evala svitu moj!

dobro san sta i vama zelin. fala vam ca me zovete i pitate. :).

fala za mailove, fala za cestitke.

neka van blagdani budu puni smija i veselja, neka tega jema na masure i kariole. neka van se ostvare zelje!

opsirnije cu se javit cin buden u prilici, zasad toliko, jemate pozdrav!

odrazi, svitla, more, okićena banovina by XVII,

klik za veće

by XVII, klik za veće

e...

nešto tražin na ovi internet i naletin na ovu sliku. zanimljivo, nisu mi pali na pamet ni filmovi ni glumci ni kleopatra kad san je vidi. pala mi je na pamet ti momenat samo jedna rič: J U B A V.

Elizabeth Taylor & Richard Burton, e... (ovo mi je za mlaje generacije, e)

je, jema svita ča skupa ne moredu bit, ali ne moredu ni jedno brez drugoga.

kad su skupa, lete grube riči, rašpe, bombe i rivolveri. jedno brez drugoga su ka jidro brez vitra. ka mornar brez mora.

"jubav lipa, jubav slipa, srića je i pokora."

nije to tako samo s filmskin glumcima, a jok, e... život je to, c' est la vie.

je li neko višje uspija skontat:

- privlače li se suprotnosti oli sličnosti?

- je li prava jubav otvoreno more (ona ča jema puste nevere i bonace ka u ovega dvojca na sliku; koliko su se samo puti ženili i razvodili, a?) ili porat (sa svin svojin miron, ali i ustajalošću, a?) 

- je li na sve skupa djeluje srića, sudbina, horoskop, imena oli štagod deseto?

jeman 34 godine. žensko san (bogu fala). točno znan šta volin i šta ne volin, šta oću i šta neću. ipak, odgovore na gornja pitanja još uvik niman. ako neko zna, molin lipo da mi nota mail oli javi kako drugovačije, e... jerbo, odma bi tribalo ti odgovor objavit u koji časopis, da svit višje ne pati brez potribe, e... ;)

ekola, gren ča, jemate pozdrav!

kamen i svitlost

detalj

marmontova

ukras i škure

Sveta Luce, 2006.

Bookfest, 2006.

zimzeleno na pjacu

o' pustih dida mrazova višje ne znan koji je pravi :o)

teatar

gospe o' zdravlja

o' isprid konstruktora najvišje blišti, global & detalj

svićice o' isprid otela president

sve by XVII, klik za veće

Santa Lucia by Sassoferrato

e...

13.12. već. ča vrime leti. sveta luce. santa lucia. zaštitnica vida i svitlosti. u ovi naš split je puno važna. jedanput na godinu, na dan svete luce, otvara se kripta o' ispod katedrale ča je narafski najstarija katedrala na svitu i ča je narafski u najlipši grad na svitu. svit tot vazimlje vodu (ča tot izvire) za koju viruje da je čudotvorna. moli se za vid i svitlost.

dici stigne koji darić, a užanca je i zasadit (p)šenicu. božić je sve bliži.

pritumbavanje mojih sićanja mi kaže da su štorije moga pokojnoga dide i pokojne bake govorile da nije nekad, u stari split, bilo ka danas. danas dica dobiju dar o' svetoga nikole, pa svete luce, pa maloga isusa, na kraju i o' dide božićnjaka oli dida mraza. nekad si sritan bija i su dvi naranče i kojin orajon, a svi sveci i ostali proizvodi mračnih i svitlih socijalističkih i kapitalističkih vrimena nisu bili toliko bogati ka danas. bija si sritan ako bi te se barenko jedan sitija - govorija je moj dida. 

moji su se stari,  iz svoga ditnjstva, tako naprimjer višje spominjali svete luce, vengo svetoga nikole.

manje je onda bilo darova, ali nekako mi se pari da je bilo višje sriće i višje jubavi. danas se sve komercijaliziralo; nije mi po guštu ovako, opće, a jok.

po gradu gre tonobil sa trumbeton. reklamira da je u dioklecijanove podrume Bookfest, sajam libri. tribalo bi to poć povirit, možda se i nađe čagod interesantno, e. libar? e to mi se , kad smo već kod darova, puno sviđa.

evo van i savit. vazimite dici ovih dan ča su dani o darivanja i koju slikovnicu oli libar. nemojte in samo vazimljat skupe pupe, tonobile, bombe, rašpe, rivolvere i mobitele o' tri iljade kuna. kad na dar dobiju libar, veća je vjerojatnost da će bit boji judi. ozbiljno, e...

ekola, gren ča, pozdravljan lipo!

*****

danas su moji versi daleki,

previše moji za dilit sa sviton,

razumljivi tek meni,

sićanjima.

zaradi tega vazmen u ruke

libar

Pjesnika;

izvučen koju lipu rič

za vas,

za te,

za me.

(pa i za me, zaradi čega ne?)

ćutin riči,

tišinu,

puninu,

prazninu.

i virujen,

(unatoč svemu),

još uvik virujen u jubav i dobro.

XVII

Ljubav

Od naše ljubavi i sreće,

Gle, zvijezde su večeras veće;

A šum, što dopire iz grada,

Nije l' ko pjesma vodopada?

O, to je polet u visinu!

Srca nam zamiru i ginu.

U ljubavi bih s tobom, draga,

Nestati htio ja bez traga.

Dobriša Cesarić

U svakom slučaju te volim

Volim te uvijek, i kad se budiš

I kad na licu šminke nemaš

I kad si ljuta, i kad se čudiš

I kad bez mene na ples se spremaš

Uvijek te volim, hoću da znaš

Volim te, ne znam kako da odolim

U svakom slučaju te volim

Volim te kad si blijeda i sjetna
I kada bore imaš na licu

Volim te kad si divlja i sretna

I kad u ruci drziš pticu

Kad ništa nećeš da mi daš

Volim te, ne znam kako da odolim

U svakom slučaju te volim...

Volim te uvijek, i kada sanjaš

Kad ne pišeš mi, kad te nema

Kada od mene stalno se sklanjaš
Volim te kad si posve nijema

Kad šutiš poput ribe baš

Volim te, ne znam kako da odolim

U svakom slučaju te volim

Volim te uvijek, čak i tada
Kad ne volim te, kad si sama

Kad večer pada iznad grada

Volim te kad se praviš dama
Kad ne voliš me, kao sada

U tome i jest život naš

U svakom slučaju te volim

U svakom slučaju te volim

Luko Paljetak, pjeva: Ibrica Jusić

Zalaz na Merjanu, by XVII, tempera, učinjeno danas

Zalaz na Ovčicama, by XVII, tempera, učinjeno danas

Galerija o' XVII (ovod jema još)

svi litrati by XVII, o' jutros, klik za veće

e...

kažu mi niki judi da se puno grubo ćute kad je južina. drugi čine kuco po ton pitanju, ali vidiš da se puno grubo ćute uvik. jema i svita šta ih ništa ne more smantat. more bit da ja gren u tu vrst, e... južina? e pa šta onda, a? neću valjda stat doma brez potribe i grintat. evo, oli nije bilo lipše mrvu proskitat, učinit koji litrat i sad ih lipo stivat na internet, a? eto svitu moj, guštajte zaradi tega i jesu tot.

oni ča me znaju, znaju da jema mista brez kojih ne moren, mora brez kojega ne moren, e...

ekola, gren ča, jemate pozdrav!

e...

otiša mail.

upravo.

jemamo još jednu referencu. bit će i nešto pinezi.

ali:

jopet smo radili danima ka konji. o' rane zore do kasno u noć.

ćutin se ka da je ferata prošla priko mene.

ovi put moja mater i ja skupa u poslu s tin da je ona iznila sto puti više o' mene jerbo je tako dopalo, po stručnosti, e... ako je priko mene prošla ferata, a šta će ona tek onda reć, e...

ne znan, o' umora mi se višje joči njanci NE sklapaju.

pitan se dikad, zaradi svega ovega, jesu li brez rokova ča se ne sme probit, brez telefona i mobitela, brez ove nesritne škatule o' kompjutera, brez stresa i konfužjuna, na čistoj ariji i uz zdravu spizu, naši stari bili sritniji, a?

more bit da jesu.

dođe mi dikad, zaradi svega ovega, da skupin tunju i pođen na otok. ovi će me gradski život višje umest. stvarno, e... nije mi teško radit. opće. teško mi je samo kad posal o' misec dan triba učinit za šetimanu i po, e... kad je ovakvi konfužjun. kad se na kraju zaradi posla danima ni sunca ni miseca ne vidi.

e... sad ću fermat, nima višje kukanja.ko je vidija na to trošit forcu, a? bolje je sutra trošit na posal, jema još tega ča triba sredit, učinit, ušestat.

gren ča, jemate pozdrav!