maška i miš by xvii

e... jema svita ča voli škovace. jednostavno voli. kad jemaju mogućnost izbora između poštenoga svita i lupeža (lupežica), biraju lupeže (lupežice). zaradi čega, a? e... uvik misle da će tot štagod ušičarit. narafski, na kraju dobiju smokvu suvu, ali za to svatit triba jemat pameti. pametan narafski rađe bira okruženje ča vonje na štagod bolje vengo na štrace i škovace - jema samopoštovanje i zaradi tega i je pametan. jubitelj škovaca nima samopoštovanje, a zaradi čega ga nima sam najboje zna. jubiteljima škovaca narafski i je misto u kanti o' škovaca, a oni ča to proba prominit more samo izvuč deblji kraj. jerbo, svaka tica jušto svome jatu leti, isti se istome raduje.

- - - - - -

izaberimo grad, izaberimo selo - ma friga mi se za sve to, danas san izabrala prirodu. prošla cili merjan (twingić je u servisu, pa mi je to odlično došlo za hodat jerbo hodanje obožavan), poza tega se spustila na more i negdi između ježinca i zvončaca notala ovih par rigi u notes. ovo je jedan o' ritkih postova notan lapišen na kartu, obično notajen drito u škatulu o' kompjutera. opče nije inspiriran današnjim izborima za poteštata, ma ke, e... vengo čime, a? životon svagdašnjim, jednim tonobilom u jednoj ulici, mižerijama o' judi, ma nije opče bitno, e..

stavila san ga na kartu da ga jeman uvik uza se i proštijen po potribi.

ala, ala, gren doma, mater mi je skuvala punjene  paprike za obid (s pireon) - odličan motiv da se krene.

morski litrat by xvii, slikano mobačem

more by xvii, slikano mobitelom danas pozapodne

evo i ove litrate ka i one u prošlon postu dajen u popriličnin veličinama.

 je san li se banjala, a? narafski da jesan, naplivala san se ka rogošić. more teplije o' arije, na ciloj plaži tri peršone, cili kaštelet meni, guštala san samo tako, bilo mi je bolje vengo šeiku. ovo je druga vala kašteleta (ona poza obojene) i narafski zvončac.

e... arija je danas prozračna, nebo se plavi, litrati ispadju dobro kad je takvo vrime.

evo duje by xvii, klik za veće

ova dva litrata vam moredu poslužit i ka pozadina na vašoj škatuli o' kompjutera. kako, a? evo uputica za one ča ne znaju kako to učinit. najprvo kliknit na litrat za dobit veće, pa all sizes i onda klikni na najveće. poza tega uprite desnu tipku mišonje i odaberite set as background. fala XVII 

e...

nekako su me ovi oblaci povrj splita učinili bokunić nostalgičnon. gledan kroza ponistru i sićan se osamdesetih, kumpanji, matejuške, bača, ajduka, azre, svega ča smo radili, kako smo živili.

nismo jemali mobitele, a kompjuter san prvi put vidila na praksi jerbo san odila u elektrotekničku skulu i jedan dan o' šetimane smo jemali poč u privredu radit umisto u skulu. nije bilo worda, pisalo se u chi writeru. na temu računalu san nacrtala moje prve komjuterske sheme i napisala maturalni rad kojega smo morali pisat iako nas je ostalih dilova polaganja mature oslobodilo (samo one ča su sve razrede prošli su pet).  nije bilo državne mature ča je išempjala dicu ni ostalih "genijalnosti" šjor primorca i njegove svite... bilo nam je kjaro je li polažemo oli ne, šta se polaže i koji dan šta gre.

redovito smo išli na koncerte na obojenu liti, posebno kad bi piva ban, pa na ajduka, a za koncert azre smo u fili stali i po nekoliko uri za vazest kartu. sve johnyeve pisme smo znali napamet. ja mislin da u to vrime njanci jedan dan nisan ostala doma. ča skula, ča banjanje, ča sve moguće zanimacije, ča kumpanji - ma uvik san bila u muvingu.

bile su to osamdesete kad smo mi, onda cure i momčići, sanjali jednu lipu i našu hrvatsku. šapjali smo njeno ime, a joči bi nam se zacaklile o' sriće. virovali smo da ćemo je jemat.

par godin poslin buknija je rat i  mnogi su moji poznati ostavili život na ratištima. tih dana smo sa strepnjom gledali u šonete.

jemamo danas li ono ča smo tili, a?

me ke, e....

rat i poraće su poseljačili zagreb i split do maksimuma (neka mi se pošten seljak ovod ne uvridi, mislin na seljačine, a ne na seljake, razlika između seljaka i seljačine je bitna). pojavili su se niki čudni judi, opljačkali ovu zemlju, uveli svoj nemoral i netoleranciju prema i mrvicu različitome na svaki kantun. pljunilo se na radnika, intelektualca, svakoga poštenoga čovika ča misli svojon glavon. pljunilo se na dicu, žene, starije, ljudskost, znanje, obrazovanje. pljunilo se na moral i na duhovne vridnosti. čovik ča nije lupež je posta predmet sprdačine. mito je svugdi, svako malo pljačke i ubojstva. do pravne države demokratskog uređenja dalek još je put.

mislin da smo prije bili sritniji. nešto smo želili, nešto sanjali. danas je u justima tek gorak okus razočarenja. priša, trka i strka u smislu preživljavanja.

stare kumpanje trefin ritko, između škancija velikih butiga oli ih čujen na internet.   sad ću puštit jednu pismu naše mladosti i ne nadan se da me adezeovci neće doč uapsit. skužajte drugovi iz partije, ali mene nećete natirat da slušan cajke. nisan ja o' te vrsti, ma ke, e... a isto tako mi nećete zabranit mislit. ne dan se.

uštekaj zvučnike, gre azra.

e...

tajkuni su se počeli slikavati po slobodnoj  i notavat ča su činili.

a ča ovu šetimanu čini jedan poduzetnik - bolje rečeno poduzetnica ča je na tržište krenila praktički samo svojin poštenjem, imenom i prezimenom,  znanjen, nešto malo vlastitih pinezi - porijeklo poznato, jednin starin kompjuteron i brez veza u politici i kod pricidnika mesića.

daklem, poduzetnik ča je totalna kontra todoriću, kerumu, rogliću i svim sličnim čunkama.

ovu šetimanu ka i svaku drugu šetimanu san radila dikad i do kasno u noć. pod kontrolon i u glavi držin cilo poduzeće.

kod mene nima šofera, niman savjetnike (dikad pitan štagod poslovne doduše, ali nisu mi na plaći), niman tekničke i financijske direture, bezbroj službi ča obilježavaju robusna, troma, velika poduzeća.

kod mene je na snazi malo drugovačiji vid organizacije, ali upravo zaradi tega ča je tako smo brzi, efikasni, uspješno prolazimo kroza recesiju, nimamo nelikvidnost, nimamo dužnike, nikome ne dugujemo, svit kod mene ne ostaje brez svojih pinezi. dok su svi ovih dana otpošljavali, kod mene su se pisali novi ugovori o djelu i o radu tj. ljudima se dalo posla.

ko je tot onda velik, a ko mali pitanje je sad, a? meni je za opstat dosta laptop, veza na net i vridni obrazovani judi koje angažiran, ne grcan u kreditima za brode, otele i sl. 

držimo intelektualne usluge i po ne znan koji put se pokazalo da san bila vizionar kad san tribala donit odluku sa čin krenit. kruva, salama, postola i vešti, kolonji, žileti, tuferi, čartera i apartmana i onako na svakon kantunu - ovo ča mi radimo jemamo jedini u rvackoj na ovakav način.

(vidi: www.parametar.hr)

bojin li se za budućnost? ni najmanje, uvik ćemo mi radit, kad niko u rvackoj ne zna i ne more, mi moremo. svi putevi ionako vode u rim kad zagusti i kad je potriba stvarno rijesit problem.

ovu šetimanu san u trci strci oko tonobila. jemamo štetu, pa se sad daje sve o sebe da se tonobil popravi. vozin renault twingo (novi tip) jerbo mi se ni potriba dokazivat nečin bisnin, to neka čine tajkuni i šimije oli majmuni - nimaju se pokazat čime pa onda je jedina mogućnost time. ja jeman ono šta oni nimaju, ča vridi puno višje i do čega nije moga doč svaki pretvorbni muljator.

ovu šetimanu san išla na more i to u splitu, mene o' građana ovega grada ne čuvaju zaštitari, gren po njemu slobodno i di me voja. zaradi moga prolaska puliciju ne toka ispraznit ulice. ne tribaju me ni o' radnika čuvat zaštitari, vidit ćete me i š njima proč priko grada oli u tonobil kad negdi moramo poč.

ovu san šetimanu ka i uvik nosila najobičniju robu i postole i bila ka i uvik jednostavna. skromnost je vrlina, a ne mana.

ovu šetimanu san dogovorila novih poslova i za stare sredila račune. ka i uvik i ovu šetimanu san uza sav posal učila i dicu jerbo nisan nikakav nedodirljivi faraon vengo običan radni čovik, a predviđeno je da se sutra uče i odrasli.

narafski, i ovu šetimanu san se pozabavila oko mojih maški koje nimaju rodovnik, ali vride puno višje vengo ča bi moga dat kerum, todorić, roglić.

eto, tako je protekla ova šetimana, a sad ćemo još za gušt navit jednu lipu pismu. ekola, gren ča, jemate pozdrav!

odlazak?

e, ali morete me uvik nač. mene i svakoga koga tražite. dosta vam je broj mobitela i samo uprite na ovi link http://www.sat-gps-locate.com , pa upišite broj mobitela peršone ča je tražite  i ekola, sve ćete vidit, ko, šta, di i s kim hehe

eto, u iščekivanju google latitude ča će vridit i u rvackoj more i ovo poslužit.

e... video, glazba, izvedba - ma sve je toliko dobro da su ovod riči suvišne...

e...

rič.

rič istinita.

riči.

riči istinite.

pari ništa.

pare ništa.

ma ke, e...

masu je zaradi nje šticanih, fotanih, idnih, ostavljenih, razvedenih, napuštenih. 

masu puti i ne ostane samo ne temu, vade se rašpe, bombe, rivolveri.

svi bi tili istinu i mrze laž, a kad čuju istinu nije im nikako prav. malo je kome istina stvarno draga, e... višje vole lažno, licemjerno laskanje. eto ti čovik moj, čovik tako proklet ka ča je će uvik rađe bit u društvu ulizica, dupelizaca i licemjera koji bi mu da mogu bubrig izvadili i prodali na crnon tržištu vengo sa peršonon ča će mu reč istinu, ali mu neće učinit ništa loše vengo samo dobro i želit će mu uvik samo dobro.

zaradi čega je tako, a? eee, zaradi tega ča bi svak tija bit najlipši, najpametniji, najimućniji i ne znan šta sve ne, ali neka budu samo superlativi. zna dobro da i nije baš tako, ali oni ča mu floćaje i laže maže u joči mu je najdraži, pa makar mu gleda ukrest ženu, bubrig, srce, tonobil, stan, brod - ovisno o temu šta ko jema.

ego, to se zove ego i kojekakvi kurbini sinovi (a i čeri) fantastično igraju na kartu tuđeg glupavog narcisoidnog ega laskajući i kroza to vrime iza leđa šporkarije čineći. kroza to vrime,  naša mona o' čovika samo lipo viruje da ga baš takva peršona voli, a s onon ča mu zna reč istinu mu nije drago bit.

mislin da je čovik odrasta i zreo ka peršona jušto onoliko koliko zna razlikovat fločavanje lupeža o' dobre i iskrene peršone, odnosno koliko se zna nosit s istinon brez da nos digne u ariju, brez da pođe vadit bombe, rašpe i rivolvere i brez da očajava - štagod se more i popravit u životu, a nešto neka ostane i kako je, kome smeta, pa upravo je tako najsimpatičnije, e...

finit ću ovi moj tekst citaton pametnoga čovika.

Istina nije uvijek ugodna, a laskanje nije uvijek istinito. - Tolstoj

e...

lipo san notala prošli post, puna nade i vire u pozapodnevno banjanje. narafski, kad misliš kako poč na more, odma dođe novi posal. e pa ajmo ča radit jerbo bogu fala moren i oču radit, nisan čer kojega lupeža, nisan o' partija ni o' njihovih lizoguza, nisan sponzoruša, ne živin po tuđin kućama (a zaradi čega bi kad jeman najbolji stan u splitu, a? a zašto je najbolji, a? jerbo niko na ovoj zemaljskoj baloti nima pinezi za ga kupit - centar, pogled na kampanel sv. duje, merjan, broč, šoltu, obilato kvadratića i narafski ne, niko nima pinezi za ga vazest, e...) itd.

dakleM, samo pričajte o krizi, kukajte, grintajte itd. u www.parametar.hr  je to najstrože zabranjeno, u nas se uvik radi, nekad višje nekad manje, ali posla jema. ne dobijemo ga partijama, priko pricidnika mesića, po podobnosti, vezama vengo zaradi tega ča ozbiljno i vridno radimo. nikome ne dugujemo, niko nam ne duguje, nimamo ni dana blokade, svi su ljudi uvik plaćeni, a ča se tiče naših novosti uvik ih morete čitat priko linka kojega san dala. prijateljima će bit drago, a neprijatelji će plakat - ja baš tako i oču...

ma bit će banjanje sutra. neće more uteč, ma ke, e....

e...

lito je. ključna pitanja su: šta čitat, di se poč banjat i šta izist?

ako prikovišje čitate foje (novine), o' političara će van doč loše. zaradi tega višje volin libre.

ajmo ča vidit šta bi se moglo vazest za čitat. gledan škancije s librima, uvik se more nač štagod ča se još nije pročitalo oli štagod ča se more ponovit.

aha, evo nešto ča nisan pročitala i ča mi pari da će bit  zanimljivo jerbo jema naslov ča privlači. stavit ćemo u boršu, pa poza posla na banjanju otvorit korice i počet. nekako virujen da će to bit dobar libar. 

a di se poč banjat, a? a ne znan još di danas, di mi šune, s one oli ove bande merjana, kako vitar bude puva. kaštelet, kašuni, sike s druge bande, svugdi je dobro. kako do tamo? e a na noge, da kako drugovačije, e... twingić je u serivsu, a ionako se baš ne volin puno vozit u tonobilu, pa nećem poč na način da neko drugi  vozi. mislin da tot nije loše doč ni bičikleton, a tantobus ćemo ostavit penžjunatima.

hodanje je zdravo i dobro za liniju (fala ča pitate, odlično me gre, višje niman viškova i ušla san u robu koju san mogla nosit kad mi je bilo 19 godin , pa čak i u jedne gače koje san vazela sa 14 godin. ušla bi i u druge stvari koje san jemala sa 14, ali niman to višje u armerunu, dala san susidima, svojti i sirotinji). 

a kako se uspilo skinit kile, a? evo tek bokunić tajni, ali možda će nekome pomoć:

• pojačano kretanje, trkat po merjanu (ne po zvizdanu), plivat.
• manje izist, večeru san ukinila tutokompleto i oko šest - sedan uri samo pojin tekući jogurt i koji najobičniji keks (najbolje one iz bjelovara oli još bolje francuske), poza te ure njanci mrvicu mrvice.
• ukinila san čikolate, bombone, pašte, goluzarije svake vrsti, krokante, torte, žbačena jaja sa cukron, paradižote, rožate itd. to more u najmanjin količinama i samo u posebnin prilikama.
• pit dosta vode, barenko litru i po na dan.
• za obid samo feta kruva, a manistre i kumplira izist ča manje; ako je to za obid, onda pogotovo pazit na kruv.
• za doručak samo jedna fetica kruva i tanko je namazat.
• izist ribe i piletine, a zaboravit na premasne bokune.
• marenda višje ne postoji, ča je to?
• na balancu stat svaki dan, odma ujutro čin se obavi potriba i prije vengo se nešto izi.

   

svima onima ča kukaju kako ne moredu skinit kile ćemo reč: kili nikad nisu o' arije vengo o' spize. kalmaj spizu, pojačaj fizičku aktivnost i viškovi će partit.

ako je kili prikovišje, triba poč do likara. ne valja ni naglo mršavit, to more bit opasno. bože sačuvaj se poč izgladnjivat, ma ke, e... kile triba skinit pomalo i s pacijencon. jerbo, ako ne učiniš tako, more stvarno bit opasno, a i vratit će se brzo nazad. nisan duperala nikakve un dijete i nešto slično. nisan duperala ni nikakve preparate za mršavit, nisan išla po teretanama (njih ne moren smislit, živila friška arija i priroda), samo ovo ča san gori napisala i upalilo je. eto, probajte i sami pa ćete vidit.

ekola, gren ča, jemate pozdrav!

e... evo jedna pisma, vesela, dobra, puna spliskih riči. dok je twingić u servisu,  karoca gre... oliver, guštajte!

e...

jema još svita ča voli čut dobru pismu, ne slušaju svi one škovace o' cajki i turbo-folka. ova gre za sve one ča su muzički normalno osvišteni. guštajte! 

e... eto ste mogli čitat kako me strefila pegula s tonobilon. sa stvarima je zapravo uvik neka monada. jedno kupiš, drugo crkne. jedno otplatiš, o' drugoga dođu rate na red. neću se sekirat, kad mi je već suđeno da svako malo jeman neki tramak oli neku monadu, gucat ću to i dalje hrabro, nima mi druge, e... 

evo da se bokunić razveselin gren navit i malo mužike... jerbo, ča su nam stvari opče, a? nužno zlo za priživit ne ovemu svitu, njanci jednu o' njih ne moremo ponit sa sebon kad partimo, e... jema  štagod ča moreš vazest, ali to opče nije materijalno. jubav, dobrota, znanje, uspomene - eto to ti u valiže more stat kad dođe vrime partence, e... ništa drugo, e...

najvažnija je škatula za sne...

e pa uštekaj zvučnike - škatula za sne gre.

a za koga gre, a? evo, za one puno kurjože:

gre za jednega šjora u najboljin godinama, o' jedno 1.90m i jedno 90 kili (mire dalmatinca tipičnoga), podužega jezika (osobina dalmatinca tipičnoga. je, lajav je, a šta ćemo, nije to ništa neobično. neobično je  samo to šta mu jedino ja uvik sve opraštan), lipih jočiju (ovod ćemo u zagrade stavit: uajme) i no comment ušiju ( - u zagrade ništa jerbo smo rekli no comment). hehe, ajme, jesan vražja, sad čekan kad će se doč karat (šta u dalmaciji narafski znači svađat, e... a ča ste mislili, a? ovo je pristojni blog, e, nima ovod ništa nepristojinih riči, ma ke, e...)

dakleM, samo se ti lipo dođi karat (svađat), urlat ćemo do iznemoglosti. najprvo malo ti, pa onda malo višje ja, a poza tega ćemo se dogovorit ko će nastavit deraču. jedva čekan. to mi je super jerbo je moj jezik ipak duži zato ča san (fala bogu) žensko.

a zna li taj šjor da je baš za njega, a? ši. a jesan li sigurna da zna, a? ma ne bojte se opče, poviri ti šjor redovito ovod... more bit da ča je god život donija i ča god još da donese, da mu niko ukrest ne more škatulu za sne, e...  a more bit da vridi i da ča je god život donija i ča god još da donese, da mi niko ukrest ne more škatulu za sne, e...  

a java, a? e, stop, stani, fermajemo. opče nije bitno. ča vas briga, a? bitna je škatula za sne... nje ili jema ili nima, a ona je najvažnija, e... ako jemaš tu škatulu i ako je jema druga strana, moguća je jubav, mržnja, strast, nježnost, radost, tuga, srića, nesrića, zadovoljstvo, bol, ono najvridnije ča moreš oćutit - ka ča vidite zapravo sve ča upada u skup silovitih emocija. kad škatule nime, e, onda čovik moj, jemaš samo jednu rič, a to ti je ravnodušnost. ona je narafski brezvezna, bljak, ne znači ništa, nikome ne triba, niko ne čezne za tin, bolje je i umrit vengo s njon živit.

nikidan san prolazila kraj jednega štekata na manuš. čovik je govorija nikoj šinjorini: "volin pogledat koju lipu žensku, zaradi čega ne, a? e ma meni je moja ane najvažnija na svitu. jerbo, jedino se s njon moren onako strastveno karat (svađat) i fala ti bože na temu jerbo dok se moremo tako karat (svađat), moremo se i volit. sve ostalo je kakica i pišota, nebitno, nevažno."

eto, ti čovik jema najvridnije, jema škatulu za sne i beskrajno je bogat. ajmo je ča navit, nećemo višje čekat

e... flegma. pačifiko. kolafjaka.

ovod u dalmaciji je velika potriba razvijanja ovih osobina kod svih nas pa i kod mene.

jemala san jučer štetu na twingiću.

nima kaznenih punti, nima judskih žrtava, nima mačjih žrtava, nima tičjih žrtava, nima nikakve štete osin ča twingić jema materijalnu štetu. sad je na popravku, a ča je bilo možda vam ispripovidin za koji dan, kako buden o' volje.

dogodila mi se pegula, brezvezna glupa pegula koja graniči s mogućin i fala bogu da se tribala dogodit baš u nedilju. rečen ja uvik da niman baš puno sriće i digod mi se pari da se bolje rodit brez nosa vengo bez sriće. a šta ćemo, šta je tu je, e...

u svemu je dobro:

- ča san uspila ostat flegma - na ovo se posebno ponosin

- ča san dalje dobro postupila

- ča san odma poza pegule sila za volan i odvezla tonobil na sigurno

- ča se sad liči u servisu

- ča jeman sve moguće police osiguranja i jamstvo

- ča ovlašteni servis jema pristojnog i zgodnog momka ča tamo radi

e... sad čekamo ča će bit oli čekamo rekuperaciju twingića i čekamo ča će pod šta ič ča se tiče troška jerbo jema i jamstvo i police, ma sve, milina jedna.

narafski, moj uzor za vježbanje flegmatičnosti je svakako šjor snoopy. na njega se triba ugledat, e...

 more, nebo, sunce, brodovi i borovina by xvii - slikano danas, klik za veće i za čitanje komentara :)

e...

more, nebo, sunce, brodovi i borovina. ča još triba, a?

narafski da san se i danas naplivala. danas ovod (vidi gornji litrat), jučer na kašteletu. nima veze ča je peti misec, ove godine su mi banji još okasnili, lani ih je bilo i u četvrti. more je višje vengo dobro i zaradi tega ne triba bit ka prajac i linčina vengo triba dignit gujicu iz fotelje i poč se banjat. e i ne triba mudrovat u općepoznaton stilu moran radit, toka me rintat i temu slično. radin i ja pa se jopet kupan. kad se oče, uvik se nađe malo vrimena. na kaštelet san jučer poza posla otišla čak i na noge, a tonobil je bija osta o' isprid kuće (to nije nikakvo čudo za mene, hodan kad god mogu jerbo noge mi i služe da njima hodan, tonobil duperan kad mi se baš ne da hodat oli kad je podalje misto u điru). narafski, oni ča ne rade a zdravi su i mogu vanka opče nimaju opravdanje šta stoje doma i grintaju, takve šempjune neću ovod opče komentirat - dragi bog će im jedan dan valjda prosvitlit ćivericu. šta još triba činit ovih dana, a? izist koji đelato, jagode (poslin će bit i praske i dinja), pit sokove, vode, ledene čajeve. a spiza, a? e, triba izist laganu spizu, nikako sad poč činit paštafažol i štagod ča teško padne na štumik. laganini spiza, hodanje po ladu, plivanje, tuširanje, pa sutra i jopet isto.

e tako, e... jerbo, dugo teplo lito je počelo i durat će. kad se sitin kako je bilo zadnjih godin, a barenko do desetoga, jedanaestoga miseca. ovo na sliku je na vatrogasni put na merjanu. iako se na sliku ne vidi (jerbo san tako stala da uvatin brode), bilo je dosta svita danas ovod, a ovod konfužjun obično počme tek krajen šestoga. iz tonobila san vidila pune kašune svita. na bačvice najvjerojatnije nisi moga nač mista ni za šuferin, a kamoli za šugaman. tamo su kupači odavno.

ove banje prije službenoga početka lita niko ne more platit, jedna od boljih strana života u splitu je upravo to.  

"Nikad ne zaboravite da je Vaša vlastita odluka da ćete uspjeti važnija od svih ostalih stvari." - Abraham Lincoln

e...

zavrućilo, a? pazite da ne pade sto kolpi, španćjeru na glavu, bočicu s vodon oli ledenin čajen u boršu.

vengo, sve se mislin, jo, ča bi bilo lipo da me na toka radit... e da je sist na provu (a zgodni mornar (još bolje kapo) neka vozi - neću valjda ja vozit, dosta mi je i tonobila, e) , pa vižitat sva ta  lipa mista i vale, a?

litrat s ježinaca, by xvii, slikano jutros

e... jutros san poza plivanja uvatila ovi litrat i to u splitu. nije mi opće tribalo daleko poč da mi bude dobro, dosta je i do ježinca. :)

libar ča ga trenutno čitan, ljubičasti autobus, čitanje o' karte

web na koji povirin u zadnje vrime:

www.zena.hr  , čitanje o' interneta

(narafski čitan ja još puno tega, posal, struka, zabava itd)

e... čitan ja malo novine. aj pročitajte i vi ovo:

http://www.slobodnadalmacija.hr/Biznis/tabid/69/articleType/ArticleView/articleId/54930/Default.aspx

vrlo je zanimljivo koliko kod nas ima firmi, koliko ih radi, a koliko malo zapošljava ljude... za ne virovat, ja san ipak mislila da je bokunić bolje.

 

e...

meni noćas noći ka da nije ni bilo... aha, sad svi očekuju tekst pun strasti. je, oćeš, baš će to kod mene čitat čovik moj, kako da ne, roge ćaćine, e... ovo je jedan blog s mirom i ukusom, e...

daklem, gre zapravo ovako:

kad san prije skoro pet godin stavila sebi firmu na leđa, znala san da će bit teško, da će tribat radit ka crnac, da ništa neće past s neba, ali da će bit baš ovako, ko je to moga virovat, e...

a kad je najgore, a? kad ostaneš sam (ka ja sinoć), kad sve radnike, knjigovođu i stranke pošalješ doma i kad te do jedan oli dva bota u noći toka čeprkat po kartušini, toj nemani, toj napasti. nešto mi je sinoć tribalo i izvrtila san zaradi tega sve libre, o' početka tj. o' prije pet godin.  tako je moralo bit jerbo mi je tribalo (po)nešto o' svih tih godin.

zaspala san kad su se drugi dizali za poč na posal, a onda san svatila da se i ja moran dignit jerboooooooo počinje posal. odlično, ko to more platit, a?

narafski da neću ranije poč leč, radin, jemamo i danas radit sve do večeras.

eto, za sve đelože i kurjože je iša ovi tekst, tako i toliko je privatniku u rvackoj lipo.

ko mi je kriv kad nisan lupeška čer, kad se nisan bogato udala oli činila pretvorbene malverzacije...

e, ma tamo di se stvarno isplati poč ne vodi prečica... pametni to znaju.

e...

francuska je zemlja koju bi mogla vižitat svake godine. poza splita i ostatka dalmacije bi za život vjerojatno izabrala paris; u njemu bi nekako izdurala i brez mora. sviđa mi se francuski jezik, volin francuske pisme, obožavan njihovu spizu. vozin francuski tonobil, a jeman i drugih francuskih stvari. francusko je uvik ljupko, dražesno, joli. jemaju mota i šesta i to je to, niko ka oni, e... narafski, nisu bili loši ni na eurosongu. evo pisme.

e...

lito 2006

lito 2009

6 se pritumbalo u 9

 sve ostalo mi pari isto...

ka da vrime ne leti.

*****

e, bravo, da, jeman i vozačku. tonobil. vozin.

laptop, moderni mob, nove očale...

jeman i koji kil manje i puno odrađenih (i fala bogu naplaćenih ) poslova višje.

fali mi tigrić, nije triba još partit, ma ke, e...

fali mi i  bokunić višje slobodnoga vrimena.

sad će jedan (realno gledajući prosječno zgodni) šjor ča redovito poviri na ovi blog reč: a šta je sa menom, a? ništa, šta će bit, jemaš jušto ono ča si tija i kako si odredija - oli se mene išta pitalo...

 itd.

  *****

lito 2006

lito 2009

6 se pritumbalo u 9

 sve ostalo mi pari isto...

ka da vrime ne leti.

 ne, nije mi rođendan, danas brojin jušto 36 i po godin. 3, 6, 9,  sve se dili s 3, nećem računat, 3, 2, 1, matematiku ćemo ostavit za sutra kad bude posal, ajmo sad ča navit mužiku...

 maslačak by xvii, slikano danas na merjanu,

jema dosta velikih maslačaka, ka baluni su :)

e... konfužjun, šušur, puni podrumi svita, navalili i domaći i furešti. a di neće, a? sve se more nač, o' prošeka do pršuta i sira, domaćih goluzarija svake vrsti, suvenira o' maslinova drva, ručno rađenih sapuna. evo par litrati, ako pogledate slideshow do kraja, vidit ćete šta san vazela, nešto puno lipo, e... već san i kušala tu deliciju, odlično, pišen palac gori

e... prikovišje posla, trka, strka, konfužjun, ne znaš šta ćeš prije i di ćeš prije. nima veze, ajmo ča navit mužiku za bokunić opuštanja. josipa je uvik dobra, evo nešto novo. guštajte.  

http://www.cepos.hr/index.php?option=com_content&task=view&id=26&Itemid=37

o' 15. do 17. ovega miseca u podrume palaca cara dioklecijana povirite plodove dalmacije - višje informacija na gornjem linku :)

http://www.parametar.hr/razno/kako_imati_uspjesan_dan[1].ppt

fala selmi iz šibenika ča mi je ovo emajlirala :)

klikajte za dalje.

e... fjera svetoga duje oli sudamja je finila, ali još jema dobrih događanja apropo nje u split. danas bi vam priporučila:

izložba litrati u fotoklub u marmontovu, ulaz ka i uvik besplatan, dura do 22.05.2009.

autor: aljoša krstulović

naziv izložbe: sveti duje

vižitajte, nećete falit, bila san sinoć i ni mi krivo, jema dobrih litrati.

http://www.flickr.com/photos/xvii_st3/sets/72157617944346716/ 

(mirni litrati merjan)

e... uajme. ajme dana, koji dar, koja lipota. mirakul. a događanja koliko očeš. nisan znala di prije poč i oču li svugdi stič bit. danas je na merjanu obilježen dan merjana, odavno tradicionalni dan. narafski da san tot povirila. evo par sličic, najviše san slikavala prirodu jerbo to na merjanu i je najvažnije, e... potpisujen sve litrati osin ovih na kojima san ja. guštajte!

poza tega san na rivi uvatila nikoliko litrati moremo komodno reč tradicionalne utrke split, oxford, cambridge. naši su uvatili prvo misto - u prve dvi trke bili su prvi. bravooooooo! ča će oxford i cambridge kontra najsportskijega grada na svitu, a?  fešta u splitu, bija je gušt gledat. sve tri trke san snimila, naši jemaju bile maje, a pozicije se iz trke u trku minjaju. evo i tega, pa guštajte i jopet!

http://www.flickr.com/photos/xvii_st3/sets/72157617856451167/ (mirni litrati utrka)

eto, tukac bija ko je doma osta. jemalo se danas šta vidit. gren ča, pozdravljan lipo, veseli i zdravi bili!

e... za ti bidni adeze ka ča znate obično glasaju mrci. živi neće. ja naime ne poznajen žive koji glasaju za njih, virovali oli ne, kroza sve ove godine nikako da nađen adezeovog glasača. svit mi se kune da im glas nije da i da im ga ne bi da ni mrtav.

eee, ma čekaj malo, stani, fermaj, sad se pitan je li opće i mrtvi za njih glasaju, a?

evo recimo moj pokojni dida, sićan se da mu adezeovci opće nisu bili dragi, ne bi im taj da glas sigurno. ne virujen ni da im je glas dala žena moga dide oli moja baba.

ma ke, e... evo, ja kad partin isto ne dan moj glas adezeu (ako ga probaju ukrest, lipo se suprostavite - recite da je XVII i na internetu rekla ne, ne nikako njen glas ne za adeze). živa ne dan njima glas pogotovu.

dakleM, ovo su sigurna tri glasa  ča ćedu ukrest jerbo ih ne moredu dobit pošteno. dva mrtva i jedan zasad fala bogu živi.

kako svi obožavaju/mo adz i adezeovske pi*darije, nadan se da ćete s popriličnim veseljen ovod jopet dočekat brskija (i mrtvi i živi). guštajte, jema tega, brksi je ovi put inspiriran mao ce tungom i njegov govor je ka i uvik pravo remek djelo... i znate, priznat ću vam, toliko san jubomorna na trogirane ča  je ovi lipi, šesni i pametni šjor u njih, a ne u nas u split. prava šteta ča ga mi nimamo.

sudamja 2009 by xvii ,

mirni litrati ovod:

http://www.flickr.com/photos/xvii_st3/sets/72157617823185202/

na dobro vam došla sudamja - ovo san nikidan slikala na ježincu

evo i jedan moj crtež: 

provedite se, guštajte, neka vam bude lipi sveti duje ;)

split, praznik cvijeća 2009. - cvjetna bajka 2009.,dioklecijanovi podrumi, svaka čast floristima, bilo je odlično, svi litrati by xvii

http://www.flickr.com/photos/xvii_st3/sets/72157617775611432/ - mirno, klik za veće

bilo jidro, bili brod by xvii

e... iako mi je ovo bija radni vikend (neću da čujen za krizu, dala san posla i sebi i drugima) našla san i bokunić vrimena za More. fala bogu da ga jema i u splitu, pa mi nije tribalo daleko poč. nije još za banjat se (nažalost, bit će valjda za koji dan), ali za program očale na joči i noge u more je odlično. kako san došla tot, a? tonobilon narafski, šofiran već na veliko, e... klik za veće, pozdravljan lipo... 

 kad će doručak, a? slikano mobitelom i odozgo slikano aparatom - sve by xvii

e... ovih dan će bit dobrih događanja u splitu. najavit ćemo štagod ovod, vižitat ćemo štagod, stavit ćemo koji litrat. a šta dobroga jema sad brzo, a?

34. Međunarodni "Praznik cvijeća"

34. Međunarodni "Praznik cvijeća" - Splitska cvjetna bajka - događat će se u podrume dioklacijanove palače, to priporučan teplo, uvik bude vrhunski događaj, karta će vas za to doč 25 kunića, a praznik cvića počinje u ponediljak 04.05. 

e... u ovoj zemlji još uvik jema svita ča se ne bavi politikon,  ne dila drogu i ne kurba se, ne pljačka banku s bičvom na glavi, ne živi na tuđe špale ako more radit. nisu svi neradnička radnička klasa, mnoštvo svita vridno radi. nisu svi ni linguzi ča traže posal a mole boga da ga ne nađu, masu svita stvarno oče radit. nisu ni svi poslodavci učesnici pretvorbenih malverzacija, stasa je čitav niz firmi koje drže ljudi ča jemaju polet, ideju, koji su zaposlili ljude, krenili o' svojih pinezi (kojima se zna porijeklo) i svojin radon. nisu svi u ovoj zemlji ni mafija o' rada na crno. e, pa svima onima ča pošteno rade i ča žive o svoga rada ka i onima ča bi stvarno tili radit a ne moredu nač posal želin sritan prvi maja - međunarodni praznik rada! jeman i jednu želju, ka i uvik za prvi maja. želin da hrvatska konačno postane zemlja u kojoj čovik ča živi o svoga poštenoga rada neće bit predmet sprdačine i omalovažavanja.

ekola, gren ča, jemate pozdrav, guštajte!