e... još malo i finit će i ova. neka nova bude boja i neka sve oko nas bude boje. neka i mi budemo bokunić boji. neka nas niko i ništa ne nervira.

zapravo, kad se mrvu bolje promislin, dobro je reka barba božo iz autoškole: za svoje pare kavu pij tamo di je tebe volja. to ti čovik moj oče reč da ni ne tribaš ničije monade trpit i gucat. neko oli nešto ne valja, čini ti dišpete, ponižava te i sl.? ma ajde ča, svega jema na mašure. nerviraju te radnici? brezobrazni su i lini? minjaj! jema ih i vridnih i pristojnih. ako te likar ne liči, nađi onega ča dobro radi svoj posal jerbo jema i takvih. nervira te računovođa? nađi drugoga, jema ih na svakom kantunu. nisi zadovoljan s bankom? ma i njih je na mašure. uostalom di to piše da ja sve te usluge moran plaćat i gucat kakicu? nigdi, e... e pa zaradi tega, lipo ćemo sve one ča budu činili monade minjat, a oni ča je normalan će sa menon ostat u suradnji dok je normalan. dobro, moren uvik dat i jednu šansu za popravni, a poza tega slušan barba božu i za svoje pare kavu biran. meni će prima ovoj riceti 2009. sigurno bit bolja jerbo ničije monade višje neću trpit. e sad, nemojte mi poslin reč da nisan na vrime rekla ovo ča san rekla.

narafski, svin dobrin judima želin zdravlje, sriću, jubav, koji šold, zdravu pamet, dobre kumpanje i sve ča u životu vridi. ekola, sritno i berićetno vam bilo novo lito! ajmo ča navit mužiku, guštajte!

suve smokve by xvii - mašite se :O)

Mi možemo odgađati stvari, ali vrijeme neće.

Antifont

e... dva dana blagdana su finila, a da nisan rekla keks. tribalo bi mi ih još barenko pet šest za se bokun odmorit. predzadnji smo posal finili za jednega građanina dan pred badnjak, a zadnji posal na sam badnjak, radili smo za BROKER CO jednu o' vodećih agencija za nekretnine u lipoj našoj (ovako se sami predstavljaju). priko blagdana mi jopet vrag nije da mira pa san nešto majstorijala na ovo škatule za jedan projekt ča ga trenutno radin, a između posla i bokunić vrimena provedenog kraj mora izija se i koji lipi bokun.

nisan na skijanju, snig ne volin, to mi je za smrznit se. nemojte me opće višje pitat di ću poč skijat, svake godine ponavljan ka papagalo da ne skijan, ne privlači me, nisan za to. mislin kako ću poč učit jašit konja kad malo zatepli. eto, tot moren poč, samo se još raspitujen o klubovima, uvjetima, ciframa (ako jemate dobre informacije, emajlirajte mi ih). moren poč i na more kad još malo stepli, a skijat nećem.

nisan ni na urlapu oli godišnjem. radin uvik. ne spajan radne dane s neradnima, ne uklapan se opće u te rvacke užance. radni dan je ka ča mu samo ime govori za radit, pa ča onda jema veze da je godina pri kraju, a? dikod se mislin da je rvatima još uvik dobro s obziron koliko rade, spaja se prikovišje radnih dana s neradnima, priko posla se gre u spizu i na kavu, na bolovanje se gre kako kome šune, na trošak firme se zove svojta u jameriku i sl... ne virujen da bi se baš tako ponašali da vode vlastito poduzeće i da sve to moraju platit iz svoga žepa, e...

godina je na izmaku. dočekali smo je s dobrin željama, ma mi se nekako pari da je bilo i boljih dana o' ove 2008. e, more mi neko reč da šta sad grintan, e, ali stvarno... pogledajte samo koliko je smrti donila ova godina, pusti svit mi je reka da je nekome iz fameje ove godine bija na sprovod oli čak na višje njih. ja san odila na sprovod također, partila mi je očeva mater. partija je i pusti poznati svit , ka npr. boris dvornik, dino dvornik. koliko se samo ubojstava dogodilo, sitite se npr. šjor pukanića.

ove godine san zbog krajnjeg nereda u veterinarskoj stanici kman ostala i brez mog dragog tigrića - pročitajte tekst do kojeg vodi ovaj link, pogotovo ako jemate beštijice.

ove godine smo radili, ali rezultatima nisan skroz zadovoljna, a pari mi se da mi je dosta svita ča drži neki poslovni subjekt reklo da im nikad gora poslovna godina nije bila.

ove godine san stekla vozačku, vazela renault twingo priko firme i sad se lipo vozin, mislin da je to jedna o' ritkih stvari ča je bila dobra iako me samo stjecanje vozačke namučilo gore vengo šta san mogla pretpostavit da postavin sve najcrnje moguće opcije...

ove godine nas je adeze ka babaroga zastrašiva krizon i mižerijon, velikon gladi, a jutros je bija pun joker svita - kako ko, neko arči, neko grbači.

nisan mišljenja da je u rvackoj život sasvin ok, dobro je zapravo kojekakvim hebivjetrima, a poštenome čoviku i nije, dapače, milijun puti godišnje oćutin kako mi se na najgrublji mogući način brez trepnit krše ljudska prava.

nikidan me zvala poreznica. bit će da je porezna uprava dobila direktivu da napuni državni proračun priko malih privatnika, ne znan šta bi drugo moglo bit. kaže poreznica: - fali, niste dovoljno dali. - ma zamisli, kažen ja, sve smo platili, 100% garantiran. e, sad, dobro je da znan sve o svakoj lipi jerbo da ne znan, trkala bi joj recimo platit dva puta isto, a to niko ne bi vratija. poza tega se poreznica ispričava, ka skužajte, sad ona vidi da je sve plaćeno.  narafski, da je osin mene zvala i računovođu i narafski da se opće se nije sitila nazvat onega šjora ča jema puste reloje oli satove ča mu po cifri nisu u skladu s onin ča mu je svaki misec u buštu i sve njemu slične - jamerika one ča ne znaju objasnit porijeklo imovine stavlja u pržun, rvacka na vodeće pozicije. narafski da iĐemo dalje, EU nas ovakve baš čeka, ne znaju šta će o' priše da s nama kusaju iz zajedničke terine, e...

sad ću fermat, prikidan, gren popit kavu, triba bokun skratit ovi tekst da koga ne zaboli štumik oli ne strefi srčani, valjda će dogodine bit bokunić bolje, e... triba je veselo dočekat, virovat, pa će i bit štagod bolje... ekola, jemate pozdrav, živili, zdravi i veseli bili!

----------------------

žunta o' 13.01.2009. dok su nam sve firme za koje smo u 12. misecu radili uredno platile račun, sa BROKER CO doo Split jemamo živu muku - čine monade i neće da plate račun. nadožuntat ću kad plate.

--------------------

žunta o' 02.02.2009.  - u međuvrimenu je uslidila i sudska tužba zaradi neplaćenog računa...

žunta 02.02.2009. jutro - uvidom u naš račun vidimo da je vodeća agencija za nekretnine (ovako se sami nazivaju) konačno namirila račun u iznosu 506,30 kuna (s pdvom).

------------------

žunta 03.02.2009. - još detalja:

http://www.xvii-online.com/p-uporna-san-trazin-i-kamate/178994.html#links

za opuštanje, litrat by xvii, a za mužiku uprite mišem na botun i uštekajte zvučnike :o)

čestitka i jaslice sa spli'ske rive, uvećajte klikom, sritan božić i svako dobro!

e... čitan šonete. štrecnilo me je... u vječnost je partila profešurica Marija Ožegović. bivši študenti će je pamtit ka strogu i principijelnu, ali ka onu iz čijih su libri naučili puno tega iz elektroenergetike. nedavno joj je partija i muž, Karlo. kako su ovi su judi zadužili rvacku elektroenergetiku i kako je ovo blog o' jedne peršone iz te branše, red je da rečemo: fala im za svaki libar i za sve ča su dali našoj branši. ča bi mreže bile brez njih, a?

gušti o' nedilje, sve litrate morete uvećat klikom

e... evo gren zabilježit i ovu bitnu stvar, twingić je danas skoro cili dan bija u pogonu. subota, pred blagdane, konfužjuna jema poprilično. vozila san s peršonon ča nima vozačku, dakleM nevozač.  jutros san vozila do poduzetničkog centra (vizavi fesba), pa me je tokalo radit, a onda san se dovezla i nazad. pozapodne marjan, pa šetnja, pa jopet vožnja. narafski i pozapodne je konfužjun bija poveći. još nisan išla solo u tonobil, ali vozit moren svakoga vozača i nevozača, oko te situacije višje niman tremu.  svugdi smo dobro došli i kroza sve ulice lipo prošli. još malo ćemo ovako, a poza tega će XVII poč i solo vozit.  

e... evo nam je arivalo vrime kad ćemo se gledat mašit bakalara na razne načine, pečenoga, pašti, čikolate i goluzarija ka ča su fritule, suvice, oraji, bajami, suve smokve, dobre ribe, kojega lipoga bokunića mesa, pršuta, sira, francuske salate. aj, fermat ću, neću višje nabrajat, znan, zubi su odma počeli činit vodu. narafski, znamo da to opće nije smisao blagdana ča su prid nima, svi ćemo to odma reč, a i jopet ne virujen da će neko činit post u pravon smislu te riči, ma ke, e... mašit će se mašit, a poza tega ćemo i jopet kukat na višak kili, spominjat ćemo se dijete na koju ćemo poč o' ponediljka, spominjat ćemo se da o' tega ponediljka ča je sigurno idući sigurno spiza triba bit riko na plitko jerbo moramo kalat barenko pet kili. itd., a onda će doč i počelo oli nova godina, jopet će bit lipih bokuna i zaključit ćemo da je bolje dijetu odgodit za idući ponediljak. a koji će ponediljak zapravo bit u điru, a? e a, ma ko bi to opće moga s prezinošću predvidit, a? e, tribalo bi za to bit kakvi višćun, a svi mi smo tek ono ča se zove obični mali čovik, a on je goluz, bonkulović, voli dobro izist i to je to.

a ča san ono tila reč, a? evo ovo: nemojte sve pineze potrošit na spizu i darove, dajte barenko deset kuna humanitaro. pridlažen UNICEF i to zaradi tega ča pomažu dicu diljen svita, sve, bile, žute, crne. narafski i one ča im bog nije da sriću da opće imaju išta za izist, a o lipim bogunima mogu samo sanjat.

ja san danas za moje poduzeće uplatila simboličnu donaciju UNICEFU (mi to stalno radimo, doniramo manje sume, ali redovito doniramo i odazivamo se njihovim akcijama). nisan to zaboravila učinit  iako me tokalo radit cili dan, a i još moran, e... božić je vrime darivanja, nemojte samo mislit koji ćete dar dobit, štagod i dajte. čovik tako biva bolji.

ekola, gren ča, u konfužjunu smo, a sutra započinjemo radit i još jedan projekt. zaradi tega pozdravljan lipo...

e...

danas me jedna peršona pita da kakav mi je novi twingić. odgovorit ću u natuknicama:

• twingić se vozi odlično i meni je ča bi rekli lega na prvi balun
• twingić jema mista, iznutra je ka mali bog, sicevi se mogu micat i raspoređivat - ča se tiče mista francuzima triba dat +5, riješili su stvar odlično i vrlo inteligentno.
• twingić jema prva liga portapak, a dodatno misto se more dobit sklapanjen zadnjih siceva - za to dajen i višje o' +5.
• twingić je za cifru 63.900 kunića (cifra s PDVom) opskrbljen klimom, zračnim kušinima za vozača i suvozača, absom, servom, radijom, cd-playerom, mp3-playerom, daljinskim zaključavanjem, alarmom itd. itd. itd. moguće su nadoplate za još tega i jači motor.
• twingić ne troši puno i ekološki je osvišten tj. jema ekološke certifikate
• twingić se lako probija kroza konfužjun, more se okrenit na malo mista i lako mu se nađe parking.
• twingić se i na brzoj cesti ponaša fenomenalno, odlično prati više brzine (4., 5.)
• twingić izgleda dobro, a i vraški je ozbiljan.
• twingić jema ok asistenciju, stižu po potribi...
• šta još reč? veliko bravoooooooo za renault, napravili su prva liga tonobil po pristupačnoj cijeni. da san boljega svićon tražila, ne bi ga našla.

   

e... evo jedna dobra Pisma. guštajte...

e... ovo je današnji detalj iz mog ureda. pošaljite i vi čestitke www.unicef.hr ; tako morete pomoć dici diljem svita.

e...

ćudoredna nacija se jučer zgražala, padala u afan. za sve su narafski krivi let3. ka da kako su ono mogli učinit, a? čep u gujicu pa š njin na tv... a znate ča ja po tom pitanju mislin, a? evo šta: let3 su samo reakcija na društvo ćudoredno, ali ipak puno negativnih akcija tj. na licemjere kojih u rvackoj jema prikovišje. danas se naime događa ovo.

jeste sinjali sve, a? timbar koji pari da je crtan čepon o' pive. split je zaradi tega zove čepuša. pulicija je zaradi njenih falšeta odavno podnila kaznenu prijavu i to je učinija odjel za organizirani kriminal. prosvjetna inspekcija je, pak, davala izjave da su diplome za šupak. ministarstvo o' skula i državno odvjetništvo su sporiji od najsporijih puževa, inertni, briga ih, a gospoja čepuša trenutno dupera pretporodiljni na trošak poreznih obveznika (to smo i ja i ti dragi moj čitatelju) ove bidne zemlje - čuva je se  ka posebno vridnu robu. godine prolaze, friga se kome za dicu. hdz nam je vratija optimizam, smijem se o' jutra do sutra. nima uređenije države o' rvacke države.

ova beleca nije jedina. jema tega još. itd. itd. itd.

i sad, bi jučer. na tv se pojave judi koji dobro zapažaju, percipiraju. nisu glupi. možda vam se njihov stil ne sviđa, ali poruka je jasna: čepani, čepuše i ino društvo o' te vrsti završi u gujicu, tamo di im je misto, e... pa poza tega bude isprđeno.

neću raspravljat o granicama dobrog ukusa, nisan ja tot da sudin, ali samo ću vam jedno reč: da u rvackoj nima čepuša, ne bi let3 jema šta utirat u gujicu, e... to se dogodilo upravo ka ča san rekla na početku ovega članka; let3 su samo reakcija na društvo ćudoredno, ali ipak puno negativnih akcija tj. na licemjere kojih u rvackoj jema prikovišje. iĐemo dalje, EU nas s nestrpljenjen očekuje.

merjan, pogled put kaštila by xvii

e... ajde gren vam špijat jednu bitnu stvar. ovi litrat san učinila na merjanu danas. narafski, ništa to ne bi bilo čudno ni novo, na merjanu san ionako svako malo...

e ma danas je ipak bija jedan posebni dan, na merjan se arivalo tako da san dovezla twingića i to sa peršon ča je nevozač tj. nima vozačku. jedini vozač u twingiću san bila ja.

vratili smo se narafski i jopet tonobilon. niko nije vika ajuto  (ča oče reč upomoć), sve je prošlo u redu ča se mene tiče.

a drugi, a?  najranije jutros mi je jedan golobradi mulac sa bih tablicama priredija šok straja, vozila san o' pulicije, pa da ću put ajdukovog stadiona i dođe semafor. ferman i tot san livi skretač. pazin, pacijenca je tot, sićan se svih napomena instruktora, milijun puti su ponovili da tot triba stat atento, bit posebno oprezan i zaradi svega tega ja lipo tako, prima uputi, oprezno, krajnje oprezno, krenem kad jema uvjeta, a golobradi mulac s bih tabilicama je iza mene i isto gre u livo skretanje i usrid rakrižja (da dobro ste pročitali , skreće livo, ja isprid njega, vozin, nisan stala, triban skrenit i tako to) gre u priticanje. nevjerojatno. aj  rekla san sebi, pijane, lude i one brez vozačke ča se idu pravit pametni pa sidnu za volan i bog čuva, valjda će mu tako šempjanome bit o' pomoći. do merjana san arivala ok, sve je prošlo dobro. onda smo se išli mrvu prošetat, ono, da se malo uvati arije, protegnu noge i tako to.

poza tega je počela kiša. svi su najedanput tili uteč doma. tonobili ka u priči. i jesan li se snašla, a? jesaaaaaaaaaaan, zaradi mene niko nije tot bija bisan, beštima, i sl. dakleM, izvukla san se iz konfužjuna i vozin i jopet iston ceston, znači  livi skretač, pa onda gremo put ajdukovog stadiona, pa put slobodne dalmacije, na mažuranićevo i eto nas. e sad gledajte ovo.... tot (potez stadion - slobodna, jušto di je znak pazi blizu je skula, oprez, tot su dica ) san jemala 46 km/h. počela je prva kiša, kažu najopasnija. vozin ka čovik, nisan zvir, di ću brže u takvim uvjetima? narafski,  iza mene trumbeta jedan šumaher, oče da gren brže. jesan li ga obadavala, a? nisan. neka njega lipo čuva dragi bog, a ja ću čuvat sebe i peršonu ča je sa menom, pustila san bisnoga čovika da me priteče i eto, to je to...  tako vam je vozit nediljon u lipoj našoj - radnin danon je još veća kaubojština.  uf, zaradi tega narafski jedva čekan jopet vozit, nima šta. ono, sve se mislin da tonobil ipak šta višje duperan za van splita. iako, kad smo nikidan išli do marine kod trogira, šumaheri su i tot trumbetali, a ja san čak onda bila i bokunić priko znaka, ne znan stvarno di im je tot bila priša. ne bi da svi voze trudne žene u bolnicu.  poslin se čudimo koliko svita gine u prometnima, a špiker gotovo uvik reče da je pulicija zabilježila neprilagođenu brzinu.

dakleM, ča se mene tiče, samo pipite, neću poč 90 tamo di je znak 50. živi mi se, a i ne ostaje mi se brez vozačke... ekola, gren vidit kako mi napreduje brudet, mater je sve već stavila u teču, danas ću guštat. e da, i za sve kurjože, baš san nju povela sa sobon, bila mi je odlična, nima vozačku, nikad nije vozila, jednom riči: peršona brez prometnog iskustva, moran tutokompleto mislit ja. e baš mi je to tribalo - napravila sam još jedan korak do cilja ča se zove: sama u tonobilu.  

split večaras, sunce gre leč, evo, jušto ovako je pa mrak... morate priznat da je to bija lipi zalaz... sve by xvii, klik za veće...

predblagdanski šušur by xvii, klik za veće

svitlost isprid katedrale by xvii

e... za luce, lučije, lucijane i sve one ča im se ime za svitlost veže... narafski, tribalo bi poč  povirit do kripte (otvara se samo jedanput godišnje), vazest vodu  i užgat šteriku, čuvat joči i vid, molit za to. sritna vam sv. luce - dan do kojega je split uvik drža! dici i danas dajte pojubac, koju glouzariju i darić, ča se mene tiče najbolje slikovnicu oli koji drugi libar...

evo i jos jedn linkic:

http://www.xvii-online.com/p-sveta-luce/85468.html#links

(tekst o' priklani, ma vridi i ove godine)

kolure jeseni by xvii

e...

zašto danas nima dvi tri rige ovod, a? e to je zaradi tega ča ja nisan političarka, mafijašica, lupežica, lupeška čer i sl. mene svako malo toka puno radit. danas je bilo dizanje prije 7, a s radom san upravo sad finila za danas. morali smo dovršit jedan posal i ka i uvik uspili. ovi put na povjerenju fala firmi: ELNA KABEL doo, Zagreb; njihova je škrabica danas dobila e-mail od nas "linčina" iz ST - i ovi posal smo (ka i sve do sad) finili prije roka. a šta ću sad, a? ništa, gren leč, radimo i sutra, uvik je kod nas živo, nima nikakve krize ni sličnih monadi.

e... jeste se digli, a? kažu da ko rano rani dvi sriće grabi. evo jedna zora, slikano jučer, kako litrat jema mišancu otvorenog i zatvorenog prostora, pogodite sve: šta je slikano, di san stala i sl... autor san narafski ja :) klik za veće, odgovori se mogu notat ispod slike kad kliknete na nju.

uajme... jeste li dobili plaću, a?

ovisi di radite. mnoga pompozna, velika i sigurna poduzeća, sigurne državne i javne službe navodno još nisu išli u isplatu.

a šta je sa sviton ča su radili u Parametar doo, a? e, to je moje malo, navodno nesigurno poduzeće. jesu li djelatnici plaćeni, a? narafski da jesu i već odrađuju nove poslove za koje će bit plaćeni u 1. misec. radimo punom parom, trenutno smo i jopet u poslu za metropolu, sad nam je u điru još jedna firma iz ZG.

ko je onda nesiguran pitanje je sad ?!

e...

cili dan nas toka slušat kako bidni državni dužnosnici još nisu dobili plaću. zaradi tega narafski beskrajno tugujen, šmrc. bidni. baš mi je to sve puno grubo čut. vengo, ne moremo samo kukat, ajmo probat štagod pomoć, barenko dat koju ideju, e... dakleM, evo jednega rješenja. recimo za pricidnika mesića. neće valjda šjor pricidnik sad nemat šta izist, je li tako, a? jerbo šta bi rvacka brez njega, a? bit će najbolje da mu kogod pomogne, e... a ko bi moga, a? bit će mislite da bi mogla ja, a? e a falili ste u mene je mižerija, ja san tek mali obični radni čovik, e... nima u mene miljardi, ma ke, e.... međutin znan ja da jema ko pricidniku more pomoć, e... jema on svoga kumpanja i savitnika, šjor roglića, e... kako je ovi tek nikidan uvatija 65 godin (godine o' penžjuna), ne virujen da je već doša na inkanat. more bit da u njega jema još koji o' svih onih šoldi do kojih je sigurno stiga brez pricidnikove pomoći, hehe.  e, pa šjor ćićo, šta iz banke, šta iz bičve, izvadite štagod i pomozite svome kumpanju. ko će ako vi nećete, a? kumpanjo bi triba bit kumpanjo i u dobru i u zlu, e... jerbo mi, puk obični, ča nas toka radit o' jutra do mraka smo ionako već prikovišje dali u državni proračun, sad bi valjda bija red da malo pomognu oni ča su s političarima ili i pili, e... na jahtama se vozili, skupin destinacijama litovali. itd. da ne nabrajan više jerbo me počeja grčit štumik, e...

e...

u zadnje vrime me tokalo trefit puno svita ča mi je reklo:

- blago ti se, ti si privatnik, pinezi ti sami dolaze.

kako me štufalo objašnjavat da za pineze triba krvavo radit, a ovi likovi to opće ne viruju, vengo stvarno misle da mi pinezi sami stižu, ovod ću takvima dat zlata vridan savjet:

- odma u ponediljak pođite registrirat poduzeće (more i obrt) i već pozapodne ćete bit bogatuni - love, pinezi, šoldi (kako god oćete) će bit do krova! jednostavno će vam sami stič.

e... ovo mi je nikidan emajlirala selma. nekako mi se pari da jema istine u ovome, e...

-------------

POREZOTINA

ONA

1. Reže kruh i slučajno si nožem ozlijedi prst

2. Pomisli: Joj

3. Stavi prst u usta da zaustavi krvarenje

4. Drugom rukom uzme flaster i zalijepi ga na ranicu

5. Nastavi rezati kruh



ON

1. Reže kruh i slučajno se zareže

2. U pi*ku materinu, urla on iz sveg glasa

3. Ispruži ruku daleko od sebe

4. Gleda u drugu stranu da ne vidi krv

5. Viče: Ženoooo!

6. Krv pada na nedovršeni sendvič

7. Ipak će si malo prileći, malo mu se vrti u glavi

8. Dok ona ne dođe on nastavlja s kuknjavom kako je teško ozlijeđen

9. Čita u Doktoru u kući koliko odrasla osoba mora izgubiti krvi da bi

doista i napustila ovaj svijet

10. Ona stiže u zadnji čas s kutijom prve pomoći

11. Nakon što ga je previla, ona mora nastaviti s rezanjem kruha

12. On zahtijeva dobar kotlet - treba nekako nadoknaditi taj gubitak

krvi

13. No, budući da je ipak preživio šok treba i pivo, onako za smirenje

14. Diže flaster, samo da provjeri je li još krvari

15. Kopa po rani dok mu ponovno ne prokrvari

16. Šalje ženu u pi*ku materinu zato jer mu nije dobro previla ranu
 

e... ovu ćemo pismu danas navit za kapetane, za mornare, za svakoga noštroma, ribara, putnika, sve one ča vole More i š njin žive, za sve one ča im vapor i barka život znače. Nikolama i Nikolinama sritan imendan, a dici pojubac i neka bude čikolate i drugih goluzarija.

e... za dobit ove litrate i film me tokalo smočit nogavice. guštajte.

e...

ovih dana dosta radin, pa jema oli će biti i nekih novitadi. za puno kurjože ćemo malo ovod reč šta, e...

- najprvo ćemo reč da samo danas finili još jedan posal, nije bija puno velik, onako, nešto šta stalno radimo za našu županiju, ali me veseli šta se referentna listica širi i također me veseli ča firma za koju smo radili jema sjedište u zagrebu. neka malo i kontitneta, e... dakleM, na povjerenju fala lipa tvrtki EuroArc doo

- najdrugo ćemo reč da smo započeli nešto šta smo odavno tribali učinit, ali eto nismo, ma bolje ikad vengo nikad. šta je to, a? e, ovih dana upravo dura osposobljavanje svega i svačega šta je potribno da bi svi (i građani i firme) u Parametar doo mogli platit kreditnin karticama oli na rate - prije je to bilo moguće samo ako ja rate odobrin. još koji dan i bit će i to kartično plaćanje, moći ćete plaćat ovin karticama: american express, visa, mastercard, maestro. također ćete moč kod nas učinit i potrošački kredit. nadan se da će ovo pomoć građanima, ali i firmama. poza ovega ću se još malo potrudit i probat uredit i mogućnost plaćanja kreditnim karticama priko interneta. eto vidite  kako ja nastojin poboljšat štagod u ova vrimena velikeeeeee krize

- najtreće će bit da ćemo vazest još svita za radit. razgovori duraju, pomalo se radi i oko tega, a poza nove godine neke stvari iz naše ponude će bit još bolje i šta bi rekli još temeljitije razrađene oli sa višje mogućnosti. o ovemu sad nećem detaljno, činin kuco, neka nešto bude i malo iznenađenje.

- najčetvrto su ponude, šalju se intezivno, radimo, mučimo se, fala lipa svim dragim ljudima s kojima smo ovih dana uspostavili kontakt, odradili prve poslovne sastanke i dogovore (a bilo je tega ovih dana stvarno dosta) - nadan se da ćemo surađivati dugo i kvalitetno na obostrano zadovoljstvo.  e-mailom, letkom oli kojim drugim oblikom reklame ovih smo dana prisutni u svim dilovima lipe naše. nimamo nikakvih antipatija, dragi su nam i slavonci i zagorci i riječani i purgeri, radit ćemo svugdi, vidit ćete tako da dalmatinci i nisu baš takve linčine kako se priča, mi možemo i znamo kako.

e, evo me sad bokunić štufalo jerbo radin cili dan, ekola, ovo je bija ka mali rezime onoga ča se ovih dana događa kroz moje radno vrime... a ono lipi moji katkad dura i 12, dikod i 15 uri dnevno. pozdravljan vas lipo, nadan se da ste i vi vridni i da radite štagod pametno.

e... još malo listan libar mudrih misli. evo jedna dobra:

U životu se ne treba ničeg bojati.

Treba samo razumjeti.

Marie Curie

samo, moremo li baš sve uvik razumit, je li nam sve baš uvik kjaro? a šta ako te strefi puno grubo vrime oli nevrime tutokompleto, vrime u kojem razum nima šta činit, u kojem razum smeta, nepoželjan je; pijana i luda ga rulja ne triba i neće, dapače, sve šta ga jema progonit će, maltretirat će, e, šta ćeš onda, a? triba ti u takvim vrimenima čovik moj puno force za izdurat i puno višje kuraže vengo je običan čovik jema - bit će da takva vrimena i stvore junake, heroje. a kad malo bolje promisliš, u takvom vrimenu je junaštvo već i to ča živiš i ča si uspija dočekat novi dan, e... sve ostalo i višje punti piše. jerbo, eto, nisu u životu samo formule, kemija, matematika, fizika - to ćemo razumit puno lakše (iako more bit napisano da pari komplicirano) vengo bezumno vrime u kojen bezumnici caruju...

aj, ekola za ovi put, gren ča štagod radit, neće mi plaću dat ni adz ni koja druga partija. veseli, zdravi i razumni bili!

nađeno na netu, spremljeno i sad izvučeno iz škafetina ča se zove:

letriko moja za te živin

Skupom šubarom ne možeš prekriti bijedu u glavi.

Ruska poslovica

Budala nije nikomu pri srcu, njoj su svi.

Hrvatska poslovica

Prva karakteristika budale je da se smatra pametnim.

Nizozemska mudrost