e...

najlipše molim da mi u par rečenica notate vaše iskustvo s autoškolom i polaganjem vozačkog za sve gradove lipe naše koji nisu split.

znači, interesira me može li se npr. u rijeci oli vinkovcima doč do vozačke kroz neki normalni fond sati i može li se normalno i ka čovik jemat svoje misto i vrime za polagat ispit. zanimaju me svi rvacki gradovi i mista.

unaprid fala svima koji mi nešto napišu!

moj mail je: xvii@xvii-online.com

e... ovo je moj ured jutros najranije. zapravo tek jedan njegov dil. jučer smo nosili dokumentaciju kod drugog davatalja knjigovodstveno-računovodstvenih usluga. uspilo se sve prinit. narafski, arhivske godine su sad nepotribne u novo računovodstvo, oni samo nastavljaju di su stari stali, pa ćemo to dobro spremit i tako sad jeman hrpe registratora oko sebe. društvo im čine i ovi ča su oduvik u mom uredu. sad su kumpanja bela, e...

tražin nike podatke, brojeve. prid očima svi ti računi, obrasci, naviru sićanja, kome se šta prodalo, kakva je bila srića kad smo i u nemogućin uvjetima uspili finit posal, kako se radilo vikendima, kako smo se borili da nam plate, kako smo sticali stranke, kako se stvara Parametar doo. ...

kažu mi jučer u poduzetničkom centru da je dobro, da gre ok, ali da ćemo sad učinit da ne bude samo tako da se o' nje živi, vengo da donese  i koju kintu višje oli bogatstvo jerbo zaradi tega se firme i osnivaju. jemaju prav.

dobrooooooo, prihvaćan izazov, moramo i možemo naprid, punin jidrima. nima druge. ;)

gren radit, posal zove.

moj mali murter mix o' danas

e... sve morete uvećat klikon... ovo je poligon u splitu jutros u 7:30.

split poligon jutros, 7:30 - ovako se polažu ispiti u splitu, brdo kandidata, brdo tonobila, instruktori i ispitivači se muče za nač misto. moja traka je bila improvizirana i na ovi konfužjun i nered mi nije uspilo proč. uloži san žalbu na hak jerbo kandidati plaćaju korištenje poligona. u isto vrime polaže više kandidata na 1 auto , ne znam je li tako bilo prije ????????
 

zna li neko kolike su plaće u haka-a? ne bi tribale bit mižerjaste kad su se sitili ovako punit kasicu.

e...

evo ča more svaki čovik učinit (ja to i činin) za dobrobit lipe naše:

1. ne činit kriminal

2. ne podržavat kriminal

jednostavno, a?

e je, samo triba jemat i bokun kičmice za to, e...

za drugovačije jema rič. ona glasi: licemjerje, e... jerbo, a šta bi drugo bilo vengo licemjerje ako se s jedne strane kritizira nered koji vlada, a s druge strani čini kriminal i nemoral o' jedne te iste peršone, a?

http://www.parametar.hr/razno/_The_simple_life.pps

e... evo nesto lipo, Sandri iz DBK-a fala lipa na ovemu :O)

e... fala svima ča pitaju, dobro san.

samo san u poslu do nosa.

ovu šetimanu smo jemali čak dvi nove firme ča im je tribalo  radit. za jednu smo posal finili, drugu upravo dovršavamo.

jeman još dosta obveza oko posla, prilazin iz jednega računovodstvenog servisa u drugi, pa i oko tega jema konfužjuna, dosta je dice na podukama i tako to, a duraju mi i obaveze oko autoškole i sl., pa je mrvicu laška ovi blog.

sadržaji će se nastavit objavljivat uskoro.

lipo vas pozdravlja XVII

e...

jemali smo jednu sad već ex pricidnikovicu kućnog savjeta. skupljala je za vodu, mi redovito plaćali, kad ono jedan misec šok i nevjerica, vodovod posla opomenu. ma šta je sad to, zaradi čega? paaaaa zgrada je plaćala vodu, e... e, ali, jerbo uvik bude i neko ali, ustanovilo se da je ova gospoja pineze pofrajala umisto da ih odnese u vodovod, e.... kad su je pitali zaradi čega je to učinila rekla je da joj je mala pemzija. manjak o' jedno 6 iljada kuna se nadoknadija na način da se iste misece plaćalo ponovno i još je zgrada dala nike pineze. a di je ex pricidnikovica, a? a u pržunu nije, eno je na skale, drži i sad govor, pametuje, ko joj smi šta reč, e...

vengo kad san već kod pricidnika i ex pricidnika, evo još malo bisera iz moga portuna.

dakleM, ovo je još dobro. 6 iljada umračenih kunića šta ih je papila maca je sitnica. jeman ja susida koji ne zna reč odakle mu npr. 6 milijunčića njemačkih maraka (da, da, ti šjor na pitanja novinara slobodne nije zna reč odakle mu to, kaže jednostavno pusti sad to, e... foji o' 10.12.1999.). u jameriku oni ča ne zna objasnit porijeklo imovine gre u pržun, a u rvackoj takav postaje savjetnik pricidnika. kojega, a? a ovega o' republike, e... ovega ča je još samo mrvu aktualan, e... pricidnika mesića, e... da, da, tega ča još malo pa će bit ex pricidnik.

narafski, opće se ne triba čudit da takvi postaju pricidnikovi savjetnici,  to vam je tako svitu moj, drugovačije ne more bit jerbo institucije moraju funkcionirati. kako "savršeno" funkcioniraju, pricidnik je okružen "najsavršenijin sviton", e... 

vengo, he, he, baš me zanima ča će sa tin sviton bit kad pricidnik bude ex pricidnik, e... ;)

e...

jutros san u moje računovodstvo poza puste sređene kartušine  zaključi da bi nam najbolje bilo poč na prvomajsku paradu i vikat : doli kapitalizam!

ši, doli kapitalizam jerbo radimo ka crnci, a još nismo vazeli brod.

e...

čovik bi uvik, a ne samo na dan planeta zemlje (koji je danas), triba bit barenko mrvu čovječniji prima toj našoj bidnoj, napaćenoj zemaljskoj baloti.

škovace se ne bi tribale itat di kome šune, šume se ne bi tribale neplanski sič, emisiju štetnih plinova bi tribalo smanjit, a prirodne, obnovljive izvore energije u ukupnon udjelu povećat.

danas jemamo ozonske buže, globalno zatopljenje, lude krave i još sto i jednu monadu i čudon se čudimo.

a sve je zapravo kjaro. dogodilo se sve to samo zaradi samo jednega razloga: judi su se ponašali i još se uvik ponašaju ka mone.

a dica ča dolaze?

mislite li na njih, a?

jemamo li im prav otet prostor za život, a?

tribalo bi bokun bolje čuvat ovu balotu, e... jerbo, druge nimamo.

ekola, ovo su bile moje dvi tri riči apropo današnjega dana.

e...

malo san danas po butigama. pari da jema svega, a kad očeš nešto kupit, muko moja, žalost i nevolja. ne valjaju kolure, nenormalne cijene, neljubazne prodavačice, nima broja, jema broja, ali nima kroja, sve u svemu uajmeeeeeee. kupnja? uajmeeeeeee meni, upomoć! ajutooooooo mama mia! nisan ka druge ženske peršone. mrzi me poč po butigama. dok one govore da ih ti famozni shoping oli vižitavanje butiga  liči, mene poza tega sve boli. najviše noge, e... a poza tega glava.

volin recimo butige o' libri. tot mi nije mrsko poč, e... a ove o' robe i one o' postoli su za umest čovika.

uza poveću muku ipak se štagod našlo. šta, a? a e, evo za puno kurjože: dvi maje kratkih rukava o' vrsti nike i kupaći o vrsti o'neill ; u niku butigu je uza niki popust to sve skupa došlo 359,98 kunića. aj nije loše, neko bi te pineze da samo za rukav o' maje oli za donji dil kupaćega.

sad gren odmorit i doč sebi. po butigama sigurno neću odma sutra, a maje i kostim ću duperat ovih dana pa ćete vidit kako izgledan u temu ako me trefite, narafski... 

e... 

blizu mene su danas na kupanju sidile tri cure. razglabaju o četvrtoj koja nije tot. mire kolika joj je srića. iz razgovora se da svatit da ta četvrta jema jubav, a ta jubav jema dicu iz prethodnog braka. osin dice jema i dosta pinezi. jedna kaže da joj je pružija sve i da je š njin ostvarila sve svoje snove.

hm, mislin se ja, lakše je živit ako jema pinezi, vengo ako nima, narafski, ali je li u pinezima srića, a? ma ne, neću se pačat, njanci ovako u sebi jerbo ko san ja da sudin o tuđoj srići i nesrići, e... zapravo, odma mi je, na prvi balun, bilo grubo čut kako to i ove tri šinjorine vazimlju sebi za prav da diskutiraju tuđu sriću, e... ajmo ča dalje, gren čitat libar... e ma ke, diskusija se nastavlja...

jedna kaže kako  ove dvi faliju, da tot opće nima sriće jerbo da taj čovik, pazite sad ovo, jema repove.

prvi momenat se mislin, asti sto, da nije koje strašilo plašilo, ma kakvi sad repovi, a? e, dalo se svatit poslin. repovi su joj značili dicu tega čovika.

poza tega je uslidila diskusija da ča bi se on sad triba odreč svoje dice oli štagod drugo, e... jedna je za tega čovika, druga govori da bi četvrta (nenazočna) prija tribala tražit o' njega da potira tu dicu.

hm. nevjerojatno ????? ne znan, ne moren svatit takve stvari. kako dica mogu bit repovi, a? svakome se more dogodit da mu se roditelji razvedu, da mu umre jedan oli oba roditelja, pogine i sl. zaradi čega ljudi misle da se to samo nekome drugome događa? i zar poza takvih događanja čovik oli žena kojega je tako nešto strefilo nima nikako prav na nastavak života, a? a šta da danas sutra vas strefi slična sudbina? bi li van bilo drago da van dicu nazivaju repovima i repicama? da ih se izolira i ponižava? sakriva ka da ne postoje, a? proglašava sramoton, a?

jo, iako san žestoko kontra nasilja zaradi ovakvih razmišljanja katkad mi dođe da kome prisvirin dvi tri poštene po ćiverici, pa da mu se ta ista ćiverica prosvitli....

kašuni danas, by XVII, klik za veće

e...

mami, a?

uđen ja...

ono ka, samo ćemo malo smočit noge jerbo nekako mi pari da su ove godine friškiji dani u ovo doba godine vengo lani, pa se pitan je li još rano za učinit prvo banjanje, e...

moran priznat da još uvik ne gren u kratki rukav,

da još ne gren brez bičav,

da po noći jeman deku,

da se nisu još izile prve jagode.

hm, hm?!

aj, još ću samo mrvicu.

mmmm dobro je, još mrvicu mrvice, e...

aaaaa nećemo više čekat, nimamo šta, buč, buč, plivaj XVII!

juhuuuuuuuuuuuu, lito mi je počelo!

(u odnosu na lani smo okasnili jušto 6 dana :o))

kako mi je i subota i nedilja bila radna, ovo mi je došlo ka pravi gušt. poslin san dan upotpuni đelaton. o' vanilije i čikolate, e...  e sad, ko ovo more platit, a?

e...

nastavljan bokunić s biserima i draguljima iz portuna.

jema jedna ča se vozi u super skupi tonobil (red veličine: poveća mazda, među novijin tipovima). 

narafski, kad gren kupit kruva, onda mi prodavačica u butigu svako malo napomene da toj susidi poručin da dođe namirit dugove koje je učinila vazimanjen stvari zapisivanjen u tekicu.

a ja narafski tu belecu opće ni ne pozdravljan.

jerbo,  šta ja jeman š njon, a?!

e...

di san, a? radin, neće niko za mene , e...

evo jedan korisni link:

 http://www.poslovniforum.hr/novosti/korisno/005_tvrtka_internet_stranice.asp

ovo oče reč da triba malo nadopunit obrazac za račun, poslovni dopis i web stranicu za firme ča su d.o.o. oli d.d. (za obrte još istražujen ča triba) pa gren ča radit... jerbo, notali su da su kazne drastične, čak i do 50 000 kn.

fala XVII

e...

kako život gre pari mi se da mi ča smo rođeni ovod, ča smo dica dalmacije moremo poč i na drugi kraj zemaljske balote, ali uvik moramo jemat onih naših nekoliko vala ča nam znače višje vengo svi pinezi ovega svita i kojima se moramo vraćat pa makar nas tokalo proč iljade kilometri za doč do njih.

narafski, jemamo i nike joči, neću sad o' kolurama jerbo to je kako ko, koje nam znače život, ali bi prije umrli vengo priznali da je tako. a kako ćete onda znat ko je to kod nekoga čovika/žene, a? eeeeeeee baš tim jočima uvik najžešće kontrajemo, činimo dišpet, nećemo reč lipu vengo grubu rič kad išče lipu. to je ono ča se vidi, e, a doma, doma poslin tega gremo plakat uškuro, u kušin, e; to je baš ona peršona ča nan se more popet i na vrj ćiverice, učinit nam sto i jednu monadu, ispritumbat život uzduž i popreko i uvik ćemo joj sve grije oprostit, a ona to zapravo i neće znat jerbo puno je teško reč rič skužaj, rič oprosti, a još teže oprostija san ti oli oprostila san ti, pa ćemo rađe činit kuco i patit. znate šta? kompleksno je sve ovo, onome ča nije dite mora sve to baš i neće bit kjaro, pa ću apropo ovega fermat.

uza vale i joči svakako još triba napomenit dvi stvari kojima trčemo. to su: spiza i pisma.

brez tega nismo svoji. ovo oče reč: ako oćete da patimo, maknite nas ča o' naših vala, jubavi, dobre spize i pisme i osušit ćemo se o' tuge  ka suva grana.

e sad nadan se da nećete poč zloupotrebljavat moje povjerenje i činit nam ovo na šta smo ranjivi, e...

ekola, gren prestat balit, fermajen, finito. do idućega teksta, pozdravljan lipo!

e... o biserima i draguljima ćemo nastavit drugi put, jema tot materijala za libar složit , e...

ajmo sad ča dat mrvu čuda prirode. 

reste iz palme, by XVII, slikano jutros, klik za veće

e...

Jaja se to cili svit zna
moredu na milijun
mali nacin spravljat
i u sorbulu i na joko
sirova, more ih se
i u tvrdo i u meko i u gusto i u ritko
i sa svon mogucon spizon mutit

ši. puno je to lipa spiza. je, je sve dok van susidi:

ne ostanu brez love i ne odluče krenit u poslove nove.

onda se recimo site svoje svojte u vlaškoj, naruče na stotine kartuna  jaja i počnu ih prodavat na crno, brez veterinarske kontrole. ilegalna butiga im je u stanu, a nađe se koje jaje o' te družine i na zidiću o' isprid samoposluge.

sveti duje spasi nas o' tičje gripe!

ovo je narafski jopet biserno-draguljna štorija iz moga portuna.

bit će još...

-------------------------------------------------------------------

ovo je još dobro, jema kvartova u kojima goje i kolju i prajce...

e...

narafski, jeman još ovih biserno-draguljnih štorija, pa ću notat štagod ovod, e...

jeman susida ča misle da svako par godin stan triba temeljito ispritumbat. ono, di je bija tinel neka bude kondut, di je bila kamara neka bude kužina. pritumbavanje mora bit jušto takvo da konačni uradak opće ne sliči na prvobitni nacrt tega stana.

onda se dovedu pusti meštri, danima se bužaju i ruše zidovi, ne more se ni obid izist na miru, pari da će se kuća srušit o' vibracija. narafski, ne more se ni zaspat ka čovik o' svega tega. po hodnicima su blokete, vriće cementa, mišalice, stari lavandini i armeruni... čovik za doč do svoga stana triba postat tica nebeska tj. tribaju mu narest krila.

e, sad slidi najzanimljivije. ko to sve plaća, a?

a evo, ovako nekako to gre... kad se u jedne o' vrlih mi susida finilo sa  monadon priuređivanja stana, došli meštri naplatit račun. zvone judi na parlafon, ne otvara ona. otvorija već neko u zgradi. došli do njenih vrata, ne otvara i jopet ona. čini fintu da ih ne čuje. vidin je priko terace kako trese niku krpu. ka ono nisu njena posla. sad ovi meštri već počinju bit nervožasti. zvone i po drugin stanovima, traže je. ništa. nima rezultata tj. račune platila nije. njihov dolazak se ponovija još nikoliko dan, a poslin ih je mora bit štufalo činit skale.

neću tvrdit da su konte namirili. ma ke, e...

e...

još jedna biserno-draguljna. di sve ovo nalazin, a?

a u svon portunu, di ću drugdi, e... ;)

dakleM, kad ih zovu na mobitel kažu judima da su na poslu.

radno misto im je: zidić

opis posla im je: dilanje 

e...

evo još jedna iz skupa biseri i dragulji.

čovik je radija ka šofer u jednu veliku firmu. vozija je diretura. jedan dan mu je to sve skupa dosadilo, pa je uša u kancelariju o' šjor diretura. sija u njegovu fotelju. diga noge na stol. raskomodija se, e... počeja potpisivat spise i tuč timbar oli pečatirat ih.

onda mu se dogodila dijagnoza: šizofrenija.

žalost i nevolja, e...

a znate ča je najveća žalost i nevolja u ovoj bidnoj zemlji apropo tega, a? sustav, e...

sustav jerbo narafski da taj lik još uvik  vozi tonobil. onako, privatno. ulicama grada splita i okolice.  onin istin ulicama kojima prolazi svit, dica, kojima voze judi brez dijagnoze.

------------------------------

eto, zaradi takvih ne pivan o' sriće kad gren u tonobil...

e...

svašta na ovemu svitu.

tek jedan o' "skromnih" zahtjeva jedne peršone ča mi je nažalost susida virovali oli ne glasi:

- svi je tribaju prvi pristojno pozdravljat, činit moj naklon, a u sve stanove će ona uč kad je nju volja.

sve joj to narafski triba omogućit predstavnik suvlasnika (nekad se taj lik zva pricidnik kućnog savjeta).

mislin da su sve dodatne riči u ovon broju suvišne, a nastavak na temu biseri i dragulji slidi... jema tega još narafski. probat ću dat i koji litrat oli film da vidite likove  na djelu

spliski porat večeras by XVII, klik za veće

www.croatiaboatshow.com

parada force, moći, pinezi...

upravo čitan, priporuča se...

životno i tutokompleto zanimljivo, o prijateljstvu, jubavi, životu, čita se s lakoćon.

zanimljivo je da je  sve u formi e-mailova i chata.  cili tekst.

dakleM, Cecelia Ahern , Na kraju duge

Nije toliko sam brod

koliko vješto upravljanje brodom

ono što čini putovanje uspješnim.

G. W. Curtis

split by XVII

e...

danas smo vižitali jubilarni 10. croatia boat show. službeni site sajma je:

www.croatiaboatshow.com

u sklopu ovega, već tradicionalnog događanja, uša je i croatia property show.

www.croatiapropertyshow.com

bilo je dobro, sajam je svake godine sve bolji i bolji. trefili smo poznatih, upoznali i nove ljude, učinili litrati oli slika.

sadržaj?  stvari o' milijuna i milijuna eura, pa do nekih simboličnih suma. štagod mi je narafski zapelo i za joko, pokupili smo cjenika, proučavat će se kako se uvati vrimena....

za one ča još nisu bili možda će dobro doč i informacija da je karta za vižitu oba sajma 70 kn. 2 u 1 za 70, aj, more stat.

litrati jema 126, pa ćemo ovako. vižitajte ih ovod:

http://www.flickr.com/photos/xvii_st3/sets/72157604461217753/

(klik za veće)

oli isto u detalj (isto klik za veće):

http://www.flickr.com/photos/xvii_st3/sets/72157604461217753/detail/

a isto jema i ka slideshow:

http://www.flickr.com/photos/xvii_st3/sets/72157604461217753/show/

 tot morete sve vidit vrlo detaljno, brode, tonobile, more, split, mene, a možda vidite i još koga poznatog oli proizvod firme za koju radite oli one koju zastupate.

ekola, gren ča, jemate pozdrav!

e....

katkad se pitan: jema li kraja licemjerju u ovoj bidnoj zemlji?

nikidan mi arivala jedna pozivnica o' Hrvatske udruge poslodavaca za Kongres malih i srednjih poduzetnika i to 4. po redu.

uza pozivnicu za kongres šalju i pristupnicu ako se želin u udrugu poslodavaca učlanit, a na ti kongres mogu doč i članovi i nečlanovi udruge.

e, sad, Hrvatska udruga poslodavaca mi nije od interesa, dapače, smatran da bi mi članstvo u njoj gadno narušilo reputaciju tvrtke i odnilo a ne donilo poslove i to zaradi tega jerbo tot jema svita ča bi u neku normalnu zemlju bija u pržunu, a u ovoj bidnoj zemlji su dogurali do vrlo visokih pozicija na krajnje čudnovat način. ja sa takvima ne želin bit nigdi skupa, nimamo ništa zajedničko, pa tu pristupnicu stavljan u arhivu...

no dobro, poslali ljudi pa poslali. njihovo je pravo da šalju, moja je sveta dužnost da čuvan sebe i svoju tvrtku.

ajmo ča dalje. da vidimo malo šta će bit na ti kongres, e...

TEMA: Financiranje i poticanje malog i srednjeg poduzetnistva

narafski  jedan od govornika je šjor premijer sanader. i narafski, triba učestvovanje na kongresu platit i to za nečlanove udruge poslodavaca dođe 220 kn, a članovi se prolaze sa 175, 00 kn.

je, je, oču, ne bi da mi pamet smeta, sve trčen dat te pineze, e... ja tega šjora ne bi došla slušat ni da on meni plati. ne bi mu bilo dosta ni 220 milijuni euri oli dolari, e...

kakvo licemjerje, a? licemjerje kažen jerbo van u praksi traženje poticaja izgleda ovako svitu moj:

http://www.xvii-online.com/p-sramota-od-hdza-i-jopet/124160.aspx

znate kad će bit to događanje? na 17.04 u 'otel lav.

sad triba stat atento i na ti dan dobro zaključat kuću i još bolje pripazit na takujin, e...

----------------------------------------------

evo, ovo sve moš ovako lipo reč kad nisi u njanci jednu partiju ka ča ja nisan, kad živeš o' svoga rada i znanja i kad nisi lizoguz ni jednega pricidnika (od onega ča je pricidnik kućnog savjeta oli predstavnik suvlasnika pa sve do pricidnika republike). e, sad vidi koje ja bogatstvo jeman čovik moj, a? ;)

e...

u rvackoj, zemlji kartušine i birokracije pošten čovik po cile dane gre o' kancelarije do kancelarije i za žive, ali i za mrtve i vižitaje vrle činovnike. triba mu milijun i jedna potvrda.

kad neko parti, fameja jema prav na smrtni list. e ma za ti smrtni list van, virovali oli ne,  triba:

- rodni list

- vjenčani list

- osobna

- domovnica

o' pokojnika. malo prikovišje, a? a je jerbo, recimo, oli osobna ne more  bit umisto domovnice?! da bi se dobila osobna ionako triba domovnica. samo kako bi se onda punija proračun, a?

glavno da ovoj gospoji ne triba ništa. iako je pulicija u splitu podnila kaznenu prijavu jerbo se zaposlila s falšetama, ona još uvik "uči" našu dicu. drugi grad po veličini u rvackoj. nikoga narafski nije ni najmanje sram....

u europu gremo punin jidrima pod vodstvom "najdražega" nam šjor sanadera!

 kurnatska idra by boris kragić

e... ovo san zasad vidi samo kroza cakal, ali sigurno ću poč temeljito vižitat jerbo i ta mrvica viđenog mi je rekla da se radi o dobroj stvari. litrati povezani s jednin o' najlipših dilova zemaljske balote. šta, a?

događanje: izložba litrati (fotografija)

naslov: kurnatska idra

autor: boris kragić

misto radnje: galerija fotokluba split, marmontova

ulaz: uvik je besplatan 

dura: do 11.04.2008.

kurnatska idra by boris kragić

tko gmiže, bit će zgažen;

tko se previše gizda,

razbit će glavu o gredu.

Benjamin Franklin

e... prežident o' jamerike, šjor bush je partija iz rvacke. neću danas o temu jerbo o temu morete čitat u sve foje, na internet, gledat na tv. gren van ča reč dvi tri riči o jednemu vrlo zanimljivon američkon prežidentu, peršoni ča je zadužila čovječanstvo.

benjamin franklin

1706. -1790.

američki državnik, znanstvenik, pisac i izdavač

rodija se 17.01.1706. u bostonu ka deseto dite u fameji u kojoj je vladala velika mižerija. bavija se elektricitetom, ustanovija dvi vrsti naboja, napravija prvi gromobran, kartira golfsku struju, itd. poznatim pokusom sa zmajem dokaza je da je grom povezan sa elektricitetom. u philadelfiji je osnova prvu javnu knjižnicu, izdava je foje (novine)  i  libre (knjige). jedan je od autora deklaracije o neovisnosti i potpisnik mira s ingleškon. umra je 17.04.1790. vrlo detaljan životopis ovog svestranoga čovika jema ovod:

http://www.english.udel.edu/lemay/franklin/

 -------------------------------------

pokus, par rigi nađenih na netu:

Za dokazivanje svoje teorije da elektricitet nastaje prilikom udara groma, Benjamin Franklin je imao više ideja. Prva ideja je bila privući elektricitet na vrh tornja crkve u Philadelfiji. Kako je za izgradnju tornja trebalo dosta vremena, sjetio se da bi bilo lakše približiti se oblacima koji su "bogati" gromovima. Za tu priliku Franklin je konstruirao zmaja. Na vrhu toga zmaja bila je željezna žica (koja je trebala privući elektricitet), a na rubovima konci od konoplje. Nakon što je konstruirao zmaja, Franklin je otišao u područja koja su bila poznata po grmljavinama. Bojao se podrugivanja i podsmjehivanja.Nije nikome govorio o svojim planovima, nego je uz pomoć svoga sina otišao u polje i za vrijeme oluje dignuo zmaja u zrak. Za vrijeme pokusu njih dvojica su koristili sjenicu kao zaštitu od udara groma. Eksperiment u početku nije davao pažnje vrijedne rezultate. U trenutku kad je već posumnjao u postojanost svoje teorije, uočio je da su konci konoplje međusobno razmaknuti. Izgledali su kao da je svaki od njih spojen na zaseban strujni vodič. Kako se poslije navodi u rukopisima, osjećaj koji je u tom trenutku stanovao u njegovom tijelu nije nikada zaboravio.
Kako bi još više učvrstio vlastitu teoriju elektriciteta, na kraju konca je pričvrstio ključ i zmaja ponovo dignuo što bliže "gromovitim" oblacima. Nakon određenog vremena na kraju ključa se pojavila evidentna i jasno vidljiva električna iskra. U trenutku kad je kiša smočila konac i ključ isti su akumulirali znatnu količinu elektriciteta.
Franklin je u lipnju 1752. godine dokazao postojanost svoje teorije. Međutim, ona je dugo vremena ostala misteriozna i maglovita jer Franklin svoje zabilješke nije objavio. Sve što je o događajima toga lipanjskog dana zabilježeno objavio je petnaest godina poslije J.Presteley koristeći Franklinove zabilješke.

www.croatiaboatshow.com 

e...

Split, 5. - 13. travnja 2008.

sajam bi se triba otvorit sutra. litrate o' lani morete vidit ovod (to da vam ne bude dosadno dok ja ne stavin ove friške, e). bude na temu sajmu zviri o' makinja, stvarno bude,  a za ovu godinu su najavili čak 5 brodi šta jemaju višje o' 30 metri i pizaju oko 15 milijuna eura . svaki, narafski. (da, dobro ste pročitali). manifestacija je tradicionalna, međunarodna i vrlo bitna. ma koliko mi splićani grintali da nam je zakrčilo rivu, split triba takav događaj oli kako moderno reču event. ne dura to cilu godinu, samo šetimanu, a riva nan je ionako sad tragedija. oli puno po njoj šetamo, a?

sajam je lipo vidit. karta je lani recimo bila 100 kn, ne znan koliko će bit ove godine, ali za te pineze stvarno jemaš šta vidit. a kupit, a? e a čovik moj, ovisno o mogućnostima. meni je lani zapeja za joko jedan gliserić, sa pojačon penton je piza mrvu manje o' 20 iljad euri i to bi nekako naš čovik na neki kredit i moga, e... ovo ča piza po po milijuna eura ipa na višje je za bogatune, tajkune i sl. no, moreš nač dobrih svakodnevnih stvari ka ča su peraje, kakva tunja, maska, konop, motor i sl. i takve stvari obično tot budu cinije vengo ča su u butigu.

narafski, na matejušku oli u koju drugi lučicu oli mandrač se ugodnije ćutin, ja san ipak dite dalmacije i meni je brod gušt, niko preseravanje tin mi pomalo gre i na nerve.

na sajam ću ipak nastojat poč zaradi višje razloga. neki su:

- volin brode pa mi je gušt vidit ča jema novega

- posal. triba koga trefit, javit se, upoznat i novi svit

- ovo je jedan o' jačih događaja u split, zaslužuje da bude vižitan

- ovi blog, triba učinit koji litrat

i to je ka to. pulitičare i ostale šimije ćemo škivat na način da nećemo trkat na sajam odma sutra, ali litrati će valjda bit za koji dan. zaradi tega, strpljen spašen, pacijenca je vrilina!

ekola, gren ča, jemate pozdrav!

 karta murtera, more se uvećat klikon, autor: hidrografski institut

virtualna šetnja:

http://www.aroundcroatia.com/projekti.asp?l=0&k=1&IDp=37&vr=227&m=2&ID=3&IDpn=31

e...

za one ča ne znaju, iz splita triba vozit ka da se gre za zadar tj. put vodica.

otok murter je jedno 30 km o' šibenika, iz splita tonobilon triba oko ura i po do tamo. jema kopneni i otočni dil. ključna mista su tisno, betina, murter i jezera. sve skupa (a pogotovo ako se u aranžman stave i kornati) je jedno o' najlipših mista na zemaljsku balotu.

 evo i linkovi na nike moje litrate murtera:

http://www.flickr.com/photos/xvii_st3/sets/72157594391051692/

http://www.flickr.com/photos/xvii_st3/sets/72157604321122588/

danas mi je Otok posta još jedan korak bliže.

kad nisan u splitu oli digod drugdi za poslon, nastojat ću bit tot. sunce, more, galebi, brodi, masline, smokve, borovina, otok, neće mi falit tot ništa, e... moj san će prič u javu. kome kjaro kjaro, kome ne ne, neću višje ništa notat, ma ke, e... ;)

tigrić by XVII, jedan stariji, ali meni drag snimak

e...

u oko 3 miseca 3 operacije. jučer zadnja. probudija se iz narkoze i sad odmara. jopet jema rez o' jedno 15 centimetri. nakupilo se jopet tega nesritnoga tkiva ča je povezano sa oni tumoron zaradi kojega je bila prva operacija, pa mu je likar mora i to očistit iz njegovog malog tila.

operacije, narkoze (za one ča ne znaju: buđenja beštijica iz narkoze su nešto vrlo neugodno, to zna durat po cili dan i beštijica jema povraćanja, baulji ka da je pijana, pothladi se i sl.), punti, teško bi to sve izdrža i čovik, a kamoli mačak. zaradi tega ću s pravon reč da je ovo moj mali junak. dotur govori da je očistija sve do kosti, da bi tribalo bit dobro. inače, tigrić je vesel, razigran, dobro jede i sl., pa mi to daje nadu. kako su mu sad morali micat i mišić, pa ga jopet vraćat, moremo reč da operacija i nije baš bila jednostavna, durala je priko ure.

doturu bošnjaku (veterinarska ambulanta za male životinje bošnjak) ka i njegovoj tekničarki i ženi dariji (ovo mi je baš interesantno, kad čovik dili tutokompleto život sa peršonon koju voli) ću beskrajno zafalit ča su operirali tigrića i ča su mene i njega  vozili o' kuće do ambulante i natrag (ovako su mi dosad pomogli bezbroj puti i to zaslužuje sve pohvale).

a kako moje šofiranje, a? a evo, šjor instruktor banović govori da san bokunić bolje, pridlaže mi da proban poč i na ispit, ali vidit ću oko tega još, jeman još malo vozit pa ćemo onda donit neki zaključak.

narafski, kroza svo ovo vrime i radin, ne dan se, ali da je baš veselo ovih dan, i nije. ma ke.

eto to je to, u dvi tri riči.

 marjanska sličica, slikano ove zime, by XVII, klik za veće