan je oni ča je naletija na instruktora s puno pacijence koji nauči čovika vozit u nekom normalnom broju sati"

vidit ćemo do koliko ću uri na kraju doč i oće li se uspit u 2008. položit nešto ča se zove VOZAČKI ISPIT (ej, ne obrana doktorske disertacije, vengo vozački ispit).

nada tj. ja & brod nada, o' jutros, iz spli'skog acy-a

evala! evo me. šta jema, a? radno. radin po cile dane, e... mora se, a kad se mora nije teško, e... prvi računi u 2008. ? već izdano, zarađuje se, neka.

autić? ma i to se već počelo u 2008., čunji sve bolje i bolje, fala na pitanju.

danas mi je pa na pamet i blog. tribalo bi štagod stivat ovod, e... a šta? ajde gren mrvu lova. o' danas, narafski. friška snimka.

zaradi čega lov, a? a zaradi tega jerbo su snimke iz lova postale moderne. bilo kuda lov svuda.

uprite na botun i guštajte, igra maške i miša počinje. eksluziva, obavezno vidit! 

SRITNA NOVA 2008.!

zaradi ovega nisan parti u london. more naslov glasit i: ča će mi copacabana? :o)

silvestrovo je izgledalo ka na litratu, doček je bija odličan, pun dobre spize i smija, a vatromet morete pogledat ovod :o) . 

narafski, sve je ovo uvaćeno sa moga balkona. car dioklecijan je moga birat di će. izabra je najbolji dil svita. ja stojin u najbolji stan u najlipšen gradu na svitu. to oče reč da san na najbolju poziciju na zemaljskoj baloti. kad je tako, niko nima pinezi za vazest moj stan. jerbo, ko bi bija lud da pođe ča sa najboljega mista na svitu, a? :o)