e...

dragi moji manageri, ključno pitanje glasi: morete li poslove sklapat po svom nahođenju i svom stavu i morete li ljude zapošljavat zato šta vi tako oćete, a ne zaradi tega šta neko drugi tako oče?

jerbo, diretur, e... lipo zvuči, a? puna justa. misto, odlučivanje, kontakti. e ma jemate direture i direturčiće.

znate li razliku, a? diretur recimo sam donosi odluke, direturčić sluša želje onih kojima je poslušnik i izvršava ih brez pogovora, e... narafski tako je  i kad je rič o zapošljavanju.

poza takvog pristupa se dogodi ovako nekako: oni ča ih diretur nije tija zaposlit jerbo recimo nisu jemali adekvatnu stručnu spremu oli su dobili otkaz jerbo nisu radili kako triba pođu radit tamo di je direturčić. njemu će bit dobri. svaka tica svome jatu leti. isti se istom raduje. pošten čovik voli poštenoga, lupež lupeža.

kako su ljudi osnov svega, zaradi tega tamo di je diretur se normalno posluje, a di je direturčić jema sto i jedna monada.

diretur sam sklapa poslove, a jema petlje reč i NE ako procijeni da je NE potribno. direturčić  sluša želje onih kojima je poslušnik i izvršava ih. brez pogovora, e...

diretur je odgovorna peršona, direturčić je šempja, marioneta na tuđim koncima.

diretur obično nije u njanci jednu partiju, direturčić je u svaku po potribi. diretura svit poštuje, s direturčićen se šprdaju.

zanimljivo je i to da se direturčićem ne postaje, ne dogodi se to nikome, to je jednostavno izbor pojednica. bira tako jerbo misli da će tako nešto lakše ostvarit, doč do nečega. narafski, na kraju dobije smokve suve. onda mu je svak kriv, a ne razmišlja o temu da je upravo svojim pristupom stiga na tako niske grančice. samostalno oli prima tuđim željama, kako ko more tako i radi.

ajde, finito za ovi put, gren ča, moran radit. pozdravljan lipo!