e...

jema nešto dan, točnije 04.09.2009., da san produžila članstvo kod haka. učinila san to jerbo ako mi tonobil stane nasrid ceste, oču jemat pomoć. nima višje nešto posebno muških kavalira na ovemu svitu, ali i da jema ni najbolja kavalirština mi ne bi pomogla ako je tonobil odlučija da neće krenit. hak nudi još dosta pogodnosti i mislin da je to sasvin ok stvar.

kako je tonobil na firmu i članstvo u haka je na firmu. firmi narafski triba račun jerbo račun računovođa triba proknjižit, arhivirat i tome slično. pitan ja račun u haka u splitu di san gotovinski platila članstvo (ti dil je di je lučka kapetanija i brodospas), međutin oni mi reču da zoven na 987.

- hak? dobar dan, produžila san članstvo, znate na firmu mi je, pa bi mi triba račun itd., bla bla bla - s pacijencon objašnjava malo žensko zovući 987 koji mi je dosad ipak pomoga kad mi je tribalo.

- dat ću vam broj odjela članstva - dobijan odgovor

na odjelu članstva mi pak daju broj o' dvi peršone iz računovodstva koje su neko vrime ko zna di, ali uporna san i nakraju dobijen niki žemski glas koji se čudon čudi ča je zoven jerbo to nije njezin posal, pa eto, ona će ipak bit ljubazna pa će mi dat broj od peršone koja čini fakture.

zoven dalje, ne dan se. naredna peršona je pak čudom začuđena ča zoven nju jerbo to je neko drugi triba sredit, ali eto, ona je savjesna i ako joj pošaljen skenirani odrezak uplatnice, poslat će mi račun.

šaljen skeniranu uplatinicu, škrabica mi i dalje prazna, računa nima...

nakon nikoliko dana zoven jopet. jopet desetak telefona, poslat će, kažu sa jednoga, na kraju me jopet vraćaju na 987 - grrr, neću višje telefon, oču račun.

znate di san bila danas? doli na rivu, u haka, kod brodospasa. došla san pitat da mi reču di bi višje mogla dobit ti račun. dadu mi neki telefon, ali sad u splitu. ma grrr, neću telefon, oču račun.

na kraju san ga dobila baš tot, di san ga počela pitat 04.09.2009. kad san gotovinski platila članstvo za narednih godinu dan. napisa ga barba iz haka isprid mene.

super! oduševljena san! konačno jeman račun! koji je to bija križni kružni put!

e...

danas san obavila jedan obećavajući razgovor apropo posla.

veselin se zbog toga.

pozapodne san učinila đir. bilo mi je lipo. podilit ću to i s vama.

povirila san do fotokluba u marmontovu. tamo dura izložba. šta, a?

povodom 50. godišnjice Podvodno-istraživačkog kluba Mornar Galerija Fotokluba Split predstavlja izložbu podvodnih fotografija Mare nostrum Croaticum – More mornarevo. 

dobro ste pročitali, podvodnih i stvarno su impresivne. evo jedna.izložba dura do 5.10. , ulaz je ka i uvik besplatan, povirite.

a jeman li ja koji litrat za danas?

da vidimo, nač će se nešto u mobitelu. evo, sunce gre leč, laganini se provlači kroza palme. gleda i virka prije vengo se pozdravi za danas.

isto sunce jemamo svi, ako postoji razlika, to je samo u kutu gledanja.

triba se znat radovat. 

sunset by xvii, slikano mobitelom, klik za veće

bija je ovo jedan lip dan, a ja vas lipo za danas pozdravljan dragi čitatelji...

e...

i ne taren suze

jer najviše vride s osmjehom kada se cide. 

fermajen ruke, vesla i švere,

mislin na luke za svoje nevere...

e... beskrajno fala svima koji mi nisu tili dat posal kad san ga tražila, zafaljujući tim mojim dobrotvorima danas jeman vlastitu tvrtku, a sad ćete vidit nike litrate nastale danas i to u vrime radnoga vrimena.

danas me tokalo poč u gašperova po twingića. e ali danas je bilo vruće.

vazela san twingića i rekla, ne, neš sad tražit misto po gradu, idemo na kašune, idemo se kupat, pa ćemo misto tražit poslin 4 ure kad svit rastereti centar.

4 puta u more. plivala san ka dupin. bilo mi je ludilo. ko ovo more platit, a?

a posal nije patija, dođe meni sve na mobitel tako da san sa svime u toku.

sve se nešto mislin kako bi se u deseton misecu mogla i češće napravit repriza ovakog radnog vrimena ako bude lipo vrime. 

a nogice, a? nogice su moje...

a misto za tonobil? iza 4 ure san ga narafski našla odma. eno gledan twingića s ponistre...

e...

moran pošteno priznat da san na visu zadnji put bila ka dite i to ono malo. odveja me tamo moj pokojni dida i nije da mi se nije svidilo, komiža mi se trajno usikla u pamćenje, ali brate mili te oko 4 ure do visa su mi prikovišje...

to se isplati samo ako greš na više dana. za lastovo vridi slično.

šolta je bliže, a za neka velika litovanja niman vrimena jerbo me toka radit. radit, e... a šta mislite odakle mi za tonobil, za laptop, za maju, za gače, za poč na murter itd., a?

fala bogu od rada, e...

vengo, šta smo ono rekli, a? šolta je bliže, e...

tribali smo poč nikidan, ali nismo jerbo je bilo ružno vrime, nima veze, bit će bolje drugi put, neće šolta uteč, e... e sad kad san van špijala da mi je na visu draga komiža, red je reč da je na šolti misto po mome guštu maslinica, ali ni u to misto nisan bila odavno.

murter je moj otok (e za doč do njega ne triba brod, jemate most), otac mi je s njega. ove godine san, fala ti bože,na murteru bila čak tri puta (sve san to ja vozila, BRAVO JA! čak dva puta san na murter odvela ljude koji tamo nikad nisu bili i odma su se zaljubili u ti otok, jubav na prvi pogled, narafski, tribala san im obećat da ćemo doč jopet), a ako bude sriće i vrimena, valjda ću i još koji. tot je narafski najlipje misto betina jerbo su tot kuće kamene, a brod drveni, e...

vengo, svi bi tili veliki brod, megajahtu. ako nije tako, ne valja. ma zamisli. a vidi ovega šesnoga brodića, a? malešni brod, jušto za od vale do vale (ma more on i do bresta, e)  - višje mi ni ne triba... hehe, gren se vozit, bit će mi lipo.

[e i nima straja ako se privrne, znan plivat, dobro, narafski. plivala san ka dite u mornara, vodija me tamo moj pokojni dida redovito na trening. danas plivan u moru od 4. do 10. miseca, a ove ću godine oko tega plivanja provat skemijat štagod i zimi... ne, ne gradin kuću s bazenon, ne udajen se za tajkuna, probat ću nešto ča mislin da će se moč, pa ćemo vidit... reč ću van kad vidin je li mi upalilo :)]

e... brime jubavi - tedi spalato , odlično, palac gori () 

 pridvečer by xvii, slikano mobitelom

e... konfužjun o' isprid pumpe je veliki, triba natankat gorivo.

furešti je još uvik pun grad.

plivala san jušto uru, a onda robu na se i pomalo doma.

usput san mobitelon slikala zalaz sunca.

e a vidi sad ovo. must oli brod murterske registracije u splitu.

meni ka i da nije jesen, još uvik je lipo, toplo.

upravo san slistila terinicu đelata.

more bit da san nikidan prerano vazela jesensko-zimske postole, čizme za kišu i cavate (ovo je stara rič, ne znan oče li je mlađi razumit, a oče reč papuče). ma nima veze, bar san ih našla po dobroj cijeni, sve će se to nosit, neće ništa propast.

gledan  izloge butiga, iste postole od butige do butige i po 150 kuna razlike, ne moš virovat.

sve litrate morete uvećat klikom, a ja gren izist još nešto lagano, a lipo.

šta, a? kurjoži smo, a? ajmo ča reč: sušene frute (voće) prelivene tekućim jogurtom - odlična večera za sve one koji oče jemat dobre kile. narafski, triba i plivat uru. hodat isto. ne uvik tonbilon, postoje i noge.

a di ćete nač sušene frute u bokunićima, a? (jerbo nećete to činit sa suvim smokvama, e). jema po butigama, marketima, u dm-a. piše 5 vrsti fruti.  vazmite i jogurt isto. eto sad sve znate, u čikaru stavite pet šest velikih žlica, zalijte jogurtom, promišajte i vidit ćete kako je dobro.

šušur I., oldtimeri u splitu by xvii,

klikom ćete uvećat i dobit linkove na svaku sliju posebno.

morete i povirit ovod: http://www.flickr.com/photos/xvii_st3/sets/72157622451563284/

he, he... kad se more ovoliko durat (jema ih čak iz 1924.) i ovako šesno izledat, narafski da se triba bit optimističan, e... jerbo jema nade, e... 

šušur II., optimisti u splitu by xvii

e... (stare) dobre stvari kojima su se pojavili spotovi na, ma kako ono kiro reče, a? ma na, naaaa, na , jubitoooooo :) 

tončicu obavezno pogledajte, jema pasa, a pas jema i fjok... nisan je baš tako zamišljala, ma ke, e...

a ako neko jema pismu di se more čut užga bi žigicu jednu da lice ti vidin u mraku, neka mi pošalje, najlipše molin za to, e... tražin je godinama, pa bi bila zahvalna...

kralj škoja - isto ludilo stvar...

e...

svak u životu kroza skulu/školovanje, posal, jubav, ma cili život općenito, naleti na neku monu oli više mona ča ga probaju iskopirat, glumit, krest mu osobnost.

nije to zaradi tega ča im imponirate, pa će vas gledat ono bokunić iskopirat ka koju filmsku glumicu, ma ke, e da je tako bilo bi to još dobro...

problemi su ovod puno veći, ali neću ulazit u detalje jerbo ja san inđinjer, a ne ni likar ni kriminališta - detektiv pulicijot.

gren ja učinit nešto drugo, notat ću koju rigu za monu br. 1 (eto ja ih nažalost jeman višje, e), jednu ča se mertojaka prije par godin doselila u moje susidstvo oli širi centar blizu općine. ma zaprav, za pošteno reč, ti mertojak joj je godinama bija tek adresa, a živila je tuđoj kući, u kojoj, poza ča se uvalila,  nije tila ništa radit, a znala je samo vazimljat, vazimljat i vazimljat.  

kako ovo znan, a? e špijala mi je tičica, eto kako znan. a pričaju tičice i o još puno kuća prije te kuće, ali nećemo baš sad sve reč. u splitu ionako svi sve znaju i svih pripoznaju.

vengo, ka je takva, dobro san je nazvala monon, a? a ča ćete, ja san pristojna peršona, pa neću duperat puno grube riči, ma miritala bi ih ta peršona još. eto toliko za opis dosta, ko(ga) se triba(lo) pripoznat, pripoznat će se, e... ajmo ča notat rige koje san rekla, e...

-------

ma kako će bit ka  ja, a?

smije se tako falšo, namišteno, brez duše. tako prazna, tako bidna, jadna, ni poštenu, judsku suzu ne more isplakat.

pari ka da joj je moreta na licu i to ona ča straši malu dicu.

ne more bit ka ja, nikako, me ke, e...

ne zna bit sritna s bokun maeštrala i pismon cvrčka, sve gleda kroza pineze, materijalistički.

masu puti do podne mrzi sebe, a od podne cili svit, čini spletke i kužine, širi laži.

na putovanje gre zaradi tega ča je baš tot bija susid, pa mora i ona da bude, kako moderno reču, in i cool, a ne zaradi tega ča je baš to misto istinski interesira...

ništa ne zna u svon životu učinit iskreno, sa puno žara.

kako će bit ka ja?

nima te ricete za bit ka ja jerbo samo jedanput je mater rodila ovakvu nadu, posebnu i jedinstvenu.

----------

ničiju osobnost (a pogotovu vrlo razvijenu osobnost) se ne more iskopirat. onemu ča to čini život postane da oprostite na izrazu kondut, a on/a najveće gov*o u njemu.

-------

ekola moje vrime višje niman vrimena(i ovo je bilo prikovišje)trošit na škovace, gren ča.

di?

a u neke sfere di sigurno lipše vonje...

e... evo malo pivanja, ali ono baš dobroga...  

e...

• twingić jopet u servisu, srića ča u renault gašperova u splitu radi šjor davor ramić koji je prema meni (a virujen i prima drugima) uvik tako ljubazan, sve mi sredi na vrime, lipo mi objasni, trudi se itd., pa ću lakše podnit dane brez autića jerbo znan da je u dobrin rukama. ovi put mu nešto šteka paljenje, ali ja virujen da će mi ekipa u gašperova sve to lipo sredit ka i uvik dosad.
• sitoma mi je napravila specijalne reklamice za twingića, to je nešto šta nije baš skroz uobičajeno, ali je skroz korisno. nije me došlo prikovišje, napravili su brzo, sve je u redu, zadovoljna san. prvi put san š njima nešto radila, fala barba boži sušiću iz autoškole sušić ča mi je da taj kontakt.
• fala i aiši milović iz poduzetničkog centra sanex split ča mi je danas poslala jednu stranku, inicijalni sastanak smo već odradili, global dogovora napravili, radit ćemo tako i još jedan posal. koji, a? e pomalo, doznat ćete kad bude vrime, e...
• fala i ankici ćurić iz pallium doo ča smo lipo i šesno odradili za danas ča smo morali. inače, u ovo vrime kad je puno ovih ča ne bi platili račune, ankicu je najvažnije znat. ona radi kompenzacije. napravit će i višestruke kompanzacije kad je potriba i do svojih potraživanja ćete doč.

gospe moja, a koja je ovo ura, a? skoro će 8, e... finito za danas, gren gledat krimi serije. ako bilo šta triba oko posla zovite sutra, dosta se danas radilo, e...

mister (šjor) savršeni oli ča to znači bit pravi muškardin... 

ovo bi bilo dobro da svi pročitaju, žene, muškarci i oni ča bi tili bit muškarci, ali se oblače ka žensko i ne bi radili vengo čekaju da ih žensko financira... nasilnici, nekulturni, brezobrazni, emocionalno oštećeni, oni ča čine žene plakat, ali i svi oni ča su sasvin ok sa ciljen da budu još bolji.

e i moj je komentar ča jema stavke nick: XVII, avatar: crna maška... samo da se zna, e...

e...

gledan ja malo ča se događa ovih dana u lipoj našoj. jema svega, lipoga i ružnoga, ali u zadnje vrime su mi najinteresantnija poduzeća čiji su vlasnici bili u velikon prijateljstvu s doturon ivom sanaderom i bili vrlo uspješni sve dok dotur ivo sanader nije da otkaz.

poza njegovoga otkaza i oni dile otkaze (nekad uspješni sms npr), a na kraju će neki i gače prodat za namirit dugovanja.

ruši se na brzake postignuta uspješnost ka kula o' karata.

jeman jednega susida ča mi je susid nažalost. prije 91. taj nije jema bogzna šta, poslin mu je pricidnik mesić pomoga da dođe do otoka i potoka, a on je njega kroza to vrime pametno svitova. recimo, neka se željezare prodaju po kunu, neka se skompi  i dogovara svašta-nešto po kojekakvin šatorima, a  ne sa ozbiljnin sviton itd.

još malo i pricidnik mesić gre ča.

ši, je, je poč će on ča sviđalo se to njemu oli ne, e...

znate šta me zanima? ne znate, a?

zanima me ča će bit sa mojin na brzinu obogaćenin susidon. živi bili, pa vidili

zaradi čega ovo govorin, a? nima ništa priko noći, poduzeće vodin već pet godina i to mi je u potpunosti jasno oli ča bi rekli kjaro.

moto oli zvizda vodilja na našen webu  je:  

Tamo kamo se isplati ići ne vodi prečica...

priznat ćete, ova kula o' karata na slici ne izgleda baš stabilno. malo vitra i finito, nima je višje, a upravo su takva poduzeća koja počivaju na političkin vezama. stabilnost  i sigurnost se ne postižu političkim putem, vengo radom.

sićate li se brksija iz trogira? danas je ostavljen i sam, a narafski bit će još puno takvih. ostavljeni i sami će bit i njegovi kumpanji.

uvik san virovala u sebe i svoj rad. partije i pricidnici su mu djelovali ka hrpa redikula (malo mačani) i bilo bi mi mučno sidit na sastancima s takvin sviton. moje poduzeće je malo, ali sve štima. uspjeh gradin korak po korak. nisan dobila zlatnu kunu, nisan sidila po kojekakvin udrugama poslodavaca i tome slično, ali danas ka i prije pet godin znan da ću radon pomalo postič stabilnost i sigurnost. onaj ko je sposoban i gre tako, nesposoban strančari i liže gujice pricidnicima... najgluplje ča poduzetnik more učinit je vezat se za političara. to ti je prva stvar koju ćete naučit na poduzetničkim tečajevima. takav poduzetnik na početku će dosta porast, istina, ali kad političar otprdi gre i on š njin u povist, e... a svaki političar otprdi pri oli posli jerbo to u principu nisu puno pametni judi, da jesu ne bi ni bili političari. ka ča znate, ni drug tito nije bija za vječnost iako je uspija bit doživotni pricidnik...

e...

jeman dva litrata prove, to je za neupućene pramac, prednji dil broda.

ne moren se odlučit koji mi se višje sviđa i tako ćete vidit i jednega i drugoga. 

jednega i drugoga san uvatila mobitelon danas, na splisku matejušku. našla san dva broda i lipo ih slikala. moga je to napravit svak, nikome ni zabranjeno. e ma tribalo se sitit. malo mašte, bokunić ideje i eto materijala za moju stranicu http://www.xvii-online.com .

srića je u malin stvarima koje su kad se mrvu bolje promislin dostupne svima samo ih triba znat iskoristit. ko danas nima mobitel, a? svak more učinit litrat (sliku), e...

koješta je dostupno. priroda, more, sunce.

evo, recimo, čovik moj, ko ti je branija da danas poza posla i obida pođeš plivat, a? more je teplo, lipo, grijota je stat doma.

ne triba grintat i očajavat, more se i radit pa zaradit za ono ča ti triba. obrt danas moš osnovat za 800 kuna, a priko obrta moš svašta radit, nisu to samo postolari i frizeraji, ma ke, e...

evo nikih ideja: obrt za turizam - afitavanje kuće fureštima, organizacija izleta i sl., informatički obrt - izrada web stranica i druge informatičke usluge, knjigovodstveni obrt - konti i računi, ribolovni obrt -  uzgoj oli ulov i prodaja ribe, umjetnički obrt - izrada nakita, unikatne odjeće i slično...

je li toliko teško radit, a?

lakše je kukat na rivi: "ka ono brale, jeman ideji, ali za njih triba punoooo pinezi." a kakva ti je to onda ideja, a? dobra ideja je ona za koju ne triba prikovišje pinezi, e, a koja će donit pineze. puno pinezi se ne stavlja u realizaciju ideje, vengo u banku, pa se živi o' kamata i rente...

asti sto ča san se navila.

e ali palo mi je još nešto na pamet i ča ćemo sad, a?

reč oli fermat, a?

ajmo ča reč.

gre ovako.

kako vezat brod, a? za kraj provon oli krmon, a?

more se vidit i jedno i drugo, ali nekako vidin da svit ča jema brod godinama rađe bira provon za kraj. je da je tako bokunić teže uč na vez i izač iz lučice oli mandrača - učinit manevar, e, ali brod je tako sigurniji.

nisan o' pomorske skule, ali meni pari da je tako kad more valja i unutar lukobrana, kad vitar puše, kad se nebo spusti na zemlju, kad jarboli zazvižđu svon forcon.

po brodu triba i znat hodat, ako nisi vješt, moš past u more, e... kad je brod vezan provon za kraj, triba nogicu prid nogicu i s pacijencon do krme. pomalo, brez priše, bolje i tako vengo past u more, e...   a kako na sam brod, a? potegni konop, približi brodić kraju i skoči. tako oli drveni mostić, e...

judi s mora će se sad smijat, ali virujte mi danas u splitu živi prikovišje svita ča te kad rečeš rič prova gleda incukano. nikad čuli. e ove upute su mi za takve, ono, kad vazmu bokun broda i dobiju vez (takvi će ga dobit, budite brez brige), da znaju koji su sastavni dilovi i kako se š njima postupa.

jerbo, nisan sigurna da bi plivali ka riba da upadnu u more, e....

ekola, gren ča, drugi put ćemo reč ča je krma, ča timun, ča je štiva itd. jerbo brod jema i to, pa bi oni ča ga misle kupit a ne znaju tribali i to saznat.

Dobro jutro tugo, di si bila ti do sad
Ja te nisam vidi dugo kraj sebe
Da me sitiš s kin si bila
Pa da puknem na dva dila
Od ljubomore

Dobro jutro tugo di si bila ti do sad
Okrenut će na jugo ovi dan
Da me sitiš s kin si snila
Pa da puknem na dva dila
Od ljubomore

Još sam na te bisan al se nisam pomaka
Ni trepnija nisam kad si s njime utekla
Priznat ja ti neću da sam rukom pokrija
Jednu kaplju ča san za te pustija

e...

danas nisan bila nigdi, a i ovi dan mi je bija lip. miran, pačifiko, brez nervoze. izdvajan detalje koje morate znat.

gre mi se u francusku, ali ne moren zaradi posla. zato san vazela libar ča vodi u provansu - alphonse daudet, pisma iz mog mlina.  

more je sad najlipje, manje je konfužjuna, teplo je, guštan na kupanju. bija ovo moj dan za hodanje, išla san plivat  na kaštelet.

tonobil čeka reklamicu (naručili smo je, virujen da će bit šesna) i odlazak u renaulta gašperova zaradi jednega pregledića i jamstva, itd., a meni je bilo lipo i na noge - ništa mi nije falilo, ma ke, e... još san puten trefila poznatoga svita i lipo smo se proćakulali. 

jeman i dva litrata, ovo je uvaćeno mobitelon, kliknite za veće.

očete li još da još štagod notan, a? e, a vratite se jopet ovod, jemat ću ja još lipih dana i lipih slika.

jerbo, srića je u osobnom stavu, promišljanju, zadovoljstvu. neki pivaju i kad je kiša, neki će i na suncu plakat. sve ovisi o čoviku.

morska I. i morska II. by xvii

sve mirno jema ovod, klikom morete uvećat svaku sliku: http://www.flickr.com/photos/xvii_st3/sets/72157622293421927/

mrduja 2009 by xvii, slikano sa spliskoga sustipana

e... tokalo me učinit štagod kilometri, ali isplatilo se.

a di smo bili, ča smo činili, a? sad ćete sve doznat.

najprvo da vam pokažen dva litrata iz mista ča se zove marina. to je jedno malo misto između splita i šibenika, tot smo popili jutarnju kavicu. 

ovi mi je litrat prva liga, snage i snagice, vidili smo motorin vozi ka veliki

poza kavice pali motore i pravac mandalina, šibenik. tot je adriatic boat show 2009 . drago mi je da smo ga vižitali i to ću napisat debelin slovima.

evo i zaradi čega:

šibenčani su se temeljito potrudili oko organizacije. parking su nam naplatili 20 kunića (cijena za cili dan), ali uvodili su red i jemali smo di ostavit tonobil. puten do mandaline je bilo oznaka i brez problema smo sve našli. sajam nije bija parada prevelike moći, ali san se na njemu ćutila lipo. svit je bija komunikativan i obavili smo dosta poslovnih razgovora. na svakon štandu je bila i poneka sitnica ka darić tipa lapiš oli fajerica, u splitu odavno fale i vizitke kod mnogih izlagača i to mi masu puti gre na nerve - na sajam triba donit propagandni materijal, na sajmu triba radit, a ne odšetat i ostavit prazan štand jerbo svit je tot doša nešto vidit i pitat,. e a je li tako, a? u šibeniku je sve ča se tega tiče dosta dobro štimalo. karta je 35 kunića ča smatran skroz normalnon i pristupačnom cifrom.

evo i koji litrat, znan da to čekate...

 

 

narafski, ko god oče na miru pogledat litrate sa sajma u mirnoj verziji more to komodno učinit ovod. http://www.flickr.com/photos/xvii_st3/sets/72157622287525521/

uvećajte klikon. na sajmu smo bile ja i ingrid - to je bila ka jedna radna vižita za Parametar doo , mene ćete lako poznat jerbo jeman poduzetničku kapu na glavi.

dosta san brodića sinjala ča bi još mogli proč ka pristupačno rvackom čoviku. na sajmu je bilo i tonobili, brodskih makinja, teknike, penti, ma svega povezano uza more.sve u svemu svidilo mi se, palac gori!

onda smo otišli u sam šibenik. šibenik trenutno jema i srednjovjekovni sajam. evo litrati (ako ne morete ovo upratit, napravite reload stranice) 

 

mirni litrati su tot: http://www.flickr.com/photos/xvii_st3/sets/72157622412174304/

ovo mi se strašno svidilo, a priznat ćete da triba reč svaka čast svim učesnicima jerbo nije lako po vrućini nosit tešku robu i postole, e...

evo mi i tri slije o' isprid najpoznatijega objekta u šibeniku, šibenske katedrale.  

najprvo ja i moja prija selma iz šibenika - inače poznata blogerica ča puno lipo piše na http://selma.mojblog.com/ , ako dosad niste bili na toj stranici, povirite, nač ćete nešto ča je puno lipo, umjetnost, komadići duše za dušu.

nada (gori) i ingrid (doli), e a mi smo iz splita

selmi ćemo se zafalit ča nas je u šibeniku lipo dočekala i ča nas je odvela na srednjovjekovni sajam, ali i ča je dala upute kako doč do mandaline bolje vengo gps (oni je mlija i ko ga je opče više sluša, a i gleda. kad smo se vraćali bija je u škafetinu, ištekan i sam jerbo nas je štufa, ali dobro, neka ga, nikad ne znaš kad će dobro doč, e). e sad, u šibeniku san twingića stavila u jednu uličicu ča je pušti me proč đir, a tot san završila zaradi nekoga idiota ča me doslovce gonija po magistrali a poza tega ulicama grada šibenika. alo, pulicija, ustanove, zaradi čega vam takvi pacijenti šetaju i ča je još gore voze, a? selma nas je lipo škapulala iz te uličice na čemu i ovin puten zafaljujen da ne bi nje teško bi se tot izvukla. eto kako je lipo svugdi jemat drage peršone, kumpanje, prijatelje.

ajmo ča dalje, selmu smo ostavili u šibenik i na obid i kupanjac smo otišle na otok murter.

na murteru san se naidila ka pas jerbo su pola restorana pozatvarali, a furešti  oče nešto izist. domaći isto. eto, čovik oče potrošit pineze i onda triba tražit di poč, e...

e ma našla san restoran tic tac, uz more, bilo mi je ka begu, e... disali smo vonj mora i izli morski obid - lignje.

sad ćete reč da stalno gledan di ću izist lignje, ali one mi pašu kad san na putu. lipa lagana spiza.

evo tri sličice iz restorana ča je danas vridno radija i di nam je bilo lipo.

dalmatinski ambijent, blizina mora, dobra spiza, ovi bi me moga i još koji put vidit, narafski, nadan se da se neće umislit i da će nastavit vridno radit...

je li mislite da je tot finija izlet, a? ma ke... ajmo ča u valu slanicu. triba se i okupat, more je sad fantažija, e...

ovo ča se na donji litrat nazire su kornati.

vozila san ovoliko za vidit sajam, ali i za vidit kornate iz slanice. ovo mi napuni baterije i vrati me u život.

bi li vidili još koji litrat, a? nisu vas štufali brodi, a? ajde, gren van pokazat Brode s velikin B. di je najlipši Brod na svitu, a? na OTOKU MURTERU - tot je Brod drven, lipo pituran, toj je Brod svetinja. evo Brodovi Murtera, uvik ovod uvatin lipe litrate, nikad dosadne, uvik drugovačije.

ekola finito izlet, u betinu, misto iz kojega vučen gene po ćaći koje je inače misto najboljih drvenih brodova ovi put nisan stigla njanci povirit. vozila san po mraku nazad, magistrala noću baš i nije bajka, od trogira do splita konfužjun, prva-druga, došli smu u split u kasnije ure. bija je to dan ka san.

e... produžila san registraciju za  autić. koji dan prije, pa ča je komodno, komodno je... dobra duša koja je jutros sa menon bila u dujmovaču je barba božo sušić iz autoškole sušić di san prije nešto višje o' godine dan položila vozački. pofalit ćemo ga apropo tega na internet jerbo stvarno čovik pomogne i poslin autoškole. pomoga mi je  i lani uzet autić iz autokuće i sve oko tekničkog, registracije, a eto bija je o' pomoći i ove godine.

borbu za ovaj poduhvat san podilila na višje dana. najprvo produžit članstvo u haka, pa poč produljit police (članstvo u haka nosi popust za osiguranje kod nekih kuća), pa po punomoć za registraciju kod leasing kuće. to sve nikidan. poza tega danas dujmovača, teknički kojega zapravo nije ni bilo - ne radi se za godinu dana star tonobil pregled, vengo se samo sredi  kartušina oli administracija i plate takse koje narafski nisu ni malo.

toka me još poč na redoviti godišnji servis... pomalo, sredit ću i to.

u svakon slučaju ove godine san po pitanju registracije prošla lišo ako se gledaju file, monade, konfužjun. lani je tega bilo i prikovišje, ove godine je bilo bolje.

ajmo slušat bralića, čovik piva odlično...

e...

na današnji dan prije jušto pet godin otišla san kod šjora ča se zove javni bilježnik i osnovala moje poduzeće Parametar doo .

od tada san / smo :

• dala posla i sebi i drugima, odradili smo i fala bogu naplatili puno tega - više informacija na našoj web-stranici
• dosta naučila
• upoznala mnoštvo svita
• učestvovala u mnogim humanitarnim akcijama

nisan se još obogatila, ali:

• nas nikad niko nije zva zaradi neplaćenog računa
• naši radnici su uvik i na vrime plaćeni
• nimamo njanci minut blokade
• ne muči nas nelikvidnost
• uvik uspijemo naplatit odrađeno

za budućnost želimo:

• povećanje prometa - ovo želi svak
• manje troškova - ovo isto želi svak
• zadržavanje svih gore navedenih stavki
• daljnja zapošljavanja ljudi
• pametno širenje
• koji sloodni dan i izlet više
• manje nekulturnih stranaka - to su oni ča se ne ponašaju poslovno, ča gledaju ne platit račun, ča izmišljaju i optužuju brez argumenata i temu slično

oče bit kakva fešta, a?

ma ke, ne virujen jerbo san radila cilo jutro, a pozapodne ako bude još bokunić sunca gren na more. to mi je najbolja fešta, e...

neka rokete i pompu čini kerum, ja san tek mali majušni građanin s malin poduzećen koje se pomalo i brez priše gradi i razvija.

e... firefox cat, klik za veće, back cat, reload cat, home cat oli maška ča gre doma... također sa moga laptopa ;)

e... maška desktop iz moga laptopa...

e...

danas su razvodi nažalost česti.

kažen nažalost jerbo ko normalan voli rašpe, bombe, rivolvere, karanje, patnju itd. , a? dobro pokarat se, pa se pomirit, to još nekako, ali kad je tako stalno, kad nikad nima lipe riči, to ni dobro, e...

svi bi zapravo tili malo mira i tek mrvicu onog slatkog nemira,  jubavi, bokunić sriće. e ma do tega danas ni lako doč.

a znate li ko najviše u svemu temu pati, a?

dica, e...

dica jerbo drugovačije je smijat se suncu i s materon i s ocon u isto vrime, a drugovačije je kad je to drugovačije. manje je straja kad grmi i kad u isto vrime zagrle i mater i otac, a drugovačije je kad to je drugovačije.

razvod znači i promjene u životu.

masu puti roditelj poza nekoga vrimena nađe i novu peršonu. ne znači da ne voli svoje dite, dapače. e ali šta ako ta nova peršona oli njena fameja ne prihvaćaju dite ča ga roditelj nosi iz prethodne veze, a? virovali oli ne, jema takvoga svita, ne prihvaćaju tuđu dicu. ja recimo ne prihvaćan takva razmišljanja jerbo dica su dica i najveća su vridnost zemaljska balote; no, dopustit ću da ipak postoji svit ča ne trpi tuđe dite; samo s takvima daleko o' mene, e.

ovi naš bidan roditelj se sve nada da će se štagod prominit, da će s vrimenon njegovo dite bit prihvaćeno, da će stvari bit drugovačije.

neće. NE, neće.

ko će prihvatit takvu situaciju, prihvatit će je odma, ko neće, neće ni poslin trideset godin.

a dite, a? samo jadno pati, misli da je ono nešto krivo, tužno je, ne shvaća da ni problem u njemu vengo u šempjama oko njega.

prihvaćanje diteta je bitno pitanje. to nije pitanje tipa oče li se spizu vazest u keruma oli u plodine, oče li se na tv gledat fuzbal oli film, oče li se večeras vanka oli ranije u pajun. to bitno pitanje itekako utječe na dite i njegov život. jema li roditelj pravo nekon svojon nazovi srićon (jerbo, kako može bit sritan ako mu dite nije sritno, ako ga triba sakrivat ka da je kužno, a?)  krest ditetu njegovu sriću, a?

znan masu primjera di je ditetu peršona ča je novopristigla u njegov život dala puno jubavi, pomogla mu, bila oslonac i prijatelj, ali jema i kontra primjera. neću sudit o tuđoj srići, no na mišljenje jeman prav. mislin ka je kontra primjer da triba poč ča.

dite je dil vašega života i to bitan. ko voli vas, volit će i vaše dite.

još jema ovod jedna sitnica. to je kako dite prihvaća novu peršonu, e... kažen sitnica jerbo ne može niko reč da je prihvatija tuđe dite, a da dite njemu čini dišpete, monade, da ga mrzi. je, more bit da neće bit obostrane simpatije odma na prvi balun, ali ako ste stvarno iskreni i dobri, dica i beštijice to pripoznaju. smirit će se i bit će te prijatelji.

najbolja moguća opcija je obostrano prihvaćanje na prvi balun, a jedino bolje o' tega more bit da dite jema potpunu sriću u svojoj fameji koja se nije raspala. no kažen danas su razvodi nažalost stvarnost. iako je teško, triba naučit živit s ton činjenicom. 

e...

ako je kiša, nije kraj svita. ako u jednome danu moš reč da se dogodila  barenko jedna dobra stvar, dan je dobar.

sigurno vas zanima ta teknika ča je jučer spominjana. dakleM, fermala je kiša, protegnila san nogice do butige i vazela GPS za tonobil. sad ću proučit to čudo teknike, a onda moremo na daleke pute... (prva dobra stvar današnjega dana).

poza obida koji se sastoja o barbuna, tikvic lešo, pomidora i kukumari , ča jel' te opče nije loše (druga dobra stvar današnjega dana), rekla san finito posal, ajmo se ča banjat, jeman špurijus da će bit ludilo.

kad san dovezla twingića na kašune, samo je jedna žena šetala po plaži gori-doli. u moru niko, ej, niko. tako san lipo jemala cilu valu za se i plivala jušto uru. (treća dobra stvar današnjega dana). ajme kako mi je bilo dobro, ajmee, ajmeeeeee. poza tega su počeli stizat muški koje tot stalno trefin na plivanju, ali ja san svoju uru iskoristila ka pale sam na svitu i bilo mi je odlično, lagala bi kad bi rekla da nije, e... more je teplo, ali triba plivat i poza plivanja stavit na se suvu prominu.

evo još jedna pisma o' šjor rundeka ka cukar na kraju ovega posta i moren reč bija je to dobar dan. narafski, sigurno će se meni i još lipih stvari dogodit danas, e...  

e...

ola-la, pivan... sutra bi tribala bit jedna stvarčica o' teknike ča će bit za posal, a možda dikad posluži i privatno; naručili smo, sad se veselin temu... neću moč noćas spavat o' silnoga uzbuđenja... a šta to, a? aj probajte pogodit, nikidan je spominjana. volin tekniku i tekničke bokune iako uvik zadnja nabavin tekničke novitade. kad san ja recimo kupila laptop, jemali su ga i oni ča ne znaju oli nisu znali poslat e-mail. da, da, istina je to...

ajmo ča dalje, još malo teknike. za sve one ča me pitaju jesan li i danas bila u moru, odgovor je nisan. (jučer jesan, more je dobro, plivaj, poslin se promini i ništa ti neće falit).  danas pozapodne nisan išla plivat na kašune jerbo san radila svoju struku i to baš onu striktnu, elektroenergetiku i to mi je narafski bilo dobro ka i plivat na kašune, e... dobro jerbo volin svoj posal, nije mi mrzak. zapravo užasno je kad čovika toka radit ono ča ne voli, pogotovu cili život. to ti ja ka da umisto na lipome štramcu spavaš na brokvama oli živiš s čovikon kojega ne moš smislit.

vengo mislin se, e da mi je posal samo elektroenergetika, jo ča bi to bilo lipo. ne bi se tribalo bakčat s muktašima ča ne bi platili račun, s hrpon uglavnom nepotribne i brezvezne kartušine, tražit radnike, vodit računa da sve odrade, borit se s državnon birokracijon, slušat grintavi svit itd. itd. itd.

u recesijsko vrime (vidi zadnji tekst) sprovodin antirecesijske mjere tj. otkantavan sve ča mi gre na nerve. ništa nevaljano se ne triba trpit i gucat, e... kad je posal u pitanju, niko nije nezamjenjiv. tekničkin rječnikon rečeno: otklanjan kvarove, eliminiran gubitke, odnosno svodin ih na minimun, povećavan učinkovitost. tako će letit sve ča se ne ponaša normalno oli ne radi normalno ma o kome se radilo. (radin pošteno, u skladu sa zakonon i pravilima struke, a kad je tako, ne bojin se njanci pricidnika mesića. a zašto bi, a?) e tako, red i samo red. jerbo, neću pustit da brod potone, ma kakvi, e... bidan je kapetan koji dopusti da brod počne puštat, pogotovu na sve strane, a na kraju prvi uteče š njega, ono, ka pantagana.

šta još reč, a? ma čitat ćete još ovih dan, nećemo odma otrkit sve tajne, e...  - iako taj posal ipak dosta solidno gre, konačno jedan smile ča se smije - promisli xvii i upre na botun objavi post, te dade svitu na internet, jedan od najjačih tekničkih izuma zadnjega vrimena, svoje misli... 

e... prominila san još jednega dobavljača i dobila bolju uslugu. i to puno, puno, puno bolju....

interesantno je da san sa svin novin dobavljačima prošla jeftinije, a dobila kvalitetnije. eto vidite da se isplati tražit i poč na bolje, e...

jema još nešto interesantno. ča, a?

stari dobavljač o kojemu je danas rič mi je bija i stranka, ali stranka koja me priko svojih stranaka strahovito nervirala, a kad je danas prikrdašija granicu raskinila san mu ugovor o poslovnoj suradnji.

tako, e... jerbo, dok me taj nervira, moren radit  za onoga ko me ne nervira.

svu antirecesijsku filozofiju tako praktički sabijan u ovu rečenicu: za svoju pineze kavu pijen di je mene voja, a svoje vrime i vrime onih ča rade za moju firmu ću dat onome ko normalo posluje, normalno plaća, normalno se ponaša...

uštede već brojin, virovali oli ne, u iljadama kunića...

ajmo ča navit malo mužike...

a za koga gre pisma, a?

e... ova pisma gre za jednega ča ka i ja puno voli more, a  jutros je jema modru maju i bile litnje gače tj. pravu morsku kombinaciju... moran priznat da mu je ta kombinacija baš lipo stoji...  

sve vidin, ništa mi ne more promač, e...

večernji đir by xvii

klik za veće, klikom se može doč i do svakoga litrata za sebe, svaki jema linkić

e..

nedilja.

za danas nije bilo posla i tribali smo poč na jedan izlet, ali smo to prolongirali za mrvu bolja vrimena. ovo bolje vrime oče reč bolje vrime u pravom smislu riči, tj. da ne bude oblačno, polugnjilo vrime ka danas.

nima veze poč ćemo drugi put, jema dana.

e i šta sad mislite da san zaradi tih oblaka ostala doma, a?

je, kako da ne, baš ću stat doma i grintat, e... grintat? to pripuštan onima malo  imberlanima, ja uvik znan ča ću sa sebon,  život je jedan, ne grintan nikad, guštan kad god moren... 

 jema dobrih stvari vanka, ajmo ča malo proskitat. najprvo na merjan.

sve more bit inspiracija, maslačak i drača, zeleno i kafeno - vidite koje litrate jeman, a?

poslin san okrenila twingića i otišla plivat na kašune, a doma me je čeka lipi obid, odličan šug i makaruni.

sve u svemu, nije mi bilo loše, dapače, bilo mi je bolje vengo šeiku...

ekola, gren ča, jema i druga polovica nedilje koju triba korisno i dobro proživit...

mirni litrati: http://www.flickr.com/photos/xvii_st3/sets/72157622354552460/

sve by xvii

e...

danas pozapodne san tribala radit, ali me šjor za kojega je tribalo radit nazva i reka da ga toka dulje radit, pa smo moj rad za njega zaradi njegovoga rada odgodili za jedan drugi dan.

narafski, nisan opće žalila, sila san u twingića i odvezla se na more. evo litrati s kašuna, plivala san dugo, more je tako lipo, tako dobro, ma mirakul jedan.  

kašuni by xvii, slikano mobitelom, klik za veće...

e... smak svita san preživila družeći se s hrpon kartušine u računovodstvu, plivajući na kašunima, guštajući dobru spizu, družeći se s formulama i kompom, čitajući dobar libar, igrajući se s maškama itd. sve u svemu bija je to jedan skroz običan smak svita. ajmo ča naprid, jema još puno tega ča triba učinit, a počet ćemo narafski jednon odličnon pismom...

e...

09.09.2009. - uajmeee, kažu da će danas smak svita...

odlično, nima šta   

iz lipote današnjeg dana by xvii - slikano mobitelom, klik za veće

e... jučer san bila twingićen na kašune poslin posla, a danas san rekla tonobil ostaje isprid kuće, gren na noge! zafaljujući mom izraženom pješačkom duhu jeman ovi lipi litrat. kako, a? e a lipo, najprvo san bila plivat na kaštelet, a poslin na noge doma uz more. ovod tonobilon nije moguće doč, e... je li van sad kjaro zaradi čega ja živin na moru, a? ko ovo more meni platit, a? more meni vridi puno, višje vengo svi pinezi ovega svita,  a letrikon se moren bavit i u splitu, e... a ča je zadnjega apropo tega, a? e trenutno su u điru študenti, pa su mi na karti o' bloka izvodi, zadaci, formule, transformatori, sinhroni strojevi i tako to... uvik nešto fala bogu jema i fala bogu da je tako jerbo da me toka samo mislit na tete iz birkoracije (npr. sa zdravstvenoga - vidi zadnji tekst), odnija bi me vrag prije vrimena... ča još jema, a? a čekan jedan izlet. di gremo, a? e pomalo, vrag odnija prišu, kad se bude išlo, notat ćemo o temu ovod, zasad se samo nadan da će bit dobro i da će bit lipo vrime... očemo navit i mužiku, a? ma očemo, evo jedna pješačka, guštajte!  :) 

litrati s posla, Parametar doo, Split , kava, misto radnje split, poviše jk labud, gori: ingrid čatić (livo), gorka magazin (desno), doli: nada magazin

e... ovo smo se išli bokun rekuperat jerbo smo višje štufi. a koga, a? u splitu svakako hrvatskog zavoda za zdravstveno osiguranje, tot nam konstantno prave probleme kod prijave/odjave radnika. kako je pravo na rad ustavno pravo čovika , danas višje nisan tila trpit maltretiranje - stavila san im pismenu pritužbu.

ča su danas činili, a? konkretno: gren odjavit radnika, a teta na šalteru br. 5 me šprda da nije ni prijavljen. vadin ugovor o radu, vadin prijavu, ali šprdanje i dalje dura, jedva san to sve kalmala i fermala. poslin je bilo još problema i na šalteru br. 4, a zaradi svega toga san notala pritužbu i dala je na protokol. ovo ča čine na to zdravstveno je sramota republike hrvatske, probajte bilo kome omogućit da radi, pa ćete vidit koje ćete sve monade jemat... barenko je u splitu tako... zaradi svega ovega nas europska unija s nestrpljenjen očekuje...

pošalji računovođu, sad će neko reč... ma moren, digod i šaljen, ali eto danas san jedva i ja s tim sotonama na zdravstveno izašla na kraj, moren mislit ča bi išle računovođi činit. računovođu san danas puštila da računa.

a je li bila plaća u našu firmu, a? je narafski, a i honorari isto narafski... fala ti bože na privatnome sektoru - tot nima hdz-a, tete paštete i ostalih mona i monadi, tot je red koji san osobno zavela.

a ča smo činili na kavi, a? e a dogovarali kako dalje radit, pričali ča još tribamo vazest za firmu (trenutno tražimo GPS za tonobil, javite nam iskustva, informacije, cijene, sve je dobrodošlo), planirali vižite sajmovima itd... ono, tekuća poslovna kavica...

sad ću još pročitat mail jednega študenta i gren reč gotovo radno vrime, gren na more... jupi!

e...

gre ovako. volin brode i uvik san di su brodi. svoj brod nažalost još uvik niman, ali bit će valjda jedan dan. nadan se drveni jer ka ča ste vidili kad smo nikidan bili na murter na mome otoku ne priznaju plastiku... tot se (betina) čine najlipši i najbolji drveni brodovi. na murteru su brodovi drveni, šesni, dotjerani, lipo piturani. virovali oli ne, ovi momenat je to jedino  o' materijalnoga ča želin a niman. možda poslin poželin i još štagod, nikad se ne zna, e...

a koja su događanja apropo brodi ča se ovi misec ne bi tribala priskočit, a?

najprvo jemate nautički sajam u šibeniku, od 17. do 21. 09. 2009. , Adriatic Boat Show

šibenik opče nije daleko o splita, uru i kvarat uvrj glave uru i po ako grete magistralon ča je sasvin dobro a i besplatno, a morete se proč i sa koji minut manje ako se kod dugopolja ubacite na autoput - to narafski nije besplatno, ali do šibenika nije ni prikovišje. morete i priko boraje ako van se ne čine nevere u štumiku na svaku okuku. znači kako to opče nije daleko tot bi tribalo poč. evo i stranica sajma pa povirite linkić http://www.adriaticboatshow.com/

ako ja s baby vozačkom vozin do tamo, more i oni ča vozi dvadeset godin, e... samo pažljivo, po propisima i sve će bit dobro..

najdrugo jemate 78. mrdujsku regatu ča bi tribala bit 20.09.2009. u split, bolje rečeno tribala bi počet u split, a jedri se split, mrduja i nazad.

mrduja je za one ča još ne znaju škojić između broča i šolte oko kojega se i dandanas bročani karaju čiji je. kažen bročani jerbo mi u split svaki otok isprid splita zovemo broč, pa je brač broč, ali je i šolta tako broč, narafski, onda su i bročani i šoltani bročani jerbo su sve broči oko nas, e...

jo, koja filozofija, aj, kalmajen, fermajen...

vengo,

sve potribito za mrduju morete na internet nač ovod:  

http://www.jklabud.hr/regate/mrdujska-regata

ekola, ajmo ča, vižitajte sajam u šibeniku, a ako jemate brod odrišite ga i pođite na mrduju, ti trošak za benzinu do/od šibenika + ulaznice i kotizacije za mrduju  i nisu nešto preveliki trošak, ovo je pomorska zemlja, živi se o mora i za more... evo i pisma, baš zaradi tega da ne umru kapitani... 

šumsko - morski mix

e... dvi kapje kiše i bokunić burice su kalali temperaturu za dva stupnja. nigdi nikoga. svi doma, pokriveni dekon. bit će su i peč užgali, čizme iz armeruna izvukli. odlično! jutros san pivala o' sriće, znala san da će bit tako. otišla lipo na merjan i šuma meni, more meni, ma prva liga. narafski da san se danas kupala, more je bilo super, teplo, lipo. bolje u moru vengo vanka... 

dugo teplo lito dura...

e...

ova gre za jednega ča je u moj život

doša prid kraj jednega lita,

nenadano,

ka divlji konj. 

donija mi je mir i nemir,

sriću i nesriću...

rekla san fala i dala mu mir i nemir,

sriću i nesriću...

*****

[prid zoru ne spavaš, znan. uključiš škatulu o' kompjutera i gledaš ča je nada notala ovod.. gledaš jema li koja rič o tebi, koja rič za te... a ja prid zoru znan da misliš na me i mislin na te... ča je to, a? ]

******

Pobiga bi sa tog mista al ne mogu,
Al ne mogu...

Sve je naše, a sve tuđe
Svega ima, ničeg nema...

*****

ma dobra je cila pisma, guštajte! 

Sve je puno te tišine
Sve je lipo, a sve grubo
Sve je moje, sve je tuđe
Ne poznajem ništa drugo
Sve je puno tebe, mene
Izgubljenih naših želja
Sve je naše, a sve tuđe
Svega ima, ničeg nema...

Svaki korak ispočetka,
usmjeravam novom toku
Pobiga bi sa tog mista al ne mogu,
Al ne mogu...

Još ne mogu pristat volit
Tebe gordu, tebe taštu
Još ne mogu prestat plesti
Istim koncem zbilju, maštu
Još te budin dobro jutro
Još te ljubim, mirno spavaj
Još za tebe isto dišem,
Još te želim, lipo sanjaj...

e...

jema dosta sconta po butigama ovih dan.

jučer san našla još jedne lipe rebatinke i još bolju maju stvarno povoljno. narafski, sve san najprvo dobro isprobala, pogledala se u zrcalo i odustala o' svih onih bokuna koje san također sa škancija i višalica odnila na isprobavanje, ali mi nisu mogli. ne, neću tisno, neću šlampavo.

ča jema veze da je sconto, a? ne moran sve kupit samo zaradi tega ča je sconto, za pineze triban radit i dobro promislin prije vengo bilo ča vazmen. tako su na kasu sa menon otišle samo maja i te rebatinke.

na kasi jedna žena isprid mene govori s prodavačicon da joj gornji dil tega kompletića ča ga upravo plaća ne paše skroz jerbo da ne može zakopčat botune, ali da nima veze, kupit će ona, sconto je, povoljno je, eto tako samo da nešto vazme, pa će nosit tu jaketicu otkopčanu....

ej, eto tako samo da nešto vazme.

mislin se ma je li to normalno? a bi li se tako i udala samo da se uda, otišla u posteju s njon sasvin brezveznin čovikon samo da se zove da je u braku?!

[e nado, govorin ja sebi, ti ne bi tako, ali koliko je takvih... ]

je li se mogla prošetat do druge butige i nač jaketicu koja bi joj pasala tutokompleto oli i sa zakopčanim botunima, a?

triba li se uvik pošto-poto jemat isti sekund ono ča ti momenat projuri kroza ćivericu, a?

život mi je pokaza da kad na jednu butigu piše sconto, obično piše i na butigu do. ne triba se zaletit u prvu potrošit po plaće, prilika jema, svugdi se more nešto nač.

samo, priliku triba znat pripoznat (ma o kojen se dilu života radilo), svoju sriću triba znat vazest i onda triba znat sa srićon sritan bit...

evo jopet cambi, a ča ćemo kad miritaju. svaka čast! odlična pisma!

e... moja listica željica reste. dosta čitan i drago mi je da je tako. čitan svugdi, doma, u uredu kad nima konfužjuna, na plaži, u fili, na putu. pari mi se da svit sve manje čita, a nečitanje je nezdravo. to je isto ka i fumavanje. sad će neki ča ne čitaju njanci foje, a kamoli libre reč da čitaju redikuli, da je to dosadno, glupo i tome slično. neka govore, a ja ću vam reč koje su štetne posljedice nečitanja.

1) peršona ča ne čita se teško izražava, nije elokventna. ne virujete mi, a? evo vam primjeri iz života. oni šjor brksi ča je sad ostavljen i sam oli naš šjor poteštat kerum. kerum je narafski još dobar u govoru naspram brksija, ali i on muku muči, a nije da ga muči mucanje oli koja druga govorna mana. čovik ne čita i to je sav njegov problem oko govora. da čita, bolje bi i govorija.

2)  peršona ča ne čita muku muči da nota pet rečenica. ozbiljno. morete mislit ča će tek bit ako mora štagod osebujnije notat. izričaj joj je nejasan, zbrda-zdola, u glavi nered.

3) peršona ča ne čita u faci postaje telava, pa čak i ružna.

4) peršona ča ne čita se bavi trivijalnostima tipa tračanje, klevetanje, ogovaranje i nije sposobna za jednu konstruktivnu ćakulicu sa sugovornikom. neinformirana je o svemu bitnome, ali zato zna ča joj je susida stavila na tiramol i je li ante privarija simonu, a pogotovu je li simona jema falše oli prave čiče, nokte, gujice, ma svejedno... ma koga pametnoga to briga, a?

5) e sad gledaj čovik moj ovo pitanjce: di vode 1), 2), 3) i 4) u 21. viku, a? ne zna govorit, ne zna pisat, ružan(a) i puna mu/joj teča trivijalnosti... aaa, po meni ovo gre u nešto ča se zove ni višje ni manje vengo psihički problemi. i ko je onda rebambljen, a? oni ča čita oli oni ča ne čita, a?

zaključak: čitat se triba jerbo nečitanje donosi krupne posljedice po zdravlje... a di je sve drugo, a?

e...našla san snimku s runjićevih večeri ča su bile nikidan. guštajte!