e... ovo je za me bija veliki dan. cili dan san se misli kako će to ispast, oče li me opće ikako sve to skupa ič... sad moren pobjedonosno reč:

večeras san dovezla tonobil od splita do omiša!

 magistrala i XVII u jubavi prvi put i to navečer

bilo je dobro, uzbudljivo. da se mene pitalo išlo bi se bokunić sporije, ali instruktor mi nije da; tako se išlo  po znakovima i eto samo još kilometar dva višje (ne višje) jerbo oladit će mu se večera. kako san je prvi put vozi, tribalo mi je i nešto pomoć, narafski. drugi put će bit i bolje, poč ćemo i jopet. jednom san čak i fermala, propusti san kolonu i onda dalje.

bitno mi je da sad konačno jeman taj osjećaj.

mislin da autoškole falivaju ča svit malo tako ne provozaju, tako se i uči, a i samopouzdanje reste.

obeća mi je i da ćemo poč i na autocestu, pa sad to iščekujen s nestrpljenjen. večeras san vozi u četvrtoj, možda dok dođen do vozačke tako uspijen isprobat i petu i šestu.

poligon i dalje uporno vježban, danas mi je on iša mrvu lošije, ali vježbali smo poza osan navečer, a tek poza te ure via omiš.

e, sad. jeman jednu ideju. ne virujen da bi to koštalo puste pineze (jerbo na svakakve gluposti se u ovoj zemlji arči puno višje o' tega troška), a pomoglo bi ovon gradu. šta, a? a osvitlite oni poligon, da svit more i navečer tot malo vježbat. sad je već litnje vrime i poza osan se slabo vidi, a zimi i u četri ure pozapodne nije za radit tot. hm? ne virujen da će odma trkat stavit stupe, potrošili su ih prikovišje bidni u marmontovu, ali , evo, ipak vridi provat notat rič dvi.

ajmo ča finit za danas. instruktor mi je reka da on oče bit na ovi blog i da lipo napišen da se zove božo sušić, da se autoškola zove autoškola sušić i da se u njega vježba i na magistrali i to na ovi način: 

šta se tiče relacije split - omiš (more i omiš - split),  u jednom smjeru šofiraš na trošak autoškole, poza oli prije svoga redovnoga sata, a vratiš se (odnosno pojaviš) tantobuson oli neko s vozačkon dođe po tebe (tantobus je recimo 19, odnosno 14 kunića, a sat u autškoli dođe puno višje). tako učiš i štediš, a on ionako mora u omiš (iz omiša) jerbo čovik tamo stoji... ;)

------------------------------------------------

narafski, napomenit ću još i to da ja nisan kod njega o' početka, tako da mogu opisivat  sadašnja događanja i učenje, ali apropo njega ne moren jemat objektivnost tutokompleto jerbo me ipak jako puno toga naučija instruktor nebojša banović (vidi prošle tekstove) i  sad nisan totalni početnik. skroz objektivan opis učenja bi bija da te jedan instruktor učija od početka do  vozačke, ali eto, nije čovik uvik te sriće.