pristojno posuđeno iz libra ča se zove spliski memento

 1. neboder u split by xvii, slikano jučer, klik za veće

e... split nije jamerika i nima nebodere na sto podi. njegovi neboderi jemaju tek svoje male, lokalne štorije. ne virujen da su svitski poznati. možda kvartovski. recimo, neboderi na kmanu oli neboderi blizu dičjeg dispanzera oli oni blizu kineskoga zida. neboderi na mertojak. itd. znate li koji je neboder prvi sagrađen u split, a? e... bilo je to 1962. split je dobija prvi neboder i meni se nekako pari da je zaradi strojarnice ča mu je na vrju to uvik bija i osta najspecifičniji neboder u gradu. baš zaradi tega oblika, e...

vidi se on sa moje ponistre, a ka ditetu mi nikako nije bilo kjaro ča je to. uvik san se pitala šta bi to moglo bit. jedan dan mi je dida složija štoriju da je to vrčina (tuta za one ča ne znaju ča rič oče reč) o' jednega velikoga barbe koji tot dođe učinit potribu. narafski da smo didi virovali. dida je bija zakon u mojin dičjin godinama, ko je opće moga promislit da to nije istina, da je to sprdačina i tome slično. danima san kurjože gledala kroza ponistru a sve neću li ugledat velikoga barbu. tako mi je i dandanas ostalo da dikad ne rečen pomgradov neboder oli neboder o' pomgrada vengo tot di je neboder ča jema vrčinu.

e... sad mi je još štagod palo napamet. sićate li se recimo štorije o plavon radionu? višje opće nije plav, ali ako rečete plavi radion svit ča je iz splita će sigurno znat koji je to neboder, a oni ča su friško arivali u split će vas narafski gledat incukano. aj, o njemu ćemo u litratu oli slici i riči koji drugi put, jema dana.