e...

bila san pozapodne u plodine kupit štagod za život i rad. u kolica nije ušlo:

• ništa ča je slatka goluzarija oli bomboni, čikolate, bajadere, pašte, bobići, mandulati
• ništa ča je slana goluzarija oli krekeri, slani štapići, inčunići,
• ništa ča je kisela goluzarija oliti salate o' obotnice, muzgavaca i sl.

nima goluzarija o' njanci jedne vrsti. stop goluzarijama. a šta smo onda vazeli? sok, meso, jogurt i mliko, kruv, frute oli voće, verduru oli povrće i još nike higijensko-sanitarne potrepštine. sad ste kurjoži znan. evo špijat ću vam, vazela san recimo sredstvo za očistit laptop, pa sredstvo za očepit lavandin pa nikoliko paketi tariguza i tako to. jeste još kurjoži, a? niste višje znan. ajmo ča dalje. zaradi čega nima goluzarija, a? recesija, a? jo, pa oli nama, poštenome svitu ča živi o' svoga rada nije recesija otkad znamo za se, a? a baš tako, puvali smo na socijalizam, i je, jemali smo prav, nije valja, ali ovo ča sad jemamo je da zaradi onih ča viču: jemamo rvacku rečeš: bože čuvaj rvacku. znači recesija otkad znamo za se, naučija se višje ovi naš čovik na to. ko višje o temu i priča osin onih šempji ča side u saboru. zaradi čega onda nima goluzarija najprvo u kolica, poza tega u portapak i nakraju na škanciju o' špajze oli u frižider, a? neki će se sad sitit ćire blaževića pa će reč: a ko će vazest čikolatu koju reklamira ćiro, tribali su tot na reklamu stavit koju zgodnu mladu žensku oli momka, možda i niku šesnu dicu, pa bi ta reklama još i natantala koga da vazme tu čikolatu, ali ovako, uajme, e... dobro, znan jema i dorina, jema i milka, nestle itd. ćiro mi gre na nerve i nećem vazest tu čikolatu, ali neću ni druge. nima goluzarija i točka, e... evo, tako mi recimo gre na nerve i cila propagandna mafijaška štorija o' tele2, nikako nije po mom guštu. nekad je tako i t-mobile jema iritirajuće reklame sa zdenkom i njegovom mamicom i nekako mi se pari da su takve reklame i odbile kojega kupca, mene onda sigurno jesu. doduše, sad drugi mob. jeman na t-mobile, a prvi mi je i dalje na vipnetu. uređaji i tarife su skoro ionako svugdi ista pašta, pa dajte, barenko koju dobru i normalnu reklamu složite - ona bi tribala privuč novog kupca i zadržat starog, a ne strašit svit i tirat kupce - to je naime osnova marketinga. vengo di smo ono stali, a? je, goluzarije, znan. nima ih, e... a je li mi se štagod dobro oče izist, a? ši, narafski. zaradi čega onda nima goluzarija, a? eeee..... dan je sve duži, sunce sve češće, još triba bit samo bokunić strpljen, jemat još samo bokunić pacijence i onda će počet nešto ča puno, puno volin. ča, a? kupanje, banjanje, sunčanje, plivanje. e... počet će i durat će, e, oče, ja se uvik počnen kupat tot negdi oko kraja četvrtoga, početkom petoga miseca i onda produžin sve do jeseni, znan digod i do jedanaestog miseca. jeste li sad skontali zaradi čega nima goluzarija, a? dijetaaaaaaaaaa, eeeeeee... triba skinit koji kil, e... ja san, recimo, odlučila skinit jušto 3,5 kila i mislin da ću onda bit jušto po miri. za to skinit nima izist ništa lipo za večeru, nima tamanit goluzarije, a jema trkat po merjanu, gledat u balancu i pazit ča stavljaš u kolica, e... eto, tako je kako je, tješin se samo da niman prikovišje viškova, samo 3,5 kila, pa će to doč na svoje. a onda ćemo očale na joči , noge u more (alo, zaradi čega niman na ponudi tega smajlića, a?) i narafski reč: ništa mi neće ovi dan pokvarit!

a proliće, a? ča se mene tiče ja njega i jesen uvik spojin s liton, tako je najbolje...