e... mrvu žešće.

daleka obala, prolaze mi godine

e...

libar: saša ljubičić - sandokane platit ćeš!

(pri samon san kraju, palac gori, dosta je dobar libar...)

filmovi:

1. borat (na ovo se još kidan o' smija)

2. babel (tek ću pogledat)

3. sherlock holmes: ubojstvo u visokom društvu (tek ću pogledat)

4. smrt alda mora (tek ću pogledat)

izleti, priroda, more:

niman pojma, možda sutra štagod bude, danas se ličin o' prehlade šta me čapala poza pustih godin.

radni i neradni dani:

petak - radni

subota- radna

nedilja - fala bogu neradna :o)

spiza:

uobičajeno, juva, pečena kokoš, mandarinke i tako to...

san o' noćas:

jednemu san šjoru ča me životno naidija odriši brod i primisti ga na drugi mul, pa neka se lipo misli di mu je imovina, neka ga traži, e...

je li ovo postajen dišpetoža, a? ma ke, to samo je san.

a koji je šjor, a? e, pripoznat će se taj već, e...

eto, sad sve znate. je li manje kurjožih, a? :o)

gren ča, jemate pozdrav!

poligon by XVII

učin, vježban, malo ovod, pa oko stadiona, a danas je bilo i jednom uličicom, tot uz stadion, di nije puno prometno - moja prva uličica :o), . autić? crvene kolure, koji? e, doznat ćete kad mi fini tečaj...

libri by XVII

oli 330+120 kunića, 330-rječnik, 120- ljubičić: sandokane platit ćeš, ovo san danas kupi, rječnik za posal, a ovi drugi libar za privatni gušt. poza ovega je najbolje bilo izač iz knjižare jerbo kupija bi čovik još puno tega, e...

ostalo je uobičajeno, posal, život, i tako to, e... e, da... pomalo uvodim nove ljude u firmu pa san i oko tega. sve u svemu živo i zdravo.

eto, to je to. brzinsko javljanje gotovo. :O)

jemate pozdrav!

e... jutros je bija ispit iz prve pomoći.

bravo ja. prošlo se i to :o)

šta mi je još ostalo oko tega vozačkoga, a?

1. odvoziti do kraja propisan broj sati

2. položiti ispit iz upravljanja vozilom

korak po korak, step by step i cilju će se doč. nadan se.. :o)

e...

malo kad ću se upustit u priporučivanje libra ča mi još nije doša pod ruke. ovi put činin veliku iznimku. gledan kako nabavit ovi libar:

saša ljubičić: sandokane platit ćeš

(to van je oni ča je notava kolumnu u slobodnu)

jerbo po onemu šta se čulo tot šjor točanin saja notaje o:

- osandesetima

- ajduku, torcidi, gostovanjima

- azri i štuliću

- životu našen svagdašnjen na matejuški

- splitu i judima ča su onda mot i šest svemu davali

nikako mi se pari da bi to moga bit jedan puno dobar libar. ko zna koju ću sve čunku pripoznat o' ispod pera šjor novinara s toča. narafski, more se on priselit di god oče, ali za mene će uvik ostat točanin. zajedno sa šilon, bokon, žikon i ostalon ekipon, e...

pročitat ću libar u dahu, čin mi dođe pod ruku. samo da ga nađen. i nadan se, teplo se nadan da me neće razočarat. jerbo, to je vezano s mojon generacijon, mojon mladosti i mojin načinon života.

mi, naime, nikad nismo išli sist kraj banke. samo na matejušku, e... nismo se odili banjat di su išli pozeri, naša mladost su bače :o) slušali smo štulića, drukali za bile, živili za split, rvacku (našu, modernu, u kojoj će se dobro živit, a ne ovo bidne zemlje ča danas jemamo).

bile su to osandesete, vrime dok se split još nije tutokompleto poseljačija.

a danas? danas bi se mnogima moglo samo ovo reč:

"pljuni na svoju facu i postani čovjek."

jerbo, fali faca u ovi grad, fali čunki, e... osandesete, e, to su bile godine... :o)

e...

gren notat ovod besidu dvi ča su danas izrečene u jednemu razgovoru između mene i (čak) dva šjor instruktora o' vožnje (ovo znaju da san ja posebni slučaj, pa angažiraju sve snage, hehe) na temu podučavanja, a vride ka životne istine.

to van znan jerbo san u životu nauči matematiku, fiziku, štagod informatike i letrike svita i svita. zapravo, kad se mrvu bolje porazmislin, stalno nešto u životu učin, s profešuron, mentoron, instruktoron i sl. oli solo, a stalno i ja druge učin. također, okružuju me profešuri, ča o' moje fameje ča ovi ča mi ulipšavaju company profile i doprinose svojin radon pa i o' njih nešto naučin.

ajmo, gremo ča sa istinama:

1. čovik triba uvik nešto učit, kad prikine učit nije višje živ, krepa je.

2. učenje opće nije lako.

3. za učenje triba pacijence. obostrane, onega ča te uči i tvoje čovik moj, e... učitelj nije turčin čudotvorac, nima ni čarobni štapić, učinjen je o' krvi i mesa ka i ti.

4. za učenje triba volje. velike, e...

5. za učenje triba vrime; znanje nije vino da će se pirijon iz glave podučavatelja prilit u ćivericu đaka (najdraži su mi tako oni ča bi tili da ih gradivo cile godine naučin za po ure, te naprosto obožavan, e)

6. postoji samo jedan nepravedni profešur/podučavatelj, to je oni ča te nije ništa naučija.

7. nije sramota nešto ne znat, sramota je ne jemat volje učit.

8. ako oćeš nešto naučit, nije preporučljivo podučavatelja doživljavat ka dušmanina.

9. triba reč: ja to mogu, a ne ja to moran i odma će sve poč nabolje (ovoj me je istini, recimo, naučija moj mentor s prakse u srednju skulu, diplomirani inđinjer edo mlikota,  i beskrajno mu fala na temu).

10. niko se nija naučen rodija

11. znanje/vještine itekako vridi, barenko kod onih ča žive o' svoga rada.

12. uči se i slušajući/gledajući ča ti podučavatelj oće reč, a slušat triba znat. gledat isto.

jema tega još, e... samo, tribalo je poč vozit tonobil, pa smo fermali diskusiju.

pročitajte pažljivo, s pacijencon ča je notano i dopustite da i među podučavatelje znaju zalutat oni ča i nimaju baš nikoga mota za to. ne idi se čoviče, ako s nekin baš nikako ne moreš, možda nije loše potražit onega ko jema mota.

meni tako dica, a i odrasli ča dođu često reču: a zaradi čega nam vi niste u skuli oli na fakultet, a? da ste nam vi, onda bi bilo lako. dobro nisan, pa šta onda, morete me nač u Parametar d.o.o. i tot ću vas učit koliko god oćete, e... :o)

dobro, dobro, aj, one šta baš oće naučit ću još nešto, ajmo, gren van reč još jednu istinu, pa ćemo finit:

13. kada se nauči dobro, sve je lako. i nima teških lekcija, jema samo teškoga svita. a znate koji su to, a? LINČINE, oni ča ne bi učili, e... takvima je teško i druge učit. samo učenje je mukotrpan proces, ali NEMOGUĆ NIJE. :o)

ekola, gren ča, jemate pozdrav. učit vozit tonobil narafski još moran,ali već je bolje vengo prošlu šetimanu kad se nije znalo njanci najosnovnije, e...

odraz by XVII, slikano danas na institutu, klik za veće

e... šetimana mi je bila bokunić naporna, moran priznat.  uza posal i autoškola, pisanje i prolaženje testova, slušanje predavanja iz prve pomoći (sad učin za taj ispit), početak vožnje (o' ove šetimane čak znan uključit tonobil i malo vozikat, ali sve su to tek počeci, triba još puno radit , nadan se da će sve bit dobro), novi ljudi u Parametar doo (jučer je bija jedan razgovor, nešto slidi iduću šetimanu - nadan se da ću šinjorine ča su bile jučer uspit uklopit, naučit na naš tempo, ritam, red i rad, a i da će se one naviknit na nas), ljudi ča su već odradili poslova za tvrtku (fala npr. Tanji ča i vikendon radi) i još svašta nešto ča život donese (poput onih likova iz ministarstva gospodarstva => pročitajte postove o' ove šetimane ako niste).

a kako se odmorit, a?

More

Vitar

Brod

Jidro

Odraz

još jedan dobar litrat svega tega i ča višje triba, a?

odlično, ja san već priporođena peršona, e... sutra moren nastavit di stalo. za one ča su već stavili džemper na se tek mala napomenica: more je još uvik lipo, pravi gušt za kupanje.  :o)

morski litrati by XVII, klik za veće, sve slikano danas

e... još uvik je lipo, teplo, banjan se, grijota bi bila propustit. :o)

e...

jutros posal.

obid.

vožnja, danas nikoliko đireva oko ajdukovog stadiona. bilo je i u drugoj. kočenje svakako moran još vježbat, zaradi tega vam je bolje bižat kad me vidite da  vježban vožnju :o)

poza tega predavanja iz prve pomoći. danas smo finili i s tin. bija nan je jedan zabavni šjor likar, špijat ću van kako se zove kad mi fini cili tečaj o' vozačkoga.

dođen jopet u ured i počnen radit jerbo neko u ovoj bidnoj zemlji i to mora.

onda me se sitija zvat šjor pomoćnik ministra o' ministarstva gospodarstva. ti se zove ivan bračić. njega je puno zanimalo ča je to bilo nikidan o' njegovoga ministarstva. čovik je puno kurjož. govorin mu jušto ovo ča je na internetu i ča je već pročitalo iljade i iljade ljudi. narafski, moj pismeni odgovor još uvik nije stiga oli ariva. sad ćemo organizirat kladionicu ovod u Parametar doo , pa možda neko i pogodi oče li to stič ili neće. poza tega mu ne dan višje ništa reč. šta će mi reč? neka pošalje odgovor, a sve te njegove gospoje/drugarice i sl. neka kupe bonton. ja višje vrimena niman, triba se radit, triba naranit sva ta gladna justa ča čičaju državni proračun. ovi barenko nije bija tutokompleto grez, ali jadna i bidna ova zemlja dok ovo teško vrime dura, e...

_________________

žunta: hdz i ministarstvo gospodarstva mi je svako malo na ovi moj blog, vidin po brojaču. jo, gospe moja ča ih tangira rič moje malenkosti. ko bi reka da toliko piza, a? a mislili su da vridi 2 marke.

                                  na vrju, by XVII

za one ča nisu odavno bili u splitu: ovo je maketa splita, lipo je i šesno napravljena, stavili su je na rivu...

ruka je moja :o)

e...

ako mislite da me ti nesritni hdz o' jučer izbacija iz takta, ma ke, malo morgen, e... neš ti njih, pa neću se valjda zaradi takvih lezilebovića koji žive na moje špale i špale ostalih poduzetnika sekirat. moren im se samo smijat, smijat koliko su jadni, e... bidni, mižerjasti, mali, sitni.

radin jučer, radin danas. nisan o' onih šta žive na tuđe špale, e... i dobro je, gre :o)

jučer san i po prvi put u životu mrvu vozi tonobil. uz nadzor instruktora, narafski, ravno, livo, desno, u krug, u prvoj narafski. ma kako mi je to prvi put za volan (ako ne računan luna park i bičikletu), onda bravo ja, još niko vrime i bit ću i vozač. a ko je platija taj vozački, a? e pa moja firma, fala joj :o)  a ko bi drugi, pa neće valjda hdz, e... oli koja druga partija. 

uvik vam i štagod priporučin o libri, za čitat ovod. gren ovi put malo prominit, evo koje san filmove posudi u videoteku:

1. THE DA VINCI CODE

2. APOCALYPTO

ovo pod jedan je odgledano sinoć i to dva puta, na ingleškome i rvackome, a ovi drugi ću pogledat danas kad stignen. mislin da bi i taj triba bit dobar, jema veze sa mel gibsonon.

eto ga, gren ča, jemate pozdrav!

e...

kad van ti hdz oće lagat i mazat, onda na tv non-stop pušta reklamu kako će puste pineze dat ka poticaje privatnon poduzetništvu. narafski, iz proračuna, neće iz svoga žepa.

kad čovik pošalje molbu, onda najprvo čeka misecima na odgovor. moj još nije stiga.

danas zoven na tel. da doznan šta je.

najprvo mi se javija jedan ženski glas ča se nije tija predstavit. onda je moju molbu tražila po ure, da bi mi poza tega rekla da će mi ona usmeno reč odgovor koji je eto negativan i to zato jerbo ona tako oće, da pismeni neće poslat, da se niman pravo žalit i da se nju hebe ča čovik odnosno ŽENA (to je bilo za poduzetnišvo žena) u ovoj zemlji mora sam sebe zaposlit i neka lipo još dugo i puno žive ovakve ča sa falšetama rade po državnin skulama/službama.

napomenit ću da je:

- tražena dokumentacija od moje strane dostavljena na vrime

- da su priloženi računi za kupljenu robu (računalo bez monitora sa WIN XP i printer, sveukupna tražena cifra 3386,21 kuna)

- da je gospoja na kraju rekla svoje ime, zove se:

ŽELJKA MAZALIN MRKŠA i predstavila se ka pricidnica povjerenstva.

sramiš li se hdz-u, a? barenko mrvicu? ministar o' ovega ministarstva je šjor vukelić.

žunta: nikad ni jedan moj glas nije otiša hdz-u, a ni neće. puno vas pozdravlja intelektualac, oni ča mu mozak vridi malo višje o' 2 marke, e... oni ča mu diploma nije falša.

žunta II.: sva sredstva koja mi je država dodilila su iznosila 11140,80 kuna (jedanaest iljada kuna i još sto četrdeset sitno), to je bilo po programu poduzetnik početnik, za troškove bilježnika i mentorstva u poduzetničkom centru. to je bilo 2004.

kad se bilo šta poslin tega tražilo ponašali su se ovako i slično.

brez posla je moja malenkost bila 6 i po godina; čak i sa magisterijen elektrotehnike, magistarski rad mi je ostvarija znanstveni doprinos.

-------------------------------------

žunta o' 9.10.2007. : http://xvii-online.com/1/sramiš-li-se-hdzu-nastavak/126478.aspx , konačno stiga pismeni negativni odgovor...

-------------------------------

žunta 2. misec 2008. : otkrijte kako poticaje dobiva šešeljeva glasnogovornica => http://www.xvii-online.com/p-nikoliko-uri-brez-konfu382juna/142353.html

e...

danas jema jušto 3 godine da su u javnoga bilježnika sređeni i potpisani papiri za moju tvrtku Parametar doo , radit se počelo nešto kasnije. točnije na 02.11. 2004.

u tri godine san učini firmu koja je kapac odgovorit na mnoge izazove. danas ta firma radi, zapošljava ljude i to najbolje na svitu, odrađuje zahtjevne poslove. niman njanci sekund blokade. svi ljudi su mi uvik i na vrime plaćeni za svoj rad. uspijen sve uvik naplatit i nikome ne dugujen. svi ljudi su mi visokoobrazovani, kulturni, pristojni. stečeno je dosta bitnih referenci, itd. nećemo se puno puvat, u svakom slučaju, prijateljima je drago ča gre, neprijateljima nije i to je to.

moren reč da mi se kroza ove tri godine život mi bitno prominija.

kako?

1. sebi san sredi zaposlenje, radin i stvaran, zarađujen

2. upoznalo se jako puno novih i zanimljivih ljudi

3. naučilo se puno tega

4. steklo se iskustvo vođenja malog poduzeća (a vodit poduzeće opće nije jednostavno. ako oćeš da sve štima, jema se tot šta radit, e. moj radni dan često dura i po 16 uri.)

5. koriste se prednosti rada za sebe, niko me ne gnjavi, ne tlači i to je veliki plus, ali triba i jako puno radit, brzo donosit odluke, snosit odgovornost za sebe i ljude i sl.

jema tega još, ali ostavit ćemo štagod i za iduću godišnjicu. jerbo, niman namjeru propast.

:o)

narafski, jeman i novitadi; danas smo pisali testove iz predmeta o poznavanju prometnih propisa. izađen prvi put i odma prođen s maksimalnin brojen bodova. bravo ja :o)

za one ča su to davno polagali triba naglasit da je danas dosta postrožen kriterij. triba jemat bar 108 bodova od 120 (znači 90%) s tim da sva raskrižja tribaju bit točno riješena.

eto, sad gremo dalje. ovu šetimanu su predavanja iz predmeta o prvoj pomoći, a pomalo će počet i praktično učenje vožnje tonobila.

a koja je srića bila sa predavanjma, gospe moja. mala grupica, lipo učenje. sad im je već počeja konfužjun, danas su mi rekli da je počeja novi tečaj i da je petnaest svita. eto, kako mi je dobar termin bija :o)

to je to, do zime se nadan jemat vozačku u žepu. :o)

gremo ča dalje. u nove radne i životne pobjede.

e...

merjan danas pozapodne.

potez: spinutska vrata-bene.

- sutra neću u taj (pazite sad ovo cinjeno čitateljstvo) jebeni vrtić! neću i neću! - viče mali, možda će jemat 4 godine.

- ma di si ti to mali već naučija beštimje, a? - pitan se ja, navino. pitan se u sebi narafski jerbo ko smi šta reč. odma počinje glas drage mu mame, a dok sve to slušan jeman osjećaj da to ne govori mater o' diteta o' 4 godine, vengo da govori nika mornarčina ča je 30 godina tukla more, a jema mire 195/110.

- očeš i očeš, jebeno i prejebeno ćeš poč, da znaš samo kako ćeš poč. - kaže mu njegova draga mama.

- dica su spužve, upijaju, kako ih naučiš/odgojiš takvi će i bit - zaključin ja, u sebi narafski. 

----------------

i narafski, uvik ću mislit da rič roditelj jema duboke i velike veze s riči ODGOVORNOST.

a di je u ovoj situaciji ODGOVORNOST?

kako mislin da san dobro i pristojno odgojena peršona, ograđujen se o' grubih riči u ovemu postu; one su tot samo da se vidi kako to grezo zvuči onemu ko to sluša sa strane. grezo, e... najgore o' svega je ča su danas te muškobanje koje tako uče dicu grubin i grezin ričima puno moderne.

stari split ih je zva peškaruše, u ovemu novemu su cinjene gospoje.

ma kako kome, e... meni ipak nisu.

ekola, gren ča... promislite kako govorite o' isprid dice. oni sve sinjaju, upiju, a poza tega i kopiraju.

s punte merjana, by XVII, slikano jučer

e... kad nisan u uredu oli oko posla općenito, kad se srede sve druge stvari i kad se ulovi bokunić vrimena, e, onda san obično na moru, u moru, kraj mora, pod morem i sl. :o)

evo dva litrata o' jučer s punte merjana, institut. narafski da se još banjan, more je dobro. dapače, ludilo je.

uputa za one ča viču da je zima:

počni odma plivat i ponesi rezervne mudantine oli kupaći i vidit ćeš šta je gušt, e...

ovi post ćemo tagirat ričima:

XVII, More, Split, Splitske plaže, Marjan, Institut, Čiovo, Brodovi

i pomalo ćemo ga finit. jerbo, moran još nešto obavit, a poza tega More me zove.

jemate pozdrav!

e...

di smo ono stali, a? moj ured jučer, e...

jemali ste čast, danas je već mrvu drugovačiji. evo dvi brzinske sličice nove police.

došla me je 263,45 kunića, kupljena je u firmu DOMOOPREMA d.o.o. (to van je ispod ajdukovog stadiona) i ta mi je firma to (ka i stvari o kojima je nikidan bilo riči) brez većih problema prodala i dostavila.

jedino mi je tribalo jednu uru i po dok sastavin ovu policu i škancije stavin na svoje misto, DOMOOPREMA d.o.o. nudi i besplatnu montažu, ali nije mi se višje dalo gnjavit svit, nikidan su došli sastavljat stol ča je ariva sa katrigama, pa kontan, aj, policu moren i u svojoj verziji sastavit. narafski, za prokužit ove moderne vide tribate vrlo intezivno duperat možđane, ne more to tek tako, triba smišljat i razmišljat, e...

dobro je znat i da ova polica gre po narudžbi, čeka se misec dana.

ovo mrvu falin ovod one ča se normalno ponašaju. obećano je pofalit i šjor optičara. u njega san naruči ove očale:

sve je proteklo u redu, čovik je ljubazan i susretljiv, očale su me došle 880 kunića. ovo opće nije puno jerbo su dioptrijske, a obične sunčane, brez dioptrije teško moš nač po toj cifri. odlično mi je š njima šetat spliton, već se probalo, e... :o) a di je ovo kupljeno, a? OPTIKA DVORNIK, Mažuranićevo šetalište 14

ka ča vidite, zadnjih dan je ovod notana rič dvi o nikin stvarima ča je moja malenkost kupila. kupilo se još tega, narafski, ali nećemo baš sve stavit na net. ovo ovako malo, za kurjože, e...

jesu li ove stvari o kojima se notavalo ovih dan preskupe, a? NISU. nikad ne kupin najskuplju stvar u butigu, a ni najjeftiniju. zlatna sredina. stvari mi služe za život, a ne živin zaradi stvari. živin normalno, trošin normalno i to je to.

a odakle mi pinezi za stvari, a? e pa kako nisan ni političar ni lupež ni lupeška čer ni kurbetina ni sponzoruša ni ništa ča je o' tih vrsti, vengo običan mali, majušni rvat (bolje rečeno rvatica) ča radi i zarađuje, onda je odgovor sasvin jednostavan: PINEZI SU U MENE OD RADA. :o)

i nije me sram (u ovoj bidnoj zemlji bi vas zaradi tega tribalo bit sram, e) ča su od rada, dapače, ponosin se ton činjenicon. bilo bi me sram da je drugovačije, e...

narafski, u mene je i danas bija radni dan. sad pomalo gren ča, gren mislit ča će mi lipoga bit za obid, e... ekola, pozdravljan lipo, zdravi i veseli bili!

e...

sad gre nešto za one ča su baš puno, ali ono tutokompleto puno, kurjoži, e...

di van ja radin, a?

evo mrvu te kapunjere je snimljeno jutros. tot odradin jedno 70% moga posla. drugi judi mi većinom rade na druga mista (ja san ovod jerbo mi je tot sve blizu, od grada, fine, banke, pošte, računovodstva , pa do postelje i plaža), a ovod povire samo kad ne mogu brez mene. kako me puno vole, skoro svaki dan neko poviri :o)

kažen 70% jerbo radin i u računovodstvu, triba dikad poč i po drugin firmama, terenu i sl., mašta i ideje mi rade i kad san i vanka (mobitel isto) i tako to.

ovod van nastaje i www.xvii-online.com . većinom. kažen većinon jerbo neki postovi su nastali i sa drugih računala, drugih mista. kako se potrefi.

morete vidit da mi je katriga najobičnija (to je zaradi tega ča jema štagod u glavi pa nije potriba o' ne znan kakve katrige), da mi je monitor još uvik stari (to je zaradi tega ča još radi, a pineze ne nalazin na grani), morete vidit libre, radne stolove, telefone, kantu o' škovaca, ča jema u armerunu, kakve mi slike vise po zidovima i ča vidin s ponistre.

narafski, diplome ča su na zidu su moje (a čije bi bile? čoviku ča jema svoje dokumente nije potriba krest ni tuđu fameju ni tuđi dokumente/identitet), pošteno i mukotrpno stečene na spliskome fesbu, i neka ih lipo tot. ko ih jema taj ih brez problema i pokaže. a je li tako, a?  ja ih se, naime, neću sramit samo zaradi tega ča u ovoj zemlji intelektualac vridi dvi marke, po šjor milasu, e... neka se srami on i oni ča ga podržavaju. i narafski, neka se srame oni ča brez diplome dođu radit tamo di je diploma potribna. u mene tj. moju firmu fala bogu takvih nima, a dok je mene neće ih ni bit, e...

znači, ako ste puno kurjoži, ovi filmić je jušto za vas, e... uprite na botun i sve dobro izvižitajte. snimljen je brzinski jerbo mi je upravo dura niki konfužjun. evo za kurjože ćemo odma otkrit i ča je to bilo,  DOMOOPREMA doo mi je dostavila jednu policu o' nikoliko škancija ča smo nikidan naručili, to će doč ka mali bog za Libre, e... njih nikad dosta, a mista za njih nikad prikovišje.

eto, to je to, ako ko jema volje doč pomoć RADIT, more mi se komodno javit pa ćemo vidit ča zna i kojega je zanimanja. ja san o' letrike, ovo van je ured jednega inđinjera... 

gren ča, jemate pozdrav! 

e...

kako ovih dan znan odakle je ko stiga u split i to prije vengo progovori iti jednu rič, a?

furešti

kratke gače, maje na špaline, eventualno kratki rukav oli kakva tanka majčica dugih rukava. more ih se trefit na peristilu, pjaci, rivi, plažama, u dioklecijanove podrume. fotoaparat je obavezan. obavezne su i bičve na šlape oli na trika-trake, obično bile. azijate osin po kosin jočima morete pripoznat i po kapelinu, španćjeri, obično ga/je jemaju. to i bokun lumbrele za sunce; da ih bidne ne opeče, e...

furešti, ali ne bilo koji vengo ovi iz susidne države

e, njihove ženske su već stavile čizme na noge. obično jemaju i robu na koju se svaka splićanka sa stilon, šeston i ukuson samo dobro nasmije. to je ono, nespojive kolure, ciganske rečine, dosta često i roba na koju su potrošeni pinezi, ali stavljena brez šesta i ukusa pa djeluje tragikomično, pogotovo kad progovore. ne moredu uteč, odma se zna odakle su. čast ritkin iznimkama iz tih krajeva koje ne spadaju pod ovi opis.

domaći

e tot jemate splićane i ove kako reče škovacin visost o' gorika. i tot se more i po stilu odma razaznat ko je tica iz kojega jata. kako? ma samo gledajte i odma ćete vidit, e... isto malo nešesta u kolurama, koja kraća nogavica, koji nešesan postol i odma znaš odakle je čovik stiga.

zanimljivo je da ovod među splićanima (ovod smatran one ča su barenko sami ovod u split odili u skulu ako im već roditelji nisu) jeman podjelu na normalan svit i preseratore oli snobove. normalan svit se nosi normalno, dosta ih se još i banja, čizme još nisu stavili, a oni ča im je možda mrvicu friško jemaju niki prikladni dugi rukavić. ova druga grupa (snobovska) često nima šta pošteno za izist, ali maja im je uvik s aždaja, a rebatinke isto ne moredu bit obične, vengo nike ča dođu barenko osansto kuna. ča se tiče te grupe, meni su komični. nisu nešesni ka furešti iz susidne države, to bude obično dobro složeno, ali je komično zaradi tega ča u životu tega svita nima ništa drugo vengo ti konkrodil s maje, a veštit ne čini čovika, e... samo ga more malo ulipšat.

ne triba patit da je roba preskupa i da se poza tih kupovina nima njanci za papar, ali lipi moji, ipak pripazite kako grete vanka. ovo ja gledan kad nekoga vidin:

• jema li šesta?
• slažu li se kolure (recimo, roza i crveno ne gre šotobraco nikako, e)?
• je li to sve skupa čisto i uredno?
• je li šumprešano?
• je li odgovara vrimenu (ko je, recimo, vidija stavit na se kapot na južinu, za takvo vrime jema balonka, šuškavac, kakva lagana jaknica)?
• je li odgovara godinama peršone?
• sliči li u svemu temu čovik na čovika oli na maškaru?

narafski, nemojte me nikad pitat kako vam nešto stoji ako ne želite čut pravu istinu. ja vam naime nikad neću reč da su čizme normalne u vrime dok još gren u more i u kratki rukav, e... oli, ako stavite na se sto koluri, činin kuco, ali kad me se pita za mišljenje, a ja ću reč da to pari afričko papagalo, neću mučat, e... narafski, ako ćete sviton ič u maju na rige, a gače na točke, a šta ću drugo reč vengo vazmi još jedne tirake, ocrveni tu kapulu o' nosa, stavi bokun perike na ćivericu i javi se na oglas za radno misto u cirkusu. :o)

znači, iz pristojnosti činin kuco na sve te monade, ali kad me nešesno obučena peršona pita za mišljenje, e, ja ću ga reč, višje mučat neću. to je tako, ako nećete istinu, nemojte me ništa ni pitat. jerbo, slabo se pritvaran, e... to san ča jesan. :o)

Kašuni by XVII, jučer

Kaštelet by XVII, jučer

e... govori mi jedan kumpanjo ka da je zafriškalo i da se bit će višje ne banjan. ma ke, ko bi bija šempija pa ovo puštija, a? more je lipo, evo, ne zna čovik di bi prije iša, e... litrati su by moja malenkost, friški, o' jučer, morete ih još uvećat klikon. ovo jeman ovako dok još gren na noge (vozački je u tijeku, učin za ispit :o)), a sve se bojin da će me poslin vrag ka i druge stivat u tonobil do mora i od mora. tribalo bi ne bit takav, to tonobila ne duperat kad nije potriba, samo kad se mora, e... jerbo, vidi lipote. ko ovo more platit, a?

znači, ovi dil godine obožavan. nima konfužjuna, plivan barenko po ure uru, jeman mista za šugaman, čisto je, lipo je. :o)

i narafski, jedino mi je priša poč u dubai, nigdi višje, e... jerbo, brez sniga ne moren, hehe.

ekola, gren ča. jemate pozdrav!

Flekica by XVII, slikano jutros

za one ča ne znaju više ovod:

http://web.vip.hr/nmagazin.vip/mace.html

Brod by XVII, slikano danas

e...

ovakav triba bit da zadovolji kriterije.

evo i premašenih kod ovega grozda. :o)

asti sto, kil i po.

bravo za moju mater, dobro je ovo vazela, a?

kil i po, by XVII

e...

ponediljak, a? uajme ča se teško dignit iz postelje. jo, da se još malo izležavat. :o)

u mene nije tako, odavno san već na noge i odradi san već dosta tega. narafski, bija i ovi vikend radni.

narafski, volin uvik i pofalit one ča su vridni. danas ću, zaradi rada vikendom, pofalit dvi vrlo vridne mlade peršone. one već niko vrime rade u moju firmu, honorarno, na određeno, kako se potrefi i kako posla jema.

dakleM:

1. Anđela

2. Tanja

bravo!

e sad, sad, gre nikoliko rigi za kurjože. kako su one dobile posal u Parametar doo ?

posal su dobile na ovi način:

anđela mi je sama, mimo natječaja, poslala CV. CV je bija ok, ali meni onda baš i nije bija opseg poslova toliki da je moren vazest. stavili smo CV u bazu i zvali je prima potribi.

tanja je poslala prijavu po jednom natječaju, bila je upisana u bazu, pozvana je kad je došla potriba. od tada praktički stalno nešto u nas radi.

ni anđelu ni tanju u životu prije nisan nigdi vidi, niko za njih nije zva na tel. veze i poznanstva kod mene samo čine kontraproduktivnu reakciju, a za pokušaje mićenja san kapac zvat puliciju. isto moren učinit i za pritnje, e... zato one ča se time bave lipo molin da olade š tin, e...

ono šta prolazi je:

1. dobar CV

(po zadnjen natječaju je bilo dosta CVa u kojima je bilo napisano mnoštvo gluposti i monadi; sad se niki čude kako ih ne zoven na razgovor, a bilo bi bolje da malo pogledaju kako su CV napisali)

2. uredni dokumenti, svima prigledan originale prije zapošljavanja 

(nikidan gren priko pjace i čujen u prolazu o' nikih meni nepoznatih peršoni da san kučka koja traži da se jema diplomu. ma zamisli, a šta bi tribalo, ne tražit diplomu, a? i stavit šalturicu oli postolara na misto profešura. e, pa lipi moji, nije moja firma državna ni javna služba, to tamo pođite tako razmišljat, u mene se radi, živi o' rada i poštuju propisi)

3. dobar nastup na razgovoru/testiranju

4. puno dobrog i kvalitenog odrađivanja poslova poza zapošljavanja brez grintanja

5. želja za konstantnim učenjem

6. volin kad čovik misli svojon glavon  i kad reče svoje mišljenje jerbo ćiverica za to i služi, nije samo za nosit frizuru, e... znači, veliko NE za ulizice

7. normalni, urbani stil život, pristojna, skromna peršona. ne zanimaju me ničija članstva u partijama, ka ni snobovi, preseratori, i sl. ovi bi mogli poč pod zajednički nazivnik PRAZNA TIKVA. 

ako se peršona, pak, bavi sporton oli jema niki kreativni hobi, to mi je drago.

8. oni ča čine kužine i drugima zapliću nogu zaradi posla isto su nepoželjni. u nas vlada jedno pristojno i normalno radno ozračje. ljude plaćan uredno i na vrime, s njima sa u dobrin odnosima, uvik san najprvo čovik pa tek onda šef i zaradi tega jeman organizaciju koja nikad ne štrajka i na koju se moren oslonit.

eto, to je to u najkraćin crtama.  nadan se da je sad svima kjaro kako se dobiva posal u Parametar doo.

ovi tekst je notan zaradi pustih blebletanja ča su se mogla po gradu čut kroza vrime duranja natječaja ča su mu rezultati išli nikidan, e... 

e...

otvori san ured, otvori san libre i ajmo ča malo učit.

ovo mi je za vozački :o)

obična i sepia verzija, sve by XVII 

More

Sunce

Kašuni

ludilo :o)

tri puta u more, lito mi još dura. :o)

eto, tako mi je bilo danas pozapodne.

ja i moja mater, 1973., split narafski

e... na ovi litrat mi je godina dana. zašto je danas tot, a? a zaradi tega ča je zafriškalo, a čin je mrvicu zafriškalo mislin di ću poč na snig. mislin, jerbo ka dite iz dalmacije brez sniga ne moren, e... vidite da u nas snig redovito pada, da ga jema u ogromnin količinama i da smo naprosto odgojeni ka dica sniga. koje more, a? pušti ti to, gušti su gušti, jedino snig priznajen :o)

narafski, nikako ne bi tribalo poč na niko obično misto, tot blizu splita, po kupresu oli u liku, gorski kotar. ča ću tot? tot se bilo mali milijun puti, šta sa roditeljima, šta sa izviđačima. slovenija me isto štufala. znan je višje napamet.

triba poč negdi pozirat, ono, di jema političara i tajkuna. jerbo, brez tih čunki ne moren nikako.

glasan za dubai. zadovoljava sve kriterije jerbo:

- tot se moren temeljito preseravat

- tot ne moran bit isključivo na snigu, jema i vodenih zabava

- tot je brezobrazno skupo

- tot moren trefit kojega šeika

itd...

jeman samo jedno skoro pa beznačajno pitanjce:

ko će to platit, a?

jerbo, sve se nešto mislin kako bi bilo da možda prikinen radit (i tako financirat svoje prohtjeve) i potražin kojega sponzora, a?

danas je to moderno...

to i lupeži. to su face, e... a ti čovik moj , ako nisi među takvima, ništa ne valjaš. aj ča, brzo se pokrij ušima.

evo gren, gren ča za poslon, mora se i radit, neću se ja narafski prominit, ma ke, moren radit i zaradit pa mi ne triba ni krest ni tražit sponzore, bogu fala, a i pamet mi još uvik ne smeta.

e i  probat ću i još koji litrat o' sniga nač pa će ovi post vjerojatno bit nadožuntan. jerbo, gušti su gušti, e... ;)

ekola, gren ča, jemate pozdrav!

aha, evo žunte. vrati san se iz autoškole pa sad jeman bokunić vrimena. inače, danas smo finili nastavu iz prometnih propisa i pravila i pisali smo pretpristupni test; pošlo mi je za rukon sve točno riješit. ahoj. sad ću još malo učit i onda gren na ispit iz tega predmeta. :o)

znate li di je ovo na litrate ča slide, a? dežela oli slovenija. bovec 1979.  ovo volin, kad sniga jema za učinit snješka, ali i kad se cviće more mirisat. uajme ča lipo vonje... a ovi litrat sa ovin čovikon, sigurno se pitate ko je to, a? e to smo sestra i ja sa našin ćaćon, a slikala nas je mater. to ja i bokunić ćaće ovod da ne rečete da samo litrate s materon stivajen ovod, e..

je li nam snješko ludilo, a?

evo, gren nač još štagod interesantno, pa budite još malo strpljeni. :o)

jopet jedna domaća, ova je slavonska, rešetari 1980., na snigu se more i past :o)

i još jedna iz dežele, oli slovenska, e... jezersko 1986.

itd.

moren ovako do sutra. jerbo, ja san dite sniga. :o)

a di neću bit kad u splitu stalno pada? ja i mater 1996., split kraj općine :o)

zvončac by XVII, jučer

e... ovo za lakše progucat mokre postole... :o)

more se još uvećat klikon.

e...

danas su me neki judi  svojin postupcima baš oduševili. to bi ustvari, svaki za se,  u normalna vrimena bija i normalan postupak, ali kako živimo u puno gruba vrimena, kako je Čovik skoro pa skroz nesta, ovo je za pofalit i zaradi tega notajen sad ovod.

najprvo ćemo reč da u autoškolu šjor predavač jema:

PACIJENCE - ča je to, a? e to je davno nestala vrlina, itekako bitna za podučavanje, a i život općenito. mi lipo pitamo, a on još lipše objašnjava. kud ćeš bolje, a? možda bi čovik ka i drugi bija štuf svega da ne radi za se, ne znan, ali istina je da pacijence jema i dobro je dupera. pohvale notajen. u koju je to autoškolu, a? e to ću vam špijat kad mi fini sve oko polaganja vozačkog.

******

ajmo ča dalje. ovod u dalmaciju je, ka ča svi znaju, puno sunca. koliko puno, a? a u svakon slučaju višje vengo kiše, e... sniga pogotovo. i kako će sad peršona ča nosi očale poč vozit tonobil, a da joj u očale tuče sunce, a? a nije baš lipo, e... pozapodne san, zaradi tega, poviri do jednega optičara. bilo mi je na pameti da riješin dvi stvari:

1. da mi učini sunčane očale s dioptrijon, zaradi tonobila.

2. da mi proda niki novi okvir za obične očale i stavi cakla i sve ča gre.

ovo pod 1. mi je odma prista napravit, izabran je jedan lipi okvirić, to je naručeno i sad čekamo, bit će za koji dan. ma za ovo pod 2. mi je odma lipo reka:

- ma slušajte, jema tu okvira svake vrsti (stvarno jema, puna butiga sve jedan lipši o' drugoga), ali pari mi da vam je ti okvir ča ga jemate još dobar. šta ćete trošit brezveze, a?

- ma moj momak, nije dobar. pogledajte sve to skupa, oksidiralo, šporkalo se, možda bi se moglo malo i uredit, ne znan, ali ovi di su kupljene te očale me i nisu baš obadavali prije nikoliko miseci, pa mi je sad došlo da vazmen nove, eto.

- ma ke, to je dobro, evo, ja ću vam ih uredit za 10 minuti, pođite popit kavicu.

i je, očistija ih je, stavija nove papučice, nove drške, ka nove su. pivan o' sriće. ušestavanje me došlo 60 kuna. okviri bi narafski bili puno skuplji. međutim, Čovik o kojen je rič jema ritku vrlinu ča se zove SKROMNOST.

nije mu bilo priša navratnanos zaradit, vengo mu je bila priša da me steče ka stranku. i uspija je. narafski, ako ostane tako normalan, skroman i vridan, eto mene i jopet kod njega, e... to će mu narafski, kroza godine donit puno višje pinezi. samo triba bit pametan pa to znat.

možda bi čovik ka i drugi bija štuf svega da ne radi za se, ne znan, ali istina je da skromnosti jema i dobro je dupera. pohvale notajen. u kojega je to optičara, a? e to ću vam špijat kad mi fini sve oko izrade sunčanih očala s dioptrijon.

nastojin duperat ove dvi vrline. nikad ljudima ne gledan zaračunat maksimalno, masu puti daden popust i kad nisu ostvarili uvjete, puno tega im učinimo i gratis, sa dicon obavezno ostanen duže vengo ča su platili za poduke i sl. znate li kod koliko svita se vidila bar mrvica zahvalnosti za sve to? kod vrlo malo, e... obično čine monade za platit račun, vriđaju i slično. to je balkanac. ništa čudno. ZAHVALNOST je jedna visokomoralna kategorija i nima je baš svak. kako znan da je tako, ni ne očekujen je prikovišje. ipak, ja nastojin bit ZAHVALNA peršona kad mogu. zaradi tega danas na ljudskim postupcima zafaljujen ovim momcima: 1. predavaču u autoškolu 2. optičaru. notat ćemo uskoro i koje su to firme, radnje i sl. jerbo, kako rekoh nikidan, pokudit ću one ča miritaju, ali i pofalit ću one ča miritaju, e... te ča su za pofale obično ritko kad neko spominje, malo ko ih se siti, e... a to nije red. nikako, e... jerbo, tako  lipo je trefit Čovika.

ekola, gren ča, jemate pozdrav!

dobro je,

poza svih ovih dan,

čut Kišu,

ćutit Kišu,

znat da slidi olakšanje.

odavno nije notan njanci jedan moj vers,

dušu je i prikovišje bolilo da bi se dililo sa sviton.

*** 

(fala ti na tome N., koliko ti boli moreš priredit to ne more niko).

***

Kiša mi vraća inspiraciju.

moga bi mi sad neko reč: a More, ča je š njin, a?

ništa.

ča će bit, a?

More, Kiša, Vitar, Sunce, Misec, Šuma, Stine,

sve su to moji kumpanji.

drago mi je nike ponovno trefit,

poza dosta vrimena, e...

***

srića je u malim stvarima.

pada Kiša!

i lipo je!

• e...
• dizanje iz postelje, doručak, jutarnje ređenje.
• autoškola (uči se, sve je bolje i bolje, jučer mi je čak uspilo dva puta proč na online testovima www.hak.hr , bit će dobro, nadan se ovih miseci to sredit :o)
• odgovaranje na neodgovorene pozive
• preuzimanje novog posla
• vižita u jednu splisku firmu
• računovodstvo, potpiši sve za plaće i honorare (radni narode, plaće su išle danas, honorari isto)
• fina
• obid
• rad na računalu u svrhu jednega posla
• telefonski razgovori oko novih poslova
• mail
• ahoj, 14:14 je sad. di si bija, šta si radija?

i sad bi vi tekst, a? a kad? kad svitu moj? :o) aj, možda do večeras štagod i notan. ako uvatin bokunić vrimena. ako ne, drugi put, e...

jemate pozdrav!

e...

danas mi je bija (čak) drugi slobodan dan ovo lito. nikidan se povirilo zadar, moj rodni grad, a u planu mi je bilo na idući slobodni dan poč do otoka murtera i mista betine, mista moga ćaće. zanimljivo da se lani na 02.09. bilo tot. vidi link.

s obziron da se na kornatima dogodila nezapamćena tragedija, da je poginija mlad svit, da je kornat gorija ka da je o' karte, a ne o' sitna i da cili murter, a i dalmacija ne moredu još virovat da je ovako nešto bilo moguće, murter će me još počekat. nije red sad poč tamo guštat, a ni izisit koji lipi bokun.

narafski da u splitu ne triba stat na slobodni dan, split volin, on je moja mladost, moje sve, ali di popit kofi, a? nije loše povrj acya, ali tot moren i radnin danon. riva je sramotna, zaobilazin je šta je više moguće i gren priko prokurativa i o' lučke kapetanije pa priko pazara, duša mi pati, ne more XVII gledat oni zločin ča su ga tamo učinili zli judi.

jema jedno misto ča vam je na po ure o' splita. to je jedan puno lipi gradić. zove se trogir. cili grad štiti unesco.

tot je:

1. povijest

2. raj za činit litrate

3. raj za banjanje

4. raj za nešto lipo izist

5. raj za zajubjene

6. raj za nautičare

7. dosta svitskih bogatuna na litovanju

i još puno tega, ovisi ča tražite, e...

priporučan tamo iz splita poč tonobilon, a ako niste u mogućnosti tako, provajte buson ča naprimjer gre za šibenik, zadar oli zagreb (priko zadra). tako ćete doč najprije, a proč najjeftinije (iz splita do trogira vam je tako oko 10 kuna), a ako pođete lokalnin autobuson duže ćete se vozit, neudobnije i karta će vas doć oko 20 kuna. ove se cifre odnose na jedan smjer.

e, sad, poč u trogir i jemat novi aparat, a bit XVII, hm? morete mislit muke kad se došlo doma, pusti litrati, jedva se odlučilo koji će poč na net.

za nač osnovne informacije o trogiru (mogli bi se libri o njemu napisat, e), priporučan ove adrese:

www.trogir.org

www.trogir.hr

znači, trogir danas. guštajte, ja jesan.

najprvo jedna sa šlagon :o)

onda katedrala, sv. lovre oli sv. ivana trogirskog

radovanov portal

kamerlengo, riva

iz trogirskih kala

xvii iz splita, u trogiru gušta dalmaciju

zaradi čega uvik gledat kroza ponistru, a? more se gledat i kroza vrata, e...

upeklo je, ajmo ča priko mosta

bogatuna jema, narafski

ipak, lipši mi je ovi litrat

a, evo i s banjanja litrat...

ma evo i još jedan, e...

more je ludilo, a ne fali ni meni ništa :o)

a jema li viškova? uajme, puno, bidna XVII :o))))))))

narafski, nećemo se stalno ni golacat, jopet jedan litrat u robi

ajmo ča jopet priko mosta

restoran kamerlengo, u čekanju obida

uajme, lignje na žaru, deset petica kuvaru!

još malo gušta na kamenoj rivi, riva je naime kamena kod normalnoga svita

jedan zanimljivi odraz

i jedan zanimljiv pogled...

kraj? ma ke, nije to sve, jema još litrati ovod:

http://www.flickr.com/photos/xvii_st3/sets/72157601818837600/

a morete pogledat i cili izlet ka slide show:

http://www.flickr.com/photos/xvii_st3/sets/72157601818837600/show/

aaaaaa, evo i jedan filmić:

sve morete uvećat klikon. potpisujen sve litrate osim onih na kojima san ja. potisujen i filmić. sve u svemu bija je ovo jedan lip izlet i dobar dan. a dan je narafski ulipšala i blanka vlašić. svaka joj čast!

ekola, to je to. bilo je dobro! neka gušta ko oće, a oni ča ga smeta neka pati, meni je zaradi prijatelja i kumpanji uvik drago ča im je nešto moje drago, a ča neprijatelji pate, e, to, to mi je posebno drago, e...

ovi će post poč i u: http://xviiskitnje.mojblog.hr

svitlost & indigo kolure, na merjanu, by XVII, slikano jučer

morete još uvećat klikom :o)

ovo je litrat o' jučer. jo, je gušt plivat kad je mrvu manje svita. o' danas niman još ništa, tokalo me i jutros radit, ali možda pozapodne uvatimo štagod lipo. barenko inspiracije u moru i prirodi jema koliko god oćeš. ove naše lipote triba pomno čuvat.

a one isprtke i govna o' judi ča su užgali kornate i ubili ljude neka sram bude. gorit će jedan dan i sami, u paklu, e...