e...

ovo mi dođe ka nika likarija, za odmorit dušu, e...

• jerbo, cili dan pada kiša.
• jerbo, jutros me je tokalo nikoliko uri ašištavat meštre ča su došli stavit klimu u ured i ćakulat š njima (to smo požurili prije toplotnoga udara; doduše još uvik san kontra te škatule, ali moran je jemat zaradi stranki), dovest sve u red kad su išli ča.
• jerbo, danas me je tokalo radit i sav uobičajeni posal.
• jerbo, danas me je tokalo zvat na razgovore profešure o' talijanskoga (oni ča još nisu pozvani neka se ne sekiraju; mi to pomalo uklapamo, kako jema posla ča odgovara završenoj grupi i iskustvu).
• jerbo, jedna me o' tih profešurica već uspila naidit, a još nije njanci stigla do ureda (znan da ste kurjoži ča je bilo, e... evo ću van špijat. čudon se čudi da mi ovod gledamo diplomu. govori da je nju zaposlilo do sad svugdi, a da joj nigdi nije gledalo diplomu, vengo su joj, pazite sad ovo, virovali na rič. i eto, donit će ona diplomu kad baš mora, ali joj nikako nije kjaro kako ja to moren tražit.  ja se sad narafski čudon čudin kako je ona to mogla igdi dobit posal, a da joj nisu gledali diplomu, pogotovo po državnim skulama zaradi takvih pripametnih diretura oli ravnatelja i jema ovakvih stvari u rvackoj: http://xvii-online.com/1/sve-za-lipe-joci/89199.aspx   i to je sve za lipe joči, narafski, e...) šta mislite ča je u horoskop ova ča se čudon čudi da se za posal gleda diploma, a? i još se gre karat oko tega. a ovan, šta će drugo bit, e... mislin da se samo ovan kapac poć karat s peršonon koja ga triba zaposlit i to i prije vengo ča je opće vidi, a sve zaradi inata, prkosa, dišpeta. ne znan ča joj je tribalo tražit za zaposlenje profešura talijanskog ako nije tribalo tražit diplomu. potvrdu o članstvu u ribičko društvo? potvrdu o završenon tečaju za šalturicu? potvrdu da zna misit kolače? zemljo, profundaj se... osta joj je termin za razgovor, jerbo san čovik, ali ne znan ča bi neko drugi učinija da je na moje misto, e... aj, baš ćemo vidit ča se š njon bit. more bit da bude i među boljima posli, ko zna, e...
• jerbo, danas smo ja i jedan profešur talijanskoga ča je već primljen jemali radni dogovor.
• jerbo, štufalo me višje danas sve. puno posla, a ča je prislano nije ni maški drago, e...

gren ča, utrnit ću sad ovo škatule, triba mi malo odmora. jemate pozdrav!