kaić na merjanu, by XVII, slikano danas

e... ovi litrat je o' danas, friški. promina koliko oćeš. samo promina stalna je. kaići su ka i ljudi, dođu i odu. promine se i pošte, ne moredu durat pedeset godin na isto misto, e... a jopet, meni se baš danas sve pari brez promina, ka da je vrime stalo, fermalo, zapteljalo se u švere. ka da se ništa nije prominilo. jerbo, još uvik volin ista mista, još uvik živin za ovi nesritni grad, još uvik volin izist istu spizu, još uvik mi znače isti ljudi (tj.: srića i nesrića, kumpanji, fameja, kolege, itd, s tin da krug kumpanji ipak pomalo, brez priše, širin), iste i trefin redovito, a isto tako iste ne trefin po nikoliko godin. još uvik stojin u isti kvart u koji san o' ditinjstva, još uvik u ovu balkansku pripizdinu (skužajte na izrazu, ali baš tako) probajen zaradit koji šold ka pošteni privatnik pa na kraju ispadan za smijat se. jerbo face su oni ča kredu; kredu državu, kredu radnike, kredu di god stignu i onda si cukun kad nisi o' te vrsti. još uvik virujen u jubav, dobro i poštenje i sa ton viron san i narafski jopet cukun. još uvik volin dalmatinske pisme, a danas je poželjno navit cajke. itd. kome kjaro, kjaro je... kome nije, nikad neće ni bit. more bit da bi neko moga i svitovat: a bi li tribalo odrišit cimu? oće li ti vapor ovako arivat u porat koji oćeš, a? oće. virujen još uvik u se i svoj timun. znan šta oću i di gren. nisan kako vitar puše i di te kurenat odnese. zaradi tega će bit sve dobro. eto tako, pa bilo kome krivo oli pravo, friga mi se... gren ča, jemate pozdrav!