e...

da nima onih ča mito primaju, ne bi bilo ni onih ča mito daju. to je ka i s drogon, da nima narkomana, ne bi bilo ni dilera. mito je općepristuna pojava u rvackoj. zaradi tega ča ne dajen i ne priman mito, sve me u životu gre sporije vengo druge ljude. mučin se, čekan file, jopet se mučin, a ča se tiče nikih mojih ustavnih prava znan da ih nikad brez mita neću ostvarit. mito i mićenje mi je nešto odvratno, ali masu svita tako rješava sve svoje probleme, s obzirom koliko je država i pravda spora, nije im se čudit.

priča mi tako jedan susid prije nikoliko godin da mu niki podstanar neće da izađe iz stana kojega jema u drugi dil grada, žali se, grinta. dura to, kako mi kaže, već godinama. trefin istoga susida poza par miseci, pitan ga kako je, je li se išta prominilo i tako to... jeeeeeeeeeeee, reče on meni i sad već ostajen deštuko jerbo znači da ipak nešto jema o' pravne države u državi rvackoj, e... neka, neka. lipo. ma isto mi vrag ne da mira i pitan bokunić za detalje, ka da kako je prošlo i tako to. ma kakva pravna država, ispriča meni susid istinu - diga je kredit, podmitija lika i ovaj je izaša iz tega stana. danas mu u temu stanu živi čer.

e sad mi je pala na pamet i štorija kad je tu njegovu čer tribalo upisat na fakultet. mala nije loša, nisu joj ni ocjene bile katastrofa, ali eto, pritisak, juriš, svi oče baš tot. sićan se da mi je susid onda ispripovidija da je bokunić podmaza jerbo da to nije moglo nikako drugovačije tot proč. mala je finila fakultet, a ča se tiče ispita, ne sićan se da mi je spominja mazanje i podmazivanje, reka mi je bija da je da samo za upis, ali masu puti se čuje o' drugoga svita da i tot jema mazanja i podmazivanja.

znači čer moga susida danas jema di stat i jema fakultet jerbo joj je ćaća bija domišljat i dobro se prilagodija uvjetima života u lipoj našoj. vjerojatno bi to jemala i da nije bilo mazanja, ali sporije.

a radi li? e... najprvo je čekala i kako nije tila provest život u čekanju, ćaća je jopet malo turnija i danas moremo reč, ši, mala radi. ovi moj susid sve to otvoreno priča, nekako mi se po njemu pari da je mićenje postalo normalno i da onega ča ne miti još triba i sram bit.

a jema li u moga susida unuka, a? jema. jema ta njegova čer maloga sina. još je malešan i sad di š njin kad otac i mater rade, a? pa jemaaaaa vrtić, normalno, a di drugo. a je li problem dobit vrtić za dite? - pitan ja nikidan susida. ma je, ali riješilo se to, kaže. sad već čekan da mi i jopet ispripovidi kako je iša u mazalačke akcije. moran vam reč da me odgovor baš iznenadija, ove godine je maza drugi dida, o' oca o' maloga otac, a on će dogodine ako bude potribe. eto, tako je dobro proša, jedan trošak manje. pozdravimo se i ode on sav sritan jerbo mi je ispripovidija kako je ušpara, a ja sva nesritna jerbo je 21. vik i volin svoju zemlju, jerbo mi je 36 godin i pitan se na kraju: a jesan li životna pi*da, pitan se i jesu li mi mater i ćaća životne pi*de kad mi cili život govore: čerce, ništa neće uteč, samo pošteno, višje vridi čist obraz vengo išta na svitu itd. razmišljan, ne, nisan ja pi*da, mislin da moji ipak jemaju prav. ja moren i brez mićenja pa tako i gren, a neka svoje pineze sipa životna pi*da i mona.

jerbo ča to znači podmitit za recimo dobit posal, a? ko mu garantira da ga za misec dan neće i jopet doč pitat mito? poslin će ga pitat svako po ure, e... itd.

ovakvih primjera jema mali milijun, rvacka je sad takva kakva je, mito je općeprisutno, ali neće moč vječno ovako, ono ča ne valja će i propast, pri oli poslin, e...

----------

ovi post je, ka i sve na ovom blogu, notan prima istinitim događajima.