e... kapetane, tribali bi doma. ši, jedan bi kapetan triba uzest u ruke timun i vratit brod doma. ova pisma gre baš za njega.

[video je murter, otok sa kojega je moj otac. ča godine višje gredu uza split doma smatran i taj otok, ali i zadar, rodni grad. na ta tri mista se ćutin posebno, ka kraljica, a ostatak dalmacije isto volin, da mi niko ne zamiri, e...]

a da mi se šjor kapetan bolje pripozna, neka lipo pogleda spot do kraja. sićaš li se litrati ča san ti ih učinila u betinu, na moru, kraj brodi s latinskin jidrom, a? dobro si osta iako si grinta i kara se cili dan. dobro, aj, ne cili, ali barenko po jesi... je, je, o tebi govorin, mirno ti bilo more, neka te čuva dragi bog...

e... finija je 7., triba se vratit. klik za veće. sve by XVII 

e... cool. samo to slušamo i čitamo tu rič, di se god okreneš cool. ča to oče reč cool, a? to je nova rič, sigurno vuče povist iz našega jezika, a evo ča sve moderan čovik triba jemat da bude cool.

najprvo, objavljenu kuvaricu. jeste li sinjali koliko je poznatega svita objavilo kuvaricu, a? željka ogresta, emisije kužinavanja kod ane i njena kuvarica su već općepoznate, sad evo gledan jednu o' zlatka galla i študiran pohane dagnje (ne pari loša riceta, me ke, e, probat ćemo to učinit).

najdrugo, vlastitu televizijsku oli barenko radijo emisiju, a more i kolumnu u kakve foje. svak tako danas jema emisiju,  neda makjanić kunić, nataša bebić itd.

najtreće,  modnoga stilistu. e to je izmišljeno da bi oni šjor ča ga zovu modni mačak jema šta činit.

a mi, mlaja, internetsko-teknička generacija, a? ča mi činimo, a? jema i u nas riceti, a kako se pinezi tribaju ulagat u posal i uvik u daljnja učenja, našli smo jeftiniju varijantu o' tv oli radijo emisije, a to je nađi besplatnu oli zakupi domenu i izrazi se. sve moš stavit tot, vers, štoriju, litrat, video, crtariju, slikariju itd. narafski i ricetu. na tebi je kako će to sve skupa izgledat, ne tlači te nikakav producent ni urednik, a ako sve skupa napraviš dobro, dogodi ti se ka meni da te na kraju judi počnu fermavat nasrid ulice i da ti reču: ma skužajte, ne bi tija gnjavat, ali naša san vas na oni internet i sve redovito čitan i pratin. najprvo ujutro ka otvorin joči gren na tu stranicu, pa tek onda dođe drugo na red.  ni mi krivo, me ke, samo čitajte, e... a moda, a? e a šta će meni sad tot niki modni mačak, a? oden ja u koju butigu ča prodaje jednostavnu sportsku robu, ka ča je hervis oli turbo sport, proban dvi tri maje, vidin ča mi paše, platin i dok dura dura. narafski da neću složit karo i cviće, crvenu i ružičastu koluru, obuč se ka afričko papagalo. zna se ča se slaže, a ča ne i ča se mene tiče modni mačak bi doša na inkanat.

jesan li onda cool, a? niman objavljenu kuvaricu, ali jeman ricete na netu. niman emisiju, ali jeman www.xvii-online.com . niman modnoga mačka uza se, ali jeman zdravu pamet - fala ti bože da je tako, pa u mene nima pornića, gole gujice i čiča na litratima, seksi memoara i sl. to vam je svitu moj isto danas cool. oli niste sinjali kako i to svako malo nika poznata čunka učini i onda nađe ko će joj ukrest mobitel, istrest škafetin i sl. i plasirat to u javnost, a?

navit ćemo i jednu cool pismu. e bravo, klapa, to je danas isto cool, jemat klapu, e... narafski to nije ni loše jerbo će se onda pojavit i puno dobrih, zna dosta svita ovod pivat, e... aj gren ča, jemate pozdrav, guštajte i razlikujte pozitivni i negativni cool jerbo razlika je bitna.

e... negdi kraj mora ovih dan čitan libar o kojen se u rvackoj vijest prosirila brzinom svitlosti. je li mirita, a? došla san negdi do pola. jednostavno, iskreno, životno, pitko, humoristično onda kad triba. virujen da će i do kraja bit dobar.

Mirjana Krizmanić - Tkanje života

e... ajmo ča još malo u zadar, tija bi ti prići - klapa lanterna

[e, ostavija tebe, izgubija sebe...  ]

e... more se upravo na rvacki sabor čut da će ozvizdit još poreza i nameta na brode. ši, neka pukne na one luksuzne jahte na kojima njihov lipi i šesni sanader vata vitar, niman ništa protiv. da oče to bit tako, ne bi me bilo opče straj. ma ke, e... vengo se sve bojin da jopet ne izi vuk tovara.

kako će se tretirat recimo ovakav brod ka ča je na litratu, a? ovi ča je za puno luksuza, e... luksuza ča se zove priživljavanje generacija. luksuza e jerbo ča jema rvacki čovik živit ovod, a? neka se gubi iz ove zemlje, neka gre di god oče, rvacka država nije za rvackoga čovika, a ako baš gnjavi i oče u njoj bit, onda će mu to bivanje tot nazvat luksuzom, e... 

koliko, a?

sve se bojin da ćemo na kraju moč brode samo gledat u marmontovu na izložbu, a sve ostalo će nam narodna vlast proglasit luksuzon i onda će narafski priko njih ubrat pineze da sebi mogu vazest bokun barčice o' nikoliko milijunčića eurića jerbo ča mislite da će takva bagra stat priko lita doma i točavat noge u kajinu, a? 

litrat i riči by xvii

e... ona peršona ča je nikidan pristojno zamolila odgodu plaćanja je brzo pristojno ponašanje zaminila u nepristojno. nisan ja te sriće da dugo bude pristojna, e...

onda me je tokalo vodit pravu bitku za naše pineze. jesmo je dobili, a? narafski da jesmo, a bahata peršona koja nas je išla zahebavat je narafski član partije zvane adz - zna se. obavlja jednu funkciju u našu lipu dalmaciju, a financiramo je mi porezni obveznici ove zemlje.  na temu radnom mistu bi tribala jemat i bokun višje skule vengo ča jema, ali nima veze skula. kome triba skula, a? podobna je, prolaze joj sve monade, pa misli da joj je i kod mene sve dopušteno.

je, kako da ne, našla je ta adzeovica crikvu di će boga molit, e... ogadila san je temeljito, rekla dvi tri riči o stručnosti koja je meni važnija od podobnosti, upitala di joj je moral, diploma, itd. i na kraju pineze je dala.  

ča se mene tiče, zaradi tega ča se ponašala brezobrazno nećemo joj drugi put radit, rekla san joj da joj višje ne padne na pamet doč u nas. neka se misli di će nač dobavljača, a ja ću evo navit još i mužiku o' sriće ča višje za takve nećemo radit...

e, bravo, o' aktuelnoga palo mi je na pamet i da se sitija i sjor kalmeta apropo ferate večeras na tv zborit o stručnosti. a bolje ikad vengo nikad, e... ši, možda jednom stručnost stvarno bude važna, možda jednom hrvatska stvarno bude zemlja poželjna za življenje... nadan se ipak da ćemo to doživit, da će to bit prije vengo nan otvore oni teštament ča gre na kartu kod advokata u kojega i nećemo puno tega napisat jerbo uvatila su govna i vitar i pineze, nakesali se, a ti se narode prpaj i misli kako platit letriku svaki misec.... ipak, višje vridi dobar glas, vengo zlatni pas. znan to, a zna i svak pametan. oni brez ćuka u ćivericu ne zna, pa zaradi tega i mora dat petama vitra kad zagusti da bi bože moj brez stida i srama vata vitar...

e... ajmo ča dan počet nečin lipim, našla san ovo još nikidan na internet, ali pomalo, svaki dan po nešto, e... klapa lučica jema spot za pismu sudamja, pogledajte obavezno, mislin da će vam se svidit.

e... neki su me danas naidili, a neki i oraspoložili. gren mislit na ove iz druge grupe. evo, lipo je kad čovik zna zafalit. arivala nam je zahvalnica ča smo donirali neke pineze za dicu. mi smo malo poduzeće, donacije su nam simbolične, pa i jopet nam je drago kad se zafale. 

http://www.uhddr.hr/ - Udruga hrvatskih dragovoljaca Domovinskog rata je dostupna preko linka.

e...

notat ću spoznaju o istini do koje san došla večeras gledajući u more i brode, one ča su vezani i misleći di je jedan o' onih ča su odrišeni.

[hm, more bit da jeman još šta kruva izist (e, ovako uvik, cili moj život govore moja mater i otac: čerce, jemaš još šta kruva izist, jedan dan će ti bit kjaro) , more bit da još ne znan sve, more bit da ča je višje godin da jema i višje mudrosti u ćivericu.]

ča san zaključila, a? evo ovo, e:

istina je oko nas, ši, ma ne mora uvik bit onakva kakva nam se pari, pogotovu ne onakva kakva nam se pari na prvi balun.

sutra je u našoj zemlji dan žalosti apropo poginulih u feratu ča se izvrnila i sutra nećemo ovod navijat mužiku.

danas gre nešto dobro o' dragih zadrana. fala in ča su učinili ovu dobru pismu. more, ne pini zbog nje.  

more, prijatelju moj doša san ti se opet ispovidit...

• za čitanje: počela san čitat libar ča se zove drugi libar marka uvodića splićanina, izdanje iz 1952. pa to vridi puno jerbo ko more platit stare riči, žute stranice. guštan.
• za gledanje i slušanje: jopet libar marka uvodića, gre nediljon pozapodne na tv ka serija ča smo na ovemu svitu? nije mi kjaro zaradi čega je ova serija bila zanemarena tj. zaradi čega je nisu dovoljno davali na tv.
• za slušanje: otočni radijo kornati, u split ga morete slušat samo priko interneta, ali bolje i to vengo ništa (www.ork.hr)
• za izist: tingulet, baš san guštala.
• za guštat posebno: ujutro najranije poč plivat, barenko po ure, ka ja danas.

e... evo ovo je jedan moj kumpanjo. zove se More. inače, ovo je slikano u split, na merjanu. za doč ovod najprvo san vozila tonobil, a poza tega san dugoooo hodala, ali mislin da moj trud mirita. lip pogled, odlično banjanje.  ko to more platit, a?

- bit će u split sad nima ni pasa, a? evo da su svi utekli na škoj oli u vlašku. - reče mi jedna peršona ča dugo živi vanka i pamti split o' prije 25 godin...

e...

nismo mi domaći te sriće, ma ke... vlaji su narafski naučili plivat, pa im je sad bolje točavat gujicu u moru vengo u vlaškoj, a još su doveli i svu svojtu ča još ne zna plivat na litovanje da nauče i oni plivat.

neka svita, meni ne smeta niko, samo neka se kulturno ponaša. 

neka, e, ma isto čekan ka malo dite dida mraza da ovi konfužjun laška, da jeman valu za se, da ne bude ovi pakal o' arije, vengo ugodno.

furešti su arivali iz cilega svita, a najviše i jopet vidin onih iz susidne države/država. tot jopet jema plivača i neplivača. nađe se i onih iz srednjeg sloja ča će potrošit koji šold na mineralnu, a vidiš digod i kojega bogatuna - e, tot jema svega, oni ča jemaju pinez u split povire natankat gorivo pa via pakleni otoci oli kornati, more i mljet, lastovo, đitica prava, a jemaš i ove ča floćaju da jemaju pinez, a da ih okreneš naopako ne bi iz njih istresa deset kuna.

kod domaćih ča su domaći friško postali je moda da se brodima se gre na bene (ne moren svatit nikako ko jema volje odrišit brod od 12 metri i onda š njin na bene, ali eto)... furešti su još bolji, dosta ih je sidro bacilo u porat i ko im šta more.

po gradu je isto tisno, svi stisnuti ka srdele.

jo, da me ne toka radit, šta bi to bilo lipo... utekla bi daleko, ne bi me uspija upratit ni ministar šuker priko oiba. našlo bi se bokun barke, kapu na glavu, očale na joči, more, sunce, cvrčak, tunja i koja riba i eto... aj neću višje grintat jerbo neko će sad reč da se kuva u zagrebu, a da ja u split jopet jeman more...

bokun lada i misto za šugaman je najtraženije ovih dana, konfužjun, mista njanci za šuferin.  eto tako prolazi pakleni sedmi misec u split, a da će sve ovo donit neke velike pineze i neće, e... jedva čekan osmi. ma šta osmi, deveti, e...

svi litrati o' jučer, by xvii, učinjeni mobitelon, klik za veće...

e... možda san ditinjasta, beskonačno romantična uzduž i popriko, možda još uvik u jubav virujen, recite šta god očete... našla san jedan članak na www.dalmacijanews.com i iako baš i niman užancu prinosit tuđe tekstove, ovi oču.

Iako s ponešto zakašnjenja, ljubavna priča Britanca Stevea Smitha (42) i Španjolke Carmen Ruiz-Perez (42) završila je sretno, jer ih je ponovo spojilo ljubavno pismo zagubljeno 17 godina iza kamina, a pronađeno kad je obnavljana kuća.

Smith i Ruiz-Perez upoznali su se prije 17 godina u Devonu, gdje je djevojka studirala. Zaljubili su se i zaručili, no veza se raspala kad se ona radi posla odselila u Pariz.

Nekoliko godina poslije Smith je pronašao adresu njezine majke u Španjolskoj te joj napisao ljubavno pismo u nadi da će obnoviti vezu. Majka je pismo stavila na kamin, no nesretno je pismo skliznulo iza kamina te ondje ostalo godinama čamiti neotvoreno.

U romanima bi takva nesretna okolnost izazvala dugogodišnju nesreću i oboje bi se mladih ljudi nesretno vezalo uz pogrešne partnere. No kad je pri obnovi kuće Ruiz-Perez pronašla pismo, ohrabrila se i nazvala staru ljubav, te su se dogovorili da se susretnu u Parizu i već u zračnoj luci potrčali jedno drugome u zagrljaj.

Par se vjenčao prošli tjedan, piše Times Online i podsjeća na roman Thomasa Hardyja "Tess d'Uberville" u kojem je zagubljeno pismo bilo izvor nesreće i gubitka. (H)

http://www.dalmacijanews.com/Magazin/Magazin/tabid/73/articleType/ArticleView/articleId/10669/Pismo-naeno-nakon-17-godina-spojilo-ljubavni-par.aspx

e... mislin da i ova pisma mirita pohvalu.

u koluri srebra by xvii

e... ovi mi se novi dil matejuške baš sviđa, pa san jutros jopet bila malo povirit tot...

e... ova odlična pisma je već bila ovod, znan, ali mi je toliko draga da gre jopet i to verzija sa službenim spotom. odlično, za sve pohvale...

mirni litrati:

http://www.flickr.com/photos/xvii_st3/sets/72157621679164512/

e... ka ča znate volin hodat. tako san danas ostavila twingića o' isprid kuće i otišla na noge pinku se smočit na kaštelet.

neki mi govore kako moš na noge, ja bi vozija, ali tonobil je vazeja brat, sad je još naša i curu i pitan se kad ću doč na red za vozit tonobil, gospe moja itd...

odgovor je jednostavan, mogu jerbo volin hodat. kaštelet nije na kraj svita, tonobil jeman i vozin kad mi triba, za benzinu isto fala bogu jeman, vozačku jeman, ne moran s nikin ni dilit tonobil, ali eto, vozin kad mi se vozi, hodan kad mi se hoda... ne razumin ča je tot čudno, a?

kad san se vraćala doma peškala san mobitelom ove litrate - sve morete uvećat klikom. čovik je ovod u vezi s morem i tot se ćutin lipo... 

eto, bolje da je tonobil osta o' isprid kuće, ne bi bilo ovih litrati da san išla njin.

je, ši, na matejušku je lipo, ali gren reč da ćemo uputit apel šjor poteštatu: šjor kerum, naredite škovacinima da tot čiste. narafski i triba reč građanima: ne itajte tot škovace, grubo ih je vidit, smetaju ovoj lipoti. 

ekola, gren pomalo ča, jemate pozdrav!

matejuška by xvii, slikano mobitelom, klik za veće

e...

jutro: jubin svoju mašku, ćiću, jema rođendan.  zvonimirova oliti bivša prvoboraca je puna tonobili, konfužjun, smjena furešti. vidila san to kad san išla za poslon.

dan: dan je pakleno vruć, razladila san malo twingića u praonici blizu kuće, a poza tega i sebe u moru (koliko se moglo -  more je teplo, bilo bolje da je mrvu ladnije) bokun dalje o' kuće. brodi su išli prima marini kaštela, jedan za drugin, vrime je da se vrate i poza tega nekome drugome u izrentaju, konfužjun, smjena furešti. (inače, kako dosta radimo s ton marinom, pozdravljan sve tamo).

e  sve nika priša i smjena danas, samo nima priše za meni platit račune. ipak, danas je veliki dan, poza skoro pet godin rada dogodilo se da je jedna peršona čak pristojno zamolila bokunić odgode plaćanja, obično su svi bahati i napuvani, a onda im ja s posebin gušton ne dan mrdat dok račun ne namire.

večer: nećem danas vanka, jema dobar film na tv, a triba i odmorit malo. jedva čekan da ferma vrućina, da more bude za razladit se, a ne za skuvat se, da na kašune bude uvrj glave pet svita, onih ča istinski vole more,  da bude 28 u ariji, da dođe 8. misec koji eto višje volin vengo 7., da pođen na nike izlete, ufff, da ono da ovo, aj prikidan grintat ;)

navit ću jednu lipu pismu, ajmo ča malo do zg da nismo uvik u st... nađe se i tot dobrih stvari... ekola, gren ča, prođe ovaj dan...

u fili za sriću by xvii, slikano mobitelom, klik za veće

e... za one ča ne znaju evo tajne. viruje se sa kad se takne palac šjor grgura ninskoga srića ariva oli takni palac i želju zaželi...

e... meri cetinić and black coffee, svaki komentar je suvišan...

latinsko idro by xvii - posebni pozdrav posadi broda, s obzirom da su baš šesno pozirali uza samu obalu, ali eto ovi litrat je bolji  :) 

a uza samu obalu more  je bilo ovako... ko ovo more platit, a?

e, evo i mene, da se posada broda siti ko ih je slika, e...

svi litrati by ja osin ovega di san ja :)

ekola, gren ča, pozdravljan lipo!

e... vrhunska pisma ča je već bila ovod, sad ćemo bokun prominit izvođače, pa će i jopet bit dobro... 

e...

moja jubav matejuška jema novi dil lipo i šesno uređen. kad nekoga voliš, gušt ti ga je gledat kad je lip, sritan, šestan. sritna san zaradi matejuške. mislin da će me ovod bit, da će se lipih uri tot proživit, dobrih versi notat, učinit lipih litrati. svaka čast šjor šegviću, odlično, po mome guštu...

xvii i jubjeni grad, evo ka i uvik, negdi san kraj mora... 

e...

sad gre jedna emotivna i jedna vesela (vesela vonje na murter na koji jedva čekan poč, brojin dane, bit će valjda, hehe). ovako jerbo ćemo sad nešto obavit ča moramo apropo posla, a onda palin motor i gren plivat. more plavo zove me...

ala lipoga dana, ajmo ča nalit benzinu, pa kad san već u spinutu i malo do merjana.

ja san slikala lipi litrat, a neko je slika mene (litrate narafski morete klikon uvećavat i temeljito proučavat). ko, a? ma vidi kurjožih, a? a neću van reč, šta morate sve znat, znatiželja je ubila mašku, e...

eto, oli za sriću puno triba, a?

vidi lipote, vidi raja na zemlji.

i je, ši, to mi je jedna od poduzetničkih kapa, e...

crvena, e, jeman i modru.

e i neka ne bude đeložih jerbo uvik rečen da pomorac i poduzetnik more bit svak - postoji samo jedan uvjet a to je da nisi linčina. e oli je teško učinit matrikulu i ukrcat se na vapor, a? na brodu uvik posla jema. isto tako za nikih 800 kn morete otvorit obrt i počet radit, niko van ne brani... 

a ko radi taj i jema. i za benzinu i za kapu i za maju i za gače.

e...

život voli bit kurbin sin. baš zaradi tega ča je takav, masu šansi ča su (na bilo kojen polju života) tribale bit moje su nepravično otišle drugome. nima veze, ne dan se ja, neka me nevere šibaju, nisan jedina kojoj je tako. napravin ja šansu od čega drugoga i bude jopet dobro, čak bolje vengo ča je moglo bit da je realizirano ono ča je ka tribala bit nika šansa a ča mi je nepravedno ukradena.

ka ča san rekla nisan jedina. evo slušan jednu pisma sa splita 2009. ča je višje vengo vrhunska, ali nije bila na završnoj večeri. nima veze jerbo narafski da će splićani (a i ostali ča vole dobru mužiku) slušat, volit. e a neću /mo valjda slušat cajke, e... živija urbani đir!

bravo za harija, sve su mu pisme dobre, jedna bolja o' druge...

ča van još moren priporučit, a? libri, e... evo sad čitan jedan ča je tribalo i prije pročitat, ali nije se stiglo, pa ga sad guštan - DAN BROWN: Da Vincijev kod. film san isto gledala, libar mi je bolji. živili libri!

a šta još jema novega, a?

ništa posebno, radin, neće niko za me, a ja ne bi ni tila da je drugovačije. ćaća mi fala bogu nije pokra škver, a mater mi fala bogu nije opljačkala rvacku, pa neću ni ja krest, bolje je radit i zaradit, je li tako, a? zapravo oni ča more kroza život ič pošteno i gre pošteno, oni ča ne more gre krest. svi bi bili bolji ljudi kad bi mogli. svejedno ih neću žalit i gren reč doli lupeži i kurbetine! 

dakleM, radi se s tin da liti narafski jemamo posebne režime (rad + odmor), ali sve uredno gre naprid. u moju firmu se tako neće smanjivat plaća, a ni honorari. a šta s pinezima, a? e a duperan ih ka i svi za priživit, platit letriku, internet, vazest benzinu, postole, boršu, štagod izist i tako to.

a ča još, a?

e meni ne triba puno, nisan fala bogu tajkunica. jema i drugih vridnosti,  u životu zapravo materijalno najmanje vridi. živile prave vridnosti!

ipak, neke stvari čovik bi volija jemat. e pa trenutno  jema još samo jedna stvar na ovemu svitu koju niman, a tila bi je jemat. šta, a? eee Brod. bit će i to, samo daj bože zdravja, pa će bit i rada, a kad jema rada jema i pinez oli para. živija privatni sektor! tot teta pašteta ne more ništa smanjit, hehe.

e bravo, evo i pisma, to je ona ča je kurbin sin o' života nije stavija u finale, ali je bolja od mnogih ča su bile tot. ekola, gren ča, nastavljamo drugi put... pozdravljan lipo!

 e... a govorili su ma šta će gibo, oli to šta vridi?

je, je, a slušajte mužiku... i gledajte spot. ja mislin da vridi puno.

e... sićate li se tome, a? tome bebića, e... onima ča vole tomu ova bi pisma tribala značit.

e...

twingić je vraćen u moj kvart (ovo oče reč popravljen, preuzet iz autokuće, dovezla ga u kvart), a ja umisto da njin danas pođen na more gren među formule i to hitro jerbo triban riješit nike zadatke iz električnih strojeva. sic se višje ne kliže po šini, sredili su u gašperova sve super, fala im lipa. dakleM, ponosna san na sebe da san se dobro snašla i pažljivo vozila kad je sic počeja pravit nered  (šta je bija pravi poduhvat s obziron da mi je to bija prvi put da brez ikoga gren u promet, a išempjalo bi i iskusnijega šofera) ka i na to da se poza tega nisan junačila vengo san zvala vučnu službu. ajmo ča dalje, na to višje ne triba mislit, sad ću mislit na s oliti klizanje kod asinhronog stroja - za neupućene zaostajanje rotora za okretnin poljen statora... eto, tako je kako  je,  triban radit, a poći ćemo na more neki drugi dan, bit će vrimena, neće more uteč.

e...

s obziron da san u žutu kuću na vrj tolstojeve,

prikovišje blizu te riječke,

dobro san zaključala vrata...

žunta: jema dobrih komentara, baš sve govore.

e...

• možeš izist ka prajac i poslin se čudit odakle kili, a možeš i reč ne, ja neću sašit dva pjata paštafažola, dosta je i jedan, sam(a) odlučuješ.
• možeš po plaće proarčit na španjulete, a moš je i jemat u takujinu, sam(a) odlučuješ.
• moš bit trizan, a moš bit i i pijan ka šlapa, ali tome si i jopet sam kriv(a), niko te ne tanta da bumbiš, sam(a) odlučuješ.
• moš bit drogiran, nesritan, bidan, a moš živit i zdrav život, sam(a) odlučuješ.
• moš finit skule, naučit štagod, postat nešto u životu, a moš i past prvi o' pučke skule, sam(a) odlučuješ.
• moš bit pošten čovik, a moš i krest, sam(a) odlučuješ.
• moš jubit lipu i dobru ženu koju voliš i ča te voli, a moš bit i s nekon zločeston ružnon višticon ča do podne mrzi sebe, a od podne tebe i sve tvoje, sam odlučuješ.
• moš raspalit po gasu i otič u vječnost na prvon stupu ča ga trefiš, a moš i vozit ka čovik, pa bit živ, o ovome konkretno (jerbo jema i drugih situacija di ne odlučuješ) sam(a) odlučuješ.

itd.

kad se mrvu bolje promislin, za puno tega vridi:

sam(a) odlučuješ -

znači skoro pa da nam je  jušto kako sami očemo da nam bude.

koješta moremo i prominit, ne mora ništa ostat do pemzije u nikoj lošoj, nepovoljnoj situaciji.

u ponediljak san recimo donila novi tapet u ured, stari višje nije bija nizašta i odletija je u škovace. novi je ludilo, vidit ćete kad dođete do moga ureda. a kako san ga prominila, a? lipo. vazela skalpel u ruke i staroga iskidala bokunić po bokunić, s puno pacijence. puno toga moreš prominit oli se riješit ka ča san se ja rišila starega tepisona tj. pacijencon. narafski, tribalo je bit i uporan, jemat volje. istina, nike stvari moš riješit i brzinskim operacijama, ali jopet oko svega triba donit odluku. odluka je vrlo bitna, neće niko uspit prestat fumat zaradi tega ča to neko drugi oče, vengo kad to sam oče. da, da tvoj je to život, o njemu oko dosta stvari možeš donit dobre odluke, možeš ih sprovest u djelo, možeš prominit ono ča nije dobro. sam(a) odlučuješ, nije baš uvik i za sve neko drugi kriv. sam(a) odlučuješ, zaradi tega napravi svoj život lipim i posebnim.

e...

čitan ovih dana apropo festivala po fojima, te rozga pokazala mudante, te poteštat kerum posla novinarku u niku stvar, itd. moš mislit velikih i bitnih vijesti. neš ti, e...

oli nije važnije da je zorica i ove godine bila vrhunska, a?

e pa kako www.xvii-online.com uređujen ja, ovod ćemo to istaknit ka nešto bitno. gre zorica, guštajte, pisma je super!

e...

danas me je poslovno nazvala jedna peršona koja je nekoć pomogla dvi zločeste peršone kad su činile zmijsko leglo i išle me olajavat.  u rvackoj vas naime svako može nekažnjeno olajavat, klevetat, vriđat i tome slično. e a more vas svak nekažnjeno  i pokrest, natuč, ubit, pa kad sve to more a šta vas ne bi nekažnjeno i olajava, kleveta, a?

toj gospoji je danas bilo nešto jako bitno i prišno riješit za posal. eto jema me obraza zvat, a šta ćemo, takva je kakva je, za sebe je, nije za me, e. napomenit ću da je osobno njanci ne poznajen. kako onda znan ča je činila sa svoje dvi kumpanjonke, a? e  rekla mi tičica. zaklela se zemlja raju da se sve tajne doznaju. znan i to je dosta.

mogla san joj pomoć na način da ljude s kojima surađujem upregnen da rintaju ka konji i na način da zoven upomoć jednega moga kumpanja , inđinjera iz druge branše jerbo ja nisan o' te ča je njoj bila potribna.

a jesan li joj pomogla, a?

ne. nisan.

rekla san joj da je to prevelika priša, a da mi je ti kumpanjo koji bi moga pomoć sad u drugome gradu. to i je istina i ča se posla tiče to je konkretni odgovor, e...

------------

vengo,  kad se mrvu bolje promislin,  zaradi čega bi zaradi nekoga ko mi je  iša činit  zlo, na vrućinu uprezala ljude ka da su konji, a? je, malo morgen, nađi drugu budalu. eto, tako mi ni tribalo činit kužine, smišljat osvete, činit monade, došla mi je maca na vratanca ča bi rekli, e... 

svi putevi na kraju uvik vode u rim, dovoljno mi je bilo reč samo jedno jedino poslovno NE.

------------

poza tega razgovora san se ćutila dobro.

dobro e... jerbo,  nastojin bit ča bolja peršona, ali nisan isus.

e... ariva mi je prid svitanje  u san sasvin nenadano ka i nekad u javu. ne, nije bija noćna mora, me ke, e, iako mi je jednanput u nastupu bisa zapritija: bit ću tvoja noćna mora! i to pismeno, e...

bože sačuvaj, ma ja ne znan šta mi žene sve to istrpimo, progucamo, oprostimo, a?

odma san se postavila, nisan se dala išempjat.

rekla san mu krajnje ozbiljno: ako ćeš bit čovik, moš bit moj san. ako ne, biži odma ča. ne triba mi noćna mora, oču lip san, oču i lipu javu. budi ti noćna mora kome god očeš, ali meni nećeš, e!

i bija je dobar.

bija je to lip san,

nježan san,

san pun nade.

eto, tako je nada sasvin nenadano prid svitanje dovela zvir zvirsku u red.

u javi je to narafski malo teža misija. ne kažen nemoguća, ali teža svakako, e...

a šta je bilo poslin, a?

e a nada se sitila da je toka radit, pa se probudila i digla iz postelje. evo me sad u uredu, a evo i jedna dobra stara pisma. guštajte, lip je dan!

idila by xvii, slikano mobitelom, može se bitno uvećat klikom

e...

šta mislite di je ovo, a?

split, kaštelet, nasip.

idila, a?

evo notat ću vam ovod kako preživit sedmi misec u splitu. to je misec kad svi arivaju na plaže i domaći i furešti. konfužjun je poveći i to odlično koriste lupeži. da bi vam odmor bija odmor, a ne mora ne nosite na plažu pretjerano vridne stvari, posebno ako grete sami na more i nima vam ko pričuvat stvari. na stvari stalo triba bacit  joko. možda će na nekin mistima ka ča je ovo bit mrvu teže ući u more, ali ako ste dobar plivač i u formi, snaći ćete se i na takvim mistima ćete jemat mir. evo, danas je meni ovod bilo lipo, a samo par metri dalje su sidili jedan drugome na ćiverici. ako niste baš vični, nemojte se polomit. bolje je onda stat ne neko manje izazovno misto. pazite da ne izgorite na suncu, najbolje je poč ujutro rano na more oli kasnije pozapodne, nikako po najvećen zvizdanu. pazite da vas ne opeče vlasulja, meduza oli da se ne nabodete na ježa. ako se ježurka ipak dogodi, jema pomoći. virovali oli ne, piš piš na bokun bumbaka i stavit to na ubod. to će izvuč iglice vanka. sad će mi neko reč aj kvragu i ti i pišalina, ali sićan se da kad san se ka dite ubola na ježa, meni je moja pokojna baba isto ovo rekla i bi xvii spašena. odonda kod mene višje nije bilo muke ježeve jerbo pazin di gazin. ajmo ča dalje. triba puno vode pit, laganu spizu izist. isto tako laganu robu nosit. hodat po ladu. jemat španćjeru, kapu. očale za sunce. kremu za sunce.  jemat uza se prominu kupaćega oli mudantina, pa moš i duže ostat na banjanju ako te volja. nije loše u boršu stavit i malu lumbrelu kad je već vrime postalo ovako kakvo je. možda je bolje na more poč na noge vengo tonobilon. razlozi: sloboda, tonobil se ne prži na suncu, na tribaš crknit za nač mu misto itd.  ekola, gren ča, eto to su nike moje ricete, a ako nimate volje gucat konfužjun,  morete još ovih 25 dan do kraja sedmoga ostat doma, u osmome konfužjun laška i sve bude puno bolje. narafski, ko jema bokun brodića i odriši ga oli kakvu kućicu uz more, more proč puno bolje vengo u gradu, a sve to i jopet narafski ako ga ne toka i liti radit ka mene.  najvažnije o' svega je bit zajubljen. sritno po mogućnosti, ali ako ne more tako, onda more proč i nesritno. 

e...

koliko dnevno hodate? triba li tonobilon poč baš svugdi, a? evo moj je tonobil u servisu i još san živa. kako to, a? e a znan hodat, volin hodat, nije mi teško hodat.

Count your steps - Walk Mate

Your phone comes pre-loaded with a step counter. The easy-to-use Walk Mate application stays activated throughout the day. It keeps track of how many steps you've walked and how many steps you have left to reach your daily average health goal. Put your phone in your pocket and you're ready to go!

koliko ovo vridi, a? meni beskrajno, nima tih pinezi ni tonobila koji bi mi ovo moga platit. kako je još jutros lipo vonjala šuma, miris poza kiše, divota jedna. narafski, ne bi vam priporučila poč u ovakav đir u šlape. najbolje patike. kapa na glavu. jemat vode uza se i ajmo ča dalje. malo penjanja i stigli smo na put za pompjere. 

kad izađete na ti put, morete poč livo i desno ovisno o tome di želite doč. kako mi je danas uza hodanje u planu bilo i plivanje, krenila san desno. hodan, šuma, čista arija, pivaju cvrčci, sve do kraja puta praktički njanci jedan čovik. točnije vidila san ih jušto 3.

kaštelet, more, stine. kurjoži ste di, a? e ovo je oni dil ča gleda put vile dalmacije. nije drug tito bija šempjan kad je sebi to rezervira, ma ke, lipo je tot, e... baš lipo, e... parkirala san šugaman na stinu povrj ove dvi i bacila se u more. ajmo ča plivat jedno po ure. mate sad miruje jerbo je mobač na suvo, a ja nekako sebi brojin plivanje. dikad brojin zaveslaje, dikad odredin odredišnu točku, a dikad jednostavno plivan koliko mi se pliva. plivan svaki dan, počnen negdi u 4. misecu i to dura sve do 11. miseca. plivanje je zdravo i nužno ka i hodanje. plivate li?

čitan libar, sušin se, minjan kupaći, gren doma. upeklo je, a i ura je o' obida. ajmo ča hodat uz more, možda peškamo još koji lipi litrat. mate broji korake.

vengo, a šta bi slikavali samo plavo, a? evo i zeleno. zvončac.

 ajmo ča još malo, evo dalmatinskoga mixa o' koluri i vonji.

lavandu san uvatila na matejušku. uajme ča vonje. doma gren priko grada. o' spinutskih vrata, oko cilega merjana, kaštelet i doma (do stana, živin u širen centru) mate je izbrojila 10239. učinila san i bokunić višje jerbo san do tih spinutskih vrata i došla na noge. osin za plivat nigdi nisan stala. pet podi san učinila brez zapuvat se (u formi san pa se nikad ni ne zapušen). dapače, trčen uza skale, kako neću kad me za obid čekala manistra, odličan šug i pome. 

pozapodne ćemo šumprešat majce za iduću šetimanu, slušat kišu ako bude padala i odmorit malo. svakako će se još koji korak učinit, ali neću brojit. za danas jeman dosta. onoliko koliko mi triba za zdrav život. a koliko je to, sad ste čuli. to je praktički đir oko ciloga merjana.

ekola, gren ča, hodajte, plivajte, trčite, balajte itd. nije tonobil sve na svitu. jema toliko lipih stvari koje se moredu činit i brez njega.

 svi litrati učinjeni mobitelom, by xvii, klik za veće

e... ovako. bilo je božesačuvaj stvari o' kojih me zabolila glava i ne daj bože da ih višje čujen. a koje su se meni svidile, a? evo, špijat ću vam. ja bi tila da pobjedu odnese jedna o' ove 4. sve 4 su dobre, jedna bolja od druge.

• VRIDILO SE RODIT' – TEDI SPALATO i MUŠKA KLAPA FILIP DEVIĆ (T. Spalato-B. Slivar-E. Botrić)
• NEKA TI BUDE POSTELJA MEKA – TOMISLAV BRALIĆ I KLAPA INTRADE (Sikirić – A. Sikirić – R. Kazinoti)
• MALI PAŠKIN – ĐANI STIPANIČEV I KLAPA SV. JURAJ HRM (H. Rončević-H. Rončević-T. Eterović)
• KAD PODNE ZAZVONI – GORAN KARAN (Z. Mamić-M. Meić/G. Karan-N. Šiškov)

ekola, sad triba čekat rezultate. strpljen spašen.

po orija o' isprid fife by xvii

e...

mislila san notat štagod u ponediljak, utorak, ali sad čitan foje i vidin da je u prometnoj u tunelu pozapodne jedna peršona partila u vječnost. bog joj da pokoj.

vengo, jučer gren s mora na noge i vidila san ovo:

• vozi i mobitelaje
• vozi a lakat kroza ponistru
• vozi a virovali oli ne noga kroza ponistru, ona ista  kojon triba stisnit kuplung kad triba stat oli minjat brzinu
• vozi i obžderava se čevapima
• vozi i obžderava se burekom
• vozi i obžderava se batkom
• vozi i obžderava se sladoledon (iz škatule)
• vozi i spava
• vozi i ljubi žensku
• vozi i pipa žensku
• vozi i pipi ženskoj isprid sebe jerbo je fermala da ne satare dite
• vozi u suprotnom smjeru koliko ti pogled seže
• pritiče kolonu o' tantobusa i tri tonobila

itd. jema tega još. ovo je sve na potezu kašjuni-tunel. vrućina udrila uglavu, a?

narafski, kad vozin, svako malo doživin da vidin priticanje u tunelu i juriš kroza tunel. u tunelu nikad nisan ispod 50, dovatin i 55 i kontroliran sebe da ne gren brže. strogo se kontroliran i znan zaradi čega to radin. ograničenje je 50. iza mene svako malo bude neka ćelava nervozna glava, razbijački tip. nervozan je bidan, kasni na sastanak udruženja reketara oli lihvara i pipi i trumbeta ka da je smak svita jerbo je moj twingić zamislite u ton trenutku jema 54 km/h, a ograničenje 50. svako malo je tako.

a di su prometni pulicijoti? otkad vozin (u ovo ću kontat i vrime provedeno u autoškoli) jednega san trefila, snimija mi je ove zime tonobil na cesti split-šibenik, ali XVII poštuje ograničenja i vozi vezana pa me nije ferma.  da jednega san vidila, to je taj, e...

u doba nevaljanoga socijalizma je i zna bit koji na cesti. dignija bi lizalicu (stop, stani, stoj), pita vozačku i prometnu, gleda jema li pijanih i ludih u tonobilu.

danas u najboljen vrimenu na svitu ceste i tuneli nam izgledaju ovako, a svit gine ka nikad.

koliko li ih samo gre vozit brez vozačke kad niko ne kontrolira jema li vozač vozačku?

daniel wallace, krupna riba -

odličan libar, upravo ga guštan čitat i vama ga teplo priporučan

a za slušat, a?

u zadnje vrime u kasnije večernje ure, znači iza 10 oli 11 uri navečer, san sinjala da na radijo kaštela bude dobrih stvari, sve starije, odlično, iz vrimena dok je zemaljska balota jemala mužiku.

osin kaštila slušan još i radijo trogir, radijo brač, radijo riva, megamix radijo hvar, nautic radijo vis, radijo salona, radijo dalmacija, radijo split - da se na svin ovim stanicama štagod dobro nač.

žaj mi je ča ne moren uvatit radijo kornati , oko ovega triba još malo probat tražit (pa doč  i u šibenik, zaradi čega ne, a?) jerbo mi kumpanji ča često voze put šibenika kažu da je dosta dobar.

žuntica : otkrila san da se u ST more slušat priko interneta a i to je nešto

za izist ćemo u ovemu postu priporučit štagod lagano jerbo nije sad vrime o' paštafažola, e... dakleM, tikvice, danas san ih guštala lešo, a moredu se napravit na mali milijun načina.

ča se tiče marki je da jeman odličan kupaći o' neill , ali danas san sebi priporučila i jedan o marke adidas. našla jedan dobar, pa ga kupila, a štagod o' njih vazmen dobro je, te ćemo priporučit i vama.

ekola, radilo se od ranih jutarnjih sati, vrime je da vidin je li taj kupaći dobar i u moru.

zdravi i veseli bili, želin vam ugodan vikend!

e... jedna za laku noć. ujutro san u konfužjunu, pa će mnogima koji ujutro povire ovod ova bit za dobro jutro, a poslin ćemo vidit, kako stigen. svejedno, uvik dobra. guštajte!

e...

radin od jutros najranije, o' prije 7 uri. finili smo jedan poveći posal za turističku zajednicu grada kaštela ,  pa san ih ka novu referencu dodala u novosti od parametar doo i to zajedno sa još jednon referencon tomas & co doo . fala lipa na povjerenju, a posebno fala antoniji , damiru i ingrid ča su uložili nadljudske napore da se taj poveći posal za kaštila fini u malo vrimena. s obziron da smo i u šesti misec ka i svaki misec radili i za veterinarski institut , vet. zavod split, danas me je tokalo zvat šjor ravnatelja te institucije apropo posla. narafski da san se već čula oli pisala/čitala i sa djelatnicima s kojima se tribalo čut oli pisat. sad me toka nekoliko uri sređivat kartušinu, a to naprosto obožavan. itd.

eto, to van se zove urlap oli godišnji o' XVII. je li mi lipo, a?

jedva čekan koji izlet. twingića isto. virovali oli ne, čekan i veću plaću. je, je, jerbo zaradi čega bi samo lupeži u ovoj zemlji jemali pinezi, a? pošćjera uvik pitan je li mi donija obavijest. koju obavijest? - pita on. obavijest da će količina u buštu narest. bit će, kaže on, neće vječno ovako. i ja se nadan, pogotovo sad ka je sanader da otkaz. a jadranka? - sad će neki. šta reč, a? ta gospoja je najprvo govorila da je učiteljica i da je radila na radijo. poza tega se počela predstavljat ka diplomirana pravnica. mirakul, divota, lipota, iđemo dalje, nadan se ipak ne za iste pare. ekola, gren ča, kartušina me čekaaaa... ako to uspijen finit, možda pozapodne i trefin more, a to mi je najbolji dil urlapa. 

e... pivan jerbo događa se odlazak peršone

koja je mislila da je centar svita,

a ne znan samo zaradi čega, e...

pivan o' sriće...

gre ča sanader.

ma ajde,

bogu fala

i ne vraćaj se višje.

spasit će se hrvatska

i pošten svit ča u njoj žive.

btw, je li ko kupija oni bmw?

e... ovod su svi povezani s morem. masu svita tuče oli je tuklo more. moji momci su bili iz pomorske branše, godinama tukli more, pa poslin ipak našli posal na kopnu. moji kumpanji su pomorci. moji poznati su pomorci. pomorci su se danas bunili, bija je demonštracijun na rivi.

pita me danas jedan čovik ča je narafski pomorac (jerbo teško da šta drugo u dalmaciji more bit) da je li radin...

evo ča san mu notala:

dragi pomorci, jemate prav, uza vas san. uza svakoga kapa, svakoga noštroma, svakoga mornara, svakoga maloga o' kužine.

držite se i ustrajte!