e da mi je neko reka, u ono vrime dok mi je dura studij, da ću morat uza sav moj posal mislit i o profešurima raznih jezika, karticama teksta i sl. čovik bi mu reka da je infiša, da ča se to mene tiče, da ću samo letriku radit, e...

je, je. roge ćaćine. ma ke. a kako je u praksi, a?  koliko je vrimena realno radin? a more bit nikih 5 do 10 % radnoga vrimena, a o' tega najmanje činin elektroenergetiku koja mi je zanimanje, moja jubav i zaradi koje se mladost ostavila u formulama.

ča činin u ostalo vrime? falili ste ako mislite da samo guštan. evo ću van špijat. napominjen da u mene nima sastančenja, to je gubitak vrimena. narafski jopet dosta vrimena gre na rubriku telefon, mobitel, e-mail, dogovori, razgovori. zatin klasična pošta. poza tega kartušina, barenko dvi ure na šetimanu sidin u računovodstvu i potpisujen hrpe i hrpe kartušine (to je još dobro kad je tako), naplata (najveći problem u rvata, ali ipak uspijen da se nikome ne duguje i da mi niko ne duguje). dogovaranje novih poslova, dogovaranje reklama, dikad put. internet, web. domjenke nastojin škivat. novogodišnje čestike šaljen. na banku i finu ka i poštu gren redovito. dikad na poreznu. u ostale buže o' države pošaljen g. redovito, a ja pođen dikad.

trenutno uza moju malenkost mislin na još 8 svita ča se ne zove ka ja (ugovori, mail, web, razgovori, jesu li odradili, jesu li plaćeni i sl. narafski, slušan i njihove privatne radosti i žalosti).

ako mislite da je to sav svit na koji mislin, privarili ste se. a di su dobavljači (npr. karta, uredski pribor, hosting i sl.), naručitelji poslova, poslovni partneri. na konkurenciju ni ne stignen mislit, a boga mi tribalo bi malo i to. jerbo, čini mi se da niki prikovišje misle na me, a premalo na se.

toka me čitat i puste zakone ka da san pravnik. o ekonomiji me na moj fakultet o' letrike fesb nije naučilo praktički ništa, ali danas već znan i o tome nešto.

moren sad ovod još nabrajat, ali neću. da ne ispadne da grintan.finit ću sa:

je mi lipo, jeman vizitku na kojoj piše mr.sc., dipl. ing., direktor i tako to. samo mi je 34 godine. guštan, a pinezi arivaju. baš meni, e... jerbo me puno vole. i stignu tako, sami o' sebe, brez se puno umorit. :o) 

a samo me je zanimalo ča se to dogodi kad udre grom i kako se to letrika učini u zakučac, a meni doma svitli žarulja...

e da mi je neko reka...

dakleM, ovod vam je firma (www.parametar.hr), obično raspetljavamo ono ča drugi nisu znali/tili i tako to... nismo lini, zovite, bit će nan drago. :o)