s moje ponistre by XVII - klik za veće, more se bitno uvećat

dikad triba fermat i disat trenutak

ča je oko nas,

ča se vidi s ponistre...

poza puno rada, najbolje je poslušat štagod lipo..

e...

sad svi pitaju: a koji je tonobil u điru, a? puno je kurjožih, sve zanima odgovor na to pitanje, to je postala najvažnija stvar, ne bi da je to stvar od nacionalne važnosti hehe

najprvo ću vam daklem napomenit da san ja žensko. to oče reč da me ne zanimaju pretjerano KS koje ionako niman di rastegnit (autocesta jema ograničenje od 130 km/h). najdrugo, u obzir san uzela i činjenicu da san početnik, preskup tonobil bi bilo šteta dat početniku. najtreće, meni se tonobil triba sviđat vizualno, mora bit neki mali, šesni, nikako tenk. tenkove i zviri ću prepustit muškima. najčetvrto, mislin da za tonobil ne triba potrošit višje od nikih 20 000 , 25 000 euri, to je tek kanta lima, neka skuplje vazmu tajkuni.

tonobili koji mi se sviđaju, ali za koje opće nisan išla tražit ponudu jerbo po cifri nisu za početnika su:

• mini moris
• citroen C1
• citroen C2
• VW lupo

ajmo ča dalje, da vidimo ča jema za 10 000 eurića i ispod tega, a da je tonobil ča je po mom ukusu. evo tonobili za koje san tražila ponudu. među njima se krije i izabrani (to je oni za kojega je sklopljen ugovor, učinjena uplata leasing kući, koji je već osiguran itd.).

fiat panda - oko 10000 eurića 

fiat seicento - oko 8900 eurića

za ova dva tonobila san ponudu tražila u autokući šta zastupa fiat i ča je vizavi groblja, a zove se autocommerce hrvatska - čovik ča tot radi je bija vrlo ljubazan i susretljiv.

za spark chevrolet smo se raspitali u PSC Dalmacija - odjel vizavi groblja, pa su oni ljubazno kontaktirali kolege iz odjela prodaje novih sparkića. javili su nam da za sparkića triba izborojit (ovisno o opremi) 8000 eurića pa do 8500 eurića. čovik je također bija vrlo ljubazan i susretljv.

renault twingo (jeste li ga opće poznali, a? ovo je novi twingić) piza 8900 eurića. narafski, sa jačin motoron cifre su jače. za sve tonobile san pitala za opciju nešto slabijeg motora, to je za moje potribe sasvin solidno, ne triba meni tonobil za činit trke, vengo za život svagdašnji, e... za twingića nam je ponudu sasvin solidno i ljubazno sačinila auto kuća gašperov.

aaa, evo još francuskih mališana. peugeot 107 (livi) i peugeot 206 (desni)

ac vukman iz kaštel starog nam je sasvin pristojno ponudija peugeut 107 za oko 10 000 eurića (ovo je cifra sa bitnim popustom), a peugeut 206 za 9300 eurića (i ovo je cifra s bitnim popustom). ne, nisan falila notat, malecki je skuplji od većeg, e...

sve cifre su s PDVom za gotovinsko plaćanje. ovo su narafski cifre brez osiguranja - osnovna cijena tonobila, ali sa klimom, sa servom, s abs-om,... daklem s onim šta je danas zapravo već standard kod tonobila.

--------------------------------

a kojega ću vozit, a?

e, to čitajte u nastavcima ča slide, e... ekola, to je to zasad. pozdravljan lipo.

------------------------------

u koluri indiga by XVII, slikano jutros, klik za veće

e...

evo me. evo koliko san uspila učinit danas:

- sredit na leasing kući svu kartušinu - ugovor, mjenice i ostale papire

- poč u bilježnika i sredit bjanko zadužnicu

- vratit se na leasing kuću i donit zadužnicu

- učlanit firmu u hak

- osigurat tonobil obvezno i kasko

- uplatit ucesce, prvu ratu i troškove

- poslat uplaticu leasing kući

na brzake san obidvala i u hodu opremila 2 stranke.

tonobil je još u autokući, teplo se nadan da će iduću šetimanu bit na tekničkom i na registraciji. kad se sve sredi, doznat ćete sve detalje tipa: ko šta di... moren reč da su mi svi bili pristojni i ok. do tad: strpljen - spašen, povirite na ovi blog i jopet. ajde, za puno kurjože ćemo otkrit koji detalj o' tonobilu: novi, europski, jako poznata marka, s klimom, sa zračnin kušinima za vozača i suvozača, s radijom, cd i mp3 playerom, a abs-om, sa servom, sa modernim zaključavanjem. aj, to je zasad dosta :o)

e...

uštekan se maloprije na www.facebook.com , kad mi stigne o' sandre da popunin kviz. ka, koji lik iz bajke čuči u mom tilu?! hm? ajmo ča probat, baš san kurjoža: ko čuči? valjda neće ispast vištica, e... odgovorin ja pošteno na sva pitanja (nije opće teško) i ispadnen alisa u zemlji čudesa... uz komentar...

a sad gren ča u realnost, gren bit nada u zemlji čudesa (hm, pogledajte samo te riči, nada u zemlji čudesa - koje duboko značenje) i gren u bitku s kartušinon, mjenicama, zadužnicama, bilježnikom (on je inače divan čovik, ali ne volin kartušinu), ugovorima, leasingom, osiguranjima - mislin da ću oko ovega tonobila ostarit u ovoj lipoj i šesnoj zemlji čudesa, stvarno

adio vice, fala za sve lipe pisme...

boris i dino, sa spliskih zidova by xvii

"nema više borisa,

nema više dina,

povuklo se more,

raspukla se stina.

puno manja sad se

čini splitska bina..."

e... događaji koje pratin, a?

krov - danas su viđeni meštri i čulo ih se da nešto majstorijaju na krovu. višje informacija zasad niman.

----------------------------------------

tonobil - obašla san autokuće koje san mislila obač, pokupila ponude. svi su bili ljubazni i susretljivi, a di san sve bila i koji su tonobili ušli u uži izbor notat ću kad projekt tonobil bude gotov.

financiranje? e, kako mi tonobil triba najviše zaradi posla, onda će se kupit na firmu. firme koriste leasing (postoji čitava filozofija zaradi čega se tako radi, možda jednom i notan rič dvi o temu) za tonobile, pa će to radit i moja. kontaktirala san nikoliko leasing kuća, svi su bili ljubazni i susretljivi, a firma je dobila odobrenje za leasing tamo di se odobrenje i tražilo.

ako mislite da se dobije baš lako, nije, ma ke, e... triba vam ponuda dobavljača, podaci o firmi, tribate jemat BON1 i BON2, a ako se ne radi dobro, bonitet nije ni moguće dobit, zatin van triba brdo kartušine koju ćete izvuč iz računovodstva: prijava poreza na dobit, bilanca, račun dobiti i gubitaka, zadnji statistički izvještaj, obavijest o razvrstavanju poslovnog subjekta prema NKD, potpisni karton, osobna diretura. leasing nećete dobit isti sekund, vengo vam firma, odnosno poslovanje gre na procjenu, pa ovisno o brzini djelatnika leasing kuće ča se zove analitičar odgovor dobijete isti dan oli za dan dva. minimalno ušešće je 20%, ali opće se nemojte iznenadit ako leasing kuća zatraži i višje, no to ne bi triba bit ogroman problem, barenko ne za tonobile ča su za rvacke prilike - ne mislin sad na jaguare, ferrarije i sl. zviri -, uplatite višje, a onda plaćate za rate manje, pa vam manje pinezi ode i na kamate.

eto, toliko san uspila napravit uza sve obveze i prehladu (radimo od jutra do mraka kako bi finili jedan posal, a danas smo uza sav posal jemali i poslovne razgovore sa jednin šjoron iz metropole - XVII jedva diše, a po bolovanje ne gren jerbo to samo znači gubit vrime u ambulanti i radne dane ako bi mi nekin čudom odobrilo bolovanje (privatnik ga u rvackoj malo teže dobije, samo jednom u životu san ga pitala i onda mi je rečeno da je od vrja stigla priporuka da se poduzetnicima ne daje bolovanje i tako ja niman ni dana bolovanja . čuva se naše zdravstvo za ovakve, njima daju i pretporodiljne na trošak nas pi*da, poreznih obveznika ove bidne, prebidne zemlje. )).

od svih likarija najviše mi je pomoga prženi cukar.

popit ću večeras još čikaru, pa će bit bolje ;) čeka me još finit ovi poduhvat ča san ga nazvala tonobil, pa ćemo onda sve reč: i koji i di i koje kolure i tako to, e... do tad budite malo kurjoži, triba i to čoviku

ekola, gren ča radit, posal zove, još nisan gotova za danas, ma ke, e... pozdravljan lipo.

plavo by XVII

e...

foji i tv su puni antikorupcijskog programa, pogotovo sveučilišnog. otkrivena je jamerika, bravo kolumbo! o temu neću jerbo notavalo se na ovi blog o temu onda kad foji nisu tili, e...

trenutno mi je zanimljiv deklarirani antifašista koji katkad, zaradi kako kaže folklora, piva juru i bobana.

postavlja ti šjor nike granice od ispod i iznad 10 000 eurića.

zanima ga di su oni iznad 10 000. hm?!

aaa, šjor pricidniče, da di su, a? me je li vi to nas ka i uvik zasmijavate, a? ne moren virovat da se to stvarno pitate, e...

ošervajte se bokun bolje oko sebe, stavite očale ako su vas uvatile, kako kažete, godine, pogledajte bokun u "puno uspješne" gospodarstvenike koji su se obogatili priko noći isključivo o "puno rada". to su vaši kumpanji, a ne moji. ja ih znan i o' prije '91, znan ko su i šta su bili i zaradi tega ča znan ko su i šta su ne rečen im njanci dobar dan kad ih trefin, a vi š njima pijete i volite štagod izist. tot recimo dogovarate prodaje/kupovine po kunu onega ča vridi višje od 10 000 eurića, puno višje, e... tako vas takvi svituju, e...

i čemu sad komedija? da di su, a?

evo, ja ću vam šapnit, a vi nemojte to nikome reč jerbo ne bi bilo lipo da se zna: vama i onemu drugome pricidniku, onemu o vlade, uz gujicu su, eto di su, e... mrtvi, duhovi, živi, sasvin svejedno. jerbo, ko je jamija, jamija je; ništa se bitno neće prominit u državi rvackoj, tresla se brda, rodija se miš.

iĐemo dalje! 

iz samog centra by XVII

najava događanja, 77. mrduja - klik za veće

iz lipote zvončaca by xvii - slikano jučer, klik za veće

e...

jema jušto 4 godine da san potpisala papire i osnovala tvrtku Parametar doo. radit se počelo nešto kasnije. to je sad već povijest koje se lipo sitit.

a kako smo danas? odlično, a bit ćemo i još bolje. za firmu danas rade krasni i sposobni ljudi (vidi: http://www.parametar.hr/index4.html), referenta lista raste (vidi: http://www.parametar.hr/index1.html), svakodnevno jemamo upite o' strane klijenata konkurentskih tvrtki koji žele prič kod nas, odradili smo poslova i poslova za tvrtke i mnoštvo građana, uvik ispoštovali rokove, sve uspili naplatit, nikome se ne duguje, dajemo u humanitarne svrhe itd.

jesmo li se obogatili? nismo. nismo još. nismo mogli na brzaka jerbo nismo u partijama, nismo u mafiji, ne peremo pineze, ne švercamo, ne kredemo...

držimo se ovih načela: kvalitetno, sigurno, vridno i temeljito. tako se uspije na malo duže staze, ali takav uspjeh se ne sruši ka kula o' karata, ma ke, e...

fala svima koji su bili uz mene kroza ove godine

(koje svakako nisu bile lake),

posebno fala judima ča rade za Parametar doo,

bez njih i njihova rada Parametar ne bi bija ovakav kakav je danas.

a kako krov? jučer je bija ti sastanak o' kućnog savjeta, a danas mi pave antičević predstavnik suvlasnika na mažuranićevo šetalište 8C nije zna odgovorit na pitanja: kad i ko će izvodit radove na krovu naše zgrade koji protapanjava već 3 miseca?!

o svemu sam i jopet izvistila hrvoja miljanića iz stanouprave.

protapanjavanje gre dalje...

e...

ka ča znate nisan član njanci jedne partije. bogu fala. koliko vridi članstvo u partiji za napredak? recimo traženje posla.

hm? evo, ja nisan niki veliki poslodavac, malo poduzeće. ljudi se tot ipak zapošljavaju. životopisi stižu. uredno zapriman i one koji su naznačili da su članovi hdza, sdpa i sl. e ma je li im to pomoglo da dobiju posal kod mene? ne. dapače, samo stvara kontraefekt. možda bi im pomoglo da pođu tražit posal u hdz oli u neku firmu di je vlasnik hdzovac oli sdpovac. ja gledan obrazovanje i sposobnost jerbo svaku kintu moran realno uprivredit, ne mogu klijentima reč: skužajte inđinjer oli profešur je trenutno na partijskom sastanku pa ćete čekat malo. a šta kažu drugi, a? sa sviton iz politike ni niman nešto posla, pa tako tot niman ni pojma šta kažu, ali svit ča realno zapošljava ljude i upriveđuje kune mi govori da se na takve napomene u CV oli životopisu samo dobro nasmije i čak stavi napomenu: ne pozivati na razgovor.

jutros san jemala priliku vidit jedan cv u kojen se peršona ča traži posal poziva na političare koji će kako kaže svin sredstvima garantirat za nju i čut peršonu ča daje posal kako govori: je, je, ovu peršonu sigurno zoven, nima šta e...

koliko onda vridi članstvo u partiji, a?

evo moga odgovora: vridi ako posal tražite u partiji, a ako posal tražite u Parametar doo, ne vridi ništa. to je tako i ča se mene tiče prominit se neće.

sad nas je vižita hrvoje miljanić iz stanouprave. prigleda je sve šta protapanjava, primija na znanje i zaključija da se problem mora hitno riješit. još mi je reka i da je natječaj za sanaciju krova za našu zgradu proveden. ovi čovik je bija vrlo pristojan.

e... probala sam kontaktirat stanoupravu.

da vidin je li uopće iko tot zna za nas.

jerbo, virujen da ih je šjor pave obavistija.

br. 340-700 centrala

gospođa se ne želi predstaviti, vriđa na najgori mogući način

zatim zovem br. koji su oglasili na internetu, dežurni nadzornik

čovik mi kaže da je u pločama, dade mi drugi broj moba.

tot je neko pristojan, kaže da se zove kilić i dade mi broj 340-600 iza kojega je tajnica za koju kilić kaže da se zove ivana milardović.

ta gospoja kaže da nema pojma o našoj zgradi, ne daje mi nikakve informacije i vrlo bezobrazno poklapa slušalicu...

sve je to za uredno plaćanje upravitelja svaki misec.

e...

obavezno povirite ovod:

http://www.xvii-online.com/p-petak-13--protapanjaloooooooooooooo/158297.html#links

to je bilo na 13.06.2008.

evo ča je jutros poza obilate kiše:

- jopet protapanjalo

- protapanjalo na stara mista

- protapanjalo na nova mista

- kajine vode iskričemo iz hodnika cilu noć

- voda prodire blizu instalacija o' letrike i to mi nije drago

- narafski, još uvik se ništa nije napravilo oko popravka, samo se proforma sastanči, arči vrime na birokraciju i pi*darije, a vrime teče, voda teče...

evo litrati iz moga doma o' jutros. jedan je i s oglasne ploče portuna, vidite datume: 

narafski i jutros je o' šteti obavišten predstavnik suvlasnika pave antičević, a ča se tiče upravitelja ovod ću notat da se zove stanouprava.

ako se ne daj bože zgrada užge, molin koju dobru dušu koja je ovo pročitala da puliciju uputi na moj članak. misto: mažuranićevo šetalište 8C, split, vrime: 21. vik

• izgled: leši mol.
• ćuti se: ka da jedna obotnica čapaje grlo.
• najbolje je: pustit crno ka sipa i uteč u postelju.

e...

ovo van je prehlada svitu moj opisana priko plodova mora.

to čapa one ča su uvik u moru ka ja ako zaborave odma prominit kupaći oli mudantine (kako ko).

kako nan je radna nedilja tek maloprije finila, XVII ovi momenat proglašava spasonosno bolovanje.

durat će do sutra. a šta ćemo, a? bolje išta vengo ništa, e...

ekola, gren ča, triba se ličit.

e...

libri. baš ih volin. uvik nešto čitan. evo šta je bilo u zadnje vrime, šta je ovi momenat i šta me čeka na škanciji za dane ča slide. 

Marina Lewycka: Kratka povijest traktora na ukrajinskom - odličan libar, nikako nećete falit ako ga vazmete čitat, pročitala nedavno, oduševija me.

Cecelia Ahern P.S. Volim te - upravo čitan, početak je odličan, a virujen da će i do kraja bit izvrsno.

Pavao Pavličić Devet spomenika - ovi me libar čeka na škanciji ka idući ča ću čitat, komentare još neću davat, ali sve šta san prije pročitala o' Pavličića bilo je višje vengo dobro.

konfužjun by xvii, slikano mobitelom

ajde da zabilježin:

večeras san dovezla tonobil o' splita do omiša 12. put, ali 1. put sa vlastiton odgovornošću tj. s vozačkom.

instruktoru boži sušiću fala na svekolikoj pomoći i poza polaganja ispita.

Navijač na sinočnoj utakmici (koju smo popušili) koji je puka na živce!
Just kidding, to je daska za šumprešavanje sa šumprešon i robon. 
 

by Polježičanin

original, klik za veće

ekola, pogođeno... a ovo ča je na litratu je stvarno šumpreš oli pegla/glačalo... jednega s daskon jeman u uredu, pa kad nima konfužjuna sebi lipo šumprešan robu za šetimanu ča slidi.  to se zove dobra organizacija, heheh.

ovo je ujedno i odgovor na pitanje koje mi je arivalo oli stiglo, a glasi:

Dobar dan XVII, znate li šta je to šumpreš? Fala.

evo jedna mala zagonetka. šta bi to moglo bit, a? klik za veće :o)

od dina ćemo se oprostit pismom...

 kašuni danas pozapodne by xvii, slikano mobitelom 

e... najbolje je dan započet plivanjen. današnja rutica: od ovčica do kavala i nazad oli uza mrižu. još kad jemaš navijače, jo, gušta...

litrati by xvii, slikano jutros najranije.

pozdrav s matejuške

niki detalji iz dioklecijanove palače, kala pusti me proč, skale

sve se more uvećat klikon,

potpisujen one litrate na kojima nisan ja...

http://www.facebook.com - društveni site 

slatko, za sve one ča u sebi još uvik jemaju bokunić diteta, za sve one ča se znaju radovat kad nađu kumpanja oli dobiju virtualni darić.

jedna krasna pisma... guštajte!

e...

ključno pitanje glasi:

poč odma sam vozit poza polaganja vozačkog oli ne?

drugo ključno pitanje glasi:

ako s nekin greš, ko bi to moga bit, a da bude od koristi, a ne od štete?

pitala san ovo stotine judi kroza vrime dok mi je durala autoškola. jerbo, ko pita ne skita, e... svi su mi odgovorili da je najbolje da za početak ipak bude neko, da split ipak nije selo, da je promet velik i da se ne kockan životon. narafski, nisan se ni mislila poč kockat, išla san najprvo u autoškolu i stekla vozačku, a sad ću još učit da stečen i još malo sigurnosti i potribnog znanja, e... možda bi sama probala vozit na nekoj ledini di nima prometa, ali po gradu odma poč sam, me ke, e...čak mi je i hakov ispitivač reka neka prvih nekoliko puti pođen s nekin, e...

dakle, odgovor na prvo pitanje mi se formira u glavi. ne odma solo i to je to.

a s kin poč, a? svit mi je napriča priča i priča o bratu, susidu, rođaku, kumpanju, ocu, materi, puncu, svekru, mužu, momku, sestri itd., a jedna mi je peršona čak rekla da je išla s bivšin za početak vozit - sve te priče su slične, vježbat se još triba jerbo u prometu jema itekako novih i opasnih situacija za početnika, a malo ko je jema sriću da to dodatno učenje prođe s pacijencon, brez grubih riči, brez opasnih situacija. nakon šta san sve to čula nije mi se išlo u prvu vožnju poza polaganja na takav način, ma ke , e...

zaradi tega  san napravila ovi plan:

• prvu vožnju ću napravit s instruktoron tonobilon u kojen san učila vozit
• vozit ću i još nekoliko vožnji na taj način - mislin da je to ok, instruktor me pozna, a jema i duple komande za slučaj potribe. sad višje neću vozit na način da mi se govori sad livo, sad desno, vengo ćemo zacrtat cilj tj. triba doč do tu i tu.
• poza tega ću prominit tonobil, ali instruktor će još bit malo sa menom
• tek poza tega ću poč vozit sa nekin ko jema vozačku, vozi i jema pacijence par puti
• na ovom stupnju ću poč solo u ure kad nima konfužjuna
• idući stupanj je solo u bilo koju uru.

prvu točku san ispunila danas.  moja prva vožnja s vozačkom. yeeees!

solinska-slobodna dalmacija-vukovarska-fesb-stadion-tot se zavrti-škver-mljekara-domovinskog rata (brzi dil)-solinska

do fesba san vozila onako u stilu vozamo se pa di dođemo, a tot mi je instruktor reka sad put stadiona. onda smo jopet išli pa di stignemo, a na brzon dilu domovinskog rata je zaključeno da gremo na solinsku.

nije bilo loše, vozila san sasvin solidno i vrlo san zadovoljna. instruktor mi je reka da san bila jako dobra i da je on zadovoljan. tako san sritna zaradi tega. moren van reč da se opće nisan ćutila loše, parilo mi se da tonobil sam gre, cilin puten smo ćakulali i smijali se. sad gren dalje po zadanin točkama i virujen da će bit dobro - glavno da je moja šoferska karijera je počela, vozačku ni slučajno ne mislin držat u škafetinu, e...  

eto, to je to, mome uzbuđenju nima kraja.

kampanel by xvii, tempera 2006.

obično ovod notan kad neko od mene dobije rad na dar.

ovi je danas uokviren u srebrno otiša na dar mome instruktoru boži sušiću - zaslužija je čovik.

xvii i najlipša vozačka na svitu

permis de conduire za be, vridi i za traktor, e... :o))))))

bila san jutros na puliciju, a najprvo kod dotura jerbo mi je jopet tribalo uvjerenje (staro je vridilo za autoškolu i hak, ali ne za puliciju, pa je tribalo učinit i narafski platit novo). osin uvjerenja ča nije starije o' 6 miseci još vam je potribno jemat dvi slike, a za troškove na samoj puliciji pripremite 70 kunića, 35 za uplatnicu koju ćete dobit na šalteru i 35 za taksene marke i još kuna dvi za kopiranje. ne zaboravit hakovo uvjerenje o položenom ispitu. jutros nije bilo konfužjuna, za učinit vozačku tribalo mi je oko dvadeset minuti. to je narafski najlipša vozačka na svitu, zaslužuje i ponosno slikanje za net :o)

sad me svi pitaju: a koji ćeš tonobil vazest, a? ne znan još, ali triba bit mali, šta manji to bolji, jedino smartića ne jerbo mi on nije drag. mora bit i lip. ne smi bit prikovišje skup. ne smi prikovišje trošit. traženje će odnit neko vrime, a iskustva sa autokućama ću također popratit na netu. realno i objektivno, e...

ekola, guštajte, gren ča.

sunce gre leč, acymix by xvii, klik za veće, slikano večeras

e...

jutros san nešto za poslon poviri u split 3, a poza tega u jednu veliku i poznatu papirnicu na temu području. počela je skula, roditelji vazimlju sa škancija svašta za dicu, potribno i nepotribno.

vidin tako sasvin solidan primjer loše odgojenoga diteta. izbor je fantastičan, može izabrat pernicu svih mogućih koluri i marki i između svega tega ona oče baš jednu jedinu i to najskuplju. narafski, ako je nešto najskuplje, ne mora značit i da je najbolje - meni se ta pernica opće nije svidila. mater joj pokušava objasnit da je pernica preskupa, neka pogleda još malo, ali mala zapela i ne pušća. oče baš tu uz obrazloženje:

- neće mi se cili razred smijat. najskuplja pernica i točka! gotova diskusija.

pernica je već u košari, mater sad muči, pa je i jopet malo gleda i pita:

- e pa ako si izabrala ruksak ča piza više od 50 euri, je li baš moraš i najskuplju pernicu, a?

- moran, ja vridin, nisan škovaca. uostalon, neš ti 50 eura, šta moreš za to, a? - "razborito" će čer.

asti sto, mislin se u sebi... evo šta san nikidan kupila za 50 euri:

- ruksak nike

- majcu kratkih rukav adidas

- majcu kratkih rukav x- fact

- šuškavac s kapon kilimanjaro

sve ovo zajedno 50 euri, e... dobro, a? vengo šta, e...

daklem, draga dico, eto toliko ja vazmen za 50 eura i ne mislin da san škovaca. radin, zarađujen, jeman vlastito poduzeće, a ča se tiče skule jeman i magistarsku diplomu, nisan učenik od 10 oli 15 godin kojemu tek predstoji postat čovik. znate li ča je vridnost, a? znanje koje ćete steč, a ne najskuplja borša i pernica u butigu, e... bidan je oni ča svoju vridnost tako miri, a pogotovo ako pineze za takvo arčenje nije sam zaradija, e...

poza ovakvih štorija štufalo me gledat po škancijama, vazmen nikoliko lapiša, koju gumicu za brisanje i još par sitnica, platin i gren ča. dobro će mi doč za učit one ča će koji šold dat i za znanje, a neće sve proarčit za pernicu.