e...

kakvu četkicu za zube duperate, a?

narafski ovo se odnosi na svit ča ne nosi dentijeru vengo još jema svoje zube. kako su moji zubi pravi, a ne falši ja vam moren iznit moja iskustva samo oko četkica za prave zube. dakleM, cili moj život u mene je bila najobičnija četkica za zube, četkica ča se micala na način da ja njom trljan. sve do nikidan, e... nikidan mi je zubarica rekla da mi ne bi bilo loše nabavit električnu četkicu, da je osjećaj bolji, čišćenje temeljitije. dobro, ajmo ča probat , pa ćemo vidit je li tako - mislin se ja.

đir po butigama i apotekama mi je pokaza da su razlike u cijenama nevjerojatne, cifre se kreću od 80 kunića pa do 1200 kunića. da, da iljadu i dvista, dobro ste pročitali. narafski, postoje dva osnovna tipa: one ča se uštekaju u šteker, pa ih goni letrika iz mriže i one ča su na baterije. nastavke morete brez problema minjat i tako jednu četkicu more duperat cila fameja - svak jema svoj nastavak i to je to. kad kupujete pripazite i da vam butiga more zajamčit da će jemat odgovarajućih nastavaka za vašu četkicu u dogledno vrime. marki jemate raznih, višje i manje zvučnih, a nike od tih četkica jemaju i dodatne opcije ka ča su timer, masažer i sl.

šta san ja vazela, a? ja za pineze moran radit i niman ih na bacanje, pa san u dm-a izabrala lipu četkicu njihove marke ča gre na baterije i ona me s jednin nastavkom i baterijama došla 79 kuna. vazela san još dva nastavka da jeman ka rezervu za oko 30 kunića i konac o' iste vrsti za 7 kunića.

dojmovi: više vengo dobro, čisti temeljito, riba, sve se sjaji. jema dvi opcije - za normalne i osjetljive desni. nikih posebnih dodatnih opcija ova četkica nima, a kad se mrvu bolj promisliš mislin se da i nisu opće potribne - otprilike uvik znaš koliko je minuti u pranju prošlo, a obid ionako moraš sam(a) učinit, neće ga četkica napravit ma ke, e... je, moš poč štagod izist i vanka, niko ti ne brani, e..  e, to, za vanka, a i na izlet oli put, mislin da je ova ča gre na baterije bolja opcija, e... nigdi je ne triba uštekat, a gre odlično, kud ćeš bolje, a?

http://www.dm-drogeriemarkt.hr/dontodent.asp

evo, marka je DONTODENT za sve zainteresirane. ja san zadovoljna.  

za oko 200 kunića morete nač isto štagod normalno, a onu opciju od 1200 moremo ostavit nekome kome pinezi arivaju u ogromnin količinama brez truda, a ja eto nisan ta.

aj gren ča, vrime je da se maknen o' ove škatule. pozdravljan lipo!