slike san pogledala.

predivne su, cila mala priča.

eto kako u samo jedan dan moš

toliko lipote vidit u ovoj našoj lipoj zemlji.

by ingrid

-----------------------

evo, ovo je bija jedan sms ča mi je ariva apropo izleta.  nekako mi se baš svidija pa ću š njin ovod.

ajmo ča dalje... našla san patike, gače za trkat i rebatinke, vidi tekst o'  nikidan, ali i dalje priman informacije apropo tega i svega drugoga ča je navedeno. nikad ne znaš, uvik moš i još štagod povoljno i dobro nač, e... ča san vazela, a? sve tri stvari o' http://www.kappastore.com/it/home.asp . bija je niki sconto i sve to san kupila tako jeftino da san baš zadovoljna...

radin, gren na more, mislin kako je bilo na izletu, mislin di će se poč drugi put, idin se jerbo mi se nešto pomaknilo oko radija u tonobilu i sad me ujutro toka čitat puste stranice uputa da to namistin - eto ča ti je moderna teknika.

formirala san listu želja na www.profil.hr i ona reste nevjerojatnon brzinon. a ko će ispunjavat te želje, a? e pa ja, a morete i vi, niko vam ne brani, e...

ča još jema, a?

ajme...  ajmeeeeeeeee, ajmeeeeeeeeeeeeeeeeeeeeeeeeeeeeeeeeeee. a ča je, a? eee... u ovi misec ča dolazi me toka sredit sve za jopet registrirat tonobil. o' svega toga mi je zlo, pa ako jema koja dobra duša koja bi otišla sa menon u koju o' svih tih fila da lakše izduran, bila bi joj zahvalna... ako niko neće/ne more gledat horor film zvan registracija i sve oko nje, razumit ću tu, pa ću u file sa sebon ponit libar. jerbo, nekako to moran preživit...

šta još reč, a? ništa, oli ovo nije dosta, a? utrnit ću ovu škatulu i gren ča, jemate pozdrav...

e... dana 29.08.2009. (vidi linkić obavezno) san položila vozački ispit.

godinu dan poslin smo bili na izlet ča smo ga nazvali vlaško-bodulski miks. di smo bili, ča smo činili, a?

sad ćete sve doznat, e...

malon ceston priko zagore i nismo otišli najprvo na more, ma ke, e... 

krka, visovac, na slici s liva na desno: moja mater, gorka magazin, božo sušić iz autoškole sušić di san položila vozački i moja malenkost.

narafski, ja san nas dovezla tot jerbo fala bogu moja vozačka nije za škafetin vengo je duperan da njon vozin. barba boži ćemo se zafalit za korisne upute koje mi je dava za vožnju po dalmatinskoj zagori. narafski da san i danas puno naučila... za ove litrate ćemo se zafalit djelatniku NP Krka kojega je barba Božo odma pita iz kojega je sela oliti kako se po vlašku reče čigovi je i dozna da zna sve njegove... nikakvo čudo, po selima svak svakoga zna..

ajmo mi ča dalje, e... da vidimo kako je bilo. gremo u selo bože sušića. tot nisan bila nikad, ali mi se odma svidilo, lipo malo misto drniškoga kraja. 

brištane, ovi bokunić seoskog putića  je jedini dil izleta ča je barba božo vozija.  meni je reka izađi iz tonobila i slikaj ulazak u dil koji vodi do moje kuće. tonobil je cili izlet bija u mojim rukama - eto koliko mi vridi vozačka. ponosna san! narafski, još uvik još učin. je li vas zanimaju detalji, a? e sad ćete vidit ča je to stara kuća u dalmatinskoj zagori, koje su lipote tot skrivene, ča se sve tot interesantnoga more nač, e...

pojata, stari kameni zid

detalj, stara ponistra, škure 

smokva, zid... ča mislite jesmo li čokali smokve, a? narafski, drito sa stabla. evo me u takvoj akciji. ovo je isprid kuće barba bože.

a gledaj sad ovo, otključaj konobu starin ključen. stari ključ je posebna dragocjenost. sićan se da je moja pokojna baba, mater o' oca,  jedan slični iz rodne kuće s otoka pomno čuvala. narafski, još uvik smo u selu barba bože... u betinu ćemo poslin. ajmo sad vidit ča sve jema u konobi barba bože.

još malo smokav, gospe moje ča je dobro doč na selo i udrit po domaćin smokvama... nima bolje...

još jedan zanimljivi detalj, dvor, stara morša

ajmo ča u još jednu zanimljivu prostoriju, ovo je prava pravcata vlaška peka. radi i dandanas, barba božo pođe u svoje selo i kako kaže utira o' ispod nje puno lipih bokuna...

e, a ovo je barba božina kuća o' starine. priča mi čovik kako kroza vrime domovinskog rata nije moga do svoje kuće, četnici su tot bili učinili okupaciju, a u barba božinu kuću učinili svoj štab. prestrašno. a jopet kad pogledaš, zafaljujući temu je nisu užgali.

e... iako san u drniškon kraju, sad ću reč: gospe sinjska, a šta je sad ovo, a? za vozit po ovako postavljenin znakovima stvarno triba jemat najlipšu vozačku na svitu, e... a to je narafski baš ova moja

evo idemo ča, finito brištane, e... a narafski bili smo u brištane.

e a da ponovimo, a di su ono brištane, a? dalmatinska zagora, drniški kraj, tot je najbolji pršut na svitu.  još ću ovod napomenit da s vlajima iz drniškog kraja iako su tvrdoglavi ka vrag (to su geni kameni), ipak nekako uspijen izač na kraj, eto  s barba božom sušićem san stekla vozačku, kod drniškoga vlaja profešura slavka vujevića san magistrirala itd. on mi je recimo reka, e , da ti nado nemaš bokun gena kamenih (a takvih najviše jeman ih po ćaći bodulu), sve bi išlo teže. geni kameni daju upornost. more bit  da jema istine u ričima dotura slavka. sad vas vodin u kraj moga ćaće, otok murter, šibenski arhipelag. kako je danas na murteru tužno sićanje na poginule pompjere, ovod nima činit monade, izlet smo nastavili kranje skromno.

evo nas, murter gradina, ovod se gre za kornate, a ja san bila babi na groblje. 

obidvali smo u restoran ča se zove račić, izili smo lignje, bilo je dobro, nećemo se žalit, ma ke, e...

u jučer spominjanu marinu hraminu nisan njanci stigla uč. samo san ka tica proletila kraj nje. eto ti ga na, priša i uvik priša... jedan dan ću valjda tot vezat bokun broda.

kad san tot, na murteru, među brodima, odma se rekuperan, skupin forcu za dalje i sve mi se odma pari bolje. kako godine idu i iako mi cila fameja živi u splitu i zadru, a sestra mi je u stranjskoj državi, ja sve višje ovi Otok zoven riči doma. sa skoro 37 moje doma su: split, zadar i murter. ostatak dalmacije jubin svin srcen, lipe naše isto, ali na ova tri mista se ćutin ka kraljica. 

smokava jema i na mome otoku, a suše se na suncu 

vala slanica, banjanje, jo, gospe moja kad san ušla u to more, more ča je tot, koji osjećaj, kako je dobro, uajmeeee... na otoku san bila u zadnje vrime, ali ovod nisan bila jušto 3 godine... a tako čeznen da dođen tot češće, a i u druge lipe vala otoka murtera. 

evo još detalja iz mista murter na otoku murteru... ajmo ča , upeklo je... vodin vas u betinu, misto moga ćaće... 

barba božo je i narafski i na otoku trefija masu poznatih. do splita san vozila ja, jadranskon magistralon  i moran priznat da mi je bilo puno lakše vengo priko vlaške, valjda zaradi tega ča taj put ipak bolje znan. godina dana šofiranja je iza mene, nisan prešla puno km, oko 2000, ali ipak danas san vozila nekoliko uri i bila u sva ova mista. sritna san zaradi tega! svih 50 litratih morete uvećat klikon, a ja ću još reč da je ovo bija izlet za 5. gren ča, jemate pozdrav!

e...

našla san nike video štorije o dvi marine na netu.  

ovo je za one ča vole brode.

pogledajte kako je bilo dramatično u marini kaštela lita gospodnjega 2004. za ne virovat. uštekajte i zvučnike, zvuk je nevjerojatan.

[kako š njima stalno radimo, najlipje ih pozdravljamo. fala lipa i na zadnjen računu ča ste nam ga platili prije dospijeća... ]

ajmo ča dalje. marina hramina , to se misto o' milja zove vrata kornata. marina hramina je misto kroza koje zaradi priše ča uvik vlada proletin ka tica, a zapravo bi tribalo jedan dan baš tot vezat bokun broda i fermat, pa samo do kornati i onda jopet fermat. sutra ponovit :)

na murteru je, otoku najbojih drvenih brodi i kalafata, velika je, jema odličnu opremljenost, odatle se gre za kornate. za doč na murter ne triba poč brodon, gre se tonobilon priko mosta.

je li vas zanima kakav lift jemaju, a? pogledajte video. e ovo ča je vezano  u split pare kaići naspram ovega ča je tot...

još dobrih litrati i videa jema na web-stranicama obe marine.

osin marine hramina na murteru jema i marina betina, ona je manja, u nju ću vas odvest koji drugi put...

e... šuferin (žigica), lipa pisma za dobar početak dana... gre za nekoga meni važnoga...

e...

prikovišje je vruće. u ovo doba godine je tribalo bit bokun manje.

danas san se bila kupat na plažu kaštelet, na sam kraj, ispod meštrovićevog kašteleta po kojemu se plaža i zove kaštelet.

sidin. blizu mene tri šinjorine.

najedanput se čulo siktanje. sssss. sssssss. ssssss. gospe moja, gledan, zmija. digla glavu, izvija se. sinjale su je i šinjorine, pripale se, kriče. nekako ih umirin, nemojte vikat, ako se derete, more skočit, smirite se i poč će zmija jopet u svoju bužu.

tako i bi, ali šinjorine su ipak pokupile šugamane, borše i šlape (pomogla im jedna žena do zuba naoružana štapom) te se preselile sto metri dalje.

zmija je utekla u bužu, arivali drugi ljudi i ne znajući za dramu koja se tot odvijala, sili i počeli se kupat.

život gre dalje, ma vrućina ne kalmaje, pamtit ću ovo lito ka lito vrućina, lito u kojen su zmije počele izlazit iz buža.

ča je još izletilo, a?

znate li ča je škatula zvana pandorina kutija, a? oni ča ne znaju za poboljšanje opće kulture, pravac www.google.com i bacit se na malo istraživanje o mitologiji, e... ako niste našli, evo i jedan linkić di morete pročitat par riči o temu.

oni ča znaju znaju da je u njoj bilo svega strašnoga, BOLEŠĆINE, MIŽERIJA, KATASTROFE, MRŽNJA, ĐELOŽINA, SVA ZLA OVEGA SVITA, a na dnu se ipak nalazilo nešto dobro, NADA, ufanje.

na www.facebook.com jeman pandorinu kutiju (nekako mi ovod ne paše rič škatula, pojam glasi pandorina kutija i niman sad tot šta mudrovat).

iz te pandorine kutije svaki dan mi  izleti štagod. evo nekih lipih stvari o' zadnjih dan.

na prve tri stvari nisan ka komentar notala ništa. kišu čekan i u stvarnosti i mislin da nisan jedina. ovi mercedes je šesan, ali  mi tonobil nije najbitniji u životu, tako da tot niman šta reč. twingić je danas osta isprid kuće, a ja na noge na kupanje. i baš mi je bilo lipo. miš na mišonji je toliko simpa da ostavlja brez daha, a kad su mi izletili pinezi notala san: ajme, još ću postat i materijalista... onda se pojavija kumplir, a komentar je bija: ma odlično, nima šta, u skladu sa salaton o' kumplira i teton pašteton... za krug: o, pa ovo je savršenstvo... u krugu sve piše, život, smrt, pobjede, porazi, itd. odlično! mačić: slatko :) , a vinčanje: romantično :)

eto, tako i iz pandorine kutije more izač štagod lipo, a za zmije je i bolje da se vrate u buže. ekola, gren ča, pozdravljan!

čitan:

Galsworthy, Jabuka

slušan:

Otvoreni radio u tonobilu, a doma i u uredu sve i svašta.

u zadnje vrime mi je doša dobar cd pod ruke: kušaj i slušaj dalmaciju, gre u kompletu s kuvaricom zlatka galla, to je ona di san nikidan čitala o pohanin dagnjama koje eto još nisan stigla učinit.

otvoreni jema dobru mužiku, ali jema još nešto bitno. čuje se u dobron dilu tunela u splitu (da, da, istina je, probajte ga navit, pa ćete vidit) i š njin mi je lakše izdurat kroza ti tunel.

čekan:

izlet koji dogovaramo godinu dana (isuse mili, ).

nadan se da će se konačnoooo poč.

tražin:

• nove patike i gače za trkanje,
• rebatinke, njih jeman pun armerun, ali eto, kalala san kile, pa mi sad sva roba omogućava plivanje,  
• postole za jesen,
• futrolice za mobitel (da mi po mogućnosti u jednu futrolicu stanu dva mobača) - ovo uvik tražin, hehe,
• libre - e tu je sad cili popis želja,
• dobre šampone i zanimljive nijanse piture za kosu (trenutno san u crvenkastoj fazi)
• skulu (školu) za učit jašit konja (obavezni uvjeti: okolica splita (da moren doč twingićen za barenko po ure, 45 minuti, jerbo me toka dosta radit i ne mogu zaradi tega u npr. zagreb), dobri judi, spontana ekipa, dobri konji)

   

sponozor mi ne triba, fala lipa, radin i zaradin za ono ča mi triba, ali ako jemate informacije di se štagod o' tega more dobro nač, javite...

xvii@xvii-online.com ili nada@parametar.hr

u zadnje vrime san kupila:

e, punu vriću stvari za malo dite, robu, igračke... hehe zaradila je butiga turbo limač. to mi je za maloga o' sestre, ja svoje dice nažalost još niman.

u zadnje vrime san radila:

html, xhtml, css sa študentima. to mi je onako o' inđinjerstva, a o ostalih poslova evo jutros najranije slala računovođi izvode o' banke... sad sve znate :)

kupan se:

kaštelet, merjan, kašuni

(na kašune san bila jučer, tonobilon. uajme, još je tot urnebesni konfužjun o' svita i tonobili)

bila san vidit:

izbožbu u fotoklub, trenutno morete vidit lipote slovenije, stvarno je super, naročito konji. zaradi tega, pravac marmontova, ulaz besplatan.

sad ću:

objavit ovi post i ostavit štagod i za drugi put... jema dana :)

e...

jutros san bila pješak. križanje za bačvice, lik prolazi kroza crveno tonobilon, jedan crni twingić iz suprotnoga smjera koči silovito, svon forcon, pripala san se o' škripe kočnica. uspija je stat i spasit svoju glavu, ali i glavu onega ludaša ča je vozija kroza crveno.

udahnen, nastavin put pojišana jerbo me tokalo poč na pbz vizavi autohrvatske. hm? sad se tot prodaju fiati, ali nekad je bila autohrvatska, e...  a pbz nije baš jušto vizavi, samo bokunić niže, e... ma razumili ste me di san odila, znan.

puten se čuje sirena, gre hitna.

pitaj boga kome je sad loše, ali svaki put kad čujen tu sirenu ne ćutin se lipo, e... ne znan nikoga ko uživa u temu zvuku.

eto, tako mi je i ka pješaku bilo lipo.

kroza  vrime konfužjuna na uzavrelon asfaltu, na otoku propadaju masline i smokve - nima ih ko brat, svi su u gradu... divljen, onemu ča nije po miri čovika, agresivnom, ubojiton. sve mi se manje sviđa takav split.

e... došla san doma, a mogla san i ne doč. fala mome anđelu čuvaru.

monada br. 1.

najprvo san na raskrižju di se križaju put za ajdukov stadion  i put za tunel bila livi skretač. prva u raskrižju, ma kolona ča zadržava smjer dura i dura. onda se prominilo svitlo na semaforu. dogodilo mi se ono o' čega svak ko vozi strepi, ostala san u raskrižju. kakav je bija osjećaj? iskreno, odvratno, parilo mi je da plivan s morskin pasima (toliko o vozačkoj solidarnosti koja bi tribala bit pravilo ponašanja), vidin doslovce krvoločne čunke i spasili su me samo okretnost za volanom koju očito ipak jeman i staloženost koja me prati kad je neka životno opasna situacija. ipak, fala lipa i mome anđelčiću, znan da je i on pazija na me. ne razumin svit koji tako jurne u nekoga, dikad  i prije zelenoga, pa i sebe ugrožavaju. hm???

---------------

došla san na more. fala ti more moje ča me voliš. a di san bila, a? e a na kaštelet iako san danas čak i mislila poč na kašune , ali poza ovega šoka nisan jemala voje ni force za još. a je li ih bilo, a? ma je, narafski.

---------------

monada br. 2.

narafski, triba taj tonobil i vratit u kvart. nekako mi je špurijus govorija: nado, aj ostavi ga tot di je, odvest ćeš ga sutra, opče ti zapravo ni daleko od kuće. oču vozit, neću, ma ajde gren ipak...

puštila san tonobil ča je bija parkiran do mene da izađe prvi s parkinga, toyota registracija OS, daden čoviku mot ča oče reč ajte šjor, meni nigdi nije priša. fala bogu da san takva, nikad se ne jačan u prometu.

toyota je prošla tunel isprid mene, ja san iza njega. izlazimo iz tunela. toyota gre u livu traku, a ja san bokunić sporija, ni mi se potriba jačat, u desnoj mi je sasvin dobro.

dakle moj bili twingić uredno prođe tunel i u desnoj trakici se vozi put kućice... u tom momentu san vidila jednega biloga fiata una, mora bit da se baš tako, na ti način i baš na tom mistu danas ukaza moj anđelčić čuvar. aaaa ovo će svatit samo jedan šjor na ovom svitu, ma za ostale me ni ni briga da svate...

vozin, dobra san, ja desno, toyota livo, držin ritam. na onom rakrižju koje me šokiralo kad san išla san sad u suprotnom smjeru, a isprid mene se pojavljuje bili mercedes. čovik vozi ok. e sad vjerojatno bi ja bila na tom mistu da toyotu nekoć davno nisan puštila. vozimo, dolazin kod radijo centra i vidin nesrića. gospe moja, bili mercedes ča je svo vrime bija isprid mene. mislin da nima mrtvih, ali heben te živote, mogla san bit na njegovom mistu. izgleda da ga je udrija livi skretač, no nećem to tvrdit jerbo me tokalo skrenit  desno, pa nisan najbolje skontala.

twingić je majušan, ne želin nesriću. vozin po pravilima, poštujen ih jerbo nisu brez veze notana.  

[u samo zadnjih par dana ih je baš na potezu radijo centar - tolstojeva bilo more nesrića koje san osobno vidila, a kakvo vidin većina se događa jerbo se ne poštiva zabrana parkiranja na trotoaru (na stopu u tolstojevoj se zbog toga ne vidi normalno i na mažuranićevo se praktički izlazi na sriću, ne volin ruski rulet, pa odavno gren okolo) i jerbo se skreće ka luđak u tolstojevu te jerbo se livi skretači ne ponašaju pristojno kod radijo -centra.]

parkiran tonobil na parkiralištu u kvartu i niman force izač, sidin u njemu još minut dva i svo ludilo svita ča mu je vrućina udrila u glavu mi je prid jočima.

fala mojoj vozačkoj. jesan li vam rekla da je najlipša na svitu, a? fala dragome bogu, fala anđelčiću čuvaru. fala staloženosti koju jeman kad je životno opasno. fala boži sušiću iz autoškole sušić ča me je činija da bar dvadeset puti vozin do omiša jerbo da tot na magistrali nisan stekla kuražu, danas vjerojatno opče ne bi ni vozila tonobil.

sve je danas bilo bilo, moj twingić, fiat uno nepoznatoga šofera, ali meni beskrajno bitan znak, mercedes ča je jema prometnu...

samo je toyota bila plava. narafski, i more.

eto tako, puna san šokova, a ne bi tila da je tako. tila bi slušat laganini mužiku i plesat. dođe mi da jopet uveden koji pješački dan jerbo dobro bi mi doša... ne znan, vidit ću...

ekola, gren ča, jemate pozdrav !

noć by xvii

nigdi nikoga, samo split i svitla, slikano noćas mobitelom, klik za veće

e...

jema dan ka' se čovik ćuti ka da ga je stivalo u ćibu.

[to je isto judski, narafski. ne more se uvik pivat o' sriće, smijat se ka cirkusant.]

jema dan ka' je arija teška i jedva se guca.

jema dan ka' se svi friži iz prošloga vrimena rekuperaju i počnu ka bisne zviri jopet tiščat možđane, vraćat se.

jema dan ka' ti prid joči dođu svi oni ča su te  poza puno dobrega ča si jin učinija pljunili.

jema dan kad je nebo ujutro najranije teško, ka da je o' olova, piza puste kile, a more mu je kumpanjo na drugoj strani balance.

jema dan ka' postoli škripju za učinit svaki korak, pari ka da po caklu bos greš.

jema dan ka' su ure duge.

kad je takvi dan, dobro je jemat jedne joči, najlipje na svitu i mislit na njih. lakše onda bude izdurat.

poza tega grop nestane, sunce odma ariva; ka ča je i danas, ka' je jutros najranije bilo gnjilo, a o' kiše nismo oćutili njanci kapju - samo se tuga provlačila kroza ćivericu, a poza tega je fala bogu bila šetebandjere i zazvižđala je radost.

najprvo tiho, a onda bokun glasnije.

poza tega činiš konat, zbrajaš sve dobre stvari ča su ti se dogodile i sritan si šta si živ.

riči i litrat by xvii - riči friške, litrat sa šufita, na njemu more i ja

[s obziron da je slikan prije skoro godinu dan, moren reč ši ja, e, s tin da je sad jušto deset kili manje, e...

a koje su kolure joči, a? moje kafene,e.

a ove druge, a?

e neću van reč, činin kuco, ni zanimljivo ka' se sve reče, probajte pogodit... ]

e...

foje san nastavila čitat ka klasično izdanje (ovo oče reč foji o' karte) na plaži. našla san još nešto. evo to još nešto iz foja, svakako puno zanimljivije. ovo će sigurno interesirat sve ča vole brode. rota palagruzona, kulturna ustanova ‘ars haleutica’ obnavlja tradiciju jedinstvene ribarske regate. fale vridna informacija, a detalje morete pročitat u slobodnu priko ovega linka.

e... 

sićate li ga se, a?

a ovi put, a?

evo čitan u foje kako je sad bidan ostavljen i sam .

puno mi je žaj kad nešto tako grubo strefi čovika, e...

ma ke, ni sam, mi smo uza tebe, u svakoj si našoj misli, s posebnom radošću se sičamo kad smo te tako pametnoga i šesnoga otkrili na internet, e... slali smo jedni drugima mailove, objavljivali tvoje govore na blogovima, učinili sve da postaneš i ostaneš legenda. nezaboravan, e... koliko smo samo suza pustili slušajući tvoje beside... suza o' sriće jerbo odličan je život u ovoj zemlji,  zemlji znanja. 

e...

ključno je pitanje di poč leč i učinit pižolot, a?

moje maške jemaju sve, velike košare za spavat, to su one ča jemaju bužu po sredini pa se kroza bužu uvučiju u njih. jemaju i prave pravcate postelje za beštije, takve se u butigu o' beštiji moredu vazest i za pasa i za mašku, otvorene a kad ih gledaš odozgol jemaju oblik ka zrno fažola. sve se to kupilo, potrošili se pinezi, ma one najmanje spavaju tot.

uvučuju se meni u postelju, jema ih po katrigama, neke čak skoče na armerun i tot spavaju, more bit da onda misle da su na olimpu, ko će ti ga znat, e...

jučer pozapodne se odvijala prava drama, flekica i pahuljica su se žestoko pokarale oko stare škatule o' postoli - svaka je oče za se, jerbo, nač neko novo, zanimljivo misto di će ubit joko je stvar posebnog mačjeg prestiža.

najprvo je u tu škatulu uspila ulizit pahuljica, a kad je štufalo u nju se uvukla flekica. jedva maške u škatulu, odavno nisu mačići. eto koliko sriće i nesriće (sve u kompletu) more donit jedna obišna, stara škatula o' postoli, praktički tek malo kartuna.

narafski, morete u nju stavit i drage uspomene, verse notane na bokun karte, svašta-nešto, a ja san moje maške stavila na litrat dok su bile u škatuli. bila je pahuljica, crna flekica.

 lito by xvii - slikano mobitelon, jutros kroza radno vrime

e... nešto smo jutros odili za  poslon na tu bandu, a kad smo finili lipo san ostavila tonobil na zvončac, izvukla japanke iz portapaka i pravac kaštelet. dikad je i dobro bit privatnik, e... za puno kurjože ovo su moje japanke, ši, jeman ih ja višje, e... ove mi, recimo, nisu ditinjaste, hehe... a brod, a? čiji je ovo brod, a? iskreno niman pojma, ali nije ni bitno, e...  eto, u očekivanju kiše uza posal tako provodin vrime... ne žalin se, nije to loše, ma ke... a oče past koja kapja, a? ma bit će, narafski, a dok ih dočekamo evo ih barenko u pismi, guštajte! 

e... neću ništa pisat, pisma je toliko dobra, neka se lipo sve možđane bave njon.

 Pogledaj, gasi se ljeto
 Rose su bose
 U travi
 
 Vidim da zaboravljaš sve to
 Zriju ti dunje
 U glavi
 
 Ideš niz strme ulice
 Mame te pune tržnice
 Oko tebe se roje pčele
 Slatka kao med
 
 Prolaziš ti
 I dugo slušaš u se
 
 A ja sam sada samo uspomena
 
 Hej!

e... moran priznat da me dikod štufaju zločesti i glupavi judi. najbolje je onda poč vidit šta čine dobre i pametne beštije - oba dila su zanimljiva pogledajte!

e i znan ditinjasta san, a šta ću, e...

e... jutros študenti oli posal, pozapodne me toka poč u zubara. nima mora za danas. šmrc. e ma zato jema dobra pisme... ajmo ča pivat.

e...

18. 08. (lita gospodnjega) 1450.

u Splitu rodija se Marko Marulić.

kad san ga 2006. crtala lapišen (klik za veće), gledala san u litrat meštrovićeve skulpture i učinila sve da marul pari živ. jesan li to crtarijon uspila prosudite sami. je, partija je jema godin i godin, točnije 05.01.1524., ali s obziron ča je sve nota i koliko je bitan za književnost hrvata, ali i književnost općenito, ka da je i živ.

apropo današnjega dana svakako ne bi bilo loše da bacite joko ovod:

http://www.knjizevni-krug.hr/marulianum/mm_index.asp

e... misto ove radnje je split, vrime danas pozapodne, točnija lokacija plaža kaštelet. bila san se kupat tot doli na nasip, a ka pametna ženskica twingića san ostavila na parkingu kraj meštrovićeve galerije, skinila patike, š njima u portapak, stavila na noge japanke i potrošila ih minuticu dvi koliko mi je tribalo za doč do mora. muški narafski ne znaju tako. oni zaradi tega i jesu pripametni, e... čast iznimkama. mislite da vas lažen, a? nisan, ma di bi, a? evo pogledajte ča je činija ovi talijan. za ne virovat. okrićanje je duralo i duralo, tribalo mu je vrimena dok je na kašteletu okrenija virovali oli ne TANTOBUS. fala ti bože da nisan išla put doli kad je ovi iša gori jerbo da san se š njin morala mimoilazit (a priznat ćete tot čovik ne očekuje tako nešto) snašla bi se, ali bi najprvo vikala ajuto mama mia...  još samo čekan ko će šleperon poč na kupanje, a nadan se da nevjerni tome sad viruju mojoj susidi kad je pričala da je nikidan i pauk viđen na kašunima... litrate morete uvećat za proučavanje, svi su učinjeni mobitelon by xvii.

poslin san malo gledala put čiova, bilo je romantičnije i bokun manje dramatičnije...

[mala digresija koja je jopet povezana s temom: narafski, ako mislite da oni ča se meni puno svidija gre na noge niza/uza uzbrdice kaštelet & kašuni, varate se. koje noge, a? bog je da noge da se njima vozi tonobil i on narafski gre tonobilon. je, je, ne beštimaj sad i ne karaj se, kad si tot iša na noge, a? triba bit iskren, pa reč onako kako je, e... jerbo, onome ča laže nareste nos, a nisan baš sigurna šta će bit s ušima, ali triba i na njih pripazit jerbo su one također zanimljiv i lip dil tila, e... kako nisu, a? a di se šapju lipe riči, a? bolje lipe šapjat, vengo grube urlat, e... aj, puštit ćemo sad ovoga šjora malo na miru, ne moremo samo o njemu, e... kraj male digresije]

eto, bože dragi, ko će znat, more bit da jema nekoga razloga zašto je muški mozak takav, e... možda ih baš zato tako šempjane i blesave i volimo, e...

ne znan, niman odgovore na tako kompleksna pitanja ka ča je muški um, e...

popela san se uza tu uzbrdicu na noge ka ča san se i kalala doli jerbo bog mi je da noge da njima hodan, prošetala, sila u twingića, izašla iz parkinga, dovezla ga do kuće i to mi je sasvin dovoljno junačenja po šoferskom pitanju za danas.

e a šta ćete, nisan šofer ni mornar, ja san, fala bogu, samo mala ženskica...

ekola, gren ča, pozdravljan lipo. bija je ovo još jedan bezuspješni pokušaj analize muškog uma.

fala uredništvu

www.mojblog.hr

na isticanju moga bloga

www.xvii-online.com

na naslovnici :)

e... ajmo bokunić fermat uza oliverov mix

evala svite, dobro jutro!

meni je već dan, pa ne znan a da rečen dobar dan, a?

žveljarin opće ne navijen, niman ga, ne znan ni di je, svako se jutro probudin ka da san škverski radnik prije šest uri. ma navikla san već. ni ne sićan se kad san zadnji put spavala duže o' šest uri ujutro, e...  tješi me da mi se tako dizala i prababa na otoku, ali da je radeći poživila pustih godin. zaradi tega živija rad, u radu je spas! eto, toliko o' dalmatinskoj linosti, hehe...

e...

koliko krivih riči pobigne kroza zube...  

ča sve rečemo brez promislit, a? samo da iskidamo nerve onome s druge bande, e... onome kojega (koju) inače volimo. ka da je rat.  

a poslin patimo, gucamo, trpimo, žaj nam je... ne moremo spavat, plačemo u kušin, nismo svoji, e...  

dobro govori gibonni - vodi me bis kroz godine a jedva se sican zbog cega je... odavno neko postoji kome ne prastam a trebao bih. itd. klapa je to super obradila, guštajte!

ova pisma gre za nekoga, meni dragoga, s kin se ni tribalo pokarat, e...

---------------

Medju ljudima za koje ne pitam
odavno neko postoji
kome ne prastam a trebao bih

Otkad stavljam kriz
kraj njenog imena
vodi me bis kroz godine
a jedva se sican zbog cega je

Refren 2x
Vec je vrime da se pomirim sa svitom
i tiho, k'o da zaronim na dah
u svemu sad mogu naci nesto lipo, lipo
i reci zivote dobar ti dan

Na te grane ja vise ne smim past
na njenu dusu prisit
sve sto nismo dospili

Koliko krivih rici pobigne kroz zube
a ko ce ih stic
ka i perje baceno u vitar
ne mos pokupit, a ucim se kupit

U svemu sad moram naci
nesto lipo
i reci zivote - dobar ti dan

Refren

U svemu sad mogu naci
nesto lipo, lipo
i reci zivote - dobar ti dan

Medju ljudima o tome ne pricam
al znaju mi s lica procitati
kome ne prastam a trebao bih

digla san se rano,

odvezla na marjan.

ušla san u more i

dugo plivala.

koji gušt... :)

e... ovod u nas u dalmaciji postoji jedna posebna jubav, to je jubav između čovika i broda, pogotovu onega ča jema svoj brod. tuđi čovik to baš i ne more svatit, e...

ta je jubav oni osjećaj ča se ćuti kad svi pođu ča, kumpanji, svojta, susidi. ostaje samo čovik, brod, nebo, more, jutro, noć, zvuk brodske makinje, zvižđanje vitra u jidru, tišina, nikoliko lignji u siču, ruke ča vonju na ješku, bonaca, nevera. oli to zapravo ni dosta, a? ča višje triba, e...

ta je jubav oni osjećaj ča se ćuti kad se brod izvadi na kraj, kad mu se s puno pacijence rukon prolazi priko trupa i sinjaje di ga triba tašelat, čini plan za ga temeljito pobrusit i piturat. ča tot iko višje onda triba, a? najbolje je ne smetat, čovik voli brod, brod mu se predaje u ruke, oče svu njegovu jubav i ne triba se tot mišat, e...  kad je čovik u toj posebnoj fazi ređenja i ušestavanja svoga kumpanja, ne triba mu ništa višje. nemojte mu njanci doč reč: e, slušaj, kuvan tingul i makarune, oču ti donit malo u tečicu, a? ne triba ništa, ne triba niko, čovik i brod se vole, to je to, sve ostalo je višak, e...

bila san malo skitat, učinit koji litrat. di san išla, a? a di ću poč, a? di su brodi, di je more, e...

evo par litrati na temu ljudi-more-brodovi. guštajte. klik za veće.

ekola, gren ča, pozdravljan svih, a posebno jednega šjora ča je u fazi velikih radova (ovo oče reč: ušestavanje broda oli faza di bi čak i tečica sa spizon smetala). 

[skrušeno priznajen bija mi je inspiracija za ovi tekst   i tako danas jemate 2 teksta pa mi ne grintajte da nimate šta čitat, e... ]

ljudi-more-brodovi by xvii

e...

već niko vrime vozan twingića sama. svugdi san do sad bila, ide to pomalo, ide...

a jutros, a? izašla san iz tunela i umisto da nađen malo mista za tonobil ka svaki dan  i kalan se na noge doli na kaštelet (neće moj twingić ka tovar niz/uz onu uzbrdicu na kaštelet, ma ke, e...) jednostavno nisan dala žmigavac za parking desno...

namjerno ga nisan dala, e... produžila san.

di, a?

a na kašune, di drugdi? kontan velika je gospa, otiša svit u sinj, neće bit konfužjun. stanen, daden livi žmigavac i skrenen put doli.

velika gospa, devet uri ujutro, tribala je bit poluprazna plaža i odlično vrime za moju probu da vidin kako će me ič vožnja put doli (a poslin i put gori).

a je li bilo tako, a? ma keeeeeeeeeee, e...

devet uri, ja doli, a svit gre gori. e dobro ste pročitali.

je li sve prošlo dobro, a? ši, XVII se uspješno mimoilazila na nizbrdici za kašune - za neupućene ona je malo manja vengo ona ča gre na kaštelet, ali eto za kaštelet ni moj twingić tovar, za kašune je, a boga mi i ja još veći tovar o' tonobila, e, kad me vrag tira doli.

ops, pomalo, kočnica, pomalo, gledaj di voziš, aaa, spuštamo seeee...

neću njanci mislit ča će bit doli kad je na putu ovoliki konfužjun. drži taj vražji volan i vozi. dobro je, eto nas tj. eto me jerbo smo u tonobilu samo ja i Paško , a paško se, eto, ne konta među svit.

ala eto i misto. stajen, vadin boršu iz tonobila, širin šugaman i gren plivat. nisan odavno bila ovod, na ovu plažu. more je ludilo, a kako ćemo poslin gori mislit ćemo kad za to dođe vrime, e...

narafski, u međuvrimenu san još nikoliko puti ušla u more, a twingića su mi kroza to vrime sasvin solidno zagradili. e ma jema XVII vozačku, mm po mm i izvučen se, idemo gas i sve do gori fala bogu nikoga, vidin samo jednoga maloga žutoga u retrovizoru iza. stajen na stop, dajen žmigavac i izlazin na cestu. triba požurit doma jerbo sad se triba snač za misto kraj kuće. mažuranićevo, ulazin u tolstojevu, jema mista, fala ti bože, stajen, dižen ručnu i gren doma.

trefila san susidu na skale, priča mi kako je nikidan bija pauk na kašune jerbo je neko nekoga zagradija i eto umisto da po plaži pogledaju i vide ko je vozač svit zva pauka. zato pazite kako na kašune stajete, nemojte zagrađivat svit, e - glasi prvi zaključak. dugo teplo lito još dura u povećen konfužjunu - glasi drugi zaključak.

sad triba doč sebi o' silnoga uzbuđenja (ja san ka ča znate još uvik baby šofer oliti šoferčić).

narafski probat ću za koji dan jopet tamo poč, konfužjun će barenko malo laškat... tako je to uvik iza velike gospe, e...

e...

ča za veterinarski zavod, ča za marinu kaštela cila šetimana nam je bila radna. do nosa u poslu. za marinu kaštela ljudi su mi radili čak i po noći da se sve stigne. (fala ingrid, fala damire).

[eto kako mi dobijamo poslove. neće nama njanci jedna partija ništa dat, a i bolje da je tako. kad mi bilo ko ko jema veze s partijama dođe odma mi je zlo, nevera u štumiku o' takvih, e... poslove dobijamo jerbo se kod nas vridno radi. ako se triba radit po noći, radi se i po noći. grintat se ne smi, radi se i po vrućini i po zimi, a svaki posal radi isključivo stručna peršona za to područje.]

sve smo uspili, a uza sav konfužjun danas san čak  uspila i 4 puta uč u more. po suncu i kiši, e...

ajmo još navit bokun pisme i svima zaželit laku noć. 

"naza' tridesetak godin' nij' u splitu bilo dupli cakal po ponistran ni peći po kućan, pa je svit biža zimi iz kuće, najskoli kad je puvala bura. oni ka pobo'ji svit je ' odi u čitaonicu oli na kafu, a oni pobasji u joštariju na po litre vina. ženske su 'odile u crikvu, molile boga i razgovarale se.

ko nij' jema pinez, komu je bura i po 'žepiman puvala, odi je na rivu. spli'ska riva je na podnevu, i tot bi se, u zaklonu o' bure, ovi poredali uza zid i na suncu se grijali. zato se spli'ska riva i zove siromaški kapot oli siromaška stuva, to je ka peć. svi oni tako, uza zid ka' karijatide poredani da i' sunce grije nisu jemali ni šolda u 'žepu jerbo da su jemali ne bi se tot grijali, vengo bi 'dikodir u joštariji sidili i misto sunca jemali pri' sobon vrč vina.

doša' je bi tako na rivu jedan dan i meštar toni kašelun."

a ča je bi dalje, a? e to morete čitat u libar ča se zove: drugi libar marka uvodića splićanina jerbo je ovih nikoliko rigi gori jušto iz tega libra - štorija ča se zove: sve utopjeno u... žmul vina.

tako je bilo nekad, danas višje nima ni siromaškoga kapota, jemamo onu monadu, a ne rivu.

jučer san trefila poteštata, skockanoga lipo i šesno, ka piperlin, e. on nan je tako  prinčipešun o' čovika. slaže se s rivon, paše i taman je sve to skupa ludilo. ludilo za igrat balote ka ča su ih igrali nikidan tot (prvenstvo dalmacije na rivu, oli se ne sićate, a? e i oli te balote recimo nisu mogle bit na zvončac, a? tamo jema i zog).

a ča govori poteštat, a?

ništa, e.. on ka mene trefi (a virovali oli ne, trefin ga svako malo) ne reče ni faljen isus ni evala ni zdravibili ni pomalo, ništa, samo muči, čini kuco. i bolje mu je, e... ši, prije se proba i gurat, proč na isto misto di i ja prolazin, e, ali ne dan se ja. jedanput san ovako nešto govorila, ka govorin ja ovemu svitu ča je sa menom, pričan nešto, ali finćukasto, da se ovi šjor poteštat pripozna, e... pripozna se narafski e... e i to mu je bilo ka da mu je neko utira feferon u gujicu, pa je uteka. sad biži čin me vidi.  eto ča ti je ženski jezik. jučer je učnija isto. tako je meni lipo bilo mista za proč po rivi, a on je odija na cestu - to je na oni dil rive di je 'otel marjan, tot upravo on sad deštrigaje, buža, okriće, privrće, jednu bužu otvori, drugu tašela itd. nadan se da će jednega dana i to sve finit, pa  da moremo jopet prolazit ka judi. 

vengo, a di poč grijat škinu ove zime brez obzira jema li ča se tiče pinez bure po žepima oli ne? nešto je ipak ostalo, nisu nan fala bogu nakaze sve unakazile, e... moj glas tako gre za ova mista: matejuška, ježinac i obojena, bačvice-ovčice, južna banda merjana, moj balkon. sve je dobro o' tega. e a neću valjda ure i ure sidit u jokera, e... skužajte me, ma nisan ja o' joštarija takvega tipa, e... staru rivu gledan na kartolinama, litratima, a jedna mi je i u kvadar u kužini. jedan dan će valjda neko normalan učinit i njeno normalno uređenje. strpljen spašen.

narafski dok dura vrućina triba mislit i kako se razladit i tako narafski jedva čekan pozapodne poč na more. petak je, počinje vikend, guštajte i vi!

e...

jučer san vazela novu boršu i pribacila stvari.

[za puno kurjože to su: digitalac, takujin (novčanik) veliki, takujin mali za munitu (sitniš) oli patakune (kovanice), timbar (pečat oli žig), lapiš (olovka), notes, vizitke, papirnate, mobitel I. , mobitel II., očale (naočale) I., očale II., ključi o' stana, ureda, šupe (drvarnice), škrabice (pretinca za poštu), raznih armeruna (ormara), tonobila (auto) - sve priko gambeta (možda i jema još koja rič, ali ovi momenat se ne moren sitit - gambet inače morete vidit po brodovima)  spojeno u jedan bokun (dio), mali album za litrate (slike), vozačka-prometna-osobna, a nač će se i još štagod...]

e ma nova borša nije makla piz, da je stavit na balancu (vagu), pizalo bi jednako...

eto ča ti je život, e...

to ti je ka i s nenadom. znate li barenko jednega koji se zove nenad i zovete ga nenad, a? ja ne znan, svaki je neno. ono da bude manje piza za izgovorit. e ma narafski kad se postiglo da je svaki nenad posta neno, e, onda višje ni to ne valja. zovu se nenek, nenić i tako dalje, ovisno gledate li seriju naši i vaši, šapjete li nekome dragome nenadu i sl. oče li ime išta prominit, a? ma neće, kako  god ime spakovali , skratili, jopet produžili, ma šta činili, jemate istoga čovika... 

tako ti je i sa stvarima u borši (torbi), moš i boršu prominit, ma pizaju stvari, piza i život.

ši, iako nije ka mađioničar makla piz života, nova borša je isto dobra, baš mi se sviđa.

ime mi je nada, jema još i nadica, nadalina, esperanza, ali najbolje je ne komplicirat - zovite me nada. ekola, ja gren ča (radit), ma nada ostaje...

  gambet, ovi litrat nije moj, slika je nađena na netu (vidi ovod)...

e...

upravo gledan izist đelato o' vanilije i čikolate, gledan u punu terinicu, mmmm... mljaaaaaaaac...

mislin kako je more danas bilo odlično.

dobro san vozila i tonobil, a s obziron da san još uvik baby šofer oliti šoferčić, veseli me svaki put kad me vožnja gre dobro, pogotovo kad san sama u tonobilu. (hm? a ko vozi kad neko sidi sa menom? nima to zapravo veze, e... stvar je samo u osjećaju) ma uglavnom sve to solidno gre, zadovoljna san. evo kucan i u drvo, e...

ako prometni pulicijoti možda čitaju ovo, gren reč da me danas jopet niki telac na motorinu iša priticat u tunelu. ja san išla 50 km/h i njanci u ludilu nima potribe to činit. može li se išta učinit apropo tega, a? nećemo valjda čekat da još kogod tot pogine, a?

počela san i čitat jedan dobar libar: puhač stakla s murana, marina fiorato.

uspješno savladavamo i konfužjun ča ga jemamo apropo riči posal.

sve u svemu jedan običan, ali dobar dan. ako ne znate ča gledat, večeras na rtl jema dobrih serija:

navit ću i jednu lipu pismu da dan bude  još bolji...

gren ča, pozdrav svima, fala na vižiti... ši, fala i na pitanju, izila san đelato.

matejuška by xvii - klik za veće

e...

ujutro uči študente, fermaj tek malo za izist obid, radi pozapodne, kupaj se samo u kadi, učini đir do labuda i nazad, peškaj litrate na matejušku, radi i jopet i fini još dan.

a ča mislite ča sad činin, a?

mislin na more.

bit će valjda dobro vrime sutra. oče li, a?

ma friga mi se, kakvo bude da bude, neće me moč zaustavit njanci diretur svemira. poč ću na more i kad uđen u njega neću vanka barenko po ure, ma ke, e...

ekola gren ča, svima ča navrate ovod navečer želin laku noć, a onima ča navrate ujutro narafski dobro jutro.

e... nešto o' olivera ča je dobro složeno i ča mi je ulipšalo dan.  

eeee, hehe, ja postat ću velik i bit ću jak ka čelik....

sićate li se ove legendarne pisme?

e... u mene je fešta zaradi pet godin bloga, ali mi fešta nije zamantala i smantala pamet. brez obzira ča je vruće, gledan malo oče li bit išta o' ove kontre na harače jadranke kosor. umiša se i pricidnik mesić, ovo mu je jedna o' ritkih pametnih, ali ma ajde i vrime je da vidimo i di koju pametnu o' njega, e... sindikati najavljuju demonštracijun, a jemaju i prav. jerbo, ovo ča se događa je jušto:

- jemamo rvacku! - viču rvatine

- ruke uvis! pare oli život! - viču rvatine poza onega jemamo rvacku.

ja, mala majušna rvatica plačen. plačen jerbo rvacku mi moju poniziše, opljačkaše (skoro pa s bičvon glavi), a sad gledaju iščičat čoviku i ono zadnje ča mu ostaje...

zaradi ilustracije ću reč di san danas potrošila pineze.

• 2 gusta i 2 pašte u cukarina jutros 46 kunića - ovo lito san prvi put sila tot, a još nisan bila njanci na jedan izlet, a kamoli na neko litovanje. radin ka beštija po cile dane, sritna san kad se obanjan i na plažama u splitu, a za jedan o' dogovorenih izleta san jutros upravo dogovorila novi dogovor, a to je da ga mičemo iza velike gospe... ne vatan vitar na luksuznu jahtu, nisan u najluksuzniji 'otel na bolu usrid krize za 35 iljada kuna po šetimani. e ali bila san izist paštu i popit sok. sram me bilo. šta jedna peršona ča radi jema na to potrošit pineze, a? tribalo bi me odma pribit na stup srama, e...
• ajmo ča dalje, blizu je i butiga o' kompjuteri pa san vazela još 1 GB memorije za ovu moju škatulu o' kompjutera da mi bolje i pouzdano radi, a kad san već bila tot rečen gospoji ča tot radi da mi na isti račun doda 10 cd, 10 dvd i 1 stick od 8 GB - sve za posal, a sveukupno 367,65 kunića - ovin ću radit, zaradit i u rvacki proračun uplatit, poticaje o rvacke ne dobijan, njih rvacka daje šešeljevoj glasnogovornici (žalosno, ali istinito), a dat ću i drugin judima radit, pa san to vazela na firmu. je li možda tot jema materijala da me se prati i uprati, a? proučava, a? zamisli se, sredstva za rad XVII vazela na firmu. strašno. nedopustivo. odma sa menon u aps, e... ajmo ča dalje,  iste ove stvari tribaju i privatno, gradjaninu. je, tribaju mu jerbo 21. je vik i neće slat dimne signale. oče poslat e-mail. neće pitat adz kako nešto gre vengo će poč na www.google.com kad nešto traži ča ga zanima. itd.

46+367=413... s obziron da u nas pošten svit jema od nikih 2500 do 6000 uvrj glave 7000 i sritan je ako opće posla jema, došla san negdi po sredini (ovo oče reč oko 4000). svitu je ovo desetina plaće. ej, desetina plaće za koju se diže svako jutro i rmbači cili misec. i sad na to ona gre tuč harače. eto, vazmi čoviku i 10% o' plaće, neš ti tega, šta more za to vazest?! najjeftinije patike i gače ditetu, jedna kolica spize u plodine, bokunić bokunića za kompjuter.

krasno.

jo da mi je blizu, pitala bi je kako je nije sram poč na litovanje koje toliko piza (otel o' pet zvizdica), a u isto vrime otimat judima kruv iz justa. narafski, najprvo bi je pitala je li opče koju skulu finila jerbo nam je pričala svaštanešto - tako je nekad bila učiteljica ča je radila na radijo, sad je diplomirana pravnica, a ko zna ča će još sve postat...

iđemo dalje, valjda nam ipak neće pokrest i daljnje pare, e...  

e...

bija je vruć litnji dan, večer, 10.08.2004., otvorila san blog koji je odma jema naslov: autor: XVII, misto radnje: Split , ali nije odma iša na ovon servisu, naknadno je primišten na www.mojblog.hr . ipak, cili arhivski sadržaj je dostupan priko šufita.

ideja mi je bila da jeman jednu stranicu na kojoj ću pratit život u splitu, ali i dalmaciji, hrvatskoj, svitu. tila san da ta stranica gre barenko jedanput na šetimanu, a evo uspila san da gre i skoro svaki dan.

ajmo, mašite se, je li okrugla fešta ili nije, a?

ovod pišen onako kako je govorija moj pokojni dida, sve te riči se više i ne duperaju, ali mislin da ih nije loše čuvat na ovi način. masu svita me pita: a kako znaš sve te riči, a? e eto san vam upravo rekla, slušala san didu kako govori i zapamtila. ne gledan u nikakve rječnike, koristin one riči ča san ih čula u svojoj kući, a ako se neka nije duperala kod moga dide, more i bit u kakvom rječniku, ali je ja ne duperan.

'obotnicu isto triba guštat, nećemo je valjda vratit u more, a?

zaradi čega bi ovod išli samo tekstovi, a? tila san i da moja stranica bude misto di će svit rado doč, di će moč čut koju dobru pismu, vidit koji litrat, crtariju, slikariju, nasmijat se, naučit štagod, guštat. jesan li u temu uspila, a? meni pari da jesan.

nastojin da stranica gre u šta je moguće vedrijen tonu, ali bože moj, ako nas neko naidi, ako nas nešto tišče, ako jema nepravde, ako su oko nas lupeži, ako štagod ne valja, ma očemo li to trpit i gucat u sebi, a? nećemo narafski, triba i to reč svitu, pa znamo da smo barenko nešto učinili, možda štagod i na ti način uspijemo prominit.

uajmeee, aaaaa,  jema i škampi, baš lipo :)

rekli smo život, e... život, a? jesmo li ga baš dobro upratili ovod, a? nastojin reč štagod o' sebi, štagod o životu u splitu, ali i okolici. reč kako je bilo nekad, kako je sad. ne želin s ničin pretjerivat, neka bude svega po malo... e sad, uvik jema zadovoljnih i nezadovoljnih, još se nije rodija ko bi svima ugodija, nekome je dobro, nekome ne valja, a šta ćemo, e... ko me se ne sviđa ne mora drugi put doč u vižite, kome se sviđa, neka dođe i jopet i to je to.

o masu tega će se još pisat, na masu mista će se još poč, doč će još puno tega na red i u svakome slučaju mislin da još jeman štagod ovod reč, da nije kraj, ma ke, e... nisan se štufala.

narafski, ne moremo samo mislit kako izist, triba pazit na kile, pa ćemo i navit i malo mužike

iskoristit ću ovu priliku da se zafalin svima koji stranicu čitaju jerbo brez čitatelja i ne bi baš jemala smisla. fala svima koji su mi se na bilo koji način javili kroza sve ove godine i dali svoje pohvale, prijedloge i sl. fala svima koji su se kroza ove godine sa menon srići radovali i bili mi potpora kad me nešto mučilo oli kad mi je bilo mi teško.

fala uredništvu/ekipi servisa www.mojblog.hr na svemu.

fala i meni ča kad triba prinit ovod recimo croatia boat show, maškare oli prvenstvo svita u piciginu jeman volje peškat i po iljadu litrati i onda odabrat najbolje za ovod.

a znan li ko sve čita ovu stranicu, a? otprilike gre ovako: za neke redovite čitatelje znan, a neki vjerojatno nalete ovod  sasvin slučajno i nastave dolazit oli nikad višje ne dođu.  neke san ljude već prije znala uživo, pa su moju stranicu išli čitat jerbo me znaju, a neki su me prvi put vidili na toj stranici, pa smo se čuli priko neta i na kraju i upoznali. neke još nisan upoznala, neke možda nikad i neću upoznat, ali ako je ikome ova stranica barenko bokunić ulipšala dan, sritna sam.

evo i malo goluzarija, neka i slatkoga, e...

čestitke, pohvale, primjedbe, prijedloge i slično priman na

xvii@xvii-online.com ,

a jemate i libar vižita ka i forum

(je, je, jema i to godinama, vidi desnu bandu bloga)

tekst gre par uri ranije jerbo me ujutro toka trkat za poslon, ma nima veze, nećete zamirit. priznat ćete da bi bila grijota da se spiza oladi, e...

eto svitu moj, gren pomalo ča, zdravi i veseli bili, još puno godin se priko ove stranice mi družili...

e... vruće, a?

ma bit će odma bolje jerbo povirili ste na www.xvii-online.com , a jeman jednu nagradu za svit ča poviri ovod.

vodin vas na krstarenje, gremo na đitu, uprite na botun i guštajte.

narafski, ne bi bilo loše ni uštekat zvučnike, pa morete i zabalat, ritam je skroz dobar.

Lanternista - Toma Bebić

Cili san život na lanterni živija,
svi moji dani bili su sivi;
kiše i sunce, nebo i more,
poneki vapor i koji galeb,
to je bilo sve.

Svakoga jutra željno san čeka
da novi dan ništo donese:
s vitron ili suncen, s neba il mora,
ponekon barkon il kojojn ticon,
ali uzalud.

Na licu mome i stini lanterne
iste je bore urizalo more;
na škoju mome živija san život;
piva o noći i plaka o danu,
to je bilo sve.
 

 e... jema jedan grad ča puno mi je drag. otkrit ću vam bokunić njegove lipote - evo jedan litrat ča san ga jutros peškala mobitelom. klik za veće...

u vrelini litnje noći

strastveno pivaju

ditiramb životu.

pijani o' sriće,

usredotočeni na trenutak.

nimaju ni tonobil ni vilu ni brod,

nimaju ništa, a jemaju sve.

opče nije važno ča će finit za koji tren,

momenat je tot, on je samo njihov, svet...

cvrčci... cvrče...

sve dok ne utihnu.

-------------

vers by xvii, prima istinitim događajima o' noćas, bilo je toliko vruće da su cvrčci pivali po noći...

srića tvoja moja je radost.

tuga tvoja moja je bol.

možda jednom,

negdi kraj mora,

vidiš sebe u mojim očima.

tu sam,

pogledaj me ka nekad...

litrat i vers by xvii, litrat je učinjen 2006., vers notan večeras...

negdi
u odsjaju sunca
nenadano
tračak sriće
ča će jopet nam doč.

nada...

čujen ti glas,
ćutin miris,
vidin joči.

------------

vers i litrat by xvii

e...

puno bi tila da se do idućega 05-08 ne ćutin loše u vlastitoj domovini. tila bi i da se u njoj prikinu veličat lupeži i kurbini sinovi, a počne poštivat rad, znanje i obrazovanje. tila bi da mito prikine bit nacionalna vridnost. tila bi da uspješni poduzetnici ne budu oni ča gledaju svakoga privarit i pokrest, vengo oni ča pošteno rade i nikome ne duguju (gledan malo sinoć izvještaje nikih kompanija - za one s kojima smo radili uočavan da pokušaj izbjegavanja plaćanja raste proporcionalno prijavljenoj dobiti tj. ča su veću dobit prijavili veće su monade činili za platit račun. čast ritkin iznimkama). tila bi da se ova zemlja počne bokun moralnije ponašat prima ditetu, starom čoviku, invalidu. oču uredne skule, puliciju, bolnice, soldate. neću da falšete  uče našu dicu - (ta je još uvik u radnon odnosu iako se odavno zna za njene falšete i pulicija je odavno podnila kaznenu prijavu), e, ni se za to išlo u rat. ne želin se sramit našega pasoša oli putovnice kad je pokažen na nekoj granici. želin da budemo civilizirana i tolerantna zemlja, 21. vik (stoljeće) je, nikome ne tribaju drugovačiji o' civiliziranih i tolerantnih, e... želite li i vi isto, a? ča su želili oni ča su dali svoj život? virujen da nisu želili mafijašku državu, punu lupeža i nemorala. želili su rvacku na koju ćemo bit ponosni, u kojoj će se dobro i kulturno živit. e a dok ne bude tako, moren na današnji dan reč:

ja domovinu jeman, tek u srcu je nosin...

i nadat se boljem...

e...

jeste li ovi misec dobili plaću, a? a znate li kad ćete je dobit, a? znate li očete li je opče dobit, a?

ja san plaće i honorare u Parametar doo isplatila judima  a i sebi 01.08.2009. i to je narafski za srpanj. praktički nikad mi ne kasnimo s isplatama, ali ne pantin odavno da smo jušto prvoga dali pineze.

nisan se još obogatila, to ćemo pomalo jerbo put napretka nije ni brz ni lak, di se isplati poč ne vodi prečica, ali se u doba recesije, krize, banane i sličnih monadi moren pofalit:

• da ne krešen prihode radnicima,
• da su svi judi uvik na vrime plaćeni,
• da nikome ne dugujen, ni privatno ni poslovno,
• da smo stalno likvidni,
• da niman njanci minut blokade,
• da uspijen naplatit odrađene poslove,
• da dajemo humanitarno kad moremo,
• da san troškove pametno skresala tj. ništa nam ne fali ni od usluga ni od robe ni od kvalitete svega tega, samo smo našli jeftinije opcije. dapače, zadovoljna san, kvaliteta novih dobavljača je čak puno bolja vengo onih prije.

ča jemate o' tega da je vaša sigurna (obično državna) firma prijavila poveću dobit ako vaša plaća još nije stigla, a? ko je tot onda mali, a ko velik, a? oče li radnici bit vječno poslušni u firmi koja ih ne plaća oli koja ih neadekvatno plaća, a u kojoj se direturi bahato razbacuju, obžderavaju, vataju vitar i temu slično, a? e čovik moj, otič će malo po malo sve o' tih kula o' karat u vitar i teško će se višje to sastavit, možda je najbolje redovito pratit oglase za posal ako radite u te sigurne firme, e... meni ne triba, u maloj san i nesigurnoj firmi (hehe - smijen se koliko je nesigurna), ali vrime pokazuje da je baš to najsigurnija opcija... pogotovu kad se prodaje znanje i pamet, kad se ne ovisi prikovišje o dobavljačima i kad praktički moš radit iz bilo kojega kraja svita za bilo koji kraj svita. ča se tiče moje firme ipak ću 2008. zaradi početka banane, recesije, a i mojih privatnih problema smatrat lošom. puno smo bolje pri radili, a i jopet kod nas je med i mliko u odnosu na ono ča je kod drugih. ča se tiče 2009. gren reč samo ovo, priživit će oni ča zna:

• jasno i realno sagledat tržište i ljude
• jasno i realno sagledat sebe
• bit skroman
• ne arčit
• puno radit
• puno učit

ostali će otič u prdac, ali to opče neće bit loše. uvik nevajano mora krepat, da se stvori štagod dobro - tako je to u poslu.

meni je zasad bitno da posal gre, da se ni krepalo o' gladi i da jedan dan vazmen bokun broda. oni ča odma misle stvorit firmu sa 5000 zaposlenih će sad prolazit malo teže, a oni ča sve u životu grade pomalo, korak po korak, s pacijencon, na dobrin temeljima, bit će bolje sriće.

 -------------

napomena: nisan ekonomist vengo inđinjer; ova promišljanja su zasnovana na zdravoj pameti te mom životnom i poslovnom iskustvu.

e... gledajte, slušajte, guštajte....

e... ma ajde šta tot floćaješ vruće je, ne da mi se,  notaj štagod duže, da jeman šta čitat - arivala mi je poruka i štaš sad, nekako me ni voja pisat, a jopet svit bi tija čitat.

nima mi druge vengo dobit volju, uključit klimu i notat štagod, e... ne notajen ovod sve u realnon vrimenu, dikad se ošervan i bokun unazad, pogledan put godin ča su odavno finile, spomenen se i peršoni ča su finile na ovemu svitu. e bravo, kad san već kod tih peršoni ča ih višje nima, jeste li sinjali kad čitate šonete da su svi bili dobri, plemeniti, najveći kumpanji, kruv o' čovika, najdraži očevi, matere, jubjeni i voljeni, e... nima drugovačijih, pari ka da oni ča su partili nisu nikad njanci zabeštimali, a kamoli ikome štagod grubo učinili, e...

tako ću se ja danas sitit jednega moga susida ča je partija jema nešto godin, a narafski bija je puno dobar, ono kruv o' čovika i zaradi tega mi je upravo i pala feta kruva na pamet, zaradi ničega drugoga, e...

ma ko, šta, di, a? e sta je ti susid na pod o' ispod mene i gušta je činit dišpete, ali nisu to bili bilo kakvi dišpeti, bili su to ni višje ni manje vengo smrdljivi dišpeti, dišpeti za udušit se...

tako je jedan put kolafinta nešto piturava virovali oli ne 79 dan (ričima: sedamdeset i devet dan). morete li to virovat, a? smrdila je cila kuća, smrdila toliko da smo se višje i navikli, posta je ti smrad dil naših života, a da nam doživljaj bude potpun, stavija je ti šjor dobri susid terpentin u pokriva o' recimo marmelade oli drugih raznoraznih važi i nareda to na ogradu o' balkona. na sunce, e... liti, e... asti gospu, čujen kako sad govorite, koja perverzija, e... ma di mu je tako nešto palo na pamet, a? e palo mu je i sve smo to trpili i gucali, ko je smija šta reč, a? a i kome bi reka, a?

ništa, smrdi, privikli smo se, prolazi vrime. jemala san u to vrime lipe garifule na balkonu i kad je moj vrli susid čuja da ih zalijen, odma je napravija napad. šta je učinija, a? ni manje ni višje nego je zva policijote. e to je učinija, zva je puliciju, a policijoti su i arivali. kad su arivali još mu je žena poslala i unuke da me napadnu bivajuć duboko uvjerena da će im to o' isprid policijota bit puno lako. e ma zaboravili su jednu bitnu stvar. koju, a? terpentin. terpentin u pokrivima. na suncu, na ogradi balkona.

- ča ovo smrdit za popi*dit, a? - odma je pita čovik ča je organ narodne vlasti.

- terpentin - rečen ja.

- terpentin? - pita jopet policijot.

- e - potvrdin ja.

- a ča s tin činite, a? - reče policijot.

- ja ništa, eno pitajte susida doli, a prije vengo pođete u njega povirite mrvicu s ograde moga balkona da vidite ča je sve nareda na ogradu svoga balkona.

*****

u isto vrime unuci probali fizički napad uz poklič da će virovali oli ne silovat i ubit.

*****

organe narodne vlasti san obavijestila o' temu da su na dužnosti i onda su se sitili tim vrlin unucima napisali prijavu, a i susidu otišli reč da miče ča ti terpentin. eto baš lipo ča je zva policijote apropo moga zalivanja garifuli, je li tako, a? vidite kako je bija dobar moj susid, kruv o' čovika. tako smo nakon osandeset dan normalno disali i s obziron na tu torturu nisan se prikovišje sekirala ča je danas bokunić vonjalo kad san polituron namazala i izluštrala parket u jednu kamaru. vonj je već pri kraju i ča je to naspram 80 susidovih smrdljivih dana, a?

narafski, sad je moj susid bija bisan za popizdit jerbo mu je terpentin-monadama doša kraj. smislija je iduću perverziju. usrid noći je počeja primištat mobiliju, vuč armerune, činit zvučni urnebes. duralo je i to danima, a onda je došla jedna noć kad mi je sestra tribala spavat jerbo je ujutro tribala partit u zadar.

smislila san nešto, e... ča, a? mome dobrome susidu, kruvu o' čovika servirat ću fetu kruva.

vazmen štrucu kruva i okinen fetu. u pupi, na vrju fete, napravila san prston bužu. kroz bužu san provukla bokun špaga i vezala ga za fetu kruva. drugi kraj špaga san vezala za ogradu našega balkona.

asti sto urnebesa, susidi s druge bande kvarta su mu ujutro najranije, kad su sinjali fetu kruva kako visi, vikali: alo, oli si gladan kad ti susidi spuštaju fetu kruva na špag, a?

ako dođu policijoti, reč ću im da puno volin beštije i da je ta feta kruva da tiči jemaju šta izist. u međuvrimenu san š njon povuci-potegni oli ka tiramola. mic doli mic gori, ali nikako mu ne dan da je se dočepa. onda je zva i sad ex pricidnikovicu kućnog savjeta da mu pomogne skinit tu fetu. eto tija je kruv o' čovika da ona tu fetu vidi i pomogne mu se popet na katrigu da je skinu. kako ona nije kruv ka on, nije se penjala na katrigu, moglo je to bit prikovišje opasno. opasno po život, e...

kako je ovo finilo, a?

nikako, e... skinila san je ja kad me predstava štufala, a moran priznat da mi je bija gušt bokun vratit tome kruvu o' čovika baš feton kruva. poza par godin o' tega je finija njegov život i sad drugi jemaju višje prostora za monade, e...

eto, tili ste tekst, dobili ste tekst. ovo mi je za rubriku biseri i dragulji - najbolji susidi na svitu. gren ča, jemate pozdrav!

e...

lito je, prikovišje vruće, teško je sad notavat duge tekstove. teško je takve tekstove sad i čitat.

to ti je isto ka i sa spizon, ko bi sad recimo udrija po teškoj spizi, paštafažolu oli po pašticadi i njokima, a? stađun je o' laganih stvari za izist. koja ribica, koja praska, feta dinje, štagod cate.

iako nan je "puno lipo" apropo bagaja koje nan vlada oče/neće natovarit na škinu, neću danas nikoga ovod zamarat teškin temama. neću, štufalo me... neću jerbo dogodit će se da ćemo postat tutokompleto dišperana nacija, e... e a to neće bit dobro.

oli ženi/čoviku ni dosta kad je dišperan(a) zaradi tega ča je/ga ne jubi oni/ona ča ga/je voli, a? ne tribaju nam još dišperani zaradi kojekavih drugih monadi, e... finit ćemo notavanje,  jeman jednu dobru pismu, a gre za sve one ča su dišperani zaradi nesritnje jubavi. u klapskoj izvedbi, guštajte.

tomislav bralić, guštajte, puno lipa pisma za vrime prije vengo se pođe leč.

e a šta ćemo, neke (i ja san među njima) sutra toka radit, pa se ne more čekat zoru, vengo oko ponoći, uvrj glave bot, kušin pod glavu i u pajun, e...

e... mačak koji voli tantobus. svaki dan se lipo ukrca, vozi i ko mu je ravan, a?

e...  radila san jutros, pozapodne kroza konfužjun vozila tonobil i sad san virovali oli ne umorna.

ipak, o' tominih pisama i besid se ne moren nikad umorit.

zaradi tega ajmo ča malo Tome, ovo je nešto baš dobro...

more je da vam otkrijen tajnu najbolje o' svega ča mi se danas dogodilo.

zaradi tega tajne mora...