iz moje borše, by XVII

e... kako okreneš da okreneš prikovišje piza.

u mene recimo nima rezervnih bičava jerbo bičve još ni ne nosin, pribora za šivanje jerbo moren doč i doma štagod zakrpat, škatule prve pomoći (to nije loše jemat, ali mi ne stane u boršu), milijun tableta (jeman zdravlje, bogu fala), kolonji, parfumi, šminki, češlja (sredin se doma, ne šminkan se) i sl. ka u većine ženskih.

evo ča se obično more nač u moju boršu:

1. ključi

2. očale

3. sunčane očale

4. mobitel

5. takujin, kartice (novčanik)

6. timbar (pečat)

7. lapiši (olovke)

8. još lapiša (za rezervu)

9. lumbrela (oli kišobran- ništa nas ne smije iznenaditi, kiša pada svako malo)

10. vizitke

11. rokovnik

12. spremalica za vizitke

13. spremalica za račune, spise, dopise i sve ča triba nosit na banku, finu, u računovodstvo i sl.

14. digitalac

15. kupaći, bude i koji šugaman

16. spiza za maške, to mi je za ove ča ih trefin isprid kuće,  po ulici i na matejušku

17. papirnate sa vonjen i brez njega

18. labello

19. vip bonovi

20. krema za sunčanje

21. blokić

ajde, da ne lažen nađe se tot i još štagod. sigurno: žvake, sokić, libar  i još svašta nešta.

prikovišje, e... piza pa piza. tribalo bi štagod reducirat, e... samo, sve mi triba :o)

za puno kurjože: sliku oli litrat morete uvećat klikon