e... kažu da će ženama produžit granicu za poć u penžjun i da će žene tokat radit ka i muške. meni nije teško. neka tega, neka. a privatnin poduzetnicama bi tribalo produžit rad sve dok ne parte na oni svit. jerbo, neka lipo pune proračun i neka ih lipo ka danas mene o' jutra do navečer zovu/emajliraju/jopet zovu i neka tako bude svaki dan. narafski, neka to čini kvarat zemaljske balote, po rvacke i tutokompleto ovi ludi grad. i narafski, neka svi jemaju upite ovega tipa:

- mađarska državljanka oće stat u budimpeštu i radit baš u moju firmu ča je u split, pa joj sad objasni da u rvacku triba jemat bokun karte ča se zove domovnica za dobit posal i da stranci idu po posebnin propisima i da rvacka još nije u eu.

- jedan šjor ravnatelj jedne poznate kuće u ovi ludi grad ne razumi da se posal koji se oće naručit od moje tvrtke dogovara na službeni broj tvrtke, sa menon (jerbo san ja diretur) i da je tvrtka ta koja mu daje garanciju da će se posal odradit, izdaje račun, itd. čovik je bija uvjeren da to more dogovarat na privatni mobitel jedne zaposlenice i to početnice. ajuto mama mia, zemljo profundaj se, ko vas je stavija na sva ta bitna mista. zaradi njega me tokalo potrošit priko trideset kuna na mobitel. a početnici narafski po ne znan koji put reć ča more, a ča ne more početnik. i ča smi samo diretur.

itd.

jema i normalnih, pa jema i grintanja, jema svega...

- služba za korisnike rvackog t-coma je postala toliko susretljiva i toliko voljna pomoć da je to čudo jedno. mirakul pravi. šta zaradi jednoga telefona ča je ka tovar i neće da na našu mrižu prikaže broj, šta zaradi jedne reklame ča će ić kod njih , danas š njima na ti telefon a skoro cilo jutro. vole mi čut glas. narafski da je ovo susretljiva krajnje ozbiljno rečeno, a ne ironično. oni su se, naime, puno popravili, barenko prima mojin iskustvima. more bit da je to zaradi konkurencije.

- ajmo ča dalje, svit ča radi za tvrtku more i ne more, kako ko. niki su štufi mladih godina, a niki najboljih, niki su puni elana, a niki nimaju force, umorilo ih je puno i na druga mista. sve pročitaj, iščitaj, saslušaj.

jema tega još, neće sve stat ovod na ovi internet pa ću fermat.

da se mene pita, tribalo bi ovako: toj nižoj vrsti o' privatnih poduzetnica bi tribalo odma ukinit plaću. neka sve daju državi kad već znaju zaradit. šta će im plaća, u buštu im ne triba bit ništa, ne tribaju ni izist nešto, neka žive o' arije, a kad se bolje promislin specijalno njima triba nabit i porez na tu ariju. nego šta, neka budu sritne ča opće dišu jerbo tu nižu vrstu je tribalo bacit u more čin su došle na ovi svit. u likara nimaju šta poć, ko je vidija bit bolestan. narafski, zakonon in triba zabranit i spavat jerbo i kroza to vrime mogu štagod radit. ne triba im njanci dopustit promislit da bi mogle jemat fameju, dicu, poć na koji izlet, vazest bar jedan put u tri godine godišnji. ča će njima urlap, to nije za tu nižu vrstu, e...

sve ča im se smi dopustit je rad i neka po mogućnosti bude šta luđe, šta bizarnije, neka im to sve skupa ne bude dosadno, e... narafski, neka ih za te sve pineze ča daju u proračun toka i barenko jedan put godišnje poć u doba radnog vrimena i na puliciju, na odjel za organizirani kriminal jerbo sa svin pinezima ča daju u proračun dica nimaju šta jemat pravo na normalno obrazovanje, neka ih po skulama uče i likovi iz šporkarija malog marinka, e... sigurno se pitate ča je s tin, znan... a ništa, ča će bit, gospoja y još uvik "uči" dicu s tin "lipin i šesnin" timbron, jerbo dok rvacko pravosuđe počne štagod činit puno će još godin proć kroza švere, e...

gren ča. neću višje kukat, bit će vrimena do penžjuna, e... ako ga na kraju i ne ukinu, e... jemate pozdrav!