e... ma ajde šta tot floćaješ vruće je, ne da mi se,  notaj štagod duže, da jeman šta čitat - arivala mi je poruka i štaš sad, nekako me ni voja pisat, a jopet svit bi tija čitat.

nima mi druge vengo dobit volju, uključit klimu i notat štagod, e... ne notajen ovod sve u realnon vrimenu, dikad se ošervan i bokun unazad, pogledan put godin ča su odavno finile, spomenen se i peršoni ča su finile na ovemu svitu. e bravo, kad san već kod tih peršoni ča ih višje nima, jeste li sinjali kad čitate šonete da su svi bili dobri, plemeniti, najveći kumpanji, kruv o' čovika, najdraži očevi, matere, jubjeni i voljeni, e... nima drugovačijih, pari ka da oni ča su partili nisu nikad njanci zabeštimali, a kamoli ikome štagod grubo učinili, e...

tako ću se ja danas sitit jednega moga susida ča je partija jema nešto godin, a narafski bija je puno dobar, ono kruv o' čovika i zaradi tega mi je upravo i pala feta kruva na pamet, zaradi ničega drugoga, e...

ma ko, šta, di, a? e sta je ti susid na pod o' ispod mene i gušta je činit dišpete, ali nisu to bili bilo kakvi dišpeti, bili su to ni višje ni manje vengo smrdljivi dišpeti, dišpeti za udušit se...

tako je jedan put kolafinta nešto piturava virovali oli ne 79 dan (ričima: sedamdeset i devet dan). morete li to virovat, a? smrdila je cila kuća, smrdila toliko da smo se višje i navikli, posta je ti smrad dil naših života, a da nam doživljaj bude potpun, stavija je ti šjor dobri susid terpentin u pokriva o' recimo marmelade oli drugih raznoraznih važi i nareda to na ogradu o' balkona. na sunce, e... liti, e... asti gospu, čujen kako sad govorite, koja perverzija, e... ma di mu je tako nešto palo na pamet, a? e palo mu je i sve smo to trpili i gucali, ko je smija šta reč, a? a i kome bi reka, a?

ništa, smrdi, privikli smo se, prolazi vrime. jemala san u to vrime lipe garifule na balkonu i kad je moj vrli susid čuja da ih zalijen, odma je napravija napad. šta je učinija, a? ni manje ni višje nego je zva policijote. e to je učinija, zva je puliciju, a policijoti su i arivali. kad su arivali još mu je žena poslala i unuke da me napadnu bivajuć duboko uvjerena da će im to o' isprid policijota bit puno lako. e ma zaboravili su jednu bitnu stvar. koju, a? terpentin. terpentin u pokrivima. na suncu, na ogradi balkona.

- ča ovo smrdit za popi*dit, a? - odma je pita čovik ča je organ narodne vlasti.

- terpentin - rečen ja.

- terpentin? - pita jopet policijot.

- e - potvrdin ja.

- a ča s tin činite, a? - reče policijot.

- ja ništa, eno pitajte susida doli, a prije vengo pođete u njega povirite mrvicu s ograde moga balkona da vidite ča je sve nareda na ogradu svoga balkona.

*****

u isto vrime unuci probali fizički napad uz poklič da će virovali oli ne silovat i ubit.

*****

organe narodne vlasti san obavijestila o' temu da su na dužnosti i onda su se sitili tim vrlin unucima napisali prijavu, a i susidu otišli reč da miče ča ti terpentin. eto baš lipo ča je zva policijote apropo moga zalivanja garifuli, je li tako, a? vidite kako je bija dobar moj susid, kruv o' čovika. tako smo nakon osandeset dan normalno disali i s obziron na tu torturu nisan se prikovišje sekirala ča je danas bokunić vonjalo kad san polituron namazala i izluštrala parket u jednu kamaru. vonj je već pri kraju i ča je to naspram 80 susidovih smrdljivih dana, a?

narafski, sad je moj susid bija bisan za popizdit jerbo mu je terpentin-monadama doša kraj. smislija je iduću perverziju. usrid noći je počeja primištat mobiliju, vuč armerune, činit zvučni urnebes. duralo je i to danima, a onda je došla jedna noć kad mi je sestra tribala spavat jerbo je ujutro tribala partit u zadar.

smislila san nešto, e... ča, a? mome dobrome susidu, kruvu o' čovika servirat ću fetu kruva.

vazmen štrucu kruva i okinen fetu. u pupi, na vrju fete, napravila san prston bužu. kroz bužu san provukla bokun špaga i vezala ga za fetu kruva. drugi kraj špaga san vezala za ogradu našega balkona.

asti sto urnebesa, susidi s druge bande kvarta su mu ujutro najranije, kad su sinjali fetu kruva kako visi, vikali: alo, oli si gladan kad ti susidi spuštaju fetu kruva na špag, a?

ako dođu policijoti, reč ću im da puno volin beštije i da je ta feta kruva da tiči jemaju šta izist. u međuvrimenu san š njon povuci-potegni oli ka tiramola. mic doli mic gori, ali nikako mu ne dan da je se dočepa. onda je zva i sad ex pricidnikovicu kućnog savjeta da mu pomogne skinit tu fetu. eto tija je kruv o' čovika da ona tu fetu vidi i pomogne mu se popet na katrigu da je skinu. kako ona nije kruv ka on, nije se penjala na katrigu, moglo je to bit prikovišje opasno. opasno po život, e...

kako je ovo finilo, a?

nikako, e... skinila san je ja kad me predstava štufala, a moran priznat da mi je bija gušt bokun vratit tome kruvu o' čovika baš feton kruva. poza par godin o' tega je finija njegov život i sad drugi jemaju višje prostora za monade, e...

eto, tili ste tekst, dobili ste tekst. ovo mi je za rubriku biseri i dragulji - najbolji susidi na svitu. gren ča, jemate pozdrav!