negdi san kraj mora i od 14.04.2010. na novoj domeni: www.xvii-online.org
stare tekstove potražite na: http://xviisufit.mojblog.hr
radijo split
metro express I.
metro express II.
metro express III.
e...
tipujen za paris, london i rio...
e pa sad, vidit ćemo, možda jedne godine i pođen, ko će znat, e... 
e...
gren van preporučit nike web-adrese, možda nađete štagod zanimljivo tot. puno svita mi je reklo da jeman dobrih litrati splita i da zaradi njih obavezno povire na www.xvii-online.com .
i vi možete slikat štagod lipo i stavit na internet i to sasvin besplatno na adresi www.pticica.com moj adres tot je:
http://xvii.pticica.com a od ptičica koje po mom skromnom mišljenju jemaju dobrih litrati, a iz splita su evo jedna, duple ( http://duple.pticica.com ) - odlične fotke pejzaža, splita, prirode 
a jema li štagod mužike za preporuku, a? jema, e... namjerno neću izvuč štagod dalmatinsko jerbo još ljudi stvara i radi dobro, nisu samo dalmatinci vridni, pa ovi put za glazbenu preporuku gre darko rundek, odličan site, povirite, a morete tot puno toga i poslušat...
a za izist i popit i još svega pomalo, a? je li van lipo čut rič dijaspora, a? meni je, zašto ne, e... nije cila dijaspora u stanju bože sačuvaj, jema tamo i dosta kreativnoga i pametnoga svita, e... ajmo ča malo tamo, evo jedan site čovika ča živi u dijaspori
http://dalmacija.kovacevic.nl/
tot je uvik nešto veselo, štagod lipo za vidit, štagod ukusno. site na koji volin povirit
ekola, gren ča, dali smo preporuke za vidit, za čut, za okusit se, ma za guštat općenito, e... stojte mi dobro, jemate pozdrav!
e...
mene puno interesira oču li u 2010. bit živa, zdrava, sritna itd. kakav će mi bit posal, oče bit pinezi? šta je sa jubavi? oče li bit nesritna oli sritna? oče li bit male dice? kako će me ič kreativnost? kako fameja, kako kumpanji, a kako beštije? posebno mi recite za zviri... oču li poč na koje dobro putovanje? oču upoznat zanimljivoga svita? kakve će mi kolure bit kosa u 2010.? kako ću stat s kilima? ko će me naidit, a ko usrićit? ako znate barenko koji odgovor, a morete ga pročitat iz moga horoskopa lipo mi javite na moju emajliranu škrabicu nada@parametar.hr jerbo mi je tlaka poč kupit sve foje koji će objavit godišnji horoskop, a to ionako bude prikovišje općenito... fala lipa onome ko mi napravi pogled u budućnost :)
e... bravo... škorpion san, 1972, jarac u podznaku, pantagana u kineski, a ako tribaju detaljni podaci, poslat ću ih proroku na mail. jerbo, šta bi svak čita u koju me uru mater rodila, a?
e... ovo san jušto sad notala na www.facebook.com
Jedna od mojih želja za 2010. je da u lipoj našoj malo više svita odluči završit kakvu skulu i počne čitat libre... Bar jedan libar u 6 miseci. Bilo bi puno lakše živit na ovim prostorima kad ne bi bilo ovoliko neukih. 21. stoljeće je.
evala svitu!
tila san reč rič dvi o jučerašnjoj izbornoj nedilji, ali san evo tek sad uvatila bokunić vrimena. ne znan kako vi, ali mene je jutros tokalo radit i neka je.
najprvo študenti.
zanimljivo kako sa študentima po splitu malo ko oče radit, svi bi samo učili dicu o' pučke skule, a kad triba radit štagod osebujnije, zahtjevnije, fakultetsko gradivo svi junaci mukom zamukoše - baš lipo, rekoh ja još prije par godina, prihvatin i študente, radin i zaradin. najžalosnije je za inđinjera kad ne radi inđinjerstvo, vengo šverca svin i svačin, goldunima, tuferima, lamicama i sl. da je zna i moga radit inđinjerstvo, radija bi taj posal, e... bilo u praksi bilo kroz teorijski rad, e...
poza študenata, banka, fina i tako to. kako pošteno radit nije sramota, vengo najveća čovikova vridnost ja se ne sramin reč da radin. to ću ponosno istaknit, a pogotovu ću ponosno istaknit da ka inđinjer uza šefovanje radin i inđinjerstvo (koga zanima ča radimo more povirit na www.parametar.hr).
a jučer, a? e... jučer mi je bilo skroz na skorz oli tutokompleto zanimljivo gledat čunke političara kako je vrime poza izbora odmicalo. prije početka izbora matematičkom preciznošću san prognozirala ko i sa koliko gre u drugi krug. prognozirala san i poredak na ljestvici. bravo ja, ovo znači da skroz dobro procjenjujen ljude, situacije, prilike, a ta sposobnost je nekome ko drži privatnu tvrtku vrlo bitna.
posebno mi je drago ča je dragan primorac proša kako je proša jerbo ne želin hrvatsku u kojoj će falšete bit nacionalna vridnost. da podsjetimo, ova se u državnoj skuli zaposlila za njegove vladavine ministarstvon o' skula i još posal jema.
jo, koja mu je faca bila poza izbora, a? vridilo je to vidit.
a hdz? hdz je izgorija ka šuferin, a to isto nije bilo nikakvo čudo jerbo poza toliko nemorala, poza toliko afera, poza toliko lupeščine i ne znan koliko krivih poteza, ne znan kako su opče jemali obraza istaknit kandidata na izbore, a kamoli poč očekivat pobjedu.
tot je bilo: jeste li vidili kakane, a?
izašla san na izbore nakon dugo vrimena i glasala san za:
- urbanu peršonu
- obrazovanu peršonu
- peršonu ča nima afere
- peršonu ča mi pari normalna i trizna.
glasala san tako jerbo ne želin agroseksualce koji pare da su tek izašli iz pećine i sa kojima će nam se smijat cili svit. ne želin veličanje falšeta, nemorala i nerada. svojim glasom ne želim nagradit lupeže, a boga mi ne tribaju mi ni pijani i drogirani.
e sad, jesan li falila oli ne, vidit ćemo. u svakom slučaju, hrvatsku u 21. stoljeću ne vidin vječno punu nepismenosti, šporkice, kriminala i primitivizma, nadan se da zlo još neće dugo durat.
narafski, osin političara krajnje zanimljivo mi je ovih dana gledat i one koji su svoje poslovne uspjehe gradili na vezama s pricidnikom mesićem. bit će ih još zanimljivije gledat kad bude do kraja finija mandat šjor mesiću.
prodavat će se brodovi, kuće, vile...
sve ono ča je brzo i brez rada došlo još brže će i uteč.
a ja? ja fala bogu još uvik jeman isto radno misto diretura u vlastitu firmu, moji ljudi su i ovi misec plaće i honorare dobili prije petnaestoga u misecu , nikome ne dugujen, niko mi ne duguje, radin i živin u istom gradu, stojin u istom stanu ka i prije 91. ne mislin da je diploma za šupak kako su mi išli reč na prosvjetni inšpekcijun poslušnici o' šjor primorca kad san im rekla da im falšeta uči dicu u skuli, dapače, mislin dijametralno suprotno, za rad sam angažirala najsposobnije i najbolje s najvećim prosjecima ocjena i zajedno s njima stvorila firmu koja fala ti bože ne ovisi ni o sanaderu ni o mesiću vengo o vlastitom radu. ovo oče reč da neman otoke i potoke, ali san najbogatija na svitu.
e pa lipi moji, gren ja još štagod napravit, stojte mi dobro...
e... dvanaesti misec. konfužjun, skoro pa histerija. u ponediljak san bila u spizu, vozila san u koloni o' lidla u lori do konzuma na stinice, a i poslin do kvarta, praktički u prvoj. neš višje ne, e, po povratku u kvart san našla misto i neka stoji tot tonobil do iza božića. žemsko san (fala ti bože na ovoj činjenici) i tonobil mi dođe ka pokora.
muka mi je u štumiku o' trke koju svit čini po butigama, o' ponašanja koje smo počeli i to poza plesa sa zvizdama (ko je pratija razumit će) zvat agroseksualno (neću davat objašnjenja, navest ću samo dva poznata rvacka pripadnika te vrsti, pa se mislite ča bi ta rič agroseksualac mogla značit, e... kerum i bandić, e) , o' prikovišje licemjerja, o' depresije ča vlada među sviton i breznadežnosti, ma o' svega i svačega, e...
najbolje je stavit kapu na glavu i poč učinit đir, uvatit malo arije, e... najprvo san se o' spinuta do bena dobro istrčala, a poza tega san činila litrate. evo kako su ispali...
a kako će ispast bakalar i fritule, a? e... ja se nadan dobro, e...
a teplo se nadan da će i jednemu goluzome nenadu dobro ispast fritule po mojoj riceti, pa sve 5... nije nenad jedini ča voli fritule,e... muški su naime toliko goluzi za fritulama da za njih triba učinit barenko po dvi tri terine. narafski bilo bi najbolje da ih jema cilo maštilo za mašit se. najbolje je kad ih čini ženska ruka, a kad se situacija zakomplicira, e, onda ih toka stavit traveršu i ako ih oče izist, moraju ih učinit sami... i čine ih, nima im druge... dakleM, pazite da uljen ne mačate gače i maju, skombinirajte s tin koju suvu smokvu, prošek oli bićerin rakijice - tako je volija moj pokojni dida i ne dajte se, triba virovat da će doč koja godina kad vas neće tokat činit sam fritule, budite lipo dobri, fini, ne pokazujte znakove agroseksualnosti, pa će vam ih učinit ženskica, e... jerbo, ko ne bi muškiću ča je dobar sve ugodija, a? a zauzvrat recimo vozite tonobil kroz ovi konfužjun, to prave ženskice, one ča nisu muškobanjaste, ne vole...
prosinac by xvii, slikano mobitelom, klik za veće
e... bilo je lipih čestitki u škrabicu o' late a i u onu emajliranu ovih dana, evo ovod dvi s dičjin crtežima - te su mi se posebno svidile, e... jerbo, jema li na ovemu svitu išta lipše o' dičjeg smija, dičje pisme, dičjeg veselja i dičjih crtarija, a?
dičji crtež za čestitku me obradova o' od marine kastela
dičji crtež za čestitku me obradova i o' tvrtke reton
fala lipa pošiljateljima :)
e...
pročitala san nešto zanimljivo, u žensku rubriku, ali mislin da vridi i za muške. evo ovod:
http://www.budi.in/6344-clanak-znakovi-da-ste-preboljeli-svog-bivseg-partnera.aspx
vridi i obrat:
- dakleM, ako čitaš njegov/njezin horoskop, još ti je drag/a.
- zanima li te sve, di je, kud je, tražiš li ga/je pogledom među prolaznicima, greš li leč s misli na njega/nju i dižeš li se s istom misli, znači da zapravo kraj još uvik ne znači kraj.
- čitaš li njegov/njezin blog oli info na www.facebook.com mora bit da tot isto nisi brezveze, jema u toj peršoni nešto zaradi čega te zanima šta je rekla, šta je napravila, šta je napisala i sl.
- držiš li još u mobitelu njegov/njezin broj? sliku? hm?
- kad ga/je trefiš i srce lupa jako isto nije kraj. ovo ne mora samo bit srce, mogu bit i leptiri u štumiku oli kakve druge bube...
- bit će kraj tek kad si tutokompleto ravnodušan/ravnodušna, kad te nije briga ni di je, ni kud je, ni šta čini, jema li koga oli ne... ča bi rekli kad moš proč pokraj njega/nje ka pored turskog groblja,e...
e...
koliko zapravo poznajemo ljude?
možete li nekoga za koga mislite da ga poznajte pripoznat u mnoštvu, recimo na rivi, izdaleka, a?
ja mogu uvik. ovo oče reč jušto to: uvik, a ne samo kad (ka ča je bilo danas) dotična peršona jema crvenu jaketu, e...
a jeste li baš uvik sigurni šta će dotična peršona reč, učinit, neće reč, neće učinit itd., a?
e... da je to lako, ne bi bilo na ovemu svitu nikad njanci jednga tužnoga i nesritnjega dana. ne kladin se da baš uvik mogu bit sigurna ča će bit. to nije nepoznavanje peršone, svaki je čovik jednostavno čovik za se i pitaj boga ča mu je baš uvik u ćivericu.
dikod se razumiš, dikod ne.
dobro je dok jema volje da barenko probaš svatit i razumit drugoga, a kad te volje nima, nima ni razmijevanja i poštovanja - a to je ka ča znate osnova svakoga dobroga međuljudskoga odnosa.
ugodan vikend dragi čitatelji, uštekajte zvučnike, gre dobra pisma...
e...
đirani su mi trenutno u hodniku jerbo bi se na balkonu mogli smrznit.
peč grije, ali su strateška mista oko nje zauzele maške.
dva džempera.
deka.
zadar je navodno u snigu.
ta me vijest straši.
brrr.
cvok, cvok...
neće valjda zabilit i split.
ja san definitivno za litnje radosti.
ni ovo za me..
gren stavit ovod nešto ča će mi zgrijat promrzlu dušu i tilo.
ja van svitu moj snig najvolin gledat na sliku, e...
e...
najprvo:
košarica veselja iz moga ureda by xvii
narafski ne moremo samo stat u uredu, poza posla, kapu na glavu i :
institut by xvii
nima bolje vengo protrčat se po merjanu. danas je bilo bokun gnjilo vrime, pa san tonobilon otišla na spinut. trči sve do bena brez stat (bravo ja, ali moren ja i višje, pokazala san to već puno puti), do instituta hodanje koje je isto korisno. od instituta do spinuta hodaj, poza tega tonobil i gremo doma, triba uštekat peć, brrr, zima je 
inače jeman skroz druge rute za trčanje, na sasvin drugin dilovima merjana, ali nećemo ovod otkrit sve tajne pa da mi po splita stigne za menon, e... ova je ka najobičnija s tin da dosta muških potegne u komadu trčanje i do instituta, jema u njih force, e...
inače, onima ča vole trčanje bi mogla biti interesantna ova stranica: http://web.vip.hr/vinko.mihanovic.vip/Trcanje.html
pozdravljan! bacan se na tv i čitanje :)
e...
godina još malo i finit će. stavit ćemo je u škovaceru i š njon u kantu o' škovaca.
neki će je pamtit po lipome, a neki po grubome...
ja ću se sigurno sićat lita gospodnjega 2009. ovako:
- u zemlji znanja dici je rečeno o' ministra skula da se more u skulu odit i brez libri - za ovo san se pitala je li dobro čujen kad je šjor radovan to reka na tv.
- bivši ministar o' skula i pricidnički kandidat šjor dragan pak pojma nima o falšetama koje su se zaposlile u skuli za vrime njegova ministrovanja ministarstvon o' skula. jeman tako napismeno o' njega, a čitali ste i vi o temu na ovi blog...
- split je dobija novega poteštata šjor željka koji se u 2009. fali činjenicon da opče ne čita libre, šta će to njemu, on je kako je reka tako pametan i nadaren... željno očekujemo da štagod o' te svoje pameti i pokaže u gradu pod merjanon, valjda će za to nač bokun vrimena kad bude jema manje posla oko žena - bivših, budućih, bivših budućih itd.
- split je konačno dobija novo rodilište koje su iz svoga žepa isfinancirale naše dobre vile. koje, a? zna se, e... iz svoga, e, nisu sigurno iz našega, e...
- sve viđenije čunke u politici su najprvo zamutile neviđeni paštroč, pa poza tege dale otkaz. niko kriv, a nima miljardi... ko je jamijo jamio je. nevjerojatan broj afera i škandala u 2009. hž, hep, hac, podravka, sms, brodosplit ča još uvik dura i neću višje njanci mislit, odma me zaboli štumik...
- iljade i iljade radnika je pak dobilo otkaz, a oni ča su te otkaze napisali su narafski ugledne face u državi rvackoj. moja malenkost pak nikome nije dala otkaz vengo je i u 2009. ljudima dala posla, ali koga briga...
- u državi rvackoj je 3000 kn (ričima: tri iljade kuna) proglašeno luksuzom i na to je lega harač - bravo za tetu paštetu koje je litovala u 5 zvizdica na bolu na broču. to je tako skromno, tako štedljivo, gospe moja mogla je sebe i svoju svitu odvest i na karibe, havaje i na put oko svita. baš san kurjža di će poč feštavat novu godinu i je li sebi dala božićnicu.
- praseća gripa je stigla, ali stiglo je i cjepivo, pa se ne bi tribalo bojat, vengo slušat ministra i poč se cijepit, e... je oču, sve trčen...
- ove mi je godine doša učenik 3. srednje na repeticije oli poduke iz matematike svega nikoliko uri. virovali oli ne nije zna koliko je 5-3. reka mi je da ne brinen, da ce on sve sredit. virovali oli ne u deveton misecu je iša u 4. srednje, a virovali oli ne o' nikidan i šofira ulicama grada splita. čudo od diteta - kako li je samo sve to postiga?!
- ove godine san čula da u 2. srednje u isti razred idu čak 2 trudnice
- ove godine je premlaćivanje i ubijanje nasrid ulice postalo normalno
- ove godine smo dosta radili, čak i za međunarodni projekt, ali to je manje bitno, a ako nekoga ipak štagod zanima, neka poviri ovod. mislin da smo uspili preživit prvi val recesije.
- od ove godine vozin tonobil i solo... splitom i dalmacijom, toliko san dosad uspila poč
- ove godine su mi kurbini sinovi (a možda i čeri) otvorili tonobil i ukrali Paška I. .
- ove san godine nastojala pročitat dosta libri, napravit litrati, ali mislin da san slabije uspila učinit crteža/slika šta mi je žaj i nastojat ću blok otvorit ovih dan, bar za koji rad nacrtat.
- ove godine je bilo dobrih izleta, vidi http://xviiskitnje.mojblog.hr i to me dosta veseli
- ove godine je bilo i tajnih zadataka na kojima smo pucali o' smija
- ove godine su me neki ljudi oduševili svojim dobrim karakterom. drago mi je da ima takvoga svita, volila bi da ih bude i više.
- ove godine san preplivala kilometre.
- ove godine sam skinila dest kila i ovih dana opet vratila dva, ma poč će i to ča kad fini fešta...
- ove godine san kosu opiturala u crveno i nije mi žaj.
- ni ove godine se nisan upisala u njanci jednu partiju.
- još uvik živin na isto misto, u split, na granici bol-manuš.
- još uvik jeman istu mater, istoga ćaću i istu sestru.
- još uvik jeman i isto zanimanje.
- još uvik sebi nisan dala otkaz, ove godine san napunila jušto pet godin staža u vlastitoj firmi.
- još uvik me veseli umjetnost, beštijice, more, priroda i život općenito.
- još uvik ne volin laž, neradnike, lupeže (kriminalce svake vrsti) i muljatore...
je li ovo dosta, a?
more bit da je, e. 2009. godina u našoj zemlji baš i nije bila najbolja.
meni osobno u privatnom životu je bila neloša, ali uvik more bolje, e, neću prikovišje grintat, kad se sve sumira onako, more stat.
e sad san se sitila da san priskočila onu ča pokazuje čiče, lambašu, e, i njenoga dikana, e... ajme meni kako san mogla, a bili su ih puni foji. odma ih je tribalo stavit i to na prvo misto, grijota je priskočit takvu jubav, takav događaj, e...
ekola, gre godina pomalo ča, a gren za danas i ja. jemate pozdrav!
e... narafski, bit će od mene i modernih čestitki. ovo oče reč sms, e-mail i sličnih, ali ča se ovih ča ih nosi pošćjer tiče, uvik šaljen čestitke UNICEF jerbo se tako pomaže dici ciloga svita.
unicef čestitke by xvii - napisala san ih, sad ih još triban i poslat :)
e... sveta je luce. sveta luce je zaštitinica vida. narafski, voli i dicu pa im nosi darove. apropo nje je danas otvorena kripta katedrale sv. duje. to se čini samo jedan put na godinu. svit će užgat šteriku (ovo je jedan moj stariji litrat), vazest čudotvornu vodu za prat joči i molit za vid. svin lucama, lucijama, lucijanima želin sritan imendan. elvis piva tako lipo, ajmo ga čut...
sveta luce čuva vid, a za uši kad ovako zaladi je najbolja kapa. evo nekoliko mojih slika sa mora o' jutros. e a šta ćete, neću ja na snig, pa neću, e... tamo mi je prikovišje ladno, gledan ga samo na kartolini i takav mi je najveći gušt.
11.12.1946. osnovan je UNICEF , organizacija koja pomaže dici ciloga svita. preko moje firme redovito dajen pineze toj organizaciji u donacije jerbo je najbolje dat koji šold za dicu. to nisu ne znan koliko donacije, svaki put pomalo, koliko se more, ali nastojimo popratit sve njihove akcije. razmislite i vi o nečem takvom, barenko desetak, petnaest kuna, to nije puno, a može pomoći nekome. čovik se bolje ćuti kad nije sebičan i kad misli i na druge.
hehe, očete da bili medo pocrni?
ma samo ga pošaljite u trope, tot se vataju kolure 
pogledati do kraja, dobar je 
e...
činit će se za koji dan bakalar, na bilo, s kumplirima, na svakako nekako. je da vonje za poludit, ali narafski da ćemo ga i mi činit. lipo ga je izist.
e ma isto nije sve u bakalaru, jema još puno dobrih stvari iz Mora - stavila san van tot gori nike ricete, probajte štagod učinit, kušajte, guštajte.
jema i riceta za fritule, e... to obavezno isprobat, ispadnu prva liga, a moredu durat i za sutra...
sad će neko reč da san hedonist. je, ši, more bit. a ko se to ne bi mašija ove dane barenko kojega lipoga bokunića, a?
e...
fala ti bože nisan linčina, nije mi mrsko radit, dapače, volin radit, pa ću ostat i poza 4 ure.
ured by xvii, slikano mobitelom
Smokvu zrilu, punu šesti
Prije nego ću osidit
Da mi te još jednon sresti
Da mi te još jednon taknit
Tilo sakriti od bure
More moga bi razmaknit
A ne mogu tvoje škure
Za mladost vrimena nima
A za jubav fali srca
Puklo je ka tvrda stina
Pa bez tebe jedva kuca
Pasali su lipi sati
I odnili ča in drago
Ti se smiluj pa mi vrati
Moje izgubljeno blago
Ti se smiluj pa mi vrati
Moje izgubljeno blago
e... stavit čiste lancune, čistu intimelu, uvuč se u postelju, užgat letriku, vidit dokle se došlo i guštat u stranicama ča slide... nima bolje.
libar u postelju by xvii
sv. nikola by xvii
kapitanima mirno more, dici puno čikolate, nikolama i nikolinama sritan imendan...
... poslin smo otvorili kesicu, moran priznat sadržaj je odličan... dosta svojih kumpanji san ovih dana opskrbila ovakvom vrićicom, nadan se da se i njima svidilo :)
e...
di smo bili, ča smo činili, a?
na zvončacu,
na ježincu,
i na sustipanu smo vatali sunce i ariju, a na kraju smo gledali i kako sunce gre leč... 
bilo je to jedno sasvin lipo pozapodne...
e... volin maške, jeman maške, ali jutros nećemo stivat ovod moje maške.
evo za prominu jedna druga. crna maška, ši, ma nemojte se pripast, to je samo moj novi wallpaper na laptopu.
za sriću, narafski.
