e...

kako se judi privuku, a?

na ovo pitanje odgovor još niko nije da, pa teško moren i ja, ali ča višje živin sve višje mislin da niki zajednički interesi (bolje rečeno zanimacije) ipak tribaju postojat među judima. ne može ako onoga drugoga ama baš ništa ne zanima o' onega ča zanima prvu peršonu, ma ke, e... vridi i obrat, e... narafski, ako baš sve volite isto, onda tot neko laže i to obično čini zaradi nekoga šporkoga interesa. jerbo da dvi peršone vole sve isto, e, tako, tako ne more nikad bit. zaradi čega, a? e zaradi tega jerbo nima dvi iste peršone na ovemu svitu. bog nas je sve učinija različitima i baš zaradi tega je svak poseban. zato, budi svoj(a)!  budi ono ča jesi!

gren reč još koju rič o' interesima. jeman  jednega susida ča ga nikad nisan vidila da je izaša vanka sa ženon, idu oni, ali svak za svojin poslon. kažu da su u sritnon braku. neka ih. zanimljivo mi je kod tih judi da oni pođu vanka, svak u svom điru, ali na isto misto, recimo merjan. susid jema jednu štaciju, susida drugu. i svaki dan tako pođu, ali svak za se... zajedno su kroza sve ove godine jerbo zajednički  interes tot ipak postoji, zove se merjan. virujen da jemaju i još koji, e...

apropo zanimacija dat ću i primjere iz života, najbolje moga:

volin se kupat, barenko šest miseci na godinu san u moru. ne moren zamislit život brez mora. e sad, neki kilavac ča uđe u more svakih  deset godin, a ostalo vrime doma leži na kauču, grinta i skuplja kile, nikako nije moj tip, ma ke, e...

isto tako kad vidin čovika ča jema trideset oli četrdeset godin, a da čini ufufufuf i ama baš sve mu je teško, teško mu se ujutro dignit, teško mu se obuč, teško mu je poč na posal, teško mu je radit, teško mu je živit, sve mu je teškooooooo, uajme, muko moja, daleko s takvin truton o' mene, e... jerbo, kako će takav poč sa menon u prirodu i na izlete, a? zaradi čega sad to, a? e pa zaradi tega ča ja ne sidin doma i ne kukan nad teškon sudbinon, vengo volin poč na merjan, na izlet, mrdnit se iz splita.

trut će vrlo vjerojatno nač nekakvu trutavicu pa će skupa na kauču grintat dobar dil života.

volin olivera, gibonnija, lukija, klape, more proč i stari dobri rock. e sad, eto stigli narodnjaci, ali ne bi fala. cajka nije moj đir.

očemo li se jubitelj cajki i ja složit, a? ni u ludilu, u obzir dolazi samo urbani đir, e...

itd.

ča je još važno, a? kemija. jema je ili nima. kontra nje ne moš. kad postoji, privlačnost je jača o' iti jedne sile u prirodi, kad je nima ni veli jože ne more izvuč situaciju.

ne virujen judima koji će reč da u njihovoj vezi nima kemije, da se fizički opće ne privlače, ali eto, on bija sam, naša nju da mu jema ko kuvat i oprat bičve, pa su s vrimenom izgradili niko poštovanje i eto oženili se... je, je... ma ke, malo morgen, e... kemije triba bit, brez tega ništa o' sriće.

a pinezi, a? pinezi su bitni za priživit. dobro, i za ugodnije priživit. slažen se, e... pinezi nisu srića, ako jubavi jema, pinezi more bit i manje; ako je nima, nije dosta ni takujin bil gatesa.

jučer gledan niku mater i čer isprid izloga zlatarije. čujen kako mater svituje čer da o' čovika ča je š njon u vezi izvuče šta je moguće skuplji prsten, a neka joj lipo kupi još i kadenu, rečine, bračolet. napravila mater čeri cili popis, tribat će budući zet s kuferon izač iz te zlatarije, e..

lipo. odličan odgoj, odlična uputa za daljni život sa čovikon kojega bi njena čer tribala volit, a ne mu gledat izvuč ča je moguće višje, e...

mučin, činin kuco. ko san ja da sudin? samo u sebi promislin kako to ne more bit srića i pođen ča. nisan dil takvoga svita. jerbo, jedno su interesi oli zanimacije, a drugo je interesenština. razlika je bitna, ali nismo svi isti. jema onih ča jemadu štumika, pa s nekin koga opće ne vole žive zaradi interesenštine. bit će je tako živila i mater te male, pa sad tako odgaja i čer.