e...

danas su razvodi nažalost česti.

kažen nažalost jerbo ko normalan voli rašpe, bombe, rivolvere, karanje, patnju itd. , a? dobro pokarat se, pa se pomirit, to još nekako, ali kad je tako stalno, kad nikad nima lipe riči, to ni dobro, e...

svi bi zapravo tili malo mira i tek mrvicu onog slatkog nemira,  jubavi, bokunić sriće. e ma do tega danas ni lako doč.

a znate li ko najviše u svemu temu pati, a?

dica, e...

dica jerbo drugovačije je smijat se suncu i s materon i s ocon u isto vrime, a drugovačije je kad je to drugovačije. manje je straja kad grmi i kad u isto vrime zagrle i mater i otac, a drugovačije je kad to je drugovačije.

razvod znači i promjene u životu.

masu puti roditelj poza nekoga vrimena nađe i novu peršonu. ne znači da ne voli svoje dite, dapače. e ali šta ako ta nova peršona oli njena fameja ne prihvaćaju dite ča ga roditelj nosi iz prethodne veze, a? virovali oli ne, jema takvoga svita, ne prihvaćaju tuđu dicu. ja recimo ne prihvaćan takva razmišljanja jerbo dica su dica i najveća su vridnost zemaljska balote; no, dopustit ću da ipak postoji svit ča ne trpi tuđe dite; samo s takvima daleko o' mene, e.

ovi naš bidan roditelj se sve nada da će se štagod prominit, da će s vrimenon njegovo dite bit prihvaćeno, da će stvari bit drugovačije.

neće. NE, neće.

ko će prihvatit takvu situaciju, prihvatit će je odma, ko neće, neće ni poslin trideset godin.

a dite, a? samo jadno pati, misli da je ono nešto krivo, tužno je, ne shvaća da ni problem u njemu vengo u šempjama oko njega.

prihvaćanje diteta je bitno pitanje. to nije pitanje tipa oče li se spizu vazest u keruma oli u plodine, oče li se na tv gledat fuzbal oli film, oče li se večeras vanka oli ranije u pajun. to bitno pitanje itekako utječe na dite i njegov život. jema li roditelj pravo nekon svojon nazovi srićon (jerbo, kako može bit sritan ako mu dite nije sritno, ako ga triba sakrivat ka da je kužno, a?)  krest ditetu njegovu sriću, a?

znan masu primjera di je ditetu peršona ča je novopristigla u njegov život dala puno jubavi, pomogla mu, bila oslonac i prijatelj, ali jema i kontra primjera. neću sudit o tuđoj srići, no na mišljenje jeman prav. mislin ka je kontra primjer da triba poč ča.

dite je dil vašega života i to bitan. ko voli vas, volit će i vaše dite.

još jema ovod jedna sitnica. to je kako dite prihvaća novu peršonu, e... kažen sitnica jerbo ne može niko reč da je prihvatija tuđe dite, a da dite njemu čini dišpete, monade, da ga mrzi. je, more bit da neće bit obostrane simpatije odma na prvi balun, ali ako ste stvarno iskreni i dobri, dica i beštijice to pripoznaju. smirit će se i bit će te prijatelji.

najbolja moguća opcija je obostrano prihvaćanje na prvi balun, a jedino bolje o' tega more bit da dite jema potpunu sriću u svojoj fameji koja se nije raspala. no kažen danas su razvodi nažalost stvarnost. iako je teško, triba naučit živit s ton činjenicom.