ajme gospe moja... šta se nisan bogato udala? kojega vraga mi je tribalo finit skule i radit, a? mogla san se lipo bogato udat i bit uzorita rvatica.

Danas umirem pod teretom kartušine. Hrvatska je definitivno birokratska zemlja koja kartušinom komplicira poslovanje. Bože dragi, prosvitli naše nadležne, sve su zakomplicirali :(

napisala je danas xvii na oni facebook i nada se da je zaradi ovega neće doč uapsit... a baš je tako, e... nisan ništa lagala, ma ke, e...

od jutros najranije se bavin kartušinom. to vam je svitu moj samo za danas izgledalo ovako nekako:

najprvo san izbrojila sve ča smo ovi misec radili za veterinarski zavod split da moren judima poslat račun jerbo je danas zadnji dan miseca. onda me tokalo notavat ti račun (ne moren oko tega nikoga zaposlit jerbo kad su u pitanju ovakve stvari triba moj potpis)  i poč ga poslat preporučenon pošton na njihovu adresu (ne moren ni oko tega nikoga zaposlit jerbo kad su u pitanju ovakve stvari virujen samo sebi). narafski, sve je to u sklopu jednega projekta ča ga financira europska unija, pa ti posal nije u sustavu pdva. e sad, mi jesmo u sustavu pdva i da ne daj bože izdajen račune brez pdva tokalo bi me poč u pržun. ovod se čini iznimka na način da se uz račun za knjiženje prilažu posebna rješenja/dopisi/ugovori ča su jopet posebno ovjerena i danas san to sve skupa samo slagala uza ti račun i fotokopirala a i jopet me je umelo. nikidan san tu svu kartušinu bila vazest na veterinarski zavod.

sad će mi neko reč knjigovođa, e... radi li ta peršona šta, a?  jeman ja knjigovođu/računovođu koja čini konte i sređuje hrpe kartušine svaki misec. normalno da radi, pada žena višje s nogu. svaki misec ova država nešto minja u pogledu obrazaca i sl. da nije knjigovođe, odnija bi me đava. no, preslano je, a ča je prislano nije ni maški drago, e... pretjerali su s kartušinom.prikovišje je tega. svitu moj, svaki misec samo oko plaća i honorara gubin (brez rada knjigovođe) nikoliko uri da se sve potpiše, evidentira, isplati. a di je sve drugo ča jedno poduzeće triba evidentirat, a? e sad, danas me se jopet tokalo nač s knjigovođon jerbo je ona još tribala nike obrasce odnit po državnim kapunjerama, pa san i tot tribala stavljat potpis.

kako je zadnji dan miseca, tokalo me i sredit kilometražu za tonobil, to se isto mora, pisat di si i kad si bija i ča si tot činija - ne bi da nan je država dala za tonobil, e... fala bogu, ni država ni partija, kupljeno o' svoga rada. baš san kurjoža, puno bi volila znat je li recimo šjor premijer notaje di je sve odija tonobilon koji sigurno nije vazeja o' svoga rada, a? kakvi su tot propisi, a?

tokalo me sređivat i ugovore s radnicima, sve ča su potpisali evidentirat, one ča još nisu potpisali sad triban činit da potpišu i reka bi čovik neš ti, ali kad jemaš ugovore o djelu već si štuf (najštufija san tot ča mi za 100 kuna koje dan radniku, država pita još toliko - dobro ste pročitali, davanja su 97%), a kad se pojave još i ugovori o radu, a oni  povlače i kartušinu sa mirovinskog i zdravstvenog, pa kartušinu ča je firma dužna vodit, pa pusta fotokopiranja zaradi miljardu brojeva, pa ispisivanje brojeva koji se tot javljaju...

grrrrrrrrrrrrr još nismo za danas gotovi, ovo je višje za ispalit... dođe mi da jedan misec stavin na balancu svu kartušinu koja prođe priko firme, pa da to objavin ovod.

šta ću sad, a? a ništa, gren još pisat kartušinu, nima mi druge, neće niko za me, e. ostalo mi je još nikoliko listova sredit, teplo se nadan da ću smoč force za to danas finit, a navit ću jednu pismu da mi bude bokun lakše, e... jerbo da nije pisme dalmatinske i mora, čovik bi teško izdura... 

evo taman da ću finit ovi tekst kad zvoni telefon. neka me teta za neku anketu pita:

- koje ste godište? 1972

- naobrazba? magistar znanosti

- da su sutra izbori za sabor, bi li izašli? ne

- koju stranku simpatizirate? ma mrš teto, ti i partije, molaj me na miru s tim kriminalcima ča žive na mojoj grbači, gotovi smo odma s razgovorima - poklapan slušalicu...

o političarima ćemo pričat, je kako da ne,  još mi samo oni fale, nakon ovoliko muke danas, a mislin se kako je ovo još bija dan kad mi je sve s ton nesritnon kartušin išlo glatko.

ma kad se bolje promislin, ajmo ča pivat, nastavit ću sutra s ton kartušinon, radnicima, svin ča je preostalo, niman višje volje za danas, e...