e...

pravilo br. 1

platit svit za njihov rad, skoro uvik to učinin prije petog u misecu, ritko se dogodi čekanje desetog u misecu.

dodatak na pravilo: korektan odnos s ljudima (na ovo se posebno ponosin).

pravilo br. 2

platit firmi/obrtu o' kojega se vazela roba oli usluga. uvik dan pineze prije dospijeća i ne dugujen nikome.

pravilo br. 3

zapošljavanje isključivo stručnih ljudi, drugovačije ne dolazi u obzir.

pravilo br. 4

obavezno rastiran (i to s posebnin gušton) one ča mi probaju bit dužni. tot milosti niman, d.o.o. se osniva zaradi stvaranja novih vridnosti oli zarađivanja, to nije humanitarna organizacija. niko mi ne duguje.

prema strankama/firmama ča su korektni dok posal dura i poslin kad triba platit, nastojin bit deset puti korektnija peršona.

pravilo br. 5

neću politiku u moju butigu. nisan član njanci jedne partije. gledan svoj posal, svoju struku i kad vidin kojega političara obavezno priđen na drugu stranu ulice. ne ližen gujicu ni pricidniku ni premijeru, ove trenutne tretiran ka nužno zlo za kojima ćemo jedan dan reč: završija je kurbin pir.

neću nakazne ideologije i ideje u moju butigu - potiran sve ča veličaju hitlera, staljina, musolinija i sl. krajnje livo je suludo ka i krajnje desno, zapravo svodi se na isto: kult ličnosti, hrpa soldati (oli vojske), sila, tiranija, progoni, klanja, ubojstva neistomišljenika. zaobilazin takve. hrvatska u 21. stoljeću nima ča koketirat sa nakaznin ideologijama ča su nekoga trpale u plinsku komoru samo zaradit tega ča je bija drugovačije vire oli na goli otok samo zaradi tega ča je drugovačije mislija.

pravilo br. 6

pomalo, vrag odnija i prišu. ništa se dobro ne more na brzinu učinit. evo firma gre skoro tri godine ma moja malenkost još nije trkala vazest tonobil, a i kad ga vazmen neće to bit jaguar oli mercedes. oni ča  arče i ponašaju se nerazmno, brzo i propadnu.

pravilo br. 7

nećete me nikad vidit na nikin domjencima i ostalin preseratorskin gluparijama. za to niman vrimena.

pravilo br. 8

kod kupnje uvik tražin višje ponuda iako to ka privatnik opće ne moran po zakonu, ali potribno mi je jerbo meni pinezi za platit robu neće narest na grani oli arivat o' dida mraza kroza fumar, pa stvarno triban nač ono ča je najpovoljnije.

pravilo br. 9

uvik ovin redon: najprvo Čovik, onda inđinjer, pa tek onda šef.

pravilo br. 10

red, rad i disciplina (naravno brez biča, postignuto korektnim odnosima).

jema tega još, ali ko samo i ovo uspije primijenit more reč da je puno napravija.