e...

uvik ti se pari da drugome gre lakše, da mu gre sve ka po špagu, da nima nikakvih problema, da jema sriće. dikad se pitaš i je li koji vrag trče o' isprid tebe i postavlja ti trapule po putu, e...

moja malenkost je rođena 1972., 35. rođendan baš čekan. toj mojoj generaciji su učinili ovako:

- najprvo je bilo niko malo testiranje za poč u pučku skulu.

- za poč u srednju skulu tribalo je jemat određen broj punti donesenih iz pučke skule i pisat te proč prijemni ispit; danas nima tega prijemnog za srednju skulu.

- za poč na fakultet tribalo je donit određen broj punata iz srednje skule i pisat te proč prijemni ispit, moj fakultet, spli'ski fesb odavno je ukinija ti prijemni.

ma vidi, vidi kako se ti prijemni ukidaju, a?

- ča je tribalo postič za magistrirat neću ovod ni probat pisat jerbo malo bi me ko i razumija, more zapravo svatit samo oni ča je i sam uspija.

- koji su uvjeti da te primi u koju rvacku partiju ne znan jerbo me to nikad nije ni interesiralo. ne znan, naime, lagat i krest. znan radit. zato me interesiralo kako ću osnovat poduzeće. e, čovik moj, koja je to monada bila kad ga je moja malenkost osnivala. katrušina, kapunjera jedna, fila, kapunjera druga, čekanje. u takvin situacijama duperan pacijencu, nima mi druge. sad su to mrvicu pojednostavnili. recimo, mb oli matični broj dobiješ brez vižitavanja zagreba. nekad to, narafski, nije bilo tako, a kako se brez tega broja ne more počet poslovat, uputin se ja u ponoći staron ceston (nije onda bilo dalmatine) do metrople. narafski, učinili samo i telefonsku najavu, rekli da se stiže iz splita, za koju firmu dolazin i tako to. mislite da mi je pomoglo? ma ke, ništa mi nije pomoglo. znate ča mi je ta činovnica rekla kad me vidila? ne znate, a? e, rekla mi je da dođen sutra. narafski da mi to nije padalo ni na kraj pameti. doma su me ti dan čekale punjene paprike za obid i nikakvo višednevno duranje tega boravka u zagrebu nije dolazilo u obzir. zato joj i rečen: " ma šta sutra, a? ja sad gren popit kofi, za ti bokun papira vas se zvalo i na tel., oću da mi to za po ure napišete, poza tega gren doma u split, čekaju me punjene paprike za obid."

kako je ovo finilo, a? a evo piše tot:

ka po špagu, tuci kilometre dok kičma more izdurat

eto, ti put je bija  jedan brzinski ulet-izlet iz metropole, to ću uvik pamtit, e...

vengo, di smo ono stali, a?

- vozački, e... osin ča je financijski krešija kad san ja na redu (sve skupa sa taksama i pregledon likara dodje  oko 5 iljada kuna, u lipu ću van napisat koliko kad mi sve fini), krešilo je i po kriterijima.

ka prvo testovi: 90% triba bit točno i sva raskrižja tribaju bit točna. svako pitanje jema više točnih odgovora i ako nisi sve označija ispitivač ti ga prikriži ka netočno. to san fala bogu položi iz prve i sa maksimalnin brojen bodova, ali moren posvidičit da je ekipa padala samo tako. ka kruške, e... možda kome pomogne ovi adres: www.hak.hr , tu se može vježbat za testove.

 prva pomoć je naučit, odgovorit i proč. to san fala bogu isto sredi.

e, sad vožnja autića. to su narafski zakomplicirali jerbo višje sati triba za vježbu odvozit vengo prije. danas je minimalo 35. aj, nije mi krivo, bolje ću naučit. tega ne bi bilo loše ni još jemat. međutin, ispit je od dva dila. poligon (poligona prije nije bilo) i vožnja gradom. brez položenog poligona nima u grad, a na poligonu se triba pokazat sasvin lipo vještina o' ravno, pa rikverc po krivulji određenoj čunjevima, parkiranje u rikverc, okrićanje autića, brzo kočenje.

http://www.herz.hr/ispit_uv.php - slike morete uvećat klikon.

ovi link stavljan da svi moji dragi kumpanji (ma kojega roda bili) vide šta zapravo triba učinit. oni/e su to polagali/e prije godin i godin kad je bilo bokunić lakše i sad im ja kukan kako se mučin da to naučin, a svi mi pomažu savjetima, lipon riči.

fala vam dragi moji kumpanji, fala vam o' srca!

hehe, ma sve ću preživit. oću. jerbo, navikla se moja malenkost odavno i na trapule i na teško.

ekola, gren ča, vozačku još niman, program za osbosobljavanje vozača mi još dura, ali ću je savladavajući program tega tečaja steč. virujen u to.

a ča uvode i ukidaju, ma friga mi se, e... mora bit da baš tako mora bit.

jemate pozdrav!