e...

ovih zadnjih dan nekako jeman uvik niku inspiraciju pa i dva puta na dan štagod stavin ovod, e...

nika spliska svitla večeras by XVII - nešto novo, more bit da i nećete odma pripoznat moj stil, e...

mislin da je dobro ispalo sa mojin aparaton koji nije nekih velebnih mogućnosti. višje vridi znat vengo jemat, e...

u mladosti smo satima crtali sve i svašta, trošili lapiše i kartu do iznemoglosti, maštali o životu i radu u parizu, o temu kako ćemo jedan dan crtarije/slikarije moć lipo prodat, kako ćemo bit slavni. virovali da naš rad vridi, crtalo se baš sve, svit, stvari, kuće, beštije. ko će brže i lipše. na papiru je bilo svega, eh, (bit će i još svega, obećajen svečano, e... ) živili smo za crtanje i slike. na kraju sa toliko mašte završin tot di je maštovit svit, u inđinjerima, e... narafski, moren crtat sve, samo sebe nikad nikad ne... to se njanci probalo nije. sebi san, zasad, realna apstrakcija. ;)

jeman sriću da mi se pružila prilika upoznat jednega našega umjetnika (neću reć kojeg, samo da je o' vizualnih umjetnosti, znači nije pivač) ča je svitski poznat. njemu francuska nije bila nedosanjani san, vengo je tamo bija dosta. na kraju se vratija ovoj našoj stini, moru, suncu, maslini. za vrime jednega razgovora (volin razgovarat sa umjetnicima, to van je kreativan svit. od tajkuna (znan nažalost i neke tajkune, umjetnike znan na sriću), pak, bižin kad ih vidin, e) mi je ti umjetnik reka da moren učinit i sebe ako dovoljno dugo gledan svoj odraz u zrcalo. svitova mi je da poza tega vazmen lapiš i počnen crtat po sićanju, brez zrcala. hm? a možda jednon i proban, možda se usudin, ko će znat. krhko je znanje. za večeras evo tek početak gledanja sebe u zrcalo, ovo je slikano u zrcalo jedne spliske kavane o' jednega tajkuna i to na misto di i car gre pješke oli u kondutu, e... nima veze ča je kondut, zrcalo je veliko i dobro, pa gren počet sa sebon. poza tega mrvu minjan kolure i obrađujen sebe do crtarije na ovo škatule. igran se. evo ča je ispalo.

jednon ću, valjda, jemat dovoljno vrimena da u zrcalo gledan sebe, a poza gledanja po sićanju učinin autoportret. to kad mi ne bude ka jutros, e... nadan se samo da će autoportret jemat lipotu mladosti i da to neću činit kad mi bude sto godin, e... hm, zaradi čega i to ne bi bija životni cilj, a? doživit 100. godinu, a? još da je doživit to u zdravlju i kud ćeš bolje, a? e, zdravlje mi je najvažnije, zaradi tega ću se sve manje i manje sekirat. ozbiljno, e...

danas u zrcalo vidin da jeman džemper. to je bilo navečer, pozapodne su bili banji, e... mrvu burice me nije omelo, more je još lipo. danas u zrcalo vidin da triba poć ošišat mrvu ovu grivu. prirodna je, ne virujte zlin jezicima ča po gradu laju da mi tu trajnu na glavi plaća hdz, nisan ja u njanci jednu partiju, bogu fala, e... danas u zrcalo vidin da san čovik. dobro je to vidit. potribno je još uć do kraja u anatomiju lica, jema Umjetnik prav, triba dovoljno dugo (e koliko je to? more bit dok ne oćutiš sebe skroz, a?) gledat u zrcalo sebe i onda na bokun karte stavit sićanja. ako si se oćutija skroz, ona bi tribala prić u realno vrime, e... cili život bi se triba stivat u to vrime, vrime o' dvi tri ure crtanja, e... brez većih poteškoća. ;)

uajme, tekst mi postaje naporan, neće me svit razumit, hehe. evo ideja za novi : o identitetu pojedinca i samospoznaji, e... bit će riči u nastavcima ča slide, obećajen.

do tad ostavljan dva pitanja na razmišljanje.

možeš li se pogledat u zrcalo brez problema?

možeš li svakome na ovu zemaljsku balotu pogledat u joči brez problema?

moji su odgovori DA, DA.

triban još nać vrimena i petlje za dovoljno dugo gledat u zrcalo, za oćutit sebe skroz i poza tega bacit sebe na kartu po sićanjima ča će u ti momenat prić u realno vrime, ča će u ti momenat predstavljat cili život, bit bića, bit bitka.

Van Gogh je dobro uvatija sebe, ozbiljno. ma dobro je taj uvatija puno tega, e... a za života je slabo proda, tek jednu sliku. danas njegovi radovi pizaju puste pineze. život je katkad čudan, slavu daje tek poza vrimena života, ćuti li je čovik opće tad? ko će znat, krhko je znanje.

gren ča, dosta je notavanja za danas. jemate pozdrav!