e...

jopet mi je danas do uva dopra tuđi razgovor. mora bit da stanovnici ovega grada stvarno vole bučno govorit.

kaže jedna peršona ženskoga roda:

- ne bi tribalo patit, ako se peršone ne slažu, ako nimaju iste poglede na život i svit, bolje se razić. zaradi čega bit nesritan, a?

na to kaže jedna peršona muškoga roda:

- a zaradi čega ne probat namistit jubav? naštimat nekako, a?

e... gospe moja, svašta. ajuto mama mia. ne bi da je jubav tamo nika vaza na škanciji pa ćeš je namistit, oli kakva vida da je naštimaš. gospe u kvadru ča malo ukrivo visi na zidu, možda.

najprvo bi tribalo reč i to za sve one ča ne znaju da je Jubav žestoko povezana s kemijon, a nje između dvi peršone ili jema ili nima, nešto između tot nima. u tu kemiju se svašta utrpa, kako kod koga, joči, pogled, stas, glas, vonj. neko ko nas privuče, drugome more bit bože sačuvaj. da bi bilo jubavi, triba bit kemije i ta kemija triba bit obostrana. jubav brez kemije je zapravo jubav brez strasti, a to je nešto mlačno i mračno i po meni se ne more zvat jubav. moš tako volit koju veštu, boršu oli kantunal, katrigu, a ne čovika, e...

nadalje, judi moredu bit i po dvadeset godin skupa, moredu se i poštivat, bit pristojni jedno prima drugome, opće ne bit grubi, ali da to nije to. reka bi karan: kad ti srce ne piva, e, to bi bila ta situacija. u životu je jema, a jema i  masu veza ča su iz interesa. kod mene nima tega, nisan o vrsti koja bi mogla bit sa nekin ako srce ne piva, pa o ovemu ne mogu i niman prav višje raspravljat, diskutirat.

duboko ću cili život (a i poslin) virovat da su moji momci bili kemijom privučeni meni i ja njima. s drugačijon pomisli ne želin živit, e...

ajmo ča dalje. more se, pak, dogodit da se judi opće ne znaju dugo, ali da kemije jema na mašure. nekoga moremo doživit ka nama vrlo blisku peršonu i za vrlo kratko vrime. jednostavno ćuti se je li se sa ton peršonon more razgovarat, moredu li joj se povjerit tajne (ne mislin sad na nike mračne, nima tega u mene bogu fala, ali svako biće jema niku malu, ljudsku tajnu), ispripovidit kakav nan je život bija prije vengo smo tu, nama dragu prešonu upoznali, ispripovidit kakav bi život dalje tili.

mišljenja san da dvoje judi moredu zajedno sasvin dobro funkcionirat ako:

1. jema kemije

2. jema volje za razgovor

druge stvari: materijalno, pinezi (ovo odvajan pineze o' materijalnoga jerbo se u ovu bidnu zemlju mislilo i promišljalo jesu li pinezi imovina paaaaaaaa), utjecaj okoline i sl., ne bi tribale bit prikovišje bitne. to se sve da savladat ako je/dok je zadovoljeno 1. i 2.

ako judi i nimaju iste poglede na život i svit, također. ajmo ča bit realni: ma di ćeš to nać peršonu sa ama baš istin pogledima na život i na svit, a? možda nije loše da peršone jemaju koji zajednički interes oli stav,  ali ona peršona ča voli i ne voli baš sve tutokompleto isto ka i ti laže ti ka zadnja kurba (skužajte na izrazu, ali baš tako) i to iz nekoga šporkoga interesa ili opće nima svoga ja, a onda je zadnja štraca (skužajte na izrazu, ali baš tako) brez stava, brez osobnosti.

jubav ne moš namistit, jubav ne moš planirat, jubav ne moš naštimat. ona te jednostavno strefi.

možda bi se tega momenta, tega kad te strefilo, e, tribalo sitit u onemu momentu kad dođe do karanja, koje grube riči, koje nevolje (a mora i do tega doć jerbo jubav nije jubav ako tega nima).

aaa koliko je već ovod rigi, a? morat ću ovo pomalo finit. za ovi put dosta. jubav je jedan vrlo kompleksan pojam, kemija tot izaziva mnoštvo reakcija, ne more to samo tako u jedan post i gotovo, e... tribat će se o temu i još štagod reć, ali jema dana.

jemate pozdrav!