e...

mislila san notat štagod u ponediljak, utorak, ali sad čitan foje i vidin da je u prometnoj u tunelu pozapodne jedna peršona partila u vječnost. bog joj da pokoj.

vengo, jučer gren s mora na noge i vidila san ovo:

• vozi i mobitelaje
• vozi a lakat kroza ponistru
• vozi a virovali oli ne noga kroza ponistru, ona ista  kojon triba stisnit kuplung kad triba stat oli minjat brzinu
• vozi i obžderava se čevapima
• vozi i obžderava se burekom
• vozi i obžderava se batkom
• vozi i obžderava se sladoledon (iz škatule)
• vozi i spava
• vozi i ljubi žensku
• vozi i pipa žensku
• vozi i pipi ženskoj isprid sebe jerbo je fermala da ne satare dite
• vozi u suprotnom smjeru koliko ti pogled seže
• pritiče kolonu o' tantobusa i tri tonobila

itd. jema tega još. ovo je sve na potezu kašjuni-tunel. vrućina udrila uglavu, a?

narafski, kad vozin, svako malo doživin da vidin priticanje u tunelu i juriš kroza tunel. u tunelu nikad nisan ispod 50, dovatin i 55 i kontroliran sebe da ne gren brže. strogo se kontroliran i znan zaradi čega to radin. ograničenje je 50. iza mene svako malo bude neka ćelava nervozna glava, razbijački tip. nervozan je bidan, kasni na sastanak udruženja reketara oli lihvara i pipi i trumbeta ka da je smak svita jerbo je moj twingić zamislite u ton trenutku jema 54 km/h, a ograničenje 50. svako malo je tako.

a di su prometni pulicijoti? otkad vozin (u ovo ću kontat i vrime provedeno u autoškoli) jednega san trefila, snimija mi je ove zime tonobil na cesti split-šibenik, ali XVII poštuje ograničenja i vozi vezana pa me nije ferma.  da jednega san vidila, to je taj, e...

u doba nevaljanoga socijalizma je i zna bit koji na cesti. dignija bi lizalicu (stop, stani, stoj), pita vozačku i prometnu, gleda jema li pijanih i ludih u tonobilu.

danas u najboljen vrimenu na svitu ceste i tuneli nam izgledaju ovako, a svit gine ka nikad.

koliko li ih samo gre vozit brez vozačke kad niko ne kontrolira jema li vozač vozačku?

daniel wallace, krupna riba -

odličan libar, upravo ga guštan čitat i vama ga teplo priporučan

a za slušat, a?

u zadnje vrime u kasnije večernje ure, znači iza 10 oli 11 uri navečer, san sinjala da na radijo kaštela bude dobrih stvari, sve starije, odlično, iz vrimena dok je zemaljska balota jemala mužiku.

osin kaštila slušan još i radijo trogir, radijo brač, radijo riva, megamix radijo hvar, nautic radijo vis, radijo salona, radijo dalmacija, radijo split - da se na svin ovim stanicama štagod dobro nač.

žaj mi je ča ne moren uvatit radijo kornati , oko ovega triba još malo probat tražit (pa doč  i u šibenik, zaradi čega ne, a?) jerbo mi kumpanji ča često voze put šibenika kažu da je dosta dobar.

žuntica : otkrila san da se u ST more slušat priko interneta a i to je nešto

za izist ćemo u ovemu postu priporučit štagod lagano jerbo nije sad vrime o' paštafažola, e... dakleM, tikvice, danas san ih guštala lešo, a moredu se napravit na mali milijun načina.

ča se tiče marki je da jeman odličan kupaći o' neill , ali danas san sebi priporučila i jedan o marke adidas. našla jedan dobar, pa ga kupila, a štagod o' njih vazmen dobro je, te ćemo priporučit i vama.

ekola, radilo se od ranih jutarnjih sati, vrime je da vidin je li taj kupaći dobar i u moru.

zdravi i veseli bili, želin vam ugodan vikend!

e... jedna za laku noć. ujutro san u konfužjunu, pa će mnogima koji ujutro povire ovod ova bit za dobro jutro, a poslin ćemo vidit, kako stigen. svejedno, uvik dobra. guštajte!

e...

radin od jutros najranije, o' prije 7 uri. finili smo jedan poveći posal za turističku zajednicu grada kaštela ,  pa san ih ka novu referencu dodala u novosti od parametar doo i to zajedno sa još jednon referencon tomas & co doo . fala lipa na povjerenju, a posebno fala antoniji , damiru i ingrid ča su uložili nadljudske napore da se taj poveći posal za kaštila fini u malo vrimena. s obziron da smo i u šesti misec ka i svaki misec radili i za veterinarski institut , vet. zavod split, danas me je tokalo zvat šjor ravnatelja te institucije apropo posla. narafski da san se već čula oli pisala/čitala i sa djelatnicima s kojima se tribalo čut oli pisat. sad me toka nekoliko uri sređivat kartušinu, a to naprosto obožavan. itd.

eto, to van se zove urlap oli godišnji o' XVII. je li mi lipo, a?

jedva čekan koji izlet. twingića isto. virovali oli ne, čekan i veću plaću. je, je, jerbo zaradi čega bi samo lupeži u ovoj zemlji jemali pinezi, a? pošćjera uvik pitan je li mi donija obavijest. koju obavijest? - pita on. obavijest da će količina u buštu narest. bit će, kaže on, neće vječno ovako. i ja se nadan, pogotovo sad ka je sanader da otkaz. a jadranka? - sad će neki. šta reč, a? ta gospoja je najprvo govorila da je učiteljica i da je radila na radijo. poza tega se počela predstavljat ka diplomirana pravnica. mirakul, divota, lipota, iđemo dalje, nadan se ipak ne za iste pare. ekola, gren ča, kartušina me čekaaaa... ako to uspijen finit, možda pozapodne i trefin more, a to mi je najbolji dil urlapa. 

e... pivan jerbo događa se odlazak peršone

koja je mislila da je centar svita,

a ne znan samo zaradi čega, e...

pivan o' sriće...

gre ča sanader.

ma ajde,

bogu fala

i ne vraćaj se višje.

spasit će se hrvatska

i pošten svit ča u njoj žive.

btw, je li ko kupija oni bmw?

e... ovod su svi povezani s morem. masu svita tuče oli je tuklo more. moji momci su bili iz pomorske branše, godinama tukli more, pa poslin ipak našli posal na kopnu. moji kumpanji su pomorci. moji poznati su pomorci. pomorci su se danas bunili, bija je demonštracijun na rivi.

pita me danas jedan čovik ča je narafski pomorac (jerbo teško da šta drugo u dalmaciji more bit) da je li radin...

evo ča san mu notala:

dragi pomorci, jemate prav, uza vas san. uza svakoga kapa, svakoga noštroma, svakoga mornara, svakoga maloga o' kužine.

držite se i ustrajte!

e... evo jedna skroz dobraaaaa! uštekajte zvučnike i guštajte...

e...

zvali me iz renaulta - gašperov split.

kvraguuu, baš san pegula.

baš moj twingić jema šinu (tračnicu) po kojoj gre sic s tvorničkom falingon (greškom). sad taj bokun triba prominit, a rezervnoga u rvackoj nima jerbo je ovo 1. slučaj u splitu, dosad nisu jemali potribe to opče naručivat. bokuna nima ni u deželi. naručili su ga u renaulta u francusku i sad će me tokat čekat, kako su mi rekli, desetak dana. eto ti ga na, a taman san jučer bila sritna kako san počela šofirat solo... u svakom slučaju, dobro je ča san vidila da jeman problem i na vrime poduzela potribite mire... neću njanci mislit ča je sve moglo bit.

sad ćemo reč vive la france  jerbo eto toka me čekat bokune iz francuske.

e...

taj šoferov sic nikako nisan mogla namistit, počeja se micat naprid-nazad po šinama i neće da stane. jučer san nekako taj tonobil dovezla do kuće, a jutros krenila u akciju...

najprvo san zvala servis, renault gašperov. objasnila san da me straj vozit, kako kočin sic uteče, nije mi to drago, ajmo ča štagod napravit prije vengo kogod nedajbože strada.

oni su me svitovali da zoven renault asistenciju, a ovima pak takav problem ne upada u jamstvo, pa smo probali stvari sredit priko haka, fala ti bože da jeman i tu iskaznicu.

hak nam je posla vučnu službu kovčo š kojoj jema poslovni ugovor. ukrcali su twingića, odvezli ga do gašperova i fala im lipa.

u dvorištu o' xvii by xvii

napomenit ću da to u ovoj situaciji nije bilo lako, čovik je uša u naše dvorište i jedva se uspija okrenit za izač jerbo je vidija da tako neće moč ukrcat twingića. onda je proba ponovno i to na način da je na rikverc ulazija sve do kraja dvorišta di je pokupija twingića. svaki sekund san govorila svaka čast momak, znaš vozit.

dvorište je zapravo očaj, to je ono ča se ulazi ispod volta u tolstojevoj kraj knjižnice, a twingić je bija jušto blizu konzuma. iako je to dvor, promet se tot praktički stalno odvija u dva smjera, a vozilo vučne službe jema dimenzije. eto, zato ću ovod i pofalit njihovoga djelatnika, čovik stvarno zna svoj posal. napravija je sve za +5.

u renaulta smo bili puno prije podne.

isprid gašperova by xvii

plišani crni mačak paško je u mome uredu, a nike-patike doma u armerunu o' postoli, hehe. sad čekamo popravak...  eto tako, danas nismo vozili twingića, vengo se on vozija. ka car, e... 

"to će jednostavno doč.

jedan dan ćeš osjetit da moreš, sist ćeš u tonobil,

uključit motor i krenit"

Aiša

"ma nimaš se šta bojat, a ko sve ove misece vozi za te, a?

kad budeš sama u tonobilu, ćutit ćeš se najbolje, bolje vengo s drugima. vidit ćeš."

Damir

e... ovako su govorili moji poznati, a ja san sve čekala ti dan. čekala i dočekala. nedilja, nije konfužjun, sila san  u tonobil i lipo od moje kuće do merjana. poza tega mrvu protegnit noge i onda nazad. u tonobilu ja i paško, moj crni plišani mačak. jeman ga u tonobilu za sriću ka prava mala vištica, hehe 

bilo je dobro. nije me bilo straj (već san vozila svugdi i svakoga, odilo se i u šibenik, omiš, makarsku, murter itd., ali uvik s nekin), ćutila san se skroz ok. kad san se vraćala bilo je i konfužjuna na cesti i onda opće višje nisan ni mogla mislit da san sama, tribalo je mislit na promet. najbolje o' svega je bilo ča me čekalo misto sa kojeg san krenila. odlično! jerbo, ko bi sad još i misto tražija poza ovoga velikogaaaaaaaa uzbuđenja.

nažalost, twingića sad nešto zafrkaje sic, pa ćemo i jopet tribat zvat servis, nadan se samo da ovi popravak neće dugo durat, možda se uspije sredit i savjetom. držimo palce za to!

----

prošlo je 10 miseci otkad san položila vozački...

točnije 29-08-2008.

možda san mogla poč i prije solo, ali nekako mi je ova Aišina bila pametna, triba osjetit da moreš i to je to, e... a Damir je jema prav... solo je najbolje vozit.

kašuni by xvii, slikano mobitelom, danas

e...

nebo i more su ka indigo. nima veze. volija se kupat i otiša je na more. more mu znači život. ona isto. brez mora ne more. jema jedna plaža na kojoj je volija baš nju. tot ju je jubija, tot ju je volija, tot ju je mrzija. danas je doša na tu plažu. sta je par metri drugovačije vengo obično, sta je di obično ona zna stat. kad je arivala na more vidila ga je. odma ga je sinjala. pripoznala bi ga uvik, na svitlu, u mraku, izbliza, izdaleka, po disanju, po koracima, po vonju, po bilo kojen bokuniću njega. oče stat kraj njega, a? je, je, kako da ne. a di bi onda bija ponos, dišpet, kaprica, a? uostalon ča je sve bilo, koliko je naidija, ča je sve reka, ča je sve učinija. je, prašta mu sve, ma isto gre dalje, jema žala. šugaman joj je na kraju na mistu di on obično stane. ča je bilo dalje, a? šjor pliva. u moru je i ona i isto pliva. špijat ću vam, jedine su šempje ča su u moru u ciloj vali. čine fintu da se ne vide, a jopet se ispod joka gleda di je ko. jesu li išli plivat na različite strane vale, a? ma ke, e... blizu su. more im se smije jerbo ih zna u dušu oboje. voli ih. još uvik šapje štoriju o jednoj jubavi, more  zna sve. jedino na ovemu svitu koje zna.  nebo i more su ka indigo, volin tu koluru... ćutin se lipo kad je tako. ekola, ajmo, triba se osušit i poč ča prije kiše. eto, bila je to subota pozapodne 27.06. lita gospodnjega 2009.

e...

Pisma o Jubavi

više vride ova 3 dana u jubavi  iz pisme (a i iz mnogih života), vengo 30 godin brez nje...

e...

ča je život kad proleti ka svi moji španjuleti....

godinama gren u četvrtoj, petoj, brez fermat, brez urlapa, brez laškat. dižen se prije šest uri ka da san soldat, rintan, radin.

slušan sve probleme, sve monade, svačije jadikovke. sve gre priko moje kičme, a niko, baš niko me ne pita kako je meni, kako sve to izduran.

zapravo lažen, pita dikod mater a mater je uvik mater i pita je n. dok je tija bit u skupu n.s. - ča je meni oznaka za normalan svit.

eto tako mi je proteklo skoro pet godin. uzdaj se u se i u svoje kljuse, (skoro) niko ne pita kako ti je, (skoro) svak misli da mi može na glavu istrest sve svoje štrace, škovace, čike, lug, ludilo, bis, (skoro) svak misli da mi pinezi restu na grani i da ih je baš u mene na mašure. je, ši, ne znan ča ću š njima, sutra ćemo dilit, itat s ponistre, bacat po pjaci i rivi pa stanite u filu, možda i dovatite kojega marulića... je li ono on na petsto kunića, a?

danas mi se počelo spavat. jednostavno tako, počelo mi se spavat. zijevan cilo pozapopodne, zaspala po ure, zijevan i dalje.

vrime je da se bokunić ferma. u sedmom misecu ću probat peškat koji slobodan dan - triba se naspavat, poč na koji izlet, odmorit malo. tako jerbo drugovačije makinja more prigorit. to ne znači da neću radit, ne moren ja dugo stat š miron, ali bokun ću i odmorit. ono, ne mora uvik bit 4. i 5., ajmo malo u 3.

bit ću šta je moguće višje kraj mora, a oni ča me vole znaju di će me nač, znaju moje štacije. disat ću š moren i odma ću bit bolje volje. brez mora mi je ka da me niko strpa u najgoru tamnicu najsmrdljivijega pržuna. brez mora nisan svoja. more mi je ka i arija.

blog će ići kad buden o' volje štagod notat, a kad ne buden fermat će i on.

eto svitu moj, guštajte i vi, lito je...

navit ćemo i dvi lipe pisme o' jednega bibinjca ča piva ka slavuj. spotove nisan slagala ja i zaradi tega ne obadajite pravopisne falinge, slušajte mužiku, dobra je.

ekola, gren ča!

di?

da di, a? e pa evo jesmo sad rekli, a?

najprvo u pajun, a poza tega na more, kraj mora, uz more, u more,  ispod mora...

e... tuga uvik stvori najbolje. evo jedna više vengo dobra pisma. uključite zvučnike i guštajte!

e... kliknite za uvećat (prvo na litrat, pa onda all sizes), isplati se...

sve by moja malenkost, slikano jučer, mobitelom...

e...

jutros san sredila nike stvari oko posla.

uspila san i vižitat izložbu lipih litrati ča su je u fotoklub uspili postavit entuzijasti ča snimaju grome, vitre, pijavice, nevere i ostale prirodne fenomene, povirite u fotoklub još danas dura, stvarno je lipo. 

neko mi je sinoć napisa nešto ča je  zapravo skroz jednostavno, ali baš lipo. to me skroz obradovalo.

lip je dan, tribalo bi danas povirit i na more.

ajde da i vas obradujen jednon dobron staron stvari... stojte mi dobro, guštajte!

e... kiša budi sjetu. neću ništa reč, mučat ću, činit ću kuco. dosta je slušat kišu i dobru mužiku.

evo još jedna dobra pisma. zna ovi momak pivat, stvarno mu svaka čast. guštajte!

e...

dan mi je bija skroz dobar iako se ništa posebno nije dogodilo. nima veze, srića je ionako u malin stvarima.

na autobusnoj stanici stoji čovik, u škartocu mu kruv. odlomija je vrj kantuna i gušta ka da jema ne znan šta za izist. e a to i je najbolji  zalogaj za stavit u kljun dok ariva tantobus, je li tako, a? gušt mi ga je bilo gledat kako gušta.

bila san trkat na merjan i baš san se iznenadila koliko san istrčala brez uspuvat se i brez umorit se, bravo ja. more bit da san u dobroj formi, a mora bit i da svakodnevno plivanje ipak čini svoje. trkala san, oko mene samo šuma, nebo i zemlja, jo koji gušt. bila san sritna ka malo dite.

obid mi bija dobar, punjene paprike i pire, jo, tega moren guštat i guštat, a već guštan jerbo znan da jema i za sutra. ( fala mama! )

pozapodne me tokalo radit , a šta ćemo, šta je tu je, kad se mora nije teško.

sad ću stavit jednu lipu pismu za koju se opče ne moren sitit je li već bila ovod, ali je toliko dobra da se more uvik slušat. šta ću još učinit, a? e... utrnit škatulu o' kompjutera i poč čitat libar, e... jerbo, vrime je da finin radit za danas. ekola, gren ča, jemate pozdrav!

e... nikidan san trefila jednu žensku koja je o meni zajedno sa svojon pomoćnicon u zanimaciji spletkarenje širila ružne laži. u jameriku bi je/ih čovik utužija, a ovod, e, a ča moreš ovod, a? uvatit je za kose i dat joj dvi po čunki, a? je je baš ću poč šporkavat ruke na tu škovacu, kako da ne...

najbolje je ne učinit ništa, e...

ta me peršona opće ne poznaje. trefila san je na način da je vozila tonobil, a ja san prilazila ulicu priko zebre. fermala je, dovoljno da je pogledan. znala san odma da je to ona.

kako?

e... kažu da nima ružnih žena, ali ovoj mora bit da je duša toliko ružna da je o' tega i fizički ružna. eto po toj ružnoći san odma znala da je to ta.

a šta san učinila, a?

ništa... baš ništa.

prišla san priko zebre, nastavila svojin puten i pustila tega stvora da ostane sam sa sebom, sa svojin zločestin karakteron, sa svojon ružnom dušom, ružnim licem, ružnin tonobilom i svon nesrićon koju u životu jema zaradi tega ča je takva kakva je i zaradi tega ča je ko je.

psi laju, karavane prolaze. ruzina se zlata ne vata. na kraju svi dođu prid svetoga petra, a vrime je takvima najbolji sudac.

otišla san ti dan na more i isplivala se dobro. isto san učinila i danas, brez obzira na kišu, dobro mi dođe poza puno posla. eto, ka ča vidite fala bogu živin, radin, hodan, plivan, vozin itd. ničije laži mi ne mogu naudit jerbo pametan i normalan čovik zna ko je ko, zna ko mu želi dobro, zna kakav je ko i kome će virovat. budala viruje lažima i lako ga je kupit igračkama, ali zaradi tega i je budala.

vengo, a da mi navijemo malo mužike, a? tako je najbolje finit dan, e... ajmo nešto prejako, predobro jerbo finili smo i danas jedan posal i zaslužila san dobru pismu. guštajte!

e...

jučer san bila uz more kad je počelo. narafski da san se i kupala. jerbo, po kiši je najbolje. e ma onda sve višje vitla, diže se more, pini se, put kaštila vidiš samo nike oblake ča pare magla, grmi, siva.

pakuj stvari, diži sidro i ajmo ča doma. jerbo, pari da će apokalipsa.

e... sad će neko reč da je bilo u foje i na tv da će ružno vrime, da koji me je đava tanta da gren na more, pogotovo i u more, da je to opasno, da se moreš utopit, da te more udrit grom i još svašta nešto.

e a...

ši, jemate prav, ma volin more. to je jače o' mene. ne moren ništa kontra tega, e... volin ga i kad je tiho, mirno, volin ga i kad pini o' bisa. more je moj kumpanjo. jedan o' najdražih.

uza more idu i brodi. drveni su zakon.

stavit ćemo danas ovod jedan lipi film o našin brodima. ako znate bokunić francuskoga, štagod ćete i razumit, a ako ne, jopet ćete razumit jerbo i slike tot puno govore.

ovo je bilo lani, festival mora i mornara u brestu.

(radili smo i mi nešto za to, nike prijevode koji su bili potribni.)

e... evo zaradi čega mi je taj autić drag... meni, zakletom pješaku, francuzi su uspili ugodit ovim autićem i eto, vozin... čak i višje vengo san mislila da ću vozit.

e... vrag na rampi ča je prije instituta mi je reka neka okrenen tonobil i da me neće puštit tonobilon put vatrogasnog puta jerbo da je diretur park šume merjan to zabranija jema jušto dva dana. ne more, ne more i točka amen. nisan ga probala podmitit jerbo nikoga ne mitin. pomirila san se sa sudbinom. jedno pet šest tonobili iza mene je puštija. ne virujen da svi jemaju famoznu propusnicu, samo su ih vozili muški, pa mislin da se nije tija s njima karat.  ništa, ka ča san rekla, pomirila san se sa sudbinom i diskriminirajućom pulitikom prima ženskicama, okrenen tonobil i via kaštelet. e... znan, sad ćete reč da je tot poveći konfužjun, da je očajno za nač misto za tonobil, da poslin pari ka da si uša u pakal kako u tonobilu bude vruće itd. ši, xvii sve to zna i zaradi tega san lipo tonobil ostavila gori u ladu da se bidan ne pati ka tovar uzbrdo-nizbrdo i ne krepaje na suncu, a sebi san našla jedno lipo misto koje će pripoznat oni ča znaju baš svaki bokunić našega priobalnoga pojasa.

(za informaciju ista je monada i na kašunima, bila san jučer, očaj o' konfužjuna judskog i tonobilskog)

poza tega san jemala plivanjeeeeeeee i sunčanjeeeeee ča je bilo po mom guštu...

evo i jedan litrat.. eee i sve se mislin da mi je bilo bolje vengo ča bi mi bilo da me puštija kroza rampu. zaradi tega, kad ti život da limun, učini o' njega limunadu. fala in.

kaštelet by xvii, slikano mobitelom, klik za veće

e...

twingić je jopet na ulicama grada splita, a možda ste ga jutros vidili i na ulicama grada solina, šofirala ja.

sređen, ništa se ne vidi, ka da te štete nije ni bilo.

renault gašperov se potrudija i lipo su ga skockali.

eto, ko čeka, taj i dočeka. strpljen, spašen.

fala lipa gašperovu, davoru ramiću, a fala i pbz leasingu i croatia osiguranju. pomogli su mi i oni, dobrim savjetima i dobrom riči.

ahoj lipi galebe moj, by xvii, slikano danas u splitu, mobitelom - klik za veće

je, ovo je sve isti galeb, malo je sletija, pa poletija, sletija i na kraju jopet poletija. slikala ga je moja malenkost koja je još danas (svečano su mu obećali tonobil sutra) brez tonobila. kad san na noge jeman i litrati, e...

***************

e, danas ću morat pofalit vogon iz rijeke jerbo su mi oko jednega problema pomogli i to brez grintanja i kukanja, stvarno svaka čast.

***************

šta još reč, a? a ništa gren radit, jemamo finit jedan posal, radimo ovih dana jakoooooo puno, između ostaloga i nekog vraga za tomas-co , obećala san čoviku, pa sad moran sve učinit da se rokovi ispoštuju.

eto, gren sletit među tekniku, posal zove.

zdravi i veseli bili!

u zadnje vrime samo pisme na blogu... - stigla mi je poruka.

drago čitateljstvo, radimo, u poslu smo do nosa, a danas smo preuzeli još jedan poveći.

zaradi tega molin za malo pacijence...

bit će i pisme i teksta i litrati i filmova, ma svega, e...

roza

tonka

marica

gordana

e...

odlične san volje. dogovorila san jedan novi posal i to se već radi (u nas nikad nima krize, štrajka i ostalih monadi, radi se, radi, a ko radi štagod i zaradi ). naplivala san se pozapodne samo tako, uajme ča mi je bilo dobro. ma sve mi je danas išlo o' ruke,  a najdraže mi je bilo čut da šjor primorac gre ča. mislin da nikoga na svitu nije obradovala ta vijest ka mene. još da oče poč u prdac i ova beleca ča se dogodila za njegove vladavine, pa da odma otvorimo šampanjac i zabalamo ples radosti, e... aj, čekat ćemo i taj dan, ko čeka, taj i dočeka, e...

vengo, kad san tako dobre voje, navit ću dvi skroz dobre pisme. jedna bolja o' druge, guštajte.

e... evo jedne pisme sa šufita, neno je jema kosu, a split nije jema šprd o' rive, bile su to osamdesete. možda i pripoznate koga, nečiji brod oli tonobil... i je, mogla san stivat koju friškiju pismu ovod, jema neno i boljih, ali eto, baš mi se nekako svidija pogled na moj grad ča smo ga jemali prije nešto godin... i grad i pogled, e... dugo toplo lito... guštajte! aj, gren za poslon, pa možda pozapodne upijen vidit i more...

e... danas ja u tantobus, tokalo me poč na drugi kraj grada.

di san išla, a? jeste kurjoži, a?

do servisa, e... da vidin di mi je tonobil. aaaa još koji dan i bit će, znate tribali smo ga iz splita otpeljat u šibenik da se sve sredi i sad još čekamo nike sitnice, pa će bit gotovo. ostajen paf. deštuko. ma odlično, otiša tonobil u šibenik, otišle u šibenik i moje stare nike-patike ča su bile ostale u portapaku (jo, mene je sram, to je tribalo izvadit iz tonobila, ali zaboravila san ), a da ja ništa o temu pojma niman.

sve ovo ću svatit ovako i nikako drugovačije:

super! vidite ča su pravi serviseri, a? rade, čine kuco, odvezu tonobil u šibenik i to o svom trošku, ne pada im opče na pamet  da bi mene zivkali, gnjavili, znaju oni da ja bidna jeman ionako prikovišje posla svaki dan, sve će oni sredit, ja se niman šta sekirat, e...

je li tako mi je ovako najbolje svatit, a?  je, e...

vengo, ajmo ča dalje... dakleM, vozin se ja tantobuson.

moran tako jerbo twingića još nisan dobila nazad. dragi twingiću s nestrpljenjen te očekujen, baš mi fališ. 

vruće je.

ča san učinila, a?

nisan sila, ma ke, e... stojin na noge i nos na otvorenu ponistru. tako je lakše izdurat.

da mi brže prođe vrime, gledan split.

osmatran ga, prolazin ga dobrin dilom.

radni je dan.

narafski,  svi kafići puni, mista njanci za šuferin, pari da nije mižerija, vengo veliko blagostanje.

hm... jesu li rvati liničine? prikovišje druželjubivi? brezobrazno bogati, pa im ne triba radit?

jema tu svega pomalo... ne triba se prikovišje sekirat jerbo se takve navike neće lako prominit.

vraćan se. aj, iskrcat ću se bokun ranije, u split 3. gren vidit je li koja butiga otvorena, radi li opče iko, triba mi nešto.

robot radi - odlično vazimljen toster, stari je otiša u prdac, a ujutro volin tepli kruv. turbo sport radi - vidin jedne neloše patike-postole, dobro će mi doč za litnji đir po merjanu, skonto, o' 250 pale na 89 kunića, ma ludilo, još da jema broja, jema, vazimljen.

do doma gren na noge, jeman force. sićan se prostora di je danas robot, nekad je tot bila omladinska tvornica, zapošljavala je mlade inđinjere, odila san tot na praksu i puno naučila.

e... bravo. praksa. jutros (puno prije servisa) ja isprid firme lama na stinice, triban nešto riješit kad eto ti neke dice tot. čekaju praksu. a jesi li i ti tu za praksu?  - pitaju me dica. jesan dico, onu ča praksira rišit svakodnevne probleme apropo posla jerbo odavno radin, a skula je moja finila jema ohoho... godin je u mene duplo vengo u vas.

skinen bejzbol kapu s glave, skinen očale, neka dica vide da jeman 36. smijemo se i ja i dica.

vengo, očete da van još notajen i pripovidan? eee oču i ja do sutra jedno dvadeset iljada kuna veću plaću, pa je neću dobit.

ajmo ča navit mužiku, tako je najbolje, za laku noć. gre svima vama ča ste ovod povirili i pročitali ovoliki tekst. e bravo, gre i jednome šjoru ča mi fali...

e... en ti iruda, cili život oko mene nike štorije o bogatoj udaji / ženidbi... srića da mene moji nisu odgajali u takvom duhu, beskrajno san im zahvalna na temu. a zašto, a? e zaradi tega ča se triba normalno udat / oženit i to učinit iz jubavi, a bogato je u svemu temu ne jako, vengo najmanje bitno.

jerbo, to bogato, zna bit i ovako:

bogata štorija br. 1

priča mi susid prije nikoliko godin da mu se čer bogatoooooo udala, te njegovi su bogatiiiiiii, te jemaju veeeeeeeelikiiiiiiiiiiiiiii stan, te afitaju apartmaneeeeeeeeeee, te puni su pinezi...

niko ni j o jubavi ne spominje. samo pinezi.

nikidan isti susid priča da mu čer sad živi u stanu ča im ga je on da jerbo da se nikako nisu mogli složit s njegovima.

eee...  odnija vrag i pršulu (tavu) i jaja, a di je bogatstvo, a?

ma mučat ću, gren činit kuco, ne pitan višje ništa, nije na meni da sudin.

bogata štorija br. 2

priča mi jedan poznati da se bogatooooooooooo ženi. govori i ka da je izabranica nika velikaaaa biznismenka, da jema luksuzni stan i veliki tonobil. o njenoj riči ovise međunarodne kompanije.

niko ni j o jubavi ne spominje. samo pinezi.

nedavno mi isti poznati priča da mu je (sad već ženica) bogatunica uselila kod njega u stan ča su mu ostavili roditelji i sad ne radi ništa, njanci neće da mu napravi štagod za obid i opere bičve a kamoli da bi našla niki posal. meni sve nekako neugodno pitat a di je veeeeeliki stan i tonobil, je li to možda vratila  agencijama kod koji je izrentala ili je štagod drugo u pitanju.

eto, mislija prika ne radit ništa i češkat jajca. e ma ne more to tako, ko je vidija tako nešto opče promislit, a? sad jema ča jema i opče mi ga ni žaj kad nije mislija da se potriba oženit normalno i iz jubavi, a ne zaradi bogatstva. 

bogata štorija br. 3

bogato se udala i poza tega dvadeset godin dobivala svaki dan bogato po čunki. i po škini. poza dvadeset godin takve sriće višje nije mogla progucat masnice i buboce i odluči poč ča... e ali  umisto da pođe ča u drugi kvart, pošalje sebe ča, na drugi svit.

osin laži o bogatstvu, jemate i drugih laži i prešućivanja. tako jema onih ča su se oženili u nikoliko država, pa u svaki grad guraju po jedan brak-mrak. jema i onih koji lažu da su finili fakultet, a jedva su skuckali večernju skulu. prikrivaju se duševne boleščine i fizičke mane. naslušala san se štorija tipa: poza trideset godin braka uvatila je muža s muškin u posteju oli ga je našla kako se oblači u ženske mudante i ređipet. di su tek kurbini sinovi ča ostave troje dice i trču za svakon suknjon oliti kurvari, a? narafski, jema i kurvetina. a di su narkomani, pijančine, kockari? jema nesritnjih i nesritnjih zaradi svega tega...

onda, je li se triba bogato udat / oženit, a? oženite/udajte se svitu moj normalno. to vam je najvažnije. ako to uspijete, možda jedan dan budete i bogati, e... a bogata ženidba / udaja more masu puti završit i velikom mižerijom, onon najvećom koja čovika more strefit, onom ča se javlja u ćiverici, e... da to bogato bude drugovačije, prava je lutrija, e... znan doduše i nikoliko takvih, ali to su oni di je bilo i jubavi. dakleM, brez nje ne more. 

e... prvenstvo svita u piciginu 2009., split, bačvice - dan lip, dobar picigin, puno svita na bače. svak je jema svoga favorita, ekipe umjetnici i sunčanica su meni bili najbolji. litrate morete uvećat klikon, potpisujen sve njih i filmove...

evo zaradi čega volin bana. slušajte koja pisma... odlično!  

Vjetar je obrisao trag

Digao je travu sto je

Lezala pod nama

I kao da nas nikad nije bilo

Kao da si uvijek bila sama

Vjetar je obrisao trag

More je obrisalo trag

Tragove u pijesku

Prekrila je plima

Pa vise ne znam da li je to san

Il' ispod pijeska neceg ima

More je obrisalo trag

Vjetar cu moliti za znak

Samo da nadem dokaz nase srece

Vjetar cu moliti za znak

A mozda ispod pijeska neceg ima

e... je, neradni je dan, ma san i danas nešto radila.

a šta, a? evo, upravo san sastavila natječaje:

http://www.parametar.hr/slobodnaradnamjesta.html

i stavila ih na naš web:

http://www.parametar.hr

molim ne vršiti pritisak, ko zadovoljava uvjete a oče radit neka se javi, uvik moremo uzest i više svita, vrimena za javit se jema, razloga za nervozu nima.

e... ovod jema svita ča zna pivat, meri je jedna o' njih... odlična stvar, guštajte!

e...

aj evo, za prominu gren i ja malo kukat i grintat, pa da vidite kako to izgleda.

• najedanput je prikovišje zavrućilo, ajmeeeeeee
• more je danas na kašteletu bilo šporko (nažalost, ali istina je), božeeeeeee sačuvaj.
• twingić je još u servisu, šmrc. šmrc. šmrc.  pomalo počinjen patit brez njega. a da u meni ipak ne spava vozač, a? 
• zaradi jednega teksta jeman jednega ofenđenog, šticanog, povriđenog i uvriđenog čitatelja. gospe mojaaaaaaaa, šta ćemo sad? a ča je isti povridija mene, to nima veze, e... jerbo, ja nisan o' krvi i mesa, vengo o' arije, pa ništa ne ćutin. meni se more svašta reč, oli je bitno kad se mene povridi, a?  
• po ovim butigama same štrace prodaju, višje me štufalo išta gledat i tražit, ništa normalno nima, sramotaaaaaaaaaaaa.
• ide mi se na izlete, a moran radit. ajmeeeeeeeeeee. a ja bi na murter, na kornate, na slapove krke i na šoltuuuuuuuuuuuuuuu. dosta mi je samo s ponistre gledat šoltu. oču na šoltuuuuuuuu. na kornate isto.
• ispalit ću višje, uvik triba čekat da se voda ugrije za otuširat se. to mi je tako kad niman protočni bojler.strašnoooooo.  
• ufffff, ajmeeeeeeeeeee, uffffffff, aj kvragu evo dosadilo mi je višje, štufala san i samu sebe poza ovoliko kukanja, a di neću druge. ekola, gren ča, nastavljan plakat u kušin.

   

ko me oče tješit jema xvii@xvii-online.com , najoriginalniju utjehu ću objavit, a ako baš bude dobro, moren ga/je i nagradit, recimo kavon, đelaton i sl.

e...

uštekaj zvučnike i čini kuco, slušaj mužiku!

e...

vraćan se ja danas s banjanja na merjanu, potez spinut - bene. dosta je svita, konfužjun. gledan kud ću proč kad eto jedne drage žene koju uvik rado trefin i s kojon uvik rado popričan. govori mi da šeta, ali da će morat požurit da uvati tantobus u 7 uri na bene.  korak joj je brz i siguran. rič pametna i svaka na mistu. nikidan san je trefila i na rivu isprid otela merjan. zapravo, svako malo je trefin, dođe ona često iz solina u split. danas mi govori da se nije još počela kupat jerbo da je ove godine bokunić friškije, ali da oče za koji dan. to je moja profešurica iz rvackog iz srednje skule. ništa neobično, sad će reč neki.

e a znate li koliko jema godina, a?  83 (ričima: osamdeset i tri).

e sad, apropo ovega teksta pitan mlada grintala o' 13,  23, 33, 43, 53 itd. jeste li danas digod bili? kad ste zadnji put bili šetat, trkat, plivat? je li vam baš svaki dan mora bit glup i dosadan s pokličem: ajmeeeeeeeee šta mi je dosadno, ispalit ću?!

eto, vidite žene, svaka joj čast, 83 i nije joj teško svaki dan arivat iz solina u split prošetat, plivat, trefit koga, proćakulat. to se zove pametna žena.

živi i ti  život, svaki dan je poseban!

Savjeti jednog od najbogatijih ljudi na svijetu - razgovor s Warren Buffetom

• Novac ne određuje čovjeka, ali čovjek je stvorio novac.
  
• Živi jednostavan život kakav si i sam.
  
• Ne radi ono što ti drugi govore. Saslušaj ih, ali napravi ono što ti se čini ispravnim.
  
• Ne padaj na brandove. Nosi ono u čemu se osjećaš udobno.
  
• Ne bacaj novac na beskorisne stvari. Kupuj samo ono što ti dosta treba.
  
• Nakon svega, to je ipak tvoj život. Zašto pružiti priliku drugima da upravljaju njime.
  

preuzeto s

http://www.budi.in/1670-clanak-savjeti-jednog-od-najbogatijih-ljudi-na-svijetu.aspx

i to zato ča je dobro, pametno i korisno.

priko linka pročitajte sve, stvarno je dobro.

nešto jako dobro...

dva morska litrata by xvii, slikano danas u splitu, mobitelom, klik za veće

e... ovo je još jedan radni vikend koji san zaradi posla (ali i zaradi twingića koji je još u servisu) provela u splitu. narafski da mi opče nije bilo loše. nismo još gotovi, toka nas još radit za danas... dala san posla i sebi i drugima, e... a odakle mi litrati, a? e kako piše, iz splita. slikala ja jutros kad san išla učinit đir oko merjana i plivat na kaštelet... jerbo, kad se oče, sve se može. bitno se dobro organizirat i ako to uspiješ, moš se u splitu i banjat i radit i to za firme  i institucije iz splita, ali i iz metropole ka ča smo radili i mi ovi vikend. zapravo, niko ti ne brani da radiš za cili svit, a budeš u najlipšen gradu na svitu. samo je nebo granica.

kašuni by xvii, klik za veće, slikano mobitelom

jedan o' najlipših dilova dana je svakako bilo plivanje na jednoj o' najlipših plaža u splitu...

*******************************

dakleM, nemojte bit šempja ka ča  je ovod opisano  i stat doma čekajući godota. lipo na more, u prirodu, vanka i neka gušti počnu. samo mona more stat doma i grintat. e... tako lipo i šta vas briga ča će ko reč , budite sritni i zadovoljni; neka ti ča olajavaju druge pate kad ih smeta.

e... javili su mi se muški.

kažu zadnji post je dobar, ali si zaboravila nešto puno važno. naša pisma, e... to je puno važno.

jemate prav! tako je!

evo, još nešto radin, a poza tega gren na more (odlično je plivan svaki dan barenko po ure ) , tako da ćemo dok san još kraj ovo škatule o' kompjutera odma navit jednu lipu pismu. guštajte!

e...

evo nikih životno važnih pitanja koja su vrlo bitna u životu jednega dalmatinca tipičnoga.

(u ovemu tekstu tretiran samo muške muške, a one ženskaste koji čekaju da im žene daju/posuđuju pineze i kojima je samo važno kakva im je kolonja i je li im kolet i franzete dobro stoje neću komentirat - s takvima jeman posla samo kad baš moran (npr. zaradi posla, susidstva i sl.) i nisu mi opće ni dragi a ni zanimljivi)

gre ovako: 

• ajduk - ajduk je životno važno pitanje, o temu se govori i razglaba svaki dan i svugdi - na poslu, na banjanju, kod susida, sa ženom/curom
• brod - svaki muški muški ga obično ili jema ili ga planira vazest. svakome muškome muškome on prvenstveno ne služi za lovit ženske (daklem, ne triba bit sunseeker, more i čagod skromnije) jerbo muški muški jema mota pa mu nije ni problem nač žensku, vengo za poč u ribe. oko broda uvik jema posla, triba ga vezat, odvezat, čistit, vadit iz mora, pituravat, mislit kako sačuvat vez (ovo o dobivanju i čuvanju veza je tema za posebni post)  itd. brodon se gre u najlipše vale, brodon se pođe do najboljih pošta, na brodu bi muški muški učinija i vinčanje i sprovod kad bi moga.
• tonobil - i oko njega uvik jema posla, a muški muški obično jemaju tonobil. ako nimaju pinezi za nešto bisno, ležat će ure i ure ispod tega tonobila dok mu ne promine sve sastavne dilove i ne učine nešto bisno.
• mali balun, košarka, trešeta, briškula, balote, foji i ostale zanimacije - obično muškome muškome dobar dil vrimena ode i na ovako nešto.
• posal na poslu i posal u kući - muški muški obično jema dva posla - na poslu i doma. radi i ispod časti mu je da ga žensko 'rani. ako mu rečete da lipo pođe ča i nađe neku bogatu žensku, pa neka lipo cili dan stoji doma i češe ja*a, smijat će vam se. jeste li normalni? ne bi on moga tako nikad, ma ke, e... bolje je ovako, on oče radit, on mora jemat zanimaciju, on se mora dokazat. dobro, dikad je malo lin, ali bogatunke on prepušta ženskastim muškima. a doma, a? e muški muški vam doma neče šumprešavat, prat cakla i luštravat, ali će vam piturat, zavidat svaku vidu, prominit lavandin, sastavit i rastavit armerune, zaminit štekere itd.
• brudet, šalša o' pomidori i ostale delicije - važnije mu je je li o' obida ostalo malo u tečicu da more guštat i za večeru, vengo stanje  dionica na burzi.
• kumpanji - a s kin će poč od baluna do banjanja, a? ne more uvik ni  samo s vama, a ni sam, uvik se nađe i neki kumpanjo.
• žena njegovog života - iako bi prije umra vengo prizna, to mu je vrlo bitno i na nju također troši svoje vrime.
• dica - ka i žena njegovog života. dobro, možda im neće oprat gujicu kad su malešni, ali kapac je sve učinit za njih, tuč more, tuč balunon na zvončacu, ma uvik su u njegovim mislima, za njih živi, a ako triba i umrit će.
• beštije - obično nije mrzitelj i obično u njegovoj kući jema pas, maška oli barenko tič.

eto, kad bi onda jedan prosječan dalmatinac ča gre u skup muški muški jema vrimena za bit tamo neki političar, poteštat oli pricidnik države, a? a vidi koliko je tega važnoga i bitnoga u njegovom životu. višje njemu vridi njegov život pravoga muškića i njegov mir, vengo pusti položaji, pinezi i ostale monade. ko more platit dva piruna brudeta ča su ostala o' obida koje izi drito iz tečice, a? a ko more platit kad se odriši cima, uvati timun i zaplovi prima spli'skin vratima? koliko vridi smij njegove žene i karanje s kumpanjima je li akuža bila pravovaljana? ajte svitu moj, molajte ga s drugim stvarima, on je naša svoje vridnosti, a raznorazne pizdarije rado pripušta drugome. za njih se neće otimat, nije to vridno, ma ke, e... ma koliko se naglas dikod i zna žestit, duboko u sebi samo će reč: fala ti bože da ih se neko oče privatit.

 Filip danas jema 3 godine.

Sritan ti rođendan Filipe! 

Veliki pojubac samo za te!