e... dikad mi je kad je

ovakvo vrime

baš gušt čut

šjor Gibonnija

i koju njegovu

realno-tužnu besidu.

danas, svi moji punti kad se zbroje.

ova gre jednemu šjoru koji kad zbroji punte dođe na moje, a ja kad zbrojin punte dođen na njegovo, ali ne baš skroz jerbo san žensko, e... pa mora bit i bokun da ostane na moje. za sriću i nesriću, narafski.

nebo na zemju, by XVII, slikano jutros

crikva gospe o' zdravja

kaštelet by XVII, slikano danas

e...

je da me je danas tokalo radit, ali sve se lakše izdura kad su za obid punjene paprike s pireon i poza tega banji na jednoj o' najlipših plaža na svitu, kaštelet split.

ovi post ćemo tagirat ovako:

XVII, Split, More, Splitske plaže, Kaštelet, Marjan

je li štagod fali, a? a je, spiza, e... brez spize ne more. ajmo ča i to dodat.

Spiza

i da još nešto ne bi falilo odma ćemo reć i mužika oli glazba, trenutno u playeru klape, koncert na poljudu, Ne damo te pismo naša.

za tagove još rič:

Glazba

ekola, gren ča, jemate pozdrav!

galeb i ja, izvodi klapa tragos

e... jema pisama ča mi nikad neće dosadit; među njima je i ova!

Tigrić by XVII

e... ovo je uvaćeno noćas, mobitelon jerbo mi je on najprije bija pri ruci. ti šjor gori na ti litrat se (ka ča već znate, a morate znat jerbo je planetarno popularan) zove Tigrić.  poza napornoga dana nimaš di njanci noge pružit. lipo , nima šta. ovo se uvalija u moju kočetu i malo mi je falilo da pođen u tinel leć. ma nisan jerbo:

• jubav je i davanje, a ne samo primanje
• jubav je i žrtvovanje
• jubav je i praštanje
• jubav je nešto najlipje ča te more strefit, a nije bitno u koji će se oblik javit, more bit i ovako na rige ka Tigrić
• jubav je vrime ča mi ga je Tigrić da i još uvik daje
• jubav je vrime ča ga dajen Tigriću
• jubav je Tigrić na mon dlanu kad je bija skroz mali (a vidi ga sad, širina kočete (postelje za one ča ne znaju rič))
• jubav je guštat gledat kako Tigrić gušta
• jema tega još, ali jubav dikad i ne moš ričima opisat.

e...

evo kako vas banka sasvin slučajno i sasvin dobronamjerno, brez ikakvih zlih primisli more (probat) brzinski pokarat sa poslovnin partnerima iz inozemstva.

XVII, jučer ujutro, iz ureda u splitu zove banku u zagreb jerbo je gori u metropolu devizni sektor

- dobar dan, pri telefonu ja, zoven vas iz spliske firme moje, zanima me kako se može provjerit je li nan stigla jedna devizna uplata; znate taj svit iz te firme ča je u drugu državu je to već triba platit, nešto mi tu nije kjaro, ne vidi se ništa na internetsko bankarstvo, a faks vaše banke o uplati u naše računovodstvo još nije stiga...

objašnjavan ovo nikoliko puti jerbo me stalno spaja i prispaja kolegici koja zna višje uz tvrdnju da inozemni poslovni partneri još nisu ništa platili...

konačan odgovor:

- kad uplate bude, sve će se vidit na internetsko bankarstvo i dobit ćete faks. nisu van platili, a tražite od njih da van pošalju SWIFT pa ćete vidit da ga neće imat sve dok ne plate.

XVII zadržava mirnoću i kaže:

- asti sto, sad mi nima druge vengo im emajlirat i faksirat opomenu u tu drugu državu. a ništa, vidit ćemo sad šta će oni reć.

i pošaljen  profešuru o' ingleškoga ča isto radi za firmu mail s tekston opomene koji triba prevest na ingleški tako da ti furešti to razume. e, nije nego partija taj mail zvoni telefon.

- alo, ovod g. (iz računovodstva). evo ti je ariva oni faks od banke za plaćanje iz druge države ča ga čekaš.

XVII:

- aj bogu fala, sad ću se kalat do tvoga ureda po to, samo da rečen da se ne prevodi opomena, fala dragome bogu da nije to partilo fureštima, još bi se i šticali.

narafski da je uplata iz inozemstva bila baš ti momenat i narafski da je banka isti sekund poslala faks. i narafski da niko tot nije zadržava pineze, kako ste opće mogli tako nešto grubo promislit, a?

ovakvih gluposti ča se zovu balkanska posla jeman svaki božji dan. štufa višje čovika to, e... a još san ka u dobru banku. a ča bi bilo da san u koju nevaljanu, a? o judi, o turci...

e...

danas mi je za sriću bilo dosta doć na kaštelet, parkirat šugaman na jednu stinu na sami nasip, guštat tišinu, bokunić sunca ča je virija kroza oblake, vonj mora, pa poslin tega krik galeba, šum valova, poza tega jopet tišinu. sigurno je da mi nigdi na zemaljsku balotu ti momenat ne bi bilo tako lipo ka tot.

asti sto, a koja je ovo ura, a?

noć je. ariva je novi dan.

jučer ujutro rano sidnen za komp, uvatin se posla i sad se pitan kako mi je brzo proša dan.

u poslu san. do nosa, e... nešto je interesantno ovi put pa moren tako i po cili dan sidit ka u doba studiranja oli postdiplomskog :o)

sve je dobro, jedino, sad će mi kičma počet igrat igricu "vatalo", zaradi tega gren ča, jemate pozdrav!

e... evo malo ugođaja iz dioklecijanovih podruma. tamo je sajam plodovi dalmacije, rvacki proizvodi. jema tot svega, za izisit, popit, obuč, gledat.  dovukli su i pršut i maslinovo uje i sir i štagod robe, slika. aj povirite, možda štagod i nađete.

lvky, ti si more

e...

da jema svakakvoga svita, jema. ali kakvu je peršonu danas moja malenkost jemala nesriću upoznat, e, takve se belece ne rađaju svaki dan.

došla gospoja na razgovor za zaposlenje. i još nije njanci dobro sila na katrigu, a već viče da kolika je plaća. ja narafski svima daden informaciju o temu koliko u buštu mogu očekivat, ali ovo čudo, ovako nešto, moja malenkost još doživila nije. odma s vrata da kolika je plaća i traži (ovo se još pitan je li mi uvo dobro čulo) 300 kuna (ričima: trista kuna) neto za 1 (ričima: jedan) školski sat oli uru poduka oli repeticija i to za najobičnije podučavanje. o' radnoga iskustva jema na par misti po par dana, a ča se tiče prevođenja iskustvo prevođenja o' isto par dana i to za tekstove tipa dičjih slikovnica i kuvarica.

gospe moja, zemljo profundaj se, skoro me strefila ta cifra oko poduka. ja joj govorin da je li ona zna da je to 600 kuna bruto na ugovor o djelu i da za te pineze oni ča uči oče dobit malo višje uri o' jedne školske. i kažen joj da to nije u skladu s našin cjenikon, a da ja niman namjeru tako pljačkat svit. a ona će ti meni da će ona pljačkat svit i da kad moredu poć u frizerke i tot izbrojit dvista trista kuna, da će i ona vazest svojih tristo. i ka da šta joj ko more. i da ka živija rad na crno i još svašta nešto. uglavnom, parilo mi se da vidin jednu tutokompleto neodgojenu, nešesnu i puno nevaljanu peršonu i špedili smo je kroza vrata. neka je zaposli ko je lud, ja nisan.

eto, pa moj narode, ajde po tin crnin podukama oli repeticijama i daj po plaće u dva dana takvim belecama.

u nas se zna ko radi, di radi, jema i klima, uredni ured, dobiva se račun, a uobičajene poduke dođu 100 kuna dva školska sata i to je cijena s PDV čin se odluči doć nikoliko puti. cjenik transparentno istaknut na internetu, tvrtka: www.parametar.hr split.

narafski, sad mi je kjaro zaradi čega ti meštri o' sive ekonomije zagovaraju da me triba satrat, eliminirat i sl. (vidi arhivske misece, pisalo se već o temu).

e...

bravo, palo mi je i na pamet da na tv svaki dan drobe o suzbijanju rada na crno. a šta ne nazovu malo te ča su ostavili broj na kantu o' škovaca oli po kojekakvin oglasnicima i to sve skupa rade ilegalno, a? od pituravanja do podučavanja i nazovi podučavanja oli i jopet pituravanja. eeee

žunta: ošišan se za 35 kuna, račun dobijen, rice su mi prirodne :O)

(more se nać i frizeraj di dadu račun, uspilo mi je i to, nije da se ne more)

morski gušti, by XVII, slikano jučer

Split danas, by XVII

nije ovako uvik, narafski. samo kad su regate krstaša. ovo je povezano sa dvi riči: dioklecijan cup

dobro je

dok si moj san.

dok sam tvoj san,

dobro je.

naše joči (ako to oće),

mogu od sna učinit javu,

od jave san.

granica je tanka.

nadaj se i nenadanom.

igra riči i slova by XVII

za nekog, meni dragog.

narafski da će  judi ponovno doć kad radiš dobro.

jopet smo učinili jedan posal za HRVATSKI REGISTAR BRODOVA. pravi je gušt reć da smo radili za jednu tako uglednu instituciju.

fala antoniji na trudu oko svega tega.

sav taj svit (osin mene) za Parametar d.o.o. radi na ugovore o djelu (honorarno). takva je vrsta posla, dikad rade po tri miseca, a dikad malo odmaraju.

narafski, čin se može, triba zaposlit i koga na ugovor o radu. e pa danas je moja malenkost uspila jednu peršonu zaposlit i na takav ugovor. na određeno, ali neka, šta više bude posla bit će i više ugovora i bit će sve bolje i bolje. kako je ovo prvi ugovor o radu poza moga triba to notat i ovod, na ovi blog. koga se zaposlilo, a? a anđelu, e...:O)

danas me toka me radit sve do večeras pa gren pomalo ča. a more? more je lipo, jučer se probalo, banjalo. šteta šta ne moren i danas poć. ako jemate vrimena, pođite vi danas. na kraju, evo malo mora da se okuse i oni ča nisu na moru. jemate pozdrav! :O)

kaštelet by XVII, slikano mobitelon

duje i rokete by XVII

e... ovi litrat je peškan sinoć, s moga balkona. fjera je finila roketama koje nisu bile loše (usporedba sa onima o' nove godine), ali da su mogle bit bolje, jesu, uvik more bolje... more bit da je i riva mogla bolja, ali neću prikovišje grintat ujutro najranije.

gren reć tek koju besidu. na to jeman prav i to zaradi tega jerbo volin ovi grad, jerbo živin ovod, jerbo sve skupa nije palo s kruške, vengo se financira pinezima pučanstva, građana, e... tvojin, mojin, našin, čovik moj, e...

dakleM, uređena je, nima višje buži ča su bile za polomit se. sve je to (relativno) lipo tašelano velikin i malin bloketama. sad triba vidit do kad će to durat (zaradi tega i govorin relativno). po meni, kamen tutokompleto bi se bolje uklopija, ali nisan meštar o' tega posla, vengo o' letrike, pa neću mudrovat, probat ću razumit da je spliska riva šira o' zadarske oli šibenske pa da nisu znali kako drugovačije popunit prostor.

šentade? aj, more proć iako san ja višje za starinske, ovi futuristički stil baš ni ne volin. masu svita je probalo i sist, ja još nisan. tek moran vidit oće li mi bit udobno, e...

mislin da će dobar efekt učinit svitla ča će svitlit iz poda. prije puno godin je u francuskoj nici bilo tako i to mi se svidilo (ne znan je li još jerbo se odavno nije odilo u nicu, valjda je).

pozdravljan i zelenilo.

e sad. sad bi ka tribalo finit. ma bogati?! finit i mučat, činit kuco, pravit se išenpjan i lud pa ne reć: a oni stupi, gospe moja, a šta je to, a?

zaradi čega su nan to utrpali tako nešesno tot, a? oće da uteču furešti, a? potirali bi i domaće, a? muko moja, ako to tako ostane, niko normalan u ovi grad višje neće zgušton arivat popit kavu. sakrijte tu redikuladu i monadu ča brže morete u te tende, bandire i ostale krpene rekvizite. jerbo, ovako je suludo, e... van svake pameti.

eto. to je moje mišljenje. jeman na to prav. pa kome krivo, kome pravo, e...

jedno je sigurno. split višje nije isti. njegova vizura je bitno prominjenja. nekome se sviđa, nekome ne.

ja ne znan oću li se na ovo naviknit. more bit da ću sve češće poć u zadar oli šibenik sist na rivu i popit kavu, oćutit dalmaciju.

ekola, gotova analiza (ne)dila, gren radit svoj posal. jemate pozdrav!

fjera sv. duje 2007.

 na dobro vam došla sudamja!

klik za veće, svi litrati by XVII, osin onega na kojen san ja :O)

pobjednička kreacija

cila izložba:

http://www.flickr.com/photos/xvii_st3/sets/72157600179764226/

ili ka slide show:

http://www.flickr.com/photos/xvii_st3/sets/72157600179764226/show/

svi litrati by XVII (osin onega na kojen san ja, narafski)

misto radnje: Dioklecijanovi podrumi Split

ružice by XVII, slikano u jedan spliski vrtal

e... prvi je maja. praznik rada. dan crvenoga garifula.

u ovu bidnu zemlju me je tokalo bit puste godine brez posla tako da dobro znan ča je to nezaposlenost.

tokalo me radit i za drugoga. vidilo se i kako to gre kad je u pitanju nekorektni diretur.

danas radin za se i omogućavan judima ča oće radit da rade. plaćan svit za njihov rad i korektno se ponašan. ne glumin faraona, vengo radin skupa š njima, gradin tu firmu, pokušavan nešto stvorit u ovu bidnu zemlju. nismo proglasili produženi vikend vengo smo i jučer radili i fala bogu odradili i domaće i međunarodne poslove (da da počeli smo i s ton vrsti posla). pomalo gre prima naprid i ovi prvi maja moremo dočekat skoro pa zadovoljni.

kad se već zadovoljstvo spominje, neću poć ni u prvomajsku paradu ni u prvomajski demonštracijun s tabelon i trunbeton, neću činit ustanke, ali ovod ću ipak reć: moren bit u zadovoljstvu ča mi u Parametar d.o.o. pomalo stvaramo, radimo i gradimo, ali s onin ča je u državi nikako ne moren bit u zadovoljstvu. prikovišje je tot nereda, šporkarija, nesriće, a sve priko škine onih ča žive o' svoga rada. ne triban sad ovod ni držat govor, prikovišje objašnjavat, jasno je sve onima ča su nezaposleni i ča ih je privarilo. sve je kjaro tutokompleto, e...

zaradi svega, za ovi prvi maja jeman samo jednu želju:

želin da se u rvackoj prikine veličat mafija, mito, kurvarluk, lupešćina i slično.

želin da se počne poštivat rad, znanje i poštenje.

kad se ovo ostvari tj. kad se sustav vridnosti postavi kako triba, drugo će sve lančano doć na svoje misto. ozbiljno, e...

ekola, gren ča, sritan van bija MEĐUNARODNI PRAZNIK RADA!