ajmo ča navit štagod lipe mužike...

Feral na provi - Ribari. guštajte, ova Pisma je fenomenalna.

e...

jutros najranije dok san još u postelju zvuk smsa. hm, ma ko je sad? nedilja, rano ujutro. ajmo ča vidit ko to mene budi ujutro najranije.

poslala si mi neke slike, ali san ih izbrisa.

mozes mi opet poslati?

kako si?

sta ima nova?

V.

asti sto, ovo mi je V. posla mail iz jamerike, a uvik mi svaki mail stigne i na mob, pa je to to... narafski, nećemo se idit na V., to je jedna moja jubav iz mladosti, uvik san mu sve oprosti, pa ću i sad, pogotovo kad znan da je vremenska razlika. ionako mi je vrime da se dignen.

zaradi čega, a?

e...

nedilja je. neradna. ala gušta. niman još vozačku, niko višje neće da me vozi - kažu navijamo za te i položi vozački, a ne da mi se tramakavat u busu oli vaporu, pa ću bit u splitu. neće ni to bit loše. šta ćemo činit, a? najprvo ćemo popit kavicu, a onda gremo ča priko toča:

ča se toč zaradi špine oliti toča točom zove: 

di ćemo, a? na bače je već preveliki konfužjun iako je najranije ujutro. ajmo ča plivat  na ovčice. za sve one ča su jutros propustili more, evo ga bokunić - ova lipota je na deset minuti hoda o' moga stana:

poza guštanja izgledan ovako: 

bižin ča doma prije zvizdana priko porta i vatan ove lipe litrate: 

za obid su mi bile punjene paprike s pireon. bile su odlične. sad ćemo notat rič dvi šjor V.  i to je ka to,  gotov prvi dil dana, odavno finilo i jutro.

gren guštat pozapodne. lito je...

pozapodnevne kartoline by XVII, slikano jučer i danas, mobitelom

e...

vraćan se s banjanja. po tleju blizu skula razbijene teke i libri. bidne li zemlje. zanimljivo je i koji je to bis kad se na libru triba tako švogat. činili su to i u moje vrime kad bi finila skula, čine i danas.

a znate li di su moji libri iz srednje, a? recimo žuta zbirka iz fizike? žuta je ona meni poza svih ovih godin o' korica do korica, požutila svaka stranica. nije mi je palo napamet iskidat, ma ke, e... š njon sa fini skulu, nauči nešto i još mi je lipo došla da zaradin i pineze (kako? poduke, repeticije, instrukcije). narafski da jeman i inglešku gramatiku, matematičke zbirke i sl. na svemu temu se u Parametar doo zarađuje. jesan li poduzetna, a?

nabavili smo mi i novih libri, narafski, ali prima ovima o' starine se odnosin s posebnon jubavi.

znate šta ću vam reč, kad u zemlji bude stvarna klima i ozračje znanja, neće njanci jedan jedini list iz libra bit po tleju, ma ke, e... jerbo, ako ga nećete čuvat (dopustit ću da ne moraju svi bi intelektualni tipovi), more se vratit u skulu, more se libar prodat u antikvarijat, more se darovat siromašnoj dici oli karitasu, more se nač familija s kojon će se zaminit ti libri za nešto drugo, ali razbit libar, jo, gospe moja, nije to lipo, ma ke, e...

e... upeklo, a? evo soka, mašite se, častin.

a kako izdurat? svak jema niku svoju ricetu, ovo je moja:

- digni se šta ranije, ne valja puno spavat kad je vruće. ja se budin prije 6 uri.

- čista roba i čisti lancuni su pod obavezno.

- ne na se stavljat ništa nekomodno, najbolje kratke gače oli vešticu di se god more, maju na špaline. šlape. narafski, neš tako u teatar, ali di god moreš ne triba se nepotribno kuvat. šta će kolarina na ovu vrućinu ako baš nije tutokompleto potribna?

- kad se digneš rano, razrači dobro svoj dom i poza tega potegni roletne oli škure, ne triba ti sunce tuč u cakla cili dan kad je ionako prikovišje vruće.

- nikad bit žedan. uvik sa sebon jemat bočicu s vodon.

- ne triba nigdi odit po najvećen zvizdanu. ono šta se mora obavi se do 10 i po oli 11.

- hodaj onon stranon ulice di je lad.

- uvik bit čist, nima gore stvari vengo znojan poč vanka i širit grube vonje.

- ča se tiče robe, izaberi bilu koluru. poznato je da ne upija toplinu ka crna kolura.

- ne vuci nepotribne bagaje, samo ono šta je nužno.

- kontra san klime, ali uključi je ako baš ne moš višje, uključin je i ja kad je tako.

- poč na more kad si u mogućnosti, ali po najgoren zvizdanu obavezno traži lad. lada se u splitu nađe na bačvice, ovčice, firule, ježinac, po merjanu. kašuni su prevrući za paklenu vrućinu, žnjan isto. tamo je lipo poč kad nije prevruće oli ujutro rano i pridvečer, e...

- spiza. pazit ča ćete izist. sad nije vrime za tešku spizu. rađe izist koju ribicu, malo blitve, pome, kukumari, paprike vengo paštafažol, e... puno fruti, verdure, đelata ;)

- odgodit sve teške fizičke poslove ako se ikako more.

- očale za sunce i kakva kapa oli španćjera isto moredu pomoć.

- umij se, pusti da ti voda dobro teče priko ruku.

- raširi/otvori tendu na balkonu oli teraci.

- pazi da na moru ne izgoriš, u drogerijama jema lipih krema za sunčanje, nisu po zlato, kupi ih.

- probaj i navečer, kad se mrvu slegne vrućina učnit đir uz more. ako greš na noćno kupanje, pazi da ne staneš na cakal oli kakvu drugu škovacu.

ekola, to je ka to - nije komplicirano. pozdravljan lipo!

e...

otuđuje li nas ovi brzi životni ritam jedne o' drugih, a? znamo li di nam je svojta i kako je? znamo li di su naši kumpanji? znamo li di su sve naše jubavi? kad smo zadnji put trefili kojega kumpanja iz razreda oli sa studija? kad smo zadnji put nazvali nekoga tek onako da se javimo, proćakulamo? jesmo li se počeli viđat samo na vinčanjima, sprovodima i sličnin događajima i između škancija velikih butiga, a? kad smo zadnji put dobili staru dobru kartolinu?

pari mi se da se svit uslid tekničkog napretka otuđuje. mobiteli, kompjuteri, tonobili, ma sve bi nas to tribalo zbližavat, a na kraju čovik o' čovika sve dalje, e...

evo, došlo je lito i vrućine. jema se bokunić višje vrimena. jeste li danas vidili oli čuli koga dragog, poznatog? barenko nekog? ma je li barenko neko negdi niki trag tipa smsa oli maila ostavija, a?

znan jako puno svita. baš dosta, a jopet, jopet mi se pari da je sve prije bilo drugovačije, da je prije komunikacije bilo puno višje.

znan di su mi mater, ćaća, sestra. znan i di mi je većina svojte iako se sa svima baš ne vidin i ne čujen ne znan koliko. s nikima višje, s nikima manje, s nikima opće ne. nike kumpanje čujen, nike vidin, nike nisan trefi godinama. di su jubavi znan. ne znan baš kako su sad, ne komuniciran sa svima, ali znan di su. znaju i oni di san ja, dapače, čita se i ovi blog o' nikih e, e... trefin svako malo nike iz razreda i sa studija, nike pak nikako. nisan baš brez kontakta s okolinon, ma ke, dapače, ali znan da je dok nije bilo ovoliko teknike, bilo puno bolje.

koga san danas trefi/čula/vidila i sl. na ovu vrućinu:

- najprvo moran reč instruktora božu sušića, danas mi je bija sat i bija je bokunić bolji, od svašta-nešto danas mi je priča samo nešto, aj, mrvu se popravija, pa ćemo i to ovod zabilježit. njega vidin skoro svaki dan.

- pozapodne je u ured došla moja draga tomislava , nju nisan vidi duže jerbo je bila na porodiljnome, sad je počela radit i danas je držala poduke. s obziron da porod zna iscrpit, moran reč da mi je jako dobro izgledala, sritna je i baš san sritna zbog nje.

- na tel. me nazvala jedna jako draga rodica, ženi joj se sin, sad se čeka vinčanje, bit će lipo virujen, sritna san i zbog njene sriće.

- jedna muška zvir je povirila ka i uvik na ovi blog...  povirili su i još mnogi drugi judi, meni znani i neznani. fala lipa svima na vižiti, ma zaradi kojega razloga vi došli tot. ko me može volit voli me, ko me oče mrzit, ma neka me i mrzi, šta ja tot mogu?! meni je važno da ja nikoga ne mrzin, da volin i poštujen i život i ljude, nikome ne činin ništa nažao.

- obid mi je napravila mater, nisan ka  američani išla izist hamburger  u niki fast food.

- trefi san još nike poznate, razmini rič dvi,  trefi san suside i tako to.

- zadnji put san kumpanja iz razreda trefi dan poza ča je rvacka izgubila o' turske, pa smo između ostaloga komentirali i fuzbal, a sa jednin kumpanjon iz mladosti  se svakih par dan ćakulan priko interneta kad uvatimo minut vrimena priko posla. šta se tiče ovega kumpanja, puno bi mi bilo draže š njin pričat uživo, ali štaš, vrime, obaveze, ma dobar je bilo kakav kontakt. jerbo, šta je čovik brez kumpanji, a?

- učenike koje ja učin  danas nisan trefi. svi su mi fala bogu prošli brez popravnog. čoviče SVI. kako je to dobar osjećaj, a? nisan nikoga vidi ni na ulici, bit će su dica otišla na more, ma neka, zaslužili su, e...

sve u svemu aj nije loše za jedan običan, prosječan, litnji dan ča je eto brez kupanja i izlaska vani jerbo jema judi ča cilu šetimanu s nikin nisu progovorili njanci rič. a jopet mislin da čoviku fali ono vrime kad se pivalo i sviralo, kad je grad zna organizirat i lude noći, kad je riva bila puna svita, kad bi svaki minut sta da se javiš kome koga znaš. fali pa baš fali, e... sad tek niki kvartovi, recimo varoš i radunica, naprave svoje fešte, svit se viđa manje, a to za mediteran nije dobro. život mediterana bi triba bit pun veselja i pisme, ulice bi tribale bit pune konfužjuna, e... u nas svake godine sve manje vonje na mediteran i meni to nije drago. nikako, e...

e...

recimo, pokaki te tič. kažu to je srića. poza tega ti se dogodi da moš birat tonobil, brod, putovanje. jednostavno moš birat ča god očeš. šta bi izabra/la, a?

ja ne bi odma trkala arčit. ma ke, e... evo nikih stvari ča zapravo i nisu preskupe (druga je stvar ča su plaće u rvackoj mižerjaste, e), a meni se sviđaju:

tonobil:

crni mini moris  

cijena? kažu da dođe nikih 20 do 25 iljeda eura ovisno o opremi. je li to skupo ako moren birat šta god oću, a? mislin da nije, e...

brod:

niki o' krstaša iz serije salona (kupujmo hrvatsko kad već moremo birat, e), po mogućnosti modrog trupa.  

cijena? s obziron da moren birat, cijena o' oko 185 iljada eura je sitnica. luksuzne jahte i brodi svake vrsti dođu puno višje. cifre se tu broje u milijunima eura.

lipoticu salonu bi svakako tribalo vezat na murter jerbo je tot blizu kornatski arhipelag, e...

 putovanje:

svakako egipat - davna želja za koju nikako nač vrimena 

cijena? oko iljadu do iljadu i po euri za nikoliko dan po peršoni - kako koja agencija. mislin da ni za putovanje ne pretjerujen....

ekola, to je moj izbor, iako se moglo arčit do besvijesti, ja bijah skormna prešona. ostatak pinezi bi bija za život, za nematerijalno i za humanitarno.

sad je na redu sandra iz dubrovnika, molin lipo napisat svoj izbor za tonobil, brod i putovanje i odredit idućega ko bira. :)

--------

ovi litrati su nađeni na internetu.

e...

jutros  se lipo dignen  rano i pođen na more. puten se sitin da mi je libar osta doma. šta ću sa sebon, a? plivat dugo? aj, to nije loše, realizirano. 

poza tega sidnen na sunce, stavin očale i ariva misao. ona iz libra života.

mislin se nekako kako je čovik zapravo puno vražji. je, e... ono, većina svita kojega ja znan zapravo u globalu opće nije loša. narafski,  nisu to nesriće, ubojice, lupeži. bože sačuvaj, daleko o' tega, niman ja s takvima posla, ma ke, e..

zaradi čega onda mislin da je čovik vražji, a?

e... zaradi ovega:

vazmite bilo koji odnos momak-cura, muž-žena, brat-sestra, dite-roditelj, kumpanjo-kumpanjo,  susid-susid, kolega-kolega, zet-punica i sl. zaradi čega to uvik mora bit lipo i šesno, a? karanje (da se odma razumimo, to u dalmaciji znači svađanje) se dogodi jerbo ko je vidija uvik živit mirno, e, a koliko vidin kad se dogodi, moramo se itat i grubin ričima, onima ča ih pas s maslon ne bi poliza i ne, nismo baš dobri prema bližnjima, ma ke, e, pristojniji smo prima judima ča ih prvi put vidimo, vengo prima onima prima kojima bi zapravo tribali bit najbolji, e... u karanju je najvažnije zabit gol, skupit šta višje punti, oni momenat naranit dušu forcon.

a poslin?

ako nam do peršone nije prikovišje stalo, ni ne opterećujemo se prikovišje. rečemo bože oprosti, bija san prajac oli tovar i zaboravimo.

međutim, jema judi i koje stvarno volimo... čemu onda takvo ponašanje, a? e a, mogli bi psiholozi sad jemat posla i štagod reč, ja samo nagađan: ego, ponos, dišpet, inat i tako to, e...

kad je tako, kad se radi o onima ča ih volimo,  poslin nam bude žaj. beskrajno žaj, ali u većini slučajeva bi prije pukli, vengo otišli zakopat ratnu sikiru s drugon stranon. ono, na način da rečemo: skužaj, falila/falija san.

pouzdano znan (iz štorija iz života, a i iz vlastitog iskustva) da se patnja može pritvorit i u višegodišnju bol. rađe patimo, vengo da se stvari probaju popravit. nekako moš i probat, ali ako ti se dogodi da si falija momenat za pomirenje i do njega ne dođe, drugi put se bojiš probat.

vrtiš sve po glavi, ćutiš, misliš kako bi da moš ponovno sigurno drugačije i sl. e... oni momenat ti je bija sveti zadatak reč grubu rič jerbo si i sam dobija grubu rič, a poslin, poslin je grubo, e...

kažu da vrime sve liči, e... ma ke, kad ti je stalo, sve je grublje ča vrime višje prolazi.

evo, recimo, sićan se moja dva kumpanja, ne znan koji mi je o' njih dva bija bolji kumapnjo onda u mladosti, e... a i njih dva međusobno su bili stvarno  dobri, dilili su dobro i grubo kako kumpanjima i priliči. šta mislite, jesu li se pokarali, a? jesu i to zaradi jedne žene.

poslin su narafski svatili da ih je nesrića o' žene pokarala (i uvik ću se pitat šta je zapravo onda tila (znan i nju dobro)), da su jedan i drugi ispali papani u svemu temu, ali mirili se nisu. ma ke, e... ponos, ego, dišpet i još svašta nešto. dugo je duralo takvo stanje. šteta, a? ma je, jedan je život, ali eto... svi smo ih tili pomirit, e, ma nisu tili njanci čut, a kako su mi i jedan i drugi bili ka brat ča ga niman, e, znan, znan, da su obojica patili. opće im nije bilo svejedno.

šta je bilo dalje, a?

jedno lito ekipa je tukla balunon o' picigina na bače. to je igra za pet svita. u krugu o' pet bila su i ova dva o kojima pripovidan. poza nekoga vrimena jedan igrač se siti izač. ostane u krugu četri peršone, među njima i dva posvađena kumpanja. igra gre dalje. siti se još niko izač. i tako je ostalo tri peršone. sad već pogađate šta je bilo dalje, znan, e... ostali su sami. cila ekipa je pomalo pustila crno. niko ne bi tija smetat, e...

njih dva se dodaju. dobre dvi ure, brez riči, niko nije tija popustit.

ni dandanas ne znan točno kako je to neko prvi izaša iz mora i stavija robu na se, znan samo da su se vratili priko toča i ako se dobro poza svih ovih godin sićan, negdi na po toča su razminili prve riči.

navečer su na matejušku  došli skupa. pačifiko, ka da je i svaki dan, ka da se ništa kroza svo to vrime dogodilo nije, ka da su švere bile stale, ka da i nije bilo karanja, mirenja.

probat ću zaključit da more bit da se judi ne moredu pomirit na način da se upre u boton, vrime ipak triba učinit svoje, pa ako su stvarno bili u dobron i iskrenon odnosu prije karanja, pomirenje je moguće, e i ono će doč kad oni to oče, a ne kad drugi oče, e...

ekola, koja je ura, a? uajme, deset i po, upeklo je, ajmo još jedan buč i gren ča prije vengo udre najgori zvizdan. dižen sidro, kupin tunju,  gren ča. obid je danas ranije.

ovo je bila još jedna  iz škafetina istine života... notano iz duše i ono ča opisuje događaj, prima istiniton događaju.

karanje je spiza za dušu, ali dođe i vrime kad čovik reče:

"već je vrime da se pomirin sa sviton"

e...

od instruktora san danas (krajnje energičnoooooo) traži:

1. da ponovimo i 3. i 4. radnju.

2. da višje ne govori svašta nešto vengo da me uči vozit tonobil jerbo san zaradi tega tot.

uz povuci potegni, bokunić se popravija pa smo vježbali i 3. i 4. radnju.

obeća mi je i da višje nima kojekakvih bisera (to ćemo baš vidit koliko će izdurat brez tega. ako bude jopet svašta priča, zvat ću mu ženu na telefon i sve joj to reč, oču boga mi).

danas je veliki dan. zaradi čega? poza dvi autoškole i 85  (osandesetipet) sati KONAČNO se 4. radnja oli kočenje probala tamo na poligonu di je ispitivač pita. konačno, konačno, konačno.

e...

već san 15 uri potroši na poligonu s instruktoron božon sušićen. zasad brojin 84 službena sata. sve 4 poligonske radnje san s prethodnin instruktoron (nebojošon banovićen)  već bila savladala i s božon sušićen san to tribala ponovit.

gren sad napravit jednu trenutnu realnu ocjenu.

šta moren reč poza  ovih 15 uri poligona?

KRAJNJE SAN NEZADOVOLJNA PO PITANJU PONAVLJANJA POLIGONA. sve 4 radnje se još uvik nisu ponovile, radile su se samo prve dvi.  šta je najgore dikad me išlo, dikad ne, a sve san već bila naučila.

sad je čak komplicirano ono šta je prije bilo jednostavno.

uplaćeno je još uri, vidit ćemo oće li se po ton pitanju išta prominit.

dobra stvar je sigurno šta se 6 puti vozilo do omiša, tot moren bit dosta zadovoljna. to je ok, dalo mi je i dosta sigurnosti.

grad ćemo valjda vježbat iza pemzije jerbo instruktor je odredija najprvo poligon.

šta se tiče komunikacije s instruktoron, e to,  to, moren reč da on jema niki stil, šale i baze (ne znan kako već da to nazoven) za koje moren reč da nisu po mon ukusu/guštu. nekome je možda ok, meni ni najmanje to ne odgovara.

a autić? autić je za po cesti super, za čistu peticu, ali za čunjeve mi i ne odgovara baš, ma preživit ću.

danas mi je autoškola, jedva čekan kad će sve ovo finit, virujte mi, ponovno ću se rodit kad ih se rišin.

napomena: mom instruktoru stalno u facu govorin da nisan zadovoljna po pitanju poligona, ali on ne viruje, misli da se zafrkavan.

e...

jubav ne znači uteč...

biže kukavice i lezilebovići, sebičnjaci. oni ča zapravo vole samo sebe.

ustvari sve je tako jednostavno, jednostavnije ne more bit. ako čovik voli ženu (more sve ovo i obratno tj. ako žena voli čovika):

1. radovat će se njenom osmijehu, neće bit sritan kad je ona tužna, neće je činit plakat.
2. bit će tot kad se jema pinezi u takujinu, ali i kad ih pofali.
3. bit će tot kad posla jema prikovišje (triba i za to jemat pacijence, virujte mi), ali i kad ga nima.
4. neće privarit prvon prilikon, a ni drugon, trećon,...., n-ton.
5. bit će tot u zdravju, ali i ako ga ne daj bože pofali. 

blog o' XVII na naslovnici www.mojblog.hr - klik za veće

e, pa fala lipa drago uredništvo. fala i za sve postove koje ste izvukli ovih dana na naslovnicu. fala vam na gostoprimstvu i fala vam ča se na ovon servisu more reč šta se misli.

a vidit  merjan na naslovnici, e to, to mi ja danas bila prava srića.

fala još jednom!

e...

gren se ja danas mrvu smočit na merjan kad me u gundulićevu ferma  jedna gospoja.

gospoja: dobar dan, ma skužajte, jeste vi XVII?

XVII: a jesan na oni internet , e.. recite.

gospoja: ma znate, moja čer vas puno voli čitat, ona je u jameriku i svaki dan čita vaš blog, rekla mi ja da vas pozdravin ako vas negdi trefin.

XVII: o fala lipa, pozdravite i vi nju. baš mi je drago...

gospoja: sad ću joj baš reč da smo se upoznale.

razminile smo još par riči i pozdravile se.

a evo, pozdravit ćemo i u jameriku vjernu čitateljicu i ovako.

puno pozdravaaaaaa!

ona će se već pripoznat, a šta se jamerike tiče, znan da se na ti dil zemaljske balote ovi blog jako puno čita, bude vižita i vižita svaki dan sa tega mista, a kako je sve to naš svit, puno pozdravljan svih ča su tamo - posebno v.

ajmo ča dalje. kako je bilo na banjanju, a? evo ovako:

more, sunce, brodi, borovina, galebi, stine... ko ovi pozapodnevni gušt more platit, a?

to je ka to, pozdravit ćemo puno i šjor instruktora božu sušića. instruktore, ajmo ča višje sredit ti moj vozački, pa da nediljon pođen i na najlipši otok na svitu, murter.

ko je sta doma i grinta, falija je, e...

---------------------------------

napomena: u moru san o' 4. miseca, ne pokušavajte odma ovako pocrnit jerbo to more bit i opasno. na sunce lipo svaki dan pomalo i oprezno

spljet suncem okupan by XVII, slikano danas, klik za veće

e... lito je danas i službeno arivalo, sunce prži, grad je pun furešti. ja se kupan o' četvrtoga miseca, ali službeni početak je službeni početak, e...

bliži se sedmi misec i paklene vrućine. ovo je doba godine kad bi mi duša najrađe izabrala mir kojega nerazvikanoga otoka, borovinu, šta manje kofužjuna i šta višje tišine.

recimo, deset, dvadeset dan na kornate. u koju ribarsku kućicu o' starine, po mogućnosti živit o' ribe i onega ča nađeš oko sebe, brez mobitela telefona i ostale teknike. poza tega, kad si napunija baterije i odmorija moždane još jedno deset dan na murter. to bi bilo dobro. nadan se da ću jedan put  to i učinit. :o)

more bit da ne bi bilo loše poč i negdi na mljet oli lastovo. zapravo,  šta dalje o' kopna to bolje, e, a kad se dobro naguštaš i odmoriš, onda moš jopet bokun bliže civilizaciji.

zaradi posla i obaveza će mi to ka i uvik ostat samo san, možda peškan tek koji takav dan. ništa, nima veze, kripit ću se lipoton spljeta, učinit koji izlet kad se stigne i neće ni to bit loše...

moren se kripit  i svojon lipoton. danas se baš ćutin lipo. već san crna, kolura mi pomalo gre koluri o'  čikolate.

 jeste li se ikad ćutili lipo? posebno? ja eto jesan danas. brez ikakvog posebnog razloga, ćutin se lipo i to je to. dobar osjećaj. probat ću ga produžit na cilo lito, a i poslin. :o)

e, je ga i ja počnen balit pa ne znan stat.

a šta smo ono tili reč, a? a evo lita, stiglo je i službeno, guštajte, odmorite se, zajubite se, kupajte se, zabavite se :O)

 puno vas pozdravlja lipa XVII

PS ko me triba neka bude uporan š tin mobitelon, ako se ne javin isti sekund, znači da plivan (u splitu oli negdi drugdi u dalmaciji - kako mi se potrefi)  i tako to...

e...

ne moš virovat.

turčina je toliko pokakila srića da se i vrime najedanput stvorilo o' nikud, a baš mi smo tribali bit toliko pegulani da nan se priko škine događa takva pegula, takvi mirakul.

život nije uvik pošten, ma ke, a ovi put je bija zadnji kurbin sin.

sudac narafski jema šjolu o' obraza i mirno će poč leč.  zaspat će ka janje, ka da nije učinija veliku šporkariju.

hebi ga. sad triba(mo) pribolit, nima druge.

XVII (oli Nada) i instruktor (oli Božo Sušić) - klik za veće

još jedna navijačka o' danas. namjerno smo u gače trikvartače jerbo je vruće. jemamo navijačke bandire (bandira - zastava, barjak) i šudare (šudar - marama, rubac), a ono ča je bitno reč je: naprid vatreni!

(inače ovo je autić kojeg san se sinoć šesti put dovezla do omiša)

slika nas je jedan ivo, pa ćemo reč: fala ivo!

e... butige isto navijaju, e... a koji je kriterij za doč na ovu stranicu, a? a evo, gren nikidan s banjanja, o' kašteleta do manuša i puten su mi ove butige bile baš simpatične: turbo sport kod svetoga frane, robot i još jedna do robota (kraj staroga placa) di se prodaje sve za dicu. namistile su se lipo i šesno, slikan ih i eto ih ovod. ekola, sad svi ajmo reč:

naprid vatreni!

e... evo ga. nešto dobro iz bespuća interneta. za sve one ča vole spliske riči. šta, a? šaka suza, vrića smija, e... jerbo, ča je život vengo fantažija.

e...

kaže mi svit da je ovo sa vodon u kondutu o' nikidan bilo dobro i da su se nasmijali. aj, gren van ispripovidit još štagod ča se more nač u rubriku telefon, mobitel i sl.

svako malo me zovu anketari. zovu i oni ča bi tili nešto prodat. ove druge bi obavezno tribalo poslat na kakav seminar o prodaji jerbo su prodaju svatili po principu kupi matun oliti ciglu - tj. dosađivat će ti dok ne kupiš i bitno je samo šta višje dosadit.

da detaljno slušan anketare i ove ča pokušavaju bit trgovci te odgovaran na njihova pitanja, proša bi mi cili moj radni dan samo na to. zaradi tega moran uvik nešto smislit kako da ih se rišin.

skužajete me, ali stvarno niman vrimena za ti telefon. kad mi nešto triba, tražit ću ponude i nač ću ili jednostavno pošaljite pisanu ponudu pa ću je čitat kad stignen.

vengo, gren van ispripovidit jedno rješavanje o' nikidan.

zvoni, svira...

XVII: - molin.

ženski glas: - dobar dan. zoven se xxxxx yyyyy, zoven iz firme wwww, jemate bokun vrimena, jemate znan, naša firma wwww je najbitnija i najvažnija u prodaji vina, prodajemo ovim firmama blablablabla - čoviče, navila se ka igračka na navijanje, ne fermaje.

XVII: - gospođo fermajte minut! mora bit da ste nešto falili, moje poduzeće ne trguje robon, tako da nam vina nisu o' interesa.

ženski glas: - e ma morete ih duperat za poč po domjencima, feštama, proslavama itd. blabla - sad već reži na me.

XVII: - skužajte, ali ja ne gren po domjencima, proslavama i sl. nikad me nećete na takvin mistima vidit. ma iako ne gren, evo van gren reč ko gre, ko jema vrimena na pretek, ko ne zna šta će sa sebon i jedva čeka domjenke, slikavanja i da ga nazovete. tot ćete sigurno uspit to prodat.

ženski glas: - a ko je to, a?

XVII: - e a nazovite šjor premijera.

ženski glas: - kiselo se smije.

XVII: - ekola, živili, zdravi bili, uspješnu prodaju želin, ja sad gren radit, neko i to mora.

jedna dobra stara pisma na malo drugačiji način. guštajte!

e...

- danas san se do kraja lipo dogovorila oko jednega lipoga poslića. na dogovoru o' jučer ideje su navirale, stiglo je puno tega samo o' sebe, jednostavno se nametnilo. jeman u glavi odličnu koncepciju, bit će to ludilo posal, radit ćemo to s posebnin gušton. neki judi ništa ne kompliciraju, s njima je lakoća radit. takva je peršona a.

- danas san vozi magistralu o' splita do omiša peti put i opće nije bilo loše, dapače, dosta dobro. mislin da su mi te vožnje do omiša dosta pomogle. vježba i samo vježba, jema moj instruktor prav.

- danas san čitala sms, dica se javljaju, referiraju pozitivne ocjene, sritni su; nisu to samo pozitivne ocjene, već su to i jako dobri rezultati, ponosin se š njima, njihov uspjeh je moja beskrajna srića - to znači da san repeticije oli poduke radila dobro. 

jema li šta loše?

ma danas je sve dobro. daj bože šta višje takvih dana

e...

zvoni, svira.

da vidimo ko je...

uskraćeni broj.

hm?

(u principu se ne javljan takvin peršonama. )

zadnjih dana me se nadoveza neki očito mačani lik. drnda tim mobitelon poza deset, jedanaest uri navečer. broj je uvik uskraćen, bit će mu je mozak prikraćen, e...

sinoć mi je to drndanje mobitela stvarno dosadilo. zaradi tega je tribalo nešto poduzet. šta, a? jeste kurjoži, a? evo šta mu se dogodilo: oden lipo u kondut, dignen tu vražju slušalicu i puštin vodu.

učinila san to namjerno, s gušton, a poza tega je bilo mrvu mira.

spljet by XVII, slikano jučer, povrj ferate. klik za veće

navijanje tilon by XVII - slikano u subotu na bačama, čovik je igra picigin u medulinskoj ekipi

navijanje tonobilon by XVII - slikano nikidan u splitu. di? na manušu narafski

sve se more uvećat klikon.

naprid vatreni!

čudo prirode i čudo teknike,

by XVII,

sve slikano danas u Splitu

(povrj kašuna i vizavi banovine)

e...

nikidan:

XVII: alo, kumpanjo, očemo na bače, a? jema prvenstvo svita u piciginu...

kumpanjo (koji je u našoj mladosti tot na piciginu utuka ure i ure): ma ajde bogati, di ću, koji picigin, ko zna bi li uvatija i jedan žešći balun, nisan igra dobrih 15 godin...

XVII: ma znaš šta, ja ću povirit,  gren učinit koji litrat za oni moj blog. gren pa makar poznala samo šjor veršića. sist ću tamo di smo igrali briškulu i trešetu i malo ću guštat. ako dođeš, tot san, pa se javi, ako ne, vidit ćemo se na kašune oli koje drugo misto koji drugi dan.

ovako smo se nekako nikidan razgovarali priko neta.

jutros:

stavin ja jutros maju kratkih rukav, gače trikvartače, japanke i priko toča via bačvice. svit me čudno gleda, svi u duge gače, maje i košuje dugih rukav. je, vrime nije neko, ali znan da zaradi dva oblačića i dvi kapje kiše ništa neće bit odgođeno. grabin sve brže priko toča. priša mi je. e. nije svaki dan prvenstvo svita.

ma ke. kakvo odgađanje? igralo se i to sasvin dobro, a poznatih čunki je bilo koliko god očeš, o' šjor novinara ćiće senjanovića, poteštata kureta,  profešura ivice veže do jure zokovića - picigin je zanimljiv i po temu ča zanima jude najrazličitijih zanimanja i profila, bilo da ga igraju bilo da ga samo gledaju. narafski da je bija i šjor veršić, 80 mu je godin tek.

prvo misto je odnila ekipa sunčanica i mislin da su stvarno i bili najbolji.

u vižite splitu su došli i judi iz medulina, oni jemaju bokun drugovačiju igru, uži krug i brdo visokih baluna; često udru po balunu i ćivericon.

sve u svemu, oni ča nije bija, puno je propustija. bilo je to jedno skroz dobro subotnje jutro.

gren sad fermat. činin kuco, evo nikoliko litarati i filmova neka oni dalje govore. sve morete uvećat klikon i sve je by XVII.

još litrati  i filmova jema ovod:

http://www.flickr.com/photos/xvii_st3/sets/72157605605576186/

a kome je to malo, more mi se javit, napravilo se jutros priko 500 litrati, pa mogu dat još štagod onima ča ih zanima.

povirite i na: www.picigin-bacvice.com

-----------------------

kažu na tv lito je počelo. ma je, počelo je meni još u 4. misec, a od onda mi dura... narafski da danas niko na bačvice nije bija bil, e... dica smo mora, naša mater je dalmacija

e... ništa ne virujen u ti petak 13., ali isto ću reč vrag ga odnija. propustija mi je krov na zgradi i to baš meni kako san na peti pod. protapanjalo svon forcon, voda prodire. kad će se to sredit ko zna, vidit ćemo. kondut, hodnik i dvi kamare oliti sobe. već je prije bilo takvih problema i na  sanaciju se čekalo ohohoho... sad su puno lipa vrimena u rvackoj, teče med i mliko i baš san kurjoža peršona da vidin koliko će durat popravljanje. predstavnik suvlasnika pave antičević je sve to jutros najranije već vižita.

ovo događanje ću do u detalje pratit na ovemu blogu. čisto da vidimo malo kako i to ide. naša zgrada je kod stanouprave.

navijač žućo by XVII,

potpisujen sve osin ovega na kojen san ja,

sve se more uvećat klikon...

naprid vatreni!

ricete by XVII

upravo nadopunjeno i ušestano.

povirite...

e... obično sebi ne izgledamo dobro kad  vidimo svoj litrat, malo kad smo tutokompleto zadovoljni. mudrujemo, filozofiramo, razmatramo gard, osmijeh, joči, kosu, kile, godine, robu, svašta nešto.  znan čak i da se razmatralo kako lumbrela stoji na sliku. volimo i onoj peršoni ča nas je slikala reč da nas nije dobro uvatila, volimo grintat, dosađivat, guštamo gnjavit. niman pojma zaradi čega je čovik takav. možda zaradi ega, ne znan, more bit. a zapravo su litrati lipi, sve smo to mi, to je naš život, jedini kojega jemamo. gledan malo danas svoje litrate o' ove godine. evo nikih ča su mi se učinili da su onako, neloši, ok.

svi su već bili ovod na ovi blog, ovo je ka niko malo ponavljanje. zaradi čega?

e a... neću sad ulazit baš u detalj, ma ke, e...

dosta je ovoliko: tot san negdi, jopet ću notat štagod ovod, ma eto, dok ne stignen jopet, da ne pofalin cinjenon čitateljstvu ovega bloga, e...

naprid vatreni! i filip navija za vas...

--------------------

ovo je mali o' moje sestre...

e... danas mi je triba bit ispit iz vožnje. međutim, autić je jema nesriću na cesti. narafski, nisan je ja skrivila, kad se to dogodilo nisan opće bila u ton tonobilu, a ni blizu njega. jema u moga instruktora i mercedes, ali nisan tila minjat tonobil na sam dan ispita, mislin da to ne bi bilo pametno.  moglo se vozit i š ovin, nadrapa mu je zadnji far i gujica, ma isto, ajmo mi ča reč da ćemo čekat popravak, a nekako mi se pari i da mi je bolje da još malo vježban. tako je ispit odgođen i čekat ćemo novi poziv iz haka, a ja san danas vozila tonobil do omiša. vozač, šofer, driver oli moja malenkost i svi putnici (hehe bilo nas je u tonobilu jerbo tonobili i jesu za to da se svit  njima vozi) su sritno arivali na odredište, a između točke polaska koja se zove split i odredišne točke koja se zove omiš je na jednom dilu puta, di se po konfiguraciji terena moglo, bila i 6. brzina. 

svitu moj, danas san vozila i u 5. i 6. brzini!

ovo mi je 4. put da vozin ovu relaciju, tri puta san je vozila noću, danas prvi put po danu. danas mi je srce bilo najzadovoljnije kako san je vozi - za one ča nisu pratili sve redon, sad san u autoskoli sušić.

eto to je to, vozačku još niman, a mnogi koje je jemaju nisu još vozili do omiša oli je čak jemaju i 20 godin pa opće ne voze. narafski,  nikad nije svako zlo za zlo, a ni dobro za dobro. jeman bokunić višje sigurnosti, mrvu me bolje gre vengo prije.  čunjići su mi i jopet dikad mrvu bolje, dikad mrvu gore, ovisi o danu i inspiraciji, ali cesta mi sigurno gre bolje, a ionako je cesta na kraju realnost i potriba.

a kako je u omišu, a? evo tot su litrati, e...

  http://www.flickr.com/photos/xvii_st3/sets/72157605488831185/

e... gibonni. divji cvit. pogledajte i poslušajte kako samo ti čovik živi mužiku...

Divji cvit

e... nije da mi je baš loše na ovu zemaljsku balotu, jeman 35 godin, znanje i obrazovanje, poduzeće, moren zaradit za sve šta poželin, živin u splitu, na odličnoj poziciji, u moru san barenko 6 miseci na godinu itd. sve u svemu more stat. ma isto bi čovik dikad volija malo i pobič, e...

recimo, odlipit se bokunić o' ove zemaljske balote. najbolje bi bilo brez svemirskoga broda, e... kako, a? evo šta učin dicu.

ako izjednačimo silu težu s centripetalnom silom, na ekvatoru će nam se tila odlipit o' zemlje, neće je višje pritiskat, e...

znači:

m*g=m*v*v*(1/r)

sad ćemo se rišit mase i radijusa u nazivniku:

m*g=m*v*v*(1/r) I : m

g=v*v*(1/r) I * r

g*r=v*v

ajmo se ča rišit i kvadrata:

v=sqrt(g*r)

znamo da je obodna brzina v=2*pi*r*(1/T) i to ćemo iskoristit:

2*pi*r *(1/T)=sqrt(g*r) I*T

2*pi*r=T*sqrt(g*r) I : sqrt(g*r)

T=2*pi*r*(1/sqrt(g*r))

uvrstite sve potribno i dobit ćete koliko bi triba durat dan (jedan okretaj oko zemljine osi), da se tila na ekvatoru odlipe o' zemlje.

pi=3,14

r- radijus zemaljske balote 6370 km

g - akcelaracija sile teže , na ekvatoru 10 m/s*s

sqrt  - drugi korijen

T=2*3,14*6370*1000*(1/sqrt(10*6370*1000))

T=40003600*(1/7981,22)

T=5012,21 s = 83,54 min = 1, 39 h

ekola, ovo oče reč da dan dura nešto višje o' ure, a ne 24 ure, da bi se komodno mogli odlipit...

ovo narafski opće nije neka mudrost, zadatak san vazela iz poznate žute zbirke iz fizike.

međutim, meni bi višje odgovoralo da dura puno višje od 24 ure jerbo lakše bi bilo sve stič. eto, judsko srce nikad zadovoljno nije...

na kraju šetimane i u onoj ča slidi u organizaciji ekološkog društva picigin bačvice održat će se:

IV. prvenstvo svita u piciginu.

detaljne informacije morete nač ovod:

http://www.picigin-bacvice.com/prv_svita.htm

narafski, nije loše vižitat i:

http://www.picigin-bacvice.com

povirit ću koliko se bude moglo uvatit vrimena, neću moč sve, ali barenko nešto.

e... ovu ćemo navit za nekoga koga je moja duša beskrajno volila, a ko je tu istu dušu beskrajno povridija.

http://www.parametar.hr/razno/Scenery.pps

nešto prekrasno, klikanjem pogledajte, a uštekajte i zvučnike.

fala lipa za ovo selmi iz šibenika.

dragi filipe,

danas feštaješ drugi rođendan, već si pravi momčić. daleko si mi oko dvi iljade kilometri. ne moren te zagrlit, pojubit, guštat u pogledu na tvoje lipe joči ča su ka more. eto, tako je kako je, ne more nam život uvik baš sve dat, šta ćemo, e... niko ne bi bija sritniji o' mene da ti danas dan pojubac, e... e  ma moren ja tebe volit di god ti bija. zaradi tega ti za tvoj drugi rođendan želin sve najbolje. želin ti da sritno resteš i da budeš voljen. želin ti da budeš zdrav. želin ti da u životu jemaš dobre kumpanje jerbo oni zlata vride. želin ti da finiš onu skulu koja će te veselit i da radiš ono ča voliš. želin ti da budeš dobar čovik, pošten i vridan kad dođe vrime da sam budeš triba sam zaradit za život. želin ti da u životu nađeš peršonu koju ćeš brezuvjetno volit i koja će tebe brezuvjetno volit, želin ti da budeš sritan. želin ti da vidiš lipih mista i puno tega naučiš, upoznaš zanimljivih judi. želin ti da ne zaboraviš da jemaš i split i hrvatsku. želin ti puno najlipših želja srićo tetina, cili život jemaš isprid sebe, guštaj ga! 

  -------------------

ove dvi tri rige su za najlipše dite na svitu, filipa, maloga o' moje sestre.

e... za moju dušu... 

e...

• uvjet more bit u matematici/programiranju, > , <  (npr. ako je nesto vece/manje, onda ce bit ovako/onako)
• more ga postavit banka za dat kredit. (recimo, nima kredita ako ne nađeš jamca)
• poslodavac kad trazi zaposlenike (ja npr. stavin uvjet VSS i trazin da se donese diploma, ko diplomu nima pokazat, neće radit, takvi mi ne tribaju, šta će mi, neka to zaposle nesposobne budale o' mita i veza; nesposobne kažen jer da znaju ič radon i znanjen, išli bi... jerbo, ako je uvjet VSS, diplomu triba jemat )

itd.

uvjet u jubavi ne postoji.

ako tot jema uvjeta, to je interesenština i računica, a ne jubav i svak normalan to zna.

jubav je jubav jedino brez uvjeta.

----------------------------------------------------------------

pitanje za razmišljanje:  je li vam jubav jubav tj. brez računice? hm? meni ne triba ništa reč, pošteno triba odgovorit sebi...

e... ajmo navit štagod mužike. šta? štagod veselo, puno ritma, štagod ča vonje na lito. tako jerbo san suuuuuuuuuper!

e... ovi post notajen za one prikovišje kurjože. gren ča opisat jedan moj sasvin običan, ali skroz dobar dan.

jučer san poviri do pazara. sve se zeleni, mami čovika. 

pazar by XVII

prikovišje kurjože sigurno zanima ča se vazelo, a? uajme, boba i poma, to volin za poludit.

danas san se najprvo iz nenaspavanih pribaci u naspavane. to zlata vridi. probudilo me jedno milo, krasno biće, biće ča vridi bogatstvo. suptilno i kako samo to drago biće zna, e... ko? a puno kurjoži neka povire ovod, e...

onda je tribalo nešto izist. puno kurjoži se sigurno pitaju šta, e... a šta drugo vengo plitvičku štrudlu ča smo je vazeli na 1001 deliciji jučer. moran van reč da mi je bila izvrsna. zapravo, svidilo mi se to lani i to toliko da san cilu godinu misli kako ću je i jopet vazest. e to ti se zove dobar proizvod, kad se kupac/korisnik zajubi u njega, e...

onda me tokalo poč u spizu. bilo bi bolje nedilju ne trošit na butige, ali šta kad radin po cile dane i niman kad. zapravo i nedilja mi je malo kad neradna, e... di se odilo, a? ovi put u šjor keruma, e... vazelo se sve i svašta, ali najbitnija je za ovi post zelena manistra i panceta. sad se puno kurjoži pitaju zaradi čega? jo, gospe moja, a zaradi boba, e... š njin ćemo danas u teču. to je baš lipi obid za nedilju, e...

dakleM, najprvo je to izgledalo ovako: 

panceta, bob i zelena manistra by XVII

a poza kuvanja ovako: 

bob by XVII

sad ću svima, pa i puno kurjožima špijat kako se to more učinit, ovo je jedna o' riceti iz moje kuće i ispadne super.

za obilato za dvi peršone triba vam:

- po kila boba

- kvarat široke (meni je najlipše zelene) manistre

- kućarin konšerve

- dvadeset deki pancete

- sol

- voda

- jedna kapula

-  biljno uje

kad ste nabavili sve potribno, onda je potribno učinit ovo:

isič kapulu na bokuniće i zažutit je na biljnon ulju, na zažućenu kapulu dodat bokuniće pancete i bob.  dodat malo vode, kućarin konšerve i malo soli, puštit da kuva po ure. dodat još vode i kad uzavre dodat manistru. neka kuva jedno dvadeset minuti oli dok manistra ne omekša.

ovo se narafski triba izist iz dubokog pjata.

meni je bob danas bija odličan, ka mali bog, a mojoj srići nima kraja jerbo mi je malo u tečicu ostalo i za sutra.

ča je još bilo danas, a? -  pitaju se kurjoži.

a makinja mi je oprala robu, bilu. omekšivač mi je odličan, vonje puno lipo.

narafski da se bilo i na more. grijota bi bilo živit na moru i stat doma i grinat pored mora i lipote, e...

sad će se puno kurjoži pitat di se danas bilo, znan. evo gren van ča reč i to. na kaštelet. evo i jedan litrat, konfužjuna jema, lito prži. 

konfužjun na kašteletu by XVII

za ovu plažu bi se moglo reč da je uvik puna zgodnih judi, mladih i onih u nikin tridesetima, uvrj glave četrdesetima. sve tot pršti o' veselja, šarenilo je koluri, dobar vitar, vole je surferi. meni je jedna o' dražih u splitu i tot me morete trefit dosta često. evo, na litratu se vide i novitade za dicu, a otvorija se i još jedan kafić.

dođen, nađen misto na drugu valu, okupan se (more je odlično) i uvatin se libra. kurjoži se sigurno pitaju kojega... e pa ovega. odličan je, još jednom priporučan.

najedanput niko šuškanje... dižen pogled i vidin surfera. evo ga, pokazat ću ga i vama: 

surfer by XVII

e... sad gre ča sve čovik misli na plaži. moren mislit ča misle muški. evo šta je meni palo na pamet. notat ću to samo zaradi puno kurjožih. pitan se najprvo: naš oli furešt? - hm, sigurno naš - zaključin u sebi, a da zapravo i niman niki argument za to, čovik more bit i furešt, e... jema dobre noge, pozadinu istooooo. - razmišljan u sebi. ovako o' pozadi pari zgodan, ali ko zna kakav je u faci, hm? aj, gren ga slikat, bit će dobar litrat, modri se more, crveno na idru. gledan ga još malo i mislin se i jopet o faci. kad , okret, oooo, pa šjor je filmski glumac, prezgodan, jema super joči. vidi da ga gledan, gleda i on mene. mislin se, a ko zna kako se smije, kad , eto ti ga na, ko da je višćun, pa da mi čita misli, eto osmijeha, smije se za pet. gledan ga, gleda me, pitaj boga šta on sad misli. možda i on mene ovako analizira. a ko zna kakvi mu je glas? hm, hm, eto ti ga na, vuče jidro, meni priko ćiverice baš, progovori, jo, glas mu je isto super, momak je stvarno mister zgodni. kukan i grintan ka da će me tih par kapljic mora potopit, a u moru san barenko šest miseci godišnje. smijen se, smije se čovik. gledan di će. gre put tonobila, poza nekog vrimena mu se sve osušilo i vidin da se pakuje. aj, gren i ja pomalo, narafski, poza još jednega banjanja, sutra je novi dan. ko zna oče li se šjor/mister zgodni surfer jopet ukazat, a? ma oče, kaštelet je odličan za surfanje. aj, baš ću stat atento, možda ga i jopet trefin...

ajmo ča dalje. doma, tuš. za kurjože keune šampon i keune regenerator ča se ne ispire, felce azzurra shower cream i nivea body uje. skupo? jeftino? ne znan, meni je ok, radin, zarađujen, proizvodi su kvalitetni, ako ništa loše o njima ne doznan, duperat ću ih i dalje...

večera?

e pa kozji sir i pome, e... a da šta drugo, a? i sok o' naranče, e...

a sad gren ča, triba bokunić nedilje proživit i bez uvida javnosti, e...

jemate pozdrav!