hehe, danas nije padala.

[inače, usrićila me je. kako san na zadnji pod, jopet jeman štetu u stanu zaradi višednevog padanja kiše. grr,čistimo, saniramo. mrvu je bolje otkad su napravili krov jerbo ne skupljamo vodu u kajine, ali još uvik nije skroz dobro i susida ča je nova predsjednica (stari je da ostavku) je već ponovo zvala upravitelja. triba bi doč iduću šetimanu.]

evo jedna dobra pisma, da nam je ne pofali, e...

Ka' i stare grote vrime život kala
i na sve lipote, prašina je pala
a tebe još vidim u slutnji, u sjeni
snovima te slidin, al te nema k meni...

Dugo nije pala kiša, na tu ljubav i lipotu
za tobom sam samo iša, ka za svitlom u životu
dugo nije pala kiša, ali nada još ne hlapi
Ljubav moja vratit će se, donijet će je prve kapi.  

san by xvii

izdržljiv je, vidite ga http://www.flickr.com/photos/xvii_st3/4285369682/ koliki je

inače, ovo su pahuljica i žućo, moje mace.

e...

ovih san dana tila kupit novi kauč za ured. tila i kupila, evo ga baš gledan kako se dobro uklopija u prostor, zadovoljna san.

a može li se tako nešto u splitu brez problema nač, a? splitu, e, onemu splitu ča je drugi grad po veličini u lipoj našoj, e...

ispod ajdukovog stadiona je nekad bija salon domooprema. tražila san ga i nisan ga našla, tot se višje ne prodaje mobilija. kako nisu ostavili  njanci biljetin di su i kud su, niman pojma ča im se dogodilo.

narafski da mobilije nima ni u zgradi di je nekad bila standa, a prije tega jadrantekstil. jadrantekstil je tot drža mobiliju kad san ja bila dite, ali od onda je dalmaciju poharačija šjor kutle i hdz, sve rvatina do rvatine (vidi zadnji tekst), pa nima višje ni jadrantekstila ni mobilije. to je bila ka mala prima.

poza tega je došla tu standa, ali i ona je otišla u prdac, a poza svega tega je ako dobro pamtin, tu proba nešto radit i kerum, ali je i to otišlo u prdac i sad super prostor u centru grada godinama zjapi prazan. oli je jedini? jemamo mi ekskluzivnih praznih prostora u užem i širem centru koliko god očeš praznih, e...

sićan se da san ka dite mobiliju u splitu jemala i kod otela marjan, ali i to je odavno otišlo u prdac.

di san još pogledala, a? na višje pode o' koteksa. e povišje jerbo i ona mobilija ča je bila doli u koteksa odavno višje nije tot. to je bija drža muž od one pivačice zrinke, ali to je odavno išlo ča. ovo na višje pode od koteksa je kataloška prodaja, prelistala san katalog i za moju potribu mi njanci jedan kauč nije pasa, pa nisan ni pitala pošto je. mislin da na tu butigu piše šimundža oli tako nešto, neka me skužaju ako san falila, nisan namjerno, e...

u splitu san uspila nač još čak dva salona, meblo u jokera i tot kauči pizaju oko 12 do 20 iljada kunića i to je prava prilika jerbo u art interijera  ča je na lovertu je ova cifra ča je  iz jokera neka gornja granica praktički startna cifra.

u art interijerima je bila i jedna prava prigoda, bokun kauča ča je piza 99 000 i nešto sitno sad jema skonto na nekih 45 000.

je dobro ste pročitali sve ovo ča piše o joker ciframa i art cifrma, ko mi ne viruje neka pođe vidit.

e sad, nisan žena o' šeika, moj otac nije pokra škver, a ne kreden ni ja, vengo krvavo radin (i radnin danom i vikendom, i danas san, a i sutra ću), pa san o' tih butiga odustala. narafski, da plivan u pinezima, ne bi za bokun mobilije izdvojila cifru za koju se more vazest tonobil. pamet mi fala bogu ne smeta. neka tot kupi koja pokondirena tikva, ja san se sitila jedne butige di san vazela namještaj kad san osnovala poduzeće i otišla san tamo. to je pisak namještaj u koplici. ljudi nimaju neki ekskluzivni salon, višje je koncipirano ka skladište, ali od namještaja tu možete nač dobrih i povoljnih stvari i ča je najvažnije ono ča ste platili i dobijete u roku dan dva.

izabrala san jedan lipi modri kauč prekjučer, platila karticom i danas je stiga. na šest rata i uz dostavu na peti pod oko 1550 kuna. gotovinski jema i neki popustić.

nije kožni, o' pliša je, ali meni se strašno svidija i odlično mi se uklopija u prostor. sad me baš zanima ča će reč stranke i svit ča radi za me.

vjerojatno se štagod mobilije može nač i u dugopolju, ali skužajte me, to nije split. u splitu praktički rvacki čovik koji živi od svoga rada more nešto nač u pisak namještaj i eto zaradi tega san ih ovod malo spomenila, da znate da ipak nešto jema. ča se tiče emmezete u kaštilima s njima sam davno jemala loša iskustva,  pa ih nećem besplatno reklamirat, a kad mrvu bolje pogledaš i to su kaštila, a ne split.

bravo drugi po veličini grade, ponuda ti je višje vengo dobra, e... narafski i najobičnije postole će te tražit iako jema butiga i izloga, a ako vam zatriba nešto sofisticirano ka ča je recimo gratakaža oli lazanjur, potraga će bit vrlo zanimljiva, samo nekoliko dana i nač će se nešto, e...

trenutno tražin tv, pa mi javite ako znate koju dobru butigu. u neke san već bila, neku sliku ponude već u glavi jeman, ali potraga još dura... za ured, ne triba mi kućno kino, dosta je i 55 cm...

fala svima koji mi pošalju neku informaciju, a fala i meni ča san vama dala informacije...

ekola, gren ča, subota je, šest uri pozapodne, finito posal.

e... vrime je korizme, odricanja i razmišljanja. evo ča san zaključila. skroznaskroz san neuzorita rvatica, može me bit stid i sram.  kako? zašto? 

evo nekoliko  razloga zaradi kojih san mali rvat, neuzoriti rvat. najprvo, plaćan poreze, a rvatine ih ne plaćaju. zaradi čega bi ih plaćali, a? oni su bogomdani, državi neće dat ništa, a vazest će joj sve.

nadalje, nisan vazela bandiru i š njon mavala di stignen, ono kad je praznik i nepraznik, petkon i svecon. nekako višje nosin rvacku  u srcu nego u mavanju bandiron. 

a di bi se moglo mavat bandiron, a? svugdi, e. na vinčanjima i sprovodima, u uredu i na merjanu. na rivi, na pjaci, na peristilu... di god očete.

evo, recimo, nisan se još udala, ali ne znači da neću. ne virujen da bi na mom vinčanju mogla bit velikaaaa bandira, kokoš na bandiri i ostali običaji veeelikih rvatina opravdani narodnim običajima za koje se zapravo pametan čovik pita: a iz kojeg i kakvog naroda nam je tako nešto stiglo, a?

da se mene pita, najprije bi taj event moga bit na provi broda, a spiza bi narafski bila riba, obotnica i školjke - sve iz mora. šta se mene tiče svi bi mogli doč u maju na rige i brez skupih darova, važno je da su dobro društvo i da ih bar nekoliko zna lipo pivat.

eto nek mi sad reču i da bogohulin, ali opče mi vinčanje u crikvi ne predstavlja nešto, samim tim šta je općepoznato da je u masu slučajeva nevjera jušto proporcionalna duljini vinčanice tj. šta je vinčanica bila dulja, šta se višje vukla po tleju, to je više jubavnika jemala uzorita rvatica ča se vinčala u crikvi, a tot bi  ka ča znate tribalo vladat pravilo ne poželi muškoga bližnje svoje. e a ona je poželila i pošćjera i vodoinstalatera i instruktora skijanja i instruktora u autoškoli itd.

ča se tiče uzvanika na piru, narafski šta je njih višje i ča je otel di je pir skuplji, muški jema višje jubavnica. je je to je oni naš uzoriti rvat ča se vinča u crikvi, a tot bi ka ča znate tribalo vladat pravilo ne poželi žemsku bližnjega svoga. e a on je poželija susidu, tajnicu, rodicu o' žene itd.

crikva kaže i ne laži, a dosta uzoritih rvata (rvatina poglavito) ča je u toj crikvi u prvi red obično jema štagod lažno: lažnu vozačku,  lažnu potvrdu da su bili u rat, a nisu se mrdnili iz svoga tinela, potvrdu s kojon su ka lažni invalidi iskamčili prijevremeni penžjun i sl.

crikva kaže i ne kredi, a koliko su samo rvatine pokrele.

tako to piše na papiru, u bibliji, ali kako to crikva OZBILJNO ne reče rvatinama da bi tribali bit bokun bolji judi i da se domovina na ovi način ne jubi, a? kako to crikva OZBILJNO ne objasni rvatinama deset božjih zapovidi, a?

štufa san višje  (rvackog) licemjera i licemjerja...

fermajen, neću višje, doč će me katolik od pamtivika, šjor milan bandić, optužit da bogohulin, e...

osin poreza ča ih rvatine ne plaćaju, jema i drugih stvari ča rvatina neće platit: režije, račune, plaće i doprinose nesritnicima koji rade za takve. ja to sve plaćan i narafski da san neuzorita rvatica i da san za svaku osudu.

u životu san upoznala različiti svit, različite nacije, rase, zanimanja. nisan netolerantna na (tamo neke drugačije) ljude, ne mislin da neko manje vridi zaradi tega ča je crnac, budist, arap. narafski, i to je za svaku osudu, uzoriti rvat neće, recimo, jednemu fureštu  japancu njanci reč di triba poč za vidit galeriju meštrović. šta on, viša rasa, jema pričat s tamo nekih malin, žutin, a? zapravo, uzoriti rvat njanci ne zna di je galerija meštrović, hebe se njega i za galerije i muzeje, to je tot samo hrpa nekih kipova i kamenja, šta će to njemu. uzoriti rvat ne čita, ne gre u teatar i sluša cajke. meni sve to skupa nije hrpa kamenja, volin i libre i teatar i ne slušan cajke, e, tribalo bi me metit na lomaču, znan. polit petroljen i užgat, kome tribaju takvi u rvackoj, a?

uzoriti rvat prdi, rutaje i kopa nos na javnom mistu, a evo su nikidan likari zaključili i da se ne voli baš puno prat. glavno da je banj uredija ka car. e i šta bi se sad u njemu pra, pa nije ga zaradi tega uredija. uredija ga je da mu stoji lipo i šesno kroza godine, neka susidi budu đeloži, neka se zna ko je mate, e... neka mu dura, e...

narafski da san i tot kontra od uzoritih rvata i kako vidin tutokompleto san očaj i katastrofa. bidna rvacka s ovakvima ka ča san ja. bidna, e... jerbo jeman ja  još grija, ne podmićujen nikoga, ne radin na crno. nisan u njanci jednoj partiji i nisan istukla susidu kad je prikjučer došla skupljat za vodu  - onu ča san je duperala za oprat se, e...

volin hrvatski jezik, volin i čakavicu mojih starih ka sastavni dil hrvatskoga jezika. uzoritoga rvata se narafski friga za jezik, kome jezik opče triba, bitno je zaurlat kako si rvatina i ništa drugo nije važno.

ekola, doznali ste moje najveće sramote, gren ča. triba se pokrit ušima.

jezik je namjerno doša na zadnje misto, ne vidin ni da ga skule poštuju (tjelesni bude prvi sat, a hrvatski jezik sedmi), a ni foji, tv, radijo, pa eto, a di š njin onda na blogu, a?

e...

pozapodne san bila malo protegnit noge

(narafski, koliko se to opče more o' kerumovih buža koje je učinija kod otela marjan u izgradnji)

do brodova.

evo ću vam litratima šapnit kako su.

peškano mobitelom, klik za veće. 

među brodovima by xvii

Galerija umjetnina Split

Galerija Emanuel Vidović Split

ovo su moje preporuke za vižitat. virtualno i realno, e...

e... kad rečemo poljud, odma je u justima rič ajduk, stadion. danas me tokalo poč do poljuda. palo mi je na pamet da, iako www.xvii-online.com dura višje o' pet godin, nikad ovod nije bija samostan ča je na poljudu. ajmo ga ča stavit, klik za veće. 

franjevački samostan, poljud, split, by xvii

stranice na zadanu temu su:

• http://samostan-poljud.com/povijesni-pregled
• http://samostan-poljud.com/crkva
• http://samostan-poljud.com/klaustar
• http://samostan-poljud.com/muzejska-zbirka
• http://samostan-poljud.com/knjiznica

e...

sićan se kad san bila študent da san pazila da mi svaki seminarski oli vježba bude točno izračunat, nisan radove predavala samo da ih predan. narafski, nisu svi bili takvi. pantin neke koji su namjerno štrapali brojeve u tablice i lipo bi rekli: ma šta jema veze, oli će to ko gledat, a?

niki su profešuri gledali, niki nisu, a ja san najviše gledala sama sebi. propala bi u zemlju o' srama da nisan bila savjesna i temeljita i sve lipo i šesno izračunala.

na poslu je isto tako, mnogi štrapaju, nije ih briga, a moto im je ma šta jema veze, oli će to ko gledat.

ide ih dok ih ide, neke uvik dobro, neke i ne, pa laganini uvate i pržun.

sebi uvik gledan sve, a i drugima, nisan od te vrsti da štrapan. ma ke, e... niti mi to more bit, a niti bi ja tila takva bit.

interesantno je dokle su sve ljudi stigli koristeći moto ma šta jema veze, oli će to ko gledat.

potpisuju se umisto drugih, lažno se predstavljaju, krivotvore, kredu materi iz takujina, kredu iz blagajne na poslu, kredu na malo, kredu na veliko, ubiju, ma svašta nešto, a uvik u uvjerenju da ama baš niko nikad neće ništa gledat.

a koliko se išta realno gleda? nažalost malo i ništa. zaradi tega nam i je kako je.

evo primjera iz života.

tonobil vozin godinu i po. doduše, na cesti nisan svaki dan jerbo san zadrti pješak, ali ajmo reč da otprilike vozin svaki treći, četvrti dan. ovo oče reč da ipak vozin i da mi vozačka ne stoji u škafetinu. znate koliko su mi puti dosad šjor policijoti pregledali vozačku? ne znate, a? njanci jedanput. bilo bi bolje da koji put jesu. zašto? e... kako se vozačke ne gledaju, tako puno svita pod motom oli će ko šta gledat gre vozit brez vozačke i poza tega obično jemamo crnu kroniku punu vijesti o' nesrićama i mrtvima.

kad ne gledaju policijoti, gledala san sama - nije mi palo na pamet poč vozit brez vozačke, e... uvik govorin: vožnja brez vozačke je jedna od povećih gnjusnih gadarija koje govno zvano čovik more učinit.  e ma nisu svi takvi, mnogima se frigalo i otišli su vozit brez vozačke, ugrozili i sebe i druge.

ajmo ča dalje, osin vozačke jema još dokumenata. posal san u lipoj našoj tražila puste godine i nikad me niko nije pita da mu pokažen njanci jedan dokument. osobna, diploma/e, domovnica, radna knjižica, nosila san ja to sa sebon po razgovorima i testiranjima, ali njanci jedan poslodavac u lipoj našoj nije jema potribu pregledat dokumente a u pitanju je ka bilo zaposlenje. krasno. prekrasno. narafski i bolje da me nisu zaposlili kad su tako imbečilni. danas fala bogu radin za se, moje diplome su na zidu u uredu i svak ih more vidit, a ča se tiče onih peršona kojima ja dajen posla , svima san pregledala dokumente. živimo o' svoga rada, pa nam ne tribaju falšte ka ča je ova.

s obziron da me svakodnevno turpijaju, evo, koristin i ovu priliku da rečen, ako čovik/žena nima stručnu spremu koja je potribna za konkretan posal, neka ne troši pineze na telefon, vrime na vatanje veza, zivkanje, dosađivanje. kod mene to ne prolazi, nisan ja hdz, e... tamo ajte tražit posal brez adekvatne stručne spreme, a ne kod mene, e...

u adeze se općenito ništa ne gleda i ništa nije bitno - zanimljivo kako jemaju obraza napadat novoga prežidenta da nije gleda za onega savjetnika, ma gleda je čovik, gleda i  brzo ga se rišija, e... ako ko ne gleda, to je partija koja je nažalost na vlasti. oni gledaju samo ko je čiji rodijak i netjak i poza dvadeset godin takvoga pristupa i jemamo državu u banani. nikakvo čudo.

a koliko se gledalo kad nam je radovan karadžić doša litovat na čiovo ka dotur dabić, a? ispada da svaki terorist i ratni zločinac more puštit bradu i brke i neometano uč u lipu našu, oli ko šta gleda, a? NEVJEROJATNO!

primjera jeman još bezbroj, nestale su miljarde, upropašteni su životi i sudbine, a sve zaradi tega jerbo niko ništa ne gleda.

čoviče, probudi se, otvori joči. bog ti ih je da da njima gledaš. gledaj! gledaj barenko za se, kad već drugi nigdi ništa ne gledaju.

e... nekako mi se pari da bi libar i postelja mogli bit čoviku najbolji kumpanji pozapodne na ovi veliki potop... ;)

aci by xvii

e... za zaposlenje, pa i honorarno, pregledam diplomu. ona i CV su važni, a ne tko je čiji rodijak. račune plaćam i tražim da ih se plati. plaćam i poreze, a zbog ovakvog pristupa sam više puta bila ismijavana u ovoj bidnoj zemlji.

predsjednik je obeća RED i kako vidim uvodi ga ODMAH.

svaka mu čast, ako netko nije radio po propisima, ne može biti savjetnik.

pomalo će prevaranti, lašci, lupeži i kojekakvi nikogovići tamo di im je i misto, neka samo nastavi ovako kako je počeja.

hrvatska zaslužuje najbolje, prosperitet, rad i poštenje. predugo je bila ponižena.

link:

http://www.slobodnadalmacija.hr/Novosti/Hrvatska/Hrvatska/tabid/66/articleType/ArticleView/articleId/92461/Default.aspx

morske by xvii

e...

novi vijađ, novi kapo.

konačno preženca o' čovika.

virujen da će vrime i čovik ča slidi

konačno donit poštivanje:

- drugoga čovika,

- poštenja,

- rada,

- kulture,

- obrazovanja.

želin mu svaku sriću!

stari krovovi, livanjska ulica, split by xvii

e...

hebi ga barba poteštate, ali meni su pozapodne sasvin nenadano naresle uši. 

evo vidite kolike su, jedva su mi u litrat stale. narafski, nisan znala šta ću, mislila san se koga zvat upomoć i na kraju san rekla šta je tu je, jeman uši, gren vanka, more bit da štagod i pametno njima čujen, e...

e ma dok san ja mislila šta ću s ušimaN, uteka mi je oni vaš karneval od pet uri pozapodne i ono paljenje krnje u uru za malu dicu.

uspila san stič na rokete i sve san se čudila kako to na maškare rokete, pa oli one nisu za novu godinu, a? 

onda su mi objasnili da se biće barba žekiju rodilo dite i da je zaradi tega zapravo fešta, a ako nije da će ubrzo.

a oče li ovi tunel ubrzo, a?

pa da kikaš brend dođe brže i u split, e... 

i da se nasmijemo ka judi

kad pravi krnje ulicama grada splita projuri...

poza ovega san otišla ča i uši su mi sasvin nadano završile na sigurno misto. narafski, nadan da neću završit u pržunu zaradi tega ča san ovo stavila na net

hebi ga barba poteštate, ja san dite splita, volin ajduka, volin moj grad i volin spliske batude, a one nimaju rokete za maškare, e... ma ke, e...

maškare 2010 split, krnjeval 2010, karneval 2010 , još ovod:

http://www.flickr.com/photos/xvii_st3/sets/72157623323858303/

spliska riva i dica na pokladni utorak 16-02-2010

e... apropo ovega je danas na trgovačkom sudu bilo ročište, međutim u ime dužnika nije doša niko, a na sudu mi je rečeno da im nisu uspili uručiti poziv i da će ih zvat ponovo.

ovod pratin i dalje kako se šta bude događalo.... baš je interesantno.

morska by xvii

voćni trg by xvii

za sve one koji vole...

sritno oli nesritno...

bitno je samo da je iskreno.

nešto slatko, u susret valentinovu ;)

prokurative u pravilnom trokutu sjena by xvii

ćićo, ženskica, pozerica by xvii moja maca

u misecu maški

lipota by xvii, klik za veće

e...

to su bili crtići...

vučina i tri gudina - krajnje dramatično i vrlo poučno :)

kiša by xvii

e... s obzirom da ove godine maškare idu u organizaciji grada, a ovo pak oče reč barba žekija, baš me zanima oče li mu kumpanjo svaguša pomoć oko krafena... onih ča se inače besplatno dile kad su maškare :))))

e...

proširila san renault ergelu.

pinezi jeman pa je ovo prošlo gotovinski bez kredita, leasinga i sl.

a za šta mi ovo triba, a? kurjoži, a?

[jedna muška zvir će sad reč: ditinjasta bila, ditinjasta ostala, a eto sad su još i autići upali u nemali opus ditinjarija... ]

neka reče ko god šta oče, friga mi se šta ko govori... 

ovin autićima naučit ću još koje dite fiziku.

stotine oni ča san ih dosad naučila su učili na drugin autićima.

neki su otišli na dar, neki su otpisani i tako to, pa je tribalo je mrvu poboljšat vozni park... kupljeno nikidan u renault gašperova za sveukupno 30 kn.

eto sad sve znate...

inače vozin renault twingo isti ka taj narančasti na sliku samo bokunić veći. bile kolure, e, a fizika mi dobro dođe za pokrit troškove oko njega.

e... pa piše:

mojoj jubavi - VOLIN TE!

ne virujete, a?

evo ovod, e...

ovo van je kad se gre o matejuške put

otela marjan u izgradnji (, ova mi je dobra),

ali ne uz more vengo gornjin puten.

e sad? mojoj jubavi - VOLIN TE!

lipo, šesno, puna justa jubavi. pitan sa samo a šta bi sa svojon jubavi tribalo činit ako ne volit?! valjda svoju jubav i triba volit, a ne mrzit, e...

prsti by xvii

moji, slikala san ih mobačen a da nisan ni znala.

kad san ih učinila u sivo, parilo mi se da litrat more proč :)

e...

ovih dana se sve po butigama

crveni o' srca i ruža.

kupi,

kupi mi,

kupi me...

kažu to je romantika.

fala, ali meni ne triba ništa.

ne triba mi tica jurilica,

ne triba mi jahtica.

ne tribaju mi dijamanti,

briljanti,

kadene,

bračoleti.

ne triba mi zlato,

srebro,

biseri.

ne triba mi cviće, kolonje, parfemi.

ne tribaju mi skupa putovanja i večere.

ne triba mi njanci jedan sms.

meni si uvik bija drag

brez ičega ča se triba platit.

sve šta mi triba je da me se sitiš,

a kad se sitiš da se nasmiješ jušto

ka oni dan kad smo se upoznali.

-------------------------

eto, možda nisan romantična, šta ću,

ali ovo je moj predvalentinovski post...

ne tuci po košnici ako hoćeš meda...

iz prirode by xvii

i

ispod istog neba by xvii

u plavetnilu by xvii

na ježincu by xvii

a ča danas činit za obid, a? očemo jednu buzaru, a?

u teči by xvii, riceta gre ovako.

stari,

novi.

kupljeni,

dobiveni na dar.

sivi,

u žarkin kolurama...

stoje svi zajedno

na škanciji

o' libri...

ni im tisno,

uvik se za još kojeg

nađe misto... 

libri by xvii, detalj iz moga ureda

dobar vitar by xvii

srebro by xvii

jedan stariji rad iz 2006. i jedan friški tj. iz 2010. 

sveti duje by xvii, lapiš (olovka)

klik za veće

konfužjun kišnog petka by xvii

DOOR

dobila sam poziv i danas sam im poslala svoju pristupnicu.

kraj mora by xvii

e... otiša je u prdac tv, frižider, mašina za pranje robe, mobitel, kompjuter i sl. i di sad s tin, a? uza cestu? u kantu o' škovaca? susidu isprid vrata?

NE

škovace takvog tipa se prema zakonu zbrinjavaju na način da se nazove besplatni telefon i priko njega dobije besplatni odvoz elektro/elektroničkog otpada.

www.eeotpad.com

najlipše molin sve ljude koji ovo pročitaju da pošalju svin svojin kumpanjima (prijateljima) i kontaktima ovaj adres. važno je! danas sam skontala da mnogi za ovo uopće ne znaju, a tribali bi. jemamo samo jednu zemaljsku balotu, triba je čuvat.

ajme, smrzla mi se i duša i tilo,
jutros dok san vozila je na
radijo govorilo da je u splitu 2 stupnja.
jedva čekan lito, doli zima!
evo jedna pisma za ugrijat se...:)

detalj s manuša by xvii, kliknite, more se bitno uvećat

put prolića by xvii, 31.01.2010., merjan, split

švere se miču,

vrime nikad ne fermaje.

proliće će jopet doč.

sunce nam se smije kroza jarbole,

još malo i partit će i ova zima.

put sunca by xvii, 31.01.2010., aci, split

e...

stranica na facebooku

pomalo, ali sigurno reste.

dodane su slike (jema fotki, ali i crteža), linkovi oli poveznice, bilješke, omiljene stranice, povirite, more se tu već puno tega nač. fala.

za opuštanje jema više albuma,

a danas posebno preporučam naš album naziva :)

to je ovi:

http://www.facebook.com/album.php?aid=197041&id=304722745791

fala lipa svima koji su nam već postali obožavatelji, jema tot naših djelatnika, zadovoljnih klijenata, mojih kumpanji, kumpanji od kumpanji, kolega iz branše, kolega iz branše do itd. pridužite se i vi, ulaz je slobodan za sve dobre ljude dobrih namjera, a ja obećajen da ću dat sve od sebe da tot ne bude dosadno. 

duje by xvii