e...

dođen ja danas na vatrogasni put na merjanu, isto misto di i jučer (vidi sliku, prošli post). tot narafski triba znat dobro plivat, pa onda tot i nima baš prikovišje svita ni usrid lita, a kamoli sad. kako je jutros bilo malo gnjilo vrime, danas pozapodne prazno, nima pasa. lipo raširin šugaman, sidnen, otvorin libar, hm, arija je tepla, aj, dvi stranice, pa ćemo poč plivat.

e, je, ma ke, roge ćaćine, e... eto ti nekog lika koji je sve samo ne moj tip. dakleM, ako ovo sad čita, neka čita i da nije moj tip.

bidan nima di sist vengo po metra o' mene. o' cilog svita i merjana on bidan nima di vengo tot. moš mislit.

i sve se nešto vrti, okriće, privrće. eto ti ga sve bliže.

uajmeeeee, kupin boršu, kupin šugaman, kupin sve i kupin se. dvadeset metri dalje.

mislite da je osta na  mistu di je bija prije? ma ke, eto ti ga jopet za menon.

tila san mu reč: "skužajte šjor, ma puno ste falili, ja san van inđinjer i ne tendin se u medicinu, e... nisan likar" ma isto činin kuco.

uajmee, ajutoooo mama mia, udav je sve bliže. kupin se po drugi put i pravac kašuni (druga plaža).

tot je svita bilo i prikovišje, more je bilo ludilo, sunce isto. u more dva puta. ne dan se, jema u splitu plaža i vala, bogu fala, e...

a šta drugo, a? pa neću valjda propustit banjanje zaradi tamo nekoga pacijenta . jedan je život...