e... po otvaranjima izložbi i promocijama i ne gren baš često, rađe čekan koji dan pa povirn na miru ča jema jerbo me slike, litrati i libri istinski zanimaju. ritko me koja čunka more činit da stignen na promociju oli svečano otvaranje. arijana čulina je umjetnica zaradi koje se svakako isplati malo poč i u konfužjun. glumi dobro i piše dobro i kad se sve to spoji jemate odličan događaj oliti kako se danas moderno reče event. sigurno ćete se nasmijat, čut o našen životu svagdašnjen na ovin prostorima na jedan krajnje duhovit način koji gađa šta bi rekli sinjani u sridu. i to jušto, e...

jutros san bila na promociji libra kako sam postao faca autorice arijane čuline, detalj san uvatila aparaton.  ovo je knjižara na dnu pjace u split. moren vam reč da je bilo odlično. autorica je najprvo predstavila libar, a poza tega čitala ulomke i davala posvete. 

a sam libar, a? vazela san ga, narafski, virujen da ću ga guštat čitat. danas me je po nikoj povlaštenoj cijeni doša 99 kunića, a darovali su i još jedan š njin. inače dođe 119 kuna.

to je priručnik za modernoga čovika, čovika novoga doba. kako na korici libra piše tot se moredu nač detaljnje upute kako privarit, ukrest, kako postat "poduzetnik" omiljen u društvu i među ženskama. autorica je lipo rekla da je to zapravo uputa kako o' pizduna doč do tajkuna. glavni lik je bija čovik koji je eto živija pošteno, čista srca, jema umjetničkog dara, ono, urbani tip. ka takav je narafski bija pizdun. onda je uveja promjene u svoj život i posta čunka.  tražena. bitna. narafski, počeja se bavit i politikon, brez nje se ne more. na kraju promocije san pitala autoricu: a o' kojega je ministarstva naš srećko, a? ma bilo kojega - odgovori arijana i nastavi - oli je opće bitno znanje i sposobnost, pa oli ne vidite da se šeta o' ministarstva do ministarstva, ministarstvo gospodarstva, ministarstvo obrane, ministrarstvo svega i svačega, ministarstvo o' konduta itd. glavno da je ministarstvo, e...

jeman i autogram na početku libra i baš san zadovoljna. bilo je to jedno dobro jutro. a ča je čitala, a? ulomak o' temu kako je do uspješnoga čovika teško doč, kako se ne javlja na tel., kako čini svit čekat, kako glumi veličinu i faraona i kako je to isto jedna o' riceti za postat faca. neću vam ovod prinosit dilove libra,ma ke, e... vazmite ga u ruke i čitajte, mislin da će bit dobar ka i sve ča je dosad notala, e...