petak:

cilo jutro posal, pozapodne tek bokunić vrimena i merjan. hm, griva mi je čupava, aj, gren se poza merjana i ošišat. već je večer. dok san u frizeraju, stiže mail na mob. sa tekston, prijevod za posal ča nan je upravo dura, prevodimo nike teknicke tekstove.

eto me uza skale, jednon rukon skidan mail da vidin sve ka čovik, a drugon mišan pituru za opiturat kosu. dok se sve otprintalo i pripremilo za rad ča će bit u subotu, večer prilazi u mrklu noć.

subota:

žveljarin mi je navijen na 6 uri. dižen se, spreman se i pravac ajdukov stadion; dogovorili se moj instruktor i ja da ćemo čunje vježbat cilo jutro, a počet ćemo ujutro najranije u 7 i po.

mislite li da je bilo šta o' te ranojutarnje vježbe, a?

a evo, u 7 i po zoven tega uvaženoga šjora na mob., a on je narafski još u postelji jerbo di bi drugo bija, pa subota je, bože mili, eeeee... i to u kaštelima, pa eto, neka ga malo čekan, arivat će on u 9 i po.

šta ću sad? a ništa, gren ča ubit vrime na merjan. do instituta i nazad i proč će vrime.

vježbanje je počelo u 9 i po i još malo, a po kiši je to sve skupa bilo šesno i lipo, odnosno moj napredak po čunju još uvik nosi puno muke po čunju, a ja san eto kako mi je rečeno jedna zvir koja nekontrolirano vrti tin volanon pa zaradi tega triban sve to još učit. eto, vrag odnija i pršulu oli tavu i jaja :o(.

inače, mome instruktoru je o' moje malenkosti rečeno da ja opće nisan zvir vengo jedno skroz pitomo biće, ali eto jeman uvik u životu čast upoznat nike zviri, pa kad se družin sa zvirima, bit će da je koja zvirska osobina i na me prišla, e...

- dobro se provedi Nado za vikend - reče moj instruktor i pozdravismo se mi do iduće muke po čunju. vožnja gradon me gre ok. to je sve bolje i bolje.

- moj provod ovi vikend je rad, jerbo, blago mi se, ja san privatnik - rečen ja i pođen ča.

obid mi je bija odličan, a poza njega je nastupija krvavi rad. ja i gorka , svak svoje, ja inđinjerstvo, ona rvacki. cila subota do kraja i skoro cila

nedilja.

eto, to mi je bija provod za vikend. isporučili smo sve mailom pozapodne, još me tokalo sastavit račun, sve složit i na kartu i sutra će to poč i klasičnom poštom.

kome? jeste kurjoži, a? a evo, špijat ću vam:

u SPOMO-STIROPOR d.o.o.

onda, kome je ka meni, a?

jeman novu frizuru, jeman još jednu referencu, zaradilo se i nešto pinezi, di ćeš bolje, provod za +5.

ovi vikend tako, a idući ča život da...

gren ča, pozdravljan lipo!