Murter, Groblje Gradina, 29.03.2008. by XVII, klik za veće

e...

ovih dana...

šta reč, a? umrla mi je baka s očeve strane. sahrana je bila tiha jerbo baka je jušto tako i živila, mirno, skromno. sad počiva na otoku murteru, praktički uza samo more. neka joj je laka zemlja.

Marija Magazin

(Marica)

1920. -2008.

mislin da se njanci jedan dalmatinac ni dalmatinka ne bi bunija da počiva uz more. jema par slika tot gori, a litrate same sahrane ću ipak zadržat u obitelji ka nešto preosobno. ako kojega člana fameje interesira, more mi se komodno javit. fala svima ča su meni i mojoj obitelji izrazili sućut oli pomogli na bilo koji način.

-------------------------------

još litrati sa murtera: 

 http://www.flickr.com/photos/xvii_st3/sets/72157604321122588/

sve se more uvećati klikom, pogledajte, jema dobrih slika, pogotovu vridi vidit marinu hraminu, nju još nisan stivavala ovod, na ovi blog.

e...

kad  mene neko nazove na mobitel, onda me obavezno poslin pita:

- ma kako ti to piva oliver kad te zoven, a? aj, namisti i meni tako nešto, e...

kako ćete to učinit? kako ušestat svoj mobitel, a?

uputica za VIP-ove korisnike:

1. najprvo poč na www.vip.hr

2. u desni kantun piše Vodafone live! tot kliknit i na meniju odabrat ono šta očeš.

pod halo melodije je izbor mužike ča se more kupit da svira dok se ne javiš. u toj ponudi nije samo mužika, jema i dobrih batudi. izabereš ča ti paše, naručiš i kupiš. platiš sa svoga VIP računa. naručeno preuzmeš priko sms poruke ča ti ariva.

za puno puno kurjože:

- kad me zovete čut ćete oliverovu pismu galeb i ja.

ajmo ča dalje. ča ne bi lipo sviralo i tebi kad te neko zove, a? tu mužiku moreš kupit na opciji melodije.

za puno puno kurjože:

- kad me zovete i ja čujen oliverovu pismu galeb i ja.

narafski, neće sad cila zemaljska balota namistit baš ovu mužiku. izaberite lipo ono ča se vama sviđa. ova ča vama svira se plati jednokratno, a ova ča drugima svira dođe svaki misec dvi tri kune, tako nešto.

možete izabrat i koju lipu sliku/animaciju pa je namistite sebi ka sliku koju ćete vidit kad otvorite mobitel oli pozadinu, a morete i neku sliku kupit pa je poslin poslat nekome ka mali znak pažnje oli ka dobru batudu.

sve skupa je papilova, ali meni je baš smišno oli ča bi moderno rekli simpa. danas san kupi jednu sliju cvića (neka mi i mob vonje na proliće, e) , a našlo bi se u mene i nekih slija maški, pa srčeko i tako to.

teknika more bit i vesela.

fala XVII :)

žuto zeleni svit oli iz merjanske lipote by XVII, slikano prikjučer, klik za veće

e...

Libri. ča bi brez njih, a?

probajte zamislit kako bi izgleda svit da se znanje nije prenosilo. 

duša čovika ča čita biva lipša, e... izričaj bogatiji.

jema tega još.

libar je jedna od bitnijih stvari ča je čovik izmislija.

s obziron na važnost, libar bi triba jemat posebno misto. ono se zove knjižnica, gradska, fakultetska, znanstvena oli kućna, a jemamo i knjižare. ši. tot im je misto i ne bunin se, neću na to opće činit kontru.

međutim, puno je bidan libar ča ga strefi mižerjasta sudbina da po 19 oli 29 kuna iz godine u godinu bude prodavan na sajmu (upravo dura book fest u dioklecijanove podrume i jema ih jušto za  te sume koliko oćeš) , a svit ga ni za tu mižerjastu sumu neće iako to opće nije loš libar, ali svit ga neće jerbo ne smatra da mu u životu ikakav libar triba. libre dupera recimo za kiselit kupus oli umisto noge o' armeruna.

jema li šta gore, a?

ma jema, e... uvik jema i gore.

nikidan mi je joko na trafiku (ej, na trafiku di je misto fojima i lizalicama za dicu) sinjalo dostojevskog.

gospe moja.

civilizacijo di greš? je li te barenko mrvu sram?

split by XVII, slikano jučer pozapodne, klik za veće

split se priprema za croatia boat show, obrisi sajma se već vide

www.croatiaboatshow.com

datum događanja: 05.-13.04.2008.

 5 za 5 oli pozapodnevni litrat by XVII, klik za veće

e...

poza svih utakmic ča ih je jema u nogan,  partija je meštar.

ovi grad je izgubija još jedan simbol, čovika ča mu je puno da.

adio roko!

boris dvornik 1939. - 2008.

galebi na ćakuli, fermaj malo, nigdi nije priša by XVII,

slikano prekjučer, more se još bokunić uvećat klikon

terina s opituranin jajima i goluzarijama, zec o' čikolate u gače na rige, xvii, vesele kolure...

sritan uskrs iz moga doma!

happy easter!

sritan uskrs! lipi blagdani!

---------------------------

e... kako je lani bilo puno lipih jaja (svako morete uvećat klikon, ovoga duju gori isto) svit me pita: kako do ovega jaja, a?

1. najprvo učinite litrat oli sliku.

2. poza tega triba duperat http://www.dumpr.net/

3. onda morete sliju snimit, emajlirat, otprintat, stavit na blog, ma štagod očete...

-------------------

pozdravljan lipo, guštajte!

ideje za dane ča dolaze:

- kupit (najbolje su u šjor kirigina, tot je stvarno tradicija i nima joj ravne) i guštat sirnicu,

- kupit i guštat drugu lipu spizu, a nikako ne zaboravit čokoladnog zeca,

- opiturat jaja, ne moraju bit za izložbu, ali eto, jednostavno vazmite flomastere i crtajte, crtajte šta god van padne na pamet, srčeka, djeteline, more, sunce, šare. svako jaje će bit posebno, lipo i jedinstveno, a to i je bit,

- pošaljite čestitke ljudima koje volite. javite se dragim peršonama,

- odite na koji mali izlet ako potrefi lipo vrime oli jednostavno prošetajte po merjanu, može i po plažama, kaštelet, bačvice, ovčice...

- popijte kavicu na suncu, povirite do labuda oli acya, more i zente,

- pročitajte koju rigu iz kojega dobroga libra,

- pogledajte koji dobar film oli seriju,

- crtajte, zapivajte, zaplešite,

- naspavajte se, odmorite se,

- nasmijite se i radujte se proliću ča stiže, novi život se budi, a to je zapravo i smisao blagdana koji su pred nama!

da, da, ja ću radit baš ovo ;)

e... evo nekih korisnih adresa:

posložite svoje omiljene adrese u www.aboogy.com i lipo ćete jemat svoje adrese uvik sa sebon, sve šta morate pamtit je ta jedna adresa, duperat se može svugdi, na bilo kojen računalu spojenon na net u svitu. ovo smo već preporučivali, ali je dobro pa preporučujen i jopet. besplatno oli free.

objavite svoje litrate oli slike na internetu, stecite nove kumpanje i na taj način. jema više servisa, naš, sasvin solidan i besplatan je www.pticica.com , a jedan od boljih stranih www.flickr.com (besplatan do 200 slika).

ukrasite svoje računalo sasvin besplatno, evo jedan od siteova di morete nač odlične wallpapere http://www.fantom-xp.com/ .

za puno puno kurjože:

u mene je trenutno ova slija

http://wallpapers.free-review.net/21__Wall_Bulb.htm

očistite svoje računalo od spywarea: http://www.lavasoftusa.com/ , sasvin besplatno, preporučljivo učinit svaku šetimanu jerbo vrag je crni taj spyware, e...

zaštitie svoje računalo nekim antivirusnim programom, evo, mislim da ovi nije loš, sasvin je besplatan, plaća se jedino za neke osebujnije primjene, jema i cro verziju: http://www.avast.com/

skinite besplatan office paket koji sasvin dobro radi i uštedite na kupnji officea. http://www.openoffice.org/  za običnoga čovika sasvin dovoljan programski paket, jema za pisat tekst, za činit tablične proračune, za crtat, za činit prezentacije.

skinite besplatan preglednik slika, sasvin je solidan.

http://www.irfanview.com/

upoznajte nove ljude, ćakulajte priko neta.

http://www.icq.com/ (tot san isto XVII, icq number mi je: 257598142 i da, moguće je priko neta upoznati svita, ja tako znan stotine ljudi).

pošaljite lipu elektroničku kartolinu sasvin besplatno nekom dragom. servisa za to koliko očeš, ali po meni baš lipih čestitki za svaku prigodu (pa tako i za uskrs)  jema ovod:

http://www.yahoo.americangreetings.com/

narafski, morete otvorit i blog, recimo na www.mojblog.hr potpuno besplatno. pišite, stavite koju sliju, izrazite svoje mišljenje, nađite istomišljenike.

možete puno toga, nač novi posal http://www.moj-posao.net/ , upoznat zanimljivih ljudi, naučit puno tega, spojit korisno s ugodnim.

itd. jema na netu puno dobrih stvari, pametni znaju čemu služi internet. ovo je tek nešto, dat ću ja s vrimenon još dobrih linkova, zasad dosta, e... :)

e... vozilo se. tunel 60, kod škvera 60, na domovinskog rata 60. to mi nije došlo nesvjesno, vengo svjesno. i sad mi je drago ča se to uspilo. slike su mi bile dosta uredne kroza tunel i na domovinskog rata , ali kod škvera jedva izdrži moje malo žensko srce tih 60 .

još san bokun među sporima kad činin livo skretanje, instruktor govori da i to triba poboljšat i ja mu virujen.

danas mi se dogodila greška za kružni tok, to ću zapamtit za cili život, a i jedan bus mi je bija na stanici isprid mene, čeka čovik vrime polaska, a meni nekako trta mrta za obač ga. učinili smo na kraju i to jerbo me instruktor pripa da ćemo sad tot stat 10 oli 15 minuti jerbo ko zna kad mu je vrime za krenit i parilo mi se da moren postat i penžjunat tot, pa ajde idemo onda naprid.

eto, to je to, bit ću valjda bokunić bolje svakin narednin vježbanjen. virujen.

do tada ajmo ča na noge, šetat, lipo je vrime...

dica i more, by XVII, slikano prikjučer, klik za veće

hehe, tako blizu, a i jopet jedan na ježinac, a drugi na kaštelet

tamarisi, by XVII, slikano prekjučer, klik za veće

e, kad bi ovi tamarisi pričat znali, o mnogin spliskin jubavima bi jemali šta reč...

zvončac, by XVII, slikano prikjučer, klik za veće

još samo malo i eto proliće, na zvončac je već stiglo...

eto, ča jema veze ča je vrime danas gnjilo, a? ne triba bit dišperan, lipota je oko nas, finit će i oblačni dan...

e...

da vidimo najprvo šta oču. oču:

- poč na murter kad me volja i ne ovisit o drugome.

- poč na sva ostala lipa mista kad me volja i ne ovisit o drugome.

- vozit kad mi triba za posal, ne tramakavat se u busu do zagreba.

- jemat dicu kad ih bog da i vozit ih di im bude tribalo, pokazat im sva lipa mista.

- moč odvest moje maške u veterinara kad im triba.

- upisat se u kakav klub u vlaškoj di su konji i poč slobodno, neovisno o drugome tot.

- poč u velike butige u kaštila i dugopolje kupit štagod.

jema još, ali ovo mi je prvo palo napamet.

zaradi tega mogu dovršit vozački. nima se tot više šta mudrovat, mogu i to je to. ;)

ovi post ću iskoristit i da se zafalin svima koji su me do sad vozili di god je tribalo, odnosno izlazili mi u susret na sve moguće načine jerbo se drugačije nije moglo kad bijah u nevoznom stanju. mnogi od tih ljudi čitaju ovi blog, pa mislin da priliči i ovod to napisat. ;)

barka i mriža, by XVII, slikano jučer, klik za veće

duje i roko, by XVII, slikano jučer, klik za veće

e...

sinjajete li da je sve višje i višje butigi po po šolda tipa china shop, sve po 8, 10, 12, mix shop i sl.? skoro su na svakon kantunu. kad u bilo koju uliziš, jednako vonje na neki meni nesimpatičan, ustajali vonj. sve višje azijata u njima radi. u split se događa isto ono ča je zagreb dovatilo pred nikoliko godin, stižu kinezi.

svit sve višje ulazi u te butige, pari mi se da je to jedino ča se ne zatvara i ne propada. jema jedna i u mom kvartu, vidin šjor kineza ča u nju radi i po cesti, vozi se u bmwu.

zaradi čega je to tako?

zaradi tega šta prosječan čovik:

- ne sidi u saboru i nima iljade i iljade kuna u buštu svaki misec,

- nije otiša opljačkat banku oli poštu s bičvon na glavi,

- mix butiga o' svega i svačega mu je ponudila nešto jeftinije i tot sebi nešto i more kupit.

ta je roba po mome skromnom mišljenju upitne kvalitete, nije baš ni sve ne znan kako jeftinije (ista je stvar i na pazaru), ali ako čovik more pronač barenko nešto jeftinije, on tot ulazi. to je jednostavno životno i neće se prominit.

... i rađa im gre. kupili kinezi bmw-e.

ekola! idemo dalje!

samo ne znan di.

u europu?

prije put siromašnih zemalja azije, e...

bogate nas neće, šta ćemo im, e...

rvacka je navodno u petoj brzini kako reče šjor sanader, a ja baš jučer govorin dici na podukama oli repeticijama iz fizike da bi nam tribala treća kozmička brzina za izač iz kakice u kojoj smo. jemaju 15 godin i smiju se, e... sve im je već kjaro, znaju i ko je ča jamija i da oni ča je jamija neće nikad u pržun, a ja se sa 35 godin još uvik čudin. možda bi i meni tribala treća kozmička jerbo to bi valjda bilo dosta za uteč daleko o' lipe i šesne "komedije", ne smin reč tragedije da me ne dođu uapsit, e...

________________

za one ča ne znaju:

1. kozmička brzina - brzina potribna za postavljanje tijela u kružnu stazu oko Zemlje (pazi, tot još uvik ne napuštamo Zemljino gravitacijsko polje!)

2. kozmička brzina - potribna za uteč iz gravitacijskog polja Zemlje

3. kozmička brzina - potribna za savladat i gravitacijsko polje Zemlje i gravitacijsko polje Sunca

-----------------------------

5. brzina, nima veze s kozmičkima, to je kod tonobila, najviši stupanj prijenosa.

---------------------------

za ilustraciju, 1. kozmička se odredi izjednačavanjen izraza za silu teže i izraza za centripetalnu silu. uz dvi rige izvoda, koje ću jednom kad buden o' volje ovod dat , ispadne:

v=sqrt(rxg)

v - prva kozmička brzina

sqrt - drugi korijen

r- polumjer Zemlje r=6370 km

g - akceleracija sile teže g= 10 m/s²

uz r=6370 km i g= 10 m/s² dobije se brzina od 8 km/s...

e... evo, koristin bokunić vrimena između podučavanja dice o' jutros i onega ča slidi pozapodne.

čitan stare tekstove o učenju vožnje jerbo mi je ta vožnja sad aktualna stvar(vidi šufit od 8/2007 pa do današnjega dana). istina, tonobil me nije u životu opće privlačija. ne privlači me ni danas, to mi je prijevozno sredstvo i ništa višje. na vozački san odluči poč iz potribe jerbo zaradi posla ne stignen sve, teško mi je bit na nekin lipin mistima, teško mi je doč u drugi dil grada oli županije ako ne vozin. iako mi tonobil ne predstavlja skoro pa ništa u životu, u starin tekstovima se ipak uočava dosta radosti oko tega da se konačno gre na vozački. onda je te radosti s vrimenon bilo sve manje i manje, mučili su me čunjići (danas me to ipak nekako gre, sad me muči vozit višje od 40 po gradu), a od moje stvarne želje da se poza vozačkoga tonobil  stvarno i vozi i da vozačka ne stoji u škafetinu, ostale su tek mrvice. dani kad triban poč na vožnju su mi postali pravo mučenje,  a u tom tonobilu se umisto sve bolje i bolje ćutin sve gore i gore. izbjegavan se vozit i sa drugima.

očajno, ali baš očajno me snerva ti šjor komadina  zaključkon da ću na ispit tek kad mi vožnja bude gušt. pošto stvarno neman nikakvog gušta, bitno mi je samo sigurno doč od točke A do točke B, on je tako pokopa svaku moju nadu da ću steč vozačku.

zanima me je li to kriterij za sve kandidate? jesu li od vas to tražili?

do tada još nekako, bilo me je volja i učit i mučit se, ali od tada mi se svit prikrenija naopako, tonobil mi se zgadija. prije mi je na to limeno čudo bila ravnodušnost, a sad ga ne moren smislit.

ton izjavon je izazva kod mene toliki kontraefekt da sad pokušavan sredit misli i skupit forcu oli snagu da opće i vozački dovršin.

instruktora san zamoli da mi tu vožnju stavi tek za koji dan.

možda  i uspijen to dovršit, ali svakako nekoliko dana u niti jedan tonobil neću sist...

eto, to je zasad to, vidit ćemo šta dalje.

e, da mi je samo jedan dan, jedan jedini slobodni dan, pa da se zaletin do zadra. sutra i jopet radin i o temu jednome jedinome danu sanjan...

evo me, vratih se sa vožnje... (sat 63.)

u svoj ovoj monadi jeman sriću šta je ovi šjor banović, moj instruktor, dobar instruktor. danas mu ja rečen da neka me mrvu bolje jema na oko, da ću probat poč brže. on govori da će on zakočit, da šta ja tot sumnjan, da triban virovat. e, a nije da sumnjan, vengo mi se nekako pari da on misli da su moji refleksi bolji, a još uvik nisu, eto... to me očajno muči.

no, dobro. proban poč brže. negdi me je išlo, negdi ne. napravilo se i nekih grešaka koje nije tribalo učinit. nije mi baš bija dobar sat. ma ke. zadnji je bija bolji. intezivnog kočenja od instruktora nije tribalo, ali puno tega mi je išlo naopako.

zapravo gluposti su mi se lančano događale. dok mislin o jednoj, već dođe druga.

a slike? slike koje vidin dok gren brže još uvik nisu lipo posložene. ma ke, vrlo brzo mi nastaje kaos, a time i nesigurnost.

ništa. bit će valjda bolje iduću šetimanu, možda mi pomogne i mrvicu odmora od svega.

danas znan:

1. da vožnja opće nije tako lagana kako neki ljudi pričaju, odgovorno i savjesno vozit je dosta zahtjevno.

2. virujen ljudima koji su mi rekli da se boje jerbo upravo se mučin sa istim stvarima, zapravo višje se bojin šta će bit poslin vozačkoga nego sad dok je još tot instruktor. gradski konfužjun mi se ne sviđa, tot ću sigurno izbjegavat i škivavat vozit. van splita mi se pari da bi moglo bit bolje.

3. taj gušt o kojen pričaju (i to muški, žene ne, barenko ne one koje san ja pitala) još neman, trenutno mi je bljak i to je to. zapravo, pitan se u kolikon su guštu i ti famozni neustrašivi muški koji stalno o temu govore?! možda negdi na širokoj cesti di nima konfužjuna, di mogu raspalit po gasu, pa da ih to nešto privlači, e... to ću im još i virovat, drugo ne. jerbo, svaki, baš svaki s kojin san se vozi, pa čak i instruktori vožnje, beštima je žestoko, poglavito po parkiralištima. kad su u guštu, kako tot ne pivaju od sriće? oli barenko zvižđu, a? ;)

znate šta svitu moj, učin dicu matematiku, fiziku, letriku, informatiku. ta dica mi dođu ustrašena, ne znaju gradivo, samopouzdanje im je poljuljano. neki su se čak toliko izgubili da su već prestali i govorit kad su došli; kažem na to roditeljima: a di ste do sad bili, a? bude ili to da su se povukli u sebe oli postali agresivni, uvik je jedno od tega prisutno. učin ih, s puno pacijence. progovore. počnu se jopet i smijat. počnu rješavat zadatke. počnu i pisat domaći. nauče štagod. vrate se u normalu (to meni sad radi ovi šjor banović, probaje me vratit među žive po pitanju vožnje poza prvoga instruktora, e). no, da ih upitan:  sitite se kako je bilo prije, promislite kako je sad. i dobro guštate li dico sad u temu? virujen da bi mi većina rekla ne, to smo naučili zaradi tega šta moramo, a ne radi gušta.

meni je konkretno baš to  bija moj gušt, zaradi tega i jesan tot u inđinjerima. vjerojatno bi neko i meni moga reč: pa kako moš guštat u tin formulama, šta tot jema zgušno,a? meni jema, eto.

virovat ću i da šjor komadina gušta jerbo da ne gušta ne bi valjda tu školu drža.

međutim, u mene tega gušta u vožnji zasad nima, ko zna kad će doč i oće li opće ikad doč.

e, sad, kad će mi taj tonobil bit skroz pod lipon i šesnon kontrolon, to mi je važnije od tega gušta. borit ću se još da mi sad sve ne propadne, ali ali ali, čitate sve i vidite kako me to gre.... 

ono ča započnen i dovršin.

obično.

tako ću i danas poč na tu vražju vožnju.

(iako mi postaje sve višje bljak, mislin se kako ću poza tega vozačkoga jopet u pješake, a vozit ću samo u krajnjoj nuždi, jednostavno mi je to brezveze i sad vidin koliko mi je život bija lip i sritan sve ove godine brez tega.)

probat ću dovatit te vražje brzine i tu vražju kuražu.

ko zna ča će ispast...

instruktoru ću reč da neka on proba zakočit ako ja ne uspijen.

valjda nećemo u smrt, još smo mladi.

ne, neću mislit na najgore, ajmo ipak bit optimistični.

u svakon slučaju, jedva čekan da mi ta vožnja danas prođe.

e...

šest manje dvadeset pozapodne. sutra ujutro bi mi tribala bit vožnja. i ta vožnja bi mi tribala bit gušt i to veliki kako reče šjor joško komadina vlasnik autoškole golf u koju gren.

a meni ne da nima gušta, vengo mi je sve oko tega postalo odvratno. svaki dan sve odvratnije i odvratnije. :(

zadnja vožnja mi je bila jučer, nije bilo većih zamjerki od mog instruktora osim šta sporije vozin (svitu moj, ja po gradu dovatin 40-45 kad oćutin da moren, ako ne moren, gren oko 35-40; višje o' tega mi se čini prikovišje za početnika, a oni oče od mene da vozin jušto 50. međutim onda jeman osjećaj da gubin kontrolu nad tonobilon i da neću uspit zakočit) i da neman tog gušta, a da to sebi moran pomoć da počnen jurit i guštat, da on tot višje ne može ništa.

u međuvrimenu san popričala sa nikoliko žena, sve voze po dvadeset i višje godina i na moje pitanje: guštate li u vožnji? sa izričitin gađenjen i vrlo odrešito su mi rekle: NE!

raznih su zanimanja i dobi.

na ispit ću po šjor komadini kad on oćuti da to mene tako lipo i zgušno gre.

a šta ako prođe i dvadeset godin a ne bude tega potribnoga gušta?

na početku me radovalo šta san konačno odluči položit vozački, sad sebe šaljen kvragu zbog te odluke i žaj mi je šta se na to išlo.  eto, do tega me dovela autoškola golf... žali bože pinezi i vrimena :(

e... ajmo jopet malo bit u balunu... ne znan kako je kod vas, ali moja plaća je s obziron koliko radin najmanja na ovemu svitu. najozbiljnije, e... da živin u jameriku, moglo se s ovoliko rada bit multimiljarder. ovod, uajme, ajuto mama mia. uajmeeeeeeee, smrc, smrc :(

no, dobro, nije mi teško radit, moren i oču radit, pa za ono ča mi triba i zaradin. ipak, miljarde niman ;)

ovod jemate test. morete vidit kako kotira vaša plaća. dobro je, humor pravi. crni, e... ka garbun. zato vižitajte, svaki iduci slide otvarate klikon miša :)

http://www.parametar.hr/razno/Placa.pps

za ovo ću se zafalit u šibenik, šjori selmi.

e... jedna lipa poruka potpore apropo (po pitanju) vozačkoga mi je arivala (stigla) sinoć i to ka message  u libar vižita. kako pošiljatelj nije ostavija kontakt podatke, zafalit ću se ovako. iz poruke se dalo zaključit da se radi o ženi, dalmatinki, a škatula o' kompjutera mi je rekla da je poslana iz jamerike oli SAD- a od peršone koja je bila i na blogu. fala lipa!

e...

živin u jednoj zemlji ča jema puno prirodnih lipota, ali je i vrlo mižerjasta, ograničena i nesritna po nekin pitanjima. zove se rvacka. često kažen da jeman domovinu, a za pojam države se pitan ča je to, e...

ovod je bit obrazovan poprilična sramota. čak vas smatraju i nemoralnon peršonon ako jemate obrazovanje i znanje. fali još samo da se koga ča zna užge na lomaču, proglasi višticon oli višćunon.

ja se moga obrazovanja neću sramit, neka se srame oni ča pljuju po obrazovanju i oni ča fabrikaju lažne svjedožbe i diplome koje su usput rečeno posebna "vridnost" ove zemlje. isto tako neka se srame i oni ča falšete zapošljavaju.

danas ću se s posebnin ponoson sitit da je 12.03. i da jema jušto 10 godin da san dipl. ing. - letrika (oli elektrotehnika), najjača struja na svitu (oli elektroenergetika)

(ova mi je godina zanimljiva, u njoj jeman i 5 godin magistriranja, to ja na 8.05. , a vaša sedamnaestica u ovoj godini jema i 17 godin da se finila srednja skula, e... ;))

stivat ću tako prigodno ovod nešto lipo, sve mi je emajlirala sandra iz dubrovnika, fala joj!

slideove ćete gledat priko linka na način da kliknete mišon za idući. svakako pogledajte, to je nešto veličanstveno :) na temu moremo zafalit majčici prirodi, ali i svin judima o' letrike diljen svita.

obavezno vidit: www.parametar.hr/razno/PN-BLUEBEAUTY_1.pps

e...

tonobil i jopet.

jučer mi je bija 61. sat. u tonobil je i jopet sija šjor joško komadina, vlasnik autoškole golf, i to da vidi do kojega stupnja znanja se došlo. vozilo se gradom, ulicama i uličicama. malo po skalicama , pa oko dalme, općine, pa oko crikve svetoga petra i tako to. nije bilo savršeno, ali nije bilo ni tutokompleto loše. poza sata su mi on i instuktor nebojša banović rekli da napretka jema, ali da još uvik nisan u fazi za prijavit ispit i da triban još učit.

uplatih tako jučer još dopunskih 6 uri, pa ćemo vidit šta će bit poza tega. kad se te ure odvoze jemat ću ih 67 oli 3 ure manje o' dva zakonskin minimumom propisana tečaja, zakonski minimum je 35 uri.

na moje pitanje:

- oču li ikad naučit vozit tonobil i jema li mi ovo sve skupa višje ikakvoga smisla?

obojica su mi odgovorili da oču, da mi još samo mrvicu fali, da će sve bit dobro itd itd itd

čunjiće san s novin instruktoron nauči, dapače 2. i 3. radnju mi je tek on pokaza i naprav san ih iz prve.

http://www.herz.hr/ispit_uv.php

kod prvoga instruktora m.g. (pokojni, puno ime maknuto na traženje pokojnikova brata 04.08.2010.) je bilo 37 sati, međutin oni nisu baš svi utrošeni na mene jerbo je masu puta bilo i drugoga svita naručeno na istu uru, a isto tako bilo je i čekanja instruktora koliko god očeš.on me naučija nešto, no kad sagledan iz današnje perspektive to je bilo vrlo malo. tot je recimo došla i 37. ura a još uvik nije bila savladana prva poligonska radnja.

ostatak uri, zasad 61-37=24, san u instruktora nebojše banovića koji je mora za šjor m.g. puno popravljat. učija me žmigavce, motanje volanom, minjanje brzina, prestrojavanje, tunel, brzu cestu, poligonske radnje, izlaz s parkirališta itd.. daklem, sve ono ča me triba naučit prvi instruktor a nije oli me naučija vrlo malo.

znači, ovi šjor banović radi svoj posal puno bolje, ne more se to mirit, nebo i zemlja. jemaš svoju uru i kroza to vrime te uči, a učenjen se nekoga vraga i naučilo. ne znan kako bi se brez učenja moglo naučit išta pa tako i vozit tonobil?!

tako trenutno znan učinit 1., 2. i 3. poligonsku radnju, a 4. tek moran probat. po gradu nekako vozin. to narafski triba još dotjerat. evo, gren van reč i zaradi čega:

i po mon mišljenju jema napretka, ali da sutra i položin vozački s ovi stupnjen znanja, ne bi bilo kuraže za sist sam u tonobil. eto, takav mi je osjećaj. a je li to dobro, a?

šjor komadina govori i da bi mi vožnja tribala bit veliki gušt, a meni tu nikakvog gušta nima. nima, jednostavno nima. šta će mi bit gušt? gradski konfužjun u kojen pitaj boga koliko likova vozi brez vozačke oli s onon brzo i jeftino nabavljenon u susidnoj državi? muka da nađeš misto za parkirat se? babe ča zatvore joči i idu priko ulice di god ih je volja , jemalo tot zebre oli ne, pa šta bude?!

tonobil mi je doša potriba, vozit ću ga zato ča moran, gušta zasad nikakvoga nima. nima pa eto nima, a šta ćete, e... inače o guštu i strasti oko tonobila je nešto već notano ovod:

http://www.xvii-online.com/p-jubav-moc-strast-oli-stagod-drugo/143648.html#links

muški rod bi stvarno triba svatit da nam se mozgovi razlikuju, muškobanjama tonobil more bit gušt, a prava ženskica je najsritnija kad ton zviri o' lima upravlja njena muška zvir oliti jača joj polovica (i to bilo da je super volje oli da je nervožast i kara se jerbo poštopoto oče da sve bude po njegovom, svejedno)  i kad je lipo doveze tamo di triba; sav gušt more bit pojubac, zagrljaj, dalje nećemo hehe, ali ne jubi te vražja makinja vengo čovik, e...  

muške zviri to vožnje bolje gre, vengo žene i to je jednostavno tako.

pita li hak koliki ti je gušt dok voziš na ispitu? friga se njima za gušt, gledaju voziš li kako priliči oli ne jerbo more neko bit i skroz šlampav dok vozi, a guštat krajnje u temu. oče li ga hak onda puštit, a? a more ako oče da on/a oli kogod drugi poslin gušta u miru onega svita, samo tako, e... drugovačije ne, e..

sebe ne smatran genijalcen, prosječna san peršona. mislin da se ovo već moglo naučit. došla je moja malenkost na svaki sat i učila, a ako san sa samo 30 godin na fesbu na najjačoj struji na svitu ostvari i magistarsku titulu, onda nisan baš tribala bit  totalna šteta po pitanju učenja tonobila. more bit i da san malo smotana i da me i mrvu straj, ali i drugi judi su mi rekli da su bili takvi na početku. s vrimenon su naučili.

nisan vidovita peršona, vidit ćemo šta će bit poza ovih 6 uri. niko me nije učija vozit tonobil osin autoškole golf, pa tako vozin jušto onako kako su me oni naučili, ko višje ko manje, e...

testove jeman 120 (maksimalan broj), to je položeno iz prve ka i prva pomoć.

e sad, pitan se šta činit ako poza ovih 6 uri još uvik ne bude dobro da se može prijavit ispit, a? tada bi se već pomalo s fondon sati ulazilo i u 3. tečaj.

da ste na mom mistu, bi li ostali u istoj autoškoli i platili im i 3. tečaj, a ne jemali garanciju da će tot bit kraj i da će se bar probat poč na ispit?

ja poza svega ovoga baš i ne moren bit oduševljena ovon autoškolon, neću je ne znan kako opanjkavat, ali neću je nikome ni preporučit. to je sigurno.

----------------------------------------------

e...

uključin ja sinoć tv u nadi da ću vidit kriminalističku seriju kad ono big brother s nekim navodno poznatim čunkama. ne pratin inače to događanje, ali ovi put ga pogledan pet minuti jerbo vidin čovika obučenog u žensko. navodno je to muško, ali je učinija čiče, našminka se i sad je muško obučen u žensko oli transseksualac. aj neka, znan da jema i tega.

kolika nan je tolerancija na toliko različito od uobičajenoga, a?

moja je jušto ovolika:

- tega čovika/ženu neću izrugivat, tuč, vriđat, pljunit nasrid ulice, to je šta je za sebe je, ne smeta mi ako se u mene ne dira, ali recimo za danijelu dvornik, ženu o' pivača dina dvornika, ću konstatirat da jema štumika kad gre leč blizu transseksualca (ka ženske su u jednu kamaru, a muški u drugu, a transseksualac je sa ženskima), meni to baš i nije po guštu pa ne bi u takve aranžmane, fala lipa, e... 

- postavilo mi se pitanje: ako nije bitno ča mu je među nogama za bit žensko, koliki je kaos u glavi tot? more bit da mu je teško živit s okolinon koja je uglavnom blago rečeno puna čuđenja (evo i ja san sad malo, priznajen), a pogotovo mu nije lako živit sam sa sebom, e... ma šta on oli ona govorija o temu.

na netu još morete nač o temu ako vas zanima ovod:

http://www.bigbrother.rtl.hr/stanari/salome

eto, notali su i da je ta peršona udana.

različitosti postoje, narafski, triba bit tolerantan, ne pačat se u drugoga čovika, meni ne smeta dok se u me ne dira, no da ću se baš poč družit s takvon peršonon, a ne, to nije moj đir, ne znan, ne znan njanci ča bi mu čovik reka, kako bi ga oslovija sa šjor oli sa gospojo.

mislin da to nije netolerantno. netolerantno bi bilo da ga/je maltretiran, to ne radin, bože sačuvaj, a svak more birat svoje društvo.

mišljenja nan moredu bit podiljena, ali ta peršona u svakom slučaju privlači pozornost. ipak, ne virujen da ću višje gledat tu emisiju, nije to moj đir. kad je tek počela, svit me začuđeno gleda kad bi im se reklo da to ne gledan, a eto, ne gledan, neka gleda ko oče, meni nije interesantno, ovo sam prvi put u životu baci joko na to par minuti i dojmovi mi nisu dobri. me ke, e...

e sad, neka san ditinjasta, ali ovo je stvarnooooooo smišno. posal gotov, preživilo se 6 uri fizike, ajmo ča. pozdravljan lipo, laku noć i slatko spavajte

e... trenutno je grozno, očajno, katastrofa, a pomak je ovi:

http://www.slobodnadalmacija.hr/20080307/split01.asp

bolje rečeno samo se konstatira, a pomaka još nikakvih nima.

ne znan kako vi, ali meni fali onako oko 10 i po oli podne  (kako bi se već uvatilo vrimena) proč priko rive. trefit koga, dikad popit kofi, dikad ne.

zapravo, niko mi ne brani da prođen, ali koga ću tot vidit, koga trefit?!

nima pasa.

nima ništa.

utekli svi.

ako je to bija cilj, onda su ga boga mi ispunili. možda bi tribalo tako, da nikoga ne trefiš, da s nikin ne proćakulaš, da s nikin ne prodiskutiraš šporkarije ča čine; onda nestaje kritična masa, nima višje ko reč ne, nećemo tako.

pred ove izbore slučajno jedno pozapodne naletin na rivu. nije bilo vidit jednoga jedinoga čovika ča urbano izgleda. samo nekoliko baba brkatih, teške kategorije, pitaj boga otkud stiglih.

jedna je vitlala baton za meso i vikala: "za ljudinuuuu sanadera!".

ostale su joj s posebnim oduševljenjen odobravale uz grleno

"takooooooo je".

prođen brzin korakon.

nije mi bilo dobro od viđenog,

niti mi je sve to skupa parija grad niti je to parija split niti je parilo da je 21. stoljeće.

na voćnon trgu uštipnen sebe. za provjeru narafski. ne, nije to bija ružan san. ma ke.

bila je to strašna java splita ča je sve manje i manje split.

split je takav posta zaradi onih ča ga mrze ka najgorega dušmanina, a dobijaju vlast i položaj tot na sve moguće načine, najmanje pošteno, narafski.

meni ka i svakome poštenome čoviku ostaje samo tužna duša.

Ako nađete nastradalog psa i pomognete mu da se oporavi, neće vas ugristi. U tome je bitna razlika između psa i čovjeka.

Oscar Wilde

e... evo mene s vožnje. danas san bokunić bolje, kaže instruktor da mi ta potribna kuraža pomalo reste.

u marjanskon tunelu mi se brez da oćutin dogodilo prekoračenje brzine. instruktor je samo mirnin i staloženin glason reka:

- nado, prvi put u vašoj karijeri ste prekoračili dozvoljenu brzinu, usporite malo.

- uajme, nisan valjda, koliko, uajmeee, pogled na brzinomjer i fantastičnih 23,61 m/s.

ograničenje za ovi tunel je 60 km/h. narafski i meni je očitana brzina bila u km/h, ali ćemo sad jopet dat bokunić znanja ovod i učinit pretvorbu tako da nauče oni ča još to ne znaju.

danas je bitno naglasit da mi se dogodila ta brzina, a da nije bilo trte mrte. to je bilo kuražno! narafski, sad moran pazit da se to ne ponovi jerbo koliko je tih 23,61 m/s u km/h, a?

pretvorba m/s u km/h

oli bokunić znanja ka šta smo obećali u jednon o' zadnjih postova

 1 km = 1000 m oli jedan km jema iljadu metri

koliko onda 1 m jema km, a?

podijelit ćemo gornju jednakost sa 1000 pa ćemo saznat.

1 km=1000 m I : 1000

1 m = 1/1000 km

dobro, sad ćemo pritvarat sekunde u ure.

1 h= 60 min

oli jedna ura jema 60 minuti.

1 min=60 s

oli jedna minuta jema 60 s.

koliko onda jedna ura jema sekundi, a?

1h=60x60s=3600s

a koliko jedna sekunda jema uri, a?

podijelit ćemo gornju jednakost sa 3600 pa ćemo saznat.

1h=60x60s=3600s I : 3600

1 s= 1/3600 h

sad ćemo ovo ča smo dobili primijeniti na našu konkretnu brzinu:

23, 61 m/s = 23, 61/1 m/s= 23, 61 x 1/1000 / 1x1/3600 km/h

dobili smo dvojni razlomak:

23,61

--------

1000

---------------------

1

----------

3600

on se narafski sredi na način da se vanjski pomnoži s vanjskin i to gre u brojnik, a unutarnji s unutarnjin i to gre u nazivnik.

znači jemamo:

23,61X3600

------------------ = 85 km/h

1X1000

ovo san uči ama baš svakog učenika ča mi je doša na repeticije iz predmeta fizika u životu, a nije ih bilo malo. svi su znali pretvorit km/h u m/s, ali nijedan nije zna pretvorit m/s u km/h. zaradi tega stavljan na net, možda nekome pomogne, a dicu fiziku učin i dalje. da vidimo kad su za fiziku... evo sutra jedna šinjorina, prekosutra još jedna. neka. bitno je da se uči, nije sramota nešto ne znat, sramota je ne želit ništa naučit, e... ja i dalje učin vozit tonobil.

fala XVII, ovako ne triba omjere učit napamet

mertojak by XVII, slikano prikjučer

e... kažu da je obrazovanje u nas dobro.

lažu. lažu ka zadnji kurbini sinovi, ne virujte im ništa.

svaka čast profešurima s poštenon diplomom koji svoj profešurski posal rade kako triba. ovo se na njih ne odnosi.

koliko je obrazovanje dobro, vidin ja ča svaki dan učin dicu iz svih mogućih skula splita i okolice sve ono šta ih u skulama naučilo nije. a tribalo je, e...

no dobro, lako za dicu, naučit će dica, ali znan ih ča su i fakultete pozavršavali pa još uvik nimaju elementarno znanje. žalost i nevolja. jedna mi je tako bila ovod u firmu, a nije znala razlikovat rub od ugla/kuta, a republiku rvacku je u službenon dokumentu išla pisat ovako: republika Hrvatska. poslin pitan dicu ča su tek srednjoškolci da mi to notaju, svi su notali kako priliči Republika Hrvatska i svi su znali ča je rub, a ča ugao/kut i kako se te dvi riči reču ina  ingleški i na rvacki. narafski i da su znali ča je ugao, a ča kut. zato i govorin dica su još dobra. ovu nesriću smo poslali ča jerbo nećemo valjda po cile dan za njoj mukte popravljat takve elementarne greške. da van ne rečen koliko je pinezi tila za tako štrapanje i kakvo joj je ponašanje bilo. zemljo profundaj se. doživjeh o' tega lika mobing u vlastitoj firmi. jedan dan ću van detaljno ispripovidit ča je sve radila i govorila. sad me štumik boli ako o' temu samo i promislin. ma evo, reč ću van samo sitnicu o' svih šempjarija ča ih je izvela. kad joj je pismeno otkazana suradnja i kad su joj vraćeni dokumenti, onda, e, onda je išla otkazivat suradnju. da nije bija pokladni utorak tj. dan o' velikih šempjarija kad je to učinila, pita bi se čovik koju bi službu zva, e...

zaradi svega ovega ča se događa  ću probat ovod s vrimena na vrime stavit bokunić znanja objašnjen na pristupačan način. da čovik more razumit, e...

evo nešto ča često muči dicu kad arivaju u srednju skulu, a tribali su to naučit još u osnovnoj oliti pučkoj skuli.

pitanja glase:

1.  koliki je zbroj kutova u trokutu?

2. zašto je to tako?

odgovori:

1. uvik 180 stupnjeva.

2. odgovorit ćemo u slici i riči.

slike su by moja ručica jerbo niman sad baš vrimena i crtat na računalu sve...

najprvo ćemo reč kad su kutovi jednaki. U tri slučaja.

slučaj prvi: kad se radi o kutovima s paralelnin kracima.

slučaj drugi: kad se radi o kutovima ča jemaju unakrsne krakove.

slučaj treći: kad se radi o kutovima s okomitim kracima.

sad gre dokaz. povucite paralelu sa stranicon trokuta na kojoj leže alfa i beta do vrja di je kut gama. produljite ostale dvi stranice. pogledajte alfu dobro, pogledajte kut ča jema paralelne krakove šta ste ga dobili produljivanjen stranice i paralelnon linijon ča ste je vukli. isti su. napišite i tot alfa, ja već jesan.

analogno: sad pogledajte betu dobro. pogledajte kut ča jema paralelne krakove. isti su. napišite onda i tot beta, ja već jesan.

za gamu vridi pravilo o unakrsnim kracima.

sad pogledajte alfa, beta i gama ča su van trokuta. leže na pravcu, je li tako? koliki je onda njihov zbroj, a?

i to je to oIi c'est ca ča bi rekli francuzi. uvik vridi:

alfa+beta+gama=180, za svaki trokut ma di on bija ;)

e, bravo, još ćemo notat zaradi čega na ovi blog rečenice počinjemo malin slovon. to narafski nije pravopisno točno, ali datira iz vrimena sporog interneta. onda se uvriježilo pisanje malin slovon na forumima i chatovima jerbo je net bija skup i bilo je teško tražit caps lock i gubit vrime. poslin se pojava prinila i na blogove koji su narafski novijeg datuma o' foruma i chatova.

fala XVII

ulica by XVII, slikano jučer

e... vozačku još niman, gren na noge. zato jeman ovi lipi litrat. nikad ne moš jemat sve, e...

a kako napreduje tonobil, a? evo, jutros mi je bila vožnja. sat broj 59.

zakonski minimum sati je 35. moja firma parametar mi je najprije uplatila 35 sati + 16 dodatnih sati, a vlasnik auto škole golf , šjor joško komadina, odredija je da će se  vozit još 10 uri, od tih 10 jeman još dvi ure odvozit. tako je odlučija jerbo prvi instruktor, m.g. (pokojni, puno ime maknuto 04.08.2010. na traženje pokojnikovog brata), nije moje vrime za učenje trošija baš uvik na mene vengo bi doveja više svita na istu uru, a ni nakon 37 uri me nije mrdnija njanci mrvicu po pitanju prve poligonske radnje.

sad san kod nebojše banovića, prve tri poligonske radnje me naučija, a i za grad mislin da jema napretka. tako i on misli. međutim, on ne smatra da je došlo vrime za prijavit ispit, kaže da još uvik vozin dosta ustrašeno.

ispit još uvik nije položila ni ona šinjorina ča je sa menon startala na tečaju, nikidan san je trefi.

o jarče pasu, sad me sve već pomalo i rastužuje, nisan kontra učenja, dapače, ali se pitan šta se ovo sa autoškolama po splitu događa. ????

intezivno pričan sa judima o vozačkom ovih dana, svi kipe na spomen samog A o' autoškole, malo ko mi je reka da je bija u potpunosti zadovoljan, da je uspija proč isprve ispit nakon 35 uri. ljudi mi spominju nekoliko padanja i nevjerojatne brojke sati. oni ča su isprve položili ispit obično mi kažu: e ma znaš, ali mene je brat naučija vozit, da je bilo po autoškoli, teško bi to tako išlo. vrlo mali broj mi je reka da je to uspija riješiti iz prve nakon 35 sati, a da je tek u autoškoli naučija kako se upravlja tonobilon. da se razumimo, ja san žestko kontra vožnje brez vozačke. to je učinija moj kumpanjo iz razreda i sa samo 17 godin otiša u nebo poza ča je ozvizdija u stup o' isprid marjanskog tunela. na sprovod mu je doša cili grad, ali šta sad jema o' tega kad je umra tako mlad.

teorijski dil ispita jeman 120 bodova, to se prošlo od prve, prva pomoć isto. upravljanje vozilon mi je sve bolje i bolje, ali sad već pomalo počinjen sumnjat u to oču li jemat vozačku barenko do 36. rođendana ča je 17.11. jerbo, ko zna koliko će uri još tribat i pitaj boga koliko će se onda još puti izlazit na ispit.

vjerojatno bi mi bilo jeftinije da san zaposli šofera... uf. :(

barka, mriža, ribar, lubinski porat, bit će da je i tot pošta.

zumbuli. lipo vonju na matejušku.

sve by XVII