negdi san kraj mora i od 14.04.2010. na novoj domeni: www.xvii-online.org
stare tekstove potražite na: http://xviisufit.mojblog.hr
radijo split
metro express I.
metro express II.
metro express III.
rapsodija koluri, by XVII, danas, s moje ponistre, klik za veće
još vizualnih radova o' XVII: http://web.vip.hr/nmagazin.vip/radovi.html
na ovi blog se puno dolazi i priko tražilica, a često upisivani pojam je: slike splita. ajde da van dan linkove na jedno misto di jema višje o' 1000 (ričima: o' iljadu) lipih slika ovega našega najlipšega grada na svitu. lip je dan, najbolje bi bilo poć vanka, ali ako se ne more ili ako ste negdi daleko u svitu, proćirite ovod:
http://www.flickr.com/groups/split_croatia/
odnosno ovod:
http://www.flickr.com/groups/split_croatia/pool/
klikon na sliku ona se uvećava, a morete gledat i pomične slike priko ovega linka:
http://www.flickr.com/groups/split_croatia/pool/show/
učinili zajubljenici u split, među njima i XVII.
izrada još uvik dura. zaradi čega, a? e pa, ovi grad je vječna inspiracija, uvik se tot nešto novo more otkrit, nešto novo doživit. :o)
morete uočit masu mojih litrati i slika/crtarija. niki vižitari ovega bloga će se sitit da su bili sa menon kad se to činilio i onda su mi grintali da šta slikajen svakih šest metri i slično. nadan se da višje ne grintate jerbo grupa split na flickru jema priko iljadu radova... ja ih obećajen dat još, a bilo bi dobro da, ako jemate malo mota i bokunić aparatića, stivate i vi štagod tot...
jerbo, split/dalmacija/rvacka se ne voli ispraznin političkin govorima, vengo kreativnošću. kad su litrati na internetu, jednostavno su dostupni cilon svitu.
svi ča me znaju znaju da san kontra nasilja raznih vrsti pa tako i kontra nasilja u vezi/braku, a i poza veze/braka. gledan sad na tv jednu emisiju o' nasilju u braku/vezi. obično su žrtve žene. zlostavljanje more bit emocionalno, fizičko, financijsko... tema je kompleksna i o temu se moredu libri napisat.
večeras ću se zadržat samo na jednom segmentu.
neki tip je mlatija ženu i sad na tv daje izjave da on bidan nije zna da je to kazneno djelo.
e pa za sve boksače, nasilnike i velike face koji se bave takvin "časnin" radnjama ovod ću notat:
PREMLATIT BILO KOGA (pa i CURU, ŽENU, MATER, SESTRU, ČER, BIVŠU CURU, BIVŠU ŽENU, BUDUĆU CURU, BUDUĆU ŽENU, KOLEGICU, UČENICU, STUDENTICU, STRANKU, SUSIDU, RODICU, NEĆAKINJU, TETU, BAKU i sl.) JE KAZNENO DJELO.
PRITIT nekome (pa i CURI, ŽENI, MATERI, SESTRI, ČERI, BIVŠOJ CURI, BIVŠOJ ŽENI, BUDUĆOJ CURI, BUDUĆOJ ŽENI, KOLEGICI, UČENICI, STUDENTICI, STRANCI, SUSIDI, RODICI, NEĆAKINJI, TETI, BAKI i sl.) JE KAZNENO DJELO.
a za kaznena djela zakonodavac predviđa kazne pa i pržun.
žunta 1: klik na rad za uvećat
žunta 2: klik ovod za još
žunta 3: fala puno ekipi mojblog.hr na još jednom isticanju na naslovnici
http://www.mojblog.com/default1.aspx#post812
Sunset by XVII, klik za veće
moje račune na flickr-u i tičici morete nać ovod: http://web.vip.hr/nmagazin.vip/radovi.html
neka me skuža svit ča stivaje litrate iz raznih svitskih gradova u tu grupu, ali jema samo jedno misto na svitu di lipše zalazi, e... to van je u zadar.
žunta: za one ča ne znaju ingleški City Sunsets oće reć zalasci sunca u gradovima.
najprvo ću van reć da ovi site jema statistički brojač vižita. ne vidite ga, a? e, namišten je da bude nevidljiv oli invisible. zaradi čega ja to duperan, a? zaradi tega ča to jema svaka stranica ča se ozbiljno izrađuje. kako ja svakoj stranici pristupan ozbiljno, svaka moja stranica jema i brojač. brojač broji vižite, ali daje i statističke podatke priko kojih moš zaključit ča dupera najviše korisnika, odakle stižu, kako se spajaju na net i sl. sve to služi ka korisna informacija pri razvoju stranice.
pratin jedno 20 do 30 blogova, nikoliko galerija o' litrati, online izdanja o' nikoliko foja, povirin na nike portale, povirin na nike stručne stranice/portale, samostalno kreiran/održavan nešto stranica, povirin na nekoliko stranica za ćakule, na nike chatove svratin, po forumima odavno ništa ne pišen, ali dikad povirin na njih, stavin štagod na net, skinen štagod sa neta, emajliran itd.
zaradi svega ovega i puno posla, a i drugog života kojeg jeman, drugi blogeri moju vižitu jemaju jednom u nikoliko dana, a ako ih povirin svaki dan znači da je trenutno velikoooooo zatišje. ritko se na isti blog vraćan višje puta dnevno. to se more dogodit npr. ako se priko komentara pokrenila nika vrlo zanimljiva/žustra rasprava. drukčije niman vrimena za vraćanje, e..
e, sad. šta oću reć, a? ovi blog ima onemogućene komentare. to oće reć da nima rasprava. na njemu bude post do dva dnevno. znači, za žestoko vraćanje u jednom danu i nima baš motiva. e samo vi to tako mislite, e... roge ćaćine, e.... prije spomenti šjor brojač mi kaže da su niki ovod i desetak puta na dan. jema dikad dana da i pedeset puti dođe ista peršona. sad će niko reć to se vraćaju za čitat, snimat slike i tako. je, jema i tega, ali za nike točno znan ko su i zaradi čega dolaze. nediljon pogotovo. jerbo, ne znaju šta će o' dosade i prikovišje su kurjoži.
e pa samo za njih gren otkrit velike pikanterije koje ovod traže non-stop :p
dakleM:
- danas mi je za obid bija rižot o' liganja
- danas se nije nigdi posebno odilo jerbo je jedan posal u điru pa san u uredu. nije mi baš pravo, ali šta ću, mora se, kako je tako je, e...
- šta školovanje, šta nezaposlenost, šta zaposlenost, šta život općenito, utjecaja na moju kosu je bilo, tako da danas sa 34 godine jeman di koju sidu. piturajen se u svoju prirodnu koluru, a duperan keune . oćete i broj, a? a 5.35, e...
- o novitadi jeman: novu mikrovalnu, novi mikser, nove bičve, novu puntaricu i novi set papirića za ure, datume, natuknice i sl. ovo smo sve povoljno vazeli jučer u jednu ogromnu butigu ča joj ni ime ne moren izgovorit, a ča je tamo negdi iza kmana, kad se već dođe na ravne njive, e... isprid nje je crikva. ma sitit ćete se, e... jeste li kurjoži koliko nas je šta došlo, a? jeste, znan. ajmo: mikrovalna oko 110 kn, mikser oko 50 kn, bičve - 4 para 9 kuna, set papirića u škatulici oko 12 kuna, puntarica oko 4 kune. tako nekako, mislin da to ipak nije preskupo, pa lipo dokle dura, dura. za tekniku su rekli da daju 3 godine garancije.
- danas mi se u makinju za prat robu vrtila škura roba.
jeste li još kurjoži, a? e, a ča ću van ja, zantiželja je ubila mašku, gre XVII ča. di? e, neću van reć, jok, ma ke, e... :p
čitan ja maloprije u slobodnu da je nova moda i statusni simbol postalo bit drogiran. kokainon, e... i da se sad ti kokain dupera na poslovnin sastancima i večernjin izlascima među poslovnin sviton. dalje su notali da to gre umisto janjaca.
more bit da je meni samo osobna i pasoš na rvacku adresu jerbo pari ka da san sa druge planete, e... čitan to i ostajen deštuko. paf. u mene nima ni kokaina ni janjaca. ne upada mi u joko ni da kod svita s kojin dogovorin posal vonje na tako nešto, e... narafski, more bit da novinari slobodne sve to dobro i brez falinge notaju, da je tako, bit će.
no, isto tako mislin da triba reć da postoji ovod u split i jedan paraleni grad, koji pari da je s druge planete, ča nije ultra moderan i ne pati o' takvih statusnih simbola, pa stvara, radi i gradi brez tih pi*darija.
notali su danas u te foje da gram tega kokaina dođe 600 kuna. a koliko dura ti gram, a?
ne bi to meni došlo njanci blizu mene ni da meni neko da tih 600 kuna, a kamoli da ću ja dat za to 600 kuna.
oli mi pamet smeta, a? a šta će mi to? triba proarčit pineze? ma bogati, oću, sigurno ću ih poć arčit, ne znan ča ću o' priše, e... pineze mukotrpno zarađujen, ne restu mi na grani i nima takvih monadi i gluposti, e...
a forca? a force jeman i previše. meni bi bilo dobro da dan dura 48 uri koliko jeman ideji i šta sve oću učinit, e... mladi judi, a fali in force. ma zamisli. a di su je izgubili, a?
objesnoga li svita, gospe moja...
ne znan oću li in se smijat ili će mi doć plakat.
a evo, gren se smijat. zaradi tega ću takvima reć da je nova moda stavit vrčinu na glavu i tako proć priko grada. to van je isto i statusni simbol. oli to niste znali? ma niste cool. niste in, za gospu blaženu, e... jeste li stavili tu vrčinu višje na glavu, a? ajmo brzo, triba bit modno osvišten, triba duperat statusne simbole.
oni ča ne zna ča je vrčina, e ti, ti neka stavi teču. more i na buže, e...
ekola, gren ča jemate pozdrav!
žunta: fala ekipi mojblog.hr na još jednom isticanju na naslovnici.
http://www.mojblog.hr/default1.aspx#post806
e...
s obziron da je meni danas bija radni petak, sunce i arija su se vatali tek pozapodne. opće mi nije kjaro zaradi čega me niki pitaju jesan li u štrajku. ja ne radin u skuli oli na fakultet, vengo za vlastitu tvrtku Parametar d.o.o.
rekli smo da tot štrajka nikad nima. profešura jeman u fameji nikoliko, no oni nisu ja. svak triba snosit odgovornost za svoje postupke, izjave, ono ča čini/ne čini. mater i sestra su mi najbliža profešurska svojta. sestra mi je u drugu državu, a mater mi uvik radi jerbo je mišljenja: da se svoja prava ne more tražit na način da se drugome uskraćuju njegova (u ovon slučaju dici se uskraćuje pravo na obrazovanje ovih dana). ona nikad ne štrajka, to zna cili split i ja ne znan kojega boga me pitaju gluposti. moran je pofalit da i u mene uvik vridno radi, a privatnik ne more ni rođenu mater držat ako mu ne zna radit, e... šta će mu? propa bi u tom slučaju, e... jerbo, u privatnika plaća ne stiže radija oli ne, vengo je triba zaradit, e... niki su me čak optuživali i za nepotizam, ka, da mater držin honorarno u firmu. gospe moja. a nisu to jemali petlje poć reć sveučilištu u splitu (di recimo rade cile fameje, pojedine katedre se mogu po famejama zvat), raznin državnin firmama (di je slično) i na sva druga mista di bi se tribalo zapošljavat po natječajima i obavljat izbor. eto ča ti je čovik. a ja san privatnik, moren zaposlit koga oću. ipak, to ne znači da mi pitur more učit dicu ingleški. a jok. budite sigurni da u mene ne rade i nikad neće radit belece s "dokumentima" di timbri pare nacrtani čepon o' pive ka ča je po nikin skulama i drugin institucijama ča su baš o' države. zanimljivo da i takvi štrajkaju ovih dana. eto ča je šjola o' obraza, e... š t r a j k? ma neka se srbi oni ča ga češe, svitu moj, e... to oće reć: šjor premijer, miništar o' skula, ravnatelji i oni ča štrajkaju. u mene se uvik radi, liti i zimi, ja dicu vazimljen na repeticije oli poduke i kad ih niko neće, dajen račun za te poduke, spašavan tu dicu. dica i roditelji me poslin fermaju na ulicu i govore kako su od mene dobili potribnu pomoć i da su mi beskrajno zahvalni i ne razumin glupa pitanja u stilu jesan li u štrajku. stvarno, e... još jednom: kod mene se uvik radi, ujutro, masu puti i pozapodne, navečer, suboton, nediljon, praznikon, liti, zimi. sad ću s ovin fermat, gremo dalje.
evo nikoliko litrati, kliknite za veće. danas me interesiraju sjene, tračci sunca, odrazi, oblici, jarboli, brodi, jubav na Matejušku, a simboli Splita se ne moredu priskočit, narafski. guštajte! pozdravlja vas XVII ča uvik radi!
dakleM, poza šišanja izgledan ovako :o).
a sad je red da vidite i kako je bilo. guštajte, zaradi tega svaki litrat i je tot, e!
- šta je, šta me gledaš, a?
- e pa i maška je cara gledala pa ga se nije bojala, ajde šinjorina Pahuljice mjaukni, namisti se, popravi frizuru, tičica i gren te slikat.... :o)
žunta: apropo frizure, moja je danas nešto kraća, šesnija, poza ovega litrata oli slike, odilo se u frizeraj skratit grivu. sad sličin na čovika :o)
zaradi čega kod mene nikad nima štrajka?
1. zapošljavan isključivo stručne ljude,
2. angažiran ih u skladu sa njihovon strukon,
3. poštujen ih i ka ljude i ka stručnjake,
4. plaćan ih uvik na vrime (nastojin kad god je moguće i prije vrimena /posebna napomena: honorari će za ovi misec, svitu moj ča ste naporno radili, ić odma na početku 12. miseca, jutros san sa g. dogovori da sredi svu kartušinu i puštan pineze odma, čin se po zakonu bude moglo/) i ne škrtarin,
5. uvik jeman vrimena čut šta mi govore,
6. nikad ne glumin niku silu; ako san diretur, nisan faraon
7. sitin se rođendana, dice, zdravlja, bolesti, božića, nove godine i sl., ljudskog pitanja: kako ste?
8. nikad ne držin sastanke već u hodu dogovaran stvari sa sviton ča mi radi,
9. znan pofalit kad dobro učine posal,
10. rič mito kod mene ka i za sav pošten svit označava kriminalnu radnju, niti ga dajen niti ga priman, posal more dobit samo oni ča zna radit, e...
11. niko njanci sekund nikad nije bija brez ugovora.
itd.
zaradi svega ovega ja znan da će oni radit i:
- dva dana prije poroda
- nediljon
- praznikon
(na ovemu su se već dokazali)
i sl.
znan da osin radnika oli kako se moderno kaže djelatnika jeman i kumpanje, a ča je to rič štrajk opće ne znan.
danas mi je dan bija dobar, dogovoren je još jedan posal, to će se sad radit. obavljeni su još niki telefonski razgovori, život mi nikad ne staje, uvik se radi i stvara.
ekola, gren ča, pametan iz ovega more naučit ključ uspjeha!
Spljet by XVII, još jedan pogled sa mog balkona, o' jutros, klik za veće
Spljet by XVII, još jedan pogled sa mog balkona - detalj, o' jutros, klik za veće
još mojih litrati jema ovod: http://web.vip.hr/nmagazin.vip/radovi.html
e... jema i u drugoga svita jako dobrih litrati, ne činin samo ja litrate, e... za sve one ča vole dobru sliku danas ću ovod jopet istaknit nike meštre i meštrice. evo za danas dvoje sa ptičice.
povirite u te galerije i po mogućnosti ih pogledajte cile, izvrtite sve stranice. nećete falit, morete samo guštat i vidit puno lipote.
ovo je za žuntu, jedna pozapodnevna by XVII, klik za veće
e...
šta ćemo danas, a? kakvo je vrime, a?
južina, e... gnjilo tutokompleto.
evo, ja san se uvalija, zauzeja mot o' fjake i...
sad ću ubit joko ka ča i priliči. kunjan, ne smetaj me višje, e... :o)
glavni glumci: žućo, pahuljica, tigrić
litrati: by XVII
vrime kad su učinjeni: današnji dan
vlasnik/ca krila: hehe, a to van neću reć, oli morate sve znat, e...
e...
jugo, kiša, gnjilo. odlično vrime za mrvu zabost nos u litrate ča jemaju patinu starine na sebi. evo jednega iz spliskog mementa. lučica labud, iljadudevestotridesetisedme (1937.). odlično vrime i za grintat. ma ja neću neosnovano grintat, e... samo grintanja radi, e... ma ke, nije to moj stil. ovo je sa svrhon i razlogon. jerbo, duša mi stvarno pati kad vidin sve ča vidin, e...
pari mi se da je onda, 1937., grad bija višje po miri čovika. danas je višje po miri divljih. ozbiljno, e... onih ča se još ne znaju ni useknit u šudar ka čovik, vengo za to duperaju tavajol. onih ča su do nikidan gujicu prston brisali, e...
tot, u labuda (a danas i acya), danas nije ka nekad. krcato je brodi, a brod je kupija svaki stipe/ante/mate i to samo zaradi tega ča ga jema neko iz njegovog sela, pa da on bidan ne bude brez, e...
a ča ne zna razlikovat provu o' krme, to nima veze, e... ča ne zna ča oće reć riči: timun, štiva, cima, pajola, gvardija, jidro, grop, bofor isto nima veze. ča 1991. nije jema ni za gaće isto nima veze.
ča nije njanci šesno ime zna dat brodu (za one ča bidni ne znaju, šesna imena za brod su: jugo, nevera, ane, sandra, maestral, bonaca, zvir, beštija, zvizda mora i sl.), vengo je brodu za ime da svoje prezime isto nima veze. ono, ka, neka se brod zove ka ja. uajme, gospe moja :o(
e, splite moj, u šta si se pritvorija, di greš?
ekola, gren ča, ko je svatija, svatija je, e... a ko nije, e temu neće ni rječnik ni prevoditelj pomoć.
jemate pozdrav!
... i ugledan ovo. a ko je moga odolit, a? potegni patent, otvori boršu, izvadi aparat, škljocni. guštajte sad i vi, klik za veće :o)
jesen, kroz grane, by XVII, danas pozapodne
za sve one ča vole moje slike, crtarije i litrate, evo jedan rad s početka 2006. godine
Prova by XVII, tempera, učinjeno na početku 2006.
evo još nikih linkova di morete nać mojih vizualnih radova (litrati, slike, crtarije):
http://xviiart.mojblog.hr
http://xvii.pticica.com
http://www.flickr.com/photos/xvii_st
http://www.flickr.com/photos/xvii_st1
http://www.flickr.com/photos/xvii_st2
http://www.flickr.com/photos/xvii_st3
zanima vas vizualna umjetnost općenito?
oćete priporuka i na druge, a? a evo za danas jedna:
http://www.flickr.com/photos/pepi/
ovod jema puno lipih litrati autorice Snježane Novak. Odlična galerija, povirite obavezno!
ekola, gren ča. jemate pozdrav!
Regata by XVII, 2006., pastele
e...
evo jedan moj rad o' ove godine ča je već viđen ovod, na ovi blog. pozapodne je otiša dobit okvirić. ovi neće nikome poć na dar vengo će bit meni. eto, svidija mi se, a šta ću, e... u modru koluru mi ga je obeća uokvirit, virujen da će bit lipo, e... :o)
kad smo to učinili, butiga. malo ugovori o dilu, malo uplatnic, malo praznih CD-a, malo kuverti i još koja sitnica a la selojtep oli punte, nisi reka keks i eto troška višje o' 100 kuna. poza tega druga butiga. jedan bon o' mobitela i ode još 100 kunića. e da tako lako stižu ka ča parte život bi bija valcer :o) evo ovi se naprimjer tek danas sitija platit svoj račun do kraja. fala dragome bogu, divici mariji i svin svecima da je rodilo to plaćanje, e...
poza tega smo ja i jedan moj kumpanjo otišli potrošit još koji šold u cukarina apropo moga rođendana ča je bija u petak. eto ča ti je kapitalizam, ne moš kumpanje ni trefit na rođendan o' posla i strke vengo se š njima viđaš na peci bokune, kako ko stigne i more, e... tot, u cukarina, mi nije krivo ostavit pineze, pašte miritaju, a usluga je dobra. kumpanju, pak, f a l a na daru. evo špijat ćemo ča je bilo: ferrero rocher (puno lipi dar , mmmm :o), a isto tako mu f a l a ča mi je kumpanjo. jerbo, jemat kumpanja puno vridi, e...
poza tega smo prošli priko grada, zavrtili se malo ka trotuli priko Matejuške i Marmontove, povirili u Fotoklub i prođe pozapodne. a ča jema u Fotoklub, a? Međunarodna izložba o' litrati oli fotografija, e... e, evo, ovod proćirite, a povirite i do Fotokluba kad uvatite vrimena jerbo je izložba odlična, e... dura do 02.12.2006.
to bi bilo to. pozapodne je opisano. ekola, gren ča, jemate pozdrav!
Sve nježne riječi svijeta sačuvao sam za te
U pjesmama mojim
Sve nježne riječi svijeta da tebe meni vrate
Moja čežnjo davna.
Sve nježne riječi svijeta za duge puste sate
Samoće se bojim
Sve nježne riječi svijeta sačuvao sam za te
moja zvijezdo sjajna.
Magdalena, Magdalena
Moje nebo, moje sunce, moja duga
Magdalena, Magdalena
Moja sreća, moja radost, moja tuga.
Magdalena, Magdalena
Moja ruža, moja nada, moja sudba
Magdalena, Magdalena
Moja patnja, moja tajna, moja ljubav
Još te molim, Magdalena
Da se vratiš, Magdalena.
Oliver Dragojević
ja Olivera moren slušat i 24 ure brez fermat.
toliko mi je dobar, e...
u smiraj dana by XVII, 18.11.2006.
dobre su, a? još na temu jema ovod
za veće triba kliknit.
jema i ovod još na temu, pa di van je draže, e...
jesen by XVII, 18.11.2006.
dobre su, a? još na temu jema ovod
za veće triba kliknit.
jema i ovod još na temu, pa di van je draže, e...
------------------------------------------
znaš, smrti zapravo i nima.
(to svatiš lakše ako si rođen u misecu mrtvih,
a moreš tek probat svatit
ako ti rođendan pada u druge stađune.
možda i uspiješ, e...)
postoje tek transformacije,
prijelazi.
iz oblika u oblik greš/mo.
nešto triba partit
da se nešto drugo stvori.
život je nepobjediv.
jubav je nepobjediva.
more je nepobjedivo.
pobjede i porazi,
život i smrt,
sve se to vrti u krug.
ka trotul, e...
"ča smo na ovemu svitu?"
"ča je život vengo fantažija?"
e...
ove godine je stvarno bilo dobrih i maštovitih postupaka, čestitki, darova, ma svega lipoga. najprvo da zafalin svin dragin peršonama ča su mi danas čestitali rođendan i zaželili sve najbolje. a sad ću van ovod špijat ča sve more bit dar i kako su me niki posebno razveselili.
"Od srca ti želim sretan rođendan..." - poruka od M. jušto u ponoć i minut. fala M. ovo je bilo baš štosno, e...
e, sad pogledajte ove moje kumpanje:
D. kaže: "Ne želin da ti se ispune sve želje jer onda ne bi imala što željeti... Ne želin da ti se ostvare svi snovi jer ne bi imala što sanjati... Želin da ti se ispune one želje i ostvare oni snovi koji ćete učiniti presretnom... Sretan ti rođendan Nado i svako dobro" , fala D. za ovako lipu poruku.
I. pak kaže: "Nado sritan rođendan i od sveg srca ti želim sve najbolje... Da ti se ispune sve želje... uživaj!"
e, sad, dragi moji, fala van obojici, pravi ste, a koliko će se želja ispunit, e vidit ćemo, e... :o)
javija mi se i još jedan D. i na icq napisa "Sritan ti rođendan!", fala i njemu :o)
evo kako mi je rođendan čestita još jedan M., uz poruku čestitke mi se pojavilo i ovo pro na flickr računu.
http://www.flickr.com/photos/xvii_st3/
to je zaradi tega jerbo mi je M. darova pro članstvo, ono se nije moglo platit iz rvacke, ali jema i jamerike. fala M., ovi me dar baš razveselija. :o)
mater mi je recimo bilo dobra, vazela je dva libra još nikidan, ali kako ona ništa o' mene ne more sakrit, tako se i za te libre već nikoliko dana zna :o). jedan se čita punon paron, a drugi čeka red. o čemu se radi pogledajte :o)
fala mama!
moja draga G. je recimo bila praktična, jedan jako lipi, potribiti i šesan dar je o' nje. prava parkerica i rokovnik za 2007. ionako uvik fali mista za pisanje za posal, G. to najbolje vidi. :o)
fala G.!
stiglo je još dosta čestitki, kartulini, a sitija me se i kompjuter. jedna vrlo ritmična čestitka, puna mužike. stigla mi je od www.webshots.com hehe, ča ti je kapitalizam, čestitke ti šalje i škatula i fond o' penžjuna i osiguravajuće društvo, svi ča znaju kad ti je rođendan. ma neka čestitki, nije to loše, e :o)
razveselila me i www.pticica.com reklamnin linkom na ovi moj blog, to je ovod, di je profil, pogledajte :o)
http://xvii.pticica.com/korisnik.aspx?korisnikid=427
tribalo je jemat višje o' osan obožavatelja, ali meni je bilo dosta i osan jerbo mi je rođendan :o)
itd. jema tega još dosta, nećemo sve špijat ovod, e...
a spiza? znan da su sad niki kurjoži i po ton pitanju, e... ovako, litrat o' njoki i šuga niman, ali svatite me, svitu moj, tako je dobro sve skupa vonjalo da mi je bila priša guštat, ko je mislija na litrate, e... fala mama za vrhunski obid!
a slatko? evo naprimjer D. me jutros pita: je li se misi ča slatko? evo, umisilo se u centar torti ovo:
narafski, najprvo je tribalo poć feštat u cukarina. kako je bilo morete vidit ovod:
e, znan, poslin ću kukat na kile, ali ova torta nije mogla čekat sutra u frižideru, a jok... zaradi tega je odma danas platila laštru i moren van reć da je bila ka mali bog, puna kreme, ali ne prislatke vengo jušto kako triba, e... okus o' čikolate.
dakleM, zasici XVII, jedanput je 34. rođendan, e... a di su svićice? e to, to ćemo ostavit maloj dici. neka pušu, neka ih utrnu, ja se već pomalo bližin među odrasle, e... narafski, želin da uvik u meni ostane i barenko bokunić diteta, jerbo tot je mašta, jubav, dobrota i sve bitno ča odrasli zaboravljaju, a tribali bi držat na prvo misto, e...
ekola, gren ča, triba još feštat, rođendan dura do kraja dana, a sa kumpanjima će se, ka i svake godine, ić po pizzerijama, pašticerijama, kavama i slično danima. volin vas svitu moj, fala van o' srca ča ste mi ulipšali ovi dan.
žunta (notana 18.11.): fešta je durala cili dan, a za kraj dana, u ponoć manje 4 minute, stigla je jedna poruka o' jednoga moga dragoga kumpanja J. gre ovako: "Prijo moja, sritan ti rođendan. Želin ti sve najlipše u životu. I guštaj mi."
fala van svima.
o' srca,
XVII
:o)
e... danas je jušto 34 godine da su Gorka i Vinko Magazin dobili svoju prvu čer, Nadu. bija je petak, ka i danas, misto rođenja je bilo Zadar, dimenzije oko 4,50 kg i oko po metra. beba i po, a?
danas jeman 1.65 m, 65 i po kili, a detaljnije o mon liku i dilu oli u vezi životnih postignuća morete pročitat ovod.
danas, 34 godine poslin, mater i ćaća mi uza mene jemaju još jednu čer, moju oko dvi godine mlaju sestru Sandru, a ona jema jednega sina, maloga Filipa.
život je kroza godine donija i dobro i loše, more života je guštalo bonacu, bilo i u neverama. za sve lipo i ružno, fala ti Živote. sritan mi bija i ovi, 34. po redu, rođendan! :o)
grijanje by XVII, slikano maloprije
e...
finilo je lito, jema jedno petnaest dan po teplici, a po kalendaru i višje. zadnje mi je banjanje u moru ove godine bilo na 31.10. počelo se u peti misec. nije loše. sad ćemo mrvu fermat s banjanjen dok ponovno ne zatepli. koliko? asti sto, pa da u moru bude ugodno, e...
iz armeruna su se izvukle bičve, cavate, postoli, balonke, jakete, džemperi, još malo pa će i kapoti izlipit vanka. šjalpe, kape isto. vrime je o' čaja, spize sa žlicon (recimo paštafažol), šugova, njoka. užgale su se i pećice. izvukle su se i deke, a mislin da imbotide u svih još čekaju, ali još malo i one će vanka.
butige su već pune svićica i baluna za bor, jučer naručin i čestitke.
nije mi baš puno zima, ali jeman ja i sibiraca u kući, e... ne virujete mi? a eto , neka litrat govori, učinjen je maloprije, e...
rođendan mi je tek prikosutra, ali darovi su već počeli. za sad zafaljujen na njima, a u petak ćemo špijat koliko je ko bija domišljat, čime me je ko razveselija i sl. narafski, zaboravite na poklone ča pizaju puste pineze, oću jubav, dobrotu, štagod ča ne piza puno, ali je o' srca.
jemate pozdrav!
di si bija? šta si radija? najprvo jedan događaj o' petka (danas je ponediljak). odila moja malenkost u tu skulu vidit jemaju li štagod u svezi i glede te gospoje y za pokazat; skula mi je konačno poslala poziv po ovemu natječaju ča je friško iša (za stalni radni odnos) da moren vidit natječajnu dokumentaciju i to po mon zahtjevu, e.... priko linka morete pročitat sve ča je prije bilo notano ovod, na ovi blogu na tu temu.
e, sad, a ča mislite ča je bilo, a? evo odma ćemo kurjožima reć da nisu jemali za pokazat originalnu diplomu, da nisu jemali za pokazat njanci kopiju domovnice i njanci kopiju rodnog lista o' gospoje Y, a isto tako nisu jemali za pokazat ni njenu radnu knjižicu; ča se tiče prethodnog školovanja, pitaj dragog boga i gospu di, šta i kako, ali joči moje ništa vidile nisu.
pokazali su takozvane originale potvrda o položenon stručnon ispitu i pedagoškin predmetima i na te tzv. originale su timbri (pečati) bili ka da su crtani čepon o' pive i to se slagalo sa čudnovatin kopijama koje su do sad viđene. jemala je još i priporuku o' ovega profešura ča na fesbu čini svašta, nikidan smo o' njemu.
tot joj on garantira prošlost, sadašnjost i budućnost pa joj ne triba ni osobna, ni školovanje, ni diploma, ni rodni list, ni domovnica, ni radna knjižica, a pečati joj valjaju i na valove oli ka da su, ča je reka jedan moj kumpanjo, crtani čepon o' pive.
zaradi svega ča smo upravo rekli zoven puliciju. onda je ta pulicija nikoliko puti zvala mene. poza tega su zaključili da dođen u ponediljak tj. jutros u I. policijsku. nigdi nije priša, oli su dica, koju uči s takvin "dokumentima", kumpliri, a? za ukradene kumplire bi se brzo trkalo ka u akcijske filmove, a dicu ko šljivi,e... dođe i ponediljak, dođen u puliciju. tot san cilo jutro na katrigu. dobro je bilo ča mi je libar bija u boršu. izvadin ga i čitan. kroz cilo jutro jednoj je baki ukrelo takujin, jednoj ženi boršu i još je niki svit doša nešto pitat. pari mirno. puno pitomi split, e... jušto po miri čovika, e... višje je poziva bilo na moj mobitel jutros vengo na telefon o' pulicije. oko 2 bota stiže inšpektor koji me naručija ujutro i govori da je i triba bit ujutro, ali eto, prominilo se nešto oko smjena. daden mu izjavu, sve je popisa.
čudon se čudi kako to inšpekcijun o' skula nije sluša pomoćnika ministra ča je naredija prigledavanje oko svega tega. znan da se malo ko ko ovo čita čudnon čudi oko bilo čega višje, ali eto...
posebno mi je drago ča san kroza to vrime o' čekanja trefi jednega kumpanja ča je sa menon studira i ča je sa menon odija u srednju skulu. ti radi gori, povišje u državni inšpektorat za područje letrike. eto, da nije bilo pulicije ko zna kad bi se trefili.
vengo, obećali smo ono koje ime ovod notat, a? e, gremo o vrja jerbo kažu da ribica odatle mudi.
ministar prosvjete: Dragan Primorac (pitaj boga je li on opće išta zna o' svemu, on valjda viruje da je rvacka zemlja znanja. jerbo, ne mogu virovat da to govori na ono škatule o' televizije svaki dan, a da viruje u štagod drugo, e... to bi onda bilo licemjerno, e)
pomoćnik ministra prosvjete zadužen za resor nadzora: Marijan Kajmak (ovi mi piše višje vengo ča jubavnici pišu jedno drugome, o' njega jeman brdo dopisa i čovik je stalno o' inšpekcijuna skula ča je u split na bačvice tražija prigledavanje i još uvik to traži, ča je, je... zasad ča se tiče njega moren reć, ajde, more se progucat, e... možda je moga poslat i ljude iz zagreba da vide ča se događa, ne znan, vidit ćemo ča će bit dalje)
ljudi pored kojih se gospoja Y zaposlila za stalno u tu srednju skulu i koji su i pismeno i usmeno bili o svemu nekoliko puta obaviješteni i kojima je pomoćnik ministra naredija ti pregled se zovu:
Ante Radovčić, načelnik Odjela za inspekcijske poslove
Lidija Vukasović, prosvjetni inspektor
ponašanje ovega dvojca prima strankama i njihov rječnik neću ovod iznost jerbo je ovo pristojni blog pristojne peršone. kad ovod objavimo skenirane podneske, prijave i slično, pročitat ćete o' dilu njihovog ponašnja, a koga zanimaju detalji, more mi se javit u privatnu ćakulu ako jema štumika slušat gadarije, e... ovod ću samo notat jednu zanimljivost. Lidija Vukasović je žena o' Gorana Vukasovića ča je diretur Brodosplita. je, to je oni ča ga interpol proučava zaradi pranja pinezi u škveru i ča govori da je kumpanjo o' premijera (pricidnika vlade) Ive Sanadera.
apropo svega ovega moja je peršona kontaktirala višje policijota, a izjave se davalo u kancelariju o' dva policijota, kako se oni zovu bit će u nastavcima.
tokalo me gledat i čunku ravnatelja o' te skule i čunku njegove tajnice. njihova imena u nastavcima ove štorije. ka i ime gospoje Y. ako joj je to opće pravo ime, e...
narafski, zadnja imena će ić i sa tin kopijama ča jemaju vesele i rasplesane timbre. čekajte malo, strpljen spašen, e... evo i na puliciju mi je danas reklo da bi bilo dobro sve to stivat na internet i poslat u foje (novine). ča bi još danas mogli reć, a? evo naprimjer to da je ravnatelj te skule rodijak o' Marina Jurjevića, saborskog zastupnika.
čija je onda gospoja Y, a? o' hdz-a oli sdp-a, a? e, ko će znat, otkrit će se i to jednom, valjda. ja mislin da zapravo nije ničija i da je svačija, fleksibilna je, e... dobro koristi buže i nered u rvackoj. e sad, more bit i da falijen, ko će znat, krhko je znanje.
jesmo rekli sve? obećana imena će bit, a fali još ko je profešur ča voli popit. e to, to ćete sami morat odgonetnit, odgovore morete poslat mailon, za točni odgovor plaćan kavu.
pozapodne smo ja i moj kumpanjo učinili đir oko merjana. evo litrati, klik za veće. ovi moj kumpanjo ka i još ne znan koliko svita zna kako izgledaju timbri o' gospoje Y. pokaže to XVII cilome gradu, a doznat ćete i vi, obećajen, e...
ekola, gren ča, pozdravljan lipo. koga zanima lipša strana splita, crikvica na sliku je ona o svetoga jere.
mrvu splita o' jutros by XVII
e...
ko kaže da za vrime južine triba bit loše volje, grintat, vriđat, karat se, a? evo moja kreativnost o' danas. guštajte. klik za veće , narafski.
Matejuška jutros by XVII
e...
ovo divlji ča su arivali ovod, u ovi split ča zaradi takvih postaje bidan, nikad neće razumit, e...
a nije mi ni briga da razume.
žunta, za nju fala jednemu internetskon kumpanju, uštekaj zvučnike, e...
niki litrati o' petka ujutro by XVII oli kad se nebo spusti na zemlju
u nikon san konfužjunu, pa za danas samo malo litrati o' jučer... notavanja ćemo ostavit za dane kad bude bokunić višje vrimena, e...
e...
rekli samo štagod o' identitetu, rekli smo i o mome identitetu, a sad ćemo počet otkrivat nike identitete ovod na ovi blog, e... jerbo, štufalo me da uvik bude da se niko drugi kakija u njihove gaće. za ono ča se učini triba snosit i odgovornost, barenko o' isprid riči javnosti kad već pravosuđe opće ne funkcionira, e... a javnost me već danima fermaje po splitu i pita: 'ma koji je to profešur ča krede i ita u ponistru poslijediplomce na fesbu, a?'
sve apropo ovega teksta i ovega njegovoga dila.
XVII:"sićan se, jedan me je sveučilišni profešur gurnija isprid dvadeset študenata, kad je moja malenkost bila poslijediplomac, u ponistru. da nije bila zatvorena, more bit da me danas ne bi ni bilo. tokalo me, naime, ka tada poslijediplomca, rintat temu profešuru, a kad se posal (poveći) finija, nije tija platit moj rad, nije mi tija to znanstveno priznat, još me i fizički napa. sve se prijavilo upravi fakulteta. osin mene napa je još svita ča tot radi i ča radi po drugin firmama. moja malenkost je tot samo studirala, nije bila zaposlenik nikad tot, a jok. e, svitu moj, kad je lipo svih napa još je i pohvalnicu te godine o' fakulteta dobija. još uvik radi na ti fakultet, a radi mu fala bogu i žena, jerbo di će radit vengo tot, e... rvacka posla."
narafski, niki su mi došli i sa direktnin pitanjen: je li se to radi o Mati Kurtoviću? je, sićamo se kad si ono minjala mentora, priča je o temu cili grad ča ti je učinija, e...
cinjeno čitateljstvo ovega bloga, je, radi se o Mati Kurtoviću, rođenon 17.11.1940. (Mate Kurtović)
kako sve uvik notajen prima istiniton događaju, sad ćemo ovod stivat i malo skenirane dokumentacije.
najprvo moja zamolba fesbu za prominu nametnutog mentora Mate Kurtovića uz obrazloženje ča mi je učinija.
evo i pozitivni odgovor fesba da mi je mentor prominjen:
kliknite za sve uvećat.
eto šta sve živ čovik/žena doživi za svoje pineze (ča ih je tribalo dat za školarinu) na fesbu.
narafski, sad me neko more pitat: a kako si onda magistrirala u profesora Slavka Vujevića? e pa profesor Ivan Slapničar se također mora minjat jerbo je bija partija u jameriku. evo i te dokumentacije. dajen je ovod čisto zaradi vjerodostojnosti, ali to nije bombastično ka ovo gori, čista procedura za prominu menotra. ipak, kliknite ako vas i to zanima.
narafski, još nike stvari ča su notane ovod će bit potkripljene imenima i dokazima, nikako mi vrag ne da mira ako to ne učinin, e...
za ovaj post snosin potpunu odgovornost i da moj internetski nick je XVII, ali ja sam:
mr.sc. Nada Magazin, dipl.ing. rođena 17.11.1972.
eto, pa žalite se, tužite me, činite šta vas god volja, e... :
e...
ne znan koliko je pametno notavat, a da na kraju pola papi mujsa, ali obećali su mi da će vratit te misece ča su postali nevidljivi, a ja se nadan da će obećanje i ispunit jerbo poslovica kaže: judi se drže za riči, a volovi za rogove, e...
ajmo ča notat štagod ovod, vrime je da se da jedan tekst ča je obećan, e...
za one ča nisu prije čitali, bilo bi dobro da povire ove tekstove:
o identitetu pojednica, dil prvi - pripadnost(i)
o identitetu pojedinca, dil drugi - važnost i ostvarenja
o identitetu pojednica, dil treći - izgradnja i samoizgradnja
o identitetu pojedinca, dil četvrti - samoostvarenje
o identitetu pojedinca, dil peti - samospoznaja oli prihvaćanje sebe
o identitetu pojednica, dil šesti - važnost očuvanja identiteta pojedinca u vezi
e...
a šta kad identiteta pojednica nima, a?
e, to je nešto najgore ča se peršoni more dogodit. ispada da joj je lakše živit i s lošin identiteton (npr. identitet lupeža, kurbetine i sl. - da, da to nije dobro, to je loše i to nisu face kako se propagira u ovaj tužnoj zemlji), vengo brez identiteta.
kad identiteta nima onda jemate puno tužne događaje. to van je kad npr. žaba digne nogu da i nju potkuju jerbo je vidila da konja kuju oli ča šimija vidi to šimija radi, e... svit ča je takav će dicu poslat na koju slobodnu aktivnost samo zaradi tega jerbo tot gre susidov mali, a opće ih neće bit briga je li njihovo dite tot sritno. kapac su dite upisat na koji fakultet samo zaradi tega je oni to oće oli jer tot jemaju vezu, a ne zato ča to iti malo zanima njihovo dite. trču na skijanje jerbo na skijanje gredu svi, a ča poslin neće jemat ča obidvat i ča će fameju dovest na inkanat to nima veze. trkat će vazest postole o' tri iljade kuna, a tolika in je i plaća. obavezno ćete ih viđat na rivu oli kakvoj drugoj špici npr. zagrebačkoj, a gurat će se i uz gujicu prežidenta mesića. stav će in uvik bit ono ča su o' nikoga čuli oli vidili jerbo svoga stava nikad nimaju. opće in nije kjaro za šta jemaju talenta i sposobnosti, a za šta nisu opće. sve to skupa je još dobro dok su tako, ajmo reć, tragikomični. međutin, iz ovega snobizma oliti preseravanja oliti želje da se živi u neskladu sa svojin intelektualnin, materijalnin, psihičkin i fizičkin mogućnostima se svašta može razvit. nike o' stvari su: tragikomičnost, duboka psihička nesritnost, dugovi, maltretiranje okoline, lupešćina svake vrsti (o' tonobila do tuđih znanstvenih radova) pa sve do ekstremnih kad je već u pitanju medicinski slučaj ča se predstavlja tuđin identiteton i ča je čak kapac poć ubit vlasnika nikog dobrog identiteta; sitite se raznih slučajava koji su tili uć u povist, npr. ubojica johna lennona, ma ko je za njega zna dok nije ubija pivača, a? šta činit pored takvih, a? moj savit za kraj ovega ciklusa tekstova je: bižite ča vas noge nose o' peršoni brez identiteta jerbo o' njih i blizu njih morete samo horor filmove doživit. najozbiljnije, e...
ekola, notan je i ovi post. obećano ispunjeno. ja nisan ka naši bože me prosti političari ča daju kojekakve jamstvene kartice, a poslin ne naprave ništa. svoje se riči držin. nadan se da će se i ekipa sa MojBlog.hr držat obećanja i vratit mi moj šufit kako je i bija.
jemate pozdrav!
e...
u moru do 31.10., a danas na 6.11. mi je pećica užgana kraj gujice. naglo je zaladilo. danas mi se nije dalo nigdi poć. ama baš nigdi. cili dan san u uredu i ušestajen ovo škatule. još koji dan i bit će mi ka nova. i durat će mi lipo sve dok ne vazmen niki laptop. PC sigurno višje neću vazimat. jema puno žica i opće nije praktičan. no, nije nigdi priša. nije mi nikad priša za vazimljat najnoviju tekniku. more bit da je to zaradi tega ča san o' teknike, a ko će znat, e... :o)
kako mi je škatula stalo uštekana, tako su me danas priko nje niki judi i razveselili. ma ko sad? pitate odma kurjože, a? e, javija mi se jedan kumpanjo, nismo se odavno bili čuli i baš mi je bilo drago da se sitija napisat koju rič. fala d. drago mi je i ča si jopet ovod, u našu dalmaciju, e...
moje litrate na flickru i tičici su mi pofalila dva čovika ča po mon mišljenju znaju učinit puno lipi litrat. to me strašno obradovalo. evo van ovod linkovi na njihove galerije pa povirite, nećete falit:
http://www.flickr.com/photos/komizamario/
javija mi se još jedan kumpanjo. nismo se čuli par dan i njegovo javljanje me isto razveselilo. međutim, dil razgovora ča je iša ovako mi baš i nije bija drag:
...
XVII: a svaćan ja sad tebe, ali ne svaćan sta je judima potriba bit tako okrutan prema nekome. je li to znači da si joj drag? hm? ma grozno.
kumpanjo: ja sam drag njoj i ona je meni, ali nikako da se nađemo kako bog zapovida, uvik su neke svađe među nama.
kumpanjo: uvik nekakvi nesporazumu i nekakvo nerazumijevanje.
kumpanjo: morat ću te pozdravit. sitija sam se sad da moram nešto obavit.
kumpanjo: čut ćemo se ovih dana.
kumpanjo: aj bog.
XVII: a dobro, čujemo se... ovan ka ovan, ispatila san se i sama. (ovod sad kidan jednu rečenicu radi zaštite nikih imena i identiteta nikih ovnova, ali kumpanjo ce razumit). sve znan.
i sad se pita čovik (a more i žena) je li se to drži one di nima svađe nima ni jubavi ili ti ča su po horoskopu ovnovi moraju tako, karat se do iznemoglosti, ratovat, pa moglo bi se reć i mučit bližnje. narafski, neću sad da ovnovi misle da jeman nešto kontra njih, dapače, poza škorpiona kojih najviše jema u mon okruženju oko mene uvik jema i ovnova. znan ih stvarno jako puno. jema li ča u temu horoskopu neću opće mislit, ali samo mi je nekako život donija niki zaključak da ti ča su ovnovi ne moredu brez rata i karanja nikako. planet mars vlada njima. mars je bog rata. rat i karanje in je spiza za dušu, a ne misle da na ovon svitu jema i svita ča mu to i teško pada, e... ča je najgore, opće ne vide kad faliju i opće ne vide da bi se barenko dikad tribalo i ispričat za takvo ponašanje. bilo bi mi puno drago da mi se javi koji ovan ča se zna pristojno ponašat, ča nije grez i ča se zna ispričat kad falije. srce mi naprosto čezne upoznat jednega takvoga...
zasad znan samo šjor tigrića da je ovan sa finin manirima, a žućo je velika maza, ali puno puti zna bit ka zadnji mornar iz nike krčme u šangaju po bezobrazluku, e... uajme, gren ča, morat ću sad ovi tekst finit da se ne zamirin previše tima ča su rođeni u proliće, e... jerbo, kako kažu da se pluton ukinija, onda je i nama škorpionima osta samo mars. paaaaa :o)
jemate pozdrav!
odmori joči u zelenilu (npr. zvončaca),
udahni modrinu.
pušti i Galeba da se pinku odmori.
neka tvoj vapor uđe u koji lipi porat (npr.spliski).
budi miran/a i sritan/a,
jubav mora je uvik tot.
slikano u subotu. u splitu. by XVII, narafski.
još mojih litrati jemate ovod:
http://web.vip.hr/nmagazin.vip/radovi.html
žunta: fala ekipi mojblog.hr na još jednemu spominjanju na naslovnici
http://mojblog.hr/default1.aspx#post776
najprvo ćemo i ovod mojoj knjigovođi g. zaželit sritan 35. rođendan.
onda ćemo čestitat mojoj firmi
Parametar d.o.o.
na dvi godine + 1 dan rada.
poza tega ćemo i jopet čestitat mojoj firmi jerbo je danas zgotovila još jedan posal i stekla još jednu referencu.
a sad ću sebi čestitat na pacijenci. zaradi čega?
evo jedan razgovor o' danas. prima istiniton događaju.
šjor M.: je
XVII: kako ste?
šjor M.: dobro san, a vi?
XVII: dobro san fala. znate ja vas zoven zaradi računa br. taj i taj. iznosi oko 2 iljade kuna. vaša tajnica me nešto zvala, tila ga je razbijat na nike rate, ali naša tvrtka dopušta rate samo za račune iznad 10 iljada kuna i to uz prethodne pismene dogovore/ugovore. tako smo joj i rekli. poza tega je vaša tajnica na svoju ruku ipak učinila ti račun na bokune i platila samo iljadu kuna, a ja vas sad zoven da van kažen da je prošlo već dosta vrimena i da tribate račun platit do kraja. ne znan koliko ste vi u sve to upućeni, je li ona to činila na svoju ruku i tako to, ali tribate namirit svoje obaveze.
šjor M.: a ja ću vama reć da smo u rvackoj i da ovod niko ne plaća račune, da je svak svakome dužan, pa šta sad oćete da se ja žurin,a? koja priša? šta oćete?
XVII: ja nikome ne dugujen. niko ni meni ne duguje osin vas (mislin se da ovako učini 10 oli 15 firmi, a di bi se onda bilo????), meni se ovako nešto niko njaci ne usuđuje reć, a kamoli činit, e... a šta je sa drugima, e, to nije moja briga moj šjor M. račun tribate namirit do kraja..
šjor M.: i vi ste toliko jadni da nimate pinezi i sad ste se sitili mene zvat, a?
XVII: skužajte šjor M., ali nismo mi ti koji nekome dugujemo. mi smo svoj posal pošteno napravili, sve na vrime isporučili i ako je ko ovod jadan to ste vi, vi nama trenutno dugujete, izvolite platit račun, živili i zdravi bili.
XVII- završava razgovor i spušta slušalicu. e da ih je pustit koji bi to raspašoj bija... ovega ćemo jopet zvat u ponediljak ako ne plati do tad, pa jopet i u utorak i tako sve dok pinezi ne bude na računu firme, e.. pacijence fala bogu jeman, kroza ove dvi godine sve se naplatilo pa će i ovi.
je li dosta za danas? ma je, ekola gren ča jemate pozdrav!
XVII: nike prednosti života u splitu, notano 28.10.2006. u 19:02
Slobodna Dalmacija: metropola sunca i nezaposlenosti, notano 02.11.2006 oli danas
ovod ka ča znate notajen besplatno. iz jubavi za ovi grad. kako mi grad i država vraćaju mogli ste pročitat i u zadnji post. ma glavno da ja s ostalin privatnicima triban napunit proračun o' grada i države,e... oli ja ča drugo bitno, a?
novinari u slobodnu primaju plaću. za tu plaću tribalo bi jemat i ideje, e... tribalo bi za notavat o' splitu i barenko mrvicu volit ovi grad, pa bi članak ispa na način da se ćuti da u njemu jema i mrvu duše, e..
kako tako nije, svakodnevno dobijen stotine poruka u kojima piše evala XVII, jopet tebe čitan prije slobodne. e pa lipi moji iz slobodne, a ča ću van ja, priokrenite mrvu način rada pa vas možda bude i jopet svit čita ka nekad (ovo mislin na prije jedno petnaest do dvadeset godin, e).
litrat duje by XVII, o' danas
prethodni povezani tekstovi:
http://xviiarhiva032006.mojblog.hr/permalink.aspx?id=58655
http://xviiarhiva032006.mojblog.hr/permalink.aspx?id=58874
http://xvii.mojblog.hr/permalink.aspx?id=53605
http://xvii-online.com/permalink.aspx?id=54293
http://xvii-online.com/permalink.aspx?id=59425
http://xvii-online.com/permalink.aspx?id=64639
http://xvii-online.com/permalink.aspx?id=77114
dakleM, iako je pomoćnik ministra Primorca naredija spliskon inšpekcijunu o' skula da prigleda originalne dokumente o' ove gospoje Y, oni to učinili nisu.
u međuvrimenu je iša natječaj u foje. nije mi vrag da mira, pošaljen molbu, čisto onako da joj i dalje moren tražit uvid u te originale. gospoja Y je sa potvrdama o' kojih su viđene samo nike čudne fotokopije primljena u stalni radni odnos u srednju skulu u drugi grad po veličini u rvackoj. danas mi je pošćjer donija ti odgovor. nikakvog razgovora za ti posal jopet nije bilo.
narafski da još uvik tražin i tražit ću i dalje uvid u originale te gospoje Y, a isto tako ću pomalo ovod reć ča su notali o temu kako je ime i prezime o' te gospoje Y, koja je to skula, kako se zove ravnatelj o' te skule, kako se zovu inšpektori u split (tot recimo jema i žena o' jednega ča ga trenutno proučava interpol zaradi pranja pinezi u škveru).
isto tako, skenirat ću te njene fotokopije i stivat ću ih ovod da ih vidite. samo pomalo, nigdi nije priša, lipo dolazite ovod, vižitajite ovi blog i sve ćete doznat.
koliko u rvackoj vridi znanje? rvackoj njanci po pišljiva boba.
meni? beskrajno puno, sa znanjen zarađujen, upravo samo isporučili prvi dil naručenoga posla. tokalo nas je radit i jučer cili dan do kasno u noć, cilo jutro danas, a drugi dil se još radi. fala judima koji rade sa menon na trudu i znanju ča ga jemaju. mi radimo i stvaramo, nismo svi fala bogu gospoja Y.
UTJEHA KOSE
Gledao sam te sinoć. U snu. Tužnu. Mrtvu.
U dvorani kobnoj, u idili cvijeća,
Na visokom odru, u agoniji svijeća,
Gotov da ti predam život kao žrtvu.
Nisam plako. Nisam. Zapanjen sam stao
U dvorani kobnoj, punoj smrti krasne,
Sumnjajući da su tamne oči jasne
Odakle mi nekad bolji život sjao.
Sve baš, sve je mrtvo: oči, dah i ruke,
Sve što očajanjem htjedoh da oživim
U slijepoj stravi i u strasti muke,
U dvorani kobnoj, mislima u sivim.
Samo kosa tvoja još je bila živa,
Pa mi reče: Miruj! U smrti se sniva.
ANTUN GUSTAV MATOŠ
SMRT I JA
Smrt nije izvan mene. Ona je u meni
od najprvog početka: sa mnom raste
u svakom času
Jednog dana
ja zastanem
a ona raste dalje
u meni dok me cijelog ne proraste
i stigne na rub mene. Moj svršetak
njen je pravi početak:
kad kraljuje dalje sama
ANTUN BRANKO ŠIMIĆ
svi moji dragi ča ih višje nima i dalje žive.
tot su, u sićanjima mojin.
update :
bacite joko i na naslovnicu:
http://www.mojblog.com/default1.aspx#post772
fala ekipi mojblog.hr na spominjanju.
