e...

cili prošli misec smo notavali o jubavi, stavljali ovod verse i litrate, a nismo se njanci dotakli jedne, kako kažu, za jubav puno važne stvari, e... koje, a? niki eto govore da jubav dođe i priko štumika, pa je tako rič o spizi, narafski. ne znan koliko ću u to virovat, ali nikako mi se pari da barenko ovod, u dalmaciji, to jema veze sa istinon, e... jerbo, ako će bit pošten i priznat, dalmatinac tipični će reć: je, jesan, ja san bonkulović, volin izist. ako reče drugovačije, čekan da mu nareste nos, e... narafski, najdraže mu je kad mu kuva mater. tek poza tega dođe na red cura, žena oli sestra. od jubavnice nikad ne traži da mu kuva. tot obično on kuva. čisti i pere. frega i šumprešaje. ma zapravo, tot će pineze i po restoranima arčit. čast iznimkama.

nikako mi nije kjaro kako onda dobiju kile kad jedu spizu ča nije materina. malo koji se o ženine spize nije nadeblja. narafski, svaka mater će reć da je bidan njen sin jerbo da je u braku smršavija. a punica? ča se punice tiče uvo mi je jedanput čulo kako jedan naručuje pismu za brzo ozdravljenje punici na radijo. to je bilo uza riči: "najdraža punice, brzo ozdravi jerbo ću, ako se za koji dan ne vrneš doma iz te bolnice, doć uza te na infuziju. gladan san!"

narafski, kad su lipi bokuni u pitanju, eto ti ih i u kužinu. tot će učinit pusti nered i ponašat će se ka zadnji šporkaćuni. mišljenja san da bi im to ulaženje u kužinu tribalo zakonon zabranit. je, već sad vidin kako niki pine uza ovo škatule o' kompjutera i govore ma je li se to i jopet nas  muških vata na ovi internet, a šta smo sad skrivili, a? e, dobro je, razumin vas, nije vam bidnima lako. zaradi tega ću fermat i gren reč ono ča mi je i bilo na pameti.

dakleM,

LEŠO RIBA + RIBLJA JUVA

za 4 peršone potribno je:

• oko po kila ribe, recimo salpe
• sol
• po manje kapule (za kontinentalce - luk)
• maslinovo uje
• petrsimul
• papar
• limun
• 1 srednji kumplir
• špica luka (za kontinentalce - češnjak)
• manja poma
• čikarica riži

čini se ovako:

to po kila ribe, recimo salpe (nećete juvu činit o' srdele oli barbuna, narafski), najprvo dobro očistit i još bolje oprat. najdrugo s ribon u teču i stivat tot vodu da pokrije ribu. dodat malo soli, po manje kapule i neka kuva dok ne uzavre. e sad pazi. kad vidiš da je riba lešana (poslin minut - dva) vadi je iz teče. šta sad š njon? zalit je sa mrvu ove vode ča se kuvala u njoj i malo maslinova uja. posut je bokunićima petrsimula. papar po želji. brez limuna na fetice nikako. :o) to ti je LEŠO RIBA.

juva nije još gotova. u ostatak vode ča je u teču dodat 1 srednji kumplir iskidan na šta tanje fetice, malo selena, malo petrsimula, špicu luka, manju pomu (more prava oli iz važa), 3-4 žlice maslinova uja. neka kuva 45 minuti na laganoj vatri. poza tega procidit juvu i izmečit u procidaljku svu tu verduru, neka šug/sok o' izgnječenoga gre u juvu zaradi gustoće.

jopet s tečon na špaher. kad uzavre dodaj čikaricu riži. narafski da riži triba najprvo očistit. neka s rižima kuva oko 25 do 30 minuti, kušaj narafski. to ti je RIBLJA JUVA.

vode se dodaje po potribi za vrime kuvanja.

zasad ovod, a čin uvatin vrimena gre i u Ricete by XVII . fala XVII. ;)