more, brodovi, split - svi litrati by xvii, uvećajte klikom. 

e... slikano večeras, nazire se i croatia boat show u daljini kod lučke kapetanije, valjda je zaradi tega i brod na litratu br. 2 vezan u splitu, a ne u kaštila... narafski, nadan se da mi marina kaštila neće zamirit ča o temu razmišljan, upa mi je taj lipi brod u joko, a kako za tu marinu moja firma dosta radi, malo san stala i promislila šta je sad, a?

a s kin smo bili šetat, a? e a nećemo otkrit sve tajne, e... ma ajde, moren reč, pa nije to opče tajna kad se bokun bolje promislin, e... danas solo. dikad je tako najbolje. niko te ne pila, niko te ne turpija, ako koga trefiš, dobro trefiš, ako ne i jopet dobro, moš komodno gledat i povonjat more, slušat mužiku jarbola, sinjat ko je odrišija brod, a kome je osta vezan za kraj. vidit kome je kaić vezan za krmu, kome leži na provi, a ko ga je odnija u dvor o' susidovog rođaka, izvižitat ko je otiša na ribe i tako to; brodovi ti uvik štagod zanimljivo jemaju ispripovidit, e, a ako greš s nekin šetat, onda obično slušaš tu peršonu i neka je i skroz normalna, pristojna i uvu ugodna, ne ostane vrimena i pacijence za brodove. aj, navit ćemo još malo mužike, gre jedna dobra pisma, pozdravljan svih najlipše, a jednoj peršoni ča redovito čita ovi moj blog i ča je, narafski o' milja - a da kako drugovačije, a? nećemo valjda o' nemilja, e... - zovemo zvir zvirska,  gre i obavijest da je mu bili brod, koliko san ja vidila, dobro; provon vezan za kraj, jušto onako kako ga uvaženi šjor uvik i veže. litrati i mužika su narafski tot da se rekuperate o' brksija u prošlon postu, e...