e...

ovo je post za sve kurjože peršone.

život mi je očajan, nikad gore, gospe moja pomozi, makni ovu nesriću i mižeriju o' mene...

današnji obid, sve ritko na plitko, ka ča vidite...

punjene paprike, brez riži narafski, prima riceti iz moje kuće:

http://web.vip.hr/nmagazin.vip/ricete4.html

poza tega je bilo mrvu ovega:

ovih dan ću, narafski, probat učinit reprizu ove mižerije... :o)

da ne mislite da san hedonista tutokompleto, špijat ću vam i koji se libar čita:

francoise sagan: čuvar srca

ovo ćemo tagirat sa: Split, More, Spiza, Ricete od XVII, Umjetnost

e...

vala - uvala

kaić, barka - brodić tj. čamac

penta - motor (vanbrodski)

tunja - pluto+krena+udica

ješka, bruma - služi za namamit ribu, bruma se baci u more da se namata riba, a ješka se stavlja na udicu da riba zagrize i uvati se

špurtil - štap+mrižica, time npr. morete ulovit koju kozicu :o)

salbun - pijesak

sika - stina ča viri iz mora oli uz samu obalu

šugaman - ručnik

šlape - japanke, natikače i svašta nešto iz te vrsti obuće

maja - majca

maja na rige - majca na pruge

španćjera - šešir

kušin - jastuk

štramac - mislin da ovo zovu luftić oli tako nekako

mudantine - muške kupaće

kostim - ženski kupaći oli badić

očale - naočale

fjaka - posebno stanje duše i tila, ovo ipak oni ča nije odavde neće nikad razumit, e...

ovo bi vam moglo zatribat ovih dan dok duraju godišnji ako niste iz dalmacije...

ako jema još koja rič ča vas muči i za koju ne znate za šta se dupera, javite se slobodno... rišit će i to dalmatinske linčine. :O)

znan, tribalo bi još reč i ča su gradele, ča je buzara, brudet, ča je mul, điga, ča je pisma, još puno tega, e... a pomalo ćemo, vrag odnija i prišu.

ako se bude išlo sa pacijencon, možda nas i budu razumili, e.. barenko nešto, e...  ;)

drr, drr zvoni telefon

- molin.

- dobar dan, moje ime je andrija i zovem iz sdp-a u zagrebu. imate li minutu?

- za sdp njanci minut. doviđenja, živili. - poklopin slušalicu

isto će se provest i hdz i sve ostale partije. niman njanci minut za vas, niman pinezi koje ću vam dat, niman glasa koji ću vam dat. zaradi svih vas takvih kakvi jeste se i sa magistarskon diplomom tražija posal po ciloj rvackoj, ponižavalo me se i pljuvalo, a kroza svo to vrime vam po državnin skulama (a tako je i na druga mista ča su pod direktnon kontrolon države) rade kojekakve falšete:

http://xvii-online.com/1/sve-za-lipe-joci/89199.aspx

da, da, ova još uvik radi na trošak poreznih obveznika ove bidne zemlje. je li bar nekoga mrvu sram radi tega, a?

dakleM, stoga i naime danas kad jeman svoju tvrtku i zapošljavan ljude:

- ni za jednu rvacku partiju niman glas,

- niman ni donacija za partije,

- niman ništa za partije, niman njanci minut vrimena, e...

hebite se i zaobiđite me,  kad se bilo bez posla di ste onda bili, a?

ponistra by XVII

e... ovo je tot blizu, iz kvarta. znan (skoro) cili manuš (i okolicu) jerbo tot živin (skoro) cili život. tot mi je živila i živi i mater, njena mater i njen ćaća oli moja baka i moj dida, njihovi roditelji također... kad prođen kraj ove ponistre (a ovo van je na onu bandu o' usjeka pruge), uvik se mislin: ma ko tot stoji, a?

jerbo, dogodi se dikad, narafski, da nekoga i ne znan. ne moš uvik sve ni znat. zapravo sad se pitan je li se moja kuća koja je kraj skule manuš vodi na manuš oli na bol. mi smo na samoj granici o' ta dva kvarta, e... ma nije ni bitno, svita znan i s ove i one strane balkanske (oli danas vukovarske) i isto tako i na jednu i drugu bandu o' mažuranićevoga, a ko stoji o' iza ove ponistre ne znan, ali nekako virujen da tot more bit niko dobar. ponistra priča da tot mora bit niko ča voli život. jerbo, ma vidi ča mu/joj je lipo ovo cviće, a?

svit ča ne voli cviće, beštijice, dicu, život triba škivat. o' takvih moreš svašta grubo doživit. kakav je to svit, a?

a ove iz kontra tabora ča vole cviće, beštijice, dicu, život volin jemat uza se. š njima je veća šansa da doživiš štagod lipo, ugodno, srcu drago...

eto... i ponistra priča o čoviku.

gren ča, jemate pozdrav!

e...

ovu zagonetku dragi moji splićani sasvin uspješno rješavaju. kako me pusti svit kroza svo ovo vrime otkad je to na netu ferma na ulici i da točan odgovor di je to i o kome se to radi (niki su me čak zvali i na telefon da mi to reču), sad ću vam notat i besidu dvi o još jednoj beleci pa vi pogodite koja je, e...

e... (brez ovoga e ne more počet, e)

sidin ja danas tako na institutu (plaža za one ča ne znaju)  i slušan (ne šta oću vengo jerbo se deru) kako jedna gospoja priča drugoj o temu kako se pokarala sa mužen/ momkon (nije se dalo svatit ča joj je), ali da se nije ona izgubila vengo da je o njegovoj novoj curi svugdi proširila nečuvene laži pa neka se ta nova gospoja sad misli. 

pitan se je li dobro čujen. kakav je to način, a? a di je poštena igra? nima je... ovo se danas cijeni, to je moderno, širit laži.

čujen ja tako i o sebi svašta, uzlaprdale se nike mone. u jameriku bi ih se isplatilo tužit, ali ovod to nima smisla. ne sekiran se, ruzina (rđa) se zlata ne vata, govorila je moja pokojna prabaka; ova je jemala mater ča divojački bila roje, e...

o drugima ne govorin laži, niman potribe za to, dosta o svakome govori i istina.

evo ću o jednoj peršoni reć istinu, i to sa svrhon i razlogon, a vi je dragi moji splićani pripoznajte...

- živi u tuđoj kući godinama i poza tega pođe priko svojih poznatih/svojte optuživat pošten svit (ča nima njanci dana života u tuđoj kući) da se uvaljuje u tuđu kuću,

- jema obraza ne pridonosit nikako i ničin; ovo oće reć ne radit godinama, tek poza tega nać niki posal priko veze; izist uvik tuđi obid, a njanci pjate ne oprat, čekat da je drugi sluškinjaju, šumprešaju. poza tega pođe pošten svit ča pošteno živi o' svoga poštenoga rada optuživat da oće živit na tuđe špale,

- ka puno je bogata, a osin tuđe kuće i tuđega obida dupera još tuđih stvari... tuđin brodon i tuđin tonobilon šparta po rvackoj i inozemstvu, narafski obično i tutokompleto na tuđi račun, tek ritko uloži niku svoju kintu, ali nije to ni problem jerbo kako došlo tako pošlo, oli je mukotrpno radila za to, a?

- iz lupeške je fameje ča se potizala u crnu kroniku po fojima i jema obraza isticat te šolde ča su ukradeni rvackon radniku ka niku vridnost,

-  kažu da nima ružnih žena, ali ovu da san muško ne bi takla njanci izoliranin štapon, toliko je grda,

- evo, gren van još reć (da vam bude lakše skontat o kome je rič) da se predstavlja da je po zanimanju vezana za poljoprivredu, sad znate dosta, a šporkarija tot jema još. i prikovišje, e...

jeste li je poznali, a? ako nekome triba odgovor tj. ako nije skonta o kome se radi, neka mi se javi u privatnu ćakulicu, rado ću mu špijat "cinjeno" joj ime, e...

ekola, gren ča, jemate pozdrav! 

nebo by XVII

bože daj koju kapju kiše, utrni požare.

"Ali zašto živjeti čitav život? Samo zato da se živi? Samo da se održava tijelo? Velika utjeha! Čemu nam tijelo ako nema ničega drugoga?"

Složenicin

zaradi tega, evo jedne lipe stvari ča čini život, e... mrvu Umjetnosti velikoga Umjetnika. nije opće istina da je činija samo suncokrete, ma ke... danas ćemo štagod crveno jerbo kažu da je to kolura pobjednika... guštajte!

Makovi by Vincent Van Gogh

e...

ajmo malo svita šta lipo piva ovod stavit, nismo odavno...

zorica & marsell, tajni čuvar

e... sad mi je palo na pamet kako ovega šjor marsella znan i uživo.

muške bi vjerojatnije zanimalo je li znan severinu, hehe, a eto moren reč da mi je i nju bila zgoda upoznat, još dok je bila dite, kad je pivala u mozaika. ozbiljno, e...  kako? a lipo... jedna je kike ča je sa menon odila u razred u pučku skulu, a šta je prije vengo se udala stala u istarsku,  isto bila u tega mozaika, pa smo jedan put skupa odili na banjanje i eto ti i seve. poza tega je se još sićan kad joj je momak bija jedan (čupavi) šjor sa toča, kumpanjo o' jednega moga kumpanja ča je isto sta na toč. eto, sad sve znate. kroza godine mi se pari da se dosta prominila i da je prije (dok nije bila nacionale) pivala bolje (meni ona sad ne vridi ništa ča se pivanja tiče, ali o ukusima se ne raspravlja) i da se ponašala pametnije. narafski, to je svima kjaro i brez da im to ja rečen...

vengo, ajmo ča još o ovemu zgodnon pivaču. upoznali smo se davno i to na jedno skroz ludo misto, priko jedne jna kasarne na srpsko-bugarskoj granici u pirotu. oko 2 iljade kilometri o' splita. tot mi je jedan kumpanjo služija soldate još u vrime one države. dođemo mu ja i još jedan kumapnjo u vižite. gospe moja, koliko je dura ti put. prominili smo puste vlakove, još smo bili sriće i da bude štrajk željezničara u to vrime pa smo išli okolnin putevima, ali smo stigli. prijateljstvo je nekad bilo na cijeni.

onda me je još tokalo u tu kasarnu reč da mi je ti kumpanjo zaručnik, a vraga je bija, to se reklo samo da dobije izlaz. poza tega su išli čagod popit. i eto ti marsella. i on je tu služija soldate, a kako je zna pivat i svirat, tokalo ga je bit mužikant srpskin oficirima. kose, narafski, tot nije jema jerbo je bija soldat. nima to veze, brez ove kose je još bolje izgleda. evo kako mi je onda parija: moren reč da je to jedan vrlo komunikativan, zabavan i duhovit čovik. valjali smo se š njin o' smija. tako je to bilo onda, a kako je danas, a ne znan, valjda se prominija nije. piva, fala bogu, još uvik lipo. zaradi tega, fermat ćemo sa pričon, ajmo čut pismu. tajni čuvar. guštajte!

e...

nike mi stvari nisu kjaro, nikako mi ne gre to u glavu. šta? a evo ovo o čemu ću notat besidu dvi.

najprvo ne razumin je li to nika nova moda ili se svit išempja, ali po splitu sve višje muških gre u roza maju oli u roza košulju. je, dobro ste pročitali. i još su nike boršice stavili priko sebe. svaki dan kad to vidin pitan se: jesu li mi očale dobre? je li to možda bija koji skonto di su jeftino to vazeli? je li to zapravo crvena maja koja je na suncu požmarila, a bidan svit nima pinezi za vazest novu ? itd.

da se odma razumimo, tolerantna san peršona, neka svak nosi ča ga je volja ako time ne ugrožava drugoga, neka i jubi koga mu je volja (oli koga more)... ipak, čini mi se da je ovega mrvu prikovišje, ne virujen baš da svi ti muški jube muške, ali istina je da priko pjace i rive gredu u roza maje.

ni mi to baš drago vidit, ne figura mi to, ma ke... pitan se: koliko onda vridi moja ženska roza maja kad je ovolika poplava muških roza maji, a? nije valjda vrag da je došla na "po po šolda", e...

dragi muški rode, oni ča čini malu potribu u more na punu rivu svita je grez i sigurno nije preženca o' čovika  , ali, i jopet, bolje mi je vidit i takvoga muškoga oli kojega u šporku maju na rige, vengo onega ča po gradu šparta u roza maju.

za gospu blaženu, očete li još i veštu stavit na se, a? i jedan cvit u kosu, a? a moga bi onda i fjok, e... i neka bude rozi, e... ni šandale višje ne tribaju bit trika-trake, bolje bi bilo koje na tak, e... tribalo bi nabavit i bokun ređipeta, e... uajme, zemljo profundaj se.

fermat ću, znan da će se sad pusti ofendit i gren se ča popačat u nike druge stvari.

šta? a evo, sve oko merjana je puno brodic. manje i mogu razumit, ali krstaše i glisere nikako. to je zločin prima brodu, e... doč brodon o' 12 metri na merjan i tot bacit sidro, e... pitan se: je li to mižerija pa se nima za natankat gorivo, a? je li to želja da se pokaže svoje plovilo, a? je li to straj da će ti ukrast takujin ako stvari ostaviš na plažu i pođeš se banjat, a? je li to sram o' svita (oli kompleks) pa se triba sakrit u brodsku kabinu, a? je li to nepoznavanje rvackog akvatorija i trta mrta za poč do broča, a?

oko merjana moren razumit samo kaiće, barke, štramce. ostale ne.

jerbo, brodu triba more ka ča ditetu triba mliko materino i velikin brodon se gre na broče, na broče o' iza broča, na kornate, na paklene otoke, na mljet. dobro, more i na puntu o' čiova ako se nima puno vrimena oti dan oli ako nije urlap, ali doč krstašon na merjan, e, a, ča reč, vengo o judi, o turci...

moj ćaća je  jema gliser. ti gliser je bija lip, ludilo. u zadar smo ga držali jerbo je tako onda život da. i narafski da se njime nije odilo na zadarske plaže borik i kolovare, vengo bi bilo: spiza u gliser, judi u gliser i via ugljan, via kornati, itd. jerbo, brod je plovilo, a to oće reč da služi za plovit. na merjan se more doč i na noge, tonobilon, bičikleton, tantobuson. pun mi je kufer višje brodi oko merjana, štufalo me to, niman višje di ni plivat ni ronit; ajte, bog van da zdravlje, naučite višje navigavat (u dalmaciji ste) oli prodajte brod nekome ko će znat šta će s njin, e...

ekola, gren ča, dosta je pačanja. jemate pozdrav!

rižot o' liganj, moj današnji obid

riceta: http://web.vip.hr/nmagazin.vip/ricete5.html

e... uajme ča je bija dobar, govorija je 10 svitskih jezika, e... :o)

XVII oli ja, jutros, prije i poza plivanja, klik za veće

osnovna informacija za sve ča nisu znali

ime: Nada

prezime: Magazin

nick o' interneta: XVII

roditelji: starija čer o' Gorke i Vinka Magazin (zvanog Gorki)

visina: 1, 65 m

masa: e, punoooooo, uajme, bidna, jutros je bilo 66 kili :O)

godine: 34

datum rođenja: 17.11.1972.

misto rođenja: Zadar, najlipši grad poza Splita

misto života: Split

zanimanje: letrika, magistar znanosti

radno misto: šefovska katriga u firmu Parametar doo

stil života: živin za more

moto: samo je nebo granica :o)

e, a moremo sad još na dugo i na široko, ali ovo je ono, brzinski u tri četri riči... da oni ča su friško počeli pratit blog skontaju ko san, šta činin, di san i kako izgledan, e...

Ćićo by XVII, slikano jutros, klik za veće

e...

gledan mrvu latinicu. tema: razvod braka.

ispada da se ljudi ljudski rastaju na način da se ženi priti ričima razbit ću te, ubit ću te. to je postalo moderno, in.

slično je i sa vezama koje nisu brak ni postale.

da, da, baš to je muški, ljudski, jako, moćno, nima šta... e...

mogu se ljudi ne slagat, teško je zapravo i naći peršonu koja će nam odgovarat i kojoj ćemo odgovarat, pogotovo u potpunosti. moja pokojna baka je uvik govorila da je brak lutrija;  ima valjda istine u tome. 

ako na išta kipin, to je zlostavljanje. bilo koga na bilo koji način. fizički, psihički, emocionalno, financijski.

zlostavljanje je nešto šta nije ljudski. mislin da me niko neće nikad moći uvjerit da je to ok.

eto, pa neka govori ko god šta oće, ja ovako mislin i svakom mogućom prilikom ću ovo ponovit. 

notano sa svrhom i razlogom.

Split by XVII, slikano nikidan iza Acya, klik za veće

e, poza svih višje i manje zanimljivih događanja vezanih uz posal i moj život o' ovih dana o kojima ste mogli čitat na ovi blog evo i jedan litrat o' ovih dana. slikano iz acya. 

a šta činin još, a? ma svašta, život gre naprid svojim ritmon, možda i mrvu žešćin vengo je uobičajeno za sedmi misec.

evo još detalja za kurjože:

čitan: Sidney Shedlon: Ponoćne uspomene

čekan: koji slobodni dan samo tako, mrvu se triba uteč iz splita; samo još ne znan kad, ali zato znan di :o)

kupan se: e, tamo di triba dobro znat plivat (tako će i ostat dok dura konfužjun).

planiran: zaposlit još ljudi i krenit u neke nove poslove. zaradi tega, povirite ovod i ako se nalazite u opisanome, javite mi se... ovi put smo posebno zainteresirani za profešure svih stranih jezika i inđinjere.

jeman: koluru ka arap. vidin da me niki začuđeno gledaju po gradu, ali to je prirodno, da, da :O)

o' sunca i mora, ove godine se počelo 14.04. s banjanjen. je, dobro ste pročitali, e...

itd.  evo, štufalo me višje notavat ovi momenat (ne more uvik bit duži tekst) pa koga zanima još tega, neka se javi u privatnu ćakulicu, e... :O)

gren ča, jemate pozdrav!

e...

evo ću vam probat na brzinu ispripovidit kako je srića relativan pojam. prima istinitom događaju (događajima) o' jučer.

srića je u/na moru. velika. velika srića, ali i nesrića. kažu mi, blago ti se, živiš na moru. da, blago mi se. more daje, ali more i vazimlje. koliko je samo života odnilo. srića je zapravo tot relativan pojam.

jučer mi je More bilo ludilo. prva liga. učinilo me sritnon peršonon, ali već po ure poslin, more me je ranilo. odnese me val na siku (ovo znači da je val bija poveći jerbo plivan ka riba), udren rame, propisno. krvi u dovoljnin količinama. e, sad ćemo fermat, nećemo višje strašit svit. danas je bolje, narafski, ali srića je zapravo tot relativan pojam.

poza tega mi doma vrag nije da mira, sitin se jednega prstena ča mi ga je darovala pokojna baka, mater o' moje matere, ona baka ča je divojački bila Ivančić, ona po kojoj se zoven Nada, e, ta... to je jedan prsten o' zlata i puno je lip. jednostavan, jema oblik fjoka. nađen ga u škatulicu o' nakita i mojoj srići nima kraja. narafski, već samo zlato je srića. bar tako kažu. srića je i srebro, narafski. jučer me je recimo bilo obradovalo vidit u tu škatulicu o' nakita i jedan puno lipi, prekrasni bračolet (narukvica za one ča ne znaju). od koga je to, a?  e, to mi je bija dar o' ovega šjora, ča ga se tot spominje, davno, za jedan 8. mart u vrime dok je muški rod još zna poštivat ženski rod. (virovali oli ne, prije je bilo višje poštivanja vengo sad, da, da). i jelte, moja srića je sad još veća, zlato, srebro, uspomene... uspomene i sićanja vride beskrajno, sve čoviku/ženi moredu odnit i ukrest, ali uspomene su život baš tega čovika/žene i s njima lupežima i nije baš lako.

e, a sad tribate jemat  pacijence pročitat kako je srića i ovod zapravo relativan pojam. vazmen ja ti prsten ča je ka fjok, stivan ga na prst di inače nosin (čak) dva prstena ča mi ih je darovala mater, a ova dva stavin na drugu ruku. na isti prst.

lipo sidnen i počnen gledat velo misto. meštra, pegulu (uajme ča je bija zgodan), violetu, babu martu, rica, feratu... mislin se, dobro je da na tv dadu i koju splisku rič, neka se malo čuje ta rič, rič ča je znan o moga pokojnoga dide, bake. rič predaka. rič ča je godinama stala na neku škanciju o' mobilije, rič ča nije krepala, ča je još živa, ali je triba mrvu izluštrat. guštan je čut i narafski mojoj srići tot nima kraja, ali srića je relativan pojam.

toliko san se udubi u to serije da se nije njanci sinjalo ča se događa. poza serije ja u kondut, kad, jeman ča i vidit. srića, a? en ti sriću, past će meni sto kolpi o' ove sriće, e...

oteka prst. oni sa dva prstena ča su dar o' matere. ne moš ih kalat ni sapunon, kremon, ničin. otiče sve brže i brže. dok svit po svitu čini ne znan šta sve ne da dođe do zlata, zlato je u ti moment za mene velika nesrića. probalo se i ledon, razbit ih klištima, ništa.

e, sad, ča je bilo dalje, a? a ne bojte se, još uvik jeman 10 prstiju na rukama i 10 na nogama. prijateljima na radost, neprijateljima na žalost.

obučen se i pođen na hitnu, a šta ću drugo.

narafski, poza razbivenoga ramena, tribala mi je još i ova monada. jedna nevolja nikad neće arivat sama, uvik jema kumpanje, da joj ne bude dosadno, da ne bude usamljena, e... kažu da je to po zakonu o' onega šjora marfija, e...

na hitnoj se, pak, likar najprvo čudon čudija ča mu je moja malenkost došla, a tek je poza tega pogleda prst. još je mlad pa ću mu oprostit.

poza tega je jedan šjor vazeja klišta. to je bija jedan o' ovega osoblja ča tot puno rade ma nisu likari. i odu dva prstena u prdac. a šta ćemo...  između prsta i prstena važniji je, ipak, prst, je li tako, a?  žaj mi je, ali odnit ćemo u zlatara, pa ćemo vidit je li se da popravit  ili od ta dva učinit nešto novo, skemijat ćemo već nešto, e...

jerbo, život nije statičan, ne more sve uvik bit isto, nešto se da popravit, nešto priđe u drugi oblik, nešto nestane, nešto nastane, svako zlo šta se dogodi nije za zlo skroz, svako dobro ča se dogodi nije za dobro skroz.

bitno je da jema Sriće, a ona je, zapravo, relativan pojam.

e...

nekome ča mi je nekad bija puno drag ću zafalit ča mi se danas odazva na mail i to vrlo brzo i to lipo iz jamerike, a nismo se ni čuli ni vidili godinama. baš puno godina. o' prije rata.

živija internet! priko godina, priko oceana i etooo...

a kermit je, pak,  nešto sasvin osobno, to nikad ne bi razumili, pa van i neću objašnjavat,  ali razumit ćete da mi je ovako lip i šesan na sliku ulipša dan... kad mi je stiga lipo iz jamerike... :O)

poza svih ovih godina, bilo je lipo proćakulat sa v.

e...

jutros san dogovori i još jedan lip i sasvin solidan posal. u to krećemo uskoro. blagomise, narafski...

narafski, svin mojin dragin prijateljima će bit drago zaradi tega, a i meni će bit drago ča je njima drago. svi moji najdraži neprijatelji će i jopet patit, ali zaradi tega ću ja, narafski, guštat. :o)

dakleM, čovik ne mora bit osuđen na 3 oli 4 ijade kuna misečno cili život. čovik more poč i u poduzetnike. samo triba jemat petlje za to i sve se more. jerbo, samo je nebo granica.

e...

lipe riči, štorije, priče

priča Čovik.

(dikad i na nekoliko jezika).

zvir riče.

svako se oglašava kako zna

(u skladu sa svojim mogućnostima, kućnim (ne)odgojem i sl.).

e... ujutro posal, pozapodne gušti (uz samo mrvu rada priko moba)... more je ludilo.

sve morete uvećat klikon, zadnja dva litrata potpisujen, a na prva tri san ja, osobno, e...

e... o' jutros posal. banka, fina, dvaput u računovodstvo itd. (mail, telefon i uobičajene poslove ni ne računan).

pozapodne poduke, zove momčić oko 2 ure i naruči se za 6... e, dico, dico, jemate sriću da san dobre volje.

a sad san još bolje jerbo san upravo tanju stavi na ugovor o radu.

koja je ura, a? 20:43 lipo... danas smo zaradi posla i banjanje priskočili. ma bit će bolje sutra, e... :o)

ekola, gren ča, jemate pozdrav!

e...

ka privatnik poduzetnik jako dobro znan ča mi to oće reč kad za honorar koji oću isplatit nekome ko je radija moran dat ovako: na neto iznos još toliko gre u razna davanja državi. recimo na 100 kuna još 100 ode u davanja. na manju cifru se da progucat, ali na 6 iljada kuna neto (dragi neprijatelji, znan da sad patite, ali u nas je bilo i bit će ovakvih honorara), tokalo me dat još 6 iljada u davanja. ugovori o radu su nešto povoljniji i sve višje svita mislin zapošljavat baš tako. ako bog da, sutra ću probat napisat baš jedan takav ugovor; ako bude manje sriće, ići ćemo na honorarni, ali radit će se u svakon slučaju... (dragi neprijatelji, znan da vas i ovo pogađa, ali šta ću vam ja, neću ja prikinit živit i radit da vi ne bi bidni patili hehe)

ipak, i tu su davanja ogromna. narafski, plaćan još i pdv o' 22%, pa porez i davanja na moju plaću, ali to sve skupa nije sve, jema toga i još. puno. da ti dođe zlo, čovik moj, e...

i sad bi čovik, narafski, tija za te pineze uređenu državu. a šta jemamo? kako šta jemamo? a bolje se pitat: a šta nimamo, e... ovod je prva liga, ne fali nan ni tičjega mlika. pulicija nan radi punon paron, svi lupeži su uvik odgovarali za ono ča su pokrali počevši o' banka (di se krelo s bičvon na glavi, ali i ortaklucima) pa do škverova (svi su ovi lupeži ča su pokrali rvackog radnika koji tako 'rani troje dice narafski dobili barenko dvadeset godin pržuna); niko se nije škapula, ni živ ni mrtav ni navodno mrtav (znate onu umra san al' san živ hehe, jema i takvih, vjerojatno). sudstvo nan radi učinkovito i expresno, soldati su nan uvik pripravni za branit lipu našu, aeroplani su po zadnjoj modi, skule pogotovo funkcioniraju samo tako. i narafski, kad smo sve tako lipo ušestali (zdravstvo i likare neću ni spominjat, tot sve puca o' divote i lipote), onda uopće nije grijota namirit sve ove lezileboviće u ovoj zemlji, neka se malo u životu svome i oni okuse pinezi kad ih već ne znaju zaradit ka mi, niža vrsta, privatni poduzetnici, e...

ča ćemo još, a? a evo, nešto lipo, jedan litrat.

o' isprid lučke kapetanije by XVII, slikano danas, klik za veće

e bravo, kad san već kod litrati, noćas me je duje priko maila u ponoći pita da koji aparat duperan oli koristin jerbo da su mi slike dobre. fala na pohvali duje, ali ča se aparata tiče, e, ništa preskupo, kodak o' samo 2 megapiksela (virovali oli ne), kupljen lani na nekon sniženju.

kako su slike (litrati) onda dobre, a? e, pa zaradi tega šta višje vridi znat, vengo jemat. ne bi mi puno pomoglo nikakvo čudo teknike da ne znan slikat, izabrat motiv, kolure, jemat špurijus za pravi momenat i tako to.

isto vridi i za pineze, poduzetnik će o' 2 iljade kuna brez problema učinit 20 iljada, političar će o' 20 iljada brez problema doć na munitu. jerbo, sve je u glavi, čovik moj, e... niki stvaraju nove vridnosti, niki arče. valjda tako mora bit da balanca bude u ravnoteži.

ekola, za danas dosta. jemate pozdrav!

žunta o' jutros 09.07.2007.: neki se već bune na ovi tekst zaradi keruma, roglića, todorića, rajića, kutle i sličnih iz kumpanje bele koja ne zna objasnit odakle je krenila.

i ono, da im "žele samo sve najbolje" (čitaj: šalju ih u niku stvar) i ka da i ono, sve se zna, niko ništa ne zna. i da kako ja mogu veličat poduzetnike? e, pa ti nisu poduzetnici, u tome i je problem.

svitu moj, iz ovega razmatranja narafski isključite te hebivetre, pa ko ozbiljan njih uzima ozbiljno?! gledajte u tvrtke u kojima rade (većinom) mladi (većinom) visokoobrazovani ljudi koji su nešto svojim radom napravili, a takvih jema, napisat ću post i o temu, samo u splitu jema sigurno 10-15 takvih tvrtki.

koča by XVII, slikano jučer, klik za veće

Split u 7 litrati na 07.07.2007., klik za veće

Rič za nas

e... zadnji post je reka sve.

jušto oni minut kad mi je jutros prošlo kroza ćivericu da smo pri kraju sa nikin poslovima i da bi baš bilo dobro mrvu mrdnit gujicu i poč u nike drage gradove i mista i kad se počelo gledat u kalendar na koji ću dan partit, mislit ča ću stavit u boršu, kome ću se sve tot javit, zazvonija je telefon.

doša je novi posal i sad će dragi gradovi i mista još mrvu čekat na me. ne znači da im neću doč u vižite, ali će me još malo čekat. pegula oli ne, ma tako je kako je, nije mi žaj, negdi dobiješ, negdi izgubiš. nikad ne moš jemat sve. radit moran i oću, nisan, bogu fala,  ni lupeška čer ni lizoguz o' partija i pricidnika pa da mi pinezi sami arivaju. moran za pineze radit, a kad se mora nije teško.

meni narafski ni ove godine nima godišnjeg. otkad radin niman godišnjeg, niman ni dana bolovanja. u te vižite ću poč na način da jutro pođen, a vratin se navečer oli sutra. drukčije će bit teško - mislin se sad.

blago mi se, narafski. ko more to platit, a? a bi li i vi malo tako, a?

e, sad ćemo fermat s kukanjen jerbo niko ne voli grintala  i gremo u nešto lipše:

more pini

nebo gori

split svitli

riči i litrati by XVII, sve o' danas, klik za veće

ekola, gren ča. moran jerbo sutra mi je još jedan radni dan. triba mrvu ubit joko. jemate pozdrav!

e... uajme...

uajme,  ča san dobre volje. upravo san dogovori jedan sasvin lipi i solidan posal. obid mi je bija za plus pet. još malo i u boršu će šugaman, gren na more. ko ovo more platit, a? :o)

Split, lito, jučer by XVII

e... dan u litratima. nije loše, a?

poza svega ovega san na dno tolstojeve trefi jednega moga dragoga kumpanja ča je sa menon študira. nismo se vidili odavno, ali unatoč vrimenu ča leti još smo uvik na istoj frekvenciji, sinhronizam ča bi rekli. pričamo o' svemu, prolazi vrime da nisi jokon trepnija. išćakulali smo se samo tako. baš ni ga je bilo drago vidit, čut kako govori. život gre, ali stvarno dragi judi uvik ostaju stvarno dragi judi.

Split by XVII, slikano večeras

e...

narafski da se poza jutarnjeg plivanja mrvu i radilo (mora se, nisan lupeška čer...).

narafski da se poza rada i lipo obidvalo (a neću valjda živit o' arije...).

narafski da se poza obida i jopet odilo na more, banjalo, guštalo, čitalo libar (more i jemamo za banjanje... pozapodne kaštelet, litrati jeman, ali mrvu ću laškat, ne moren stalno vadit mast ovima ča nisu na moru. dobro, dobro, znan da se mast vadi i onima ča su na moru, ali su lini  izvuć šugaman i mudantine/ kupaći iz armeruna i poč se smočit).

narafski da se navečer mrvu i izlipilo (sad lipo gledajte litrat o' večeras... :o)).

a sutra? sutra je i jopet litnji dan pa  triba učinit reprizu. zaradi tega sad gren ča, jemate pozdrav!

Ovčice by XVII, slikano jutros

e... i ča će mi sad rio, copacabana, karibi, havaji, azurna obala?

(evo, recimo na azurnu obalu je moja malenkost bila, i s punon odgovornošću moren reč: ništa to nije prema ovemu, e...)

di je ovo, a? a di će bit vengo na najlipši dil zemaljske balote, u dalmaciju, u split, na merjanu, e, to je to :o)

litrati se moredu uvećat klikon...

2005., link na post

2006., link na post

2007., danas pozapodne

narafski da se i danas išlo na more. jubav ča dura i ča će durat dok me jema je danas Merjan. oko Merjana jema puno lipih plaža, a svi ovi litrati su slikani na protupožarni put prije soldati. tot je super, ali tot triba znat i super plivat.i narafski, sve litrate se more uvećat klikon :o)

gren nešto izist, večera zove, jemate pozdrav!

"i nikad naglas ne bi reka

i ne bi prizna ja da ti srce ka u vrši ostavljan... "

dalmatino, dobro jutro

e.. nikidan mi je uvo jemalo prilike čut kako dva šjora jedan drugome nasrid pjace tumače ča je to vrša. na kraju su zaključili da je vrša tunja. dobro da me nije strefilo ti momenat. došlo mi je da ferman, da im rečen:

skužajte, ali sigurno je tako, nima šta. ma ko vas je doveja na more, gospe moja, a?

a ča je to vrša, a?

vrša služi za poč u ribe, to je zatvorena konstrukcija, žičana (bilo ih je i o' pruća), spusti se u more, gre na dno, u nju ulov uđe, a ti poza nekog vrimena dođeš na to misto i pokupiš svoje vrše... vrša nima veze sa tunjon (za neznalice, tunja je pluto+krena + udica), tot nima krene (za neznalice krena je najlon, nit), a ni udice...

vrša je zapravo vrst trapule, a trapula je zamka (za neznalice).

i narafski, vrša opće nima veze sa špurtilon. ovo govorin sad odma  jerbo su sutra kapac počet govorit da je vrša špurtil jerbo ka špurtil jema bokun mrižice na bokun štapa.

ma mislin se, zapravo, a zaradi čega opće tumačit riči ovoliko detaljno ovod, a? sebi se čudin otkud mi višje pacijence...

ovo je dosta, kome je kjaro kjaro je, a onome kome ni ni. i oni ča mu je kjaro će brez problema razumit i pismu, a oni ča mu nije kjaro neće razumit njanci rič.

finito... dobro jutro, dan je odavno počeja, guštajte!