e...

koliko pazite kad uđete u butigu? gledate li cijene? obađete li najprvo sve oli odma stavite štagod u košaru? gledat zlata vridi. višje vengo bit bogat, e...

a ja? gledan, uvik gledan. da ne gledan, propala bi i ja i firma.

evo primjer iz života našeg svagdašnjeg kako triba pazit...danas mi se tilo izist nešto lipo, pjatić salate o' muzgavaca, sipe, obotnice i još svašta nešto ča su plodovi mora. gren štagod ulovit, nima mi druge, e... di ću, a? misto ove radnje je butiga kerum u jokera, split. nađen ja šta me zanima, teta izvadi kaciolon, stavi u niku terinicu o' plastike za ponit doma i reče mi cifru o' koje me strefilo. skoro. kažen skoro jerbo kako vidite još san živa. ne dan se baš samo tako, e...

poza tega XVII pita jerbo ko pita ne skita a more i ko pita i gleda u takujinu jema višje tega, e...

XVII: a skužajte, ma pošto je 10 deki tega, a? koliko ja vidin ovod piše 14,99 kunića za 10 deki?! nije mi kjaro kako 20 deki more doč toliko, e...

teta iz butige: e, ma to van je druga vrst, ova piza višje...

XVII gleda, motri, proučava. hm? ma di to piše?!

XVII (naglas): hm? ma di to piše?!

teta: evo, tot doli u kantunu...

XVII: a ča niste i tu cifru istakli jasno da svit vidi, ovako zbunjujete kupce, e... ajde, znate šta, ja za pineze moran radit, pa ćete vi meni lipo dat ovu salatu ča je 10 deki 14, 99 kunića.

teta sasvin ljubazno vadi novu plastičnu terinicu i stavlja o' druge vrsti na balancu. 21 dek, kunića 31,80 - odlično XVII će guštat, a neće doč na inkanat.

hehe, moren van reč da mi je stvarno to bilo dobro za izist.

je li mi bilo neugodno zaminit?

ne, opće, a zašto bi mi bilo, e...

neugodno bi mi bilo da se nisan izborila za svoja prava, da san mučala i dala puste pineze za salatu ča mi po cifri ni najmanje nije odgovarala jerbo je skupa ka vrag. koliko, a? e, neću van reč, pođite u tu butigu, nađite taj frižider i u desni donji kantun nađite cifru. jerbo, virujen da je teta neće maknit, bože moj, jema puno svita ča im je neugodno ka se dogodi eto taki (namjerno notajen ovu rič ovako) nesporazum, pa će platit i činit kuco.

u našin butigama je jako česta ova filozofija: jedno na polici, drugo na kasi. onda vam reču, e, niste dobro gledali. zaradi tega ja gledan, gledan i pitan, e...

šta san još vazela, a? a to je bilo na gornji pod prije ove spize. dvi robe di kappa maje kratkih rukav za 159,98 kunića. to su dvi maje,e... jedna dođe  79,99 kunića. kako? a' e a lipo, dobro san gledala po škancijama o butige i našla povoljno, e... vazela san još i dva libra za 129 kunića, narafski, to je cifra za dva libra, a ne jedan. kako? lipo dobro san gledala po škancijama o butige i našla za tu cifru dva libra.

naslovi:

• Cecilia Ahern, PS Volim te
• Marina Lewycka, Kratka povijest traktora na ukrajinskom

sad jeman šta čitat. baš lipo. libar je jedan o' boljih kumpanji s kojin čovik more provest vrime.

e... bija bi koristan u uredu. pedantan, šesan, pravi pomoćnik.

e...

jema svita ča je uvik u nikoj lošoj vezi i umisto da se gleda ča prije škapulat o' tega, tvrdoglavo inzistiraju na pogrešnon izboru. sami recimo nisu opće loši, a uvik uza se jemaju svit ča jema mane (prvenstveno mislin na karakterne mane i nemoral svake vrsti) - za veze, za kumpanje, za posal i sl.

u takvom odnosu čovik bude i popljucan i omalovažen na najgrublje moguće načine, a i jopet brez te peršone ne more. jerbo, navika se, eto. to ta peršona misli. hm?

ma ke, mislin da tot zapravo nije rič o nikakvoj navici, e... ja nisan psiholog, vengo inđinjer i možda i falijen, ali mislin da se tot radi o jednoj stvari. kojoj, a?

kronični manjak samopouzdanja, e... to i ništa višje. e a samopouzdanje nije baš lako izgradit. dikad i roditelji svojin odgojem dovedu do nesamopouzdane dice, dikad  partneri sruše samopouzdanje, dikad se čovik ćuti nesamopouzdano jerbo ga nešto ne gre najbolje (npr. matematika).

e sad, di je loše samopouzdanje, tot moš vidit da takva peršona često bude žrtva partnera koji se (sasvin bezrazložno) proglasija višon vrston. onda  se dogodi da popušta na svaki prohtjev i pi*dariju te vrle više vrste, da ga ovi vriđa i omalovažava na najgrublji mogući način, da mu iščiča sve pineze, često i privari, obavezno popljuje sve šta je o' naše promatrane peršone, sruši mu tutokompleto samopoštovanje, a time lako i samopouzdanje. poza tega more od njega šta oče.

šta činit? samopouzdana peršona će se vrlo brzo maknit o' takvih odnosa i neće tolerirat da je se gazi. nesamopouzdana peršona opće neće ni probat napustit takav odnos u kojem je gažena i to zaradi tega jerbo misli da bolje ne mirita (ne zaslužuje). daklem, ovima iz vriće nesamopouzdani ću probat reč šta činit.

• svakako tribaju sebi reč ja vridin i nač ne nešto vengo sve u čemu su dobri (recimo razne vještine, hobiji i sl., a ako se peršona realizirala i u struci, tim bolje) - dok budu sačinjavali popis (da, baš tako lapiš u ruke i napišite sami sebi: ja, peršona ta i ta, znan lipo crtat, plivat i sl.). razmišljajte ča sve znate. kako budete razmišljali u čemu ste dobri, samopouzdanje će rest. e sad promislite i u čemu bi mogli bit dobri, šta bi tili isprobat, možete li eventualno to sebi priuštit i krenite u akciju. neke stvari su i sasvim besplatne, a dobre, naprimjer šetnja, trčanje i sl. ne odustajte na prvo šta vam se dogodi ka prepreka - vježbom ćete postat sve bolji. probajte se u neku aktivnost upisat oli počet bavit brez vašeg pljuvača i omalovažavatelja. morate naučit vrime provodit i sami, brez tiranina i bit zadovoljni u temu.
• idući korak je poč u frizeraj oli kod brijača. ušestajte se. nastojte šesno i lipo složit i robu, postole, dignite visoko glavu jerbo vi vridite i prođite sami, brez tiranina priko grada. možete to naprimjer učinit i kad vam je pauza na poslu. prođite frekventnom ulicom i lipo budite sritni jerbo ste jedinstveni i posebni. tiranin je taj ča jema dubokih psihičkih problema, a ne vi. 
• nastojte na poslu bit sve bolji. možda vas gazi i šef, ali probajte svaki dan svoj zadatak obavit šta bolje tako da budete sami zadovoljni učinjenin.
• razmislite i o pinezima. jemate li ih dovoljno da se maknete od onoga s kojim niko ko sebe poštuje ne bi tija živit? jemate? odlično. nimate? pogledajte oglase, možda možete nač posal oli nač bolje plaćeni posal.
• sad ćete i jopet sebi reč ja vridin. koje kilo viška? manje izist za večeru i otopit će se. manjka? izist fetu kruva višje i popunit ćete se. volite svoje tilo, nasmijite se svako jutro sebi kad se pogledate u zrcalo i recite sebi čarobne riči: ja vridin.
• šta ne volite kod sebe? recimo fumajete i to je ono zaradi čega se ne ćutite dobro. a šta ne prestanete? recite sebi ja to mogu, ja to oču i budite uporni. kad nešto uspijete, sami sebe ćete višje poštivat.
• okružite se judima zdrave pameti.
• okružite se veselin svitom, optimistima.
• probajte poč na neko putovanje oli barenko izlet, narafski brez mučitelja. sami. to je najbolje jerbo sebi ako ste pametni morete bit najbolji kumpanjo.
• čitajte, dovršite obrazovanje ako niste.
• itd.
• počnite tlačitelju ukidat povlastice tipa: uvik ga/je čekate, šofirate, puštate da sve vaše o' robe do postupaka omalovažava. omalovažava vaš kraj? e pa doša je dan da kažete: to je moj zavičaj i prikini višje omalovažavat sve ča je moje. omalovažavaju se vaši roditelji, sestra, brat, dica ako ih jemate iz prethodnih veza? e pa doša je dan da kažete: to je moje i prikini višje omalovažavat sve ča je moje! ako san ti toliko loš(a), pođi ča, nađi sebi para iz višje vrste.

je li znate šta će se dogodit? vi ćete slideći točke izgradit vaše samopouzdanje (to ne gre priko noći i triba bit uporan). narafski, triba postič i unutarnji mir, staloženost. to sve ne morete jemate ako ste stalno gaženi i na takvim izborima ne triba tvrdoglavo inzistirat, vengo ih se triba rišit. odnos u kojem vas i sve vaše neko sustavno i konstantno omalovažava nije nikakva jubav. bižite ča o' takvoga svita, oni zapravo ne poštuju sebe, pa zato pljuju i vas. čovik ča poštuje sebe jema i poštovanja prema drugom čoviku.

uspili ste pobič o' mučitelja? odlično. muči vas šta je mučitelj reka da gre ča? ma neka je, šta vas briga, recite sebi ja vridin i bogu fala da san se takve peršone rišija. budite odlučni da se s takvon peršonon ne mirite. ako se budete mirili, bit će vam samo još gore. sustavno ponižavanje i pljuvanje nije isto šta i di koja gruba rič koja doleti kad je svađa oli karanje (narafski, tribali bi učit i kako se kvalitetno i staloženo svađat, ali ne znan koliko ćemo mi ovod u dalmaciji to ikad moč naučit, temperament je prejak za tako nešto).

ajmo ča dalje. sami ste. ne ulećite ka muva brez glave u novu vezu. najprvo se smirite, ojačajte samopouzdanje, budite drugima ugodno, a ne neugodno društvo. nimate s kim izač? ma izađite sami, napravite đir, pogledajte izloge, obađite koju izložbu, protegnite noge, trefit ćete koga. javite se judima, proćakulajte. naučite živit sami i bit zadovoljni. tek kad to budete mogli, moč ćete nač i peršonu za kvalitetnu vezu.

možda će proč i neko vrime dok se budete ćutili sposobnim za novu vezu, ali jako je bitno da vam je u duši mir. ne mrzite vašeg mučitelja, on je sam sebi najgora kazna.

dok ste god opterećeni mislima na ono šta je bilo, niste sposobni za novu vezu. ovo je bitno dobro upamtit jerbo nimate pravo ujurit u nečiji život i napravit toj peršoni mučne stvari i monade samo zaradi tega šta ih je vama neko učinija.

za nastavak života ne forsiraje nikoga, prava ljubav će se dogodit kad bude za to vrime. do tad volite more, prirodu, beštije, kumpanje, cviće, Sebe.

probajte i dat koji šold humanitarno (ne mora opće bit puno - recimo 10 kuna misečno), vidit ćete kako to čovika čini boljin. obiđite svoj zavičaj, svoje roditelje. šta bi ih se sramili, neka se srami oni ča je kreja i sl., a ne svit šta je pošten. javite se kumpanjima, nađite nove zanimacije i obnovite stare. možete vi to: jerbo, vridite, e...

a šta će mučitelj? e pa briga vas, nije vas mater rodila zaradi tega da vas neko muči, vengo da budete sritni, e...

--------------------------------------------

ekola, to je to, ovo je bilo onako iz mojih inđinjerskih promišljanja, još jednom napominjen da nisan psiholog ni nešto slično.

e...

mislite da je samo more jučer bilo dobro, a? e, privarili ste se... jeman još nike litrate o' jučer. jeste li kurjoži koje, a? višje vengo recimo kurjoži duje ča ćiri di je vestibul, a?

kurjoži duje by XVII

e pomalo. a di je priša, a? triba jemat i bokunić pacijence, e... ona u životu zlata vridi. evo, najprvo ćete duju vidit ciloga, e... jerbo, mirita, e...

duje by XVII

sad ćemo vidit jema li još ko kurjož. hm? jema. šjor grgur, evo ga, ćiri i viri temeljito kroza vrata o' zlata oli zlatna vrata.

kurjoži grgur by XVII

aha, evo i ciloga šjor grgura jerbo mirita i on. brez njega ne more e...

grgur by XVII

jerbo, ajde priznajte pošteno ča bi mi a i furešti brez sve one sriće ča je želimo kad taknemo njegov palac, a?

palac ča nosi sriću by XVII

šta ćemo sad, a? e a sad ćemo bokun fermat. nigdi nije priša, e... jerbo vrime je o' obida; znan da jema kurjožih, pa evo ćemo špijat ča se jučer slistilo:

riba lešo by XVII - riceta: prima ovoj riceti:
http://web.vip.hr/nmagazin.vip/ricete15.html

ekola, finija prvi dil dana. ajmo ča još dat litrate o' pridvečer i štagod o' navečer, e...

evo, recimo kapetanija u oblacima. dobar litrat, a? me je, e... bolje da je kapetanija u oblacima, vengo kapetani, e... o' kapetanije u oblacima barenko nike koristi, jemaš dobar litrat. a šta kad je kapetan u oblacima? brod onda more poč ispod mora zaradi njegovih oblaka, e... a posada i putnici među oblake, e... ajme, sad se već rastužujen, pa ću fermat.

kapetanija u oblacima by XVII

ajmo ča na rivu.

riva by XVII

split by XVII

vengo, recite mi jeste još kurjoži a? za takve evo i dvi noćne slike oli litrata by XVII. njih, a i sve druge morete uvećat klikon. ekola, gren ča, dobro ti jutro grade! danas je novi dan.

noć by XVII

noć by XVII

e... ovčice jutros. cila vala meni. ala gušta. ovo mi je na deset minuti hoda od kuće. je li van sad kjaro zaradi čega ne živin u metropoli, a?

a kakvo je more? odlično. baš san se naguštala plivat. litrati i film by XVII

e...

kad san ka mladi inđinjer tražila posal diljen lipe naše, nike firme su mi se uspile temeljito zamirit.

kako? a duperale su bahatost, brezobrazluk i tako to. među njima je i spliski škver oli brodosplit.    

žestoko su me naidili i onda sam im rekla: znate šta? nemojte mi se višje u životu obraćat, nikad, ali baš nikad i za ništa, e... oni će meni: e, je, kako da ne, a zaradi čega bi ti se mi obraćali, a?

finija je ti razgovor, finile su i godine. danas fala bogu radin za se u parametar doo. radin i liti narafski. a zaradi čega ne bi, a? jeman more i u splitu (fala bogu jerbo se kupan barenko 6 miseci, i danas san, more je lipo), a uvik moren klisnit koji dan i van splita kad mi u njemu dojadi, e...

i tako jučer, lita gospodnjega dvi iljade i osme zvoni tel. zovu iz škvera. tribalo bi im ka nešto riješit.

pamti pa vrati.

(briga me oće li me sad neko proglasit dišpetožon, e)

spliski škver, a?

ma pa-pa, nimate tih para, e...

i tako san ih otkantala, a otkantala bi ih i da me nisu nekoć naidili jerbo sa škveron u kojen još uvik radi goran vukasović koji je predmet interpolovih istraga ne želin radit. ma ke, e... a zašto bi, a? rađe ću vazest 10 iljada kunića ciniji tonobil, vengo š njima/takvima jemat posla, e...

znan desetke inđinjera ča pošteno zarađuju svoj kruv tot i njih molin neka mi se oni ne ofende. neka se ne ofendi ni oni pošteni radnik na navozu. niman ništa kontra tega svita, jeman samo kontra onih ča su i tega inđinjera i tega radnika pokrali, a tako je u bidnome škveru već godinama.

jema li barenko koja uprava koja tot nije jemala afere, kaznene prijave, nestale pineze i tako to, a?

-------------

šta je još bilo jučer? ajme, uvatila me tlačit jedna peršona iz hepa sa nikon anketon ča je po mom mišljenju svašta-nešto samo ne adekvatna anketa, pa san i njoj još škivala odgovorit na to.

poza tega mi je dosadija ured i pođen na more...

-------------

vengo, zanima li vas koga smo još otkantali u zadnje vrime, a? od većih le meridian (lav) oli otel lav - razlog: vrlo bahati upit s njihove strane i vlasnička struktura koja se meni ne sviđa. eto ne sviđa mi se i šta sad? nećem za njih radit i to je to.

--------------

a očemo li radit za vas oli vašu tvrtku, a?

možda očemo, možda nećemo, ovisi o temu jeste li me u životu naidili, kako poslujete, kako plaćate, je li vas ne daj bože traži interpol, šta će meni reč moj špurijus i tako to...

e ovo, ovo vridi bogatstvo, kad moš reč  NE ako procijeniš da triba reč NE.

a za koga smo radili u zadnje vrime?

svakako mi je drago šta smo nikidan radili za poduzetnički centar sanex split , a zadnji račun je jučer otiša u marinu kaštela.

ekola, to je to. posal gre dalje, a pi*darije koje svako malo kruže spliton da san zatvori firmu ne obadajite, to pričaju oni ča nimaju ideje za život i rad, da san u jameriku utužila bi ih, a ovod im se samo smijen, e...

gren ča, nekako mi se baš sluša festival klapa u omišu, pa bižin od ove škatule e...

e...

zanima vas kakva je neka peršona, a?

evo jedna mala finta za bolje skontat svit. život mi je pokaza da gre jušto ovako.  pogledajte:

• kakva mu je (kakav joj je) cura/žena (momak/muž)
• šta jema za kućnog ljubimca
• kakve su joj postole
• sve višje mislin da se i iz tonobila neki vrag da zaključit

šta  ovin oču reč? pravi muškardin uza se obično jema lipu, zgodnu i dobru ženskicu, a ako je uza njega nika ružna rošpija ča pari muško, e, onda je obično rič o' ženskaston muškom. vridi i obrat, prava ženskica uza se jema zgodnog muškardina (malo koji more bit dobar, a ako se nađe oni ča jema i tu osobinu, onda ste dobile na lutriju, e ; a lip? e pa muško opće ne more bit lip, samo zgodan), a ako je uz nju koji drugovačiji, e, onda je obično rič o muškobanji.

ovu tvrdnju dokazat ćete sami sebi pažljivijim promatranjem parova ča prolaze gradom.

beštijice? kažu da beštija sliči na gospodara. pari mi se i da je to istina, a i ovu ćete tvrdnju dokazat sebi ako s pacjencon promatrate svit i pase ča prolaze gradom. tot smo bokun ograničeni jerbo postoje i maške, tiči, hrčci, ribice, zecovi i sl. virovali oli ne jema i onih ča doma drže zmije i konkodrile. zaradi tega pazite kod koga idete u vižite, a ako jemate čast da recimo vidite mašku oli tiča, pogledajte ga, reče vam i ta beštija nešto.

postole će mi reč je li peršona pedantna, jema li ukusa i je li snob.

a tonobil? isto ka i postole.

ekola, ovo je bilo ukratko, a na dugo i široko se more roman notat, e... gren ča. jemate pozdrav!

sv. frane by XVII, slikano jučer, klik za veće

nada oli XVII

slikano u splitu jutros. di?

e a dokučite, nije teško :o)

sve se more još uvećat klikon...

za sve ča pitaju: živa, zdrava, nisan na godišnjen oli urlapu, vengo radin,

a guštan kad uvatin vrimena... sve u svemu dobro san...

šta činit kad zafriška?

pinel u ruke, malo truda i eto, popravlja se svaki simbol...

slikano jučer, mobitelon

e a morete se banjat ka i ja, more je lipo.

nebo i kamen, srebrna vrata by XVII, slikano jutros

nebo i kamen, radunica by XVII, slikano jutros

e...

uapsilo je dotura. kažu u foje da je tija poč u split. asti sto, a kod koga je on to tija ovod doč, a? evo, špijat ću van ča se meni pari: mislin da je iša kod svoga kumpanja dotura, e... jerbo, kod koga je drugoga on to moga poč, a?

--------------

dnevni komentar by XVII

e... toka me radit pa nisan na moru. zaradi tega se gren tješit, evo nešto dobro iz bespuća interneta. za sve one ča vole dobru pismu i ča su ka i ja infišani u more. guštajte!

e...

vidin nikidan vapor drveni, vezan o' isprid lučke kapetanije u split. piše na njemu izleti. otvoren, odličan za poč na izlet, šta je je.  meni se baš gre na koji izlet, nisan odavno. na palubi mu jema dosta mista za sist, ne bi bilo kuvancije. i sad, gledan, merkan, gledan, e...

u zadru recimo takvih brodi morete vidit dosta  i da se po tabelama i natpisima na brodima svatit di će oni i za koliko pinezi će vas odvest tamo te koliko dura izlet.

gledan jema li di tabela di piše ono ča me interesira, a to je :

• di
• kad
• ko, koliko 
• za koliko pinezi

nima ništa. gledan oču li sinjat koga o' posade i pitat. nima ni njih. e jesan pegula. ništa o' izleta. bit će bolje drugi put, nije baš da nigdi ne gren, evo, sinoć san i jopet vozi po magistrali do omiša.  

u škrabicu (bolje rečeno ispod škrabica, hehe sad jemamo škancije za reklame)  mi ariva letak. na njemu roba, maje, gače, postole i sl. klasa srednjeluksuzni (ovo oče reč da nije na običnu kartu, ali nije ni niki luksuzni katalog kakvog možete pokupit na kakvom sajmu tipa croatia boat show) - dakleM u tisak su uloženi pinezi. i sad, sviđa se meni koješta tot oglašeno i gledan di to moren poč kupit. aaaaaa nima adrese. en ti iruda, ništa od kupnje.

itd.

e sad. nisan ni dizajner ni marketinški stručnjak. na reklamu gledan ka inđinjer. (to oče reč da na nju gledan zdravon pameću.) meni, naime, reklama triba odgovorit na ova pitanja:

• di? (di je butiga/ured/ordinacija/radnja oli di se gre tin brodon oli tonobilon i sl. adresa obavezna - kartu je isto pametno stavit, telefon, mail, web)
• kad? (kad je radno vrime, da ne dolazin ka nika stvar brezveze oli kad se negdi gre)
• ko? koliko?(za likare, advokate, zubare i sl. - ko to radi oli ko je vlasnik; za izlete, putovanja i sl. te robu - koliko izlet dura? koliko jeman robe/usluge dobit, a ča su popusti i sl.? )
• za koliko pinezi? (narafski da me i to zanima, pa nisan mona da za izlet do šolte oli običnu pizzu isprsin deset iljada kuna, e... oču znat pošto je nešto)

kad ste mi sasvin jasno odgovorili na ova pitanja, onda mi morete notat da ste najbolji, najlipši i krajnje nezaboravni. jerbo, kako ću vas tako lipe, dobre i nezaboravne opće doč vižitat ako ne znan njanci di ste, a?

fala Ivanu s Broča za ovi suvenir iz Bresta.

e...

ključno pitanje glasi: a ko će to sve platit, a?

znate li ko je platija ama baš svako piće, kavu, obid, đelato (itd. svejedno) na koji san ja nekoga pozvala, a? a šta mislite, a? ko bi to triba platit, a? red bi bija da plati oni(a) ča je pozva i ja se tega držin. dakleM, ako vas ja negdi pozoven, straja nima, ono šta se naruči tot di san ja zvala, ja ću i platit ka šta san i do sad uvik kad san nekoga pozvala....  

e sad... jeste li ikad bili pozvani, a da je peršona koja vas je pozvala poza tega lipo čekala da vi to platite i još protestirala i idila se ako je slučajno ipak morala platit ono na ča je zvala, a?

to van je svitu moj ako niste znali nova moda.

gledan je već nikoliko godin. zovu, pa čekaju da platiš ono na šta su pozvali. ko to radi, a? muški, ženske, duže i kraće znani, sasvin je svejedno.

narafski, oni su vas sasvin fino pozvali, a vi ste svakakvo-nikakvi kad ne razumite taj đir. oni su fini. jerbo, eto, oni vas časte. da, da. a šta ste mislili, a? da ste vi častili ako ste platili račun, a? ma ke, časti vas oni ča je pozva, a platit ćete vi.

sigurno će vas zanimat šta radin u takvin situacijama? ništa, šta ću radit s takvin peršonama ča nimaju elementarnu pristojnost, a? par puti san plati takvo čašćenje, par puti je ipak uz povuci-potegni platila peršona ča je pozvala, ali kako bilo da bilo dogodilo se da na sljedeće pozivanje o' iste peršone jednostavno rečen: skužaj, niman vrimena, a u sebi promislin zahebaji ti sad malo nekoga drugoga, e... jerbo, kako drugovačije nazvat opisano, a? možda je najbolje notat ovako: pazi se "pozivanja" čovik/ženo moj(a), a sve se mislin da bi bonton tribalo uvest u rodilišta i dilit ga materama da jemaju šta čitat svojoj dici za laku noć, e...

a di su tek oni ča oče dar, a? oče, pa oče. i lipo sami sebi naruče dar. ti im recimo očeš nešto darovat za rođendan oli koji bitni datum i opće nimaš namjeru škivat ti trošak, ali peršona lipo odredi: kupuj odma i ono šta ja oču! ako nećeš, svakako si nikakav, a on(a) ča tako sam određuje kad je vrime za darivanje je velika faca, e... moderna. o' takvih van se more dogodit i da vas odvuku u butigu, izaberu sami štagod skupo i nevjerojatno skupo, o preskupoooo, vi gledate tek onako brezveze po škancijama, čekate da prođe vrime; poza tega slidi kasa i morate vadit takujin. jerbo, peršona ča je sve to lipo dovukla na kasu zamislite nima pinezi oli nije pri parama.

a di su oni ča u kino uvik pođu sa velikon novčanicon i bidni nikad nimaju sitna, tako da im karte uvik drugi plaća?! aaaaa a oni ča im uvik fali munite za marku za kartolinu, tantobus i slično, pa se sa nekih grupnih putovanja tipa maturalno oli izviđačko litovanje na ti način uvik vrate s višje pinezi vengo šta su krenili, a? to je još dobro, jema likova ča su kapac naručit i luksuzno putovanje u inozemstvo i još svašta nešto na tuđi račun. ako rečete ne, narafski i svakako ste svakakvo-nikakvi.

itd. počinje mi pomalo bit zlo, pa ću fermat.

šta reč ka zaključak? je li ti tribaju takvi likovi u životu, a? me ke, e... a ko ih voli, a? niko, e... znate di na kraju budu, a? sami, brez kumpanji, brez ikoga. jerbo, svakoga moredu zafrknit jedanput oli dva, nikoga pametnoga višje o' tega, e...

e...

kako gren prima nikin srednjin godinama, sve višje uviđan da je za bilo koji odnos, osobni oli poslovni, vrlo bitno uza se jemat šta višje svita ča je zdrave pameti. drugovačije se niko neće izličit, samo se sam(a) moš razbolit, e...

ako uza se jemate svit zdrave pameti, obično nećete jemat njanci priliku čut riči ka šta su: droga, alkohol, kocka oli karta, kurvarluk, dugovi, bombe, rašpe i rivolveri, pulicija, pržuni i sl., a kamoli  da ćete o' temu razbijat glavu zaradi drugih, da sami opće nimate nikakve veze s tin, e...

ako uza se jemate svit zdrave pameti, obično ćete i sami bit veseli i produktivni, kreativni. vaša zdrava pamet udružena s određenon količinon zdrave pameti drugih peršona će dat zdravu pamet na drugu, treću, n-tu potenciju. narafski, mogli bi i reč da je uvik bolje dva oli tri kila zdrave pameti vengo kil. tako se bolje vidi, čuje, zaključuje.

judi zdrave pameti obično nas ne opterećuju, ne sekiraju. judi zdrave pameti obično nas potiču na dobre stvari. s judima zdrave pameti sve postaje lakše. s takvima se nećete izgubit na životnon putu, morete samo prosperirat. 

kad je sve ovako jednostavno, zaradi čega onda svi ne tražimo uza se samo svit zdrave pameti, a? e a, čovik moj, triba se valjda i bokun ljudske gluposti probat da se nauči poštivat zdrava pamet, e... ne znan šta drugo reč, e...

u zadnje vrime nastojin jemat šta višje posla s peršonama zdrave pameti i šta manje s onima nezdrave, te škivajen šta je višje moguće.moren vam reč da se ćutin sve bolje i bolje...  zdrava je Zdrava pamet.

e...

nevjerojatno je šta sve šeta ulicama ovega grada.

ovo šta ću vam ispripovidit u dvi tri rige ča slide je notano prima istinitom događaju.

scena I.

misto radnje: Split, Solinska, parkiralište

vrime: nikidan.

tot san: jerbo čekan instruktora.

---------

ususret vašoj omiljenoj XVII stiže jedna baba, nikad u životu prije viđena. slidi ovi dijalog:

baba: dobar dan. mogu vas nešto pitat?

XVII (misleći da babu zanima koja je ura oli kad jema tantobus): recite.

baba: vidin da jemate mobitel.

XVII (mobitel zaradi posla visi oko vrata i je baba ga jasno vidi): e. i?

baba: e, sad ćete mi dat da malo telefoniran.

XVII (brdo upitnika povrj glave): ???? a zamislite da mi sad cili split tako dođe, a? ajte gospođo, imate tamo govornicu, ja za kune triban radit, meni šjor sanader ništa nije da, e...

baba: ihhhhhhhh šta si brezobrazna.

XVII (miče se šta dalje od nesritne babe): gospođo, pustite me na miru, jemate tamo govornicu, pa telefonirajte! - biži ča je noge nose na drugi kraj parkirališta.

štorija se finila na način da je baba i dalje uporno pogledavala prima XVII koja eto, zamislite, u 21. stoljeću jema mobitel i koja eto zamislite ne želi da cila zemaljska balota priča na njen račun i zaradi tega je eto brezobrazna. poza minut dva eto instruktora. XVII sida u tonobil, prva, desni žmigavac, motaj, druga i bižmo ča o' babe...

scena II.

misto radnje: Split, Gundulićeva, sasvin blizu parkirališta na Solinskoj

vrime: jučer.

tot san: jerbo prolazin, vraćan se s banjanja na noge, položi san tek poligon i još niman vozačku... ma bit će, duboko virujen u to, e...

--------------

ususret vašoj omiljenoj XVII stiže nikoliko muških, nikad u životu prije viđenih. istovaruju staru kadu iz portuna. slidi ovi dijalog:

muški: alo, je li van triba još jedna kada u kući, a?

XVII: ne.

muški: ma bogati. i di ćemo mi sad s ovon, a?

XVII: di god znate, u mene nećete.

muški (u glas): ihhhhhhhh šta si brezobrazna.

štorija se finila na način da su ti muški i dalje uporno pogledavali prima XVII koja eto, zamislite, u 21. stoljeću ne triba tuđu kadu i koja se eto zamislite misli i kako će se svoje rišit i učinit tuš kabinu. XVII daje gasa svojim autotabanićima i žuri prima svojoj kućici.

jerbo, o' ovega šta je počelo šetat spliskin ulicima moš samo dobit žulj na mozak, e...

e...

danas mi je bija vozački. drugi put da polažen. i jeman dobru vijest:

poligon je položen!

grad moran ponovo, dosta je tega bilo dobro, ali nike stvari ka ča su radovi na cesti (to me mrvu zbunilo) i jedna šempja (koja ni sama nije znala di će malo prije dva na potezu slobodna dalmacija - turska kula - di opće nima pješačkog - sam kraj ispita) su mi donile da moran ponovo polagat grad. zaradi nje san bokunić izgubi kontrolu, instruktor je mora dovatit volan. nima veze, vježbat ću grad još, poligon se priznaje za idući put. bolje da još vježban, vengo da se život izgubi.

jedan dil san odvali i to mi je bitno. nadalje, vidilo se kako gre ispit po gradu i to je dragocjeno iskustvo.

gren van sad ispripovidit i kako je danas bilo na ispitu. instruktor božo sušić mi je odredija da dođen dosta ranije. onda je lipo reka: sad biraj traku!

narafski da san kad već mogu izabrala najlipšu, po sredini poligona, koja nima goba, šahti i sl. bila je zauzeta, tot je vježba jedan instruktor, ali moj ga je instruktor lipo zamolija da se pribaci u drugu traku jerbo on vježba, a mi jemamo ispit. ovi ga je posluša i tako smo osigurali super poziciju.

raširija mi je čunje i vježbalo se do samoga ispita. te ure mi je darova. pitala san se koliko će to bit produktivno, ali vidin da je bilo jerbo san se prilagodi na vrime i prostor.

napomenit ću da je traka bila ogromni problem - zaradi tega se minjala autoškola. danas se pokazalo da se pametnom strategijom može učinit da to opće ne bude problem. možda je do ovih rješenja božo sušić doša kroza godine rada, ne znan, ali danas san vidi da problema oko tega ne triba opće bit.

ispitivač je stiga iz osijeka. bija je krajnje korektan i kulturan. reka mi je da se zove davor kad se predstavija. prezime je reka također (nadopunit ću ovod kad pitan instruktora, od uzbuđenja san to bokunić smetnila s uma).

evo nadopunjan: davor spajić  

dakle, čovik pristojan, lipo reče dobar dan, predstavi se, prije svake radnje reče šta triba, poslin svake radnje reče da je bilo dobro. šta se tiče grada, kad je finija ispit objasnija mi je kulturno šta je bila pogreška i pozdravili smo se. ako triban vježbat još, vježbat ću, to opće nije problem. bitno mi je da su mi danas uvjeti bili ljudski, da me se za razliku od prošloga puta tretiralo ka čovika i da mi je uspilo barenko dil problema riješit. čovik mi je reka da reka da dosta dobro vladan teknikon vožnje, da ću još malo vježbat i da će sve bit dobro.

još grad i bit će vozačka.

agave by XVII, slikano danas, mobitelom

e...

tekst mi je o' lani, vridi i ove godine... zaradi tega obavezno pročitat.

http://www.xvii-online.com/p-u-roza-maju-iili-krstasen-o-iza-bena--zemljo-profundaj-se/118031.html#links

litrat i flim o' danas. misto radnje split, merjan, 2. protupožarni put - između bena i instituta, oni bliže institutu. ja san tot arivala na noge, šetnjom kroza šumu. more se i tantobuson doč do bena oli instituta, tonobilon do rampe na institutu, pa dalje na noge. a pogledajte ove likove, da nije tragično bilo bi komično. ako je razlog gorivo, jerbo velika je mižerija - ka i u onih doli opisanih u prošli post, a nemojte ga trošit ni od lučice do tu, tot se more doč i na noge.

e...

probat ću vam u svega par rigi opisat nešto šta je zapravo tema za dubinsku analizu. šta, a? kukanje mižerije, e... ne stvarna, istinska mižerija, vengo kukanje mižerije, e...

ko to kuka, a? neće oni ča stvarno nima, ma ke, e... ponos mu ne dozvoljava. kuka oni ča jema i od obijesti zapravo ne zna šta će višje.  gren ča dat par rigi opisa peršoni ča mi nisu nepoznate, dapače, vrlo poznate, tot iz moje okoline...

peršona A

• dva stana u jednon lipon dalmatinskom gradu
• trokatnica i zemlja na jednon lipon dalmatinskon otoku
• bisni tonobil
• prihodi raznorazni: šta o' rada, šta o' dodatnih zarada (npr. furešti)

itd. jema tega još. narafski, još njanci jedanput nisan trefila peršonu A, a da mi nije kukala mižeriju. uvik kuka. baš uvik, a znan je o' moga rođenja.

peršona B

• dva stana u drugon lipon dalmatinskom gradu
• kućice i zemlja na eto baš iston lipon dalmatinskon otoku di i peršona A jema trokatnicu
• mrvu manje bisni, ali sasvin solidni tonobil
• poduzeće
• prihodi raznorazni: šta o' rada, šta o' dodatnih zarada (npr. afitavanje)

itd. jema tega još. narafski, još njanci jedanput nisan trefila peršonu B, a da mi nije kukala mižeriju. uvik kuka. baš uvik, a znan je o' moga rođenja.

peršona C

• stan u centru dalmatinskog grada
• brod (krstaš) i brodići oli kaići
• tonobil
• prihodi raznorazni: šta o' rada, šta o' dodatnih zarada (npr. poč na ribe)

 itd. jema tega još. narafski, još njanci jedanput nisan trefila peršonu C, a da mi nije kukala mižeriju. uvik kuka. baš uvik. ne znan je o' moga rođenja, ali je znan temeljito, pa mi se to isto konta u dobro poznavanje.

peršona D

• kućerina blizu dalmatinskog grada uz more
• dva stana u tom lipom dalmatinskom gradu - oba u centru
• tonobil
• poduzeće
• poslovni prostor
• prihodi sa svih strana, nima ko ovu peršonu ne financira - uvik kuka šta nije bogata. bidna.

štufalo me nabrajat. štufalo me i mislit o svemu ovome. zaradi tega, ko mi idući dođe kukat mižeriju, dogodit će mu se, brez obzira koliko ga znan, da ću mu reč: dobro, gren ti pomoć. dignit ćeš se u 5 uri i radit ćeš. dat ću ti pituravat, nosit stvari niza i uza pet podi, dilit ćeš letke za moju firmu po splitu i okolici, itd. jerbo, pinezi mi ne padaju s neba, za njih ja i svit ča san ih zaposli mukotrpno radimo. i to je sva mudrost. radi mukotrpno, troši pametno. druge mudrosti nima, e...

evo jedna dobra pisma. guštajte...

e...

dobro jutro svite! evala. jeste se digli, a? je li urlap oli godišnji? ja uvik radin, ali nađe se i koja ura za štagod pročitat, pogledat. evo šta trenutno pratin s posebnin intereson.

serija:

zakon brojeva - numb3rs

evo nikih linkova:

http://zakonbrojeva.novatv.hr/opcenito.aspx

http://www.numb3rs.org/

matematika je više o' brojeva. na matematici i fizici počiva svit. u ovu seriju matematičari i fizičari pomažu FBI da raspetljaju i najkompliciranije stvari. virujen da će inđinjerima ova serija bit zanimljiva ka i meni, ali dosta je pristupačna i za one koji nimaju viši nivo znanja iz tih područja, vridi pogledat.  glumi i glumac ča je bija likar u kultnoj seriji život na sjeveru.

evo gren van reč i šta čitan. trenutno je u điru libar:

priče naše mladosti - tony parsons

narafski, dat ćemo i link di izdavač daje kratku prezentaciju libra:

http://www.profil.hr/index.php?option=com_content&task=view&id=689&Itemid=1

mislin da će ovo bit dobro štivo. u zadnje vrime mi je pod ruku došlo par naslova ča ih je izda profil, recimo, otok, na kraju duge itd... i svi su bili odlični.

a šta slušan? e, u zadnje vrime najviše radijo u tonobilu o' autoškole, ali finit će jedan dan i to.

ekola, gren ča, sad me toka štagod i radit, pa ću vas najlipše pozdravit.

"Volanon se vrti kad triba i koliko triba."

Božo Sušić - instruktor u autoškoli

e...

a šta misliš čovik moj, da mudre misli triba tražit samo u nike ritke libre notane o' puno učenoga svita, a? narafski, tot moš svašta pametno nač, ali dikad triba i bokun slušat oni svakodnevni život oko sebe i iz njega crpit mudrost.

moj instruktor misli da ja njega ništa ne slušan. narafski, grdno se privarija,  sve slušan, pitanje je samo šta ću poslušat, a šta ne, e... voli on pričat i svašta nešto, jezik mu dikad trče i prije pameti, ali jema i dobrih stvari koje će ti reč. ova gori notana misao mu je baš pametna.

timunon o' auta oli tonobila i vapora oli broda se vrti kad triba i koliko triba. je, baš tako. ši. ovo triba dobro upamtit. da to svi čine, ne bi bilo ovoliko nesrića na cesti. smanjija bi se njihov broj, e...

a gledaj sad život. koliko smo puti zavrtili timun vapora života premalo oli prikovišje, a? koliko puti nismo opće vrtili, a tribali smo, a? jo, more bit da je masu stvari moglo bit i drugovačije da smo ti timun zavrtili kako triba.

puno je tega u našin rukama. ne ovisi sve o drugima, ma ke, e... svak je kapo svoga života sam.

ne more se samo grintat i očajavat, puno tega moremo odlučit, napravit, učinit. ko je recimo zapalija ti španjulet ča ga sad fumate i stavija van ga među prste, a? ja? a nisan, po dušu moju jedinu, e...

sami ste to učinili.

kako ste učinili tako ste mogli i ne učinit.

kad san odlučila da je finito s fumavanjen, jednostavno višje nisan žigicon oli fajericon užgala njanci jedan španjulet i to je bilo to - zdravje je bolje, takujin deblji, roba i kosa lipo vonju. ni mi triba ni likar, ni flaster i nikakve druge pi*darije - čovik će prestat fumavat kad to zbilja sam odluči. ista ti je stvar i sa milijun drugih stvari u životu.

kukamo i grintamo da smo debeli, mršavi i još svašta nešto. e, pa, triba zavrtit tin volanon života, manje oli višje izist (kako je potriba) i vrtit njin koliko triba (šta oče reč ne doč na sučiju oli ka prajac). itd. jema tega još. o' posla do jubavi.

di god stigneš timun triba dobro držat, e... jerbo, moš tako, a moš i ozvizdit u prvu stinu zid oli siku, sam(a) biraš. u 99% slučajeva, e...

litnje, veselo, smišno, guštajte!

e... gren izvuč rič dvi iz mojih sićanja.

najprvo jedno iz najranijeg ditinjstva. ti dan smo došli na Otok i moja  prabaka, očeva baka nije bila u kući. bit će otišla digod radit oko maslina oli na more, vridna je bila ta žena. ćaća se opće nije sekira, ključ o' kuće je visija odma tot, lipo ga je vazeja i otključa. bija je to velik, gvozdeni ključ, dobro mi se usika u sićanje. kako je otključa on, moga je i svak drugi, ali nikome nije padalo na pamet vazest štagod tuđe. dobro, možda bi svit posudija jedan o' drugoga kućarin dva cukra oli soli, ali bi i rekli jedni drugima šta su vazeli. u malome mistu je višje vridija dobar glas, vengo zlatni pas oliti kaiš i prabaka je mogla komodno,  brez straja da će joj neko u kući štetu učinit, poč vidit šta joj čine masline.

iz kasnijega ditinjstva se sićan i moga dide, ćaće o' moje matere. on bi otiša u susida na bićerin razgovora i ostavija bi vrata otključana po uru dvi. narafski, kad bi liti bilo vruće ostavija bi i vrata širon otvorena, neka bude malo promaje, e... nikad nam ništa pofalilo nije. ne bi dida tako nešto učinija da je bilo kakve opasnosti, e... vridija je onda i u velon mistu višje dobar glas o' zlatnoga pasa oliti kaiša, e...

uključin li danas tv bit će i jopet koja pljačka banke oli pošte, one su postale svakodnevnica. jučer me je tokalo uč u ove financijske kuće: finu, pbz dva puta i u splisku banku jedanput. pogled u svakoj o' tih institucija zabrinut, moj a i tuđi; jedva čekan obavit posal i poč ča, nikad ne znaš oče li baš tot pljačka. ništa višje ne ostavljan otključano, njanci na pet minuti. sve višje razmišljan i o nikin dodatnin sigurnosnin rješenjima. blindo vrata su praktički postala standard u novogradnjama. na plaži posebno triba svako malo gledat u stvari, ovo višje nisu vrimena kad si moga ostat u more i po dvi tri ure i niko ti ne bi ništa dira. zapravo, na sve triba pazit jerbo kredu di stignu. najobičnija je lupeština ukrest takujin u tantobusu oli kojen drugon konfužjunu, a kredu i dicu, ljude, beštije, tekniku, tonobile, brode, umjetnine, zemljišta, državni proračun, otoke i potoke, tuđu ženu/curu i muža/momka, ma nima šta neće, e... brez obzira ča pulicija govori o nikin brojkama kojima iskazuje smanjenje kriminala, meni se pari da nikad gore nije bilo. na sve triba pazit, život je posta ča se tega tiče krajnje nelagodan. jedino nismo te sriće da nam niko dođe ukrest vrle političare. njih niko neće. život tako gre naprid puno lipo i šesno. je, je, iđemo dalje, e... nima šta. a di je nesta čovik? i misto za čovika, a?

iz porta by XVII

 jidro, more, nebo - iz lipote koluri by XVII ; slikano u peti misec, klik za veće

e... jučer nikin fureštima nikako nije bilo kjaro zaradi čega ne moredu tonobilon u palac o' cara dioklecijana. uspilo nan je ubijedit ih da tonobil ostave na solinsku, more bit da su tek poslin svatili zaradi čega je to tako. jema tega još. recimo, svako malo me priko interneta niki furešt pita ovako nekako: najprvo mi reče  da je čuja da ovod u nas u split jema nika palača u koji živi grad. i uvik ista pisma, ne viruju da je to moguće. kako? zaradi čega? znate šta im rečen, a? dođite i uvjerite se, je, mi ovod u split jemamo palaču, štiti je unesco, a u njoj stvarno, virovali oli ne, živi grad.

evo tek nikoliko litrati o' jutros. sve by XVII, klik za veće. pridzadnji litrat i oni prije njega - rodna kuća jakova gotovca.

Najveća prepreka na putu do sreće je očekivanje još veće sreće.

Bernard de Fontenelle

e...

čeprkan ovih dan, kad uvatin bokunić vrimena, po svemu ča drži moja šigureca sićanja, ništa ispalo nije, ma ke... mogli su nan učinit oni zločin o' rive i onu marmontovu brez bokunića šesta, dovest divlji svit ovod, činit nas šapjat spliske riči, ma kontra moje šigurece ne moredu, e. ona je o' najjačega materijala na ovu zemaljsku balotu i bolje mi ona drži sva ta sićanja , vengo išta na svitu, vengo da ih stavin u kakvi škafetin kantunala oli armeruna oli vežen konopon i dobro zagropan na sto misti, e... drži ona meni sve briškule i trešete iz mladosti, sve karike, svako akužavanje, e... drži i lišine jerbo dikad i š njima moš štagod dobit ako jemaš šta u ćivericu, e...  sve je tot: grad, judi, događaji, riči, pisme, spiza, radosti, tuge.

dikad ću, kad san o' volje, notat ovod rigu dvi o' tega šta šigureca drži, dikad ću dat koji friški dan, dikad koju dobru staru užancu. kuco činit neću, e... ne pada mi ni na kraj pameti, e... je da su puno gruba vrimena, pogotovo za poštenoga rvata i splićanina ča živi u rvackoj o' svoga rada, ali ko je vidija činit kuco, a? reč ću ja uvik ča valja i ča ne valja pa neka gušta oni ča mu je drago, a  oni ča mu ni pravo neka upre na botun x u desni gornji kantun, e...

---------

ekola, to je to, ovo je odgovor na pitanje ča mi je arivalo:

a očeš li napisat još štagod na onu stranicu, a?

opće mi nije kjaro jerbo ovi blog gre skoro svaki, svaki drugi dan, možda je ferma svega nikoliko dan, ali eto, pita čovik, a ja odgovaran, e...

e...

split - omiš, 7. put - vozila moja malenkost, narafski.

sigurno, dobro.

instruktor je bija zadovoljan, a i ja. suputnici isto.

instruktor je bija i mrvicu bolji po pitanju priča, aj, popravlja se, vidit ćemo šta će bit do kraja.

lipo svi navijajte za me i bit će vozačka...

e...

kako donosimo poslovne odluke?  analizirajući grafikone o dobiti kompanija, mnoštvo informacija koje se mogu naći u časopisima, na internetu, raznoraznim info servisima i sl.? slušajući šta nam je neko o nekoj firmi oli prešoni reka? slideći niku svoju zvizdu?

kako ćete se meni recimo svidit da vas zaposlin oli da surađujen s vašon firmom? zanemarimo sad minimalne zakonske uvjete (npr. stručna sprema, ovlaštenja za neki posal i sl. - recimo da to sve jemate, brez tega opće nećemo pričat)

e, znan, mnogi su sad kurjoži, ali moren van reč da konkretne ricete i nima baš. šta mi se kod nekoga svidi, kod drugoga će mi bit antipatično.

u jednoj san firmi recimo vidila luksuzni ured, tot nije samo luksuzni ured, koješta se tu vrti oko velikoga luksuza, dolaze tot i svitski bogatuni, dogovaraju se bitniji poslovi. ti dan je padala kiša i pitan ih ja da di ću stavit lumbrelu. odgovorili su mi da pođen u kondut i stavin je u lavandin jerbo se eto još nisu sitili kupit stalak za lumbrele - narafski, posluju godinama. radili smo š njima sasvin ok, ali ti stalak ča ga nije bilo je na me ostavija dubok trag.

u mom malom poduzeću jema stalak za lumbrele, dapače to je bila jedna o' prvih stvari ča ih je moja malenkost nabavila kad san počela poslovat. zaradi čega? zaradi tega da se jema di stavit lumbrela. lumbreli nije misto u lavandinu, e...

može van se recimo dogodit i da pođen na vaš web. sve je lipo, šesno, ne radin tek jedan link. e pa taj link van more donit budućnost brez suradnje sa menom. jerbo, ako je važan, a vas nije bilo briga je li van sve radi oli ne, kako ćete onda meni posal napravit kad ni na se niste znali mislit, a?

svašta nešto je još u igri. ne daj bože da vidin maču na kolarini oli koletu o košulje, reputacija odma pada.

u svakon slučaju, more se dogodit i da vam je ured tiptop, da ne fali stalak za lumbrele, da svi linkovi besprijekorno rade, da je sve čisto i uredno, a ja i jopet odustan o' suradnje s vama.

kako sad to, pitat će se niki? e to znači da mi je nešto reka i moj unutrašnji špurijus (kod žena je to jako izraženo - mene u poslu vodi i vidin da malo kad falijen kad njega slušan, a kad ga ignoriran obavezno falijen) i da mi je jednostavno ne sviđate. ne šmekate mi, niste mi dragi i šta sad, e... asti sto, pa ne moran se ni ja svakome svidit, e...

eto, zaradi tega mi je  (unatoč svim problemima koji idu uz privatno poduzetnišvo u rvackoj) baš dobar moj posal. ako mi neko nije drag, ne moran radit š njim. i to je to. sve dekrete ča stignu, jednostavno moren užgat, ne financira me njanci jedna  partija ni mafija, moren samostalno donosit odluke, a to donošenje se sastoji od čitavog spektra pojmova, katkad ću napravit kompleksnu matematičku analizu neke firme, katkad ću jednostavno pogledat samo očale moga sugovornika i zaključit jesu li čiste i stoje li mu/joj dobro na nosu, moj nos će mi reč: jeeee, s ovima oču radit, e...

cvit by XVII - klik za veće

oduševija me danas, procvita tek svakih nikoliko godin, a dura jako kratko. pari mi se ka i sve šta je lipo...
 

zlatna vrata - slikano danas, lipo ih je konačno vidit brez kojekakvih krpetina