e... jeste li se uvatili danas na koju baketinu, a? ja fala bogu nisan. :o) dapače, dan mi je bija baš dobar, ono, more se reć lip i normalan. standardna nedilja, pranje robe, sredit malo stvari, operi cakla i tako to. pozapodne smo otvorili ured jerbo je ivicu tokalo odradit nešto i to je ka to... navečer đir po gradu, jedna pizzeta o' škampi, još đir do labuda i acya, pa nazad i evo me, među živima san, brez se uvatit na baketinu. :O) a ča je to opće baketina, a? za one ča ne znaju, na baketinu se love tiči, ali ta rič se dupera i kad se oće reć da je neko nasamaren. onda se reče da se uvatija na baketinu.

vengo, sad se sve mislin oću li van nešto reć. mislin se jerbo ne znan oćete li mi virovat. more bit da se dogodi da će nekome past na pamet da je ovo sad neka uncutarija oli baketina. ma ke, svitu moj, ne, nima to veze s baketinon, jednostavno je tako ispalo, e... zapravo, oni ča je proba će mi virovat. o čemu je rič, a? a evo, pričan ja jučer priko ovo škatule s jednin kumpanjon o svemu i svačemu. životu, smislu, besmislu, jubavi, mržnji, običnin i neobičnin stvarima. čovik jema mota i zanimljive poruke notaje. za koji dan nas toka nešto u moj ured učinit apropo letrike. on će činit, a ja ću narafski nadgledat, grintat, pomoć gulit žicu, dodat koju kacavidu oli faz-lampu i tako to :o). jerbo, ko je vidija da se tu niko malo žensko pača tamo di joj nije misto, a? ;) onda ćemo ćakulat i uživo, a kako jema fala bogu teknike i letrike i moderno je vrime za ćakulu duperamo i ovo škatule. šta ne bi, a?  izrodija mi se kroza taj razgovor jedan zaključak koji doduše ne moren egzaktno dokazat, ali empirijski dokaz jeman i to iz vlastitog života, e... a kumpanjo mi je reka da jeman prav i da je to moguće. bit će i on jema koji empirijski dokaz, ko će znat, e... dakleM:

• fatalna privlačnost postoji, jema je i u našin životima, a ne samo u filmovima.
• peršone ča se fatalno privlače se moraju kad tad upoznat. (ovo oće reć da se more dogodit i da stoje nikoliko portuna razlike i da se po života opće ne znaju, ali ako je taj privlačna sila među njima toliko jaka, upoznat će se jednom, na aerodrom u jameriku, priko interneta, u feratu, itd. opće nije bitno di i kako, upoznavanje će se dogodit.).
• kad je u pitanju fatalna privlačnost, kemija je prejaka.
• kad je kemija prejaka, reakcije su burne, sve je puno strasti i osjećaja.
• jubav se ćuti u svih 16, ali svaka strana prejako ćuti i svaku rič o' druge strane, bilo lipu bilo grubu i to more bit poveći problem.
• zbog prejakih vibracija pari da di je fatalna privlačnost dvoje zapravo teško more skupa, ali još in je teže jedno brez drugoga, e...
• itd. jema tot još svega. mirenja, karanja, lipoga, gruboga...
• poanta je: unatoč svemu, ako te tako nešto ne strefi kroza život, čovik moj, breveze si bija na ovu zemaljsku balotu, e...

nije baketina o' aprililija, ma ke, živa istina je. :o)

ekola. gren ča. pozdravljan lipo! e, ši, pazite se, do ponoći još jema vrimena za baketine, e... :O)