Kašuni, zalaz by XVII, danas

1. misec 2007., by XVII, danas

Matejuška, by XVII, danas

e...

nije baš da jeman užancu prisluškivat ča ko govori, niti san o' te vrsti svita. samo kad ti niko viče oli je mrvicu bučniji, e, onda ti do uva rečeno i ariva. čuje tako čovik svašta i nike ga stvari dobro nasmiju, a nike i rastuže.

jučer, recimo, ja poza posla bokunić do zvončaca, ono, povonjat mrvu more i odma uteć, jerbo vrime i nije bilo baš neko, e... dva čovika o' jedno šezdeset godin uza brode kritiziraju trećega kumpanja koji mora bit da je upravo otiša ča. žestoko, e... ka da šta on misli, da kako more tako, da uvik je on najbolji i najlipši (joj, ča mi ovi pridjev  gre na nerve ka su u pitanju muški, a pogotovo o' 60 i kusur godin - žene su lipe, kako muško more bit lipo, a?), da najbolje piva, da najbolje pituraje, da najbolje kuva... i ne znaš oćeš li se smijat oli plakat, e... jerbo, šezdeset in je godin i pogledaj ti, čovik moj, kakvin se onin monadama o' tema bave. ka da in je trinaest. i ka da su ženske za gospu blaženu.

poza tega o' ispod kampanela svetoga duje o' dvi šinjorine ča su upravo iz susidne države arivale u split čujen poklič:

- ju, kolki toranj!

ne znaš oćeš li se smijat oli plakat. jerbo, stigle su u ovi grad sa žestokin ciljen da već kroza godinu oli dvi budu u fotelju o' poteštata, e... a njanci ne znaju za rič zvonik, kampanel. gospe moja, žalosti i nevolje.

vengo, toranj, jašta, a sad smo u parisu i nismo judi vengo aeroplani, e... jerbo, ko smi šta reć, a? njanci promislit, a kamoli reć, e...

poza tega gren doma. i čujen još u hodu niko mrmljanje, niki urbani momci govore: eno XVII, jesi vidija dobrih slika iz labuda, a? e da oće koju o' zente stivat na oni internet, e... zaradi tega evo:

zenta o' nikidan, by XVII, klik za veće

ekola, notan je i ovi post, sad već pomalo triba mislit na obid, pozapodnevni đir i tako to. e i nemojte mi sad reć da samo skitan, niste vi jutros najranije dicu učili sile i ostale bokune fizike vengo ja. stvar je, naime, u organizaciji. ako za to jemaš mota, sve moš stić, e... a vidi dana danas. zove, mami. ko mu more odolit, a? gren ča. jemate pozdrav!

klik za bokunić veće :o)

e... oni litrat sv. frane o' jučer je mrvu ulizija u ovo škatule o' kompjutera i izaša je ka crtež i puzzle. evo kako je ispalo.

e... ben ti miša potopira. evo ča se sve dogodi kad ka ja znaš po splita i kad ti to po splita čita blog.

ovi dil teksta je iša jučer:

za jednega šjor brodovlasnika ča mu je brod na jedan o' tih litrati gori, a za kojega znan da će povirit ovod:

gre ovako: brod ti na sliku dobro izgleda i ka ča vidiš na mistu je. a da ipak mrvu poviriš ovih dana do tega broda i realno, a? jerbo, već mi je u nikoliko navrata joko sinjalo da ti se niki čudan svit muva oko prove, potiže konope, parkira baš tot bičikletu, nešto merka, miri, odmirava, prčka tot i tako to... ženski špurijus mi govori da tribaš protegnit noge do broda, e...

onda me danas u emajliranu škrabicu dočeka mail:

Bog Nado.

Na pet fotki (brzinski je pogled pa se unaprid ispričavan - akonto onih broči) pet je brodi vezano provon. Od tih pet jedan je moj bivši (sad je od brata mi), a jedan je moj.

Iman li pravo sumljat da je gornji paragraf meni upućen?

Ako iman priznajen svaki dan san tako blizu,a ovo godišće san ugazija jedan put na brod. Sram me bilo.
Evala ti.

N.

ne, nije se mislilo na te brode, vengo na drugi. ipak tribaš i ti povirit imovinu, uvik se oko broda triba stat atento, e... - odgovorin ovako nekako ovemu šjor N., a onemu na čiji se brod mislilo u tekstu, ćemo i jopet reć: ako nisi, poviri ga!

eto, vidiš šta ti je to znat po grada i kad ti još sav taj svit čita blog... na kraju se svit uspaniči, dobro da ih ne strefi i tako to... zaradi tega van je najbolje kad van nešto nije kjaro pitat ka ča je i ovi šjor učinija. ko pita ne skita. danas ću zaradi svega stivat jedan litrat o' sv. frane. da utečen mrvu o' brodi i ne stvaran i jopet konfužjun. iako, tot su oni, dva metra o' frane, na matejušku, e... jerbo, živi se o' mora, život je more, naša mater je dalmacija. ekola, gren ča, jemate pozdrav!

dičje radosti u 5 litrati by XVII, o' danas pozapodne, klik za veće

za jednega šjor brodovlasnika ča mu je brod na jedan o' tih litrati gori, a za kojega znan da će povirit ovod:

gre ovako: brod ti na sliku dobro izgleda i ka ča vidiš na mistu je. a da ipak mrvu poviriš ovih dana do tega broda i realno, a? jerbo, već mi je u nikoliko navrata joko sinjalo da ti se niki čudan svit muva oko prove, potiže konope, parkira baš tot bičikletu, nešto merka, miri, odmirava, prčka tot i tako to... ženski špurijus mi govori da tribaš protegnit noge do broda, e...

mozaik by XVII

(detalje morete nać ovod: http://www.flickr.com/photos/xvii_st3)

Jednostavno

volim te

Nitko drugi nije kao ti. Ti si svojevrstan, jedinstven, posve originalan i neponovljiv. Ne vjeruješ to, ali nitko drugi nije kao ti - odvijeka dovijeka. I svaki čovjek koga voliš nije nikakav običan čovjek. Iz njega zrači neobična privlačna snaga. I ti po njemu postaješ na neki način drukčiji. Možeš mu čak reći: Što se mene tiče, ne moraš biti nepogrešiv, bez greške i savršen, jer: ja te jednostavno volim.

by Phil Bosmans

e... uokviren je i ovi moj rad:

e, ovo je nađeno na internetu i na internet upravo vraćamo. za kompon sidimo ja i jedna moja maška ča se zove flekica... ajmo ča, daj flekice šapu, stisnit ćemo objavi i pozdravljamo vas do idućega posta. :o)

mozaik by XVII

redom: Matejuška (gori livo), Porat (gori desno), Ježinac (doli livo), Bene (doli desno)

ove litrate morete nać na adresi :

http://www.flickr.com/photos/xvii_st3 ,

tot ih morete klikon uvećat.

južina by XVII, Zvončac, jučer, klik za veće

e... još dura, a? nikako je se rišit. kad će višje fermat? ništa pametno ne moš ni činit, tuče na mozak, pritišće na ćivericu - već vas čujen kako nervožasto govorite. dišperani ste, a? uajme, a kad je danima durala teplica svi su i jopet grintali - da di ti je ta tepilca za ovi stađun, da je zemaljska balota otišla kvragu, da se sve priokrenilo, pritumbalo, da nije ni čudo ča se svit, dica, cviće i beštije šempjano ponašaju, da sve to utječe i na njih, da ćute. asto sto, postali smo ka ingleži. svi samo o vrimenu. ma šta ka ingleži. gori o' ingleža, e... višje mi niko ništa drugo u zadnje vrime ni ne govori vengo samo kakvo je vrime. i uvik je uajme. uajme sunce. uajme kiša. niko mi višje ne bi špija ni kako mu dica, punica, ča je stiva u tečicu ti dan. samo vrime, vrime, vrime. e pa meni se friga. ne tangira me. fala bogu, nima još starosti u kosti, ćiverica ne zvižđe, preživin, izduran i sunce i južinu. i daj bože da ovako i potraje, još puno godin, e... južina? e pa šta? neka je, finit će , ka i sve.

e... javija mi se jedan moj kumpanjo i pita me kako san. na to pitanje ćemo odgovorit opisivanjen današnjega dana, odnosno di si bija i šta si radija. najprvo, jutros na banku. poza tega fina. u hodu me je na mobitel uvatilo iz jednega bitnoga rvackoga poslovnog subjekta za jedan sasvin solidan posal. kojega? e pa to ćete doznat ako bacite joko na ovi dil stranice  od  moje firme di notamo zanimljive reference kad budemo ti posal finili. zasad činin kuco. kad se arivalo iz grada, nije prošlo ni po ure, kad eto ti ti čovik ča je zva na mobitel. e, sad triba š njin sredit narudžbenicu, proćakulat, pitat za poznate ča rade u ti subjekt i tako. poza svega tega i preuzimanja posla, pozdravljanje. ajmo ča dalje. nisi reka ni keks, eto ti drugoga čovika. ovi je iz jedne bitne rvacke osiguravajuće kuće. e, š njin se već danima dogovaran kad ćemo se vidit oko jedne police osiguranja. nikako se nać, ili ne more čovik ili ne moren ja. mirakul jedan. evo smo se danas konačno našli. e, sad je tribalo sve oko te police sredit, proćakulat, pitat za poznate ča rade u tu bitnu rvacku osiguravajuću kuću. poza tega uvatit 10 minuti za poć na obid. onda me je i jopet uvatilo na telefon. sve telefone prije ovega neću ni kontat. sad me zovu iz jedne firme ča drži nika bitna mista rvackoga weba. narafski, triba se i tot proćakulat, dogovorit šta ćemo i kako ćemo, pa rič po rič i ode i tu 20 minuti po ure, tu negdi. poza tega me jopet toka poć do grada. između poslova se uspilo ukrest i po ure za poć povonjat more na zvončac. evo, konačno je moja malenkost sila i okružena je sa bokunić mira. notajen ovo i pitan se oće li telefon jopet zazvonit. posla za danas narafski još jeman. i narafski, sve ću brez grintanja i odradit, ali kako znan da me čeka i niko sastavljanje ugovora, a to je  iz škafetina ča ga zoven kartušina, ni mi baš pravo. onda? kako san? ma super san, konfužjun dura, ko ovo more platit? :o)

ježinac by XVII, o' nikidan

u konfužjunu san, pa samo jedan lipi litrat sad. možda poslin bude još štagod.

cvit o' 1. miseca, by XVII, slikano jučer pozapodne na Merjanu

zalaz u sto koluri, by XVII, slikano danas pozapodne s moje ponistre

mirakuli,

lipota i inspiracija,

pitomo i divje,

obično i neobično,

spojivo i nespojivo,

sve je u prirodi.

okreni se oko sebe,

ošervaj se,

ne priši,

ne gori more.

pogledaj!

pojmljivo,

s pacijencon,

s jubavi,

s dušon.

sve je tu!

litrat i vers by XVII, litrati se mogu uvećat klikon na njih.

e...

evo dva litrata o' nedavno (by XVII narafski) i jedna kreacija o' danas. klik za veće!

Raj by XVII

ajmo ča vidit kako bi izgledalo na izložbi... nije loše, a?

litrate morete uvećat klikon na njih

Odakle se čisti riba riba riba riba?
Dal' od glave ili ili repa?
U suštini stvar je ista, na kraju je samo bitno
Neka riba bude čista.

samo, triba počet, e... jerbo predugo grubo vonje "friškina" ovod, e...

e... počela je dici skula. drugo polugodište. uza profešure sa znanjen i pošteno stečenim dokumentima u zbornice ulaze i oni ča jemaju ovakve "timbre" ("pečate"):

 nikakvo čudo u zemlji koja jema, kako nikidan govori šjor premijer sanader na tv, prepoznatljiv brand znanja. ovo je tek jedan o' "veselih" timbri gospoje Y. o ovome je moja malenkost izvistila nadležno ministarstvo kojen je na čelu ministar Primorac i nadležnu puliciju oli I. policijsku postaju Split. nikoliko puti. usmeno i pismeno. oni su , pak, izvistili nadležni inšpekcijun, a to je oni o' skula. nikoliko puti. i narafski da je gospoja Y i jučer došla radit i "učit" dicu sa tin timbron.

kako me štufalo igrat se maške i miša sa nadležnima, ovo je danas na internetu. i niko se ne smi bunit ni žalit. jerbo, ako je ti "timbar" dobar, onda je ovo reklama za gospoju Y. ako nije (a ja mislin da nije jerbo su mi očale dobre i još mi nije vrime za poć u penžjun), onda morete samo ka i ja konstatirat da i tu "divotu" financiramo mi porezni obveznici ove tužne zemlje. neznalicu o' diretura ča je zaposlija gospoju Y triba podučit definiciji kružnice - tu, šjor neznalice, postoji ovi zahtjev: jednaka udaljenost svake točke krivulje o' središta, gradivo pučke skule, narafski. :p 

i znan, sad već niki govore riči ka ča su mito, korupcija, seks, grupni seks, pedofilija i sl. ma ke svitu moj, kako ste tako nešto opće mogli promislit, a? sve van je to za lipe joči... puno lipe, e...

u idućen nastavku ove serije tekstova obećajen slike i puna imena diretura te skule, tajnice te skule i gospoje Y. danas tek inicijali:

diretur: M. T.

tajnica: D. M. rođena M.

gospoja Y: K. K. rođena V.

skula: T. š. u Splitu

ostala imena smo već naveli, pročitajte tekstove pod linkovima, puno tega zanimljivoga morete tot nać, e... za one ča još nisu skontali di je to, moran reć dvi zlata vridne riči: strpljen spašen, e... bit će sve do kraja ovod obećajen, e...

1. http://xviiarhiva032006.mojblog.hr/permalink.aspx?id=58655
2. http://xviiarhiva032006.mojblog.hr/permalink.aspx?id=58874
3. http://xvii.mojblog.hr/permalink.aspx?id=53605
4. http://xvii-online.com/permalink.aspx?id=54293
5. http://xvii-online.com/permalink.aspx?id=59425
6. http://xvii-online.com/permalink.aspx?id=64639
7. http://xvii-online.com/permalink.aspx?id=77114
8. http://xvii-online.com/permalink.aspx?id=80292
9. http://xvii-online.com/permalink.aspx?id=81509
10. http://xvii-online.com/permalink.aspx?id=83060

 --------------------------------------------------------------------------------------------

žunta o' 18.01.2007.: svaka povezanost s prethodnim postom je namjerna

žunta o' 23.03.2007. : alo, alo, ovod odjel za organizirani kriminal

žunta o ' 28.03.2007.: ariva mi je jutros pošćjer, pulicija podnila kaznenu prijavu

žunta o' 23.06.2007.: link ovod

žunta o' 31.08.2007: link ovod

žunta o' 27.11.2007. : istinita štorija iz rvacke, zemlje kojoj je hdz vratija optimizam

j., ovo je za te, za sriću i brzo rekuperavanje! guštaj!

litrat by XVII, na ježincu, nikidan, klik za veće

san

sanjala san te noćas.

sidimo na provi.

oko nas More, Kornati i Tišina.

mučimo, činimo kuco.

razumimo se brez riči.

nekad je dobro živit u snovima.

nekad je dobro živit za snove.

život se tako lakše proguca.

sićaš li se opće da smo rekli poć na Kornate?

znaš, tribalo bi odrišit cimu,

predugo Brod je vezan za kraj.

versi by XVII 14.01.2007.

e...

ako o' kašjuna greš prima institutu, ceston narafski, s desne bande ćeš sinjat ove putokaze ča su na prvi litrat. lipo se popni uza te skale i arivat ćeš do crikvice gospe o' sedan žalosti. ovo je još jedna fantastična merjanska crikvica (za one ča ne znaju: merjan ih je krcat), a more se nać podatak da crikvica datira iz 1362. u total split iz 2005. šjor goran borčić je nota i da je crikvica poznata pod nazivon S. Maria Pietatis. ova crikvica je popravljana krajen prve polovice prošloga vika, a u zadnje vrime je potpuno restauirana. uređen je i okoliš. crikvica sadrži i reljef Pietatis Beatae Virginis ča se pripisuje Jurju Dalmatincu oli barenko njegovoj radionici - zaradi stila, kiparske obrade i rješenja kompozicije.

svaki litrat morete klikon uvećat. na crikvici morete vidit da je cila fasada ispisana. asti sto, a šta je sad to, a? e, to svit piše želje. narafski, baš ih je interesantno čitat. dosta ih je iz vrimena domovinskog rata kad je svit pisa molitve za domovinu i svoje sinove ča su na ratištu, jema i jubavnih želja, a more se nać i gospe daj novi motorin. jeman želja, ali ja ih ipak neću tot notat, e... me ke, ča bi to svi morali znat, a? :o)

eto svitu moj, ako ne znate di ćete danas poć protegnit noge, pođite malo do merjana, povirite ovu crikvicu; lip je dan, ko ovo more plati, a? :o)

e...

današnja slobodna dalmacija donosi izjavu šjor branka roglića zvanog ćićo:

"Kupit ću svaku kuću koja mi zapne za oko, veli Roglić, naravno ako je na dobroj poziciji, na osami, bez susjeda u blizini... Obnovit ću je u izvornom slogu i obvezno sagraditi bazen"

sve to u članku di opisuju koliko on tega jema i da sad redi stare kuće po dalmaciji i tako to...

link ovod: http://arhiv.slobodnadalmacija.hr/20070112/stil-design01.asp

e, sad... lipo je ča branko roglić jema, šta ulaže i šta o njemu notaju foji. neka ga, a bog da i ciloj rvackoj da bude bogata. narafski, ja se ne zalažen za svakakvo bogatstvo, meni jedino piza ono ča je stečeno pošteno... a takvih je malo, e...

branka roglića znan od svoga ditinjstva. prije 1991. nije jema bog zna šta, bija je niki šefić u varte, a mater o' njegove žene  oli njegova punica je jemala kuću na makarskoj rivijeri i nju je afitavala fureštima. njegov mlađi sin josip je odija sa menom u razred, čak smo niko vrime i sidili skupa u klupu, jeman ga i na slike (vidi arhiv slika pod rubriku o meni, pa one iz moga albuma, litrati iz pučke skule oli ovod: http://xviiarhiva032006.mojblog.hr/permalink.aspx?id=58867 ) a starijemu, stipi je moja mater predavala rvacki u tekničku skulu. stali su u moj portun, nikoliko podi niže o' mene i narafski pogled iz tega stana nije ni sjena onemu ča ga ja jeman. stan tot još uvik jemaju i afitaju ga podstanarima od kojih većina nima osnove pristojnosti (čast ritkin kulturnin iznimkama ča su tot živile), a jesu li to afitavanje prijavili na poreznu ne znan. nismo se vidili godinama, josipa san trefi pred nikoliko godin, javija se i to je ka to... ti judi ne žive višje u split, priselili su u zagreb koliko ja znan, a ovod afitaju stanove, kuće, brode i svo to svoje silno bogatstvo koje je puno nareslo o' iza 1991.

zaradi čega ovo notajen sad, a? e pa ako ste pojmljivo čitali, šjor roglić govori da će kupit sve redon ča njemu zapne za joko. poslin mu za joko more zapet naprimjer i moj stan oli moja firma. i iston će logikon zaključit da će on to kupit. e, pa šjor (bivši) suside, ne morete sve kupit. evo, ja van ovod na ovi internet notajen da nimate pinezi za kupit:

1. moj stan

2. moju tvrtku

3. moje kumpanje, moje maške, moju fameju.

ne virujete, a? evo, pošaljite kakvu ponudu, koliko god oćete i notat ću van NE. i to brez iti malo straja... jerbo, znan vas i prije 1991.

hehe, čunka, a? eto šta ti je Tigrić u postelji, e... :o)

litrat by XVII , slikano ovih dana

klik za veće

narafski, ne prodajen Tigrića, ne darijen Tigrića

more

nebo

misao

nada

litrati i versi by XVII

kliknite za veće i guštajte!

e...

ajde da konačno notamo i prvi post sa sređenoga kompa na ovi blog.

mislin se ča stivat za početak godine ovod, a? a nima se tot šta puno mislit,  mudrovat, filozofirat. najbolje je stivat koji lipi litrat o mora, brodi, jidara, odrazi. zasad guštajte u ovemu jednome, morete ga klikon i uvećat, a ovih dan će bit još, upravo san priko dvisto litrati pribaci sa digitalca na komp, e... pomalo ćemo š tin, vrag odnija i prišu, e...

šta reć za početak 2007. godine? najprvo ću se svima ča su mi se ovih dana javili zafalit za mailove, čestitke, moderne i starinske (te su mi posebno drage), sms-ove, pozive i sl. narafski da i ja vama želin svako dobro, mir u srcu i duši, zdravja, jubavi, sriće, pinezi, svega lipoga.

e...

znan da jema i kurjožih ča se pitaju di san i kud san ovih dana.

a šta mislite, a?

oni ča me znaju znaju da uvik puno radin i da živin skromno i jednostavno, brez kiča i pompe.  zaradi tega i niman baš nikih potriba o' pokazivanja i paradiranja po otelima za novogodišnje dočeke i po skijalištima poza dočeka. dakleM, niste me mogli vidit na novogodišnjen balanju za iljadu i po kuna u otel lav sa onin šjor vukasovićen ča ga interpol proučava, a isto tako me nećete vidit ni na kojen skijalištu ovih dana; snig ne volin, štufa me je kad smo ka dica po cile dane po sloveniji bili na snigu u izviđače. niste me mogli vidit na govorancijama šjor sanadera u marjana, a nećete me vidit ni na govorancijama bilo kojega drugoga političara ča ariva u split.  kod mene nije bilo ni rvackog narodnog običaja spajanja praznika, radilo se svaki radni dan. tako uza trud i rad danas na 09.01. jeman situaciju da mi za 2006. niko ne duguje, a da ni ja ni moje poduzeće nikome ne dugujemo. na 09.01. je moja malenkost mogla gotovinski platit komp u butigu i lipo dobit popust (i to ne mali, dobrih 20%, e). honorari za 12. misec 2006. su mojin judima isplaćeni još prošlu šetimanu. već su mi dogovoreni i neki veći i bitniji poslovi za 2007. itd. neću se višje falit, skromost je vrlina.

sad bi neko moga reć da ja ni ne živin. ma ke, svitu moj, di neću živit, jedan je život, narafski da ga živin, e... fritule su mi bile odlične, pršut isto, francuska nikad bolja, šampanjac ka mali bog, njoki za prste polizat. vatromet mi je nažalost bija mižerjast, ali tako je bilo svima ča su novu dočekali u split.

drago mi se bilo čut i vidit sa meni dragin peršonama, a sa nikima se tek jeman vidit.

e, bravo da ne zaboravin, posebno mi je bilo drago razminit lipe riči za novu sa jednin N., bilo je i vrime da se poza nikih grubih riči ča su bile tot dogodi i koja dobra. judi su najlipši kad se pomire. ozbiljno, e...

sve u svemu, stara je dobro otišla, nova veselo i dobro došla. nadan se da ste i vi guštali i da van život gre naprid lipo.

toliko za ovi prvi post sa novega kompa, nastavljamo sa www.xvii-online.com ka ča ste i dosad navikli. fala van na pacijenci ča ste je jemali ovih dan dok ste čekali sadržaje ovod.

ekola, gren ča, jemate pozdrav!