e... naglo je zaladilo. nima u nas višje nikih međustađuna, ma ke... do nikidan u more, plivaj, roni, a danas bičve, jaketa i zimski postoli. nije baš da ne volin ovo vrime. jema nekoga gušta u melankoniji jeseni, jema gušta kad se uvališ o' ispod deke i stepliš, po mislima pribireš i sitiš se ča je sve ti dan bilo lipo, promisliš ča je moglo bit bolje oli kad dovatiš koji dobri libar i stranice krenu, vuče ti prima naprid, čita bi i cilu noć da te ujutro ne toka radit. volin i učinit čaj kad zafriška, to mi je isto gušt. snig mi baš nije pri srcu, kad nas on dovati gledan da ne slomijen kičmu oli ne polimin noge, ali kad je ovako i kad nije prikovišje zima, e to, to more stat. kad se mrvu bolje promislin, ni ni dobro da uvik bude lito, priroda mora učinit svoje, njene zakonitosti se moraju poštivat.

a ča očekujen u vrimenu ča dolazi, a? a ča ću puno očekivat, a? kad prikovišje ne očekuješ, ne moš se ni razočarat. evo da recimo rečen da očekujen da će svi lupeži i ubojice završit u pržunu, a poznato je da malo koji završi, cinjeno čitateljstvo ovega bloga bi se počelo smijat. oču li očekivat da svit bude bolji, a? a moren ja očekivat, ali koliko će moja očekivanja pomoć ti boljitak, e to, to ne znan. moren uvik dat sve o' sebe i učinit sve najbolje ča mogu, za to odgovaran, ali za cili poredak i sustav oko sebe, ča ja tot mogu,  ne moren puno,e...

kad san bila mlaja, čudila san se ča to stariji svit uvik spominje niko zdravje, ka da je to nešto puno važno, e... danas znan da su jemali prav. daj bože zdravja, pa će se štagod i radit, a kad se radi bude i koja kinta, barenko da život more ič naprid i da se u pjat jema šta stavit. daj bože uza to i bokunić sriće, one životne općenito  i one jubavne i višje o tega pametnome čoviku ni ne triba. možda još čagod za dušu, koji libar, koji dobar film oli pisma, vonj mora i dobro je...

 nadobro van došla jesen...