e... svit svako malo pogodi di je ovo: šporkarije maloga marinka

kako je na vrju bloga, a jočiju mi bit će tot dok me jema, uvati to vižita i vižita dnevno.

kako je već rečeno, zna cili grad, ali još jema onih ča nisu baš sigurni. e, pa za te (iako se sve more iščitat kroza tekstove):

• to je u gradu splitu, to vam je drugi grad po veličini u rvackoj.
• u ulici zrinsko-frankopanskoj, to je ona ča gre o' staroga placa pa do novega ajdukovog stadiona.
• skula srednja, inicijali imena T.Š.
• ponosna vlasnica tega timbra ča tako "šesno" izgleda (vidi link:  šporkarije maloga marinka ) i ča se zaradi njega pulicija angažirala i podnila kaznenu prijavu "uči" dicu letriku. pošten svit ča se tot natjeca brez falšeta, sa svojon poštenon diplomom/diplomama, dosad je oštetila za iljade i iljade kuna jerbo za ti timbar ča pari da je crtan čepon o' pive (po splitu je zaradi tega popularno zovu čepuša), naime, svaki misec na račun poreznih obveznika uvati oko 5 iljada kuna, neto, narafski. a koliko su oštećena dica? e, svitu moj, briga koga za dicu u ovoj bidnoj zemlji.
• je li vas zanima kako se ta beleca zove, a? inicijali k.k., rođena v., a oni "puno pošteni čovik" ča je to zaposlija za "lipe joči", narafski, jema inicijale m.t.,  pomagala mu je tajnica d.m., rođena m.

daklem, prolaze godine, a kroza godine republika rvacka je do sad po ton pitanju učinila ovo:

1. spliska pulicija podnila kaznenu prijavu na državno odvjetništvo apropo tega timbra i još kojekoga i koječega šta je povezano š tin.

2. pomoćnik miništra o' skula je nota da oni to timbra izdali nisu.

kako pulicija nije poslodavac, vengo pulicija, ona joj  ne može otkazat ugovor o radu, pa tako ta beleca još radi dok jednega lipoga dana pravosuđe ne itne sve u kantu o' škovaca jerbo kad to dođe na red bit će vjerojatno 3057. godina.

da nisu tako spori, možda bi je kogod i pita je li ti timbar sama crtala ili ga je digod jeftino kupila i možda bi i dobila koju godinicu pržuna.

ovako, šipak. ne događa se ništa, još samo ča velikin slovima na vrj merjana nisu notali: živile falšete, neka ih, IDEMO DALJE, s takvima u najlipšu i najsritniju budućnost.

jema li još ko da ne zna točno di je to i o kome je rič, a? e, evo obećajen, jedan dan ću ovod sigurno objavit puna imena. kad? kad mi dosadi , eto kad.  zasad ovako, jerbo kako reče šjor pricidnik mesić: institucije moraju funkcionirati, pa želin vidit oće li to funkcioniranje bit baš 3057. oli more i koja godinica prije, e...

-----------------------

sad bi se neko moga pitat je li mene straj šta će bit ako hdz formira vladu, a ja jeman ovi naslov. čega će me bit straj, a? je li sve ovo u redu? ako je, onda je ovo reklama za šjoru čepušu (u prijašnjim tektovima nazvanu gospojom y) i njenu svitu na jednemu o' posjećenijih blogova u rvata; a ako nije, onda bi valjda ti hdz tribalo bit straj, a ne mene, e... jerbo, ja sa svin ovin fala bogu niman ništa, a oni jemaju i prikovišje. kako? a narafski jema tot još veselja, ovi šjor diretur ča je to zaposlija je recimo rodijak o' marina jurjevića ča je u sdp, ali dok pulicija u splitu na sve to podnosi kaznene prijave, svemu temu se, pak, vesele prosvjetni inšpektori iz splita lidija vukasović (žena gorana vukasovića iz spliskoga škvera, onega ča ga se pita di je 10 milijuna dolori) i ante radovčić. oni su mi kad se tamo odilo razgovarat apropo svega ovega konkretno rekli da diplomu/e stavin u šupak (da, dobro ste pročitali, upravo to je rječnik tega dvojca) i na spomen učenja i znanja grohotom se smijali. ostali arsenal šporkih rič o' tega dvojca neću ovod iznosit, to je nešto strašno, nepojmljivo. tot me se vriđalo, pritilo mi, ma bože sačuvaj. prosvjetna inšpekcija u splitu je u onu veliku kuću na bačvice, uza samo plažu. to su ka ča svi znate kumpanji o' šjor ive sanadera, bilo je u sve foje to o jubavi između vukasovića i sanadera, e... velikoj i iskrenoj.

ko ovo sve financira, a?

a ja, pi*da, da oprostite na izrazu. jerbo, ja san recimo privatnik, jeman tvrtku i niko mi ništa ne daje, moran stvorit posal, odradit ga, naplatit ga, dat puste pineze u državni proračun. i ko još? ostali porezni obveznici, pi*de, slične meni, eto ko.

je li idemo dalje? a bože moj, s posebnin gušton. dovedite nan još falšeta, brez tega ne možemo...

e, bravo, prije vengo završin ovi članak, da još pitan ako bi mi neko moga reč. šta je jadranka kosor po zanimanju? 91. je govorila da je učiteljica i da je radila na radijo, a kad se takmičila na zadnje pricidničke izbore  na koje je pobijedija mesić svugdi je govorila da je diplomirana pravnica. sad se pitan, gospe moja: šta je ta žena, zna li iko? za točan odgovor plaćan kavu ;)

e...

u šest uri ujutro mi je zasvira alarm na mobu, to mi dođe ka moderni žveljarin, i počeja je moj radni dan. poza jutarnjega spremanja pravac banka, ovi put splitska,  odma poza tega fina. minut san poviri do kodak centra split da mi moga dragoga maloga nećaka filipa, ča mi ga je sestra jučer poslala na mob, fenomenalno uslikanog s ajdukovin šalon, stave na bokun karte. ti litrat oli sliku jeman i na kompu jerbo san je s moba mailon pribaci i na ovo škatule, ali neću š njon na net. ako ja stavin ovod, šta ću van onda ponosno pokazivat kad me trefite, a?  poza tega san poviri do svijeta knjige , vazeja se jedan libar. poslin san u jednu fotokopirnicu, triba umnožit letke za firmu. onda me je tokalo poč do ajdukovog stadiona jerbo mi je danas i vožnja, u koju autoškolu gren doznat ćete drugi put, ne more sve odma, e... poza vožnje tonobila po gradu, finilo se na zvončacu i odatle gren vazest moje letke; valjda su gotovi. jesu, super, plaćamo i gren ča. onda san mrvu poviri u  računovodstvo, g. je nikidan bija rođendan, a i meni, a još to profeštali nismo jerbo nikako uvatit minut vrimena. e, pa ajmo poč danas. kad smo sredili svu kartušinu, gremo izist koju paštu u cukarina (to je odlična spli'ska kavana), poveli smo i d. narafski da ćemo to reprizirat ovih dan jerbo gre božić, nova i tako to. toliko smo se zaćakulali da se litrate opće nismo sitili učinit. onda mi je bilo vrime o' obida, a vrimena poza tega je bilo tek toliko da samo minut stanen na ponistru. jušto toliko gledan kroza ponistru i  vidin antoniu, stiže ona u ured, moramo nešto sredit oko posla. narafski, ti minut ča mi je bija free se zvalo u nautika centar nava da vidimo kad cemo nastavit posal s kojin smo stali u četvrtak. ovu šetimanu, šta prije to bolje, odlično, vidimo se. poza antonie se još slalo mailove u nike firme, kroza svo vrime o' jutros narafski odgovaran i na mob.

vengo zna li neko ko će formirat novu vladu, a?

možda ću sad uvatit koji minut za uštekat tv, ko zna, a? eh, krhko je znanje, poduzetnici žive dinamično i brzo, triba se radit i vrimena za gluposti i nimamo na pretek, hehe. zaradi tega tek sad (a na noge san o' 6 uri ujutro) gren vidit ča je novega po ton pitanju. ovo danas još jemate i sriće "dragi moji" političari, inače tv stignen uštekat  puno kasnije. jerbo, priša mi je svugdi, ali za vas mi nigdi nije priša.

e...

gledan ovo škatule o' televizije. nikima su veštiti toliko tisni da pucaju po šavovima. o' pusti kili ča su ih natukli ni kolarinu višje ne moredu vezat ka čovik. da ih vrag odnese, ne bi bilo ni kapsila za njih. triba bi marangun činit posebne mire, e...

noćas su mi usrid noći zvonili na parlafon, a čak i na tel. zvali i govorili ka da se mora glasat.

nevjerojatno nešto.

odgovaran toj beleci da mi je dužnost platit porez i da to nikad ne škivajen, a za te mone o' političara nima šanse da daden glas.

ne, sve dok u rvackoj dura ovo:

http://xvii-online.com/1/sve-za-lipe-joci/89199.aspx 

(da, da, ta još "uči" dicu sa takvin timbron)

i dok to i slične svinjarije nitko nema namjeru rijesit, vengo samo misle kako napunit svoj takujin,  ja moj glas ne dan, e... nikome, e.

zaradi čega, a?

zaradi tega jerbo on vridi puno i triba ga zaslužit.

kako?

samo je jedan put:

red, rad, disciplina, poštivanje zakona, čovječnost, nepodmitljivost.

kad vidin da neko tako gre kroza život i po svitu, bit ću u 6 uri ujutro na biralište i moj će glas jemat sigurno. dok je ovako, samo gledan i iskreno govoreći: gadi mi se više.

znate li svitu moj, koliko se samo svita moglo zaposlit za sve pineze proarčene ovih dan, a?

jo, ja bi da se tin raspikućama da malo radit, radit za plaću pa da vide kako je to.  evo, ovako, ka ča ja radin, meni nema kuna od nikud, triban stvorit posal, odradit ga zajedno s ljudima, naplatit ga, mislit kako ću podilit plaće.

e, da im je tako, da plaću moraju zaradit, vidili bi onda bi li tako sramotno arčili.

još malo i ova monada će finit, sve će to platit radni narod ove bidne zemlje.

Čovjekom - u pravom značenju riječi - postaje se samo ljubavlju.
Phil Bosmans

e...

bidan ti je oni ča uvik čini kuco i guca svaku kakicu ča mu serviraju.

u libar kontre danas notan:

kontra kulturnoga zločina, riva bi tribala bit tinel, a sad ne sliči njanci na kondut!

i narafski oču ka i iljade i iljade svita ča je dalo potpis da mi vrate našu rivu. da, da, za svoje pineze oču našu rivu, rivu di se živilo i ćakulalo, rivu ča je bila pozornica života, a ne ovo monade ča je sad!

potpiši se i ti, stavili su misto tamo kraj pirije u marmontovu danas, a sve skupa organizira građanska inicijativa građana grada splita (www.gi-zasplit.org) i nima veze s njanci jednon partijon. ovo su mi posebno napomenili da moran podebljat, e...

sve se more uvećat klikon!

žunta: sad je dva manje kvarat, evo mi je upravo javilo da je jedan barba o' 103 godine doša potpisat peticiju lipo sa mertojaka, dopratija ga je sin. šjor se zove: Ante Zekić. svaka mu čast!

a evo ča još jema po splitu apropo rive, split je krcat ovega materijala i nikako se mislin da mora bit da je stvarno proradija dišpet i da je svit štuf do kraja kad je iša u trošak za tisak ovega.

priko linka vidi još:

http://farm3.static.flickr.com/2329/2054949068_ccfee2e835_o.jpg

ka ča svi znate ja nisan u njanci jednu partiju, ne lobiran za nikoga, dapače, ne glasan opće već godinama.

sve ča oču je uredna država, zaposlen svit, sritna mladost i starost, spliski split. državu kulture, tolerancije i 21. stoljeća, e...

a niman njanci mrvicu o' tega. :o(

e...

uvik san negdi di su brodi. tako i danas. ovi posal mi je nekoliko svita radilo nikoliko dana i upravo smo to finili. za koga, a? e, na povjerenju ovi put fala:

MARINE KAŠTELA d.o.o.

dodat ćemo ih na našu referentnu listu kad uvatin bokunić vrimena, a ovi post ćemo tagirat i između ostalog i na rič brodovi :o)

gren ča, u konfužjunu san, nisu mi ovi iz kaštila jedni na pameti, jemamo još tvrtki i stranki ovih dan. guštajte!

sunce gre leč by XVII, slikano danas, pogled put čiova

e... tamo negdi u acya i labuda me morete i inače trefit često. ovih dan i češće jerbo trenutno nešto  radin za jednu firmu ča je tot. ovi je litrat peškan danas pozapodne,  a kako mislin da je lip učinjeno je da ga klikon morete bitno uvećat i recimo stavit na svoj desktop. fala XVII

e...

moj radni dan katkad dura puno. jučer je počeja ujutro najranije dok je vanka bija još mrak; oko 6 uri pozapodne me zove mater na mob i pita di san, ma radin, da, da, jos uvik, ma di cu bit, e, a zadnji mail u vezi posla čitan u postelji na mobitelu oko ponoći. šalje mi jedna o' vridnica ča u mene rade tekst za jedan projekat koji upravo završavamo.

jutros najranije joj izmedju ostaloga u emajliranu leteru stavin i ove dvi tri rige.

 ...sama znas da sve moramo svojim radom, da nam nista neće dat njanci jedna partija ni koji drugi vrag vengo samo rad. a da ti pravo recen, ja ni ne znan drugacije nego ovako, a i za tebe isto mislin....

kako ću jedan dan vazest bokun broda, a? a evo ovako, a da kako drugovačije, e... jerbo, neću valjda poč opljačkat rvackoga radnika u recimo škver oli koju drugu firmu oli vazest člansku iskaznicu o' koje partije i poč laprdat oli spavat (kako ko) u rvacki sabor. svako, naime, u životu bira svoj put i nakraju gre jušto onin za koji je sposoban. moj je: inđinjerstvo, red, rad, disciplina, učenje, napredovanje. drugovačije neću a i ne znan. sad gren ča, u poslu san do nosa, zaradi tega i nima baš puno vijesti zadnjih dan ovod. pozdravljan, zdravi i veseli bili!

e...  eto, preživija se i 35. rođendan. još uvik san inđinjer ča je prikovišje za kompom, a kad nisan za kompom onda štagod crtan, čitan, gledan koji film, gren na Merjan oli mislin kako ću štagod dobro izist. narafski jeman još cilu ventulu oli lepezu zanimacija, a jedna o' njih je i More.

uza ove litrate o' danas jeman još i skoro cili dan rada, a kako nisan lupeška čer toka me i sutra radit, pa zaradi tega sad pomalo gren ča. pozdravljan lipo!

 duboko virujen da će istina i pravda jednom ipak doći na svoje unatoč svoj sramoti i mižeriji onega ča se, ti primjerci o' vrsti zvane čovik, umom usuđuju nazivati.

za vukovar i vukovarce

lipi rođendan želin, draga moja tanja

za tanju

jutro

e...

fala ti živote

 za sve lipo i grubo

ča si mi da kroza

ovih 35 godin.

gren ča u nove,

s optimizmom, narafski.

:o)

---------------------------

pozapodne je načeta torta, a najprvo je bija lipi obid.

najlipše fala svima koji su me se sitili :o)

feštavanje se ka i svake godine nastavlja još nikoliko dan, dakleM durat će, e...

e...

ovo je ča bi rekli 'vako (heheh) jedan brzinski izvještaj:

• čunji su bokunić bolje, to gre prima naprid (ovo će razumit oni ča redovito prate ovi blog) i nadan se da ću uz rad i vježbu uspit i to. sad vježbamo i radimo i bolje je.
• ovih dana puno radin u firmi, u poslu san do nosa. tako je kako je jerbo smo ušli u nove poslove. nije mi krivo, dapače, zapravo me sve oko tega puno veseli. jerbo, poduzeće je zaradi tega i osnovano,e, da se radi, stvara i zarađuje, e...
• mojoj dragoj tomislavi čestitan na lipin vijestima koje mi je javila, o' srca, e...
• šta još jema, a? a čekan 35. rođendan. to je sutra. niman nikakvih posebnih želja, tonobil i brod moren vazest i o' svoga rada, pa ću tako i učinit. narafski, kad stečen vozačku i ostale dozvole potribne za upravljanje ton teknikon. tonobil jerbo je doša potriba, brod zaradi tega ča je to jedino materijalno ča želin, a zasad niman. sitnije stvari također. šta onda želin pitat će se neki, a? e, želin samo mrvu mira, jubavi i dobrote, eto. ništa višje.

ekola, gren ča, posal zove. jemate pozdrav!

igra by XVII

e... nisan višje dite, ali volin se igrat, e... igran se s mojin maškama, litratima, crtarijama, ovon škatulon o' kompjutera, kodovima. tvrtku vodin na krajnje nekonvencionalan i drugačiji način, pari ka da sve gre kroza igru.

(jedan dan, kad uvatin vrimena, probat ću napisat libar o temu kako se ipak more stvorit i odlučna, čvrsta kompanija koja poštuje rokove, koja uredno i točno radi  i u kojoj su ljudi sami svjesni (brez da im to posebno napominjem) da pineze tribaju uprivredit, da nam ništa neće past s neba, a sve jopet na krajnje prijateljski način, brez biča, brez batine, sa teplon i ljudskon riči za svakoga ko tot radi. u nas nikad nima zastoja, neplaćanja računa, neplaćanja radnika, dužnika, tužbi, sastanaka (na ovo se posebno ponosin). diretur oli ja vrlo često i u velike tvrtke ulazi u rebatinke, jednostavno, brez preseravanja, drugačije. poza samo tri godine moren reč da je moja malenkost sasvim uspjesno u praksu sprovela sasvin nove načine upravljanja, organiziranja, vođenja. možda jedan dan i druge kompanije prihvate moje pristupe, ali za ih opće shvatit triba najprvo jemat popriličan red u glavi. vizije. maštu. ideje. narafski, u ovoj tvrtki nije nepoželjno da i zaposlenik jema ideju, dapače neka ih jema šta višje. jerbo, u ovoj tvrtki diretur nije faraon. moja katriga je obična, a zajedno sa radnin narodon uvik radin. upravo zaradi ovega pristupa jeman odanu i vridnu organizaciju kojoj mogu virovat i koja će posal uvik izvuč do kraja. itd. nastavljamo drugi put, e...)

volin tako. ma zapravo, drugovačije i ne znan. jerbo, dok me jema, bit će i bokunić diteta u mojoj duši, a  di je bokunić diteta tot jema i mašte i ideji. brez tega nima inđinjera. ma ke, e... ekola, gren ča, šta smo ono tili reč, a? e, a, guštajte u litratu, ovo je oni o nikidan, ovako bi izgleda na izložbi, e... :o)

ovi litrat nije moj, narafski.

ja zvir ča riče moren trefit samo u zoološki, na tv oli u cirkus.

pristojno ga posuđujen s ovega site-a:

http://www.meyers-naturfoto.de/loewe13.htm

a je, je, bravo, jeman i nikoliko zviri u životu, ne znan samo zaradi čega je bog baš mene š njima kaznija. dakleM, ova obavijest ča slidi se odnosi na zvir o' sinoć (jerbo, sinoć se jopet čula rika zviri, nije bidan odavno. gucan dok jeman pacijence. poza tega gren ča. katkad se sebi divin kolika mi je tolerancija.), ali i na sve ostale ča se tako ponašaju.

1. ja van nisan kriva ča kiša pada

2. ja van nisan kriva ča vitar puše

3. ja van nisan kriva ča vas postol žulja

4. ja van nisan kriva za sve ono ča van je drugi/a priredija, a da ja te peršone, recimo, opće ni ne znan; za vaše krive procjene u životu; za vaše loše postupke i poteze itd.

5. kratko i jasno, ja van nisan šjor krnje, a narafski nisan ni likar vengo inđinjer i zaradi tega pacijence za vašu dreku, urlike i nekontrolirane ispade bisa jeman samo u ograničenin količinama.

fala in. možda bi brez njih bilo puno lipo, e...

a di smi bit, a?

e...

danas smo ušli u čak dva nova posla. za koga, a? pomalo, to ćemo špijat poza nekog vrimena, ovo su nam nove tvrtke za koje radimo pa nije priša poč s podacima u javnost, e... za puno kurjože ajmo ča reč ko sad vridno radi apropo tih poslova:

posal prvi:

nada (oli vaša omiljena XVII), gorka, adela, jelena, antonia

posal drugi:

nada

narafski da neću zafaljivat na poslu ni hdz-u, a ni sdp-u oli kojoj drugoj partiji. oni naime nisu ti ča stvaraju nama posla. stvaramo ga sami, sa mojon malenkošću na vrju udarničke kolone.

kome ćemo onda zafalit, a?

samima sebi, narafski. nimamo kome drugome. :o)

jerbo svaku kunu i euro smo sami zaradili, brez partija, brez podobnosti, brez veza, isključivo vlastitim radom i znanjem. može se i tako, e... :o)

ekola, gren ča, jemate pozdrav!

More by XVII, klik za veće

XVII, klik za veće

e...

šinjorine nekoć davno:

- udat ću se za princa.

šinjorine u moje vrime, vrime moje matere, bake:

- udat ću se za filmskog glumca, likara, inđinjera, profešura, pomorca... 

danas:

- udat ću se za mafijaša.

cinjeno čitateljstvo, je da ne moš virovat, ali dobro ste pročitali, e... ovo ka i sve ostalo na ovemu blogu notajen prima istiniton događaju. izjavila je to šinjorina luce. jema jedno 18 godin. vidi san je na učenju vožnje tonobila, gre u istu autoškolu ka i ja, e.

gospe moja, koja su ovo vrimena došla, a?

žuto by XVII

e...

tot san.

tot, negdi.

gledan,

slušan.

i znan.

vrime je.

vadin kolure života,

žute, crvene, žarke.

u ratove nove gre

iljade ratnika.

jerbo, tribaju se finit nike stvari stare;

tribaju se dobit bitke nove.

vrime je.

tot san.

tot, negdi.

gledan,

slušan.

i znan.

e...

kako se niko nije naručen rodija, palo mi je napamet da jučer odlučno i čvrsto o' moga šjor instruktora tražin da se ti čunji malo vježbaju.

još uvik san na prvoj vježbi, ali se jučer barenko to vježbalo. znači, greš naprid, prva, druga, prva i stat. poza tega kroza dvi kapije o' čunja, ali u rikverc. u prvoj brzini se ne smi ispravljat više ništa, samo rikverc. svi se koraci vide na sliku.

nije mi opće lako to prolaženje kroza kapije o' čunja u rikverc po krivulji, mučin se, ali eto, uz povuci potegni jučer mi je pošlo za rukon jednom proći kroza te čunje, a ostale pute, šta gore, šta bolje, digod blizu, digod dalje. i prije smo tu probavali, jednom oli dvaput me išlo, a ostalo nije bilo dobro i onda smo išli ča, a ja mislin da triba bit uporan. mislin da triba uporno i sa pacijencon vježbat.

ovi put kad se kroza njih prošlo instruktor je dava upute. govorija malo livo, malo desno. ono, ka šta i susidi pomažu rikverc kad se triba uč u dvoru i sl. eto, kad je pomoga, onda je i uspilo, ali brez pomoći zasad još ne ide. jedan dan će ić, ali zasad ne. sad ću mu morat reč da još bokunić pomogne i drugi put, a možda to i on ovod pročita, hehe.

instruktor mi cilo vrime puno zamjera šta moja malenkost nije naučila vozit tonobil prije autoškole. po njemu je to bit neozbiljan. ka, ono,  svi su naučili prije autoškole, a ja eto, jedina nisan. hmmm? ovo stvarno triban stavit na proučavanje. evo, stavit ću i anketu na blog. pitanje glasi: jeste li znali vozit prije autoškole? =>desna banda bloga

kad se malo bolje promislin i jesan neozbiljna peršona skroz; pa kako se opće moglo mislit da se tonobilon ne upravlja brez vozačke i da bi me  autoškola tribala naučit vozit tonobil?! to je bilo krajnje neozbiljno o' mene, e.. :O)

no, dobro, idemo ča dalje, instruktor je reka da je uvjeren da će vratit reputaciju koju je jema  kod mene kad se vozački položi.

je, oče ako me nauči čunje.

ostalo gre nekako :o) bar mislin da gre, a ko zna je li stvarno gre...

e...

vjerni čitatelji ovega bloga će se sitit da ovod opisujen korak po korak kako gre autoškola. moje znanje o vožnji tonobila prije autoškole je bilo vrlo mižerjasto i svodilo se na autić o' lunaparka. počelo se učit praktično vozit tonobil 18.09.2007. prije tega se brez ikakvih problema prošlo testove i prvu pomoć.

o' tega dana se naučilo krenit, stat, drito, ulivo, udesno, nešto malo rikverc (s otin opće ne moren bit zadovoljna peršona, rikverc još nije dobar). vozalo se oko stadiona i minjalo brzine. vozilo se i po gradu. po danu, navečer. po suncu, po kiši. prošlo se i kroza tunel nikoliko puti. u svemu tome ćutin još šlampavosti, ali vidin nadu da će se kroza još malo vrimena to i poboljšat.

za ove nesritne čunje NE ZNAN ŠTA ĆU. :O(

NE ZNAN.

to smo mrvu samo probali, ali očito na krivi način jerbo je sve stalo na probi, tj. ne ide i nećemo se višje gnjavit, ajmo ča.

kako se brez tega NE MOŽE steČ vozačka, najlipše molim sve dobre duše da mi dadu neki savjet kako to riješit.

evo šta kroza čunje triba napravit:

http://www.herz.hr/ispit_uv.php

fala svima!

detalj sa moga balkona :o), by XVII, narafski, klik za veće.

žaj mi je samo ča i ti lipi, posebni vonj ne moren stavit ovod na blog, e...

e...

07-11-07

vidi datuma, vidi dana, ludilo nima šta, e... a di se bilo, šta se činilo, šta obidvalo, a? ajmo ča vidit. jerbo, je li blog internetski dnevnik oli nije, a?

najprvo mi se nika mona o' čovika (a možda i žene, ko će znat, a?) sitila zvonit ujutro najranije (prije šest uri) na parlafon. kako su sad ovi šempjani političari najavili svoje vižite po kućama svekolikog pučanstva lipe naše, a ja niman namjeru takvima otvarat, samo mislin jesu li mi vrata dobro zaključana. ne otvaran nikome, narafski :O)

znači, ko je da je, neka gre u niku stvar, oću spavat.

e, ma ke, ko će višje joka sklopit poza tega drndanja. ništa. dižen se.

štagod u kljun i pravac ured.

šta ćemo danas činit, a? nima baš nikoga konfužjuna, ali neću ni besposličarit, preskupo mi je to, e...

da vidimo, jema tu nikih adresa na koje bi se mogla poslat koja ponuda, možda se poza tega i zaradi koji šold. jerbo, njih  narafski nikad dosta.

dok se ta rađa događa, zvoni tel.

- dobar dan.

- dobar dan.

- izvolite, šta tribate?

- triba nam vaša ponuda za jedan posal itd. za koliko je možete sastavit?

- ma odlične san volje, pa ću odma.  zvrcnit ću kad je pošaljen.

ajmo, malo računanja, mrvu kalkulatora, kuc-kuc oli tipkanje, send i otiša mail.

ajmo ča dalje. triba još malo tih ponudica poslat, to su one o' prije. ma samo momenat. evo i jopet tel.

- dobar dan.

- dobar dan.

- evo, upravo sam dobili vasu promidzbenu ponudu, tribalo bi nam nesto doc radit. ma, ali znate, je li mozete doc u nas? znate, nasi zaposlenici rade do pet, a tribalo bi im to pokazat jerbo nan posal bez toga ne more.

- ma odlicne sam volje, ludilo mi je započeja dan, narafski da cemo vam doc. evo, za to podrucje cu vam bas ja arivat, iducu setimanu me ocekujete. samo mi recite di vam triba i kome cu se javit.

- meni, a parkirat cete se blabla (ovo je umisto zvizdica, poslovna tajna)

aha, ma najprvo triban položit vozački za zaparkirat se - mislin se ja :o) no, nisu daleko, na odlicnoj poziciji, tot san i onako skoro uvik, pa nece bit problem. lapiš u ruke i zapiši ih - govorin sebi.

eto vidiš kako smo im lipo poslali signale da smo zivi, da radimo i stvaramo. narafski, duboko virujen da ce se i jos tega izrealizirat jerbo svit putevi vode u rim :O), tako je uvik.

ajmo još štagod učinit dok jeman malo vrimena. send, send, send. dosta send, jopet tel.

- dobar dan.

- dobar dan.

- ovod banka iz blablabla (ovo je umisto zvizdica, poslovna tajna). jučer ste za nekoga jemali uplatu, ma nešto sa ovin brojen nije u redu.

- jučer su išli honorari, a ovo me opće ne iznenađuje ča me zovete, rekla mi je računovođa nešto oko tega. možemo li šta sredit?

i sad slidi blablalbla i rijesli smo i to.

ajmo jopet malo radit, usput narafski i ćakulan po netu sa jednon peršonon, pa i jopet zvoni tel., pa i jopet malo radimo, pa ja zovem na tel. i tako to.

onda obid.

šniceli, kečap, salata, kupus, čikolata, sok, kava - aj more stat, dapače dobro je.

nisi reka keks, eto tri i po. ajmo ča, eto i vožnja. malo ja, malo drugi kandidati, vozamo jedni druge.

vrime prolazi.

gren doma, štagod večeran i uštekan ovo makinje. dođen minut sebi i notan ovih par rigi. za sve moje vjerne, nevjerne, kurjože i manje kurjože čitatelje.

koja je ura, a? a prošlo sedan i po na 07-11-07; ovo je još bija jedan lipi i šesan dan. brez karanja, brez monadi, brez psihičkih bolesnika (ako zanemarin onu nekolicinu ča se trefila u prometu), brez onih ča ne bi platili račun, brez zviri, brez čimavica. samo me snervala ona šimija na početku. o' jutros, e... ona o' parlafona, e...

eto, more bit i da ne mora bit da se po jutru dan poznaje, e...

ekola, gren ča, gotov post, šta će bit dalje neću reč, oli morate sve znat, a? ;) jemate pozdrav!

e...

šta jema, a?

evo, ispripovidit ću van ukratko, ono, tek besidu dvi o nekome.

ona jema savršene roditelje, uvik je razume, podržavaju, pomognu kad god mogu. narafski, i ona njih. to je vrlo skladna fameja, a ona sama nije. jema najboljega brata na svitu i još bolju sestru.

živi u najboljen kvartu, a stan joj je super uređen. narafski, njezin je. bolje rečeno o' njenoga fantastičnoga muža i nje. muž joj je legenda, dobričina, čovik na svon mistu. dica su joj krasna, mila i draga, dobro uče. susidi su joj tako dobri i prijazni da bi ih svak poželija.

pinezi jemaju i višje vengo solidno, karijere su im vrhunske, ničega im ne fali, putuju sviton, jemaju skupe tonobile i hobije. fala bogu i zdravlje im je izvrsno, a ni njihov pas nima ama baš nikakvih problema. maška je također odlično.

ekola, finito. nećemo višje zabadat nos u susida i mislit kako je njegova trava zelenija. uvik će parit zelenija, ali to ča nama pari ne mora opće bit istina. možda je u susida milijun problema, samo čovik čini kuco, guca, trpi, pa drugi misli da mu sve gre  ka po špagu.

vratit ćemo se u našu bidnu realnost, u naš mali mižerjasti život. moramo, jerbo život narafski nije bajka. samo fantažija. :o)

zaradi tega za sve one ča pitaju kako san gre ča reč:

fala in i zasad dobro san. radin, živin. vozan autić, vozačku još niman, ali bit će :o) mater i ćaća zasad dobro, sestra isto. susidi višje manje, kako koji. kolege su koliko ja znan ok. savršeno nije, sve more i bolje, ali gre. a najvažnije je, čovik moj, baš to. da ne ferma, vengo da gre. gren. gren ča. do idućega posta jemate pozdrav!

noćas mi je arivala u san,

bila ka snig,

nije bila sama,

jemala je i jednega mališana :O)

-----------------------------

MAČKA – prijevara ~ crna mačka – opasnost ~ bijela mačka – ljubav ~ s mačićima - poslovni uspjeh ~ ako vas je ogrebla – troškovi ~ ubiti mačku - nezadovoljstvo i problemi

to su notali ovod:

http://www.covermagazin.com/sanjarica-m.htm

i još u neke libre o snovima.

-----------------------

još da se san pritoči u javu,

pa da rečen:

sanjalo se mašku pravu :O)

e...

virujete li u snove? ča lipoga sanjate? znate li da ugodan san ne mora uvik jemat i pozitivnu konotaciju? noćna mora, pak, može donit nešto lipo. znači, ne bi tribalo opće govorit lipo sanjaj ka niku dobru želju za laku noć jerbo koji lip san more značit i bolest, smrt. najdraže mi je kad je san lip i kad u isto vrime i lipo znači. to je gušt.

narafski, ne znan baš šta ću o svemu mislit, sve je to još uvik područje o kojen čovik puno i ne zna, a mene je u zadnje vrime i to počelo nekako zanimat. jerbo, dvaput san već kroza san pred(vidi) da će neko umrit. jednom je to bila peršona koja je svakako temeljito obilježila moj život, moj dida. drugi put jedna poznata, susida, prijateljica moje matere iz ditinjstva koja me narafski znala o' kad se dite bilo. eto, pa se sad se ti misli čovik moj, more bit da dok sanjamo u nama leži jedan mali višćun, ko će znat, e... 

za ovi zadnji ću svakako reč:

još da se san pritoči u javu, pa da rečen: sanjalo se mašku pravu :o)

e...

malo ćemo stavit na kartu, vrime je, nismo odavno, a jučer je bilo jušto tri godine da se na poreznu upravu u split prijavilo da je moja tvrtka Parametar doo počela radit.

kako gre?

- lipo, propalo se nije, država nas ne sanira, radimo i o' svoga rada i živimo.

- za koga smo radili? e, nike reference puno kurjoži moredu nač ovod:

http://www.parametar.hr/index1.html

ali jema tega još, narafski.

- za koga ćemo radit? asti sto, a za one ča moredu platit, e... nećemo valjda radit mutke. nismo ni dosad, pa nećemo ni odsad. ovo oće reč da u ovoj balkanskoj rapsodiji uvik uspijen sve odrađeno naplatit, a one ča gledaju škivat plaćanje s posebnin gušton doveden do čina plaćanja, e...

- narafski, nikome ne dugujen, ni privatno, a ni poslovno, pa ću i to poza tri godine poslovanja istaknit ka nešto dobro.

- a ko to sa menon stvara nove vridnosti, a? evo, popis je ovod:

http://www.parametar.hr/index4.html 

narafski, ovin judima posla nije da hdz (ovo moran reč jerbo takve gluposti notaju po plakatima i to onima ča financiramo mi, porezni obveznici ove bidne zemlje, da su oni ka otvorili nika radna mista. ne znan samo di. i otkad to partije otvaraju radna mista, a?), vengo ja, odnosno pod mojin vodstvon ga sami sebi stvaraju i to svojin kvalitetnin radon i svojon stručnošću. drugovačije mi ne znamo, e...

- porijeko kapitala? nije nepoznato tj. poznato je. ulaz pinezi u firmu? sve se zna, poznato, prima zakonu, objašnjiva svaka kuna. izlaz pinezi iz firme? sve se zna, poznato, prima zakonu, objašnjiva svaka kuna. plaćanje djelatnika? redovito.

- donacije? koliko moremo, dajemo za dicu, bolesne, braniteljima, za ekologiju. ne financiramo njanci jednu političku partiju, a posebno ću istaknit i činjenicu da ja nisan u njanci jednu partiju.

- zaposlenja? stručni i sposobni ljudi s urednim životopisom i dokumentima, drugačije ne dolazi u obzir. 

- ciljevi? daljnje širenje, rast, red, rad i disciplina.

eto, tako to izgleda poza samo tri godine. stvorila domaća pamet, brez pretvorbenih mućki, na zakonit način, vlastitim radom, bez partija i podobnosti, brez lizanja gujice bilo kome. u posal se krenilo bez kredita, a bez kredita se i danas posluje. odrađujemo poslove ča pizaju iljade i iljade kuna isključivo vlastitim radom i znanjem. kako mi je tek za koji dan 35 godin i toka me radit još puno do penžjuna, a ideji jeman na pretek, bit će još puno tega :o).

šta još reč?

beskrajno fala svima koji me nisu tili zaposlit, da nisu bilo toliko "pametni", možda danas ne bi bija notan ovi post, ko zna.

----------------------

žunta: našoj Gordani iz računovodstva i ovim puten želin sritan rođendan!

s moga balkona jutros, by XVII