e...

dakleM, još uvik dura natječaj za profešure stranih jezika, arivaju CV. stiglo je dosta vrlo kvalitetnih CV-a judi ča su naveli da su profešuri i one najbolje ću zvat na razgovor. ne moraju svi ni bit odma pozvani, zvat ćemo po potribi.

e, sad gre druga strana medalje:

nevjerojatno je, pak, sa koliko bahatosti i bezobrazluka se na natječaj javljaju apsolventi ili pak oni ča nisu njanci pomirisali filozofski fakultet, ali eto, oni misle da to znaju, promovirali oni sami sebe.

zaradi takvih moran JASNO reč:

1. svi oni ča su naveli da su apsolventi su u jednoj kuverti i to zaradi tega da ih slučajno ne falijen zvat ako ikad diplomiraju.

ni jedan apsolvent nikad nije radija u moju firmu profešurski, a ni inđinjerski posal, a boga mi i jočiju mi neće dok je moja malenkost živa. ove ča sad ovako drsko i bezobrazno navaljuju ovin puten obavištavan da su šansu koju bi eventualno jemali poza diplomiranja za Parametar doo upravo ovakvin bezobrazlukon izgubili.

sramotno je i ča ti apsolventi sve navode di su dosad radili (i po državnin skulama i institucijama), a kroza to vrime su judi ča su finili faks brez posla. sve to more u "zemlji znanja". SRAMOTA! narafski, to je sve pod pokroviteljstvon dvojca : Primorac - Sanader, tako da znate svitu moj, e... njima i ova beleca radi u državnu skulu. još uvik, e... ta skula je za one ča još nisu otkrili u zrinsko-frankopansku, e...

2. stalno mi se javljaju i oni ča su navodno studirali i diplomirali vanka, ali nisu nostrificirali diplomu. ni to ne dolazi u obzir.

3. stalno se javljaju i novinari, ekonomisti i sl. ni takvi nam sad ne tribaju, u natječaju jasno piše PROFESOR stranog jezika.

4. javlja se cila rvacka, a u natječaju jasno piše da oni ča traži posal triba živit u gradu SPLITU ili eventualno tot blizu Splita.

e sad, je li ovaj svit misli da san ja rebambljena peršona pa da ne znan ča tražin ili ne znaju ča će o' dosade pa se javljaju na svaki oglas koji vide, a?

ovako: niko ko nije bar PROFESOR i ko ne živi u SPLITU ili okolici i ko nije hrvatski državljanin i ko profešur nije posta u HRVATSKOJ neće dobit posal. friga mi se za vaše ćaće, matere, suside, partije, veze i ne znan šta sve ne. mi ovod živimo o' svoga rada i upravo zato će bit jušto ovako kako je određeno o' moje strane i nikako drugovačije, e... i kako je po zakonu, e...

e...

evo jedna šetimana autoškole oli skule za naučit vozit tonobil je iza nas, sutra nećemo jemat, tako smo dogovorili s našin predavačon. kakvi su mi prvi dojmovi, a?

aaa bilo je sriće. svi u učionici jemaju 30+.

* nima mularije ča čini nered i uncutarije.

a kako svi jemaju 30+, a?

muškići jemaju prednost pa:

- šjor predavač jema 35 godin (kako ovo znan, e, neću van reč, sve se dozna kad se oće, ali nismo tega šjora pitali, ma ke, e...)

- moja malenkost 34

- simpatična kolegica ča isto uči 32

i to je to, finito, nima višje.

eto, izabrali smo lipi termin kad su judi još na urlapu pa sad

* jemamo praktički privatnu poduku.

to mi je ludilo, kako se i ja bavin podučavanjen u mojoj firmi, jako dobro znan da stvari po pitanju podučavanja najbolje funkcioniraju kad jemate do 5 svita za ih čagod naučit (ja radin matematiku, fiziku, letriku - cilu grupu predmeta, informatiku - određene predmete).

ajmo ča dalje.

* učionica je ok.

jema klupe, katrige, sve je šesno i uredno. jema ploču, maketu raskršća oli raskrižja, prometne znakove, laptop, projektor, klimu.

* blizu mi je.

* čovik tumači sa pacijencon, pomalo smo sve pametniji po tom pitanju.

* zasad jemamo 2 libra, jedan u koji puno tega piše i drugi sa ispitnin zadacima.

štagod o' ispitnih smo već i probali raspetljat, nije sve ispalo 100% točno, ali niko se nije naučen rodija,

* pomalo gre naprid i mislin da je dobro.

mislin i da mi dosta pomaže moja teknička struka.

narafski, čovik je i sa 34 odgovorniji vengo sa 17 godin  (ako je normalan), pa mi se čini da je to zapravo prednost, a ne nedostatak.

e... da vidimo ča je novi kodak, opisan u prošlon postu, uvatija pozapodne...

ovo je na merjanu i ovo su tek prvi pokušaji, nije savršeno, ali more stat :O)

malo mora na mom dlanu by XVII

uštekajte i zvučnike :o)

e...

stvari nisu za vičnost. jedan bokunić je partija na mon kodaku o' svega 2.0 megapikselića i rekli su mi da se to ne isplati popravljat. njime je bila slikana većina slika na ovemu blogu koje potpisujen (neke su bile slikane i aparatom s filmom, davno) i koje su se svitu dosta svidile..

danas se vazeja novi aparatić. jopet jeman kodaka, ovi put:

KodakEasyShare C360

jema 5.0 megapikselića. sta mi na dlan i nije puno težak :o) (to mi je važno jerbo mi borša ionako puno piza). odma je posta jubav moja, oduševija me. more se i filmić učinit njme. doša me je 999 kn, ali žensko ka žensko, moran uvik i još nešto kupit. nisan ništa nepotribno, pazin ja na svaki šold jerbo mukotrpno za njih radin, e... i nije mi opće teško mukotrpno radit, ma ke. teško bi mi bilo da je drugovačije, e... gušt mi je prihvatit izazov, radit, zaradit i živit o' svoga rada. to nije sramota. sramota je samo ča je u ovoj bidnoj zemlji sustav vridnost iskrivljen pa se veličaju lupeži, kurbetine i slične vrsti. fala bogu, nisan lupeška čer, nisu mi ni ćaća ni mater opljačkali ni banku ni koji škver, a niman namjeru ni ja, e... radin svoju struku, vodin tvrtku, rade i drugi judi u mene pa i zaradimo. moren objasnit odakle mi svaki šold i di mi je otiša svaki šold. tako bi triba svaki čovik u ovoj zemlji moč, a da je država normalna onoga ča to ne more bi stavila u pržun.

vengo, ča se još vazelo, a? a još jedna kartica (dobra mi je i stara, ali neka jeman lipo još mista, uvik nešto slikajen, a mislin poč i na još nika draga mista ovih dan pa će dobro doč, e) i boršica za novi aparatić, e... boršica (lowepro) je odlična, jema i malu kabanicu ka zaštitu kad pada kiša. tako san u kodak centru ostavi 1207 kunića. baterije i punjač su o' staroga, moglo je tako.

e...

jema jedan Grad ča ga puno volin. nismo se odavno vidili, proćakulali, rekli jedno drugome da se jubimo. počeja mi je toliko falit da mi je višje došlo ugrist koga.

zaradi tega u subotu (moj prvi slobodni dan ovo lito) u 6 uri ujutro sidnen u autobus i via Zadar , moj rodni grad. to vam je najlipši grad na svitu poza splita.

odma vam moren reč da je jednodnevni izlet iz splita u zadar dosta složen i da je bolje poč autobuson vengo tonobilon; put dura, a nije lako ni vozit simo tamo 6-6,5 oli 7, dikad i 8 uri, kako se potrefi konfužjun na cesti. jednako vrimena se potroši i autobuson, ali te drugi vozi. za poč i vratit se van triba oko 200 kunića (po skoro sto u svakon smjeru).

znači, Zadar.

grad ča je bija glavni grad dalmacije (tot se dalmacija i danas itekako ćuti, riva je kamena, nikakve čevape nisan vidi, a ni jednu cajku mi uvo nije čulo. ne kažen da nima i tamo tega, ali nije viđeno o' moje strane), grad košarke, grad bogate sveučilišne povijesti, grad povijesti općenito, grad di sunce najlipše na svitu gre leč, grad di more svira najlipšu mužiku.

domaći rad: proguglajte i nađite o starosti samoga grada i  sveučilišnoj tradiciji.

odgovori: grad je star priko 3 000 godin (ričima: priko tri iljade godin), a sveučilište je prvo na tlu hrvatske, priko 600 godin.

znate ča ću vam reč svitu moj. ove monade ča se događaju splitu (riva, marmontova i sl.) bole svakoga čovika ča istinski voli split. puno je to grubo gledat. u zadru nije tako. taj grad je svaki put kad ga vidin sve lipši i lipši.

evo kako je bilo jučer, uvećava se klikon:

pjaca

kalelarga

XVII i sv. donat

XVII i (kamena) riva

kopnena vrata

sv. stošija

trg 5 bunara

foša, heh, odakle je ovo slikano, a?

obid, restoran noštromo, blizu vruljice, za +5

sv. marija

XVII i morske orgulje

e, ovod more čini najlipšu mužiku na svitu

jučer su mi zadrani rekli:

"a ča je splićanko,

ostavija te split brez

rive pa si došla guštat u zadar, a?"

dakleM, za sve one ča ne znaju: riva je kamena. oduvik. to u dalmaciji triba bit tako. prije vengo učinite još pi*darija po splitu pođite u zadar vidit ča je to riva i kako to izgleda kod normalnoga svita.

narafski da se i banjalo. tri puta u more. a neću valjda bit na moru, a ne obanjat se, e... a di je ovo, a? e, pa nije borik, to zadarski znalci odma vide, vrimena za poč u petrčane oli u nin, nažalost, nije bilo, a za preko pogotovo. u subotu je narafski na kolovare konfužjun. na rivi se svit banja u svih 16, ali nisan ni tot. e pa di san, a? zadrani su su skontali, za ostale sumnjan. za ovo nač triba zadar znat ka svoj žep, e... evo ću van ipak špijat: o' ispod elektre, e. e tot je, e... nije bilo loše s obziron da mi je dan bija o' puta cili dan i da je tribalo učinit masu litrati, a guštat i zadar cili, a ne samo more, e...

kamen, ah kamen, za kamenom mi duša čezne

ovo se već pripreman za nirvanu, zalazak i orgulje, nešto ča je nevjerojatno. kažu da je zadarski zalazak najlipši na svitu. jučer ga je stotine furešti slikavalo kraj mene. svit je ushićen, kako zalazi samo viču: uajme, uajmeee lipote. na svin jezicima svita. crni, bili, žuti. došli su iz svih krajeva svita da to vide. a tot su odma i morske orgulje. dakleM, ovo je nešto šta morate doživit. zaradi tega, pravac zadar.

zaradi ovega litrata me tokalo trkat

na bus za split, ali vridilo je. jerbo, mirita, a?

znači oboreni su svi rekordi, o' rive do bulevara za manje o' dvadeset minuti. na noge, narafski. jo, ča su mi zadrani vikali puten: a ča je splićanko, trčeš doma, a di ti je priša, a? a meni stvarno nije bila psihička priša, zadar toliko volin da bi zaradi njega split moga bit i ostavljen na nikoliko dan. vengo, tribalo je uvatit taj vražji riječki, e... a riječkome opće nije bila priša. najprvo je bokunić okasnija, a onda je umisto u 9 manje kvarat krenija poza devet. u split me je doveja u ponoć manje kvarat. zaradi njega se nije uvatija aparaton osvitljen most, ali pomalo, jema dana, narafski da ću u ZADAR poč i jopet.

lipi moj grade, uvik te se sitin.

ovako svitu moj, ovo je tek kraći izvještaj. više litrati jema ovod:

http://www.flickr.com/photos/xvii_st3/sets/72157601665666918/

svaki morete uvećat klikon. potpisujen sve osin ovih na kojima san ja. ispod svakoga piše ča je to. na stranicma www.zadar.hr jema i bokunić povijesti. narafski i drugih korisnih informacija.

sve morete vidit i ka slideshow ovod:

http://www.flickr.com/photos/xvii_st3/sets/72157601665666918/show/

žalosno je odit po svitu, proučavat indiju i kinu, a ne upoznat najprvo ono ča ti je na tri ure o' doma, e...

meni je jučer bija jedan o' lipših dana u životu. nadan se da ste i vi guštali.

ekola, gren ča, jemate pozdrav!

ovo će poč i u :

http://xviiskitnje.mojblog.hr

-------------

još jedan adres: http://www.infozadar.net/

povirite i ovi: http://www.tzzadar.hr/

e...

dolazi lip dil godine, pa bilo ovo sad, bilo ovo prima deveton, deseton misecu. konfužjun o' furešti će mrvu laškat, urlapi (godišnji) će finit, dici će počet skula. u 9. misec mi je uvik mrvicu manje posla. sve ovo skupa znači:

- da ću se valjda koji dan uspit zaletit na mista koja želin,

- da ću plivat na kašteletu, ovčicama i kašunima komodno i neometano, dikad će mi bit i cila plaža na raspolaganju, ka šeiku, e...

- da neću čak i na merjanu pitat pošto kilo arije.

šta ću još probat učinit, a?

- a evo, širimo još jednu prostoriju za radit, pa to triba finit, a gips i pitura, špatule i pineli,  bit će podnošljiviji kad je mrvu manje vruće.

- ištekat ću klimu, još uvik san kontra tega čuda i duperan ga samo kad moran.

- jemat ću (bar se nadan) bokunić vrimena i probat ću pohađat/položit vozački kroza ove misece ča dolaze.

- probat ću obavit razgovore po pristiglim molbama i zaposlit još koga.

- probat ću osigurat još poslova iz ovoga šta već radimo i krenit pomalo u još neke nove stvari.

- probat ću skinit još kil dva, da bude ono, kako triba, sad je 165/65.

ekola, gren ča, triba štagod o' ovega počet sprovodit iz plana u stvarnost. jemate pozdrav!

e...

danas san kraj stare slobodne vidi velik i puno skupi tonobil. piza to čudo nikih 100 iljada. eurića, narafski.

u njemu su sidili čovik i žena. žena je bila sva otečena. o' suza, e... njen mi je pogled reka puno. nije joj niko umra pa da je zaradi tega tužna. nije joj se ni kuća užgala. taj čovik šta sidi kraj nje je zapravo čovik samo na papiru. suze su radi njega, divljaka. vidi joj se to iz pogleda, aha. ništa i niko tot nije umra doli nje, ali ona će i dalje tako. neće poč ča, ma ke. zaradi nekoga razloga (možda je to i skupi tonobil, ne znan) su joj draže nemoguće situacije s ton barabom, nego sasvim lip život sa nekom normalnom peršonon.

jema ovega u životu još. ljudi se upoznaju, ali ako se ne mogu nač na kraju se i raziđu. međutim, niki ostaju skupa iako i mala dica vide da nije dobro to ča im se događa. zašto? zato ča par para i u crnu goru nađe, e, eto zašto...

ova žena o' danas je očito par toj barabi. da nije, ne bi bila š njin. jedna je moja poznata uvik govorila da čovik more jemat jubavi i jubavi (ona nije virovala u samo jednom se jubi, e), ali da na kraju bude jušto kraj one peršone ča mu je par. to van oće reč: baraba barabi, kurba makrou, sponzoruša sponzoru,  žigolo sponzorici... 

jedan normalan čovik ča je iz poštene fameje i ča žive o' svoga poštenoga rada će narafski gledat kraj sebe jemat i jednu poštenu i urednu ženicu; en ti iruda, a neće valjda gledat jemat kraj sebe barabu, kurbetinu, sponzorušu, sponzoricu, pijanicu, narkomanku, kockaricu, ubojicu, lupežicu i sl. vridi i obrat, ženica - muškić, e...

ukratko: svaka teča jema svoje pokrivo oli svak je jušto sa onon peršonon ča joj je par po fizičkom izgledu, duhovnom izgledu, obrazovanju, materijalnim prilikama, itd., ako nisu jušto par, veza će puknit. ajde, tribaju bit barenko baren par ako ne jušto, e...

i još nešto, ne reče se brezveze: s kim si takav si.

e...

današnji foji donose ovi članak:

http://www.slobodnadalmacija.hr/20070822/biznis01.asp

muški su se svugdi utirali, istina.

u moje malo poduzeće, pak, većina je ženskih.

djelatnici u Parametar d.o.o. su ovi (ako otvorite njihove stranice, morete ih i vidit kako izgledaju):
http://www.parametar.hr/index4.html

sa ovim ženama danas, skoro tri godine poza početka poslovanja, brez problema odradin vrlo složene poslove ča pizaju iljade i iljade kuna.

trenutno jemamo natječaj, zaposlit ćemo još svita, narafski i jopet su po životopisima bile kvalitenije žene, a kako ja gledan kvalitetu CV-a i ča peršona zna radit, a ne ko jema pikicu a ko pišu, mislin da ćemo i jopet vazest višje žena vengo muških.

ka žemsko je moja malenkost odila u elektrotekničku skulu i na elektroteknički fakultet. ocjene su mi bile puno bolje vengo većini muških kolega; dapače, mnogima je moja malenkost pomagala i posuđivala teke, bilješke. brez obzira ča se stekla i magistarska diploma, masu puti mi se dogodilo da mi otvoreno reču ne, nećemo vas zaposlit jerbo ste žensko, a ženske ne želimo. napominjen da radna mista na koja se apliciralo, a di su mi tako rekli, nisu bila ni terenski ni fizički rad.

jedan dan su me tako zvali iz instituta končar i molili da dođen na razgovor. znali su da zovu žensko.  razgovor je narafski bija u zagrebu. i narafski onda nije bilo dalmatine. znači cilu noć puta staron ceston, ono, u ponoći se ukrcaj, u 6 ujutro metropola. put malo žensko narafski plati iz svoga žepa. dođen ja u njih, diretur im je onda bija šjor Poljak, to van je još ka niki naš vlaj, odavde iz dalmacije i kad me vidija samo mi je "srdačno" reka: paaaaaaa vi ste ženskooooooooooooo! ne bi da bidan to nije zna dok je moja ženska malenkost bila u splitu.

poza tega lipoga razgovora mi je puka film. dođen na kolodovor i rečen:

- šinjorina, evo, ubacite me nekako u prvi bus ča jemate za split, dat ću van i duplo za kartu ako triba.

onda san 17.09.2004. učini vižitu bilježniku, sredi i svu ostalu kartušinu i evo, danas radimo punon paron; mi male žemske uz pomoć naša (zasad tek) dva šesna i vridna muškića.

ča ćemo sve još odradit priko ove tvrtke i koliko će se pinezi zaradit, tek ćete vidit. jerbo tek smo počeli, a jema još dana, e...

za koga se sve radilo povirite ovod:

http://www.parametar.hr/index1.html

nike od ovih na referentnu listu ne moredu dobit ni oni ča su (navodno) puno jači o' mene/nas. a kako ih ja jeman, a?

a našin znanjen i radon, e... većinom ženskim :o)

fala, beskrajno fala šjor Poljaku iz instituta končar, fala i svima ostalima ča me nisu tili zaposlit. zafaljujući vašoj "pametnoj" prosudbi danas jeman tvrtku. :o)

budite samo i dalje tako "pametni" pa ću jemat i još štagod :O)

e...

katrige, ovod spominjane, a na litratima prikazane, o' danas su konačno u mene.

drvene katrige se poza svih ovih godina našlo ispod ajdukovog stadiona, butiga se zove: DOMOOPREMA doo

ka ča vidite katriga je jednostavna, brez pliša, samta i ostalih gluposti ča se brzo šporkaju, stavili smo lipo na njih kušine. cina je pristupačna 225,17 kuna po komadu. jedino, nisu mi ih tili/mogli (ne znan točno o čemu se radilo, dali su bili niko obrazloženje, ali ko more sve popantit) prodat refužo. zaradi tega se sa te 4 katrige vazeja i stol koji eto nije bija puno skup, 637,38 kuna, to je ok.

još se stvari vazelo u njih, jutros su donili sve ča je plaćeno, a jedan bokun gre na način: izrada po narudžbi pa će to arivat za koji dan. to ćemo i platit naknadno.

intervencija je bila jedna i nije bila žestoka, onako, čisto malo podsjećanje da mi tribaju donit robu.

za nač najjednostavnije katrige i stol (koji nije bija planiran) uza njih potroši san vrimena i živaca koliko je opisano na ovemu blogu. pinezi opće nisu bili upitni, svo vrime ih jeman. eto, pa sad pitan sve prodavače o' mobilije koji ovako nešto nisu bili u stanju jemat u ponudi: JESTE LI NORMALNI?

eto, neka se zna koja je butiga jedina u splitu jemala i normalno prodala (uz tek sitnu intervenciju) ono ča se tražilo, a mislin da opće nije bilo prikovišje mudrolije sa moje strane, e...

priko linkova morete upratit koliko se godin ovo tražilo i šta se sve zaradi tega proživilo. od 1. miseca 2005. molin i priko interneta informacije o' katrigi. napominjen da se van splita isto odilo, to ste mogli pročitat. možda štagod jema i u dugopolje, ali poza kaštila mi se tamo nije išlo. rečen sebi: čekat ću oću li šta nač u splitu i eto, konačno su tot.

e...

za kurjože: narafski da jesan, upisan je taj vozački. nije se uteklo, ma ke, e... :o)

stvar je zapravo volje. kad nešto odlučin, onda to i napravin. sad se krenilo u to i nima povratka. uložit ću  volju i trud i virujen da će bit dobro. :o)

pita me nikidan psihologica na to pregleda za vozački da je li pušin.

- ne više - govorin joj ja.

- a pušili ste? - ona će meni.

- e, jesan, puno godin, mlado ludo, a šta ćete - skrušeno ću. :o)

- i kako više ne pušite, a? - sad je već kurjoža.

- lipo. jedan dan mi je dosadilo i rečen više neću pušit. poza tega se njanci jedan španjulet nije zapalija - objašnjava moja malenkost puna sebe.

- samo tako? - ona će.

- e, samo tako. ne pušin već godinama. stvar je volje. jedino, tu volju triba jemat, to je sva mudrost - završin ja, a samo u sebi na brzaka promislin: jo ča me bolija drob tih dan dok nije fermala nikotinska kriza. zaradi tega ću realno reč, opće nije lako prestat, vrag su španjuleti, volja ti triba bit baš jaka i dobro promisli oćeš li je jemat kad počneš fumat, e...

- vengo, a je li vi pušite, a? - sad pitan ja.

- a jesan - skrušeno će sad psihologica

- a ča ne prikinete, a? - jopet pitan ja.

- ma ne moren, nije to lako, e... -  još je skrušenija i prikida se psihološko ispitivanje. :o)

1:0 za mene, gremo ča naprid.

a one križiće i kružiće san joj napravi najprvo. i još san joj na pitanje činiš li malu potribu u postelju zaokruži odlučno NE. žaj mi je samo ča san tako odgovori i na pitanje: jesu li judi i svit općenito pošteni prima tebi? bilo bi mi draže da mi je tot odgovor bija DA, ali ča ćemo kad nije, a ne moren lagat, eto...

a likari? a ništa  tot je vid, tlak i tako to. i tvoja ti doktorica mora još napisat da nimaš duševnih, kroničnih i zaraznih bolesti, e... (kad je tako sad se pitan: a odakle ovoliko imberlanih na cestama, a? jesu li svi ti ča sataru i poza tega uteču jeftino vazeli vozačku u "profešura" ljube, a? na pazaru o' ispod banka?)

eto sad znate kako izgleda pregled u likara za vozački. to me došlo 350 kuna. platila moja tvrtka, fala joj. :o)  platila je i tečaj, ali kako tot dođe i još nikih dodatnih plaćanja i taksi, najbolje da na kraju napišen koliko to sve piza, ali mislin da to morete nać i na svakoj stranici o' koje auto škole oli skule za naučit vozit tonobil. sad moran učit i pomalo, niko se nije naučen rodija. a kad se bude to sve skupa vježabalo po ulici najbolje van se narafski sklonit na sigurno dok ne uvježban :o) jerbo, šta je sigurno, sigurno je, e...

narafski, danas me sa puno volje tokalo odradit još sto i jedan posal.

tako bi mi naprimjer ovod spominjane katrige sa ostalin naručenin tribale arivat sutra. zasad je upotrebljena taktika ženski jezik, ali u manjin količinama. e, sad čekan sutra samo tako da vidin je li današnji poziv bija dosta ili će još tribat ladit zube. o svemu ćete bit na vrime obavišteni. ma vidi, vidi ča jeman i za te katrige volje, a? koliko to već dura, asti sto... u drugon gradu po veličini u rvackoj, e... svaka čast butigama o' mobilije i njihovin vlasnicima. volje jeman, a neću jemat mira dok mi te katrige ne budu točno di se odredilo, e...

a da van pravo rečen voljon san:

- kraj imena pribilježi dipl. ing. i mr.sc., (na spliskon fesbu mi je narafski bila potribna poveća količina volje)

- otvori moje poduzeće (uajme, koliko kartušine, koje monade za sve to, sad su samo mrvicu pojednostavnili, ali i to je nešto u ovoj bidnoj zemlji)

- napravi o' njega firmu za koju danas mnogi žele radit (evo natječaj ča dura, stižu životopisi i stižu),

itd... jema još puno stvari koje su učinjene voljon ili ću ih učinit voljon. voljon ću ovod još reč i ovo:

materijalno mi ne predstavlja (skoro pa) ništa u životu. ono, da se jema stvari koje su potribne za normalan život. tonobil (oli auto) me nikad nije posebno privlačija, živin i radin u centru pa mi nije puno ni tribalo, ali evo sad gren u to zaradi posla.

jedina materijalna stvar koju istinski želin, a niman je Brod. e voljon ću i za Brod zaradit. duboko virujen u to i bit će.  :o)

a sad gren ča, sutra je novi dan, toka me radit, svaka čast svima koji su jemali volje pročitat ovi poduži post. jemate pozdrav!

e... sutra ću učinit nešto čemu dugo dura moj otpor.

eto, ne opiren se više, pa likujte svi vi ča ste mi govorili da je to tribalo odavno učinit, da kako mogu ovako, itd.

po količini likovanja, znan, najviše će likovat moj ćaća.

poza njega će doč na red moji najdraži, najpametniji i u svakom smislu najbolji bivši, sve jedan bolji o' drugoga, e...  (je li vidite da počinjen veličat bivše, a? e pa ako niste znali to vam je moderno, niste faca ako to ne činite,  to se mora činit, pa evo počet ću i ja - nemojte samo ovo svatit ozbiljno),

poza tega će doč na red narafski i moji kumpanji (no ipak ne svi, hehe), a i zaposleni (iako i među njima jeman kumpanje, to se meni isprepliće). neke san trefi i danas u gradu i likovanje su već sasvim uspješno obavili.

dragi tata i ostalo društvo, je, jemali ste prav, to je stvarno tribalo odavno učinit,  evo je li vam sad srce svima veliko, a? :o)

a ko će to platit, a? e pa ja. nikoga narafski nećemo za to pitat pineze jerbo XVII radi i zarađuje pa će ovi poduhvat samostalno financirat. draže bi mi narafski bilo upisat doktorski studij, ali eto, mora se i ovo pa kad se mora nije teško. narafski, isfinancirat ću i poduhvat ča će slidit iza tega, ali pomalo, nije nigdi priša, e... step by step :o)

dakleM, sutra ću konačno upisat vozački. preglede u likara se prošlo prošlu šetimanu.

eto, pa likujte, hehe, moran jerbo jeman sve manje i manje vrimena i višje ne moren ovako, ali da nije vražjega posla ne bi ja još, e.... :o)

e...

jutros poduke. ulažen naljudske napore da jednemu malome nešto stavin u ćivericu. barenko nešto. tolerancija mi je i višje vengo ogromna oko tega. da ovoliko ne volin dicu, poslalo bi se sve kvragu. najozbiljnije, e... bilo bi: murter, kapa na ćiverici, očale na joči, tunja u ruke, more i ja.

-----------------------------

poza te poduke je bilo nešto puno lipo. a šta, a?

konačno san vidi uživo ovega šjora.

prvi put u životu.

moran van reč da je ludilo, jema stas i mot.

joči su mu ka More.

a jeman i dar o' njega, e...

darova mi je osmijeh.

sad san najbogatija peršona na svitu.

e, 'ben ti kilometre ča nas dile.

---------------------------------------

stavit ću šugaman u boršu i gren se malo smočit. to mi je ritki odmor ča ga jeman ovih dan. sutra mi je konfužjun kronikus, a izleti još uvik čekaju. ma mora doč i to, bit će, e...

guštajte nedilju  svitu moj, e... želin vam lip dan!

"moja jutra

tek uz tvoja

nose dan..."

vers by daleka obala

evo kad me već i danas toka radit, barenko da malo ulipšan dan kojin lipin verson.

frane by XVII

e... ovo mi je aparat peška večeras, pri povratku sa banjanja.

ovo je ovod, u split, crikva svetoga frane. to vam je tamo di počinje Matejuška.

Matejuška. jo, ako rečen tu rič, morat ću ih još puno notat ovod, a oni ča ne zna ionako neće nikad razumit, neće mu bit kjaro, nikad neće svatit.

nikad neće znat ča se to znači dogovorit kod svetoga frane, pa onda proč priko Matejuške, trefit kumpanje, sist na šentadu, reč koju splisku rič, vidit koju splisku čunku, potegnit cimu, skočit priko tuđe prove čisto iz đira, čekat da ribari popi*de.

tako je bilo osamdesetih; sve je kod svetoga frane i na matejušku bilo puno ka šipak; danas je, pak, sve otišlo u prdac. puna je riva nikih furešti ča bale rvacki, ali ne znaju ča opće oće reč rič split, ne razume split. višje ni riva na rivu njanci ne sliči; osta je još sv. frane, matejuška i bokunić duje ča viri i gleda u nesriću, gleda u ono sramote ča su nan one kakice o' judi učinili. rekli su nikidan u foje da će ona višala ispilat i bacit ih ča u more. ma nisu još. da tu monadu vide naši stari, u grobu bi se privrnili. a je li ovi bidni grad zaslužija takvu rugalicu, a? mirita li to, a?

bale pravi furešti, oni iz stranih država, ingleški, francuski, razumin štagod. jedna ingležina govori drugoj kako je bila ovod, prije ove "ušestane" rive. ka da jema temu pet godin i kako je ovo ča je učinjeno uništilo vizuru jednega grada ča je jema šarm, a sad ga višje nima. i ka da je puno rastužilo to ča vidi.

asti gospu, dišperana je ingležina, a ča ću ja onda reč, a? ovo je moj grad, mene toka tot živit i svaki dan bit sve veći furešt ovod, e... a to je ono najgore ča te more strefit. bit tot, bit blizu, a bit puno daleko. moje srce je u dalmaciji, a nje jema još samo na moju Matejušku, tot iza sv. frane. drugo je zasad, dok ta višala ne počupaju, strašno, užas, katastrofa, smak svita, e... da rečen zemljo profudaj se.

kad prođen priko Matejuške suza dođe na joko, sitin se rane mladosti, kumpanji, ajduka, svega. odma mi dođu u sićanje i bače, sve ure provedene tot, sve briškule, trešete.

malo koga danas trefin (jesan kumpanja kumpu nikidan na merjanu da ne lažen, e, govori kako triba vazest bokun broda; e, a triban i ja govorin, e), pari ka da nan je neko istrgnija kartu iz ruke, vazeja svoj, za nas niki čudan lapiš i prikrižija sve naše spliske punte. izgubili smo utakmicu, a ni ošervali se nismo.

dere se cajka na svaki kantun, splisku rič i pismu svićon tražin. smrdi (neću ovod duperat riči -grubo vonje-, gren reč baš smrdi jerbo je jušto tako) sve na niku gnjilu spizu, a ne moš nigdi nač vonj gradela, ma šta gradela, nima njanci manistre na pjuvaku, eto, tolika je mižerija došla. ona o' nestašice spliske riči, spliske mularije, spliske uncutarije. nije mi obid bija danas loš, juva, pohana kokoš, kumpliri, pomidore, čikolata, ali ako me razumite, a to će poč za rukon samo onemu ča je ovod resta, duši mi fali malo onega mota i đira o' osandesetih, a i o' još prije, e... ono, kad bi ubija uru do dvi o' frane do fife i to samo da se javiš svima dragima, e... da rečeš: evala kumpanjo, kako je, kako život, jema li ča novega, a? kako dica, kako punica? kako kupus, kako karota? oćemo se poslin vidit na obojenu, a? pivat će ban večeras... itd.

ekola, gren, oni ča nije ovod proveja mladost, nije razumija njanci rigu, znan.

a ča ćemo, devedesete su poseljačile split, o' tad je pun škovaca i kakice i sve manje mota jema. pari mi se da će se teško rekuperat, e...

gren ča, gren jerbo boli. puno, e...

jemate pozdrav! litrat moret uvećat klikon. za grad, za sićanja, za jednu mladost, e...

13 razloga za adio - nastavak

tekst o' jučer ću sad nadopunit da bude primjenjiv i na muške razloge za adio.

e... danas me je jopet tokalo čut jednu puno grubu životnu štoriju. zaradi tega ću ovod probat notat ono šta sa 34 znan.

razlozi kad je potribno pokupit tunju:

1. tuče vas, fizički je nasilan. priti vam. je li se "velika srića" možda krije u batinama i bubocima, masnicama, a? koja to normala peršona voli? to je fizičko zlostavljanje.

žene su manje sklone fizičkon zlostavljanju, ali jema i ovega, pa ako vas žensko gre tuč, satrat tonobilon, mlatit čekićen i sl. pokupite tunju.

2. vriđa vas, omalovažava vas, sve vaše po njegovin ričima ništa ne vridi, o' fameje i svojte, posla, obrazovanja, imovine, pa do glasa, stasa, maje, vešte... to je obično kompleksaš, brez jubavi u ditinjstvu, s velikon potribon da se i sam na nekome iživljava, pa će sad na vama jerbo, jelte, za ništa drugo (recimo poč branit zemlju kad je potriba oli vridno radit, štagod izumit i sl.) nima muda. ovo je emocionalno zlostavljanje.

ovemu su žene sklone, znaju vriđat i emocionalno maltretirat peršonu sa kojon su. ništa njegovo ne valja, ne valja mu posal, fameja, stas, glas... pokupite tunju, nima tot sriće. meni je recimo momak kojega volin (kad nekoga volin) najbolji na svitu. prihvaćan mu i glas i stas i posal i takujin. ne omalovažavan ni njega ni ništa njegovo.

3. vara vas oli trči kurbetinama. ovo ne triba komentirat. osin "velike sriće" tot je i dobra mogućnost za ulovit sifilis oli sidu. varanje je najmižerjastije ča čovik u vezi more učinit. tin činon pokazuje da ne poštuje ni sebe ni peršonu sa kojon je u vezi.

isto ovod vridi i za muške, ako vas žena vara nije dobro, bižite dok je na vrime.

4. spominje bivšu/e svaku uru vrimena i nima namjeru prikinit dizat je/ih u nebesa. šta vi tot onda opće predstavljate, a?

5. traži o' vas pineze, obično grubo i ucjenjivački, a more radit i zaradit. to je financijsko zlostavljanje, osin ako peršona dobrovoljno ne sipa pineze. međutin i ovo drugo je jadno, e... jadne su sponzoruše, ali još gori mi se pare žigola.

isto ovod vridi i za muške, ako vam žena samo čiča pineze, ako je nije briga kolika vam je plaća i je li se nešto more o' te plaće kupit, vengo vazimlje najskuplje u butigu i friga joj se ča će sutra bit, jemate posla sa peršonon koja vas sigurno ne poštuje i koja vrlo vjerojatno nima sve daske u glavi... bižite.

6. karta (oli bilo koji drugi oblik kocke npr. trče u kladionice), loče, drogira se. mislin da ni ovo ne triba posebno komentirat.

jema ovega i kod žena, pa muški, ako je tako i ako nima mogućnosti za bolje na vidiku, bižite, šta drugo reč, e...

7. maltretira dicu ako ih jemate oli ako ih neko od vas dvoje jema iz prethodne veze/braka. neki psiholozi kažu da je to prvi znak da jema drugu, pa sad, žene drage, promislite malo je li mu kolet vonje na ženske parfume i kolonje.

mater ča maltretira dicu, oli općenito žena ča maltretira dicu je nešto tako mižerjasto da neću njanci komentirat.

8. arči pineze u svih 16, a vama npr. ne da da o svoje plaće dici kupite njanci frute (voća). i ovo je financijsko zlostavljanje.

isto ka i kod suprotnog spola, financijsko zlostavljanje.

9. tira sve vaše poznate, ne da vam s nikin progovorit, đelož je na svakoga kome rečete i jednu jedinu rič. ovo je đeložina i to patološka, po meni također emocionalno zlostavljanje.

isto ka i kod suprotnog spola, emocionalno zlostavljanje.

10. trče muškima zaradi, jelte, pipkanja i štipkanja, e... nije heteroseksualan i vi ste mu samo dobra finta za svit.

ako žena trče ženama zaradi istega, onda joj je muško dobra finta za svit.

11. pinezi ča su mu u takujinu nisu stečeni na zakonit način. lupež, moglo bi van se dogodit i da završite u crnu kroniku š njin jedan dan.

jema i ženskih lupežica, vridi, dakleM, isto.

12. ne želi nikakvu pozitivnu promjenu u životu, ne želi ič naprid, o' života vam je učinja baru. ovo pari zanemarivo, ali razmislite, morete li tako? ovisi zapravo koliko ste ambiciozne.

jema i ženskih trajalica, ča se ne miču i ne mrdaju, dakleM, i ovod isto.

13. mamin sin. svačija mater je mater, ali materi ipak nije misto između vas dvoje. ne triba komentar, stvari tada već spadaju u domenu: bolestan čovik. možda š njin doživite i psiho brez filma.

mamina čer, tatina čer. zna i ovod bit bolesnih odnosa. manje često vengo u obrnutom slučaju, ali neće vam valjda njena mater diktirat život, ako se drugarica punica pača u sve i svašta, ni to nije dobro ka ni pačanje svekrve. vi bi tribali bit vi ka par, a vaši roditelji su vaši roditelji (sa obje strane). nikakvi incesti (ni psihički ni fizički, ni individualni ni grupni) po mom mišljenju nisu ništa normalno.

jema tega još, narafski. život mi je pokaza da kad se dogodi i jedno od ovega ča je navedeno ne more bit dobro. teško će se tovar/ica o' 30+ oli 40+ minjat. moš jemat ne znan koliko pacijence, ali ovo su krajnje ozbiljni pokazatelji da šjor muško (gospoja žensko) jema ozbiljnih problema i tunju je tot (ako baš nima nikakvih pomaka na bolje, a ni volje za to) najbolje pokupit. nima tot sriće, e...

jema još nešto ča je razlog za poč ča, to je nešto puno grubo i jadan ti je onaj kome se to dogodi o' partnera ma kojega spola ko bija.

to je RAVNODUŠNOST, e... gore o' bilo kakve mržnje. gore o' svega.

e... danas me je jopet tokalo čut jednu puno grubu životnu štoriju. zaradi tega ću ovod probat notat ono šta sa 34 znan.

razlozi kad je potribno pokupit tunju:

1. tuče vas, fizički je nasilan. priti vam. je li se "velika srića" možda krije u batinama i bubocima, masnicama, a? koja to normala peršona voli? to je fizičko zlostavljanje.

2. vriđa vas, omalovažava vas, sve vaše po njegovin ričima ništa ne vridi, o' fameje i svojte, posla, obrazovanja, imovine, pa do glasa, stasa, maje, vešte... to je obično kompleksaš, brez jubavi u ditinjstvu, s velikon potribon da se i sam na nekome iživljava, pa će sad na vama jerbo, jelte, za ništa drugo (recimo poč branit zemlju kad je potriba oli vridno radit, štagod izumit i sl.) nima muda. ovo je emocionalno zlostavljanje.

3. vara vas oli trči kurbetinama. ovo ne triba komentirat. osin "velike sriće" tot je i dobra mogućnost za ulovit sifilis oli sidu. varanje je najmižerjastije ča čovik u vezi more učinit. tin činon pokazuje da ne poštuje ni sebe ni peršonu sa kojon je u vezi.

4. spominje bivšu/e svaku uru vrimena i nima namjeru prikinit dizat je/ih u nebesa. šta vi tot onda opće predstavljate, a?

5. traži o' vas pineze, obično grubo i ucjenjivački, a more radit i zaradit. to je financijsko zlostavljanje, osin ako peršona dobrovoljno ne sipa pineze. međutin i ovo drugo je jadno, e... jadne su sponzoruše, ali još gori mi se pare žigola.

6. karta (oli bilo koji drugi oblik kocke npr. trče u kladionice), loče, drogira se. mislin da ni ovo ne triba posebno komentirat.

7. maltretira dicu ako ih jemate oli ako ih neko od vas dvoje jema iz prethodne veze/braka. neki psiholozi kažu da je to prvi znak da jema drugu, pa sad, žene drage, promislite malo je li mu kolet vonje na ženske parfume i kolonje.

8. arči pineze u svih 16, a vama npr. ne da da o svoje plaće dici kupite njanci frute (voća). i ovo je financijsko zlostavljanje.

9. tira sve vaše poznate, ne da vam s nikin progovorit, đelož je na svakoga kome rečete i jednu jedinu rič. ovo je đeložina i to patološka, po meni također emocionalno zlostavljanje.

10. trče muškima zaradi, jelte, pipkanja i štipkanja, e... nije heteroseksualan i vi ste mu samo dobra finta za svit.

11. pinezi ča su mu u takujinu nisu stečeni na zakonit način. lupež, moglo bi van se dogodit i da završite u crnu kroniku š njin jedan dan.

12. ne želi nikakvu pozitivnu promjenu u životu, ne želi ič naprid, o' života vam je učinja baru. ovo pari zanemarivo, ali razmislite, morete li tako? ovisi zapravo koliko ste ambiciozne.

13. mamin sin. svačija mater je mater, ali materi ipak nije misto između vas dvoje. ne triba komentar, stvari tada već spadaju u domenu: bolestan čovik. možda š njin doživite i psiho brez filma.

jema tega još, narafski. život mi je pokaza da kad se dogodi i jedno od ovega ča je navedeno ne more bit dobro. teško će se tovar o' 30+ oli 40+ minjat. moš jemat ne znan koliko pacijence, ali ovo su krajnje ozbiljni pokazatelji da šjor muško jema ozbiljnih problema i tunju je tot (ako baš nima nikakvih pomaka na bolje, a ni volje za to) najbolje pokupit. nima tot sriće, e...

e... trčen zaradi posla cilo jutro.

toka me i pozapodne radit.

ajmo ča štagod dobro navit ovod da ulipšamo dan.

urban, guštajte!

moji pozapodnevni gušti

u more jušto 5 puti.

ma stvarno, ko ovo more platit, a?

ka ča vidite još uvik san na mistima di triba dobro znat plivat.

ovo je na merjanu.

na druge plaže ću pomalo, za koji dan kad konfužjun bokunić laška, e... jema i 9. i 10., a ako bude lipo vrime i 11. misec, e... :o)

brez mora ne moren.

koliko ovo piza, a? bit u moru barenko 6 miseci na godinu? recimo, koliko bi šoldi koji furešt mora dat za 6 miseci bit ovod, a?

onda, jesmo li bogatuni? ja jesan, a oni ča stoji doma i grinta umisto da pođe na more, e taj je najveća mižerija. i to ne ona u takujinu, vengo ona u ćivericu, a toj teško jema pomoći, e...

juuuuuupi! veselin se ka malo dite.

finija mi je obavezni dil posla, sve je obavljeno i sad mislin ovako kako ću ovako nekako:

1. najprvo štagod dobro za obid,

2. najdrugo oli a poza tega:

šugaman, očale, šlape, kostim, more, sunce.

fjaka.

ištekan komp, isključen mob.

ko ovo more platit, a? eto zaradi čega ne živin u zagrebu.

u splitu jeman i posal i more. :o)

tek navečer će me tokat bokunić kartušine sredit. ma to je zanemarivo naspram svega ča se odvalilo ovih dan.

želin van lip praznik svitu moj, guštajte!

nikoliko litrati o' večeras s novog gata

Spljet by XVII

a ko je slika XVII, a? e, to nećemo reč, ali za ovi zadnji litrat svaka čast. kako je to samo uspilo, a? napominjen da je taj litrat samo mrvu izoštren i umanjen, te je dobija bokunić biloga ruba. znači, veliko bravo za ovo umijeće, hehe, eto, slučajno, ali ispa je ludilo :O)

sve morete uvećat klikon. kako mi brojač uvik pokaže najviše klikova na litrate na kojima san ja, puno višje vengo na ove di je split oli štagod drugo, zaključit ću da je svit dosta kurjož po pitanju mene. ne bi da spadan u filmske glumce, e... ma neka svitu moj, samo vi mene klikajte, morete me i komodno pofalit, morete me ogovarat, morete mislit di se vazelo ovu maju, di rebatinke, a di boršin, jesu li mi očale iste ka i lani, kad se bilo ošišat, je li mi koža ka u arapa, koliko jeman kili itd...  za one puno kurjože evo: večeras je kili bilo 65, roba se sva vazela u split (a šta ću, niman se kad ukrcat na vapor i poč do ancone jerbo radin po cile dane, ali bi rado, e), a očale mi jesu o' lani (nisan tarik da jeman iljadu pari, e). ovu koluru jeman jerbo san u moru o' 14.04. (u solarije ne gren, ma ke, šta će mi to, sunce i more i to je to, e). jeste sad manje kurjoži, a? :o)

gren ča, ludilo van je novi gat, povirite ga! nadan se samo da će mrvu bolje tašelat stari dil, oni tašeli ča su sad  i nisu baš na čast, e... recite poteštatu ako ga trefite, e...

pozdravljan lipo!

e...

ako mislite da je u inđinjera uvik najnaprednija teknika, grdno se varate. barenko kod mene nije. pratin tekničke novitade, čitan o nima. moran jerbo mi je to bitno za posal i zanima me i inače (da nije ne bi se ni bilo o' teknike), ali moja imovina ča spada pod tekničku/e robu/stvari, e, to mi je dobar materijal za notat štoriju komičnog sadržaja, e...

kad su se pojavili mobiteli, sve mi je to bilo simpa i cool ča bi rekli, ali moja malenkost je zaključila da to meni opće ne triba, a i da mi u svakon slučaju ne bi bilo drago da me svaki čas tin čudon moredu nać.

moje opiranje mobitelu je uspilo durat čak do godine 2000. - te godine je to već imala svaka baba ča prodaje kupus na pazaru iako opće nije bilo jeftinih. tada se vazeja moj prvi, maslinasto-zeleni alcatel koji me onda, te dviiljadite godine, doša iljadu i po kuna i odma mi spasija život jerbo je život XVII te dviiljadite donija jednu grubu situaciju. poza njega se prominilo nikoliko mobitela, ali nikad moj mobitel nije mora bit najskuplje ča jema u butigu. uvik gledan proč šta jeftinije, e... narafski to ne znači najjeftinije,  ali ne znači ni najskuplje.

niman komplekse manje vridnosti, tekničke san struke pa znan da vridnost teknike ne ovisi isključivo o cini; ne triba mi najskuplja teknika, vridin i brez tega...

na šta sad pričan, a? jeste kurjoži, a? evo, špijat ću van, sony ericsson, ma ovod smo ga  opisali, e:

http://xvii-online.com/1/o-umijecu-trgovanja/104141.aspx

virujte mi, taj mob je ludilo, ali masu mi puti dođe da ga bacin u more. život mi je bija lipši i mirniji dok nisu izumislili mobitel. mobitel olakšava poslovanje, ali ograničava mir i slobodu čovika. kako mi je ipak spasija život, ne znan baš šta ću mislit, more bit da su judi ipak to tribali izumislit, e...

ajmo ča dalje. kompjuter. virovali oli ne prvi se u mene vazeja tek 2002. (onda su ga već i političari jemali), a do te se godine puno tega na njega znalo, ali se vlastito računalo nije jemalo. bilo ih je dosta i na mom "omiljenon" fakultetu fesbu di je moja malenkost studirala, diplomirala, magistrirala, pa je ta moja malenkost zaključila da moren i tamo sve napravit i da mi neće to škatule zagorčavat i u kući život. monitor o' tega prvoga ča se vazeja 2002. još uvik jeman i duperan. u međuvrimenu se vazela nova konfiguracija, najobičnije uredsko računalo, ništa posebno. 2002. mi je kompjuter triba jerbo mi je tribalo magistrirat i radit puno uri na dan, a to se višje nije moglo na onima ča su na fesbu. zaradi tega se konačno popustilo opiranju. kako živin otkad jeman računalo? a masu puti mi dođen i da ga itnen priko ponistre, ali ipak, na njemu se učinija magistarski, njime zarađujen, priko njega (uz ostale načine) komuniciran sa ljudima. more bit da su judi ipak to vražje škatule tribali izumislit.

narafski, opirala se moja malenkost na isti način i digitalcu, klimi i svemu temu se na kraju popustilo.

jema jedna stvar o' teknike kojoj se opiren godinama. drugima je to izvor faljenja, vridnosti, time se potvrđuju, dokazuju i sl., brez tega ne postoje. ja ću se recimo rađe pofalit činjenicon da mi je magistarski rad ostvarija znanstveni doprinos oli činjenicon da mi za tvrtku radi dobroga svita, pametni, obrazovani, vridni.

ipak, život (oli sve manje i manje vrimena na raspolaganju) me pomalo tira da se popusti i temu čudu. nije mi baš pravo, ali morat ću. eto, šta je tu je.

je li ko pogodija šta  me sad toka, a?

hm? niste još?

a pomalo, strpljen spašen, sve ćemo vas obavistit kad za to dođe vrime, ne triba bit prikovišje kurjož, ne triba ni prišit, barenko ča se teknike tiče, e...

gren još stavit naslov. a šta ćemo? nešto pametno? ma je oću, pa ovo je samo blog, nije znanstveni članak. mogli bi onako, jedan ka u pučku skulu, ono ka, moj grad i ja oli lito i ja. dakleM, teknika i ja, e... 

ekola, gren ča, jemate pozdrav!

e...

evo me, tot san, notat ćemo rigu dvi. znači prekjučer se kulturno upozorilo, a jučer je bilo žestoko. grmilo je, sivalo je. puno, e... narafski, otkad vodin ovo moje firme već znan da čin je račun bokunić veći, monada se ne očekuje samo u nikon postotku vengo je i gotovo pa siguran događaj. recimo, rvacke firme će van još platit brez poveće muke (ovo oće reć da ćete isto uložit truda, ali nećete morat dušu ispustit) račune do 2 iljade kuna. iznad 5 iljada očekujte cirkus, iznad 10 i 20 pogotovo. dalje nećemo, to su (za osjetljiva bića) horor filmovi za naplatit se pa čak i kad tražite dil unaprid oli jemate mjenice i sl. ako ste iti malo osjećajni po tom pitanju i ne morete zvat dužnike za svoje pineze jerbo vam je to neugodno, nelagodno, straj vas i sl., butigu (firmu, obrt) ćete brzo zatvorit. ako to morete odradit, možda i morete vodit tvrtku. narafski, jema još bitnih stvari i momenata za bit poduzetnik, nije ovo jedina, e...

dakleM, kako cifra reste, morat ćete žešće vikat kad tražite svoje pineze. nije da baš volin, nije ni meni tutokompleto ugodno, bilo bi bolje da se ne mora, ali na to me prisiljava balkan. postoje doduše i druge metode, ja samo zakonite duperan (neke zakonite ću tek uvest), a ne tučen nikoga. metoda ženski jezik je među efikasnijima kad se radi o računima povrj 20 iljada. kod takvih računa druge zakonite metode nisu baš brze, a nezakonite ne duperan. dakleM, s obziron na situaciju i cifru, jučer je bija ženski jezik i to u gromoglasnon izdanju.  za  račun o' iznad 20 iljada kuna (nećemo sad reč koliko iznad jerbo je to ipak poslovna tajna) tokalo me duperat ženski jezik jušto uru.  i grmit žestoko. poza tega su pustili pineze na naš račun.

naplata je tek dil problema. emocija tot niman. oguglalo se višje poza svih ovih godina. pravo je čudo kad problema nima i kad sami plate brez da ih se na to podsjeća. moren se sitit tek ritkih koji su platili brez cirkusa. rastirat ove ča probaju bit dužni mi je dil posla ka i osigurat posal, odradit posal, platit ljude, sredit kartušinu i sl.

zaradi tega psihički tako moren i svaki dan. no, tilo ipak jema granice. uru vrimena derače ti iščiča bokunić force, e... jo, kako me jučer more ličilo. poza tega mi se javija kumpanjo, pričan mu kako je proteklo, sluša me, daje mi prav. govori : nima druge vengo borit se, e...  gospojama iz računovodstva pričan jutros iako su nešto već čule i jučer. govore mi: ma je li to u onih ča su im same kožne fotelje, a? e, gospe moja, tot di je prikovišje luksuzno triba bit posebno oprezan, e...  je, je, tako je tanja bila rekla kad je išla radit da su se puno uredili i ušestali, sve u luksuzno, a moja ih malenkost nije opće vižitavala, e... ne znan njanci točno di su, negdi u dujmovaču, ali ne znan točno di e... znači ovo je bitno pa ćemo ponovit: e, gospe moja, tot di je prikovišje luksuzno triba bit posebno oprezan, e... to vam je isto dobar savjet ako oćete krenit u posal. jema još stvari oko naplate, zapravo tribate na puno tega pazit, e... ako nekome triba koji konkretan savjet, more mi se i javit, pa ću probat vidit je li moren pomoć, a možda jedan dan i višje o temu ovod notan.

kad mrvu bolje promislin moren reč da je naplata u nas čak postala i dil koji nam je zabavan, oko tega čak napravimo i sprdačinu, virovali oli ne.

mi smo van ovod u ovi moj Parametar doo recimo već počeli razmišljat da triba otvorit ka niku našu malu internu kladionicu kad je dan koji ja odredin za istrirat one ča probaju bit dužni. (kažen probaju jerbo mi niko nije uspija bit dužan višje o' nekoliko dana, e..) onda svak predvidi za koliko ću ih uri natirat da plate i jemamo se na šta kladit. hehe... onda recimo, ča je kome moja malenkost rekla kad nije tija platit račun; niki su i proplakali, virujte mi, e... i nije mi ih žaj, njanci mrvicu, e... a te moje riči kojima ih se dovodilo do suza ovi moji u firmu još uvik prepričavaju ka dobre viceve.

itd

znači, sa 34 godine i ovoliko iskustva u naplatu gren ka da gren na kavu.  svaki put uspijen.  oni ča me proba zeznit samo izi kakicu. poslin reče sebi da mu to i nije tribalo, da je moga proč lišo da je jema pameti. ja mislin da ovi o' jučer još drže krpu o' kvasine na glavi. narafski, mogli su proč lišo, da su samo malo pitali po splitu kako se provedu oni ča probaju ne platit račun vašoj omiljenoj XVII.

narafski da je još poslova u tijeku tako da se mižerije ne bojin. (ovo je odgovor onima koji misle da tako recimo moredu izgubit stranku. a jeman i još bokun odgovora: ma zamisli? izgubit ćeš stranku, a? onda odma zatvori firmu. nije to za te, e... jerbo, firma jema samo jedan cilj: pripoznat priliku na tržištu i iz nje stvorit novo dobro oli zaradit pineze. tako piše u libre o ekonomiji. to nije humanitarna organizacija, u poslu milosti nima)

vengo, gren dalje, triban još nešto reč. ako mislite da je samo puno veselja kad grete nešto prodat, a da je kupit lako, grdno se varate. najprvo, kupit nije opće lako. čak i kad radite i kad lipo zarađujete. evo primjera.

sićate li se kad je ovo notano, a? zaradi ovega isto nikoga nije sram, narafski.

svo ovo vrime ja jeman pineze za te drvene katrige i gledan oću li ih di kupit. nima. u splitu ništa, van splita bi se možda nešto i našlo. pogledajte na koji je datum notano to na linku. tražin već godinama, gledan po butigama.

danas vičen jupi. kako je bila kiša i nije baš bilo za bananje, poza posla san se malo uputi u akciju švrljanja po butigama i sinjan na jedno misto stol i lipe katrige. drvene. uajme. nađen i jedan lipi trosjed. čak i jednu policu o' nikoliko škancija. konačno. poza svih ovih godina, traženja, nadanja, lutanja. a di, a?

tili bi odma znat, a? kurjoži ste, a?

e, to ću van reč kad mi dostave to, za koji dan. za sad činin kuco da se ne urečen. jedna o' tajni trgovine je i činit kuco u vrime kad triba činit kuco, e... ne moš uvik ladit zube. :O)

ekola, gren ča, za ovi put dosta. jemate pozdrav!

e...

ovako je to počelo prije jušto 3 godine.

od svega čega se dovatin napravin nešto prepoznatljivo, dobro. tako je i sa ovim blogom (brez ikakve umišljenosti, e).

danas ga čitaju prije foja, jema vižita i vižita, zaradi njega mi ariva tona poruka, mailova, pohvala.

fala svima ča su mi se na bilo koji način javili, fala svima ča su ga falili na radijo, u foje. fala svima koji ga vižitaju.

oćete i fetu torte, a? aaa nećemo ove godine tortu, štufa čovika uvik isto, e... ajmo štagod drugo. fruti o' marcipana, friško nađeni na ovi internet, mislin da ne bi tribalo bit loše, e... eto, pa mašite se...

gremo naprid, narafski, jerbo  jema se još štagod reč, fotografirat, nacrtat. pozdravljan lipo i gren radit, posal zove.

e...

bila je moja je moja malenkost sigurna da će svit pogodit o kojoj je visosti  ovod rič, ali da će to bit baš tako strelovito i brojovito ni se baš moglo pretpostavit.

nikoliko, pazi sad ovo, iljada točnih odgovora. o' nikidan, e... točnije 7553 (ričima: sedan iljada i petsto pedeset i tri)

nisu baš sve notali/rekli moji kumpanji, ma ke... nota je (reka je) to split.

stiglo mi je samo jedno pitanje.

glasi: ma slušaj ti draga XVII, pari mi se da znan o kome je rič, ali pomozi bokunić. je li ta lupeština o kojoj je rič bila u spliski škver, a?

i sad gre odgovor: narafski...

svaka ti čast grade, gađaš u sridu!

nastavak slidi...

zrake svitlosti by XVII, slikano nikidan, klik za veće

e...

ka da me prigazija vlak.

tako mi je uvik kad moramo brzo finit posal. jedan smo upravo uspili.

fala ti draga XVII na trudu i angažiranosti, fala ti na svemu ča si učinila da se to uspije finit...

ovo ja ovako mrvu sebi zafaljujen jerbo znan da niko neće.

gren ča. kičma mi igra na vatalo.

jemate pozdrav! sutra je novi dan pa ćemo (valjda) i štagod notat, stivat ovod. danas smo cili dan radili.

OBAVIJEST:

sutra zoven na telefon one ča mi još nisu platili račun, a morali su, pa im je najbolje da ujutro najranije prije vengo otključan ured puste virman na finu oli uštekaju internet bankarstvo. inače će takve tokat jemat posla sa ženskin jezikon a to van je puno gore o' muške šake, e...

meni niko nikad ne duguje i naplatit ćemo se i ovi put ka i svaki, a sad svitu moj mislite kako je to moguće, e... narafski ni ja nikad nikome ne dugujen. znači, platit račun i nima mudrovanja, e...

e...

jopet mi je danas do uva dopra tuđi razgovor. mora bit da stanovnici ovega grada stvarno vole bučno govorit.

kaže jedna peršona ženskoga roda:

- ne bi tribalo patit, ako se peršone ne slažu, ako nimaju iste poglede na život i svit, bolje se razić. zaradi čega bit nesritan, a?

na to kaže jedna peršona muškoga roda:

- a zaradi čega ne probat namistit jubav? naštimat nekako, a?

e... gospe moja, svašta. ajuto mama mia. ne bi da je jubav tamo nika vaza na škanciji pa ćeš je namistit, oli kakva vida da je naštimaš. gospe u kvadru ča malo ukrivo visi na zidu, možda.

najprvo bi tribalo reč i to za sve one ča ne znaju da je Jubav žestoko povezana s kemijon, a nje između dvi peršone ili jema ili nima, nešto između tot nima. u tu kemiju se svašta utrpa, kako kod koga, joči, pogled, stas, glas, vonj. neko ko nas privuče, drugome more bit bože sačuvaj. da bi bilo jubavi, triba bit kemije i ta kemija triba bit obostrana. jubav brez kemije je zapravo jubav brez strasti, a to je nešto mlačno i mračno i po meni se ne more zvat jubav. moš tako volit koju veštu, boršu oli kantunal, katrigu, a ne čovika, e...

nadalje, judi moredu bit i po dvadeset godin skupa, moredu se i poštivat, bit pristojni jedno prima drugome, opće ne bit grubi, ali da to nije to. reka bi karan: kad ti srce ne piva, e, to bi bila ta situacija. u životu je jema, a jema i  masu veza ča su iz interesa. kod mene nima tega, nisan o vrsti koja bi mogla bit sa nekin ako srce ne piva, pa o ovemu ne mogu i niman prav višje raspravljat, diskutirat.

duboko ću cili život (a i poslin) virovat da su moji momci bili kemijom privučeni meni i ja njima. s drugačijon pomisli ne želin živit, e...

ajmo ča dalje. more se, pak, dogodit da se judi opće ne znaju dugo, ali da kemije jema na mašure. nekoga moremo doživit ka nama vrlo blisku peršonu i za vrlo kratko vrime. jednostavno ćuti se je li se sa ton peršonon more razgovarat, moredu li joj se povjerit tajne (ne mislin sad na nike mračne, nima tega u mene bogu fala, ali svako biće jema niku malu, ljudsku tajnu), ispripovidit kakav nan je život bija prije vengo smo tu, nama dragu prešonu upoznali, ispripovidit kakav bi život dalje tili.

mišljenja san da dvoje judi moredu zajedno sasvin dobro funkcionirat ako:

1. jema kemije

2. jema volje za razgovor

druge stvari: materijalno, pinezi (ovo odvajan pineze o' materijalnoga jerbo se u ovu bidnu zemlju mislilo i promišljalo jesu li pinezi imovina paaaaaaaa), utjecaj okoline i sl., ne bi tribale bit prikovišje bitne. to se sve da savladat ako je/dok je zadovoljeno 1. i 2.

ako judi i nimaju iste poglede na život i svit, također. ajmo ča bit realni: ma di ćeš to nać peršonu sa ama baš istin pogledima na život i na svit, a? možda nije loše da peršone jemaju koji zajednički interes oli stav,  ali ona peršona ča voli i ne voli baš sve tutokompleto isto ka i ti laže ti ka zadnja kurba (skužajte na izrazu, ali baš tako) i to iz nekoga šporkoga interesa ili opće nima svoga ja, a onda je zadnja štraca (skužajte na izrazu, ali baš tako) brez stava, brez osobnosti.

jubav ne moš namistit, jubav ne moš planirat, jubav ne moš naštimat. ona te jednostavno strefi.

možda bi se tega momenta, tega kad te strefilo, e, tribalo sitit u onemu momentu kad dođe do karanja, koje grube riči, koje nevolje (a mora i do tega doć jerbo jubav nije jubav ako tega nima).

aaa koliko je već ovod rigi, a? morat ću ovo pomalo finit. za ovi put dosta. jubav je jedan vrlo kompleksan pojam, kemija tot izaziva mnoštvo reakcija, ne more to samo tako u jedan post i gotovo, e... tribat će se o temu i još štagod reć, ali jema dana.

jemate pozdrav!

e... u ritkin slobodnin momentima:

čitan:

Stendhal: Opatica iz Castra

slušan:

dobru mužiku, nešto je stivano i tot gori na play listu, uštekajte zvučnike, uprite u botun i guštajte

narafski, moran štagod i izist, a to je:

lipa dalmatinska spiza, danas nećemo stavit litrate da ne mislite da samo na spizu mislin, e...

banjan se:

još uvik di triba dobro znat plivat. nikidan se, doduše, povirilo i do kašteleta, ali konfužjun je tot još uvik prevelik.

evo jedan litrat sa mista di se triba dobro znat plivat:

More by XVII, klik za veće

o' crtarija i slikarija:

e, nešto činin i došlo se negdi do pola. kad se dovršin, stivat ću ovod, narafski. vezano je uz more.

kako ja? kako moji?

sve gre svojon regulon. znači zasad više-manje dobro.

pogled s balkona mi je ovakav:

Spljet by XVII, klik za veće

a za sve đelože ću stivat još jedan litrat slikan narafski s istog balkona pa neka i još pate:

Spljet by XVII, klik za veće

nadan se da je sad onima ča nisu bili kod mene kjaro zaradi čega je baš moj stan najbolji stan u cili split, e... a i unutra nije loše, dapače. kako je split najbolji za živit o' cilega svita (to vam je i šjor dioklecijan reka, a bar je on moga birat di će stat), ispada da san u najbolji stan na svitu. narafski da kad je tako da ga niko ne more kupit. neću valjda poč sa najboljeg mista na svitu, e...

narafski i posal mi je (skoro) najbolji na svitu, radin, rade drugi judi, radimo, zarađujemo. svak svoj dil posla. ugodni i kulturni judi, vridni, staloženi, pametni, obrazovani. to vam je u Parametar doo narafski. ovod smo notali rič skoro jerbo uvik more i bolje. ipak, ne žalin se, dosta to dobro gre, a meni posal ne daju ni partije niti šta mutin sa pricidnicma. naš rad i znanje i to je to. nima ništa drugo, virujte mi. sve je jasno, kjaro, moren za svaku kunu oli euro reč odakle je stiga, a isto tako i di su pinezi otišli.

sad pomalo gren ča, tribamo i danas nešto učinit apropo posla, a čekan i jedne vižite.

guštajte!

sritan vam praznik svitu moj! uvik more bolje, ali ipak je ovo rožefjori kako je bilo dok je dura rat.

ne da nan bog ponovo tega zla. jerbo, rat je među gorin stvarima koje moredu strefit čovika.

jemate pozdrav!

e...

konačno minut vrimena, evo, gren notat post.

znate ča mi je osmi misec, a? to mi je šlag na kraju ako radnu godinu promatran ka i školsku. zaradi čega, a? a zato ča uvik isti profešuri jemaju uvik istu dicu na popravni. i uvik ih moran spašavat zadnji čas. lani mi je tako dolazija jedan učenik na matematiku u osmi misec. naporima ča nisu za čovika ga škapulan. prođe razred. obeća mi je da će učit redovito  iduće godine. šta mislite, je li je, a? ma ke, ove godine jeman š njin radit i matematiku i fiziku. mora bit da me puno voli, hehe. narafski, jopet mu je kosa priko očiju i narafski da će se ošišat kad nauči (tako je bilo lani, bit će i godine ove, znan ga već u dušu, e). eto, tot san ujutro. formule, zadaci, akceleracije, sile.

svega jema oko tih poduka, nikad mi nije dosadno. (sad bi mi neko moga reč: ma ča se i ti sa svačin bakćeš, oli ti nije dosta vodit tvrtku, a? ma ke, nije, ne moren ja brez moga inđinjerstva, tot se uvik nešto radi, prčka, čeprka, e)

vengo, kad san već kod sile, sad mi je pa na pamet jedan otac o' nikidan. reka mi je da ča mu sina (to mi je drugi učenik iz druge skule) nisan dobro, pazite sad ovo, naklepala, natriskala. je, oću čovik moj, pa ne moren ja nikoga tuč, a pogotovo ne tuđe dite, e. niti moren niti oću. a šta da van rečen, čovik se naidija na svoga maloga i puno mi je zamirija ča san mu na plaćene 2 ure odradi još vrimena gratis, reka mi je da mu je tribalo naplatit dvi ure, a odradit jednu i dat mu dvi za uši jerbo da mu mozak jedino tako gre u dobron smjeru.

kad čovik radi s judima vidi svašta.

ništa me po ton pitanju višje ne more iznenadit.

barenko ne 99,9 % mogućeg. i nemogućeg, narafski.

e, da je samo ovo... jemamo mi još veselja ovih dana. to raspetljavaju ljudi, ali pačan se pomalo i ja u to. gre prima planu, ali i oko tega se ulažu nadljudski napori. da me za ti posal nije zamolija jedan moj internetski kumpanjo, teško bi se tega sad prihvaćali na ovi datum, ali eto, kumapnjo je kumpanjo, pa se  usluga triba učinit i sad smo tot di jesmo. radi se, punon paron i neka. oko tega san u cik zore i u kasnin noćni urama.

u druge ure me recimo morete trefit u računovodstvu, na pošti, na banku, na finu oli čut na tel., mob., mail, icq i slično. mislin malo i na druge firme, druge zaposlene i tako to.

jema li još koja urica, a? jema, narafski, ali to je rezervirano za More. vičnu, iskrenu jubav. jubav ča dura.

eto, kako je tako, ne sekiran se. neće uteć ni dobri judi ni dobra mista. dobri judi zaradi tega ča su dobri  ostaju tot i kad gre i kad ne gre; jemaju pacijence i kad je laganini i kad je konfužjun.

a dobra mista? to neće uteč nigdi, zašto bi? a di će? na loša mista? je, malo morgen, roge ćaćine, e...

oni ča nisu dobri judi uteču na prvi problem, ali i je bolje kad su već mućci i kukavice da ih vrag odnese, e... a loša mista? ma šta me briga za to, ja ću poč na dobra čin se rišin svih ovih stvari oko posla, e... barenko u 9. misec ako u 8. ne stignemo. planiramo nike baš lipe stvari i živin za to, to mi forcu daje.

ekola, gren ča, pozdravljan lipo! guštajte u godišnjen oli urlapu kad vam ga je bog da.

žunta: je li iko dobija barenko rješenje za ovogodišnje poticaje za poduzetnike  o' ministarstva gospodarstva? ako neko je, molim lipo da mi javi... baš me to zanima, pitan sve poznate, a niko još ništa oko tega nima, e... glavno da smo prvi kad tribamo dat u proračun. onda je velika priša. jo, da kojin slučajen ne dan u ti proračun, odma bi mi dva pulicijota arivala na vrata...

kartolina s mora by XVII, klik za veće