e... u svom životu nisu jemali pravi kondut vengo štagod improvizacije o daščic i late, obično brez puno šesta. bila je mižerija. bližnje su pokapali  drito u zemlju, zamotane u sami lancun, brez kapsila. bila je mižerija.

mižerija, e...

život je na kršu bija težak, nije svima bila dosta srdela oli pura. šime je sa svoga otoka tako krenija u potragu za višje pinezi put jamerike oli australije, a mate se iz sela zaputija a di drugo vengo u njemačku.

u tim su zemljama neki uspili napravit cile biznise, a neki su tek uspili preživit, priranit fameju i donit koji šold doma. to je šold ča je zarađen na način da su se radili teški fizički poslovi koje domaći nisu tili radit i da se šparalo na sebi, njanci obid se ne bi izija, dosta je bila i feta kruva i salama iz butige.

e... sad slidi nazanimljiviji dil štorije. šta s tim šoldom, a? a narafski, kondut u kojemu će se sve blistat, a uza kondut i grobnica triba bit ka kuća jerbo neka se zna ko su šime i mate. narafski, ako je mate imoćanin, uložilo bi se malo i u polovnog mercedesa šta je i jopet van pameti, ali bolje od investicije luksuzni kondut + faraonska grobnica. 

da se odma razumimo, nisan kontra konduta, kondut triba, potribno je misto di ćeš činit potribu, ali čovik moj to misto triba bit uredno i čisto, ne tribaš sve pineze za koje si rinta o' jutra do sutra uložit u misto di se čini potriba. je li baš potriba da jemaš najskuplji lavandin, najskuplju četku za oprat kondut i kvake o' zlata, aaaa?

a grobnica? čovik se triba pokopat, razumi se, ali triba li ti baš keopsova piramida, a?

je li bilo pametno za kondut velebni i grobnicu faraonsku (i eventualno polovnu mečku) ostavit fameju, život, mladost, dušu i tilo po njemačkim bauštelima?

ne znan, kako kome, radin i ja puno u rvackoj, ali kondut mi je skroman (e fala ča pitate, pituran je, je, piturala ga ja, e. zanimljivo kako mi se par dana dok su radovi durali kumpanji nisu javljali, a sad me svako malo neko pita kako san - narafski, kad njima triba pomoć, onda mi se ne zaboravi niko javit; eto šta ti je čovik - zaradi tega: uzdaj se use i u svoje kljuse ti je poza svega šta san vidila u životu najbolji savit čovik moj), a ča se tiče grobnice još nisan za tu svrhu vazela kuću trokatnicu. jerbo, oli nije bolje pineze uložit u ono ča moreš ponit sa sebon kad partiš, a? znanje, jubav, putovanja (pa sa sebon nosiš sićanja), itd. eto to ti u valiže stane, sa tebon ne more poč mečka, a je li trokatnica ili normalan grob, e, oli ćeš ćutit?

bile su to desetljećima šimine i matine investicije, e... e a čovik moj, mogli su i drugovačije, ali su tili da se zna ko su oni i tako su danas po našim selima i mistima konduti ka u cara, a grobnice ka u faraona. ne virujete, a? a gledajte bokunić oko sebe, pa ćete vidit da jeman prav.