e...

u zadnje vrime samo trčen, simo san i tamo, jedva stignen stat na balun, a tribalo bi bokun i fermat. je, znan da je tako, ma ostavit ću to za bolja vrimena.

šta jema novega, a? dobili smo oni poveći posal koji san nekidan želila, naša ponuda je prošla ka najpovoljnija, održali smo i prvi sastanak, formulirali smo i ugovor, proša je i on, iduću šetimanu dajemo potpise i počinjemo radit. o kome se tot radi, a? e a čitajte naše vijesti na www.parametar.hr , objavit ćemo tot kad dođe za to vrime, a bit će i ovod.

iduću šetimanu me jopet toka poč u jedno lipo misto. koje, a? a to ćemo vam reč kad se vratin, nadan se da će sve proč u najboljen redu. probat ću i tot učinit koju dobru sliju.

šta još jema novega, a? evo, kolege iz metropole su me ugodno iznenadili redizajnom portala http://www.mojaenergija.hr i šta su mi tot dali reklamicu za moje poduzeće,  fala im lipa...

šta ćemo još reč, a? šta je bilo za obid, a? kurjoži, a? juva o' gljiva, pohančeko,  pečeni kumpliri, jedan lipi umak, bokunić torte, kofi, sok. lipo, e... sve to se sasvin dobro uklapa s programon skidanja kojega kila, nima šta, znan.

vengo ča san ono tila reč, a? kad je već život trči, radi, priši i tako to, gren bar nač koju pismu u kojoj se more malo fermat, guštat. evo jedna, uštekajte zvučnike, puno je dobra, mirita da je se posluša.

e...

uvjerava je sebe da višje ne voli tu ženu, a svako jutro čin bi joči otvorija je baš na nju promislija. 

uvjeravala je sebe da višje ne voli tega čovika, a svako jutro čin bi joči otvorila je baš na njega promislila.

nebo i more su bili ka tempera, mladost je kroza prste curila.

a kako je to finilo, a? e, to, to vam ne bi znala ispripovidit  jerbo nisan opče  sigurna je li finilo, e...

apropo jubavi, navit ćemo jednu odličnu pismu o' šjor gibonnija, guštajte!

eto, finila je veljača, e... a jubav? me ke, e, jubav ne more finit, jubav dura...

evo još jedna lipa pisma, guštajte!

e... krenili smo jutros u 8 uri iz splita za poslon. nije to opće triba bit izlet, vengo tek jedan radni odlazak u šibenik... ja i jedan moj kumpanjo, svak zaradi svojega posla. narafski, posal smo napravili, a dan je bija tako lip, ka za bogove... e sad, vidi lipote, vidi divote, ko je moga  proč kraj tega, a ne slikat to, a? evo nikoliko litrati. guštajte!

ponosna san na sebe jerbo san vozila do šibenika, poza tega vodice, a poza tega san prošla i tri kvarta murtera, tisno, murter, betina, nisan jedino bila u jezera. ko je jutros kad san se digla iz postelje opće moga promislit da ću vižitat otok - odluka da se gre tamo je bila iznenadna, inspirirana lipin danom. narafski, skroz dobro odlučeno.

narafski da san vozila i nazad u split. iz šibenika san se javila barba boži sušiću ča mi je bija instruktor u autoškoli sušić, ono, neka vidin on di san ja došla s mojon baby vozačkom koju jeman tek 6 miseci. oko 7 navečer uri zove mene barba božo, ka da provjeri jesmo li se sritno vratili nazad, jesan li živa... pukla san o' smija. da živa, haha, a narafski da ću bit, živa i zdrava, a kako otok puni baterije, to je nešto nevjerojatno, priporučan svima da se zalete tamo ako ikako moredu.

litrati redom: šibenik (1-6), vodice (7-8), otok murter - misto betina (8-15)... ka i uvik uvećavaju se klikom...

šta ćemo još za danas napravit, a? a mojoj materi i ovim puten zaželit sritan rođendan, popit sokić i kako još uvik dura misec jubavi reč dalmacijo jesi lipa, volimo te...

evala svitu!

ma ke, nisan vas iznevjerila, jeman litrate i videa o' maškari ča su bile sinoć u split... samo me jutros tokalo radit pa bokunić kasnimo, ali nima to veze, vidit ćete sad sve.

šta san bila ove godine, a? e a ministar šuker na tajnom zadatku, to mi je nekako pasalo najbolje, odlična maska priko koje san vas mogla najbolje pratit i upratit, e... ono da vidin ča činite, s kin ste izašli vanka, jeste li kune u takujinu stekli pošteno, jeste li prikovišje izili, di ste bili, š kin ste se jubili itd..

evo ovako ti to izgleda kad muškima reste drob, a ženskima brki. svečano je otvoreno splisko rodilište (inače ova je maska odnila 1. misto, a kako se svake godine uspijen slikat sa zvizdon večeri, e, to, to vam neću reč). šta ovo činimo (osin ča se dobro za*ebavamo, a?), a ? aj, gren van špijat, ministar šuker je stegnija kaiš i sad mirimo drob, čiji je veći, o' noseće oli o šjor ministra, e...

trudnice su ka ča vidite u fili, a rodilo se i prvo dite. dobilo je ime Dujka. neka, neka, puno lipo ime, e...

čitate li stripove, a? recimo alan ford, a? eeee, dobro da se u svašta tendin i da san čitala te stripove, inače mi opče ne bi bilo kjaro odakle pinezi za ovu makinju, e... 

kako makinja nije stečena na sumnjive načine, moremo se brez ikakvoga straja malo provozat

jopet me ne pitajte kako se uspijen svake godine slikat sa zvizdama večeri, te tajne nećemo otkrit, ma ke , e...

ajmo ča dalje. veli varoš standardno jema dobru masku, ove godine su gusari i tot narafski jema posla za ministra šukera, e... ajmo, brzo platiti porez na to ča ste ogusarili, e... nećete proč lišo, ma ke, e... 

narafski, nimate sad tot šta filozofirat, mudrovat, pitat se ča je prije, kokoš oli jaje itakodalje... 

nećete mi se pravit ni marsovci, e... 

a ni da vam je glava u balunu, e...

sve ćemo skontat, prokužit, raskrinkat... evo i ove ča im nije tribala falša brada i brki, vengo su mislili da su im dosta svitleče očale... jo, ča volin slikat poznate spliske face, a kako meni to svit pozira, e, to, to nećemo okrit, e...

hmmm, da vidimo još malo, ča ste bili, šta ste radili, a?

ne, ne, nima klaunovskih monadi...

a odakle van pinezi za visoku modu, a? a čuda teknike, a? 

alo, alo, kosati svih vrsti, a odakle  za te trajne, a? kapeline u tuti koluri?

šta se smiješ, to su krajnje ozbiljna pitanja, e...

aaaaaaaa biče ča sidiš, kako moš jemat otoke i potoke ako sidiš, a?

a šta je, a? štufala su vas pitanja, a? e a ko vam je kriv? a krnje narafski, nisan ja, e...

bik ča sidi postaje oblak ča muči oliti čini kuco... krrnje preuzima krivicu, a litrate ostalih maškara ča su po meni bile zanimljive morete vidit ovod...

znači ovo je bija taj šjor, ružna beštija ča nas je sve saplela u mrižu. stiga je u split ka kurbin sin, pitaj boga otkud, pun sebe, napuvan, sa čunkon ko san šta san.

mislija je da nas more krest, lagat, mazat, činit sve ča ne valja, bit razbojnik. mislija je da će mu sve proč lišo, e...

e ma sve do jednega puta, jučer mu je prisudilo, evo, ovod ćete čut tek dil šporkarija koje je učinija (jeman snimljeno sve, koga zanima neka mi se javi, ma ovo su mu najgore svinjarije).

na kraju su ga odveli ča i užgali. kako je i mirita.

sveusvemu, bile su ovo još jedne neloše maškare, žaj mi je samo ča se sinoć nije ukazala ekipa sa maskama banana i car je gol, bili su u kaštila i rijeci, ni mi kjaro ča nisu došli u split jerbo kaštelani uvik stignu. nadan se da ih poza kaštela i rijeke nije uapsilo... a mene, a? ne nije još, sinoć san odma poza maškare skinila brke i španćjeru, prošla kraj policijoti brzin korakon, jutros se digla najranije i otišla na poslovni sastanak, poza tega u poduzetnički centar. neko triba i radit, a šta ćete, e.... narafski, ako me očete doč uapsit, nemojte doč ni sutra, sutra je i jopet radni dan, a toka me poč i malo vanka splita... ekola, bija je ovo jedan iscrpni post ča me bokunić i iscrpija, post zaradi kojega je tribalo i puno stat atento, slikavat, radit. gre XVII vratit forcu i popit čašu soka. pozdravljan lipo! veseli i zdravi bili!

za google: split karneval 2009, split maškare 2009, split krnje 2009

potpisujen sve litrate i videa osin ovih na kojima san ja... 

e...

nikidan, ono , prije vengo ča ja pa snig, me tokalo poč vazest bokun potvrde na sud. u split višje nije spliski sud, tot morete nač zemljišnik i trgovački sud, a ča se tiče spliskoga suda, za arivat do njega tribate partit iz splita.

jema već niko vrime da je spliski sud stavilo na misto di su nekad bili soldati, dračevac, kasarna oliti vojarna sv. križ.

nisan tila poč tonobilon. kontan nisan nikad do tamo vozila, nisan baš sasvin ni sigurna di je to točno, ne želin falit, aj, gren u tantobus.

solinska, vazmen povratnu karticu, 20 kunića kaže teta. gre dvi peršone i to je 40 kunića.

na stanici promatran, na peron stiže tantobus za dugopolje, lip, šesan, moderan. baš lipo, kontan sad će bit i za dračevac nešto lipo.

e ma ke čovik moj, roge ćaćine, e... jo gospe moja, kad je stiga i sve oko sebe zadimija - na šta je sličija , strašno, ne da se ričima opisat. broj 13, split-dračevac, da nije jema tabelu mislila bi da nije  o spliskoga prometa vengo o firme krstić i da gre za beograd.

dindile dindile split, malo vanka splita, rotor, još malo i eto dračevac. o stanice smo tek bokunić protegli noge, vrime pred snig je pojačavalo doživljaj ča vonje na apokaliptično. na ulazu kućica ča je ostala o soldati, razbijeni cakal, vijori se ružna, stara koltrina. tužno. vidiš prostor koji je  još nekako pasa za kasarnu, ali u kojem sud izgleda groteskno. ka da je neko tija tutokompleto ponizit sud, pa ga je strpa tot i do njega stavija staru, prdekavu kantu o tantobusa za koju se pitan kako opče prolazi teknički pregled. šetaju po skalama službenice, nose hrpe spisa u ruke, jema bit da je pravda spora, sporija o najsporijega puža. nije ni čudo ka se tako pribacuje iz kancelarije u kancelariju pa i jopet vraća iz jedne u drugu.

potvrdu smo uspili dobit, idemo ča.

u split se vraćamo brojen 5. izgleda tek mrvicu bolje o broja 13. prolazi kroza mravince i krca dicu ča moraju stič u skulu. pun je ka šipak. nekako mi se po tin tantobusima pari da je niko tija reč da tot stoji manje vridan svit, oni za koje nikoga nije briga. jerbo, zaradi čega u dugopolje gre lipi tantobus, a u dračevac ružni?! je li se jema para oli nima? je li se tantobusi postavljaju tako da se gleda koji je pulitičar iz kojega sela?

znate kad ćemo u europu, a?

onda kad u ovoj zemlji ne bude višje i manje vridnih judi, onda kad sud bude sličija na sud, a tantobus na tantobus, onda čovik moj kad se ne budeš smrznija i protrnija o straja kad tribaš samo par kilometri potegnit o splita oli zagreba...

e...

nova riva, marmontova, caklena maja i još cakla, cakal di se god okreneš, višekatnice po merjanu, oni bunker ča je nekoć davno učinjen ka dom omladine, zgrade u iljadu nešesnih koluri na misto di je nekad bila jugoplastika, itd.

čije je to maslo, a? e a sve su to učinili judi ča jube ovi grad svim srcem, ko prije ko poslin. sva se raskrabin o' sriće kad mi neko spomene tu kumpanju belu, e...

narafski, nije dosta furbarija i svinjarija, ma ke, e... zločini kontra splita se jopet tribaju nastavit. ovi put oče pomest bače i firule, nasut ih šljunkon.

a ča će poza tega, a? ko zna, možda još i kampanel svetoga duje potaracaju i sore sa zemljon jerbo ni njega tot ne bi tribalo bit.

satari sve ča je splisko, potiraj još ovo malo splićana iz splita i bit će odlično.

niko se višje onda neće ni sitit da je tot bija jedan ponosan i dišpetožasti grad ča je toliko tega zna i toliko toga svitu i životu da... niko ga neće spomenit njanci u niku štoriju. živit će tot neki drugi judi, neće se čut spliska besida, neće bit spliskih batuda, spliskih mulaca, nestat će spliski mot.

očete li onda bit sritni, škovace o' judi, a?

e... borija se rico ka lav, sve je da za ajduka... danas ćemo reč: naprid bili!

e...

ča je novega, a? danas san bila u spaladium arenu, tako nešto se ne propušta.

12 000 (ričima: dvanaest iljada) judi je došlo navijat za blanku vlašić, puna dvorana, nije bilo praznoga mista. blanka narafski najbolja, na kraju se takmičila sama sa sebon, ostalo je 204, a 206 je nažalost srušila. špiker je reka da nikad neki miting u atletici u dvorani nije pratilo toliko svita, bilo je stvarno odlično, jedino bokun moren zamirit na preprebučnon razglasu.

nisan nosila digitalca jerbo ga nisan tila ostavit barbama i tetama na ulazu, ka zabranjeno je. poslin vidi svi slikaju. eto ti ga na. boršu me je činilo otvarat na ulazu, ko zna, kakve san sriće i pegula u takvin situacijama, možda bi me bilo i fermalo da san ga jemala.

a očete li vi vidit koji litrat danas ovod, a? narafski da očete, slikala san mobitelon i čak uspila uvatit skokove... nije velika slika i nije najveća kvaliteta, ali je

bravo za blanku

najveće!

atletski miting, spaladium arena split, 2009., by xvii, slikano mobitelom

ovo notajen s laptopa, nisan još sve sredila oko neta, tek san bokunić raspetljala žice, ali sredit će se sve i dalje...  litrate san bluetooth-on prinila na laptop i bokun izoštrila, sve u svemu more stat, nije digitalac, ali more se oćutit doživljaj, a to je najbitnije...

e...

ovo je moj prvi post s novog laptopa. trentuno sidin na podu jerbo je laptop na katrigi, tako san ga nekako uspila spojit na net brez da napravin nered kronikus oko zica za stari komp. sad triban omogucit ovoj zviri da gre na net u isto vrime sa stolnin kompom i isto tako i bezicni net. to je jos koji dan posla, a dok mi to barbe i tete koji rad za net providere to ne srede, postove notajen sa staroga jerbo ne more mi kicma igrat na vatalo...  

dakleM, ovo je bilo ka nika proba, prvo javljanje... najlipse pozdravljan!

e... raskrabija se snig, ma jubav nije... evo još jedna dobra.  

e... malo san slikavala po splitu. smrzla san se, na radost prijatelja i žalost neprijatelja nisan se slomila, učinila san dobrih slika... sve morete vidit ka slide show oli mirno  priko linka ovod , uvećajte klikom... pozdrav o' XVII

 split i snig by xvii, pogled s moje ponistre, slikano jutors

e... noćas je pa snig. napravite snjeska, pazite da ne slomijete nogu. tonobil sigurno neću poč vozit...  narafski, u grudu nije pristojno spakovat bovan, pa to nemojte činit,  stavite sami snig. 

sad ćemo vidit za koliko će se okrabit....

e...

kažu da su u postolara uvik najlošiji postoli. a inđinjer, a? kako san inđinjer, narafski, poznajen najviše inđinjera... kod njih je uglavnon ovako: važno je da postoli budu udobni i barenko bokunić šesni, a ča se tiče kompjutera tot ti uvik vridi snađi se... tako san već bila dipl. inđinjer o' letrike, a nisan jemala to škatule. prvi san vazela 2002. i na njemu san uspila finit magistarski rad. š njin sa pokrenila i posal. radija je s win 98 i dura mi je pet godin, a njegov monitor virovali oli ne još uvik duperan, evo sad u njega gledan dok ovo notajen. ka ča vidite XVII nije opće jemala niko čudo teknike, ali je raspoloživim sredstvom učinila čudo, pravi mirakul, e... jerbo, sve je u glavi čovik moj, moš vazest tekniku ča piza puste pineze i ne napravit ništa, a moš jemat i manje, pa stvorit nešto.

poza tega san prominila računalo, monitor je osta isti. tega san vazela na početku 2007. i š njin narafski isto zaradila pineze.

a danas, a? danas je posebni dan u mome životu, danas san kupila svoj prvi prijenosnik, eto ga tot na sliku, upravo san se vratila iz butige. narafski, teknika i žice su isprid mene, sad triba sve to skužit, skontat, vidi di šta gre, šta mi je za šta, e... znan da jema kurjožih ča pitaju: a koliko smo pinezi ostavili u tu butigu, a? s boršom, mišonjom i tako to skoro 4 i po iljade kunića - to je s PDV. ni najskuplji (to mi opće ne triba, ne radin za vojsku), a ni najjeftiniji - ono zlatna sredina....  pomalo ću ga osposobit i ča bi rekli personalizirat. nadan se da će dobro radit i donit pineze, neka mu je sa srićon, e...

finilo valentinovo, jubav nije... jedna odlična pisma, guštajte!

e...

u zadnje vrime... šta bi mogli reč na tu temu, a?

ništa posebno, život pomalo gre svojim ritmom. kako san sebi rekla da me u ovoj 2009. višje niko za moje pineze neće zafrkavat, napravila san neke promjene, ovo se odnosi na jude ča su prikrdašili sve granice moje tolerancije, a bit će tega i još.

u zadnje vrime u tonobilu slušan nautic radijo vis, nekako mi pašu po izboru glazbe koji čine. tonobil mi vonje na miris jabuke jerbo jeman taj osvježivač, ali možda proban i miris lavande.

u zadnje vrime dosta radin, a brez obzira na vrime proban bokunić vrimena potrošit i u prirodi, uz more oli na merjanu. veselin se brzon dolasku maškara, ali i prolića ča će arivat i izletima na koje mislin poč.

u zadnje vrime i ne crtan baš (nije da nima ideji vengo je malo vrimena), ali bit će ubrzo štagod. nadan se uvatit i bokunić vrimena za štagod dobro pročitat, pogledat koji dobar film i malo sporta.

još uvik živin u splitu i radin u istoj , mojoj firmi. uza moju stranicu  koja je na netu o' njigovih davnih vrimena, jeman još jednu stranicu, ista je ka i ona o' prije, samo s novijon slikicon. ovo moran malo ovako da svit sazna za nju i da mi se i ta stranica bokunić posjeti, e...

ekola, gren ča, moran radit... pozdravljan lipo...

dragi čitatelju, sasvim nenadano i s puno nade uz ovu krasnu glazbu promisli na nekog dragog...

Jubav by Sarah Key

"Ljubav je posebni svjetski događaj" - Alfred Polgar

e...

poza karata u spaladium areni (vidi tekst ispod) svratila san do trgovačkog centra lora, tamo san našla lipe džemperiće, bili, crveni, sivi, zelenkasti-indigo neka puno lipa kolura. jedan je dolčevita, dva na patent, a jedan brez ičega. nosit ću ih ove godine, a bit će mi dobri i dogodine. baš san zadovoljna ča san našla jerbo ih opće nisan puno platila. ka ča znate ja za pineze triban radit i nikad ne kupujen najskuplje. ni najjeftinije ni najskuplje. zlatna sredina, tako je najbolje. pozapodne san povirila i u svijet knjige, našli smo odličnih libri, a jedan se dobija i na dar. donila san doma puno boršu libri, ali njih narafski nikad dosta, pa tako već jeman u planu još nike za kupnju... di san još bila, a? eeee, došlo je vrime da vazmen i jedan notebookić oliti laptopić, pa san bila to naručit, triba bi bit moj iduću šetimanu. zašto sve ovo pišen, a? sutra je valentinovo. šta mi triba, a? ništa materijalno, e... ča se tiče mene najbolje je zaobič butige, histerija koja vlada po tom pitanju opće nije normalna, a oni ča jubav gleda kroza darove i pineze isto nije normalan/normalna... jubav se ne kupuje, jubav se ne prodaje, vengo se jubav za jubav daje, e... a materijalno, a? kad jema jubavi, nije opće bitno, a kad je nima, nije dosta na dar ni jahta o' milijun eura, e...

ajde da van rečen ča mi se danas još dogodilo. stiga mi je u škrabicu oni broj građanina priko kojega će nas pratit i upratit. šta se mene tiče, to će izgledat ovako. ja i dalje pošteno radin, plaćan porez i ostala davanja, ne dan moj glas njanci jednom političarskom cukunu koji živi na moje špale , a  kad ja sinjan da me prati koji popunjeni adezeovac, recimo ka šjor šuker, poč ću na merjan. na noge narafski i onda ćemo malo trkat. uzbrdo, narafski. e, da malo smršavi, neće mu škodit, e... to je dobro za zdravlje, e... sinjan li da me prati koji blidi, e, onda gren na kašune. more je dobro za zdravlje, sunce isto. šugaman ću raširit di nima lada i to blizu onih ča se kupaju gole gujice - tako će zabadalo jemat di zabost nos, a dobit će i lipu koluru. itd. jeman još ideji, pa me samo pratite, morete završit na skroz dobrim mistima i bit će vam skroz veselo , e...  

e...

jutros san bila vazest karte za blanku vlašić ča je u iduću subotu u spaladium areni.

- dobar dan, 2 karte, molin lipo...

- 40 kunića - kaže teta

pružan 100 kunića, ali teta nima sitnih. ajde dogovorimo se da ću poč razminit u  butigu ča je vizavi. vraćan se s muniton.

- a di bi karte, a? - kaže teta

- a slušajte, samo mi nemojte dat karte blizu sanaderovog mista, drugo sve more, e... jerbo, ja san mali čovik ča pošteno radi i plaća porez i takvoga ne želin njanci blizu sebe, e...

- dobroooooooo - kaže teta i pruža kartice...

iza mene u fili još jedan čovik, kaže i on da neće blizu šjor ive, nikako, e i traži o' tete karte ča dalje o' sanadera...

toliko o popularnosti barba ive...

pogled na kalendar, petak 13. by XVII

e...

jema svita ča će ih puntat nogon i učinit im svakakve gadarije i šporkarije... sram ih bilo! jerbo, to je toliko čista, smišna i draga beštijica da u nešto tako lipo more taknit samo oni ča mu puno tega fali u ćiverici, e...

otkad jeman maške moj je život puno drugovačji, maška je nešto ča donosi radost i opuštanje. nisu ih brezveze stari egipćani držali posebnon beštijicon, ma ke, e...

maška zna ono ča malo judi zna.

• maška zna guštat na suncu.
• maška zna guštat uza peć.
• maška zna guštat u maženju.
• maški zna dugo promatrat.
• maška zna skočit jušto onda kad je potriba.
• maška se zna dočekat na noge.
• maška se zna  baloticon učinjenon o' stanijola o čikolate igrat satima.
• maška je jako dobra majka - mnoge žene o' vrsti čovik moredu učit o' maške.
• maška razumi život i raduje mu se.

morete li za čovika reč da jema ovakvih osobina, a? ritko, e... ovo pare tek nek obične osobine, ali probajte živit tako, guštat u onome ča ti sam život pruža, promatrat, skočit kad je potriba, dočekat se na noge itd. ko to more, puno more. 

maška ćuti puno jače i intezivnije vengo čovik - to je zaradi tega ča nikoliko puti bolje o' čovika čuje, vidi i njuši. najbrži je lovac u prirodi, zato more onoliko vrimena potrošit na spavanje. ta beštijica je hodajući radar, a ako mrvu bolje pogledate, vidit ćete da stvarno vrti ušima. jema moć predosjećanja - to san masu puti vidila kod mojih maški.

individualac je, ali komodno more živit u skupini - svaka jema svoj poseban karakter i šarm, nima 2 iste, e...

maška je kurjoža i zna puno. puno višje vengo ča mislite.

oni ča kažu da su to oportunističke izdajice, lukavi lupeži, linčine i još svašta nešto misle tako jerbo nisu probali živit s maškom - maška nije to, ma ke, e...

maška vas neće slušat ka pas, ona nije poslušnik, ali ta beštija je kapac prevalit i nikoliko iljada kilometri da se vrati doma. vežu se višje za prostor, vengo za čovika, a ako oćute da su voljeni, uzvratit će vam jubav na način da će to masu puti bit dirljivo i strašno duboko, to se zapravo ne more ispričat, triba se doživit. narafski, čovik sam nije kapac tako reagirat na jubav, on će najprije onega koji ga voli puntat nogon - čast iznimkama.

evo doli jedan šerjasti, smišni mačak ovi nije moj vengo je nađen na internetu.

moje ćete nač ovod: http://web.vip.hr/nmagazin.vip/mace.html

 napominjen da ih ne darijen i ne prodajen - vride te maške višje vengo svo blago ovega svita.

Tigrića, pak, čuvan u uspomenama, to je bija mačak kakvoga nije jema svit, a ja san beskrajno bogata peršona zaradi tega ča je to bija baš moj kumpanjo, e...

ovod morete pročitat ko je temu mačku učinija loše, a ko dobro, e... narafski, svi će jedan dan doč prid  sv. petra, niko neće ostat na ovu zemaljsku balotu za sime, e, pa će se tot i polagat računi.

šta još reč, a? volite beštijice, volite ljude, volite život... ko to more, puno more!

e...

danas san trefila jednega momka ča san ga učila dodatno matematiku (tj. davala mu repeticije) dok je odija u skulu. bija ja onda mali iako je po visini značajan, bija je i bokunić ustrašen, a matematika je parila strašna. šta je bilo dalje, a? a ništa, sili smo, vazeli blok, lapiš i počeli radit zadatke. pomalo, s pacijencon. strašno je bilo sve manje strašno i postalo je zabavno, u skulu je dobija pet i sve je tako bilo za pet, e...

a danas, a? evo upravo je uvatija kartu za ajduka, a inače kaže radi, u struci, jema lipi posal, zadovoljan. naša je i curu, jema temu već dvi godine i ubrzo se ženi. eto ti ga na, tako je to, nisi se ni ošerva, a godine prolaze. vrime leti, dica restu i već su judi.

neka mu je sa srićon!

pokušavan dobit još jedan novi, bitniji posal, pa san jutros poslala ponudu za to u split. jedna je ponuda za stranku za koju smo već radili otišla i u zagreb. jutros je bilo brrrr o' zime, jo da mi je bilo ostat u postelji, e, a sad je već bokun bolje. je li sta svit? je li se vrime zaplelo u švere, a? e a to je relativno, e... kako kome i kako šta, e... ajmo, ala, ala, nećem višje mudrovat, evo jedna dobra. guštajte!

e...

oblaci, sivi porti oliti luke i dan u kojen me jopet toka družit se s kartušinon...

kako znan da jedan od mojih najvjernijih čitatelja voli rundekove pisme, a ni meni rundekov umjetnički opus nije mrzak, dapače, evo malo rundeka...

dakleM, ajmo ča mislit na otok, rundek, odlična pisma, guštajte!  

 indigo by XVII, slikano danas

e...

moderno je na ovi internet reč šta upravo činiš. to ćete često vidit na facebook oli koji program za chat. a na blog, a? evo gren ja i ovod reč šta upravo činin, finili smo još jedan poslić za Marinu Kaštela , pa san napisala račun za njih. s njima stalno radimo, svako malo nam nešto naruče. ljudi su sasvin ok, pristojni, uredno plaćaju i zaradi čega im čovik onda ne bi radija, a? nadan se da će takvi i ostat.

jučer je nam bila strka kronikus, danas bokunić mirnije. e, to je sad, a ko zna ča će bit za uru oli dvi. narafski, tribalo bi već pomalo mislit i kakvi će mi bit obid, oče li jemat dobar ukus i odlično vonjat itd. međutin, mene danas jopet toka poč u zubara - kontrola, ne bi tribalo bit strašno. ipak, kako se u zadnje vrime stalno sa zubarima družin već me pomalo štufaje, e...

zato ću sad navit jednu dobru pismu, da mi bude bokunić lakše. jubavnu, e... jerbo je li misec jubav ili nije, a? hari. guštajte!

 kolure by xvii, slikano večeras u splitu

e...

jučer san malo bacila joko na tv, u emisiju kod mosora je doša ban. ma šta neki govorili o banu, meni je on čunka. zaradi čega, a? čovik lipo priča, nije dosadan ka političari, pisme su mu ludilo, sićaju me na mladost. eto zaradi tega.

bana se sićan još prije vengo se proslavija, ariva bi na ajduka, na sjever, masu puti su on i bjondi gogi iz špinuta znali donit gitaru, pa raspali, ožeži i onda su i manje utakmice na koje bi došlo svega sto svita bile super doživljaj - čak puno bolje vengo derbi. odavno ne gren na poljud, a i ban jučer kod mosora govori da ne gre. to triba izdurat, živci igraju, na kraju se stoji doma. nima veze, navijali mi na placu oli doma, ajduk živi vječno.

bana se sićan i kad je na voćnon trgu piva u maju na rige, s jednon staron španćjeron na ćiverici i puno radosti u sebi - skupilo bi se dvadeset svita i jemali smo dobru mužiku. poslin je broj pomalo resta. bilo nam je dobro, nije nam triba nikakvi glamurozni event na koji će doč neka tamo fifica i sl.

bitni su nam bili i koncerti o' isprid obojene na kaštelet, odili smo i to slušat ka da gremo na neko posebno važno misto. osamdesete su bile godine, split je onda još jema bokun duše, u njemu su se onda izgrađivali ban, gibonni, dino. malo ko je onda virova u njih, a vidi koje pisme jemamo danas.

šta je još priča ban kod mosora, a? e a da mu je pisma morska vila dobila samo 2 glasa o' iljadu svita i da mu se ni ruzinavi brod nije nešto dobro plasira. morsku vilu narafski poza rukometa znaju svi, a ruzinavi brod je meni toliko dobra pisma i ne moren virovat da još jema iko ko za nju ne zna. ajmo je ča navit. za sve one ča je vole i ča će je tek zavolit. uštekajte zvučnike i guštajte!  

lola slavonska:

dobre su ti pjesme na www.xvii-online.com, ali samo dalmatinske...

ima li koja slavonska?

xvii:

oli su mi samo dalmatinske? nađe se i još štagod. ok, ma bit će i slavonske... aj, stavit ću dvi lipe.

----------------

ja nisan ka političari da obećajen, a ne izvršin. evo, za slavonce, za dalmatince, za sve dobre ljude.  dvi pisme, po meni pune duše ča diraju drito u srce...

e...

jutros san bila na cesti kad je počela kiša. vraćan se od bena i gren prima tunelu. nije to bila obična kiša, ma ke, e, vozila san ja već puno puti po kiši, i twingića i druge tonobile, ovako nešto ne pamtin. zavoj isprid kašuna (ako gledate o' bena onda je isprid, e), dupli, opasan. cakal se iznutra zamagli skroz. za sekund, naglo, nevjerojatno. slabo se vidi. gospe moja, badan, vozin po njuhu. gren polako, ma isto mislin, bože, čuvaj nas, ako samo malo falijen, moremo izginit. nekako se dokopamo zvončaca, krpa u ruke i briši. vrag odnija ledenu kišu i temperaturne razlike. pojačan puvalicu oliti ventilaciju u tonobilu da bude bokun bolje. ajmo, kroza tunel, slobodna dalmacija i na mažuranićevo. počne i jopet, ali sad se bolje vidi.

dođen doma i gledan sunce kroza ponistru. čuva nas je dragi bog. narafski, i 25 km/h.

pouka: kad je kiša, triba vozit polako... bolje tako pa doč, vengo brzo i ne vratit se nikad doma.

  e... dikad je karta prazna, lapiš linčari na njoj.  čovik je štuf, dosta mu je svega. nije o' puno riči, štufalo ga je puno tega. fala bogu jeman se još force borit, u mene nije tako, ovi san lapiš vazela za ured, ka zafrkanciju i za sprdačinu, ali eto, ko god je zadnjih dan doša pita: - ma skužaj, ali di si ga vazela? i ja bi jedan takvi.

e, zaradi tega san ga danas slikala i š njin na net, pa ćemo reč cilon svitu di. jeste kurjoži, a? aj, špijat ću vam. joker centar, knjižara profil. eto tot. to mi je misto dobro, povirin kad stignen, vidin ča jema novega o' libri, odlično mi je ča se more sist i prelistat libre ka čovik, a eto, nadje se i ovakav lapiš.

a da san baš sasvin zadovoljna i nisan, tribalo bi puno tega počistit, pomest. ono, moj privatni i poslovni život gre nekako, fala ča se interesirate, dikad bolje, dikad gore - tot moren i sama puno tega prominit kad san o' volje, a moren i stisnit zube kad nešto ne more bolje, pa eto, gre kako gre, ne žalin se, ali ča se općenite situacije u zemlji tiče, to, to je uajme. jo koja ruzina i šporkica, gospe moja, tribalo bi i klore i dobar bruškin i narafski svega tega u ogromnin količinama, e...

a kad san već kod čišćenja, palo mi je napamet da vam pokažen i ča jedna moderna vištica triba jemat, e... 

najprvo maške oko sebe, žive, ali i jednoga crnoga paška o' pliša u tonobil... to je za sriću,e... je li mome pašku dobar fjok, a?

narafski, i jednega maška na dvi noge tribate stavit u srce, brez tega nikako ne more.

ajmo ča dalje...

moderna vištica triba i radit, a nikako ne smi ništa ne znat, triba  čitat, znat, bit pametna, obrazovana. uza sve to triba i bit smišnica jerbo nije babaroga vengo moderna vištica, e.... i šta još, a? eeeeee.... vozit tonobil, brez tega ne more, e... to vam je danas puno važno, e.... da znate samo koje su mi sve ričetine rekla muška justa dok nisan počela vozit, a sve apropo tonobila. ka da kakva san, da kako moren ne vozit, da ko je to vidija, e... a ja cili život u centru, tonobil mi baš puno i nije bija o' nike potribe, posta je to tek kad je grad naglo naresta, e....

i eto, danas XVII i šofira. narafski, samo kad moran, vožnja mi nije baš nešto u čemu guštan, e... znači vozin kad gren za poslon, kad gren po butigama i u drugin situacijama kad se baš mora. a šta, a? novi renault twingo i moren vam reč da je odličan, e... jušto za modernu višticu. vraški je ozbiljan, a perfomanse su mu za +5. oče renault dat koju kintu za reklamu, a? nisu još, ali možda jedan dan i dadu ko zna, e... sve se mislin koliko je pinezi ivano balić uvatija o' nissana, a nije reka njanci jednu rič, e... onda bi bija red da renault dat štagod kad ga stalno falin... barenko popust na ratkape, e... a ča se tega tiče, koji je ovo grad, gospe moja, na svaki tonobil vidiš friže o' pokušaja lupeštine ratkapi. ne bi da je ratkapa neka ogromna vridnost pa to idu krest....

vengo, danas san vozila u butigu plodine vizavi ove nove dvorane ča su je u splitu zgradili za prvenstvo svita u rukometu, a valjda će poslužit za još štagod. šta smo vazeli, a? aaaa svega i svačega, dovezla san pun portapak stvari i za život i za firmu oli za rad. cijene su dosta povoljne, butiga je uredna, parkinga otvorenoga i zatvorenoga koliko očeš (čak na nekoliko podi), sve u svemu ok, neka nastave ovako pa ću doč i jopet. narafski, sad ste kurjoži i tili bi bar jednu stvar da vam otkrijen ča se kupilo, e... a šta mislite, a? evo, šta jedna moderna vištica triba jemat, a? a teško da će poč vozit aeroplan, dosta joj je ča se i s tonobilon triba tramakavat, ali jedno sredstvo brez kojega vištica ne more je metla i to vesela... evo je na na litratu. jesan li ja to dobro kupila, a?

a šta ćemo s njon, a? šta mislite, a? ja mislin da bi najbolje bilo pomest kužinu i narafski da je ovako lipu i šesnu ne damo za ušestavanje države -  za tu svrhu triba štagod jače i čvršće, e... 

očemo sad finit, a? jesan dosta notala, a? aj očemo, gren ča radit štagod pametno, pozdravljan vas lipo... e, bravo, za sve kurjože još i ovo, katrige i stol san vazela u domoopreme ispod ajdukovog stadiona, a pod u ukusa povrj koteksa, kušine u specijaliziranu butigu ispod crikve gospe o' zdravlja, tot jemate kušine, lancune, koltrine i sl. naranče su iz plodina, a lapiš san narafski vratila u ured, tribat će mi....

e...

odlične riči i još bolja mužika.

trogir. lipe slike.

sićanja...

aj, fermajen.  ne more mi bit. guštajte!

e...

danas san brzinski prošla priko nazovirive, brzo, najbrže moguće ča me noge nose. a vrime i nije bilo skroz loše, da riva sliči na rivu čovik bi ferma, popija kavicu, odmorija malo, gleda more.

e, ne znan kako vi svitu moj, ali morete li virovat da ja još njanci jedan put nisan njanci minut sila na njanci jednu nazovišentadu na novoj nazovirivi u splitu, a?

a ča se tiče onih vrlih štekata sila san samo jedan jedini put i to kad su u split arivale sandra iz dubrovnika i selma iz šibenika i tot su već sidile kad san ja stigla pa san sila i ja. nazovikatriga mi opće nije bila po guštu.

višala i cili ostatak tega ambijenta mi se u pravon smislu te riči gade, to ča su tot učinili je kulturni zločin, ružno je, joko neugodno, straši čovika.

priko rive prođen brzo, u velikoj priši i na ton posranon dilu (skužajte na izrazu, ali baš tako) skoro nikad ne trefin nikoga poznatoga. veća je vjerojatnost da ću koga trefit o' zente do bača, na matejušku, na pjacu, u labuda i acya,  na merjanu, između škancija gospe o' kauflanda oli koje druge butige, bilo di... na rivi sad side neki drugi ljudi, moje poznate ja tot ne vidin.

a prije tega velikogaaaaa ređenja, ušestavanja, lickanja (o' pinezi nas građanina - da, da, to nije platija doktor sanader iz svoga žepa, vengo građani) san znala tot koga i trefit, proćakulat i ujutro i navečer, popit kofi. nikakva višala me nisu strašila, a vrućina nije isijavala iz nikakvih ružnih ploča ča su učinjene o' pitajboga čega.

bilo mi je drago doč na rivu.

možda nije bila savršena, možda je bila i šlampava, ali nekad je riva jemala dušu. sad se gledan s tega mista ča prije škapulat. i nisan jedina, e...

tužna san i fali mi moj split.

eto, ovo je još jedan od niza razloga zaradi čega hdz nikad neće dobit moj glas; ne dan ga živa, a ako me vrag odnese, da ste stali atento i ako ga budu tili na silu vazest vičite: a neš ne, mi smo svidoci, e, XVII je i na internet rekla NE , ni živa ni mrtva, e...

narafski, napominjen još jedan put za sve one ča nisu moji redoviti čitatelji da nisan član njanci jedne partije (fala bogu), ne lobiran za nikoga.

ko san ja, a? e... ja san samo mala, majušna rvatica. ona ča pošteno radi i po 12-16 uri na dan u svom malom, majušnom poduzeću i plaća poreze i sva druga davanja. ja san ona ča joj diplome i vozačka nisu falše.

(fala bogu - jerbo bit falšeta nije ništa lipo, narafski, a ča joj u ovoj bidnoj zemlji porezni obveznici financiraju i pretporodiljne i ča je se čuva ka niku posebnu dragocjenost, to je poveća sramota, e).

dakleM, ja san ona ča svojin radon zapravo financira cili cirkus. eto, ta. ta ča kune daje u rvacki i spliski proračun i nije zadovoljna kako se arče. jeman li prav išta reč s obziron da su to i moji pinezi, a? jeman, e... e pa kažen NE.

ekola, gren ča, ka ča vidite i danas mi je došlo malo mislit i razmišljat a kako takva pojava nije ni najmanje poželjna u lipoj našoj i danas ćemo reč: ako ćete me doč uapsit, dođite prije ponoći, poza tega ću zaspat, ujutro me, naime, toka radit. neko i to mora.

---------------

pitanja za vladajuće: koliko nam je dobro kad jedna visokoobrazovana peršona o' 36 godin koja radi i privređuje svako malo jema potribu napisat ovakav post, a? ča ste to o' hrvatske učinili? spavate li skroz mirne savjesti?

detalj iz porta I., by XVII, slikano danas

detalj iz porta II., by XVII, slikano danas

e... ovod u ovoj našoj lipoj dalmaciji skoro svaki muškić ča se oče da je pravi muškić jema barku oli brod i gre na ribe. malo koji ne gre, e... a kako on to gre, kako s pacijencon priprema ješku i brumu, kako za crva zna dat zadnje pineze, kako mu je parangal jedna o' važnijih stvari na popisu imovine, kako za poč u ribe jema staru maju i gače na buže i mače, kako mu brod vonje na friškinu, a s veslima skoro uvik ne zna di će, e to, sve to ću van ispripovidit jedan dan kad buden o' volje i vrimena, a sad bižin pomalo ča o' ove škatule, štufalo me višje, radin cili dan, pa evo tek jedna pisma koja će se virujen mnogima svidit.

jubavno-morska-ribarsko-moreplovska. guštajte!  

e... ovih san dana tekstovima bokunić dotakla jedan problem koji se nažalost javlja u lipoj našoj - problem naplate. nečuveno za civilizirane zemlje, kod nas stvarnost.

sad ću probat ovod reč onima ča tek kreću u posal zaradi čega je jako bitno da svoj rad naplatite. naplata vam triba bit imperativ. ako svoj rad ne naplatite, jako brzo ćete propast. kako? zašto? evo nekih natuknica koje su zapravo odgovori.

1. niste humanitarna organizacija, zaradi čega bi radili besplatno?

2. vama niko ništa neće dat besplatno, tribate platit i letriku i fit i kartu i računovođu...

3. besplatno morete radit za cili svit, to nije cilj. cilj je radit i za svoj rad dobit svoje pineze, a onda od tih pinezi ako baš očete dajte nekoj humanitarnoj organizaciji.

4. nikako dopustit da vam oni ča jemaju tvrtke, tonobile, kuće i brode ne plate - naplatit se triba i 100 kn. 100 po 100, e... neka jednome vazmu kartu za dvista kuna, drugome toner za 400 kuna, trećemu advokatsku uslugu za iljadu kuna, četvrtome prevoditeljsku uslugu, petome računovodstvenu uslugu i tako dalje - žive na tuđe špale i bahate se, a ti se čovik moj misli šta ćeš posli, e... a posli je gadno - detaljizirat ću i to, e... e, a da su u butigu  došli vazest pršut, a nisu ga platili, trkali bi policijoti za njima. da su došli u restoran obidvat, a nemaju za platit, prali bi pjate, e

5. ako se pročuje da vas je jedan uspija pokrest, probat će i drugi.

6. ne bojte se takvih ladoleža ča gledaju škivat plaćanje, nimaju oni nikakvu moć osin brezobrazluka i jezičine koja bi se mogla nazvat vargula o' konduta, e... jerbo, znate ko jema moć, a? moć jema oni ča jema 500 kuna, a ne oni ča ih nima, e... uza to priporučan da još jemate i znanje, te da sami pošteno radite, pa ćete uspit izač na kraj sa ovima ča probaju činit monade.

7. e, lipi broj. kažu sritan, e... a sad ću vam ja još lipše ovod reč ča će vam se o' sriće dogodit ako se ne uspijte naplatit.

a) morate platit radnika i davanja državi za njega. ako to ne učinite, radnik će vas tužit i ostvarit će svoja prava brez obzira ča vi niste naplatitli račun. davanja državi su značajna po iznosu - recimo ako očete nekome dat honorarno 100 kn neto, državi po tom honoraru gre još 97% (devedeset i sedan posto, e - dobro ste pročitali) a to je 97 kuna. na 1 000 kuna to je 970 kuna. kad se radi na ugovore o radu, davanja državi su nešto manja, ali tu se javljaju druge obveze prema radnicima i problemi.

b) brez obzira ča se niste uspili naplatit, državi morate platit pdv a on je u lipoj našoj još uvik 22% - (kojekakve jamstvene kartice da će se smanjit pdv doktora sanadera koje je dava biračima pred izbore su narafski obična pi*darija, lud bija ko mu je virova). ovo oče reč da ako je vaša usluga 100 kuna na to gre pdv o' 22% i to je 122 kune koje pišete na račun. hebivjetar vam ne plati, ali vi državi morate dat te 22 kune. na iljadu kuna vaše usluge  je 220 kuna državi, a na 20 000 kuna vaše usluge je 4 400 državi... obrti su ovod u boljem položaju - oni daju pdv samo ako su uspili naplatit svoju uslugu, a doo pdv mora dat uspija naplatit račun oli ne. narafski, neću sad reč da je bolje bit obrtnik, jema to svojih prednosti, ali i nedostataka.

c) državi baš i nije priša da vam pomogne svojim mehanizmima, ali drugo vam ne preporučam jerbo upotreba sile je protuzakonita i na takve načine ne triba rješavat problem. znači tribate jemat poveće strpljenje oli pacijencu. jemate još i tvrtke koje se bave naplatom na zakonite načine, te kompenzacije na fini i faktoring kod banaka - sve te usluge se narafski plaćaju jerbo niko za vas neće mukte radit. zato zapamtite, ne radite ni vi za nikoga mukte, vaš rad vridi i naplatite ga, a donacije lipo dajte unicefu oli kojoj drugoj humanitarnoj organizaciji.

dakleM, ne dajte se smest grubim ričima onih ča neće da plate račune, narafski da će vam poč svašta govorit, pa njihov je cilj ne platit i zaradi tega svašta i govore da se vi šticate i višje ne zovete za svoje pineze. zovite, budite uporni, a ako baš ne ide tako, utužite takve na Trgovački sud.

a šta govore kad neće da plate račun, a? uvik isto, ka papagala. reču vam da šta ih gnjavite, da su oni sad na skijanju i opuštanju, da su išli u dubai, pitaju vas jeste li toliko jadni kad ste se sad sitili njih zvat oko tega računa i pitaju vas oli ste ostali brez pinezi? finiji kažu da će platit sutra, a sutra jopet ponove isto. na to ne triba nasjedat, jadan je oni ča skija na tuđi račun i oni ča duguje, a ne pošten čovik.

dogodit će vam se u svemu tome još nešto. obavezno ćete kroza vrime doznat da oni ča je vama pravija problem oko plaćanja računa to čini i drugima. kako san u kontaktu sa dosta spliskih a i hrvatskih poduzeća, moren vam reč da se točno zna ko plaća, a ko ne plaća i čini monade. isto tako moren vam reč i da ovo višje nisu devedesete kad ti je svaka baraba mogla doč i kalašnjikovon otet šleper robe pa ne platit - itekako se gleda ko plaća uredno, a ko ne, te se muktašima sve manje želi radit. dakleM, ko ne plaća uredno sve teže pronalazi dobavljače tj. niko pametan mu višje ne daje svoju robu oli usluge... sasvin dovoljno jema ljudi ča plaćaju i rade normalno, pa muktaši višje nikome ne tribaju. nađite normalne stranke i klijente, a muktaše potirajte... ja upravo tako radin i dosad nisan propala.

ekola, gren ča, dosta o poslu, ali mislin da je sve ovo bilo dobro doznat...

e... veljača je misec jubavi, karnevala, maški. evo jedna lipa jubavna...

za koga gre, a? ma guštajte svi, zato i je tot, ali posebno bi pomno riči triba(li) slušat oni ča vole puštit da im svaka mona svašta o nekome nadrobi, a brez da promisle je li to jema veze s realnošću i more li bit istina oli ne...

e...

http://www.xvii-online.com/p-konacno-moji-pinezi/178905.html#links

mogli ste pročitat da nam je BROKER CO konačno namirija račun - to su učinili na način da je Ivica Vulić učinija uplatu. kako ja redovito plaćan račune za moju firmu priko firme i to priko računa koji nam je svugdi oglašen, a ne priko moje malenkosti oli tuđih računa, nisan baš ni bila sigurna da on more ovo učinit, ali eto napravija je... more oli ne more, pitajte advokate, poslovne savjetnike i sl. ja već jesan i znan ča su mi rekli.

zaradi čega nisu napravili uplatu s poslovnog računa koji su svugdi oglasili? ne znan. more bit blokada a i ne mora.

moje poduzeće Parametar doo nima ni sekund blokade, pa neman povećih spoznaja o takvim situacijama.

kako su nam bitno kasnili u plaćanju, danas sam na Trgovački sud u Split stavila da tražimo i kamate po tom računu.

narafski da je tako, e...  jerbo, zaradi čega bi ja mukte nekoga kreditirala i to na način da su me iz te firme još išli i vriđat?! daje li banka kredite brez kamata, a? more li se državi dugovat brezkamatno, a? e, pa ne more se ni mojoj firmi dugovat brezkamatno - uporna san, tražin i kamate...

ekola, nastavaci slide...

e... novi dan u novom misecu (koji je eto ariva a da nisi reka keks) nove godine ćemo i ovod na blogu započet novim... naš novi letak počeja se dilit po splitu i okolici, a na našem novom webu (čiji se redizajn bliži kraju i na stranim jezicima - to smo skoro pa gotovi, još malo i bit će i to finito) možete pročitat i o tim novostima. novosti će tot redovito bit objavljivane - ovo mi je informacija za sve drage kumpanje, ali i konkurenciju. zanima vas ča je novega, a? a povirite na www.parametar.hr i pročitajte...

ča se tiče www.xvii-online.com , narafski i tot morete nač sve šta vas zanima, i novo i staro, ovod i dalje gremo po ustaljenoj šemi tj. pratimo život, komentiramo sadašnjost, sićamo se prošlosti, nastojimo se kad je god moguće razveselit, napisat štagod lipo, stavit koji litrat oli film, pismu, ali bože moj, kad nas neko naidi oli nam štagod drugo grubo napravi, nećemo valjda to kupit u sebi i gucat, činit kuco. stavit ćemo na internet pa neka se zna ko čini monade, e... neka i takvih, narafski, da ih nije, postalo bi dosadno i ne bi vridilo.

ekola, zasad toliko, gren ča, posal zove...

e... evo jedan po meni puno lipi filmić sa jednega puno lipoga otoka. uvik kad ga pogledan ponovno me oduševi. i otok i film, e... murter. guštajte! zasad ovako, a čin bokunić stepli idemo na to misto. živin za ti dan, već se dogovaramo, XVII će vozit, ostali će guštat u otoku, dobroj spizi, lipoj ariji i moru, e... a ko će sve poč, a? e, to, to van ne moren odma reč, ne moremo odma otkrit sve tajne, vižitajite i dalje ovi blog, pa ćete bit obavišteni u ričima i litratima kako nam je bilo, ko je sve bija i kako smo se proveli...

http://www.xvii-online.com/p-jos-dug-dura/177416.html#links

dakleM, na tekst na kojega vodi gornji link san  danas dodala ovu žuntu.

žunta 02.02.2009. jutro - uvidom u naš račun vidimo da je vodeća agencija za nekretnine (ovako se sami nazivaju) konačno namirila račun u iznosu 506,30 kuna (s pdvom).

 ---------------------

e... sad. ovo notajen ovod da znate da se ja  ne bojin, da dužnike brez problema moren utužit i da oni ča mi prova bit dužan samo na kraju izvuče deblji kraj. nikad neću upotrijebit silu, samo zakonske metode, ali nije dobro ni njih kušat, e...

pouka: kad radite s Parametar doo Split , račun platite na vrime, tako vam je najbolje i najjednostavnije, e...

fala svim dragim ljudima koji su mi bili podrška u ovoj situaciji...

---------------------

žunta, 03.02.2009. , još detalja

http://www.xvii-online.com/p-uporna-san-trazin-i-kamate/178994.html#links

e....

jedna o' meni dražih plaža u split, ovčice, snimljeno nikidan by XVII

i jedna prigodna pisma, morska vila, ban je tot još mlad brez suvišnih kili, skoro da ga nećete pripoznat  

šta još reč, a? bože čuvaj našu branku, daj dobru igru i ako je ikako moguće zlatnu kolajnu. jerbo, miritaju je naši, e...